ཨ་རིའི་རྒྱལ་ས་ཝ་ཤིན་ཊོན་དུ་ཟླ་འདིའི་ཕྱི་ཚེས་ ༡༥ ནས་ ༡༦ བར་གྱི་ཉིན་གཉིས་རིང་། རྒྱ་ནག་དང་ཨ་རི་གཉིས་བར་གྱི་ཚོང་ལས་མཉམ་འབྲེལ་གྱི་ལྷན་ཚོགས་ཐེངས་ ༢༡ པ་ཟེར་བ་དེ་ཚོགས་ཡོད་འདུག ཚོགས་འདུ་དེར་ཨ་རིའི་ཕྱོགས་ནས་དཔལ་འབྱོར་བློན་ཆེན་གྷ་རེ་ལོ་ཁུ་ (Gary Locke) དང་། ཚོང་འབྲེལ་འཐུས་མི་རོན་ཁེ་རིག་ (Ron Kirk) གཉིས་བཅར་ཡོད་འདུག་ལ། རྒྱ་ནག་གི་ཕྱོགས་ནས་རྒྱལ་སྲིད་བློན་ཆེན་ཟུར་བ་ཝང་ཀྲི་ཧྲན་གཙོས་པའི་མི་སྣ་ཁག་ཅིག་མཉམ་ཞུགས་བྱས་ཡོད་འདུག
ཐེངས་འདིར་ཨ་རྒྱ་གཉིས་བར་གྱི་ཚོང་འབྲེལ་གནད་དོན་འགར་གྲོས་མོལ་བྱས་ཏེ་མིང་རྟགས་བཀོད་ཡོད་འདུག འདིའི་ཐད་ཨ་རིའི་དཔལ་འབྱོར་བློན་ཆེན་གྱིས། ཐེངས་འདིའི་ཚོང་དོན་གྲོས་མོལ་དེ་ལོ་རྗེས་མའི་ཕྱི་ཟླ་ ༡ པོའི་ནང་རྒྱ་ནག་གི་སྲིད་འཛིན་ཧུའུ་ཅིན་ཐོ་ཨ་རིར་ཡོང་སྐབས། ཨ་རྒྱ་གཉིས་བར་སླར་ཡང་ཚོང་དོན་གྲོས་ཆོད་གང་མང་ཞིག་འཇོག་ཐུབ་པའི་རྨང་གཞི་ཡིན་ཚུལ་བརྗོད་འདུག འདི་ལྟར་ཨ་རྒྱ་གཉིས་བར་གྱི་མཐོ་རིམ་དཔོན་རིགས་ཀྱི་འགྲོ་འོང་དེ་ལ་ཐེ་ཝན་བློ་འཚབ་ཆེན་པོ་སྐྱེ་བཞིན་ཡོད་འདུག
ལྷག་པར་དུ་ཕྱི་ཚེས་ ༡༦ ཉིན་ཨ་རིའི་རྒྱལ་སྲིད་བློན་ཆེན་གཞོན་པ་ཇེམ་སི་སི་ཁྲེན་བྷེར་གྷི་ (James Steinberg) ལགས་དང་། རྒྱ་ནག་གི་ཕྱི་འབྲེལ་བློན་ཆེན་གཞོན་པ་ཚའུ་ཐེན་ཁོའུ་གཉིས་ཀྱིས་པེ་ཅིན་དུ་ཚོགས་འདུ་ཞིག་ཚོགས་ཡོད་ཅིང་། ཚོགས་འདུ་དེའི་ཐད་ཨ་རིའི་སྲིད་གཞུང་གི་མགྲིན་ཚབ་པས། ཐེངས་འདིའི་ཚོགས་འདུའི་ནང་དོན་གཙོ་བོ་ཕྱོགས་གཉིས་དང་འབྲེལ་བ་ཡོད་པའི་ས་ཁུལ་གྱི་གནད་དོན་འགའ་དང་། ལོ་རྗེས་མ་ཧུའུ་ཅིན་ཐོ་ཨ་རིར་ཡོང་རྒྱུར་གྲ་སྒྲིག་བྱེད་བཞིན་ཡོད་སྐོར་བརྗོད་ཡོད་པ་དེས་ཐེ་ཝན་ལ་སྔར་ལས་ལྷག་པའི་སེམས་འཚབ་ཅིག་བསླངས་ཡོད་འདུག
