བོད་སྐད་ཡིག་དེང་རབས་ཅན་ལ་བསྒྱུར་དགོས་ཀྱི་འདུག

ཕྱི་འདིའི་ཕྱི་ཚེས་ ༡༦ ཉིན་གྱི་དགོང་མོར་བོད་གཞུང་ཟློ་གར་ཁང་དུ་བོད་ཀྱི་སྐད་ཡིག་རྒྱུན་འཛིན་ཚོགས་པས་གོ་སྒྲིག་འོག བཙན་བྱོལ་གྱི་ལོ་ལྔ་བཅུའི་རིང་གི་བོད་སྐད་ཡིག་སྲུང་སྐྱོབ་སྐོར་གྱི་རིག་རྩལ་སྤྲོ་ཚོགས་ཐེངས་དང་པོ་བསྡུས་ཡོད་ལ། འདི་གའི་གསར་འགོད་པས་གནས་ཚུལ་དེ་དང་འབྲེལ་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་གྲགས་ལགས་སུ་བོད་ཀྱི་སྐད་ཡིག་སྐོར་ལ་བཅར་འདྲི་ཞུས་པ།

དྲི་བ། དང་ཐོག་སྐུ་ཉིད་ཀྱིས་བཙན་བྱོལ་སྤྱི་ཚོགས་སུ་བོད་སྐད་ཡིག་སྲུང་སྐྱོབ་སྐོར་གྱི་རིག་རྩལ་སྤྲོ་ཚོགས་ཐེངས་དང་པོ་བསྡུས་པའི་སྐོར་ངོ་སྤྲོད་ཐུང་ངུ་ཞིག་གནང་རོགས།

ལན། བོད་ཀྱི་སྐད་ཡིག་སྲུང་སྐྱོབ་ཐད་ཀྱི་རིག་རྩལ་སྤྲོ་ཚོགས་ཐེངས་དང་པོ་ཟླ་འདིའི་ཕྱི་ཚེས་ ༡༦ ཉིན་གྱི་དགོང་མོར་འཚོགས་པ་རེད། འདི་ལྟ་བུའི་སྤྲོ་ཚོགས་ཤིག་བསྡུ་དགོས་པའི་རྒྱུ་མཚན་གཙོ་བོ་བོད་ཀྱི་སྐད་ཡིག་རྒྱུན་འཛིན་ཚོགས་པ་བཙུགས་ནས་ལོ་ལྔ་འཁོར་བ་དང་། བོད་ཀྱི་སྐད་ཡིག་ཅེས་པའི་གསར་ཤོག་འདོན་སྤེལ་བྱས་ཏེ་ལོ་གསུམ་འཁོར་བའི་ཉིན་མོ་སྲུང་གཙིའི་ཆེད་ཡིན་ལ། གཉིས་ནས་སྔོན་མ་ནས་བོད་ཀྱི་སྐད་ཡིག་སྲུང་སྐྱོབ་ཟེར་བ་དེ་བྱེད་ལས་འདྲ་མིན་གྱི་སྟེང་ནས་སྤེལ་ཐུབ་ན་ཡག་པོ་འདུག་བསམ་མྱོང་ལ། ནམ་རྒྱུན་སྐད་ཡིག་སྲུང་སྐྱོབ་ཀྱི་ལས་འགུལ་སྤེལ་དུས་ཤོག་བུའི་སྟེང་ལ་ཡི་གེ་བྲིས་ཏེ་ཆེད་རྩོམ་གྱི་ལམ་ནས་མི་མང་ལ་སློབ་གསོ་རྒྱག་པ་དང་བགྲོ་གླེང་བྱེད་པ་ལྟ་བུའི་ལས་འགུལ་སྤེལ་གྱིན་ཡོད་མོད། ཐེངས་འདིར་ང་ཚོས་སློབ་གསོ་སྤེལ་སྟངས་ཀྱི་རྣམ་པ་བསྒྱུར་ཏེ། མང་ཚོགས་ལ་ཕར་བསྟུན་པའི་སྒོ་ནས་བྱ་འགུལ་འདི་སྤེལ་བ་རེད། སྤྱིར་བཏང་ནས་མི་ཞིག་ལ་མཚོན་ན་ཁོ་རང་ཉིད་ཀྱི་ནུས་པ་དང་བསྟུན་ནས་སློབ་གསོ་རྒྱག་པ་དང་བསྐུལ་སློང་། རེ་བ་བྱས་ན་ཁོའི་སེམས་ནང་འཇགས་སླ་བ་དང་དྲན་པ་མི་བརྗེད་པར་སེམས་ལ་གཏན་འཇགས་སུ་གནས་ཐུབ་གི་རེད། དེ་བཞིན་མི་མང་ཆེ་བ་རྩེད་མོ་དང་གླུ་གཞས་ལ་དགའ་བོ་ཡོད་སྟབས། རྣམ་པ་དེ་དག་གི་སྟེང་ནས་ཁོང་ཚོར་བོད་སྐད་ཡིག་ལ་སྲུང་སྐྱོབ་བྱེད་པ་དང་རེ་འབོད་བྱས་ན། ཁོང་ཚོའི་སེམས་ནང་འབབ་ཐུབ་པ་དང་ངེས་སླ་བ་ཡོང་གི་རེད་བསམ་ནས་ང་ཚོས་རིག་རྩལ་སྤྲོ་ཚོགས་འདི་བསྡུས་པ་ཡིན།

