བཀའ་བློན་ཁྲི་པའི་འོས་མི་གསུམ་གྱིས་བཙན་བྱོལ་སྤྱི་ཚོགས་ཁྲོད་སྐོར་སྐྱོད་ཀྱིས་རང་རང་གི་སྲིད་བྱུས་དང་ལྟ་བ་ལངས་ཕྱོགས་དྲི་བསྒྲགས་བྱེད་ཀྱིན་པའི་སྐབས་འདིར། འདི་གའི་གསར་འགོད་པས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ལགས་སུ། བཀའ་ཁྲིའི་འོས་མི་གསུམ་གྱི་གཏམ་བཤད་དང་འབྲེལ་ཏེ་བཅར་འདྲི་ཞུས་ཡོད།
དྲི་བ། སྐུ་ཉིད་ཀྱིས་ད་ལྟའི་བཀའ་བློན་ཁྲི་པའི་འོས་མི་གསུམ་ལ་སྤྱི་ཡོངས་ནས་གཟིགས་སྟངས་གང་འདྲ་ཡོད་དམ།
ལན། དང་ཐོག་བློ་བཟང་སེངྒེ་ནས་གླེང་ན། ཁོང་བཀའ་ཁྲིར་ཐོབ་མིན་ལ་མ་ལྟོས་པར། བོད་ཀྱི་གཞོན་སྐྱེས་ནང་གི་སྲིད་དོན་མི་སྣའི་ཚབ་མཚོན་ལྟ་བུར་གྱུར་འདུག ལྷག་པར་ཁོང་འགྲིམས་སའི་ཧ་ཝར་ཌི་གཙུག་ལག་སློབ་གྲྭ་ཆེན་མོ་ལྟ་བུར་མཚོན་ན། དེང་སྐབས་དེར་ཆབ་སྲིད་མི་སྣ་གྲགས་ཅན་མང་བོ་འབྱུང་ས་ཞིག་ཏུ་གྱུར་ཡོད་པས། ཁོར་ཡུག་གི་ཆ་ནས་ཀྱང་བློ་བཟང་སེངྒེ་ལ་མཐུན་རྐྱེན་རེག་ཡོད། ཡིན་ནའང་། མི་རྣམས་ཀྱིས་ཧ་ཝར་ཌི་ནས་ཐོན་མཁན་རྣམས་གོ་སྐབས་འཛིན་ཐུབ་མཁན་ཞིག་ཏུ་ངོས་འཛིན་བྱེད་ཀྱིན་འདུག་ལ། མ་གཞི་སྲིད་དོན་གྱི་གོ་སྐབས་ལབ་ན་གོ་བ་གཉིས་ལྡན་ཡོད། ཡག་ཕྱོགས་ནས་བཤད་ན་ཆབ་སྲིད་ཐད་གོ་སྐབས་ཡོད་ཚད་འཛིན་ཐུབ་ན། དེ་ནི་སྦྱང་གྲུང་ལྡན་པའི་དོན་ཡིན་ལ། ཡང་གོ་སྐབས་ལས་བསམ་རྒྱུ་མེད་ན་གོ་སྐབས་རིང་ལུགས་པ་ཟེར་བའི་ངན་ཕྱོགས་སུའང་ལྷུང་སྲིད་པ་རེད།
དེ་བཞིན་བཀྲས་མཐོང་ལ་མཚོན་ན། དེང་དུས་ཀྱི་སློབ་སྦྱོང་རེག་ཡོད་པའི་མི་ཚད། ནུབ་ཕྱོགས་ཨ་རི་ལྟ་བུ་སྲིད་འབྱོར་རིག་ གསུམ་ཚད་མཐོན་པོའི་སྤྱི་ཚོགས་ནང་དུ་ཡོད་པའི་མི་རེད། ཡིན་ནའང་། སྔོན་མར་བཀྲས་མཐོང་ལགས་དང་མཉམ་དུ་ལས་ཀ་བྱེད་མྱོང་མཁན་མི་རྙིང་པ་ཚོས། ཁོང་ནི་ལྟ་བ་ཅུང་ཙམ་མཁྲེགས་པོ་དང་གོ་སྐབས་ལས་ལྟ་གྲུབ་གལ་ཆེན་པོ་འཛིན་མཁན་ཞིག་རེད་ཅེས་གླེང་གི་འདུག ཆབ་སྲིད་ཀྱི་ཁྱབ་ཁོངས་སུ་དེ་འདྲའི་གྲས་ལའང་དགེ་སྐྱོན་གཉིས་འཇོག་གི་ཡོད། ཆབ་སྲིད་མི་སྣ་ཞིག་ཡིན་ན་རང་ལྟ་མཆོག་འཛིན་མང་དྲགས་ན་མཉམ་འདུས་ཀྱི་ལས་དོན་སྒྲུབ་མི་ཐུབ་པའི་དཀའ་ངལ་འབྱུང་གི་ཡོད། དཔེར་ན་བཀའ་ཁྲི་ཟམ་གདོང་རིན་པོ་ཆེར་སྐྱོན་འདི་འདུག་ཟེར་ནས་བདག་གཞན་གཉིས་ཀྱིས་ལབ་བསྡད་ཀྱི་ཡོད། གོ་ཐོས་སུ་སྔོན་མ་བཀྲས་མཐོང་བཀའ་ཁྲི་ཡིན་དུས་ལས་མཚམས་འཇོག་དགོས་བྱུང་བའི་རྒྱུ་མཚན་ཡང་ཁོང་ལ་རང་ལྟ་མཆོག་འཛིན་ཆེ་དྲགས་པས་རེད་ཟེར། འོན་ཀྱང་། ང་བཀྲས་མཐོང་ལ་ནང་རྒྱུས་མེད་སྟབས་སྐད་ཆ་དེ་ཚོ་བདེན་མིན་མི་ཤེས།
བཀྲ་ཤིས་དབང་འདུས་ལགས་ལ་མཚོན་ན། ངས་ཁོང་གི་རྩོམ་ཡིག་ཁ་ཤས་ཀློག་མྱོང་། ཁོང་ནི་བཙན་བྱོལ་ནང་དམར་ཤོག་ཚོགས་པ་འཛུགས་མཁན་གྱི་མི་ ༤ བྱུང་བའི་ནང་གི་གཅིག་རེད། དེར་བརྟེན་ངས་བཀྲ་ཤིས་དབང་འདུས་འདི་ཕུགས་བསམ་གཞིར་བཞག་སྟེ་སྲིད་དོན་ལ་ཤུགས་རྒྱག་མཁན་ཞིག་རེད་སྙམ་ཡོད། ང་མི་དེའི་གྲས་ལ་དགའ་བོ་ཡང་ཡོད། ཡིན་ནའང་། ཉེ་བའི་བགྲོ་གླེང་མང་བོ་ཞིག་ལ་ཉན་དུས། བཀྲ་ཤིས་དབང་འདུས་འདི་སྒྲིག་འཛུགས་རང་བཞིན་གྱི་མི་ཞིག་ཆགས་འདུག་སྙམ་པའི་ཚོར་བ་བྱུང་། དེ་ཡང་ཡིན་སྲིད། ཁོང་གིས་ལོ་བཞི་བཅུའི་རིང་སྒྲིག་འཛུགས་ནང་ལས་ཀ་བྱས་པ་རེད། སྒྲིག་འཛུགས་རང་བཞིན་གྱི་མི་ཞིག་ཆགས་སོང་ན། ཕུགས་བསམ་ཟེར་བ་ཞིག་ཡོང་ཐབས་མེད་ཁར། ཕྱོགས་གཅིག་ནས་སྒྲིག་འཛུགས་སམ་གཞུང་དང་དམངས་ཟེར་བའི་བར་དུ་ལྟོས་གྲུབ་ཀྱི་འབྲེལ་བ་ངེས་ཅན་ཞིག་ཡོད་ནའང་། ཕྱོགས་གཞན་ནས་འདི་གཉིས་ཀྱི་ཁེ་ཕན་ཁ་གཏད་ཀྱང་ཆགས་འགྲོ་གི་ཡོད་སྟབས། བཀའ་བློན་ཁྲི་པ་ནི་རྩ་བའི་ཆ་ནས་གཞུང་དམངས་གཉིས་ཀྱི་ཁེ་ཕན་ལ་ལྟ་ཐུབ་མཁན་ཞིག་ཡིན་དགོས་ཀྱི་ཡོད་མོད། བཀྲ་ཤིས་དབང་འདུས་གཞུང་གི་ཐོག་དཀྱོག་འགྲོ་ས་རེད་བསམ་བསམ་ཞིག་འདུག
དྲི་བ། ཉེ་ཆར་ནས་བཟུང་བཀྲ་ཤིས་དབང་འདུས་ལགས་ཀྱིས་ཁོང་ཐེངས་འདིའི་བཀའ་ཁྲིའི་འོས་མིར་བཞེངས་པ་ནི་ཁོང་གི་རྒྱབ་རྩར་སུ་གང་ཡང་མེད་པར། ཁོང་རང་ཉིད་ཀྱི་ལངས་ཕྱོགས་ཤིག་གཞིར་བཟུང་སྟེ་ལངས་པ་ཡིན་ལ། རང་གི་ལངས་ཕྱོགས་ནམ་ཡིན་རུང་གློད་རྒྱུ་མིན་གསུང་གི་འདུག འདིའི་ཐད་ལ་དགོངས་ཚུལ་ཅི་ཡོད།
ལན། སྤྱིར་བཀའ་ཁྲིའི་འོས་མི་གསུམ་པོའི་སུ་ཡིན་རུང་། རང་ཉིད་སྒེར་ངོས་ནས་བློས་གཏོང་མང་བོ་ཞིག་བྱས་ཡོད། དེར་བརྟེན་ཁོང་ཚོས་བློས་གཏོང་གི་ཆ་དེར་ང་ཚོས་རྗེས་སུ་ཡི་རངས་བྱས་ན་འགྲིག་གི གཉིས་ནས་ཁོང་ཚོ་མངོན་གསལ་དོད་པོས་བཀའ་བློན་ཁྲི་པའི་འོས་མིར་ཞུགས་པ་དེས། ང་ཚོའི་སྤྱི་ཚོགས་ལ་གདམ་ག་དང་། འགྲན་རྩོད། སྤྱི་ཚོགས་ཆབ་སྲིད་ལ་དབྱིངས་ཡོད་པ་ཞིག་ཏུ་བསྐྲུན་ཐུབ་ཡོད་པས་ན། འདི་ལ་ངེས་པར་དུ་དྲང་ཕྱོགས་ཀྱི་ངོས་འཛིན་བྱ་དགོས། ཡིན་ནའང་། བཀྲ་ཤིས་དབང་འདུས་ལགས་ལ་མཚོན་ན་བཀའ་ཁྲིར་ལངས་རྒྱུ་ཡིན་ཟེར་བ་ལས་ཀྱང་གསལ་བཤད་བྱེད་དུ་འགྲོ་བའི་རྣམ་པ་ཤུགས་ཆེན་པོ་འདུག ཉེ་ཆར་སྒྲོལ་མ་གླིང་དུ་གསུང་བཤད་གནང་སྐབས་ཀྱང་ཁོང་གིས་ད་རེབ་ཀྱི་གོ་སྐབས་འདི་གསལ་བཤད་ཡིན་གསུང་གི་འདུག་ལ། ཕྱོགས་མཐའ་ཁག་ཏུ་ཕེབས་ཏེ་མང་ཆེ་བ་གསལ་བཤད་བྱེད་ཀྱི་ཡིན་གསུང་གི་འདུག གསལ་བཤད་ག་རེ་བྱེད་ཀྱིན་འདུག་ཟེར་ན། སྐུ་ངོ་འཇུ་ཆེན་ཐུབ་བསྟན་རྒྱབ་ལོགས་སུ་མེད་པ་དེ་གསལ་བཤད་བྱ་རྒྱུ་ཡིན་ཟེར། བློ་བཟང་སེངྒེ་ལགས་ཀྱིས་ཀྱང་དེ་འདྲ་ཞིག་བརྗོད་སོང་།
སྤྱིར་བཏང་ནས་དེང་སྐབས་ང་ཚོའི་སྤྱི་ཚོགས་འདིར་རྒྱབ་ན་མི་འཇུ་ཆེན་ཐུབ་བསྟན་ཡོད་མི་འོས་པ་དང་། ལྷ་ཤུགས་ལྡན་ཡོད་མི་རུང་བ། གལ་སྲིད་དེ་གཉིས་གང་རུང་ཡོད་ཚེ་མི་དེ་ནག་པོ་འདྲ་བོ། ཡང་ཟམ་གདོང་རིན་པོ་ཆེ་དང་རྒྱ་རི་རིན་པོ་ཆེ། རྒྱ་ལོ་དོན་འགྲུབ་སོགས་རྒྱབ་ན་ཡོད་ན་མི་དེ་དཀར་པོ་ཡིན་པ་འདྲ་བོ་ཞིག་བཤད་ཀྱིན་ཡོད་སྟབས། ཆབ་སྲིད་པ་རྣམས་ཀྱིས་གོ་སྐབས་དེ་བཟུང་ནས་ལྷ་སྲུང་ཐོག་དམ་ཚིག་གཙང་རབས་དང་། མིའི་ཐད་ནས་འཇུ་ཆེན་རྒྱབ་ཏུ་མེད་རབས་དག་འབུད་བྱེད་ཀྱིན་པ་ཚང་མས་མཐོང་གསལ་རེད། སྐད་ཆ་དྲང་མོར་བཤད་ན། འཇུ་ཆེན་རྒྱབ་ན་ཡོད་ན་ཧང་སང་རྒྱུ་གང་ཡང་མི་འདུག