ཕྱི་ཚེས་ ༡༤ ཉིན་ཐེ་ཝན་ཕྱི་འབྲེལ་དྲུང་ཆེ་ཧྲིན་ལུའུ་ཞོན་གྱིས། ཨོ་བྷ་མ་སྲིད་གཞུང་གིས་ལོ་རྗེས་མར་ཧུའུ་ཅིན་ཐོ་ཨ་རིར་སླེབས་སྐབས། ཡང་བསྐྱར་ལོ་སྔོན་མ་ལྟར་མཉམ་འབྲེལ་གསལ་བསྒྲགས་དེ་འདྲ་སྤེལ་སྲིད་པར་ཐེ་ཝན་གྲོས་ཚོགས་དང་། ཕྱི་འབྲེལ་ལྷན་ཚོགས་ཀྱི་ངོས་ནས་བློ་འཚབ་ཆེན་པོ་བྱེད་ཀྱི་ཡོད་པ་མ་ཟད། ཨོ་བྷ་མ་དང་ཧུའུ་ཅིན་ཐོ་གཉིས་ཀྱི་གྲོས་མོལ་སྐབས། ཐེ་ཝན་གྱི་ཁེ་ཕན་ལ་གནོད་པའི་གནས་ཚུལ་རིགས་མི་འབྱུང་བའི་འབོད་སྐུལ་ཞུ་བཞིན་ཡོད། ཅེས་བརྗོད་འདུག
ཐེ་ཝན་རྒྱལ་དོན་ཞིབ་འཇུག་ཁང་གི་ཉམས་ཞིབ་པ་ལིག་ཧྲི་ཀྲུང་གིས་ཀྱང་གསར་ལམ་ཁག་ཏུ། ལོ་སྔོན་མའི་ཕྱི་ཟླ་ ༡༡ པའི་ནང་ཨོ་བྷ་མ་རྒྱ་ནག་ཏུ་བསྐྱོད་སྐབས། ཧུའུ་ཅིན་ཐོ་དང་ལྷན་དུ་གསལ་བསྒྲགས་ཤིག་སྤེལ་བ་དེ་ནི། རྒྱ་ནག་གིས་ཨ་རྒྱ་གཉིས་བར་གྱི་ཆབ་སྲིད་ཀྱི་འགྱུར་བ་ཞིག་ལ་ངོས་འཛིན་བྱས་ཏེ། ཨ་རིས་རྒྱ་ནག་གི་གཞི་རྩའི་ཁེ་ཕན་ལ་བརྩི་འཇོག་བྱ་རྒྱུ་ཡིན་སྐོར་ཁྱབ་བསྒྲགས་ཤུགས་ཆེན་བྱས་ཡོད་པ་མ་ཟད། ཨ་རིའི་གཞུང་གིས་ཐེ་ཝན་ལ་དམག་ཆས་མཁོ་འདོན་དང་། རྒྱ་ནག་གི་ལྷོ་ཁུལ་རྒྱ་མཚོའི་བདག་དབང་སོགས་རྒྱ་ནག་གི་ཁེ་ཕན་དུ་བགྲངས་ཏེ་གླེང་རྙོག་སྣ་ཚོགས་བཟོས་ཡོད་པ་རེད་ཟེར།
བདུན་ཕྲག་སྔོན་མའི་ཝ་ཤིན་ཊོན་གྱི་དཔྱད་གླེང་ཚོགས་འདུ་ཞིག་གི་སྟེང་། ཨ་རིའི་འཐབ་ཇུས་དང་རྒྱལ་སྤྱིའི་ཉམས་ཞིབ་བསྟི་གནས་ཀྱི་ཉམས་ཞིབ་པ་བྷོ་ནའེ་གྷི་ལ་སིར་ (Bonnie Glaser) ལགས་ཀྱིས་ཀྱང་། ལོ་སྔོན་མའི་མཉམ་འབྲེལ་གསལ་བསྒྲགས་དེས་ཨ་རྒྱ་གཉིས་བར་གྱི་ཆབ་སྲིད་ལངས་ཕྱོགས་གསལ་བོ་བཟོས་ཡོད་པ་རེད། ཨོ་བྷ་མ་སྲིད་གཞུང་གིས་མ་འོངས་པར་བསྐྱར་དུ་གསལ་བསྒྲགས་སྤེལ་དགོས་པའི་རྒྱུ་མཚན་གང་ཡང་མི་འདུག ལོ་སྔོན་མའི་མཉམ་འབྲེལ་གསལ་བསྒྲགས་དེས་ཐེ་ཝན་ཙམ་མ་ཡིན་པར། རྒྱ་གར་གཙོས་ཨེ་ཤ་ཡའི་རྒྱལ་ཁབ་དག་ལའང་བློ་འཚབ་བསླངས་ཡོད་ཅེས་བརྗོད་ཡོད།