དྲི་བ། བོད་ཀྱི་སྐད་ཡིག་རྒྱུན་འཛིན་ཚོགས་པས་འདས་པའི་ལོ་ལྔའི་རིང་བོད་སྐད་ཡིག་སྲུང་སྐྱོབ་ཐད་ལས་འགུལ་ཁག་ཅིག་སྤེལ་བ་དང་། ལྷག་པར་དུ་སྐད་ཡིག་ཚགས་པར་སྟེང་གསལ་བསྒྲགས་དང་སྙན་ཞུའི་ཡི་གེ། ཟ་ཁང་དང་ཚོང་ཁང་གི་སྒོ་བྱང་སྟེང་གི་ཡིག་ནོར་རིགས་ཐེར་འདོན་བྱེད་ཀྱི་ཡོད་པ་རེད། འདི་ལྟར་འདས་པའི་ལོ་ལྔའི་རིང་གི་ཉམས་མྱོང་གཞིར་བཞག་ན་གྲུབ་འབྲས་གང་འདྲ་ཞིག་ཐོན་སོང་བསམ་གི་འདུག

ལན། ཡི་གེའི་དག་ཆའི་ཕྱོགས་ནས་གྲུབ་འབྲས་གང་འཚམ་ཡག་པོ་ཐོན་ཡོད་བསམ་གྱི་འདུག དཔེར་ན། ང་དང་ཐོག་ངྷ་སར་བསླེབས་དུས་སྒོ་བྱང་དང་གསལ་བསྒྲགས་རིགས་ཤིག་ཀློག་མི་ཤེས་པ་ལྟ་བུ་དང་། གོ་བརྡ་མ་འཕྲོད་པ། ཡིག་ནོར་གྱི་རིགས་མང་བོ་མཐོང་རྒྱུ་འདུག ཡིན་ནའང་། ང་ཚོས་བྱ་འགུལ་དེ་མགོ་བརྩམས་པ་ནས་ད་ལྟའི་བར་ལ་ཕྱིར་འདང་ཞིག་བརྒྱབ་ན། དེང་སྐབས་གསལ་བསྒྲགས་ཤིག་ཀློག་སྐབས། ཨོ། མི་འདིས་འདི་ལྟ་བུ་ཞིག་བཤད་ཀྱིན་འདུག་བསམ་སྟེ་ཀློག་ཐུབ་པ་ཞིག་དང་ཀློག་ན་གོ་ཐུབ་པ་ཞིག་ཆགས་སོང་། དེ་བཞིན་སྒོ་བྱང་སོགས་ཀྱི་སྟེང་གི་དག་ཆ་ཡང་གང་འཚམ་ཡག་པོ་ཡོང་གི་འདུག

སྤྱིར་ང་ཚོས་དག་ཐེར་བྱེད་སྐབས་ཀྱི་རྩ་འཛིན་ནི། དཔེར་ན། སྙན་ཞུ་དང་གསལ་བསྒྲགས་ཀྱི་རིགས་ཡིན་ཚེ་དེའི་ནང་དུ་ཡིག་ནོར་བཞི་ལས་བརྒལ་ན་ང་ཚོས་ཚགས་པར་སྟེང་བཀོད་ཀྱིན་ཡོད་ལ། སྒོ་བྱང་ལྟ་བུ་ཡིན་ཚེ་ཡིག་ནོར་གཅིག་མ་གཏོགས་མེད་ནའང་བཀོད་ཀྱིན་ཡོད། དེ་ནི་སྙན་ཞུ་དང་གསལ་བསྒྲགས་ནང་ཡིག་ནོར་གཅིག་གཉིས་རེ་འཆོར་སྲིད་པ་རེད་ལ། སྒོ་བྱང་ནང་དུ་ཚེགས་བར་ཐུང་ངུ་ལས་མེད་སྟབས་ཡིག་ནོར་གཅིག་ཡིན་ནའང་། ཚབས་ཆེན་དུ་མཐོང་སྟབས་ཡིན།

དྲི་བ། འདས་པའི་ལོ་ངོ་འདི་དག་རིང་ཁྱེད་རང་བཙན་བྱོལ་གྱི་གཞིས་ཆགས་ཁག་ཏུ་གནས་ཚུལ་རྒྱུས་ལོན་བྱེད་དུ་འགྲོ་མྱོང་ཡོད་པ་རེད། དེར་བརྟེན། ཕྱོགས་མཐའི་ས་གནས་ཁག་ཏུ་ཕྱིན་སྐབས་བོད་སྐད་ཡིག་སྲུང་སྐྱོབ་བྱས་པ་དང་། མང་ཚོགས་ཀྱིས་བོད་སྐད་ཡིག་བཀོལ་སྤྱོད་བྱེད་པའི་ཐད། ཁྱེད་རང་ཉིད་ལ་མཐོང་སྣང་གང་འདྲ་བྱུང་སོང་།

