ཟླ་འདིའི་ཕྱི་ཚེས་ ༢༡ ཉིན་གྱི་སྔ་དྲོར་མཚོ་སྔོན་ཞིང་ཆེན་མཚོ་ནུབ་སོག་བོད་རང་སྐྱོང་ཁུལ་གཏེར་ལེན་ཁ་གྲོང་ཁྱེར་ལྷོ་ནུབ་ཕྱོགས་ཀྱི་པ་དབྱིན་ཆུ་བོའི་འགྲམ་དུ་ “ གཏེར་ལེན་ཁ་དམངས་སྤྱོད་གནམ་ཐང ” ཟེར་བ་ཞིག་འཛུགས་སྐྲུན་བྱ་འཆར་གྱི་མཛད་སྒོ་བསྡུས་ཡོད་འདུག མཛད་སྒོ་དེའི་སྟེང་མཚོ་སྔོན་ཆེན་ཆེན་དམར་ཤོག་ཚོགས་པའི་དྲུང་ཆེ་ཆང་བེ་དང་། རྒྱ་ནག་ནུབ་བྱང་མཁའ་འགྲུལ་དོ་དམ་སྡེ་ཚན་གྱི་དྲུང་ཆེ་ཝང་ཊི་ཆིན་གཉིས་གཙོས་པའི་མཚོ་སྔོན་ཞིང་ཆེན་དང་མཚོ་ནུབ་ཁུལ། གཏེར་ལེན་ཁ་རྫོང་རིམ་པའི་འབྲེལ་ཡོད་ལས་བྱེད་ཁག་མཉམ་ཞུགས་བྱས་ཡོད་འདུག
སྐབས་དེར་མཚོ་སྔོན་ཞིང་ཆེན་དམར་ཤོག་ཚོགས་པའི་དྲུང་ཆེ་ཆང་བེ་ཡིས་བརྗོད་དོན། “གཏེར་ལེན་ཁ་དམངས་སྤྱོད་གནམ་གྲུ་འབབ་ཐང་འཛུགས་སྐྲུན་བྱེད་རྒྱུ་འདི་ནི། རྒྱལ་ཁབ་ཀྱི་ནུབ་རྒྱུད་གསར་སྤེལ་ཆེན་པོའི་འཐབ་ཇུས་དང་། མཚོ་སྔོན་བོད་ཁུལ་འཛུགས་སྐྲུན་ལ་རྒྱབ་སྐྱོར་བྱེད་པའི་རྣམ་པ་ཙམ་དུ་མ་ཟད། མཚོ་ནུབ་ས་ཁུལ་གྱི་འགྲིམ་འགྲུལ་ཆ་རྐྱེན་སྔར་ལས་ཇེ་ལེགས་དང་རྒྱལ་ཁབ་རིམ་པའི་ཚྭ་འདམ་གཞོང་སའི་འཁོར་རྒྱུག་དཔལ་འབྱོར་ཚོད་ལྟ་ས་ཁུལ་འཕེལ་རྒྱས་སུ་གཏོང་བ། མི་རིགས་མཐུན་སྒྲིལ་ཇེ་དམ་དུ་གཏོང་བ། རྒྱལ་ཁབ་ཀྱི་བདེ་འཇགས་ལ་སྲུང་སྐྱོབ་བྱེད་པ། ས་ཁོངས་དཔལ་འབྱོར་དང་སྤྱི་ཚོགས་འཕེལ་རྒྱས་སུ་གཏོང་བ་བཅས་ཀྱི་ཐད་ལ་ཧ་ཅང་གལ་འགངས་ཆེ་བའི་ལས་གཞི་དོན་སྙིང་ལྡན་པ་ཞིག་ཡིན” ཞེས་བརྗོད་འདུག
མཚོ་སྔོན་ཞིང་ཆེན་གཏེར་ལེན་ཁ་དམངས་སྤྱོད་གནམ་གྲུ་ཐང་འདི་ནི། ཟི་ལིང་དང་ན་གོར་མོ། ཡུལ་ཤུལ་བཅས་ས་ཁུལ་གསུམ་གྱི་དམངས་སྤྱོད་གནམ་ཐང་གསུམ་གྱི་རྗེས་སུ་འཛུགས་སྐྲུན་མགོ་འཛུགས་བྱས་པའི་ཞིང་ཆེན་ནང་ཁུལ་གྱི་དམངས་སྤྱོད་གནམ་ཐང་བཞི་བ་དེ་ཆགས་ཡོད་འདུག་ལ། མཚོ་སྔོན་ཞིང་ཆེན་དང་མཚོ་ནུབ་ཁུལ་གྱི་ལོ་ལྔའི་འཆར་གཞི་བཅུ་གཉིས་པའི་འཛུགས་སྐྲུན་ལས་གཞི་གལ་ཆེན་ཞིག་ཡིན་སྐོར་ཡང་བརྗོད་འདུག
གསར་འགོད་པ། དོན་འགྲུབ་བཀྲ་ཤིས།