གསར་འགོད་པ། ཚེ་རིང་རྒྱལ།
རྒྱལ་ཁབས་ཆེན་པོ་འདི་ཚོས་སོ་སོའི་ཁེ་ཕན་གྱི་ཆེད་དུ་མཉམ་འབྲེལ་བྱེད་ཏེ། རྒྱལ་ཁབས་ཆུང་ཆུང་དང་མི་རིགས་ཉམས་ཆུང་ཚོའི་བདེ་སྡུག་ལ་བསམ་བློ་གཏན་ནས་གཏོང་གི་མི་འདུག་ལ། བྱེད་སྟང་འདིས་མ་འོང་པར་འཛམ་གླིང་འདི་ཆགས་སྒོའི་ནང་ལ་ཁྲིད་ངེས་རེད།
བློ་དགའ་ལགས་ཀྱིས་ཡིག་གཟུགས་ལ་ངེས་ཏན་འཇོག་དཀའ་འོ་།།ཞེས་གསུངས་འདུག་ཀྱང་འབྲེལ་མེད་ཀྱི་སྐད་ཆ་འདྲ་ཅིག་མ་གཏོགས་གོ་བ་ལེན་སྟངས་ཤེས་མ་སོང་།
གསལ་བཤད་ཤིག་གནང་རོགས་ཞུ།
ཚེ་རིང་རྒྱལ་ཟེར་བའི་གསར་འགོད་པ་འདི་སྔོན་མ་དུས་བབ་ཚགས་པར་སྟེང་དུ་ཁོང་གི་མཚན་མཐོང་མྱོང་མོད། ད་བར་གསར་འགྱུར་སྤེལ་བ་མཐོང་མ་སོང་། ཉེ་ལམ་ཞིག་ནས་ཁོས་གསར་འགྱུར་རྩ་ཆེན་འགའ་སྤེལ་སོང་ལ། ལྷག་པར་དུ་རྒྱ་ནག་ལ་ཉམས་ཞིབ་བྱས་པ་དེ་ང་ཚོར་དགོས་མཁོ་ཆེན་པོ་ཞིག་གི་ཁ་སྐོང་རེད།
འཽ་་་་་་་་གོང་དུ་ཅོ་རི་ཉི་མ་ལགས་ཀྱིས་རྒྱ་མིང་བོད་བསྒྱུར་བྱས་པ་ཞིག་འགྲིག་མེད་སྐོར་བརྗོད་འདུག་པ་དེར་ངས་ཀྱང་བསམ་ཚུལ་ཞིག་བཤད་འདོད་བྱུང་སོང་། སྤྱིར་རྒྱ་ཡིག་དང་དབྱིན་ཡིག་ཐོག་གི་མིའི་མིང་རིགས་སྒྲ་སྒྱུར་ལས་དོན་བསྒྱུར་ཡོང་ཐབས་ཡོད་པ་མ་རེད། སྒྲ་སྒྱུར་དེ་ཡང་འདོད་རྒྱལ་ལྟ་བུའི་ཐོག་ནས་བསྒྱུར་རྒྱུ་ལས་གཞི་འཇོག་ས་ཞིག་ཕལ་ཆེར་མེད། དེའི་རྐྱེན་ཀྱིས་སྒྲ་ཅི་བཞིན་ཐོན་ཐབས་ལ་འབད་བརྩོན་བྱ་རྒྱུ་ལས་ཡིག་གཟུགས་ལ་ངེས་ཏན་འཇོག་དཀའ་འོ་།།།
གསར་འགོད་པ་ལགས་གསར་འགྱུར་དུས་ཐོག་ཏུ་སྤེལ་བ་ཐུགས་རྗེ་ཆེ་ཞུ་བ་དང་ཆབས་ཅིག་དག་ཆ་སོགས་ལ་དོན་སྣང་མང་ཙམ་གནང་རོགས་ཞེས་ཞུ་རྒྱུ་ཡིན།
ཨ་རིའི་རྒྱལ་ས་ཝ་ཤིན་ཀྲོན་ལས་ཝ་ཤིན་ཊོན་ཞེས་བྲིས་ན་བདེ་བ་མིའདུག་གམ།