ལན། ང་སོང་བའི་གཞིས་ཆགས་ཁག་གི་ནང་ནས་དར་རྒྱས་གླིང་དང་ཀ་བློན་སྤུག་གཉིས་སྡུག་ཤོས་ལྟ་བུ་ཆགས་སོང་། དཔེར་ན། ཁོང་ཚོས་བལ་ཡུལ་དང་རྒྱ་གར། བོད་སྐད་སོགས་ཚང་མ་མཉམ་དུ་བསྲེས་ནས་བཤད་གི་འདུག མཚམས་རེར་ཅི་ཞིག་བཤད་ཀྱིན་པའང་མི་ཤེས་པ་ལྟ་བུ་ཡོང་གི་འདུག ཁོང་ཚོས་རང་གི་ཁྱིམ་མི་ནང་ཁུལ་དུ་སྐད་ཆ་བཤད་སྐབས་ཀྱང་ཅི་ཞིག་བཤད་ཀྱིན་པ་ཤེས་ཀྱི་མི་འདུག ངས་ཁོང་ཚོར་ཁྱེད་ཚོས་བཀོལ་བཞིན་པའི་སྐད་རིགས་འདི་ཅི་ཞིག་རེད་ཅེས་དྲིས་མྱོང་། སྤྱིར་ཁོང་ཚོའི་ཕ་མ་ཚང་མ་བོད་པ་རེད་ལ། ཁོང་ཚོས་ཀྱང་བོད་སྐད་བཤད་གི་ཡོད་ཟེར། དེ་བཞིན་ཁོང་ཚོའི་ངོས་ནས་རང་གིས་བོད་སྐད་བཤད་ཀྱིན་ཡོད་བསམ་གི་འདུག་མོད། ང་ཚོས་ཕར་ཉན་ན་གོ་གི་མི་འདུག

དེ་བཞིན་བདེ་སྐྱིད་གླིང་དང་ལྷོ་ཕྱོགས་སྦེལ་ཀོབ། ཧོང་སུར་ལྟ་བུ་ཡིན་ན་རྒན་རབས་པ་རྣམས་ཀྱིས་བོད་སྐད་གཙང་མ་བཤད་པ་ཅུང་ཙམ་ལེགས་པོ་འདུག་མོད། གཞོན་སྐྱེས་དང་དར་མའི་རིགས་ཀྱིས་བོད་ཡིག་ཕར་ཞོག སྐད་རང་སྟེང་ནས་ཉམས་ཆག་ཆེན་པོ་འགྲོ་གི་འདུག ནམ་རྒྱུན་སྐད་ཆ་བཤད་སྐབས་དབྱིན་ཧིན་གྱིས་བསྲེ་སྐད་མ་འདྲེས་པར་གོ་བརྡ་འཕྲོད་ཀྱི་མི་འདུག སྤྱིར་དེང་སྐབས་ཅ་དངོས་གསར་བ་མང་བོ་ཞིག་འཐོན་ཡོང་གི་ཡོད་པ་ལྟར་དེ་ཚོར་མིང་ཚིག་གསར་བའང་གང་འཚམ་ཞིག་ཡོང་གི་ཡོད། དེ་ཚོར་མི་སྒེར་རེ་རེ་བཞིན་སོ་སོ་རང་ཉིད་ཀྱིས་ངོས་ནས་འགན་ཁུར་ཏེ་སློབ་སྦྱོང་བྱ་དགོས་ཀྱི་འདུག དེ་གནད་འགག་ཆེན་པོ་རེད། ཚོགས་པ་སྒྲིག་འཛུགས་ཁག་དང་ལས་ཁུངས་ཁག མང་ཚོགས་བཅས་ཚང་མས་དོ་སྣང་བྱས་ཏེ། དེང་རབས་ཀྱི་བོད་སྐད་ཡིག་གཙང་མ་ཞིག་བཤད་ཐུབ་པ་དང་མི་རང་རང་གི་ཉིན་རེའི་སྤྱི་ཚོགས་འཚོ་བའི་ཁྲོད་བེད་སྤྱོད་གཏོང་ཐུབ་རྒྱུ་དེ་དངོས་གནས་གལ་ཆེན་པོ་རེད།