གཅིག་ནས། འཇུ་ཆེན་ཁྱིམ་རྒྱུད་ཀྱིས་བཙན་བྱོལ་བོད་གཞུང་ལ་དང་བླངས་དཔྱ་དངུལ་འབུལ་བཞིན་པའི་རྒྱལ་འབངས་རྣལ་མ་ཞིག་དང་། གཉིས་ནས། ཟམ་གདོང་རིན་པོ་ཆེ་དང་། རྒྱ་རི། རྒྱ་ལོ་དོན་འགྲུབ་སོགས་ལ་བྱས་རྗེས་ཡོན་ན་འཇུ་ཆེན་ལའང་དེ་མཚུངས་ཤིག་ཡོད་ལ། ངན་ཕྱོགས་ནས་གླེང་ནའང་ཚང་མ་འདྲ་འདྲ་རེད་སྙམ། དེ་བས་མང་ཚོགས་ཀྱི་དཀྲོགས་མགོ་ལངས་ཕྱོགས་ཙམ་གཞིར་བཞག་སྟེ། ཆབ་སྲིད་པ་ཚོས་གནད་དོན་དེའི་གྲས་ཡང་ནས་བསྐྱར་དུ་གསལ་བཤད་བྱ་རྒྱུ་ནི་སྒེར་ལ་གལ་ཆེན་པོ་ཡིན་སྲིད་མོད། སྤྱི་ཚོགས་ལ་བསམ་ན་ཕན་ལས་གནོད་ཆེ་ཞིང་། འདིའི་རིགས་སྲིད་དོན་པ་ཚོ་རང་ཉིད་རང་ལ་གདེང་ཚོད་མེད་པའི་ཕྱོགས་ཤིག་ཀྱང་རེད།
དྲི་བ། བཀྲ་ཤིས་དབང་འདུས་ཁོང་བཀའ་ཁྲིར་འོས་འཐོབ་བྱུང་ན་སྲིད་ཇུས་གསར་བ་གང་ཡང་མེད་ཀྱང་། ད་བར་གཞུང་གི་སྒྲིག་འཛུགས་ནང་དུ་ཚགས་མ་ཚུད་པ་དང་འགྱུར་བ་གཏོང་དགོས་ས་ཁག་ཅིག་ལ་ཤུགས་རྒྱག་ཐུབ་ཀྱི་རེད་གསུང་གི་འདུག དེས་ན་ཁོང་གིས་ལས་དོན་ཅི་ཞིག་ཚགས་ཚུད་དང་འགྱུར་བ་གཏོང་ཐུབ་ཀྱི་རེད་དགོངས་ཀྱི་ཡོད་དམ།
ལན། ངས་དེང་སྐབས་ལྟ་དུས། བཀྲ་ཤིས་དབང་འདུས་ལ་གཞུང་གི་ཁེ་ཕན་གཙོ་བོར་འཛིན་པའི་གཤིས་ཀ་ཞིག་འདུག དེར་བརྟེན་གཞུང་དང་འབྲེལ་བའི་ཡར་རྒྱས་གཏོང་ཕྱོགས་སྐོར་ནས་ཁོང་ལ་ཉམས་མྱོང་ཡོད་པ་དང་། གཞུང་གི་ལས་དོན་ཐོག་ཤུགས་རྒྱག་རྒྱུའི་རྣམ་པ་ཞིག་འདུག དེ་ཕྱོགས་གཅིག་རེད། ཡིན་ནའང་། ཁོང་གིས་གཞི་རིམ་སྤྱི་ཚོགས་དང་འབྲེལ་བའི་ལས་དོན་ཐོག་ལ་ཤུགས་རྒྱག་ཐུབ་མིན་བཤད་ཁག་པོ་རེད།
དྲི་བ། བློ་བཟང་སེངྒེ་ལགས་ཀྱིས་ཁོང་གི་བོད་ཡིག་གི་ཤེས་ཚད་ནི་འཛིན་རིམ་བཅུ་གཉིས་དང་ནམ་རྒྱུན་ནས་ཞལ་འདོན་སྐྱོར་བ། མཚམས་མཚམས་བོད་ཀྱི་དུས་བབ་དང་ཁ་བརྡ་དྲ་རྒྱ་གཉིས་ཀློག་པ་ཙམ་ཡིན་ཞེས་གསུང་གི་འདུག བོད་ཀྱི་བཀའ་བློན་ཁྲི་པ་ཞིག་དང་གཞུང་གི་འཛིན་སྐྱོང་གི་ལས་ཀ་མང་བོ་ཞིག་བོད་ཡིག་སྟེང་གནང་དགོས་པས། འདི་ཞན་ཆ་ཞིག་ཡིན་སྲིད་དམ།
ལན། ཁྱེད་ཀྱིས་དྲིས་པ་ལྟར་རེད། བོད་ཀྱི་བཀའ་བློན་ཁྲི་པར་བོད་ཡིག་གི་ཤེས་ཚད་ཅི་ཙམ་ཡག་ན་དེ་ཙམ་གྱིས་བཟང་གི་རེད་ལ། བློ་བཟང་སེངྒེ་ཟམ་གདོང་རིན་པོ་ཆེ་ལྟར་བོད་ཀྱི་རིག་གཞུང་ལ་བྱང་ཆུབ་པའི་མིང་མེད་ནའང་། འཛིན་སྐྱོང་དང་འབྲེལ་བའི་ཡིག་ཆར་ལྟ་རྒྱུ་ཙམ་ལ་བློ་བཟང་སེངྒེ་ལའང་དཀའ་ངལ་འཕྲད་ཀྱི་མ་རེད་སྙམ། སྤྱིར་བཀའ་བློན་ཁྲི་པ་ནི་ཆབ་སྲིད་ཀྱི་ཆེད་ལས་མི་སྣ་ཡིན་དགོས་ལ། ངས་ནམ་རྒྱུན་བློ་བཟང་སེངྒེར་འོས་ཐོབ་ཀྱང་ཁོང་ཕྱག་སྟོང་སྦྱན་སྟོང་མ་རེད་ལ། སྐྱོན་ཀུན་སེལ་དང་ཡོན་ཏན་ཀུན་ལྡན་ཡང་མིན་པས། ཁོང་གིས་བོད་ཀྱི་དཀའ་ངལ་ཆ་ཚང་སེལ་ཐུབ་ཀྱི་མ་རེད་ལ། ང་ཚོས་དེ་ལྟ་བུའི་རེ་བའང་རྒྱག་གི་མེད། ཡིན་ནའང་། བློ་བཟང་སེངྒེ་ཡར་བསླེབས་པ་འདི་འགྱུར་བ་ཞིག་རེད། ང་ལ་མཚོན་ན་འགྱུར་བ་ལ་དགའ། དེར་བརྟེན་ངས་སྔོན་ནས་སྐུ་དྲག་གི་ཁྱིམ་རྒྱུད་དང་། བླ་མས་བཟུང་བའི་ཆོས་སྲིད་ཟུང་འབྲེལ་གྱི་ལོ་བཞི་བརྒྱ་ལྔ་བརྒྱའི་རིང་གི་འགྲོ་སྟངས་འདི་མཚམས་ཤིག་འཇོག་རྒྱུའི་སྐོར་བཤད་ཀྱི་ཡོད།
