སྤྱི་ཚོགས་ཆུང་ལ་སྐད་གྲགས་ཆེ་བའི་ངྷ་རམ་ས་ལ།

སྔོན་ཆད་སྟག་གཟིག་དོམ་དྲེད་དང་། སྡིག་སྲིན་དུག་སྦྲུལ་གྱི་ཚང་དུ་གྱུར་པའི་རྒྱ་གར་བྱང་ཕྱོགས་ངྷ་རམ་ས་ལ་ནི། རིམ་བཞིན་འཛམ་གླིང་ཞི་བདེ་ལས་དོན་ལྟེ་གནས་ཤིག་དང་། གྲུབ་མཐའ་རིས་མེད་ཆོས་ཀྱི་གདན་ས་ཞིག སྲིད་འབྱོར་རིག་གསུམ་འགྲོ་དོན་སྒྲུབ་ས་ཞིག འཛམ་གླིང་ཤར་ནུབ་མཁས་མང་འདུ་ས་ཞིག ཡུལ་སྐོར་སྤྲོ་འཆམ་ལས་རིགས་འཕེལ་ས། ཕྱོགས་མཐའ་ཀུན་གྱི་སྤྲང་ཚོགས་འཛོམ་ཡུལ་ཞིག་ཏུ་གྱུར་ཏེ། རྒྱལ་ཁབ་འདྲ་མིན་དང་མི་རིགས་སྣ་ཚོགས་ཀྱི་སྐུ་མགྲོན་ཁྲི་སྟོང་མང་པོ་པད་མའི་ཚལ་དུ་བུང་བའི་ཚོགས་བཞིན་ལོ་རེ་ནས་ལོ་རེར་ཇེ་མང་དུ་འགྲོ་བཞིན་ཡོད།

འོན་ཀྱང་། རྒྱ་གར་བྱང་ཕྱོགས་ངྷ་རམ་ས་ལ་ནི། ས་བབས་མཐོ་ཞིང་ཁོད་རྒྱ་ཆུང་བ། འགྲིམ་འགྲུལ་སྟབས་མི་བདེ་བ་སོགས་ཀྱི་དབང་གིས་ས་འདིའི་འཚོ་བའི་ཡོ་བྱད་གྱི་རིན་གོང་ཧ་ཅང་མཐོ་ལ། སྔོ་ཚལ་དང་གྲོ་ཕྱེ། འབྲས། ཤ སྣུམ་སོགས་རྒྱུན་སྤྱོད་ཟས་རིགས་ཀྱི་རིན་གོང་ལོ་རེ་ནས་ལོ་རེར་ཇེ་མཐོར་འགྲོ་བཞིན་ཡོད་པ་དང་། ཁང་གླ་དང་ཟས་སོང་མཐོ་དྲགས་པའི་དབང་གིས་མི་མང་པོ་ཞིག་སྤྲང་པོའི་འཚོ་བ་ལས་ཐར་མྱོང་མེད། སྔོ་ཚལ་གྱི་རིན་གོང་ལ་མཚོན་ན། ལོ་གཅིག་གི་དུས་བཞིའི་འགྱུར་ལྡོག་ལྟར་མཚམས་རེར་རིན་གོང་མཐོ་ཞིང་། མཚམས་རེར་ཅུང་དམའ་བོ་ཡིན། དགུན་ཁའི་དུས་ཚིགས་ནི་སྔོ་ཚལ་གྱི་རིན་གོང་དམའ་ཞིང་སྤུས་ཀ་བཟང་ཤོས་ཀྱི་དུས་ཤིག་ཡིན།