ཡང་ཐ་སྙད་གསར་བ་བེད་སྤྱོད་གཏོང་མཁན་ཞིག་གི་ངོས་ནས་བཤད་ན། སྐབས་རེར་དཀའ་ངལ་ཞིག་ལ་འཕྲད་ཀྱིན་ཡོད། དཔེར་ན། ངས་ཐ་སྙད་གསར་བ་ཞིག་བེད་སྤྱོད་གཏོང་གི་ཡོད་ནའང་། ཁྱོད་ཀྱིས་དེ་ཤེས་ཀྱི་མེད་ན། ང་རང་བཞིན་གྱིས་ལྐུག་པའི་ཚད་དུ་ལྷུང་ཡོད། དེ་ལྟར་མ་ཡིན་པར་ཐ་སྙད་གསར་བ་བེད་སྤྱོད་གཏོང་མཁན་དེར་རྒྱབ་སྐྱོར་གྱིས་ཚང་མས་ཁོང་ལ་འཕྱ་དམོད་དང་མཐོང་ཆུང་བྱེད་ཉན་གི་མི་འདུག མི་གཅིག་གི་སྟེང་ནས་ཀྱང་སློབ་སྦྱོང་རེག་རྒྱུ་མང་བོ་ཡོད། དེ་ལྟར་བྱས་ཏེ་རིམ་བཞིན་ང་ཚོས་དེང་རབས་བོད་སྐད་ཀྱི་ལམ་ཁ་ཞིག་ལ་བསྙེག་དགོས་པ་གལ་ཆེན་པོ་རེད།

ཉེ་ཆར་བོད་ནང་དུ་བོད་སྐད་ཡིག་སྐོར་ལ་ཚོགས་འདུ་ཞིག་འཚོགས་འདུག སྐབས་དེར་འཇུ་སྐལ་བཟང་ལྟ་བུའི་མཁས་པ་ཁག་ཅིག་གིས་ང་ཚོའི་སྐད་ཡིག་འདི་དེང་རབས་བོད་སྐད་ཀྱི་ལམ་དུ་འགྲོ་རྒྱུར་དགོངས་ཚུལ་ཤུགས་ཆེན་པོ་བཏོན་འདུག བཙན་བྱོལ་སྤྱི་ཚོགས་སུའང་དེང་རབས་བོད་སྐད་ཀྱི་ལམ་དུ་འགྲོ་དགོས་པ་གལ་ཆེན་པོ་མཐོང་གི་འདུག དེང་རབས་བོད་སྐད་ཟེར་དུས་དེང་དུས་ཀྱི་ཅ་དངོས་གསར་བ་མང་བོ་ཞིག་ཐོན་པ་ལྟར། ཅ་དངོས་གསར་བ་དེའི་མིང་ཚིག་དེ་ད་ལྟའི་སྤྱི་ཚོགས་ནང་བེད་སྤྱོད་གཏོང་ཐུབ་ཚེ་དེང་རབས་བོད་སྐད་ཆགས་སོང་བ་རེད། གལ་སྲིད་མི་ཞིག་གིས་དེང་རབས་བོད་སྐད་བཤད་མ་ཐུབ་ན་དེ་རང་བཞིན་གྱིས་རྗེས་ལུས་ཐེབས་སོང་བ་རེད།

དྲི་བ། མི་རིགས་ཤིག་གི་ངོས་ནས་འབྱུང་འགྱུར་གྱི་རེ་བ་བཅོལ་ས་ཉག་གཅིག་དེ་གསར་དུ་འཚར་ལོངས་འབྱུང་བཞིན་པའི་མ་འོངས་པའི་གཞོན་སྐྱེས་དག་རེད། དེས་ན་གཞི་རིམ་སློབ་གྲྭ་ཁག་གི་བོད་སྐད་ཡིག་སློབ་ཁྲིད་བྱེད་སྟངས་ཀྱི་སྟེང་ནས་གཞི་རིམ་སློབ་མ་དག་ལ་ནུས་པ་ཞིག་ཐོན་པ་དང་། མི་རབས་གསར་བ་དག་ལ་རེ་བ་ཞིག་མཐོང་གི་འདུག་གམ།