ངས་འདི་ལྟར་བཤད་དུས་འབྱོར་མེད་གྲལ་རིམ་གྱིས་སྲིད་དབང་སྒེར་འཛིན་བྱ་དགོས་ཀྱི་འདུག་གམ། ཡང་ན་འབྱོར་ལྡན་གྲལ་རིམ་གྱིས་སྲིད་དབང་སྒེར་འཛིན་བྱ་དགོས་ཀྱི་འདུག་ཟེར་བ་ལྟ་བུའི་སྐད་ཆ་མིན་པར། དཔེར་ན། ཨེ་ཇབ་ལུང་པར་སྲིད་འཛིན་མུའུ་བྷ་ར་ཁུས་ལོ་ངོ་སུམ་ཅུར་བཟུང་བའི་མཇུག་འབྲས་ཚང་མས་མཐོང་བཞིན་པ་དེ་རེད། དེ་ལྟར་ཁྱིམ་བརྒྱུད་དང་། ཡང་ན་ཚོགས་ཁག་ཅིག་གིས་ཆབ་སྲིད་ཀྱི་དབང་ཆ་འཛིན་ཡུན་རིང་དྲགས་ན། མི་རྣམས་ཀྱི་སྲིད་དོན་གྱི་དབྱིངས་བརླག་འགྲོ་གི་རེད། དེའི་སྟབས་ཀྱིས་བློ་བཟང་སེངྒེ་ཡར་བསླེབ་ཐུབ་ན་དེ་འགྱུར་བ་ཞིག་རེད་ལ། ངས་དེ་གལ་ཆེན་པོར་བརྩི་ཡི་ཡོད།
དྲི་བ། བློ་བཟང་སེངྒེ་ལགས་ཀྱིས་ཁོང་བཀའ་ཁྲིར་འོས་ཐོབ་བྱུང་ན། མ་འོངས་པའི་ལོ་ལྔའི་ནང་དུ་ཨེ་ཤ་ཡ་གཙོས་རྒྱ་ནག་ལ་འགྱུར་ལྡོག་མང་བོ་འབྱུང་སྲིད་ལ། སྐབས་དེར་གོ་སྐབས་དམ་འཛིན་བྱས་ཏེ་སྲིད་དོན་ཐད་ཕྱག་ལས་མང་བོ་གནང་རྒྱུ་ཡོད་གསུང་གི་འདུག དེའི་ཐད་དགོངས་ཚུལ་ཅི་ཡོད།
ལན། བློ་བཟང་སེངྒེ་ལ་ཧ་ཝར་ཌི་གཙུག་ལག་སློབ་གྲྭ་ཆེན་མོའི་སྲིད་དོན་གྱི་གཡའ་ཞུགས་ཡོད་ལ། ཨ་རིའི་སྲིད་དོན་པ་ནི་མདོར་ན་ཚོང་པའི་སྲིད་དོན་པ་ཡིན་སྟབས། གོ་སྐབས་ཀྱི་གཤིས་ཀ་ཡོད་དང་ཡོད། དེའི་སྟབས་ཀྱིས་ཁོང་གིས་གོ་སྐབས་འཛིན་ཐུབ་ཀྱི་རེད་གསུངས་དུས། འཛིན་ཐུབ་མིན་ལྟ་རྒྱུར་ལྷག་ཡོད་ཀྱང་། ང་ཚོས་གོ་སྐབས་འཛིན་ཐུབ་པའི་རེ་བ་རྒྱག་ཆོག་གི་རེད་སྙམ།
དྲི་བ། བཀྲས་མཐོང་ལགས་ཀྱིས་ཁོང་གི་ཁྱད་ཆོས་ནི་དཀའ་ངལ་མ་ཡོང་སྔོན་ནས་སྔོན་དཔོག་དང་དེ་ལ་དཔོག་པའི་གྲ་སྒྲིག་བྱ་རྒྱུའི་ནུས་པ་ཞིག་ཡོད་གསུང་གི་འདུག ཁྱེད་ཀྱིས་བལྟས་ན་བཀྲས་མཐོང་ལགས་སུ་དཀའ་ངལ་མ་ཡོང་སྔོན་ནས་གྲ་སྒྲིག་བྱ་རྒྱུ་དང་སྔོན་དཔོག་གི་ནུས་པ་ཞིག་ཡོད་པར་མཐོང་གི་ཡོད་དམ།
ལན། ང་ལ་མཚོན་ན་ཡིག་ཐོག་གི་བཀྲས་མཐོང་དང་། ཁོང་རང་ཉིད་ཀྱི་སྐད་ཆར་ཉན་བསྡད་པ་མ་གཏོགས། བཀྲས་མཐོང་མཉམ་པོར་ལས་ཀ་བྱས་པ་དང་། ཁོང་དང་མཉམ་དུ་དཀའ་ངལ་ལ་སྔོན་དཔོག་བྱས་པའི་བརྒྱུད་རིམ་ཞིག་བཤད་རྒྱུ་མེད། ཡིན་ནའང་། ཉེ་ཆར་གྱི་བགྲོ་གླེང་གཅིག་གཉིས་ཤིག་ལ་བལྟས་ན། བཀྲས་མཐོང་ལགས་ཀྱིས་སྐད་ཆ་གནད་འགག་ཅན་ཁ་ཤས་བཤད་སོང་། ཁོང་གིས་ད་བར་བཙན་བྱོལ་ནང་གི་འཐུས་ཤོར་ཆེ་ཤོས་དེ་ཆོལ་ཁ་དང་ཆོས་ལུགས་ཀྱིས་ཕྱོགས་ཞེན་འཇགས་མ་ཐུབ་པ་དེ་ཡིན་ཞེས་བརྗོད་སོང་། དེ་ནི་རྒད་པོ་ཁོང་གི་སེམས་གཏམ་དང་ཉམས་མྱོང་རེད། ཡང་ཁོང་གིས་དབུ་མའི་ལམ་གྱི་སྲིད་ཇུས་ལ་འགྲེལ་བཤད་རྒྱག་སྐབས། སི་ཊ་སི་སྦག་གི་གྲོས་ཆོད་དང་། ཞི་བའི་དོན་ཚན་ལྔ་ནས་བཟུང་སྟེ། ལམ་དབུ་མའི་སྲིད་ཇུས་ཀྱི་མཐར་ཐིག་འབབ་ས་ནི་བོད་མི་མང་གི་མངོན་འདོད་ཀྱི་ཐོག་ཡིན་ཟེར་གྱིན་པ་མ་གཏོགས། དབུ་མའི་ལམ་ནི་མི་མང་གི་མཐར་ཐུག་མངོན་འདོད་ཡིན་ཞེས་གཏན་འབེབས་གནང་མེད་ཟེར། སྐད་ཆ་དེ་བདེན་པ་རེད། ད་དུང་ཁོས་ཐེངས་གཅིག་གཉིས་ཙམ་མིན་པར། ང་ཚོའི་ཕྱོགས་ནས་རྒྱ་ནག་ཕྱོགས་ལ་སྤྲོད་དགོས་པའི་ཡིག་ཆ་ཆ་ཚང་སྤྲད་ཚར་ནའང་། རྒྱ་ནག་གིས་ཚུར་ངོས་ལེན་མེད་ཅེས་ཁ་བསངས་སོང་ཡང་། འདིར་ང་ཚོས་ད་དུང་དེ་མ་གོ་མདོག་མདོག་བྱས་ནས་བསྡད་ན་འགྲིག་གི་མི་འདུག དེར་བརྟེན་དབུ་མའི་ལམ་གྱི་སྲིད་ཇུས་ཡིན་ནའང་ད་ནི་བསྐྱར་ཞིབ་ཀྱི་ལས་རིམ་འགྲོ་དགོས་པ་རེད་ཟེར་བ་སོགས། ཉམས་མྱོང་གཞིར་བཞག་སྟེ་བཤད་ཀྱིན་འདུག་ལ། སྐད་ཆ་དེ་ཚོར་ང་ཁོང་ལ་རྒྱབ་སྐྱོར་བྱེད་མཁན་ཞིག་ཡིན་མིན་ལ་མ་ལྟོས་པར། དྲང་ཕྱོགས་ནས་གདེང་འཇོག་བྱ་དགོས་པ་རེད།
