བཙན་བྱོལ་བོད་མིའི་སྤྱི་ཚོགས་ནང་ཐེངས་འདིའི་བཀའ་བློན་ཁྲི་པ་དང་སྤྱི་འཐུས་འོས་བསྡུའི་ཐོག་མང་ཚོགས་ཀྱིས་སྔར་ལས་དོ་སྣང་ཆེ་བ་གནང་ནས་འོས་བསྡུའི་བརྒྱུད་རིམ་འདི་ཤིན་ཏུ་འཁྲུག་ཆ་དོད་པོར་གྱུར་སོང་། ལྷག་པར་བཀའ་བློན་ཁྲི་པའི་འོས་བསྡུ་དེ་རྒྱུ་མཚན་སྣ་ཚོགས་ལ་བརྟེན་ནས་འཁྲུག་ཆ་དོད་པོ་དང་། དེས་བཙན་བྱོལ་བོད་མིའི་དམངས་གཙོའི་བརྒྱུད་རིམ་གྱི་ཚད་གཞི་འཇལ་ཐུབ་པའི་གནས་སྟངས་ཤིག་ཆགས་ཡོད་པར་མང་པོས་ངོས་འཛིན་གནང་གི་འདུག འོན་ཀྱང་འོས་བསྡུའི་བརྒྱུད་རིམ་དེའི་ནང་སྤྱི་སྒེར་དང་འོས་བསྡུ་ལས་ཁང་བཅས་ཀྱིས་ཕྱག་ལས་གནང་ཕྱོགས་ལ་སྐྱོན་གྱི་ཆ་ཡང་གང་ཙམ་བྱུང་ཡོད། འཛམ་གླིང་ནང་འོས་བསྡུའི་ལས་དོན་ཚགས་ཚུད་ལྡན་པ་ཡོང་བར་གསར་འགྱུར་ལས་རིགས་ཀྱིས་འགན་འཁུར་ཤིན་ཏུ་ཆེན་པོ་ལེན་གྱི་ཡོད།
རང་རེའི་བཙན་བྱོལ་སྤྱི་ཚོགས་ནང་ཨ་རི་གཞུང་གིས་གཉེར་བའི་རླུང་འཕྲིན་གཉིས་དང་ནོར་ཝེ་བོད་ཀྱི་རླུང་འཕྲིན་བཅས་ཡོད་པ་དང་། དཔར་འགྲེམས་ཀྱི་གསར་འགོད་ཚན་པའི་ཁོངས་སུ་བོད་ཀྱི་དུས་བབ་དང་བོད་ཀྱི་བང་ཆེན་གཉིས་ནི་རྒྱ་ཆེ་མང་ཚོགས་ཀྱིས་དོ་སྣང་དང་ཀློག་པ་པོ་མང་ཤོས་ཡིན་པའི་གསར་ཤོག་གཉིས་རེད། འོན་ཀྱང་ད་བར་གསར་ཤོག་དེ་གཉིས་ཀྱིས་བཙན་བྱོལ་བོད་མིའི་འོས་བསྡུ་དང་འབྲེལ་བའི་གསར་འགོད་བྱེད་ཕྱོགས་ཚད་དང་ལྡན་པ་བྱུང་མེད་ཅིང་། འཛམ་གླིང་ནང་འོས་བསྡུའི་སྐབས་འོས་བསྡུ་དང་འབྲེལ་བའི་སྤྱི་བྱེ་བྲག་གི་གསར་འགྱུར་མཁོ་སྤྲོད་བྱ་རྒྱུར་གསར་ཤོག་གིས་འགན་ཆེན་པོ་འཁྱེར་གྱི་ཡོད། འོས་བསྡུའི་སྐབས་གསར་ཤོག་དང་རླུང་འཕྲིན་སོགས་ཀྱིས་འོས་མིའི་འགུལ་བསྐྱོད་དང་གཏམ་བཤད་ཀྱི་ནང་དོན་སོགས་མང་ཚོགས་ལ་དུས་ཐོག་མཁོ་སྤྲོད་བྱེད་དགོས་པ་དེ་ཧ་ཅང་