ལན། ང་ལྟ་བུ་ཡིན་ན་བོད་ནང་དུ་རེ་བ་ཤུགས་ཆེན་པོ་བཅོལ་ཡོད། བཙན་བྱོལ་དུའང་རེ་བ་མེད་པ་མིན་ཡང་། གཞི་རིམ་སློབ་གྲྭ་ཁག་གི་དགེ་རྒན་ཚོའི་ཤེས་ཡོན་གནས་སྟངས་དངོས་གནས་སྐྱོ་བོ་རེད། ཉེ་ཆར་ཞི་བདེ་ཟླ་བ་འབོད་པའི་སློབ་མ་ཞིག་ཆེད་དུ་ང་ལ་ཐུག་འཕྲད་བྱེད་དུ་བསླེབས་སོང་། ཁོས་སུ་ཇཱ་བོད་ཁྱིམ་དང་གྷོ་པལ་པུར་བོད་ཁྱིམ་གཉིས་ནས་སློབ་སྦྱོང་གནང་མྱོང་ཡོད་འདུག ཁོས་དགེ་རྒན་རྣམས་ཀྱི་ཤེས་ཡོན་གནས་ཚུལ་དངོས་གནས་སྐྱོ་བོ་རེད། གལ་སྲིད་སློབ་ཕྲུག་ཅིག་གིས་གནས་ཚུལ་དེ་ཡར་བཤད་ན་སློབ་ཕྲུག་དེའི་མདུན་ལམ་ལ་སྐྱོན་རྒྱག་གི་རེད། དེར་བརྟེན་སློབ་ཕྲུག་རྣམས་ཀྱིས་ཁ་གྲགས་ཐུབ་ཀྱི་མེད་སྟབས། ཁྱེད་ཚོ་སྐད་ཡིག་གི་ཆེད་ལས་པ་དག་གིས་དེའི་ཐད་ལ་ཞིབ་བཤེར་ཞིག་བྱ་རོགས་ཞེས་རེ་སྐུལ་བྱེད་ཀྱིན་འདུག དེ་བཞིན་ངས་ས་རཱ་མཐོ་སློབ་དང་ཤེས་རབ་དགའ་ཚལ་སློབ་གླིང་། བོད་ཁྱིམ་གྱི་སློབ་གྲྭ་ཁག་ཅིག་བཅས་ཀྱི་སློབ་མ་རྣམས་ལ་བསམ་ཚུལ་བརྗེ་རེས་བྱེད་མྱོང་ཡོད། ཁོང་ཚོས་ཀྱང་དེ་ལྟར་བཤད་ཀྱིན་འདུག དབྱིན་ཡིག་གི་སློབ་ཁྲིད་བྱེད་སྟངས་ཐད་ནས་འགྲིག་གི་འདུག་ཀྱང་བོད་སྐད་ཡིག་སློབ་ཁྲིད་བྱེད་སྟངས་ལ་མཚོན་ན། བོད་དགེ་དག་གི་ཤེས་ཡོན་གནས་ཚུལ་སྐྱོ་བ་དང་། འདོད་པ་མ་ཁེངས་པ་མང་བོ་འདུག་ཟེར།

དེར་བརྟེན་ང་ཚོའི་ཚོགས་པས་ངོས་ནས་ཉེ་ཆར་བོད་གཞུང་ཤེས་རིག་ལས་ཁུངས་ལ་སྙན་ཞུ་ཞིག་ཕུལ་ཏེ། ང་ཚོས་སློབ་གྲྭ་ཁག་ཏུ་ནང་སྦྱོང་བསྐྱར་ཞིབ་ཀྱི་ལས་རིམ་ཞིག་བྱ་འཆར་ཡོད་སྐོར་ཞུས་ཡོད། ང་ཚོས་ངོས་ནས་དེ་ལྟ་བུ་ཞིག་མ་གཏོགས་བྱ་ཐུབ་ཀྱི་མ་རེད། ང་ཚོས་ནང་སྦྱོང་བསྐྱར་ཞིབ་དེ་འཛིན་གྲྭ་ལྔ་བ་དང་དྲུག་པ། བདུན་པ་བཅས་ནས་མགོ་བརྩམས་ཏེ། སློབ་མ་རེའི་བདུན་ཕྲག་གཅིག་ནང་ནང་སྦྱོང་གང་འདྲ་ཞིག་འབྲི་གི་འདུག ནང་སྦྱོང་དེར་དགེ་རྒན་གྱིས་ཞིབ་བཤེར་གང་འདྲ་ཞིག་བྱེད་ཀྱིན་འདུག སློབ་མ་དེའི་ཡི་གེའི་དག་སྡེབ་དང་ཤེས་ཡོན་གནས་ཚུལ་གང་འདྲ་འདུག དེ་ལྟར་བྱས་ན་དགེ་སློབ་གཉིས་ཀྱི་སྤུས་ཀ་དེ་རང་བཞིན་གྱིས་དག་ཐེར་བྱ་ཐུབ་གི་རེད།

ང་ཚོས་དེ་ལྟར་སྙན་ཞུ་ཕུལ་ཏེ་ཉིན་གཅིག་གཉིས་དང་བདུན་ཕྲག་གཅིག་གཉིས། ཟླ་བ་གཅིག་གཉིས་མིན་པར་ལོ་ནས་ལོ་བསྟུད་དེ་བྱ་འགུལ་འདི་སྤེལ་རྒྱུར་བོད་གཞུང་ཤེས་རིག་ལས་ཁུངས་ཀྱིས་མཐུན་རྐྱེན་སྦྱོར་རོགས་ཞུས་ཡོད་ཀྱང་། བོད་གཞུང་ཤེས་རིག་ལས་ཁུངས་ཀྱིས་དེའི་སྟེང་ནས་ང་ཚོར་འདོད་བློ་ཁེངས་པའི་ལན་ཞིག་ཕེབས་མ་སོང་། དེ་ལ་བློ་ཕམ་ཡོད། དེར་བརྟེན་ང་ཚོས་སྙན་ཞུ་དེ་བཀའ་ཤག་དང་སྐུ་སྒེར་ཡིག་ཚང་ལའང་ཕུལ་ཏེ། རིམ་བཞིན་བྱ་འགུལ་འདི་ལག་བསྟར་བྱ་ཐུབ་པའི་རེ་བ་ཡོད། གལ་སྲིད་བྱ་འགུལ་འདི་ལག་བསྟར་བྱ་ཐུབ་ཚེ་ངའི་ངོས་ནས་བོད་སྐད་ཡིག་གི་རྨང་གཞི་ཡག་པོ་འཇོག་ཐུབ་རྒྱུར་གདེང་ཚོད་ཆེན་པོ་ཡོད།

