གཅིག་གྱུར་སྐད་ཡིག་ཁྱབ་སྤེལ། རྫ་ཆུའི་ཟླ་བ།

ལོ་ངོ་སྟོང་ཕྲག་མང་པོའི་གོང་ནས་དར་བའི་ཡང་དག་པའི་རིག་གཞུང་འདི་དག་གི་རྩ་བའི་ཕན་ནུས་དང་འབྱུང་ཁུངས་ཞིབ་འཇུག་རིག་པས་ཤེས་རྟོགས་བྱས་ཏེ། དུས་རབས་གོང་འོག་གི་ལོ་རྒྱུས་ཁྲོད་དུ་བླ་མེད་མཛད་བཟང་འོད་སྟོང་འབར་བའི་ཡབ་མེས་ཚོའི་ཤུལ་བཞག་ནོར་བུའི་རིན་ཐང་བསམ་སྟེ། ད་ལྟའི་ང་ཚོའི་མི་རབས་འདིས་ཀྱང་མི་རིགས་རང་གི་ཁེ་ཕན་རྩ་དོན་ཆེད་འབད་བརྩོན་ཡང་དག་གི་སྒོ་ནས་གཅིག་གྱུར་སྐད་ཡིག་ཁྱབ་སྤེལ་འཕེལ་རྒྱས་ཀྱི་ཁ་ཕྱོགས་འཚོལ་རྒྱུ་འདི་གལ་ཆེན་རང་བཞིན་ལྡན་པའི་དོན་སྙིང་ཞིག་ཏུ་མཐོང་། 
དེའི་ཕྱིར་ང་ཚོ་བོད་ས་གནས་སྤྱི་ཡོངས་ལ་དབང་བའི་སྐད་ཡིག་ཁྱབ་སྤེལ་དགོས་ན་ཐོག་མར་ས་གནས་སོ་སོའི་དམངས་ཁྲོད་དང་སློབ་གྲྭ། དགོན་པ་སོགས་ཀྱི་ནང་ནས་གཅིག་གྱུར་སྐད་ཡིག་སྐོར་ཀྱི་བགྲོ་གླེང་ཚོགས་འདུ་དང་དེང་རབས་སྤྱི་ཚོགས་གསར་བའི་བྱ་དངོས་རྒྱུས་ལོན་བྱས་ཐོག་འདོད་རྗེས་གང་རུང་གི་ཐ་སྙད་སྡུ་རུབ་བྱས་ཏེ། དེའི་ནང་ནས་ཀྱང་མིང་དོན་འཚམ་མི་འཚམ་དང་གོ་བརྡ་སྤྲད་ཐུབ་མིན་ཀྱི་ཁྱབ་ཁོངས་ཆེ་ཆུང་སོགས་ཞིབ་འཇུག་བྱས་ཏེ། གཅིག་གྱུར་ཚིག་མཛོད་དཔེ་དེབ་འགྲེམ་སྤེལ་བྱ་རྒྱུ་དང་། དམིགས་བསལ་སྐབས་མ་གཏོགས་རྒྱུན་ལྡན་འཚོ་བའི་ཁྲོད་དུ་དབྱིན་སྐད་དང་རྒྱ་སྐད་སོགས་མི་བཤད་རྒྱུའི་དྲན་ཤེས་རྟེན་མིན་ལ་རག་ལུས་ཡོད། 
དེ་མཚུངས་སུ་གླུ་བ་དང་གླུ་ཚིག་རྩོམ་པོ། སྙན་དེབ་གསར་བ་འབྲི་མཁན་སོགས་ལ་མཚོན་ན་ཧ་ཅང་གིས་གལ་འགངས་ཆེ་ཞིང་སྤྱི་ཚོགས་ཐོག་གཅིག་གྱུར་སྐད་ཡིག་ཁྱབ་སྤེལ་འཕེལ་རྒྱས་ཕྱོགས་སུ་ཕན་གནོད་ཆེ་བའི་གཞི་རྩ་རླབས་ཆེན་ཞིག་ཆགས་ཡོད་པར་མ་ཟད། གླུ་བ་དང་གླུ་ཚིག་རྩོམ་པ་པོ་དེ་དག་གིས་ཁ་ཕྱོགས་གཙོ་བོ་དེ་ཡང་མི་རིགས་རང་གི་ཐུན་མིན་སྲོལ་རྒྱུན་རིག་གཞུང་རྒྱུ་རྩལ་གྱི་ཉམས་འགྱུར་འབུར་དུ་ཐོན་རྒྱུའི་གྲུབ་འབྲས་འཚོལ་རྒྱུ་གལ་ཆེན་པོ་རེད་འདུག་སྙམ། དེང་སྐབས་གཞན་སྐད་འདྲེས་པའི་གླུ་ཚིག་ཇི་སྙེད་ཅིག་གིས་ཞོ་ཡི་ནང་དུ་ཁྲག་བླུག་པ་བཞིན་བོད་སྐད་གཙང་མར་འབག་བཙོག་ཧ་ཅང་ཆེན་པོ་བཟོ་ཡི་འདུག དེ་ཡང་ལེགས་ཆར་མི་ལྟ་བར་སྐྱོན་ཆ་འཚོལ་རྒྱུར་དགའ་དྲགས་པ་མིན་ཡང་། དཔེར་ན་“བུ་ཆུང་ང་ལ་(Hello)གསུང་རོགས་གནང་དང,,ཞེས་པ་དང་། བུ་ངའི་(number)གཟིགས་རོགས་གནང་དང,,སོགས་ཀྱིས་མཚོན་པའི་ཉེས་སྐྱོན་མང་དག་ཅིག་མཐོང་རྒྱུ་ཡོད་པ་འདིའི་རིགས་གཅིག་གྱུར་སྐད་ཡིག་ཁྱབ་སྤེལ་དང་འཕེལ་རྒྱས་ཀྱི་བགྲོད་ལམ་གཏོར་བཤིག་གཏོང་བྱེད་གཙོ་བོ་ཆགས་ཡོད།