འདི་གའི་གསར་འགོད་པས་ངྷ་སའི་ཁྲོམ་སྲང་གི་སྔོ་ཚལ་སྐོར་ཞིག་གི་རིན་གོང་དང་། མང་ཚོགས་ཀྱི་འཚོ་བའི་གནས་བབ་ལ་རྒྱུས་ལོན་རགས་ཙམ་བྱས། རྒྱ་གར་སྔོ་ཚལ་བཙོང་མཁན་ཇཱམ་མན་སི་ལགས་ལ་ཟླ་འདི་འགའི་སྔོ་ཚལ་གྱི་རིན་གོང་སྐོར་བཅར་འདྲི་ཞུས་སྐབས་ཁོང་གིས་བརྗོད་དོན། ང་རང་མེག་གྷན་གྱི་ཡུལ་མི་ཞིག་ཡིན་ལ། ད་བར་སྔོ་ཚལ་བཙོང་སྟེ་མི་ལོ་ ༡༠ ཙམ་ཕྱིན་སོང་། ཟླ་རེའི་སྔོ་ཚལ་གྱི་རིན་གོང་གཅིག་པ་མིན་པར་མཚམས་རེར་ཡར་འཕར་བ་དང་མཚམས་རེར་མར་ཆག་གི་ཡོད། རྒྱུ་མཚན་ནི་སྔོ་ཚལ་ཁ་ཤས་ངྷ་ས་ནས་རག་གི་མེད་པར་རྒྱལ་ས་ལྡི་ལི་དང་པཎ་ཇབ། མ་ཧ་རཱ་ཤི་ཊ་སོགས་མངའ་སྡེ་གཞན་ནས་ཉོ་དགོས་སྟབས། རིན་གོང་མཐོན་པོ་མ་བླངས་ན་མ་རྩ་ལེན་ཐུབ་ཀྱི་མི་འདུག ཅེས་བརྗོད་བྱུང་།

ངྷ་སའི་མང་ཚོགས་ཚོས་ནམ་རྒྱུན་སྤྱོད་བཞིན་པའི་སྔོ་ཚལ་ཁག་ཅིག་གི་དགུན་དུས་ཀྱི་རིན་གོང་ནི། ལྡུམ་སྒོང་ངམ་ཊོ་མ་ཊི་སྤྱི་རྒྱ ( Kilogram) གཅིག་ལ་ཧིན་སྒོར་ ༢༠ ། མཛུབ་ཚལ་སྤྱི་རྒྱ་གཅིག་ལ་སྒོར་ ༤༠ ། ཙོང་སྤྱི་རྒྱ་གཅིག་ལ་སྒོར་ ༥༠ ། ཚལ་དཀར་ཆུང་ངུ་འམ་པཱ་ལག་བསྡམས་ཤོག་གཅིག་ལ་སྒོར་ ༡༠ ། ཞོག་ཁོག་སྤྱི་རྒྱ་གཅིག་ལ་སྒོར་ ༢༠ ། སྒོག་པ་སྤྱི་རྒྱ་གཅིག་ལ་སྒོར་ ༣༠༠།  ལོ་འཁོར་པད་ཚལ་སྤྱི་རྒྱ་གཅིག་ལ་སྒོར་ ༣༠། ལ་ཕུག་དཀར་པོ་དང་དམར་པོ་སྤྱི་རྒྱ་གང་རེར་སྒོར་ ༡༠ བཅས་རེད། ཤིང་ཏོག་རིགས་ཤིག་གི་གོང་ཚད་ནི། ཀུ་ཤུ་སྤྱི་རྒྱ་གཅིག་ལ་ཧིན་སྒོར་ ༦༠ དང་། ཚ་ལི་མ་སྤྱི་རྒྱ་གཅིག་ལ་སྒོར་ ༥༠ ། ལིམ་བུ་སྤྱི་རྒྱ་གཅིག་ལ་སྒོར་ ༦༠། ངང་ལག་སྤྱི་རྒྱ་གཅིག་ལ་སྒོར་ ༤༠ །  པཱ་པ་ཡ་སྤྱི་རྒྱ་གཅིག་ལ་སྒོར་ ༤༠ བཅས་རེད། ལུག་ཤ་སྤྱི་རྒྱ་གཅིག་ལ་ཧིན་སྒོར་ ༡༦༠། བྱ་ཤ་སྤྱི་རྒྱ་གཅིག་ལ་སྒོར་ ༡༣༠། ཕག་ཤ་སྤྱི་རྒྱ་གཅིག་ལ་སྒོར་ ༡༣༠། ཉ་ཤ་སྤྱི་རྒྱ་གཅིག་ལ་སྒོར་ ༡༤༠ ཡིན་པ་དང་། དེ་མིན་སྣུམ་དང་ཕྱེ། འབྲས་སོགས་ལ་བཟང་ངན་རིགས་ཁ་ཤས་ཡོད་ཀྱང་། ངྷ་སའི་མང་ཚོགས་ཚོས་རྒྱུན་སྤྱོད་སྣུམ་སྤྱི་རྒྱ་ཕྱེད་ལ་སྒོར་ ༧༠། གྲོ་ཕྱེ་སྤྱི་རྒྱ་གཅིག་ལ་སྒོར་ ༣༠། འབྲས་སྤྱི་རྒྱ་གཅིག་ལ་སྒོར་ ༥༠། བྱ་སྒོང་གཅིག་ལ་སྒོར་ ༣ ། ཚ་ཤོག་ཐུམ་རེར་སྒོར་ ༡༢ བཅས་རེད།

