རྒྱ་ནག་གི་ཆེད་མཁས་པའི་སློབ་གསོའི་ཚོགས་ཆེན།

ཟླ་འདིའི་ཚེས་ ༢༨ ཉིན་ནས་བཟུང་རྒྱ་ནག་གི་ཆེད་མཁས་པའི་སློབ་གསོའི་ཚོགས་ཆེན་སྐབས་བདུན་པ་ཟེར་བ་པེ་ཅིན་ནས་འཚོགས་བཞིན་ཡོད་པ་དང་། ཚོགས་འདུའི་སྟེང་རྒྱལ་ཡོངས་ཀྱི་སློབ་གསོ་སྲིད་འཛིན་དོ་དམ་སྡེ་ཁག་དང་། སློབ་གྲྭ་ཆེ་འབྲིང་ཆུང་གསུམ། དེ་མིན་སློབ་གསོ་ཞིབ་འཇུག་ལས་ཁུངས་ཁ་ཤས་བཅས་ནས་ཡོང་བའི་ཆེད་མཁས་མི་སྣ་ལྔ་བརྒྱ་ལྷག་མཉམ་ཞུགས་བྱས་ཡོད་འདུག

ཁ་སང་ཕྱི་ཚེས་ ༢༩ ཉིན་མཚོ་སྔོན་བོད་སྐད་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༢༨ ཉིན་ནས་བཟུང་རྒྱ་ནག་གི་ཆེད་མཁས་པའི་སློབ་གསོའི་ཚོགས་ཆེན་སྐབས་བདུན་པ་ཟེར་བ་པེ་ཅིན་ནས་ཚོགས་མགོ་བརྩམས་ཡོད་པ་དང་། ཚོགས་འདུའི་སྟེང་། ཀྲུང་གོའི་མི་རབས་རྗེས་མར་སེམས་ཁུར་བྱེད་པའི་བྱ་བའི་ཨུ་ཡོན་ལྷན་ཁང་གི་མགོ་ཁྲིད་ཀུའུ་ཞིག་ལེན་གྱིས་གཏམ་བཤད་བྱས་པའི་ནང་། རྒྱལ་ཡོངས་སློབ་གསོ་བྱ་བའི་གྲོས་ཚོགས་ཚོགས་པ་དང་ ༼ རྒྱལ་ཁབ་ཀྱི་ ༢༠༡༠ ནས་ ༢༠༢༠ ལོའི་བར་གྱི་དུས་ཡུན་འབྲིང་རིང་གི་སློབ་གསོ་བཅོས་སྒྱུར་དང་འཕེལ་རྒྱས་འཆར་འགོད་རྩ་གནད ༽ ཅེས་པ་ལག་བསྟར་བྱས་པ་དེས། རང་རྒྱལ་གྱི་མ་འོངས་པའི་ལོ་བཅུའི་སློབ་གསོའི་ལས་དོན་གོང་དུ་སྤེལ་བར་ཁ་ཕྱོགས་གསལ་བོ་ཞིག་བསྟན་ཡོད་པ་དང་། རང་རྒྱལ་གྱི་མ་འོངས་པར་སློབ་གསོ་བ་མང་པོ་འབྱུང་རྒྱུར་ཐོབ་དཀའ་བའི་གོ་སྐབས་བཟང་པོ་ཞིག་བསྐྲུན་ཡོད་སྟབས། སློབ་གསོ་བཅོས་བསྒྱུར་དང་སློབ་གསོ་འདྲ་མཉམ་དུ་བཏང་བ་དང་མཉམ་དུ། ང་ཚོས་སྤྱི་ཚོགས་ཡོངས་སུ་དགེ་རྒན་ལ་བརྩི་འཇོག་དང་སློབ་གསོ་གཙིགས་སུ་འཛིན་པའི་རྣམ་པ་བཟང་བོ་ཞིག་བསྐྲུན་པར་འབད་བརྩོན་བྱས་ཏེ། ལྟ་བ་ཡང་དག་པའི་སློབ་གསོ་བ་སྐོར་ཞིག་སྐྱེད་སྲིང་བྱ་དགོས་ཞེས་བརྗོད་འདུག 