ད་དུང་རྩོམ་དེབ་གསར་བ་འབྲི་མཁན་ལ་མཚོན་ན་ཁ་ཤས་ཀྱིས་རང་མོས་སྙན་ངག་ཡིན་ཟེར་ཏེ་ (ཚིག་ཆག་བཙན་སྒྲིག) བྱས་ཏེ། ཡིད་ལ་གང་དྲན་དྲན་ཤར་མར་བྲིས་ཤིང་ཡུལ་ལུང་མི་གཅིག་པའི་སྐད་རིགས་འདྲ་མིན་སྒྲ་སྦྱོར་བྱས་ཏེ། དོགས་ཟོན་མེད་པར་རྩོམ་དེབ་འགྲེམ་སྤེལ་བྱེད་རྐྱང་བྱེད་བ་སོགས་ནི་མིག་རྒྱང་རིང་བའི་བློ་གྲོས་ཅན་དག་གིས་ཅི་ནས་ཀྱང་སྔོན་འགོག་ཀྱི་ཐབས་ཤེས་འདོན་རྒྱུ་གལ་ཆེན་པོ་རེད་འདུག་སྙམ། 

གཅིག་གྱུར་སྐད་ཡིག་ཁྱབ་སྤེལ་ཐད་དགོས་མཁོ་ཆེ་བའི་ཚིག་མཛོད་ཁག་གཅིག་འགྲེམ་སྤེལ་བྱས་ཟིན་པའམ་ཡང་ན་འགྲེམ་སྤེལ་བྱ་གྲབས་ཡོད་པ་སོགས་ཀྱང་། རང་གར་བཞག་པས་མི་ཕན་པར་དེས་ནང་གི་དེང་རབས་སྤྱི་ཚོགས་ཀྱི་བྱ་དངོས་གསར་བའི་ཐ་སྙད་དག་ལ་དོ་སྣང་བྱས་ཏེ། ཚོང་ལས་དང་འགྲིམ་འགྲུལ་གང་གི་སྐབས་སུ་ཡིན་ན་ཡང་བོད་རིགས་ཕན་ཚུན་བར་དངོས་དོན་ལག་སྟར་བྱ་རྒྱུ་འདིའང་གཙོ་བོ་ཡིན། སྤྱིར་དེང་སྐབས་ན་གཞོན་མང་དག་ཅིག་གིས་བོད་སྐད་ཀྱི་ཐ་སྙད་བཀོལ་རྒྱུ་ལས་གཅེར་བུར་སྲང་ལ་འགྲོ་རྒྱུར་ངོ་མི་ཚ་བའི་གནས་སྟངས་ཆགས་ཡོད་ན་ཡང་། དོན་དངོས་ཐོག་བོད་ཀྱི་སྐད་ཡིག་འདིའི་ལོ་རྒྱུས་དང་གྲུབ་ཆ་སྤུས་ཚད་གང་ཅིའི་ཐད་ནས་རྒྱལ་སྤྱིའི་ཐོག་ངོ་གནོང་མི་དགོས་པར་མ་ཟད། རྒྱལ་ཁབ་རིམ་པའི་ཆེད་ལས་མི་སྣ་དང་ལོ་རྒྱུས་མཁས་དབང་དག་གིས་མགྲིན་གཅིག་དབྱངས་གཅིག་གིས་བསྔགས་པའི་གནས་སུ་གྱུར་ཡོད། 

