རང་བྱུང་གི་གོད་ཆག

ཉེ་བའི་ཆར་སིང་གྷ་ལར་དྲག་ཆར་དང་ཆུ་ལོག་གིས་ཡུལ་མི་ཉིས་འབུམ་ལྷག་གི་སྡོད་ཁང་དང་འཚོ་གནས་ལ་གནོད་སྐྱོན་ཕོག་པའི་གོད་ཆག་མཇུག་མ་རྫོགས་གོང་། གཟའ་འཁོར་འདིའི་མགོ་སྟོད་ནས་བྷར་ཛིལ་གྱི་ནུབ་བྱང་ས་ཁུལ་དུ་ཆར་ཞོད་ཆེན་པོ་བསྟུད་མར་བབས་ཏེ། གཟའ་མིག་མར་ནས་ཆུ་ལོག་དང་ས་རུད་ཀྱི་གནོད་ཚབས་ཆེན་པོ་བྱུང་ཡོད་ཅིང་། ཁ་སང་ཕྱི་ཚེས་ ༡༢ ཉིན་ཆར་ཞོད་ཆེ་རུ་ཕྱིན་ཏེ། རི་ཉིལ་འདམ་ཟེགས་དང་། ཆུ་ལོག་ཤུགས་ཆེན་གྱི་དབང་གིས་ཡུལ་མི་བརྒྱ་ལྷག་རྐྱེན་འདས་སུ་སོང་ཡོད་པ་དང་། ཁང་ཁྱིམ་དང་རླངས་འཁོར། ཚོང་རྫས་སོགས་ཀྱི་ཅ་དངོས་ཆུ་ལོག་གིས་ཁུར་བ་བློ་ཡུལ་ལས་འདས་པ་བྱུང་ཡོད་འདུག

ཁ་སང་དགོང་མོ་ཆུ་ལོག་གི་ཤུགས་ཚད་ཆེ་རུ་ཕྱིན་ཞིང་། ཁང་ཁྱིམ་དང་ཟམ་པ་རིགས་གཏོར་སྐྱོན་དང་། གློག་ཆད་པ་སོགས་ཀྱི་དབང་གིས་མྱུར་སྐྱོབ་པའི་ནུས་པ་འདོན་མ་ཐུབ་པའི་དཀའ་ངལ་ཕར་མ་ཞིག་འཕྲད་ཀྱིན་ཡོད་པ་མ་ཟད། མྱུར་སྐྱོབ་དམག་མི་འགའ་ཡང་རྐྱེན་ལམ་དུ་ཤོར་ཡོད་འདུག་ལ། ད་ནང་ཞོགས་པར་རགས་རྩིས་བྱས་པ་ལྟར་ན་ད་བར་མི་ ༢༧༠ ལྷག་གི་ཚེ་སྲོག་ཤོར་ཡོད་པ་དང་། མི་ ༡༨༠༠༠༠ ལྷག་གི་སྡོད་གནས་ལ་གནོད་འཚེ་ཕོག་ཡོད་འདུག གཞན་ས་གནས་མང་པོ་ཞིག་གི་ལམ་དང་གློག བརྡ་འཕྲིན་བརྒྱུད་ལམ་ཡོངས་རྫོགས་ལ་གཏོར་སྐྱོན་ཐེབས་ཏེ། ས་ཁུལ་དེ་དག་ནང་གོལ་ཆག་ཅི་བྱུང་ད་ཆར་ཤེས་རྟོགས་གང་ཡང་བྱས་ཐུབ་མི་འདུག

སྤྱིར་བྷར་ཛིལ་ནང་དབྱར་དུས་ཆར་ཤུགས་ཆེ་བ་རྒྱུན་ལྡན་ཡིན་ཡང་། ད་ལྟའི་དུས་སུ་ཆར་བ་ཤུགས་ཆེན་འདི་ལྟ་བུ་ཞིག་བབས་པ་དེ་ལོ་རྒྱུས་ཐོག་གི་ཐེངས་དང་པོ་དེ་ཆགས་ཡོད་འདུག་ལ། རྒྱལ་སྤྱིའི་གནམ་གཤིས་བརྟག་དཔྱད་ཁང་གི་ཟིན་ཐོ་ལྟར་ན། ཐེངས་འདིའི་བྷར་ཛིལ་ནང་གི་ཆར་ཞོད་དེ་ནི་ ༡༨༨༠ ཚུན་གྱི་ཆར་ཤུགས་ཆེ་ཤོས་དེ་ཆགས་ཡོད་འདུག

གསར་འགོད་པ། བནྡེ་སྐྱབས།