ངྷ་རམ་ས་ལར་མཚོན་ན་སྔོ་ཚལ་གྱི་རིན་གོང་ཆེས་མཐོ་བའི་དུས་ཚིགས་ནི་དབྱར་ཁ་ཡིན་ཞིང་། དེ་ནི་ཆར་བ་འབབ་ཤུགས་ཆེ་བའི་སྟབས་ཀྱིས་སྐྱེལ་འདྲེན་སྟབས་མི་བདེ་བ་དང་། སྔོ་ཚལ་གྱི་ཞང་ཁར་དཀའ་ངལ་འཕྲད་པ། དེ་བཞིན་སྔོ་ཚལ་འཇོག་སྣོད་དག་ལས་འཕྲོ་བརླག་ཏུ་ཕྱིན་པ་སོགས་ཀྱིས་རེད། དཔེར་ན། ཕྱི་ཟླ་བདུན་པ་ཡས་མས་ནང་། ཊོ་མ་ཊོ་སྤྱི་རྒྱ་གཅིག་ལ་སྒོར་ ༨༠། བཙོང་སྤྱི་རྒྱ་གཅིག་ལ་སྒོར་ ༥༥། ལ་ཕུག་དཀར་དམར་གཉིས་སྤྱི་རྒྱ་རེར་སྒོར་ ༣༠། ཞོག་ཁོག་སྤྱི་རྒྱ་གཅིག་ལ་སྒོར་༢༥། ལོ་འཁོར་པད་ཚལ་སྤྱི་རྒྱ་གཅིག་ལ་སྒོར་ ༤༠ བཅས་དང་། ཀུ་ཤུ་སྤྱི་རྒྱ་གཅིག་ལ་སྒོར་ ༨༠  བཅས་ཡིན་ཞིང་། ཤ་རིགས་དང་ཕྱེ་འབྲས་སོགས་ལ་དུས་བཞིར་ཁྱད་པར་མེད།

གསར་འགོད་པས་རྒྱ་གར་སྔོ་ཚལ་འཚོང་མཁན་དེར་སྔོ་ཚལ་བྲིན་ཤོས་དང་མང་ཚོགས་ཀྱིས་དགའ་མོས་ཆེ་ཤོས་གང་ཡིན་སྐོར་དྲིས་སྐབས།  སྤྱིར་བཏང་སྔོ་ཚལ་གྱི་ཚོང་ཡག་པོ་འདུག ངས་བསམ་ན་ཚོང་རྒྱུག་ཆེ་ཤོས་ནི་ལྡུམ་སྒོང་ (Tomato) དང་ཙོང་  (Onion) ཞོག་ཁོག་གསུམ་རེད། དགུན་དུས་ནི་སྔོ་ཚལ་གྱི་ཚོང་ཡག་ཤོས་ཤིག་ཆགས་ཡོད།  ཆར་དུས་སྐབས་སུ་སྔོ་ཚལ་མང་པོ་ཞིག་འཕྲོ་བརླག་ཏུ་འགྲོ་བཞིན་ཡོད་སྟབས། སྔོ་ཚལ་གྱི་གོང་ཚད་ཀྱང་འཕར་འགྲོ་བཞིན་ཡོད། ཅེས་ངོ་སྤྲོད་གནང་བྱུང་།