དྲི་བ། བཀྲས་མཐོང་ལགས་ཀྱིས་དབུ་མའི་ལམ་གྱི་སྲིད་ཇུས་ལ་རྒྱ་ནག་གི་ཕྱོགས་ནས་ངོས་ལེན་མ་བྱས་སྟབས། བཀའ་བློན་གྱི་མཚན་ཐོག་ནས་༧གོང་ས་མཆོག་དང་སྤྱི་འཐུས་ལྷན་ཚོགས་ལ་སྙན་གསེང་ཞུ་དགོས་པ་དང་། ཐབས་ལམ་གསར་བ་བཙལ་དགོས་པ་སོགས་ཡོང་སྲིད་ཀྱི་རེད་ཟེར་དུས། གལ་སྲིད་ཁོང་བཀའ་བློན་ཁྲི་པར་འོས་ཐོབ་བྱུང་ན་ཁོང་གིས་འདིའི་སྟེང་དུ་ཐབས་ལམ་གསར་བ་དང་། སྲིད་ཇུས་གསར་བ་འཚལ་ཐུབ་རྒྱུ་རེད་དམ།
ལན། སྤྱིར་བཀྲས་མཐོང་ལགས་ཀྱིས་ལས་ཀ་གནད་འགག་ཅན་མང་བོ་བྱས་འདུག དེ་དངོས་ཡོད་གནས་ཚུལ་རེད། ཡིན་ནའང་། ཁོང་གིས་ལས་ཀ་བྱས་པ་རྣམས་གཞུང་འབངས་གཉིས་ལས་གཞུང་གི་ཁེ་བཟང་གཙོ་བོར་བཟུང་བ་མ་གཏོགས། མི་མང་ནང་དུ་དེ་ཙམ་བབས་མི་འདུག་བསམ་བསམ་ཞིག་འདུག དེར་བརྟེན་དེང་སྐབས་དབུ་མའི་ལམ་ཀྱི་སྲིད་ཇུས་འདི་མི་སེར་དཀྱུས་མའི་ཁེ་ཕན་ལས་བརྒལ་ནས། གཞུང་དང་གཞུང་བར་གྱི་ཚོང་རྫས་ཤིག་ཆགས་ཡོད་སྟབས། སྐུ་ངོ་བཀྲས་མཐོང་ཡང་ལས་དོན་དངོས་ཐོག་སླེབས་དུས་འདིའི་གྲས་ལ་མཉེས་པོ་མེད་འགྲོ དེ་ནི་ངའི་རྣམ་རྟོག་ཙམ་ཡིན། དེ་མ་གཏོགས་བཀྲས་མཐོང་ལ་དབང་འཛིན་པའི་ཕྱོགས་ཀྱི་རྒྱབ་སྐྱོར་དང་། ཁོང་གི་མི་རྩ་མི་བདག་སོགས་འབྲེལ་བ་ཤུགས་ཆེན་པོ་ཡོད། གལ་སྲིད་བློ་བཟང་སེངྒེ་ཡར་བསླེབ་ན། ལོ་གཉིས་གསུམ་རིང་མི་གཞན་གྱིས་རྒྱབ་སྐྱོར་བྱས་མ་བྱས་ཀྱི་སྟེང་ནས་དཀའ་ངལ་འབྱུང་སྲིད་མོད། བཀྲས་མཐོང་ལྟ་བུར་མཚོན་ན་ཡར་བསླེབ་མ་ཐག་ནས་རྒྱབ་སྐྱོར་གྱི་ཆ་དང་། སྟོབས་ཤུགས་ཀྱི་ཆ་ཡོད་པ་རེད། དེར་བརྟེན་གོང་ནས་བཤད་པ་ལྟར་གཅིག་བྱས་ན་འདིའི་ཐད་ནས་བཀྲས་མཐོང་གིས་ཅིག་འཇོན་ཡང་སྲིད། གང་ལྟར་ལམ་དབུ་མའི་སྲིད་ཇུས་ཟེར་བ་འདི་བཀའ་བློན་སུ་བསླེབ་མིན་ལ་མ་ལྟོས་པར། འགྱུར་བ་གཏོང་དགོས་པ་ནི་དུས་ཀྱི་དགོས་མཁོ་རང་རེད།
གསར་འགོད་པ། ཨ་རིག་འགྱུར་མེད།
སྦྲ་རིགས་ཐོགས་མེད་ནས།
སྤྱི་ལོ་ ༢༠༡༡ ཟླ་ ༢ ཚེས་ ༡༧ གི་ཆུ་ཚོད་ ༨ སྐར་མ་ ༣༥ ཁ་བརྡ་ཚང་།
མདོ་སྨད་ཡུལ་གྱི་རྒྱ་ཆེའི་མི་མང་ལགས།
མདའ་དྲང་མོར་བརྒྱབ་ན་འབེན་ལ་ཕོག།
གཏམ་དྲང་མོར་བཤད་ན་མཚང་ལ་ཕོག།
ཅེས་པའི་དཔེ་བཞིན་ང་ཚོ་མདོ་སྨད་ཕྱོགས་ཀྱི་རྩོམ་ཡིག་ཐར་ཐོར་རེ་འབྲི་ཤེས་མཁན་དང་།སློབ་སྦྱོང་ཕྱོགས་ཙམ་རེ་ཡོད་མཁན་ཚོ་མང་བོ་ཞིག་ལ་ཐུན་མོང་གི་སྐྱོན་ཞིག་ཡོད་པ་ནི་ཁོ་ཚོས་ནམ་ཡང་མི་ཞིག་གམ་གནད་དོན་ཞིག་ལ་དཔྱད་པ་གཏོང་སྐབས་ཡོངས་ཁྱབ་རང་བཞིན་དང་མཚུངས་བསྡུར་རང་བཞིན་གྱི་དཔྱད་པ་གཏན་ནས་གཏོང་མི་ཤེས་པ་དེ་རེད།ཀླུ་མཁར་བྱམས་ལ་དགག་བཞག་གཏོང་མཁན་ཚོ་ཡང་འདིའི་ཁོངས་གཏོགས་ཀྱི་གྲས་རེད།གནད་དོན་དང་བོར་ཀླུ་མཁར་བྱམས་ཕར་ཤོག་བོད་མི་མང་སྤྱི་འཐུས་སུ་ཡིན་ཡང་སྐྱོན་མེད་སངས་རྒྱས་ནང་བཞིན་གྱི་མི་ཞིག་ནམ་ཡང་ཡོང་ཐབས་མེད་པ་དེ་ཤེས་དགོས།འོན་ཀྱང་།མདོ་སྨད་ཀྱི་ཤེས་ཡོན་ཡོད་མེད་ཀྱི་མི་མང་ཚང་མ་དེ་འདྲ་ཞིག་ནམ་ཡང་ཡིན་མི་སྲིད།
གཅིག