གལ་འགངས་ཆེན་པོ་རེད། བོད་ཀྱི་བང་ཆེན་གྱིས་འོས་བསྡུ་ལས་ཁང་ལ་སྐྱོན་བརྗོད་ཀྱི་གླེང་བརྗོད་གཅིག་བཀོད་པ་དང་། སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་ཟིན་རྗེས་གྲུབ་འབྲས་ལ་གླེང་བརྗོད་གཅིག་བྲིས་པ་ཙམ་ལས། དཔེར་ན་བཀའ་བློན་ཁྲི་པའི་འོས་མི་སོ་སོས་གཏམ་བཤད་གནང་བ་སོགས་ལ་དཔྱད་ཞིབ་ཀྱི་གནས་ཚུལ་སྤེལ་བ་ནི་དཀོན་ཙམ་རེད།
བོད་ཀྱི་དུས་བབ་ཀྱིས་འོས་བསྡུ་དང་འབྲེལ་བའི་སྒེར་གྱི་རྩོམ་ཡིག་མང་པོ་འགོད་སྤེལ་གནང་སོང་ནའང་། རྩོམ་ཡིག་མང་པོའི་རྩོམ་པ་པོའི་དངོས་མིང་མེད་པ་དེ་དག་ལ་དེ་ཙམ་ནུས་པ་མེད། དེ་བཞིན་རྩོམ་ཡིག་སོ་སོའི་གཤམ་དུ་མཆན་མང་པོ་བཀོད་ཡོད་ནའང་། མཆན་འགོད་མཁན་གྱི་དངོས་མིང་མེད་སྟབས་དེ་ཙམ་ནུས་པ་མེད། དཔེར་ན་བྷི་བྷི་སི་དང་དེ་མིན་སྙན་གྲགས་ཆེ་བའི་གསར་འགྱུར་བརྒྱུད་ལམ་གྱི་དྲ་རྒྱའི་སྟེང་མཆན་འགོད་སྲོལ་ཡོད་ནའང་། དེ་དག་ལ་དངོས་མིང་འགོད་དགོས་ཀྱི་ཡོད། དངོས་མིང་མ་བཀོད་པར་རྩོམ་ཡིག་འགོད་སྤེལ་བྱེད་པ་ནི་སྨྲ་བརྗོད་རང་དབང་ལ་དམ་དྲག་ཡོད་པའི་རྒྱལ་ཁབ་དང་སྤྱི་ཚོགས་ནང་ལག་བསྟར་བྱེད་པའི་ལམ་སྲོལ་ཞིག་ཡིན་པ་ལས་རང་དབང་ངང་བསམ་ཚུལ་འདོན་སྤེལ་ཆོག་པའི་སྤྱི་ཚོགས་ནང་དེ་ལྟར་གནང་སྲོལ་དཀོན་ཙམ་རེད། རང་རེའི་བཙན་བྱོལ་བོད་མིའི་སྤྱི་ཚོགས་ནང་དེ་འདྲིའི་བཀག་འདོམས་ནི་མེད། དངོས་མིང་ཡོད་པའི་རྩོམ་ཡིག་ནང་ཚིག་རྩུབ་ཉུང་བ་མ་ཟད། རྩོམ་ཡིག་དང་བསམ་ཚུལ་རྣམས་འགན་འཁུར་ཡོད་པའི་ཐོག་བྲིས་པར་ལ་ངོས་འཛིན་བྱེད་ཐུབ།