ཡང་གསར་འགོད་པས་མེག་གྷན་གྱི་བོད་པའི་ཟ་ཁང་ Drum Stick  ཡི་མ་བྱན་བསེ་ཆུང་ལགས་སུ། ཟ་ཁང་གིས་སྔོ་ཚོད་མངགས་ཉོ་བྱེད་སྟངས་དང་མགྲོན་པོས་དགའ་མོས་གནང་ཕྱོགས་ཀྱི་སྔོ་ཚལ་གང་ཡིན་སྐོར་དྲིས་སྐབས། ད་ལྟ་གནམ་གཤིས་གྲང་མོ་ཡིན་པ་དང་མགྲོན་པོ་མང་ཆེ་བ་བོད་པ་ཡིན་སྟབས། ང་ཚོས་རྒྱུན་དུ་ཐུག་པ་དང་མོག་མོག་བཟོ་དགོས་ཀྱི་འདུག སྔོ་ཚོད་དང་ལ་ཕུག ཞོག་ཁོག་བཅས་ཀྱི་ཟ་མ་ཡང་བཟོ་དགོས་ཀྱི་འདུག བོད་པ་ཚོ་དགའ་ཤོས་ཀྱི་ཟ་མ་དེ་ཤ་རེད། སྔོ་ཚོད་ལ་དེ་ཙམ་དགའ་བོ་བྱེད་ཀྱི་མི་འདུག་མོད། ཞོག་ཁོག་ཟ་མཁན་མང་པོ་འདུག ཟ་ཁང་ཞིག་ལ་མཚོན་ན་སྔོ་ཚལ་རིགས་ནམ་རྒྱུན་མི་གཅིག་གི་ལག་ནས་ཉོ་བཞིན་ཡོད་དུས་གོང་ཚད་ཆེན་པོ་ལེན་གྱི་མི་འདུག ཅེས་བརྗོད་བྱུང་།

ཡང་གསར་འགོད་པས་ངྷ་རམ་ས་ལར་སྡོད་དམངས་དོན་གྲུབ་ལགས་སུ་བཅར་འདྲི་ཞུས་སྐབས་ཁོང་གིས། སུར་སྔོན་དང་དེ་མིན་སྔོ་ཚལ་ཁག་ཅིག་གི་རིན་གོང་ལ་འགྱུར་བ་འགྲོ་ཡི་མེད་ཀྱང་། སྔོ་ཚལ་གཞན་དག་གི་རིན་གོང་དུས་ཚིགས་རེར་འགྱུར་བ་འགྲོ་བཞིན་འདུག པད་ཚལ་ལ་ཆ་བཞག་ན། ད་ལྟ་རིན་གོང་ཆུང་བའི་དུས་ཚིགས་ཤིག་ལ་འཁེལ་ཡོད་སྟབས། མང་ཚོགས་ཀྱིས་དགའ་མོས་ཆེན་པོ་བྱེད་ཀྱི་འདུག པད་ཚལ་དེ་མིག་ལ་མཛེས་པ་དང་ཁ་ལ་ཞིམ་པོ་ཡོད་དུས་ཁྱིམ་ཚང་དང་ཟ་ཁང་ཚང་མས་བེད་སྤྱོད་བྱེད་ཀྱི་འདུག ང་རང་སྒེར་ལ་མཚོན་ན། ནམ་རྒྱུན་ཞོག་ཁོག་དང་པད་ཚལ། ལྡུམ་སྒོང་། ལ་ཕུག་སོགས་བེད་སྤྱོད་གཏོང་བཞིན་ཡོད་ཅིང་། དེ་དག་ནི་ངའི་འཚོ་བཅུད་ཀྱི་ཆ་ཤས་ཤིག་ཆགས་ཡོད་ལ། ངའི་རོགས་པ་ཚོས་ཀྱང་སྔོ་ཚོད་དེ་དག་ལ་དགའ་མོས་བྱེད་ཀྱི་འདུག ཅེས་བརྗོད་བྱུང་།