མི་རྐྱང་ཀླུ་མཁར་བྱམས་ཟེར་བ་འདི་རང་ཉིད་ལ་སྒེར་ཚུགས་ཀྱི་ལྟ་བ་ཡོད་མཁན་ཞིག་རེད་ལ། རང་ཉིད་ཀྱི་ལྟ་བ་དེ་བཤད་ཕོད་ལ་ལག་ལེན་ཐོག་ནས་སྒྲུབ་ཀྱང་ཕོད་མཁན་ཤིག་རེད།
བདེན་དཔང་། བོད་གཞུང་ཉམས་ཞིབ་ཀྱི་ལས་ཁུངས་ལས་རྩ་དགོངས་ཞུས་པ་དེ་གནད་དོན་དེས་གསལ་བོ་མཚོན་ཐུབ།དྲང་མོར་བཤད་ན་ང་ཚོའི་སྤྱི་ཚོགས་འདིར་ཁ་བཤད་དང་ལག་ལེན་གཉིས་དངོས་སུ་འགྲོགས་ནས་འགྲོ་ཐུབ་མཁན་ག་ཚོད་ཅིག་ཡོད་དམ།
གཉིས།
མི་རྐྱང་ཀླུ་མཁར་འདི་མ་མཐར་ཡང་རྒྱ་ནག་གི་ཁྲིམས་ལུགས་དང་རྒྱ་ནག་གི་སྲིད་ཇུས་སོགས་ལ་དཔེ་ཀློག་ཙམ་མ་ཡིན་པར་ལོ་ངོ་མང་བོར་རྒྱ་ནག་གི་ཁྲིམས་ལུགས་སློབ་སྦྱོང་དང་རྒྱ་ནག་རང་གི་འཛིན་སྐྱོང་སྐོར་ལ་ཉམས་མྱོང་ཡོད་མཁན་ཞིག་རེད།
བདེན་དཔང་། ཁོང་གིས་རྒྱ་ནག་གི་སློབ་གྲྭ་ཆུང་འབྲིང་ཚང་མ་མཐར་ཕྱིན་པ་མ་ཟད་རྒྱ་ནག་གི་བཙོན་ཁང་སོགས་སུ་རྒྱ་ནག་གི་ཁྱིམས་ལུགས་སྐོར་གྱི་ཟུར་ཁྲིད་པ་ཡང་བྱེད་མྱོང་ཡོད་པ་ཞིག་རེད།དེ་མ་ཟད་མི་རྐྱང་འདི་རྒྱ་ནག་རང་གི་འཕྲུལ་ལས་ཆེད་སྦྱོང་སློབ་གྲྭ་ཆེན་མོ་ཡང་འགྲིམས་མྱོང་མཁན་ཞིག་རེད།
གསུམ།
མི་རྐྱང་འདི་བོད་ཡིག་མི་ཤེས་པ་རང་གི་གཟི་བརྗིད་དུ་རློམ་མཁན་གྱི་སྤྱི་འཐུས་ཁ་ཤས་དང་མི་འདྲ་བར་བོད་མི་རིགས་ཀྱི་སྲོག་རྩ་རང་གི་སྐད་ཡིག་ལ་དགའ་ཞེན་དང་སྐད་ཡིག་ལ་བླ་མེད་ཀྱི་བརྩི་བཀུར་ཞུ་མཁན་ཞིག་རེད།
བདེན་དཔང་། ཕྱི་ལོ ༢༠༠༧ ལོར་ <> ཞེས་པའི་དེབ་ཞིག་བོད་ཡིག་ཐོག་བསྒྱུར་བ་དང་།དེ་མིན་བོད་ཡིག་དྲ་ཐོག་གི་ཟིན་བྲིས་པ་གལ་ཆེན་ཤིག་ཡིན།ད་ལྟའི་བོད་ཀྱི་སྤྱི་འཐུས་ཚོའི་ཁྲོད་དུ་བོད་ཡིག་གི་དྲ་བ་དེ་དག་ཀློག་མཁན་དང་བོད་ཡིག་དྲ་ཐོག་ཏུ་རྩོམ་ཡིག་འབྲི་མཁན་ག་ཚོད་ཅིག་ཡོད་པ་ཁྱེད་ཚོས་གསལ་བོ་མཁྱེན་ངེས་ཡིན།
བཞི།
མི་རྐྱང་འདི་ལ་ཆ་རྐྱེན་གལ་ཆེན་ཞིག་ཡོད་པ་ནི་ས་ཆའི་ཚོད་ཀྱི་རི་དྭགས་བཞིན་མི་གཞིའི་སྙིང་སྟོབས་ཀྱི་ཁྱད་ཆོས་ཅུང་ཞིག་ཡོད་པ་དེ་རེད།དེ་ཡང་ཁ་གསལ་དུ་བཏང་ནས་བཤད་ན་ཁ་གཡང་དང་ཆོས་ལུགས་ཀྱི་དར་ཆ་བེད་སྤྱད་ནས་རང་ཉིད་དཀར་གཙང་དང་ཡང་དག་པ་ཞིག་ཏུ་མི་བཟོ་བ་དེ་རེད།
བདེན་དཔང་། ཁོའི་གསར་འགྱུར་བརྒྱུད་ལམ་ཁག་གི་དྲི་བ་དྲིས་ལན་དང་ཆབ་སྲིད་བཙོན་མའི་མིང་ཕྲག་པར་ཁུར་ནས་ཕྱི་རྒྱལ་ཁག་དུ་བྲེལ་བྲེལ་འཚུབ་འཚུབ་ཀྱིས་འཕུར་འགྲོ་མཁན་ཚོ་དང་མི་འདྲ་བར་བོད་སྤྱི་ཚོགས་ནམ་ཡང་མི་གློད་པ་དེ་རེད།
འོན་ཀྱང་།བོད་མི་མང་སྤྱི་འཐུས་དག་ནི་ནམ་ཡང་བོད་མི་ཡོངས་ཀྱི་ངོ་ཚབ་ཡིན་པ་ལས་མདོ་སྨད་པ་གཅིག་བུས་ཚབ་མཚོན་མིན་པར་བརྟེན་ང་ཚོས་བསམ་བློ་རྒྱ་ཆེ་ས་ལ་གཏོང་བ་དང་དང་མིག་གིས་ཐག་རིང་ས་ལ་བལྟ་དགོས་པ་གལ་ཆེའོ།།
སྐུ་ཉིད་གནས་ལ་གནས་ཚུལ་རྒྱས་པ་དང་བགྲོ་གླེང་ལྷུག་པོ་གནང་འདོད་མཆིས་ཚེ། གཤམ་གྱི་བོད་རྒྱ་ཟུང་འབྲེལ་གྱི་དྲ་ཐག་འདི་ལ་ཕེབས་རོགས།
http://www.darig_thokmay.blogspot.com
གནས་ཚུལ་འདི་ང་ཚོ་ལྡི་ལིའི་གཞོན་སྐྱེས་ཁག་ཅིག་གིས་སྤེལ།
༡ དགེ་འདུན་རྒྱ་མཚོ། ལྡི་ལི་གཙུག་ལག་སློབ་གྲྭ་ཆེན་མོ།
༢ ཤེས་རབ། ནེ་རོ་གཙུག་ལག་སློབ་གྲྭ་ཆེན་མོ།
༣ གཅན་སྣང་བ་ཚེ་རིང་བཀྲ་ཤིས། ཀེ་རོ་རེའི་མཱ་མཐོ་རིམ་སློབ་གླིང་།