བོད་ཀྱི་དུས་བབ་དང་བོད་ཀྱི་བང་ཆེན་གསར་ཤོག་གཉིས་ཀྱིས་བཀའ་བློན་ཁྲི་པའི་འོས་མི་ཚོའི་བར་བགྲོ་གླེང་གནང་བའི་གནས་ཚུལ་དང་གཏམ་བཤད་གནང་བའི་ཚིག་དོན་ལེབ་བཤུས་གནང་བ་བཀོད་པ་ནི་ལེགས་པའི་ཆ་ཞིག་ཡིན་མོད། འོས་བསྡུའི་དྲིལ་བསྒྲགས་ལས་འགུལ་ནང་འོས་མི་ཚོས་གཏམ་བཤད་གནང་བ་དང་། ལྷག་པར་བགྲོ་གླེང་སྐབས་འོས་མི་བྱེ་བྲག་པ་སོ་སོས་མངོན་འདོད་བཞིན་གཏམ་བཤད་གནང་སྲོལ་ཡོད་པ་དེ་ཡར་ཐོན་ཅན་ཨ་རི་ལྟ་བུའི་ནང་དུའང་ཡོད་པ་ནི་དངོས་ཡོད་གནས་ཚུལ་རེད། རང་རེའི་བཀའ་བློན་ཁྲི་པའི་འོས་མི་རྣམས་དང་ཁོང་ཚོར་རྒྱབ་སྐྱོར་གནང་མཁན་བཅས་ལ་བགྲོ་གླེང་སྐབས་དྲི་བ་མཐའ་བསྐོར་རི་བསྐོར་གནང་ནའང་། ལན་དེ་སོ་སོའི་མངོན་འདོད་ཀྱི་གཏམ་བཤད་གནང་བ་ལས་དྲི་བར་ཐད་ཀར་ལན་མ་གནང་བ་ཡང་བྱུང་ཡོད། གནས་སྟངས་དེ་མང་ཚོགས་ཀྱིས་གསལ་པོ་ཤེས་ཐབས་ལ་གསར་ཤོག་གི་ལས་འགན་ཆེན་པོ་བཞེས་དགོས་ཀྱི་ཡོད། དེ་ལྟར་མེད་ཚེ། སྐད་ཆ་སྙན་པོ་དང་རྫིག་པོ་ཤོད་མཁན་དེར་རྒྱལ་ཁ་ཐོབ་པ་ལྟ་བུ་ཆགས་ཏེ། དྲང་བདེན་གྱི་ལན་འདེབས་གནང་རྒྱུར་འབད་བརྩོན་གནང་མཁན་དེར་གྱོང་གུན་ཕོགས་ཉེན་ཡོད། ལར་ནས་བཙན་བྱོལ་བོད་མིའི་སྤྱི་ཚོགས་ནང་བཀའ་བློན་ཁྲི་པའི་འོས་མིའི་བར་བགྲོ་གླེང་གོ་སྒྲིག་གནང་མཁན་ཚོས་བགྲོ་གླེང་གོ་སྒྲིག་གནང་བའི་དགོས་པ་དང་དམིགས་ཡུལ་ངོས་འཛིན་ལེགས་པར་མ་ཐུབ་པའི་སྐྱོན་མེད་དམ་སྙམ་པའི་བློ་ཚབས་ཀྱང་ཡོང་གི་འདུག
ཨ་རི་སོགས་གསར་འགྱུར་ལས་རིགས་ལ་ཡར་ཐོན་ཅན་ཚོས་བགྲོ་གླེང་གྲུབ་མ་ཐག་ཆབ་སྲིད་དབྱེ་ཞིབ་པ་དང་དཔལ་འབྱོར་རིག་པར་མཁས་པ་སོགས་ཆེད་དུ་གདན་ཞུས་ཀྱིས་བགྲོ་གླེང་ནང་གཏམ་བཤད་གནང་ཕྱོགས་དང་ལན་འདེབས་གནང་ཕྱོགས་བཅས་ལ་ལམ་གསེང་བསྐྱར་ཞིབ་ཀྱི་བགྲོ་གླེང་གནང་སྟེ། མི་མང་གིས་བགྲོ་གླེང་གི་གནས་ཚུལ་དུས་ཐོག་ཤེས་ཐུབ་པའི་ཐབས་ལམ་ཡོད། རང་རེའི་བཙན་བྱོལ་བོད་མི་ཚོར་དེ་འདྲའི་ཆ་རྐྱེན་མེད་པར་བརྟེན་བོད་ཀྱི་དུས་བབ་དང་བོད་