ཕྱི་ལོ་ ༢༠༡༠ ལོ་ནས་ ༢༠༢༠ བར་གྱི་དུས་ཡུན་འབྲིང་རིང་གི་སློབ་གསོའི་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད་ཅེས་པ་ནི། ད་ལོའི་ཟླ་བདུན་པའི་ནང་རྒྱ་ནག་རྒྱལ་ཡོངས་ཀྱི་སློབ་གསོའི་ཚོགས་ཆེན་ཚོགས་ཏེ་ཐག་གཅོད་བྱུང་བའི་སྐད་གཉིས་སློབ་གསོའི་སྲིད་ཇུས་གསར་བ་ཞིག་ཡིན་ལ། འདི་ལོའི་ཟླ་ ༩ ཚེས་ ༡༢ ཉིན་མཚོ་སྔོན་ཞིང་ཆེན་དམར་ཤོག་ཚོགས་པ་དང་ཞིང་ཆེན་སྲིད་གཞུང་གཉིས་མཉམ་འབྲེལ་ཐོག ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་ཐེངས་དང་པོ་དེ་སྐོང་ཚོགས་བྱས་ཏེ་མཚོ་སྔོན་ཞིང་ཆེན་དུ་དངོས་སུ་ལག་བསྟར་བྱ་རྒྱུའི་གཏན་འབེབས་བྱས་རྗེས།  ཟླ་ ༩ ཕྱི་ཚེས་ ༡༩ ཉིན་མདོ་སྨད་རེབ་གོབ་ནས་མགོ་བརྩམས་ཏེ། མདོ་སྨད་ས་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་གྱིས་སློབ་མ་སྟོང་ཕྲག་མང་བོས་ངོ་རྒོལ་བྱས་ཡོད་པར་མ་ཟད། རྒྱ་ནག་གི་རྒན་ཡོལ་ལས་བྱེད་ཁག་ཅིག་གིས་ཤེས་ཡོན་སྲིད་ཇུས་གསར་བ་དེ་ནི་བོད་ལྟ་བུའི་གྲངས་ཉུང་མི་རིགས་ཁག་རྩ་མེད་བཟོ་བའི་སྲིད་ཇུས་གསར་བ་ཞིག་ཡིན་པར་ངོས་འཛིན་གྱིས་གོང་རིམ་ལ་ཞུ་གཏུག་ཡི་གེ་ཡང་ཕུལ་ཡོད།  

ཡིན་ནའང་། ཐེངས་འདིར་པེ་ཅིན་དུ་ཚོགས་པའི་རྒྱ་ནག་གི་ཆེད་མཁས་པའི་སློབ་གསོའི་ཚོགས་ཆེན་སྟེང་། རྒྱ་ནག་གཞུང་གིས་མུ་མཐུད་སྐད་གཉིས་ཤེས་ཡོན་སྲིད་ཇུས་གསར་བ་འདིའི་སྟེང་དུ་ཤུགས་སྣོན་རྒྱག་རྒྱུ་ཡིན་པར་མ་ཟད། མ་འོངས་པར་ལྟ་བ་ཡང་དག་པའི་སློབ་གསོ་བ་སྐོར་ཞིག་སྐྱེད་སྲིང་བྱེད་པའི་གོ་སྐབས་བཟང་བོ་ཞིག་སྐྲུན་ཡོད་ཟེར།

འདི་གའི་གསར་འགོད་པས་དེའི་སྐོར་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་གསུངས་དོན། ཁ་སང་ ༢༨ ནས་ཉིན་གསུམ་རིང་གི་ཚོགས་འདུ་དེ་གཙོ་བོ་རྒྱ་ནག་གི་སློབ་གསོ་རིག་པའི་སྐོར་ལ་མཁས་དབང་ཚོའི་བགྲོ་གླེང་ཚོགས་འདུ་ཞིག་ཆགས་འདུག ཡིན་ནའང་། ཚོགས་འདུ་དེ་རྒྱ་ནག་གཞུང་འབྲེལ་གྱི་སློབ་གསོའི་སྡེ་ཚན་དང་། སློབ་གྲྭ་ཆེ་འབྲིང་ཆུང་གསུམ་གྱི་ཞིབ་འཇུག་སྡེ་ཚན་སོགས་མཉམ་དུ་ཡོད་སྟབས། གཞུང་འབྲེལ་གྱི་ངོ་བོ་ལྡན་པའི་ཚོགས་འདུ་ཞིག་ཀྱང་ཆགས་ཡོད་པ་རེད།