དྲི་བ། དེང་སྐབས་བོད་ཕྱི་ནང་གཉིས་ཀར་བོད་སྐད་ཡིག་སྲུང་སྐྱོབ་སྐོར་ལ་སྔར་བས་དོ་སྣང་ཤུགས་ཆེ་རུ་འགྲོ་བཞིན་འདུག ཡིན་ནའང་། ཁྱེད་ཀྱིས་གཟིགས་ཚུལ་དུ་བོད་ནང་གི་བོད་མི་དང་བོད་ཕྱིའི་བོད་མི་གཉིས་ལས་སུས་བོད་སྐད་ཡིག་སྲུང་སྐྱོབ་ཐད་གལ་ཆེའི་ནུས་པ་འདོན་གི་འདུག

ལན། ཤུགས་ཆེ་ཤོས་བོད་གཞིས་སུ་རེད། འདིར་ང་ཚོ་ལ་རང་དབང་ཡོད་ཅེས་རང་དབང་དེར་ཁ་གཡར་ཏེ། རང་དབང་བེད་སྤྱོད་གཏོང་མ་ཤེས་པའི་སྒོ་ནས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེས་གསུངས་པ་ལྟར། རྒྱ་ནག་གིས་ཁྲིམས་ཀྱིས་གཏོར་བརླག་གཏོང་གི་ཡོད་ལ། ང་ཚོས་ངོས་ནས་རང་དབང་གི་སྒོ་ནས་གཏོར་བརླག་གཏོང་གི་ཡོད།

དེར་བརྟེན་བོད་ཕྱི་ཕྱོགས་ནས་བསྒྲུབ་དགོས་པ་དེ། བོད་ཀྱི་སྐད་ཡིག་འདི་ཁྲོམ་ར་ཅན་དུ་བསྒྱུར་ཐུབ་པ་དང་བོད་རང་གི་སྐད་ཡིག་གིས་བོད་རང་གི་སྤྱི་ཚོགས་ལ་ཞབས་ཞུ་བསྒྲུབ་ཐུབ་པ་ཞིག་ཏུ་བསྒྱུར་དགོས་ཀྱི་འདུག སྔོན་མ་ལྟ་བུར་མཚོན་ན་བོད་ཀྱི་སྐད་ཡིག་ཟེར་དུས་ཆོས་འདོན་སྤྱད་ཅིག་དང་དགོན་པ་གྲྭ་ཚང་ཁག་ཏུ་སློབ་གཉེར་བྱེད་པ་མ་གཏོགས། སྤྱི་ཚོགས་རང་གི་སྟེང་ནས་བཀོལ་སྤྱོད་བྱེད་ཐུབ་ཀྱི་མེད། ད་ལྟའི་དུས་འདིར་ང་ཚོར་རང་དབང་ཡོད་པ་རེད་ལ། རང་དབང་དེ་བེད་སྤྱོད་གཏོང་ཤེས་ན་བོད་སྐད་ཡིག་འདི་ཁྲོམ་ར་ཅན་དུ་བསྒྱུར་ཐུབ་གི་རེད། ཁ་སང་དེ་རིང་བོད་ཕྱི་ཕྱོགས་སུ་ཚོང་ལས་གཉེར་བཞིན་པའི་མི་མང་བོ་ཞིག་འདུག སོ་སོས་ངོས་ནས་བཟོ་གྲྭ་བཙུགས་ཏེ་དེའི་ནང་དུ་བོད་པའི་ཐོན་རྫས་མང་བོ་འདོན་གི་ཡོད། དཔེར་ན། ང་ཉེ་ཆར་བལ་ཡུལ་དུ་ཕྱིན་པ་ཡིན། བལ་ཡུལ་དུ་ཁྱིམ་ཚང་རང་གི་ངོས་ནས་ས་གདན་དང་གྱོན་གོས་ཀྱི་བཟོ་གྲྭ་བཙུགས་བཞག་པ་མང་བོ་འདུག ཡིན་ནའང་། ཐོན་རྫས་དེ་དག་སྟེང་དུ་བོད་ཡིག་ཡོད་པའི་ཚོང་རྟགས་དང་ཡང་ན་བོད་ཡིག་གི་འགྲེལ་བཤད་ཡོད་པའི་ཅ་ལག་སྣ་གཅིག་ཀྱང་མཐོང་མ་བྱུང་། དེ་ཚོ་བློ་ཕམ་དགོས་པ་ཞིག་རེད། བོད་ཡིག་འདི་བཞིན་རྒྱ་དཀར་ནག་དང་དབྱིན་སྐད་ལྟར་ཁྲོམ་ར་ཅན་དུ་བསྒྱུར་ཐུབ་ཚེ་སྤྱི་ཚོགས་ལ་གཡོ་འགུལ་ཞིག་ཐེབས་ཀྱི་རེད་ལ། དེས་སྤྱི་ཚོགས་ལ་རང་བཞིན་གྱིས་ཞབས་འདེགས་བསྒྲུབ་ཐུབ་གི་རེད། བོད་སྐད་ཡིག་སྲུང་སྐྱོབ་ཀྱི་རྨང་གཞི་ཡང་རང་བཞིན་གྱིས་འདང་ཚར་བ་རེད།