ཀྱི་བང་ཆེན་གསར་ཤོག་གཉིས་ཀྱི་ལས་འགན་དེ་འཁྱེར་ཐུབ་ན་ཕན་ཁྱད་ཆེན་པོ་ཡོང་ངེས་ཀྱང་། འདས་པའི་དུས་སུ་རྒྱ་གར་ནང་བགྲོ་གླེང་སྔ་རྗེས་གཉིས་གོ་སྒྲིག་གནང་ཡོད་པ་གང་ལའང་དེ་འདྲའི་ལས་འགན་འཁྱེར་མཁན་བྱུང་མེད། དེའི་ཚབ་ཏུ་སྐབས་རེར་གསར་ཤོག་དེ་གཉིས་འོས་མི་བྱེ་བྲག་པའི་མགྲིན་ཚབ་པར་འགྱུར་གྲབ་ཀྱང་བྱེད་ཀྱི་འདུག དཔེར་ན་ཉེ་ཆར་རང་བོད་ཀྱི་དུས་བབ་ཀྱིས་བློ་བཟང་སེངྒེ་ལགས་སུ་འདྲི་བ་བཅུ་ཞེས་པ་ཞིག་འགོད་སྤེལ་གནང་འདུག་པ་དེ་ནི་ཁོང་ལ་རྒྱབ་སྐྱོར་གནང་མཁན་ཚོས་འགན་འཁུར་འོག་དྲ་རྒྱ་དེར་དང་ཐོག་དབྱིན་ཡིག་ལ་བཀོད་པ་དེ་རྗེས་སུ་བོད་བསྒྱུར་བྱས་པ་ཞིག་འགོད་སྤེལ་གནང་སོང་། དྲི་བ་བཅུ་ཟེར་བ་དེ་བོད་ཀྱི་དུས་བབ་ཀྱིས་ལེབ་བཤུས་བྱས་ཏེ། དྲ་རྒྱ་དང་གསར་ཤོག་གཉིས་ཀར་བཀོད་འདུག སྤྱིར་བཏང་འགྲོ་ལུགས་ལ་གསར་ཤོག་གི་རྩོམ་སྒྲིག་ཚོགས་ཆུང་གིས་མི་གང་ཞིག་ལ་རྒྱབ་གཉེར་གནང་སྲོལ་ཡོད་ནའང་། དེར་རྒྱུན་མཚན་གསལ་བཤད་ཀྱིས་ཡོངས་ཁྱབ་ཀྱི་རྒྱབ་གཉེར་ཞུ་སྲོལ་ཡོད་པ་ཙམ་ལས་འོས་བསྡུའི་གནས་ཚུལ་འགོད་སྟངས་ཕྱོགས་ལྷུང་མེད་པར་འོས་མི་ཚང་མའི་གནས་ཚུལ་ཆ་སྙོམ་གསར་འགོད་བྱེད་ཀྱི་ཡོད་པ་དེ་ནི་གསར་ཤོག་གི་དྲང་ཚུགས་དང་རང་དབང་གི་གནས་ཚད་ཕྱིར་འདོན་བྱེད་པ་མཚོན་གྱི་ཡོད། གཅིག་བྱས་ན་བོད་མིའི་གསར་འགོད་པ་ཚོར་གསར་འགོད་ཀྱི་ལྟ་གྲུབ་དང་ལེགས་བྱང་ལ་དེ་ཙམ་མྱོང་བ་མེད་པའི་སྐྱོན་གྱིས་གནས་ཚུལ་དེ་འདྲ་ཡོང་སྲིད། གསར་ཤོག་གི་ལས་འགན་གཙོ་གནད་ཆེ་ཤོས་གཅིག་ནི་ཕྱོགས་ལྷུང་མེད་པར་གནས་ཚུལ་དྲང་པོ་འགོད་སྤེལ་བྱ་རྒྱུ་དེ་རེད།
