ངྷ་སར་གནས་སྡོད་གྲྭ་ཡེ་ཤེས་ལགས་ཀྱིས་འདི་ག་གསར་ཁང་ལ་གནས་ཚུལ་བརྗོད་པ་ལྟར་ན། ཁམས་འབྲི་རུ་རྫོང་ནས་ཡིན་ཞིང་། ད་ལྟ་རང་ལོ་ ༢༩ ལ་སོན་པའི་བོད་མི་འཆི་མེད་བཀྲ་ཤིས་ལགས། ཕྱི་ལོ་ ༢༠༡༠ ལོའི་ཟླ་ ༡༠ པའི་ཚེས་ ༣ ཉིན་རྒྱ་ནག་ཉེན་རྟོག་པས་གློ་བུར་དུ་འཛིན་བཟུང་གིས་འདྲི་གཅོད་ཚད་མེད་བྱས་ཡོད་པར་མ་ཟད། ཉེ་ཆར་ནགས་ཆུ་ས་གནས་མི་དམངས་ཁྲིམས་ཁང་ཟེར་བས་ཁོང་ལ་ལོ་ ༢ ཀྱི་ཁྲིམས་ཐག་བཅད་ཡོད་པ་རེད།
༢༠༠༥ ལོའི་ཕྱི་ཟླ་ ༨ པའི་ནང་བཀྲ་ཤིས་ཚུད་པའི་བོད་མི་ ༥༡ ཙམ་ཤར་ཁུམ་བུ་བརྒྱུད་བལ་བོད་ས་མཚམས་བརྒལ་སྐབས་རྒྱ་དམག་གིས་ཁོང་ཚོ་འཛིན་བཟུང་བྱས་ཏེ། དིང་རི་དང་གཞིས་རྩེ་བཙོན་ཁང་བཅས་སུ་ཟླ་ ༤ རིང་བཀག་ཉར་བྱས་རྗེས་ཁོང་ཚོ་བོད་མི་ཁག་ཅིག་འབྲི་རུ་རྫོང་སྤྱི་བདེ་ལས་ཁུངས་སུ་རྩིས་སྤྲོད་བྱས་ཡོད་འདུག་ལ། ལོ་ལྔའི་ནང་ཆབ་སྲིད་ལས་འགུལ་གང་ཡང་མ་སྤེལ་བའི་ཁས་ལེན་འོག མི་རེ་ནས་རྒྱ་སྒོར་ ༤༠༠༠ རེ་སྤྲད་དེ་མཐར་ཀློད་གྲོལ་བཏང་ཡོད་ཀྱང་། ༢༠༠༨ ལོའི་ཕྱི་ཟླ་ ༡༠ པའི་ནང་ཁོང་རྒྱ་གར་ལ་བསྐྱར་དུ་བྲོས་བྱོལ་དུ་ཡོང་སྟེ། ༧གོང་ས་མཆོག་གི་གསར་ཞལ་མཇལ་བ་དང་། གནས་མཆོག་རྡོ་རྗེ་གདན་དུ་འབུམ་ཕྱག་འཚལ་བ། ཝ་ས་ཎ་སིར་༧གོང་ས་མཆོག་གི་གསུང་ཆོས་སོགས་ཞུས་ཏེ་ཕྱིར་བོད་དུ་ལོག་མཚམས། རྒྱ་གཞུང་གིས་ཁོང་གིས་སྲིད་གཞུང་གི་རྩ་ཁྲིམས་དང་འགལ་བའི་ལས་དོན་མང་པོ་བྱས་ཡོད་པའི་ཉེས་འཛུགས་འོག ལོ་ ༢ ཀྱི་ཁྲིམས་ཐག་བཅད་ཡོད་པ་རེད།
གསར་འགོད་པ། དཔལ་ལྡན།