༤ སྦྲ་རིགས་ཐོགས་མེད། ཧིན་རྡུ་གཙུལ་ལག་སློབ་གླིང་བཅས་སོ།།
ཆོས་སྲིད་ཟུང་འབྲེལ་ལམ་ལུགས་སྒྱུར་དགོས་ན། བཅའ་ཁྲིམས་རྙིང་བ་མེ་ལ་བསྲེགས་དགོས་ཤིང།
ཏཱ་ལའི་བླ་མའི་སྐུ་དབང་ལེན་དགོས་པས། བཀའ་བློན་ཁྲི་བས་དབང་སྒྱུར་ནུས་མ་ཡིན། ཀླུ་མཁར་འཁོར་བཅས་སྤྱི་འཐུས་སླེབས་ཐབས་གལ།
མང་མང་རང་དབང་དམངས་གཙོའི་སྐྱབས་བཅོལ་ཟེར། ཁྱོད་ཀྱིས་ཨེ་ཇབ་མུའུ་བྷ་ར་ཁུར་བསྡུར། གནམ་ས་ལྟ་བུའི་བར་ཁྱད་འདི་བདེན་ནམ།
འདི་འདྲའི་མཐོ་རྒྱག་དམའ་རྒྱག་བྱེད་སྟངས་འདིས། གང་གི་ནང་སྙིང་རུལ་བ་ད་གཟོད་ཚོར།
སྐབས་བཅོ་ལྔའི་མདོ་སྨད་སྤྱི་འཐུས་ཀྱི་འོས་མི་ཨ་ཚོགས་ཀླུ་མཁར་བྱམས་ནི། ༡༩༧༡ མདོ་སྨད་མཚོ་སྔོན་མངའ་ཁོངས་ཀྱི་ཨ་ཚོགས་ལྷ་སྡེ་རུ་སྐྱེས། རིམ་གྱིས་སློབ་གྲྭ་ཆུང་འབྲིང་འགྲིམས་ཏེ། བོད་རྒྱ་གཉིས་ཀྱི་སྐད་ཡིག་ཐོག་སློབ་སྦྱོང་བྱས་ནས་ཞིང་ལས་འཕྲུལ་ཆས་ཐོག་ཆེད་སྦྱོང་གནང་། ༡༩༩༠
རྒྱ་གར་ལ་བཙན་བྱོལ་དུ་ཡོང་ནས་སུ་ཇཱ་སློབ་གྲྭར་ལོ་གཉིས་རིང་དབྱིན་ཡིག་ཆེད་སྦྱོང་གནང་། དེ་ནས་བོད་ནང་གསང་སྟབས་ཀྱིས་ཕྱིན་ནས་འཐབ་གྲོགས་གཞན་དག་དང་མཉམ་དུ་བོད་དོན་འཐབ་རྩོད་ལ་ཞུགས་པར་བརྟེན།
༡༩༩༢ རྒྱ་གཞུང་གིས་འཛིན་བཟུང་གིས་ལོ་བཅུ་བདུན་གྱི་བཙོན་ཐག་བཅད། བཙོན་ཁང་ནང་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་ནས་གཟུགས་པོར་ན་ཚ་ཚབ་ཆེན་ཕོག་པར་བརྟེན།
༡༩༩༥སྨན་བཅོས་ཁག་ཐེག་འོག་གློད་གྲོལ་ཐུབ་ཙམ་བྱུང་།ལོ་བཞི་མ་ཟིན་ཙམ་རིང་བཙོན་ཁང་ནང་མར་ཁི་སུའུ་དངོས་གཙོ་རྩོད་སྒྲུབ་རིག་པའི་གཞུང་ལུགས་དང་། བྱེ་བྲག་རྒྱ་གཞུང་གི་མི་རིགས་སྲིད་བྱུས་ཟེར་བའི་སྐོར་ལ་རང་སྦྱོང་གང་ཐུབ་བྱས་པ་དང་བཙོན་པ་ཚོར་ཁྲིམས་ལུགས་ཟུར་ཁྲིད་པའི་འགན་ཡང་ཁུར།
༡༩༩༨ སླར་ཡང་བྲོས་བྱོལ་དུ་ཡོང་ཐུབ་ཙམ་བྱུང་ནས་ལྡི་ལི་རུ་ལོ་གཅིག་ཙམ་ལ་དབྱིན་ཡིག་ཆེད་སྦྱང་གནང་བ་མ་ཟད། མཁས་དབང་ཟླ་བ་ནོར་བུའི་དྲུང་ནས་དམངས་གཙོ་དང་སྤྱི་ཚོགས་རིང་ལུགས་ཀྱི་རྒྱབ་ལྗོངས་ཐད་ཟབ་ཁྲིད་སོགས་ཡང་ཡང་ཐོབ།
ཁོང་བཙན་བྱོལ་ལ་འབྱོར་བ་ནས་བོད་གཞུང་བདེ་སྲུང་ཉམས་ཞིབ་ཁང་གི་ཉམས་ཞིབ་པ་དང་། ཡིག་སྒྱུར་བ། དྭང་སློབ་དབུས་དམག་སྒར་ཁང་གི་རྒྱ་ཡིག་དགེ་རྒན་སོགས་གཞུང་འབྲེལ་གྱི་ལས་དོན་ལོ་མང་རིང་བསྒྲུབས་ཡོད་པ་མ་ཟད། ལས་ཞོར་ནས་བོད་ཕྱི་ནང་གཉིས་ཀྱི་དུས་དེབ་ཁག་དང་། དྲ་རྒྱ་སོགས་སུ་རྩོམ་ཡིག་སྣ་ཚོགས་སྤེལ་དང་སྤེལ་མུས་ཡིན།
༢༠༠༧ ལོར་དབྱིན་ཡིག་དང་རྒྱ་ཡིག་གཉིས་ནས་བསྡུས་བསྒྱུར་གྱིས <>ཞེས་པའི་དེབ་ཆུང་ཞིག་ཀྱང་བཏོན་ཡོད་ལ། <>ཟེར་བའི་བརྙན་དེབ་ཅིག་ཀྱང་ཁོང་གིས་རྩོམ་སྒྲིག་བྱས་ནས་ཐོན་གྲབས་ཡོད།
མདོར་ན། ཁོང་རིག་གནས་ཚོགས་འདུ་སྣ་ཚོགས་དང་། སློབ་གྲྭ་ཁག་གིས་མགྲོན་འབོད་གནང་བ་ལྟར་ཚོགས་འདུ་ཆེ་མ་ཆུང་གསུམ་ལ་ཞུགས་པ། བརྒྱུད་ལམ་ཁག་གི་བཅར་འདྲི་འདྲ་མིན་གནང་བ་བཅས་དུས་ཚོད་མང་ཆེ་བ་དེར་རྫོགས་འགྲོ་གི་ཡོད་ལ། ད་ལོ་དགུ་བཅུ་གསུམ་ཀྱི་ཚོགས་ཆེན་ཐེངས་ལྔ་བའི་ཐོག་རྒྱུན་ལས་ཚོགས་གཞོན་ལ་འདེམས་ཐོན་བྱུང་བ་ལྟར། ད་ལྟ་དགུ་བཅུ་གསུམ་ཚོགས་པའི་ཚོགས་གཞོན་གྱི་འགན་བཞེས་བཞིན་ཡོད།