ཚོགས་འདུ་དེ་ཚོགས་དོན་གཙོ་བོ་ད་ལོའི་ཟླ་བདུན་པའི་ནང་རྒྱ་ནག་རྒྱལ་ཡོངས་ཀྱི་སློབ་གསོའི་ཚོགས་ཆེན་ཚོགས་པ་དང་། ཚོགས་ཆེན་སྟེང་འབྱུང་འགྱུར་གྱི་ལོ་བཅུ་སྟེ་ ༢༠༡༠ ལོ་ནས་ ༢༠༢༠ ལོའི་བར་དུ་རྒྱ་ནག་སྤྱི་ཡོངས་ཀྱི་སློབ་གསོའི་འཕེལ་ཕྱོགས་དང་སློབ་གསོའི་སྲིད་ཇུས་གསར་བ་ཞིག་ལག་བསྟར་བྱ་རྒྱུ་གཏན་འབེབས་བྱུང་བ་དང་། དེ་རིམ་པ་བཞིན་དུ་མར་ཡོང་དུས་མཚོ་སྔོན་གཙོས་བོད་ས་ཁུལ་ཡོངས་སུ་སྐད་གཉིས་སློབ་གསོའི་སྲིད་ཇུས་གསར་བ་ལག་བསྟར་བྱས་པར་ངོ་རྒོལ་གྱི་ལས་འགུལ་སྤེལ་དགོས་པའི་རྐྱེན་རྩ་ཐུག་ས་དེ་རེད། ཅེས་གསུངས།

ཡང་ཁོང་ལ་སྐད་གཉིས་སློབ་གསོའི་སྐོར་གྱི་གནད་དོན་དེར་མཚོ་སྔོན་གཙོས་བོད་ནང་གི་ས་ཁུལ་ཁག་མང་བོའི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མས་ངོ་རྒོལ་དང་། འདོད་མོས་མེད་པའི་རྣམ་འགྱུར་བསྟན་ཡོད་སྟབས། ཐེངས་འདིའི་ཚོགས་ཐོག་ནས་སྲིད་ཇུས་གསར་བ་དེར་བཟང་ཕྱོགས་ནས་བསྒྱུར་བ་འདྲ་གཏོང་སྲིད་དམ་ཞེས་དྲིས་པར། ཁོང་གིས་གསུངས་དོན། རྒྱ་ནག་གིས་ད་ལྟའི་བར་དུ་མང་ཚོགས་ཀྱི་རེ་འདུན་བཏོན་པར་བསམ་ཤེས་བྱས་པ་ཞིག་མེད། དཔེར་ན། བོད་ནང་དུ་ལས་འགུལ་ཆེ་ཤོས་མཚོ་སྔོན་དང་དེ་ནས་ཀན་སུའུ་ཞིང་ཆེན་ནང་སྤེལ་བ་རེད། མཚོ་སྔོན་ཞིང་ཆེན་ནང་ལས་འགུལ་དེ་སྤེལ་རྗེས་མཚོ་སྔོན་ཞིང་ཆེན་གྱི་དམར་ཤོག་གིས་ཏང་གི་ལས་བྱེད་ཚོགས་འདུ་ཟེར་བ་ཞིག་བསྐངས་ཤིང་།  ཚོགས་འདུའི་ཐོག་ད་ལྟ་ང་ཚོས་ལོ་བཅུའི་སློབ་གསོའི་སྲིད་ཇུས་དེ་རྒྱ་ནག་དབུས་གཞུང་གིས་གཏན་འབེབས་བྱས་པའི་སྲིད་ཇུས་ཤིག་རེད། སྲིད་ཇུས་དེ་ངེས་པར་དུ་ལག་བསྟར་བྱེད་དགོས་པ་རེད་ཅེས་བརྗོད་དེ། ད་ལྟ་མཚོ་སྔོན་ཞིང་ཆེན་ནང་ལག་བསྟར་བྱེད་ཀྱིན་པའི་སྐད་གཉིས་སློབ་གསོའི་སྲིད་ཇུས་དེར་འགྱུར་བ་རྩ་བ་ནས་བཏང་མེད། དེ་ཆབ་སྲིད་ཀྱི་གནད་འགག་ཅིག་ཡིན་པ་དང་ཁོང་ཚོས་སྐད་ཡིག་གཅིག་གྱུར་བཟོ་བ་དེ་རྒྱལ་ཁབ་ཀྱི་མ་འོངས་པའི་ཐབས་ཇུས་རང་བཞིན་གྱི་སྲིད་ཇུས་ཤིག་ཡིན་ལབ་ཀྱིན་ཡོད།

