ཨོ་སི་ཊོ་ལི་ཡའི་རྒྱ་བོད་མཛའ་འབྲེལ་ཚོཊ་པ་དང་བོད་གཞུང་དོན་གཅོད་གཉིས་ཀྱི་གོ་སྒྲིག་འོག ཕྱི་ཚེས་ ༡༡ ཉིན་ཨོ་སི་ཊོ་ལི་ཡར་བོད་རྒྱ་མི་རིགས་ཀྱི་ཞི་བདེ་དང་འཆམ་མཐུན་ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཤིག་ཚོགས་ཡོད་ཅིང་། ཚོགས་འདུ་དེར་ཨོ་སི་ཊོ་ལི་ཡའི་བོད་གཞུང་དོན་གཅོད་དྭགས་པོ་བསོད་ནམས་ནོར་བུ་ལགས་དང་། དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟླ་སྒྲོན། དེ་བཞིན། ཡུལ་དེར་གནས་སྡོད་རྒྱ་རིགས་རྩོམ་པ་པོ་དང་མང་གཙོ་དོན་གཉེར་བ། སློབ་ཕྲུག ཨོ་སི་ཊོ་ལི་ཡའི་རྒྱ་ནག་གཞུང་ཚབ་ཀྱི་དྲུང་ཆེ་ཟུར་པ་སོཊ་ཁྱོན་མི་ ༧༠ ཙམ་མཉམ་ཞུགས་བྱས་ཡོད་འདུག
ཚོགས་འདུ་དེ་ནི་བོད་རྒྱ་མི་རིགས་བར་བསམ་ཚུལ་བརྗེ་རེས་བྱ་རྒྱུ་དང་ཕན་ཚུན་བར་གོ་བ་ལོག་ཡོད་པ་རྣམས་སེལ་ཆེད་དུ་ཡིན་སྐོར་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་མེ་ལི་ཆི་ཡིས་བརྗོད་དོན། ཕྱི་ལོ་ ༢༠༠༨ ལོར་བོད་ནང་དུ་ཞི་བའི་ངོ་རྒོལ་བྱུང་རྗེས་རྒྱ་གཞུང་གིས་བོད་མིར་དམ་དྲག་ཤུགས་ཆེན་བྱས་ཡོད་པ་མ་ཟད། བོད་རྒྱ་མི་རིགས་གཉིས་བར་དཀྲུག་ཤིང་བརྒྱབ་སྟེ་མི་རིགས་འབྲེལ་བར་འགལ་ཟླ་ཆེན་པོ་བཟོས་ཡོད་སྟབས། ཐེངས་འདིར་ང་ཚོས་མི་རིགས་གཉིས་ཀྱི་བསམ་བློའི་གོ་རྟོགས་ཆེ་རུ་གཏོང་ཆེད་རིག་གཞུང་བརྗེ་རེས་ཀྱི་ལྷན་ཚོགས་འདི་གོ་སྒྲིག་བྱས་པ་ཡིན་ཞེས་བཤད་འདུག
ཐེངས་འདིའི་བོད་རྒྱ་མི་རིགས་ཀྱི་ཞི་བདེ་དང་འཆམ་མཐུན་ཞེས་པའི་ཚོགས་འདུ་དེའི་སྟེང་། ཚོགས་བཅར་བ་ཚོས་བོད་ཀྱི་ནང་ཆོས་དང་རིག་གཞུང་། བོད་ནང་གི་འགྲོ་བ་མིའི་ཐོབ་ཐང་དང་ཁོར་ཡུག རྒྱ་ནག་མང་གཙོ་དང་བོད་རྒྱ་འབྲེལ་མོལ་བཅས་ཀྱི་སྐོར་བགྲོ་གླེང་ལྷུག་པོར་གནང་ཡོད།
གསར་འགོད་པ། དཔལ་ལྡན།
ཨོ་སུ་ཁྲོ་ལེ་ཡ་ན་ཡོད་པའི་བོད་མི་ཚོ་ཕྱི་རྒྱལ་ཁག་ན་ཡོད་པའི་བོད་མི་རྣམས་ཀྱི་ནང་ནས་བོད་དོན་ལས་མགུལ་མི་བྱེད་མཁན་ཨང་ཐ་མ་དང་། རྒྱ་དགའ་ཨང་དང་པོ་ཆགས་ཡོད། ཁོས་ཚོའི་ལས་མགུལ་འདིས་མཇུག་འབྲས་ལ་བལྟ་རྒྱུ་ཡིན། ད་དུང་འདིའི་དམིགས་ཡུལ་ཅི་ཡིན་ངོས་ཟིན་མེད།