མཇུག་ཏུ་ཁོང་ལ་ཁྱེད་མེག་གྷན་གྱི་སྔོ་ཚོད་དང་ཟས་རིགས་ཀྱི་གོང་ཚད་ཐོག་ལྟ་ཚུལ་ཇི་འདྲ་ཡོད་མེད་དྲིས་སྐབས། ངྷ་རམ་ས་ལ་ནི་ཡུལ་སྐོར་ལྟེ་གནས་ཤིག་དང་མི་ཚོགས་འཛོམས་སའི་ས་གནས་ཤིག་ཆགས་ཡོད་སྟབས། ཁང་གླ་དང་ཟས་རིན། སྔོ་ཚལ་གྱི་རིན་གོང་སོགས་ལོ་རེར་ཇེ་མཐོར་འགྲོ་བཞིན་འདུག ང་རང་ལས་བྱེད་ཅིག་ཡིན་པའི་ཁུལ་ཡིན་ཡང་། ཁང་གླ་དང་ཟས་སོང་ཧ་ཅང་ཆེ་སྟབས། གླ་ཕོགས་ཀྱིས་འཚོ་བའི་འགྲོ་གྲོན་འདང་གི་མི་འདུག མེག་གྷན་གྱི་ཁང་པ་སྤྱིར་བཏང་བ་ཞིག་ལ་ཡང་ཧིན་སྒོར་ ༢༠༠༠ ཙམ་རེད། ཁང་གླ་མཐོ་དྲགས་པའི་དབང་གིས་མེག་གྷན་དུ་མི་བཞི་ལྔ་མཉམ་དུ་སྡོད་མཁན་ཡང་མང་པོ་འདུག ཅེས་བརྗོད་བྱུང་།

ངྷ་རམ་ས་ལར་གནས་སྡོད་བོད་མི་དག་ལ་མཚོན་ན། འཚོ་སྟངས་རིགས་གཉིས་སུ་འདུ་ཞིང་། འདི་ལ་ “གསར་འབྱོར” དང་ “རྙིང་འབྱོར” ཞེས་ཀྱང་འབོད་སྲོལ་ཡོད། རྙིང་འབྱོར་ནི། ང་དགུ་ལོར་བོད་པ་སྐྱབས་བཅོལ་ལ་ཐོག་མར་འབྱོར་ཞིང་། ད་ཆར་སྒེར་ལ་སྡོད་ཁང་དང་། ཟ་ཁང་ཚོང་ཁང་སོགས་འཚོ་བའི་རྟེན་གཞི་སྲ་ཐག་ཆགས་ཡོད་པ་ཚོ་ལ་ཟེར་ཞིང་། གསར་འབྱོར་ནི། བོད་ནས་བྱེས་སུ་འབྱོར་ཏེ་རྒྱ་གར་གཞུང་གི་སྐྱབས་བཅོལ་བའི་ཐོབ་ཐང་དང་། བཙན་བྱོལ་གཞུང་གི་གཞིས་ཆགས་ཀྱི་ཐོབ་ཐང་གང་ཡང་རག་མེད་པར་ཉིན་རེའི་འཚོ་བ་འཁྱོལ་ཐབས་ཙམ་བྱེད་མཁན་ཚོ་ལ་འབོད། གསར་འབྱོར་རྙིང་འབྱོར་གཉིས་ལ་ཐུན་མོང་གི་འཐབ་ཕྱོགས་ཤིག་ཡོད་པ་ནི། ཁྲིམས་མཐུན་ཁྲིམས་འགལ་ཅི་རིགས་དང་། ཚུལ་མཐུན་ཚུལ་མིན་གང་རུང་ཐོག་ནུབ་ཕྱོགས་ཡུལ་གྲུ་ཁག་ལ་ཐར་ཐབས་བྱ་རྒྱུ་དེ་རེད།