ཅོ་རི་ཉི་མ་རླུང་ལངས་པ་ཁག་མི་འདུག བོད་ཕྱི་རོལ་ནས་རྒྱ་གར་གྱི་ཡི་གེ་ཊ་ཎ་ལོག་ཋ་་ཌ་ཧྒསོགས་ལོག་ཡིག་འབྲི་སྲོལ་དར་ཁྱབ་ཆེན་པོ་ཡོད་པ་འདི་ཡག་པོ་མ་རེད། བོད་ཡིག་རང་གི་ནང་ནས་སྒྲ་གང་ལྟར་ཡོང་ན་དེ་ལྟར་བྲིས་ན་ལེགས་བསམ། ཐུགས་རྗེ་ཆེ།
《གྷརེ་ལོ་ཁུ་ རོན་ཁེརིག 》 གསར་འགོད་པ་ཚེ་རིང་རྒྱལ་ལགས། ཚིག་འདི་གཉིས་གཞུང་ལུགས་གང་ལ་བརྟེན་ནས་བྲིས་པ་ཡིན་ནམ། ཁེརིག་ཞེས་པ་འདི་ཅི་འདྲ་བྱས་ནས་ཀློག་དགོས་སམ། སྔོན་འཇུག་གང་ཡིན་དང་མིང་གཞི་གང་ཡིན། རྗེས་འཇིག་གང་ཡིན་གསལ་པོ་ཞིག་གསུང་རོགས་ཞུ།
མི་ཞིག་གི་མིང་དང་ས་ཆ་ཞིག་གི་མིང་འབྲི་དུས་འདི་འདྲ་རྐྱང་རྐྱང་བྲིས་བསྡད་པ་ཡིན་ན་མ་འོང་པར་བོད་ཡིག་འདིར་སུས་ཀྱང་ཀློག་མི་ཤེས་པ་ཞིག་ཡོང་གི་མ་རེད་པས།
ཨིན་ཡིག་འབྲི་སྟངས་ནང་བཞིན་བྱས་ནས་འབྲི་གཅིག་ལ་ཚེག་མེད་པའི་ཐོག་ནས་སྒྲ་གདངས་གཉིས་རེ་གསུམ་རེ་ཐོན་ཡ་ཡོད་པའི་བོད་ཡིག་འབྲི་སྟངས་འདིས་བོད་ཡིག་གཏོར་བརླག་གཏོང་གི་མ་རེད་པས།
སུམ་རྟགས་ཀྱི་གཞུང་ལུགས་མཐུན་གྱི་ཡོད་རེད་པས། ཐ་སྙད་གསར་པ་རེ་འབྲི་དགོས་དུས་སྔགས་ཡིག་ལྟ་བུ་རྐྱང་རྐྱང་འབྲི་དགོས་པ་ཡིན་ན་བོད་ཡིག་གི་རྒྱ་ཆ་ཕྱེ་ཀ་སྔགས་ཡིག་ལྟ་བ་ཆགས་འགྲོ་གི་མ་རེད་པས།
ཡིན་གཅིག་མིན་གཉིས་ཡི་གེ་ཕྱི་ལོག་དང་སྔགས་ཡིག་ལྟ་བུ་རྐྱང་འབྲི་དགོས་དོན་གང་ཡིན་ནམ། གསལ་བཤད་ཤིག་གནང་རོགས་ཞུ་རྒྱུ་ཡིན། མཁས་མདོག་དང་འཇོན་མདོག་བྱས་པར་དེ་འདྲ་རྩ་བ་ནས་མིན། བོད་ཡིག་ལ་ཤ་ཚ་བའི་ཁུལ་ཡིན། ཁྱེད་ལ་དགག་པ་རྒྱག་པ་དེ་ལས་མིན། འདི་འདྲ་ལ་གནད་འགག་ཆེན་པོ་འདུག་སྙམ་པས་ཡིན།
འདི་འདྲ་འབྲི་མཁན་ཁྱེད་གཅིག་པོ་མ་རེད། དེང་སང་ཨིན་ཡིག་ཏོག་ཙམ་རེ་ཤེས་མཁན་ཚོས་འདི་འདྲ་རྐྱང་འབྲི་བསྡད་ཀྱི་ཡོད་རེད།
ཐུགས་རྗེ་གཟིགས།