དེའི་ཐད་ནས་བོད་ཕྱི་ཕྱོགས་ཀྱི་ཚོང་ལས་པ་དང་བཟོ་གྲྭ་བཙུགས་ཡོད་མཁན་ཚོས། ཁོང་ཚོ་རང་གི་ཐོན་རྫས་སྟེང་བོད་ཡིག་རྐྱང་པ་འབྲི་མ་ཐུབ་ཀྱང་ཅ་དངོས་དེའི་མིང་དང་འགྲེལ་བཤད་དག་བོད་དབྱིན་གཉིས་ཀ་འབྲི་ཐུབ་ན་ཡག་པོ་འདུག དེ་བོད་ཡིག་སྟེང་ནས་བྲིས་འདུག འདི་ཚོང་ལས་ལ་འགྲོ་གི་མ་རེད་ཟེར་བ་ཞིག་མེད་ལ། བོད་ཕྱི་ཕྱོགས་སུ་དེའི་ཐད་རང་དབང་ཡོད་པ་རེད། བོད་ནང་ལྟ་བུར་མཚོན་ན་དེ་ལྟར་བྱ་རྒྱུར་རང་དབང་མེད་སའང་ཡོད། དཔེར་ན། གོང་རིམ་ནས་ཆོག་མཆན་དགོས་ཟེར་བ་ལྟ་བུར་ཁ་གཡར་ཏེ་བཀག་འགོག་བྱེད་ཀྱི་ཡོད།

དྲི་བ། དེང་སྐབས་བཙན་བྱོལ་སྤྱི་ཚོགས་ནང་དུ་ཕ་མ་དང་དགེ་རྒན། གྲོགས་པོ་བཅས་ཀྱིས་སློབ་མ་ཚོར་ཁྱོད་ཀྱིས་ངེས་པར་དུ་དབྱིན་ཡིག་སྦྱོང་དགོས། གལ་སྲིད་དབྱིན་སྐད་དབྱིན་ཡིག་བྱང་ཆུབ་པ་ཞིག་མ་ཤེས་ན་གཞུག་ཕྱོགས་ཁྱོད་ལ་ལྟོ་གོས་གཏམ་གསུམ་ཐད་ནས་དཀའ་ངལ་འཕྲད་གི་རེད་ཅེས་བསླབ་བྱ་རྒྱག་མཁན་ཡོད། དེའི་ཐད་དུ་ཁྱེད་ལ་ལྟ་ཚུལ་གང་འདྲ་འདུག

ལན། སྤྱིར་ལྟོ་རྒྱབ་ལ་མི་རེ་བའི་མི་ཞིག་མེད་ལ། ང་ཚོ་ཚང་མས་ལྟོ་རྒྱབ་ཀྱི་ཆེད་དུ་འབད་བརྩོན་བྱེད་ཀྱིན་ཡོད། ཡིན་ནའང་། སྐད་ཡིག་སྲུང་སྐྱོབ་བྱ་དགོས་པ་དེ་ཁྱོད་རང་ཉིད་བོད་ཀྱི་མི་རིགས་ཤིག་ཡིན་པའི་ཆ་ནས་ཁྱོད་ལ་འགན་ཞིག་ཡོད་པ་རེད། བོད་སྐད་བོད་ཡིག་སྦྱོང་གི་ཡོད་པ་དེ་ལྟོ་རྒྱབ་གཅིག་པུའི་ཆེད་དུ་ཡིན་ན་ནོར་འཁྲུལ་རེད་ལ། མ་སྦྱང་ན་འགྲིག་གི་རེད། ཡིན་ནའང་། དེའི་ཐད་དུ་སྔོན་མ་༧པཎ་ཆེན་རིན་པོ་ཆེ་མཆོག་གིས་ཤུགས་ཆེན་པོས་གསུངས་མྱོང་ཡོད། ཁྱེད་ཚོས་བོད་སྐད་མི་བཤད་ན་མི་བཤད། བོད་ཡིག་མི་སྦྱོང་ན་མི་སྦྱོང་། བོད་ལྭ་མི་གྱོན་ན་མི་གྱོན། ཡིན་ནའང་། ཁྱེད་ཚོའི་ཤ་དང་ཁྲག་དེ་གང་འདྲ་བྱ་རྒྱུ་ཡིན་ཞེས་རིན་པོ་ཆེ་ཁོང་སྐུ་རླུང་བཞེངས་ཏེ་བོད་ཀྱི་མཐོ་རིམ་སློབ་མ་ཚོར་བཀའ་བཀྱོན་གནང་དགོས་བྱུང་ཡོད། རྒྱུ་མཚན་གཅིག་རང་རེད། མི་ཞིག་ཡིན་ན་ལ་རྒྱ་མེད་པ་དང་རང་གི་མི་རིགས་ལ་ཞེན་ཁོག་མེད་ན་ཁྱེད་རང་བེམ་པོ་ལྟ་བུ་རེད་ཅེས་གསུངས་ཡོད།