ངྷ་རམ་ས་ལ་ཁུལ་དུ་སྡོད་མཁན་བོད་རིགས་གཞོན་སྐྱེས་མང་ཆེ་བ་ལས་མེད་ཡིན་ཡང་། ཁག་གཅིག་གིས་ཟ་ཁང་དང་ཚོང་ཁང་། མགྲོན་ཁང་སོགས་སུ་འཕྲལ་སེལ་གྱི་ལས་ཀ་རེ་བྱེད་ཀྱི་ཡོད་ཀྱང་། ཟླ་རེའི་གླ་ཆ་ཧིན་སྒོར་ ༢༥༠༠ ནས་ ༤༥༠༠ ཙམ་ཡིན། ཡང་རེ་ཟུང་གིས་ཁྲོམ་སྲང་དུ་མོག་མོག་དང་བག་ལེབ། ར་ལུག་གི་རྒྱུ་མ་སོགས་འཚོང་བཞིན་ཡོད་ལ། རྒྱ་ནག་གི་བཅའ་དངོས་དང་ཟས་རིགས་ཙག་ཙིག་གི་ཐང་ཁྲོམ་སྟོན་མཁན་ཡང་མི་ཉུང་བ་ཞིག་ཡོད་ཀྱང་། ཡོང་འབབ་ཀྱི་ཐད་ནས་ཉིན་རེའི་འཚོ་བ་འཁྱོལ་ཙམ་ལས་དངུལ་གསོག་རྒྱུར་རེ་བ་ཤིན་ཏུ་ཕྲ།

མིང་དུ་གྲགས་པའི་གནས་མཆོག་འདིར་ཡང་སྐྱོན་ཆ་མེད་པ་མི་སྲིད་ལ། འདིར་ཡོང་མཁན་ཕྱི་མི་ཡོངས་རྫོགས་བཟང་བོ་དེ་བས་ཀྱང་མིན། ནུབ་ཕྱོགས་རྒྱལ་ཁབ་ཁག་གི་བྲེལ་ཟིང་དང་འདུ་འཛི་ཆེ་བའི་སྤྱི་ཚོགས་ཁྲོད་ནས་ངལ་གསོ་དང་གུང་གསེང་ལྟ་བུར་ཡོང་མཁན་མང་ལ། དུས་ཚོད་ཀྱི་སྒུལ་ཤུགས་དང་སྤྱི་ཚོགས་ཀྱི་གནོན་ཤུགས། དཔལ་འབྱོར་གྱི་རླབས་ཤུགས་མ་བཟོད་པར་འུ་ཐུག་སྟེ་ཡུལ་བྱོལ་དུ་ཡོང་མཁན་ཡང་ཉུང་ཉུང་མིན་སྟབས། ངྷ་རམ་ས་ལའི་སྤྱི་ཚོགས་ཆུང་ཆུང་འདིའི་ནང་འདུག་ཤེས་མཁན་ཞིག་ཡིན་ན་ཉམས་མྱོང་དང་ཤེས་ཡོན་སྣ་ཚོགས་རག་གི་ཡོད་ཀྱང་། སྡོད་སྟངས་མི་ཤེས་མཁན་ཚོའི་སྤྱོད་པ་ཡ་མ་བརླ་དང་སྐད་རིགས་ར་མ་ལུག་ཆགས་ཡོང་གི་ཡོད་པ་མ་ཟད། བཅོས་ཐབས་མེད་པའི་ནད་རིགས་སྣ་ཚོགས་ཤིག་ཀྱང་ཁྱབ་བརྡལ་དུ་འགྲོ་བཞིན་ཡོད། ཡང་བོད་རིགས་གཞོན་སྐྱེས་ཕ་མ་སྤུན་མཆེད་ཕྱི་རྒྱལ་དུ་ཡོད་མཁན་ཁག་ཅིག་དང་། བོད་དུ་ནང་མིར་ཆ་རྐྱེན་ཡག་པོ་ཡོད་མཁན་སྐོར་ཞིག་གིས་དབྱིན་ཡིག་དབྱིན་སྐད་སྦྱོང་བའི་མིང་ཐོག་ནས་དངུལ་འབད་མེད་ལོངས་སྤྱོད་བྱེད་པ་དང་། ཁྱོ་ག་སྐྱེས་དམན་ཕྱི་རྒྱལ་དུ་ཡོད་བཞིན་དུ་ཚུལ་མིན་སྣ་ཚོགས་བྱེད་པ། ཐ་ན་མྱོས་རྫས་སྤྱོད་མཁན་ཡང་མི་ཉུང་བ་ཞིག་ཡོང་གི་ཡོད།

གསར་འགོད་པ། དཔལ་ལྡན།