དེ་བཞིན་འོས་བསྡུའི་སྐབས་སྒྲིག་སྲོལ་བཞིན་འོས་བསྡུ་བྱས་ཡོད་མེད་དང་། ཚུལ་མིན་གྱི་གནས་ཚུལ་སོག་བྱུང་ཡོད་ཚེ་དེ་དག་ཐེར་འདོན་གནང་རྒྱུའི་ལས་འགན་དེ་གསར་འགྱུར་བརྒྱུད་ལམ་ལ་ཡོད་ཅིང་། བཙན་བྱོལ་བོད་མིའི་སྤྱི་ཚོགས་ནང་གསར་འགྱུར་བརྒྱུད་ལམ་འགའ་ཞིག་ཡོད་པའི་ཁོངས་ནས་འགྲོ་རྒྱུགས་ཆེ་ཤོས་དེ་བོད་ཀྱི་དུས་བབ་དང་བོད་ཀྱི་བང་ཆེན་གསར་ཤོག་གཉིས་ཡིན་པར་བརྟེན་འོས་བསྡུ་དྲང་བདེན་དང་ཚགས་ཚུད་ལྡན་པ་བྱུང་ཡོད་མེད་ཀྱི་དངོས་བྱུང་གནས་ཚུལ་རྣམས་འགོད་སྤེལ་གནང་དགོས་པ་ཡིན། དཔེར་ན་བོད་ཀྱི་དུས་བབ་ཀྱིས་སྤེལ་ཀོབ་ཀྱི་གནས་ཚུལ་བྱུང་བ་ཁག་ཅིག་བཀོད་པ་ནི་བསྔགས་པར་འོས་པ་རེད། འོན་ཀྱང་། འོས་བསྡུ་ལས་ཁང་གིས་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་གནང་ཕྱོགས་སྒྲིག་གཞི་དང་འགལ་འཛོལ་བྱུང་བར་མང་ཚོགས་ནང་བསམ་ཚུལ་ཡོད་ནའང་། གནས་ཚུལ་གསར་ཤོག་དེ་གཉིས་ཀྱིས་གླེང་སློང་ཙམ་གནང་མེད། གསར་ཤོག་ཐོག་གླ་ཡོད་གསལ་བསྒྲགས་དང་གསལ་བཤད་ཀྱི་གཏམ་བཤད་བཅས་བཀོད་པ་ནི་གསར་འགྱུར་མིན། དཔེར་ན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་བཀའ་ཁྲིའི་འོས་དམིགས་ཁོངས་སུ་མེད་པའི་སྐོར་གསལ་བཤད་གནང་བ་ཞིག་ཚགས་ཤོག་གཉིས་ཀྱི་ནང་བཀོད་འདུག་ཀྱང་། དེ་འདྲའི་གནས་ཚུལ་བྱུང་བ་དེ་འོས་བསྡུ་ལས་ཁང་གི་སྐྱོན་ཡིན་མིན་སོགས་རྒྱབ་ལྗོངས་ཀྱི་གནད་གང་ཡང་བཀོད་མི་འདུག དེར་བརྟེན་ད་ལྟ་བཀའ་བློན་ཁྲི་པ་དང་སྤྱི་འཐུས་ཀྱི་དངོས་གཞིའི་འོས་བསྡུ་གནང་དགོས་ཀྱི་ཡོད་པས་བོད་ཀྱི་དུས་བབ་དང་བོད་ཀྱི་བང་ཆེན་གསར་ཤོག་གཉིས་ཀྱིས་མང་ཚོགས་ལ་གནས་ཚུལ་མཁོ་སྤྲོད་གནང་རྒྱུར་འགན་འཁུར་ཆེ་ཙམ་བཞེས་དགོས་པའི་རེ་བསྐུལ་བྱེད་ཀྱི་ཡོད།