དེ་བཞིན་མི་ཞིག་གིས་བོད་སྐད་བོད་ཡིག་སྦྱོང་བ་དེ་ལྟོ་གོས་གཏམ་གསུམ་གྱི་ཆེད་དུ་ཡིན་ན་མཚམས་བཞག་ན་ཡག་གི་རེད། མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཆེད་དུ་སྦྱོང་གི་ཡོད་ན་ཤུགས་རྒྱག་དགོས་པ་ཞིག་རེད། སྤྱིར་བོད་སྐད་བོད་ཡིག་ང་ཚོའི་སྤྱི་ཚོགས་སྟེང་བེད་སྤྱོད་མེད་ཟེར་གི་ཡོད་ལ། དེ་དངོས་ཡོད་གནས་ཚུལ་ཡང་རེད། དེར་བརྟེན་ངས་གོང་ནས་བོད་སྐད་ཡིག་དེ་ཁྲོམ་ར་ཅན་དུ་བསྒྱུར་དགོས་པ་རེད་ཟེར་དོན་འདི་རེད། གཉིས་ཐད་ནས་མི་སུ་ཡིན་རུང་རང་ཉིད་ལ་མི་རིགས་ཀྱི་ལ་རྒྱ་དང་རུས་པ་ཡོད་རྒྱུ་གལ་ཆེན་པོ་རེད། བོད་ཀྱི་ཆོས་དང་རིག་གཞུང་གི་རྩ་བར་ཐུག་པའི་བོད་སྐད་ཡིག་བེད་སྤྱོད་གཏོང་ན་སྤྱི་ཚོགས་དང་ཁོར་ཡུག་གིས་ནམ་ཡང་གཉའ་གནོན་ཡོང་གི་མ་རེད།

དཔེར་ན། བཀའ་ཁྲིའི་འོས་མིར་བཞེངས་ཀྱིན་པའི་བློ་བཟང་སེངྒེ་ལྟ་བུར་མཚོན་ན། ཁོང་ལོ་བཅོ་ལྔ་ཉི་ཤུའི་རིང་དབྱིན་ཇིའི་སློབ་གྲྭ་རྐྱང་པའི་ནང་དུ་བཞུགས་པ་རེད། ཡིན་ནའང་། རང་གི་མི་རིགས་ལ་ཤ་ཞེན་དང་དོ་སྣང་ཡོད་ན། ཉེ་ཆར་ཁོང་གིས་བཀའ་ཁྲིའི་བགྲོ་གླེང་དག་གི་སྐབས་སུ་དབྱིན་ཇིའི་ཚིག་གི་འགྲོ་སྟངས་ལྟར་གྱི་གསུང་མོལ་གཅིག་ཀྱང་གནང་མ་སོང་། ཡིན་ནའང་། རུས་པ་མེད་པའི་མི་དེ་ཚོར་རང་བཞིན་གྱིས་ཤུགས་རྐྱེན་ཞིག་ཐེབས་ཡོང་གི་ཡོད། བོད་སྐད་བཤད་སྐབས་ ༼ གང་ལ་འགྲོ་གི་ཡིན་ཁྱོད་ ༽ ཟེར་བ་ལྟ་བུའི་དབྱིན་ཇིའི་ཚིག་གི་འགྲོ་སྟངས་ཇི་བཞིན་ཚུར་ངོ་བཤུས་བརྒྱབས་པ་དང་། ང་འགྲོ་གི་ཡིན་ཟེར་སར་ང་བུད་ཐལ་ཟེར་བ་ལྟ་བུའི་དུས་གསུམ་གྱི་དབྱེ་བ་ཚུན་ཆད་ཉམས་ཆག་ཏུ་འགྲོ་གི་འདུག་ལ། དེའི་རིགས་མི་རང་ཉིད་ཀྱི་ངོས་ནས་འགན་མ་ཁུར་བ་དང་མི་རང་ཉིད་ཀྱི་ནོར་འཁྲུལ་རེད་བསམ་གྱི་ཡོད།

གསར་འགོད་པ། ཨ་རིག་འགྱུར་མེད།