གཅིག་གྱུར་སྐད་ཡིག་ཡར་རྒྱས་ཀྱི་རུ་འདྲེན་གཙོ་བོ་དགོན་སྡེ་དང་སློབ་གྲྭ་སོགས་ཡིན་ལ། ཉམས་རྒུད་གཏོང་མཁན་ཡང་བཤད་གྲྭ་དང་སློབ་གྲྭའི་སློབ་མ་ཚོ་རེད། དེ་ཡང་དགེ་རྒན་ཀྱིས་སློབ་གསོ་གཏོང་ཕྱོགས་སྐོར་ཀྱི་གོམས་ཆ་དང་སློབ་ཕྲུག་སོ་སོས་རྒྱུན་ལྡན་འཚོ་བའི་ཁྲོད་དུ་ཉམས་སྣང་མ་བྱས་པའི་སྐད་ཆ་ཤན་བཞུགས་སྟངས་ཤིག་ཀྱང་རེད། དེས་རིམ་པས་ནང་མི་དང་གྲོགས་པོ་ཕན་ཚུན་བར་གཞན་སྐད་ཀྱི་ཐ་སྙད་བཀོལ་རྒྱུ་ཇེ་མང་ནས་ཇེ་མང་དུ་སོང་སྟེ་འདི་ལྟར་སྣང་མེད་དུ་བཞག་ན། འབྱུང་འགྱུར་ཕལ་ཆེར་ལོ་ཉིས་བརྒྱའི་རྗེས་སུ་བོད་སྐད་ཡང་དག་གི་བསྟན་པ་དེ་ཡང་འཇའ་ལྟར་ཡལ་ངེས་ཡིན་པའི་སྔོན་དཔག་བྱེད་ཐུབ། 

གཞིས་ལུས་བོད་རིགས་སྤུན་ཟླར་མཚོན་ན། ས་གནས་སོ་སོར་སྤྱི་སྐད་གཏན་འབེབ་ཆེད་གཉེར་ཀྱིས་ལས་དོན་བསྒྲུབས་དང་སྒྲུབ་བཞིན་ཡོད་པར་དགའ་བསུ་ཞུ་འོས་པ་ཞིག་རེད། འོན་ཀྱང་བྱེས་བཞུགས་བོད་རིགས་དག་དེ་དང་གཤིབ་ན། གཅིག་གྱུར་བོད་སྐད་བཤད་རྒྱུར་དེ་ཙམ་དོ་སྣང་མེད་པར་མཐོང་གི་འདུག སྐད་རིགས་གཞན་ཞིག་གི་སྒྲ་གདངས་དང་དག་ཆ་ཡོང་མིན་སྐོར་ཀྱི་གྲོས་བསྡུར་དང་སེམས་ཁུར་མ་གཏོགས་བོད་ཀྱི་བརྡ་སྤྲོད་གཞུང་ལུགས་ནང་གི་སྔོན་རྗེས་མིང་གསུམ་གྱི་སྒྲ་དོན་འཇུག་ཚུལ་དང་། རྟགས་འཇུག་ནས་གསུངས་པའི་སྐད་གདངས་དྲག་ཞན་ནམ། ཡང་ན་དེང་རབས་སྤྱི་ཚོགས་གསར་བའི་བྱ་དངོས་དང་མཐུན་པའི་བོད་སྐད་གཙང་མ་འགྲན་བསྡུར་ཞིབ་བཤེར་བྱ་རྒྱུ་ཉུང་ཉུང་རེད། དགེ་རྒན་ཚོས་མཚམས་རེར་སློབ་ཁྲིད་སྐབས་གཏམ་དཔེ་དང་དཔེར་རྗོད་སོགས་འདྲེན་དགོས་ཚེ་དབྱིན་སྐད་ཀྱི་ཐ་སྙད་བེད་སྤྱོད་གཏོང་རྒྱུ་ལས་བོད་སྐད་ཀྱི་ལམ་ནས་ཚིག་དེ་ལ་སྙན་ཆ་མི་འདུག་ཟེར་བའམ་ཡང་ན་སྟབས་བདེ་བོ་མི་འདུག་ཟེར་མཁན་ཉུང་ཉུང་མིན། དེའི་སྐྱོན་གང་ལ་ཐུག་ཡོད་ཟེར་ན་དགེ་རྒན་ཁོ་རང་ལ་བོད་སྐད་ཡིག་གི་ཆུ་ཚད་འདང་ངེས་མེད་པའི་ནང་རྟགས་ཕྱི་རུ་མངོན་པ་རེད་མ་གཏོགས་བོད་ཀྱི་སྐད་ཡིག་གི་ནུས་ཚད་དམའ་དྲགས་པ་གཏན་ནས་ཡིན་མི་སྲིད། 