བོད་མི་རིགས་ལ་ཤ་ཚ་བ་ཟེར་ ན། འདི་ལྟ་བུ་ལ་ཟེར་བ་ཡིན། ངོ་མ་རེད། འཛམ་གླིང་ནང་ཆེས་ཆེར་སྙན་གྲགས་རྒྱས་པའི་དབུ་ཁྲིད་༸གོང་ས་མཆོག་ལྟ་བུ་ལ་རྒྱ་ མིས་ཁ་ཡ་རྩ་བ་མི་བྱེད་པར། ཉམས་མྱོང་གང་ཡང་མེད་པའི་མི་ཞིག་གིས་རྒྱ་ཡི་མཉམ་དུ་བོད་དོན་གླེང་རྒྱུའི་རེ་ བ་བྱེད་པ་ནི་ཡི་དྭགས་སྨིག་རྒྱུར་ཆུ་འཁྲུལ་དང་མཚུངས་པ་རང་རེད། མ་གཞི་ནས་བཀའ་བློ་ཁྲི་པའི་ཞབས་སྟེགས་འདི་འཇོན་སྟངས་འདོན་སའི་གཡུལ་ས་ཞིག་ རེད་མ་གཏོགས། ཉམས་མྱོང་གསོག་ས་དང་སྦྱོང་བརྡར་བྱེད་སའི་མི་རྒན་སློབ་གྲྭ་ཞིག་མ་རེད། བོད་ལ་ཤ་ཚ་ཡོད་པའི་གཞོན་སྐྱེས་ཡིན་ན་ཧོལ་རྒྱུགས་མ་བྱེད། གལ་སྲིད་ཁྱེད་ཚོས་ལོ་གཞོན་རྒྱུ་མཚན་དུ་བྱས་ན་འོས་ཤོག་འཕེན་པ་ཡིན་ན། བོད་བསྟན་པ་ཆབ་སྲིད་ལ་གནོད་ཚབས་ཆེན་པོ་སྐྱེལ་རྒྱུ་ཡིན་པ་རྗེས་ནས་ཤེས་ཡོང་། ཕན་མ་ཐོགས་ནའང་གནོད་མ་སྐྱེལ་རོགས།
” སྐད་ཆ་སྙན་པོ་དང་རྫིག་པོ་ཤོད་མཁན་དེར་རྒྱལ་ཁ་ཐོབ་པ་ལྟ་བུ་ཆགས་ཏེ། དྲང་བདེན་གྱི་ལན་འདེབས་གནང་རྒྱུར་འབད་བརྩོན་གནང་མཁན་དེར་གྱོང་གུན་ཕོགས་ཉེན་ཡོད། ”
གོང་གི་ཚིག་དོན་དེས་བཀའ་བློན་དང་སྤྱི་འཐུས་ཀྱི་འོས་བསྡུའི་ལས་རིམ་ལས་བརྒལ་ཏེ། བཙན་བྱོལ་སྤྱི་ཚོགས་ཀྱི་གྲུ་ཟུར་ཡོད་ཚད་ལ་དཔེ་འགེབས་བྱས་ན་འོས་ཤིང་འཚམ་པའི་བདེན་གཏམ་ཞིག་ཏུ་གྱུར་མི་འདུག་གམ།།
རྣམ་རྒྱལ་ལགས་ཀྱིས་གསར་ཤོག་སོགས་བརྒྱུད་ལམ་ཁག་གིས་འོས་བསྡུའི་ལས་རིམ་དང་འབྲེལ་བར་གསར་འགོད་གནང་ཕྱོགས་དྲང་བདེན་དང་ཕྱོགས་ལྷུང་མེད་པ་གནང་དགོས་སྐོར་དོན་སྙིང་ལྡན་པའི་བསམ་ཚུལ་གསུང་འདུག་པ་འདི་སྐོར་འབྲེལ་ཡོད་ནས་ཞིབ་ཆའི་བགྲོ་གླེང་ཞིག་གནང་ཐུབ་ན་དགེ་མཚན་ཆེ།
རེ་བསྐུལ་དང་དགོང་ཚུལ་གསུང་པར་རྒྱབ་བསྐོར་ཡོད་ལ་བསླད་ནས་སྤྱི་ཚོགས་ཕན་པའི་ལེགས་བྱང་མང་ཙམ་གསུངས་ཐུབ་རྒྱུར་སྙིང་ནས་རེ་བསྐུལ་ཞུ་བཞིན་ཡོད་ཐུགས་རྗེ་ཆེ་ཐུབ་བསྟན་ལགས