དེ་ལ་ག་དུས་ཡིན་རུང་འགྱུར་བ་གཏོང་རྒྱུ་མིན་ཐོག ཚང་མས་བསམ་བློ་གཅིག་གྱུར་གྱི་ཐོག་ནས་ལག་ལེན་ཏུ་བསྟར་དགོས་ཟེར་གྱིན་ཡོད། དེ་ལྟར་བརྗོད་དུས། དོན་དག་དེ་ནི་རྒྱ་ནག་དབུས་གཞུང་གི་སྲིད་ཇུས་ཤིག་ཡིན་པ་དང་། ས་གནས་ས་ཐོག་ཏུ་ལག་བསྟར་བྱ་རྒྱུ་ཡིན་པ། དེའི་སྟེང་ཐེངས་འདིའི་མཁས་དབང་ཚོའི་སློབ་གསོའི་ཚོགས་འདུའི་སྟེང་རྒྱ་ནག་དབུས་གཞུང་གིས་གཏན་འབེབས་བྱས་པའི་ ༢༠༡༠ ལོ་ནས་ ༢༠༢༠ ལོའི་བར་གྱི་རྒྱ་ནག་གི་སློབ་གསོའི་སྲིད་ཇུས་དེ་ཡང་དག་པ་ཡིན་ཚུལ་དང་། ངེས་པར་དུ་ལག་ལེན་དུ་བསྟར་དགོས་ཚུལ་གྱི་ཐོག་ཏུ་བབ་ནས་བགྲོ་གླེང་བྱེད་གི་རེད། ཅེས་དང་།  

འདི་ལྟར་ཉིན་གསུམ་རིང་ཚོགས་པའི་རྒྱ་ནག་གི་ཆེད་མཁས་པའི་སློབ་གསོའི་ཚོགས་ཆེན་སྐབས་བདུན་པའི་སྟེང་། རྒྱལ་ཡོངས་ཀྱི་སློབ་གསོ་སྲིད་འཛིན་དོ་དམ་སྡེ་ཁག་དང་། སློབ་གྲྭ་ཆེ་འབྲིང་ཆུང་གསུམ། དེ་མིན་སློབ་གསོ་ཞིབ་འཇུག་ལས་ཁུངས་ཁ་ཤས་བཅས་ནས་ཡོང་བའི་ཆེད་མཁས་མི་སྣ་ ༥༠༠ ལྷག་མཉམ་ཞུགས་བྱས་ཏེ། སྐད་གཉིས་སློབ་གསོའི་སྐོར་ལ་བགྲོ་གླེང་གནང་ཡོད་ནའང་། སྐད་གཉིས་སློབ་གསོའི་སྐོར་ལ་བཟང་ཕྱོགས་ཀྱི་བསྒྱུར་བ་གང་ཡང་གཏོང་རྒྱུ་མིན་པར། རྒྱ་ནག་གི་སྐད་ཡིག་སློབ་གསོའི་སྲིད་ཇུས་མུ་མཐུད་མཁྲེགས་འཛིན་བྱེད་ངེས་རེད་ཅེས་གསུངས།

གསར་འགོད་པ། ཨ་རིག་འགྱུར་མེད།