དེ་ཡང་ལོ་ཙཱ་བ་ཀུན་ཀྱི་དབུས་ནས་མངོན་པར་འཕགས་པའི་སློབ་དཔོན་ཐོན་མི་སཱམ་བྷོ་ཊ་བྱོན་ནས་བཟུང་། དུས་རབས་བདུན་པའི་དཀྱིལ་དུ་སྨིན་གླིང་ལོ་ཆེན་དྷརྨ་ཤྲཱི་བྱོན་པའི་བར་ལོ་གྲངས་ཆིག་སྟོང་ལྷག་གི་རིང་བོད་ཀྱི་ལོ་ཙཱ་བ་སྔ་རྗེས་ཡོངས་རྫོགས་བསྡོམས་ན་བདུན་བརྒྱ་ཡས་མས་བྱུང་བ་དེ་ཚོས། རྒྱ་བལ་འབྲུག་གསུམ་དང་། ཁ་ཆེ་ཞང་ཞུང་། ལི་ཡུལ་བཅས་ཀྱི་སྐད་ནས་ནང་པ་སངས་རྒྱས་ཀྱི་གཞུང་ཆེན་ལྔ་དང་། གསོ་རིག སྐར་རྩིས། སྙན་ངག སྒྲ་རིག་པ། གཏམ་རྒྱུད། རྩོམ་ཡིག ཟློས་གར་བཅས་ནང་དོན་ཧ་ཅང་རྒྱ་ཆེ་ཞིང་རྣམ་གྲངས་མི་ཉུང་བའི་བཀའ་བསྟན་དེ་དག་བོད་སྐད་དུ་བསྒྱུར་ཡོད་པ་འདིས་ཀྱང་གསལ་བོར་ཤེས་ཐུབ། 

སྤྱིར་དེང་དུས་སུ་གསར་བྱུང་བྱ་དངོས་ཉིན་རེ་ལས་ཉིན་རེར་གོང་འཕེལ་དུ་འགྲོ་རྒྱུ་བགྲང་གིས་མི་ལངས་ཤིང་། དེ་དང་མཚམས་པའི་ཐ་སྙད་ཡང་གསར་དུ་འདོག་རྒྱུ་མ་གཏོགས་སྔ་ས་ནས་དེ་ལ་མིང་ཞིག་གྲ་སྒྲིག་བྱས་མེད་ན་ཡང་། བྱ་དངོས་གསར་བ་གང་འདྲ་ཞིག་ཡིན་རུང་དེ་ལ་མིང་གསར་བ་འདོག་རྒྱུར་གཞི་རྩའི་བོད་རང་གི་སྐད་ཡིག་གིས་འདང་ངེས་ཡིན་ལ། ང་ཚོ་མདོ་དབུས་ཁམས་གསུམ་དབྱེ་འབྱེད་མེད་པར་བོད་སྐད་ཡིག་རང་གི་ཐོག་ནས་དེང་དུས་ཀྱི་བྱ་དངོས་གསར་བའི་ཐ་སྙད་ཀྱི་སྟོང་ཆ་འགེང་རྒྱུ་དེ་དང་། ཕྱོགས་ཡོངས་ནས་གཅིག་གྱུར་སྐད་ཡིག་གི་ཆུ་ཚོད་གོང་མཐོར་བཏང་སྟེ། མི་རིགས་ཀྱི་སྲིད་དཔལ་རིག་གསུམ་དར་སྤེལ་གཏོང་རྒྱུ་དེ་ཕུགས་རྒྱང་རིང་བོར་ཞིབ་དཔྱོད་མཁས་པའི་བློ་གྲོས་ཀྱི་མིག་ཟུང་ཅེར་མཁན་དང་<<ཁོག་ན་སྙིང་དང་སྙིང་ན་དྲོད>>་ཡོད་པའི་ཤ་ཞེན་ལ་རྒྱའི་ཀི་རིང་འདེབས་མཁན་ཚོའི་ཕྲག་ཏུ་བབ་པའི་འོས་འགན་ཉག་གཅིག་རེད་འདུག་སྙམ།

༼ རྩོམ་པ་པོའི་ཟིན་བྲིས་ལས་བདམས་བཀོད་བྱས ༽