༢༠༠༩ ལོར་ཁོང་སྒེར་གྱིས་གོ་སྒྲིག་འོག་སིམ་ལར་(ན་གཞོན་ཤེས་ཡོན་པའི་བགྲོ་གླེང་ཚོགས་ཆེན)ཞིག་ཚོགས་པའི་སྟེང་ནས།
༢༠༡༢ལོར་༸རྒྱལ་དབང་བཅུ་གསུམ་པ་ཆེན་པོའི་བོད་རང་བཙན་ཁྱབ་སྒྲགས་གནང་ནས་ལོ་བརྒྱ་འཁོར་བའི་དུས་དྲན་དེ་བཞིན་༼བོད་རང་བཙན་༽གྱི་བསྒྲགས་གཏམ་དོད་དུ་སྲུང་བརྩི་གནང་རྒྱུ་གཏན་འཁེལ་བ་དང་། ད་དུང་ཚོགས་ཐོག་དེར་མ་འོངས་བོད་རང་བཙན་རྒྱལ་ཁབ་ཀྱི་རྩ་ཁྲིམས་གསར་བའི་ཟིན་བྲིས་ཚོགས་ཆུང་ཤིག་སྔ་ས་ནས་གྲ་སྒྲིག་དགོས་སྐོར་གྱི་འཕྲོས མོལ་བྱུང་བ་ལྟར། ཁོང་དེང་སྐབས་ཚོགས་ཆུང་འདི་གཉིས་ཀྱི་རྐང་འཛིན་མི་སྣའི་གྲས་ཀྱང་ཡིན་པ་བཅས་ཨ་ཚོགས་ཀླུ་མཁར་བྱམས་ཀྱི་ངོ་སྤྲོད་མདོར་བསྡུས་སུ།
མདོ་སྨད་ཀྱི་ན་གཞོན་དང་བླངས་པ་ཁག་གིས་འགྲེམས་སྤེལ་བྱས།
འབྲོང་བུ་ཟླ་བ་ཚེ་རིང་གིས་སྤྱི་ལོ་ ༢༠༡༡ ཟླ་ ༢ ཚེས་ ༡༦ ལ་ གསལ་བསྒྲགས་ཀྱི་གྲས་སུ་བཀོད། |
ཁ་བརྡ་དྲ་རྒྱ་ལས་བཤུས།
གནས་ཚང་ལགས། ང་སུ་ཡིན་མིན་གཙོ་བོ་མ་རེད། ང་ཕྲག་དོག་ཅན་ཞིག་ཡིན་མིན་ཀླུ་མཁར་བྱམས་ལགས་ལ་སྐད་ཆ་ཕྲིས་ར་གསལ་བོ་ཤེས་ནི་རེད། ཁོང་ཕེབས་ན་ངས་གུས་བརྩི་ཆེན་པོས་བློ་འདྲི་དང་དོགས་གཅོད་བྱེད་འདོད་ཡོད། དེ་ལྟར་ཁོང་ལ་ཐུག་ན་ཅིག་བཤད་རོགས་ཞུ།
ཆོས་འབྱོར་ཟེར་བ་འདི་སུ་རེད། ཨ་མདོ་བ་ཕྲག་དོག་ཅན་ཞིག་མིན་འགྲོ མཉམ་ཞུགས་བྱེད་རྒྱུ་ཡིན་ན་བཀའ་བློན་འོས་མིའི་སྐོར་མི་གླེང་བར་ག་རེ་ལབ་ཀྱི་ཡོད་དམ། བཀྲས་མཐོང་ལགས་ཀྱིས༼དབུ་མའི་ལམ༽ལ་གྲོས་ཚོགས་བརྒྱུད་ནས་འགྱུར་བ་གཏོང་གི་ཡིན་གསུངས་འདུག ཀླུ་མཁར་བྱམས་ལགས་ཀྱིས་དེ་ལ་འགྲེལ་བཤད་བསྐྱོན་བཞག ད་དེ་ལ་དགག་པ་རྒྱག་གི་ཡིན་ནམ། རྒྱབ་བསྐྱོར་རྒྱག་གི་ཡིན། དེ་མ་གཏོགས་འདི་ནང་འཁྲུག་རྒྱག་ས་མ་རེད་ལ། ཆོལ་ཁ་གཞན་པར་ནད་དུག་བགོ་སའང་མ་རེད། འདི་དྲ་མགྲོན་ཚང་མ་ལོས་མཁྱེན་པའི་ཐོག་ནས་གཟབ་གཟབ་གནང་རོགས།
ཀླུ་མཁར་བྱམས་ལགས། ང་ཆོས་འབྱོར་ཉམས་ཞུགས་བྱེད་ཀྱི་ཡིན། ཡིན་ནའང། ངས་གུས་བརྩི་ཆེན་པོས་འདི་འབྲེལ་གྱི་སྐད་ཆ་བཤད་ཡོད་ཀྱང། ཁྱེད་ཀྱིས་དྲང་ལྡོག་ཞེས་པའི་ཚིག་དེ་བེད་སྤྱོད་གནང་དོན་ག་རེ་ཡིན་མིན་ཕར་ལ་བཞག་ནས།
ཆབ་སྲིད་བཤད་རྒྱུ་ཞིག་མིན་ཡང། ཁུངས་ཐུབ་བཤད་པ་དང་འཕྲལ་ཕུགས་ལ་ཕན་གནོད་འབྲེལ་ཚུལ་གྱིས་ཡིན་པས་བབ་བརླིང་བརྟན་གསུམ་མེད་ཚེ། སྤྱི་མ་སྦོམ་གྱིས་རང་གིས་མི་འདོད་པའི་སྲིད་བྱུས་དེ་ནི་ཚོས་རྗས་ཉག་གཅིག་ཏུ་གླེང་ན་ང་འདྲ་བ་ཚོའང་གོད་མོ་ཤོར་གི་འདུག་ལ།
དེ་ལས་ཀྱང་སྐུ་ཉིད་རྒྱུས་མེད་ཡིན་པའི་བྱུང་རབས་དང་རིན་ཐང་གི་ངོས་ནས་བཤད་ཀྱང། ལྟ་གྲུབ་ལ་བརྟན་ཚུགས་དགོས་ཤིང། ཆབ་སྲིད་བརྗོད་ཚིག་ལ་རིགས་ལམ་རྣམ་དག་དང་གཞན་དཔེ་རིག་འགྲེས་ཀྱི་རྒྱབ་ལྗོངས་ཡོད་ལོས་དགོས་ཏེ། ཁྱེད་ཀྱི་གསུང་དུམ་འདིའི་ནང་གི་གྱ་ཚོམ་གྱི་མཚུངས་བསྡུར་དེ་དང། རང་གིས་མི་འདོད་སར་སྡོམ་ཚིག་བཀོད་པ་གཉིས་ནར་ནར་རེད་དམ། གྲུ་བཞི་རེད་ལབ་ན། ཁྱེད་ཀྱིས་གཉིས་ཀ་ཡིན་གསུངས་ས་རེད་པཱ།
བཅར་འདྲི་འདི་དང་འབྲེལ་བའི་དྲང་ལྡོག་གི་དྲ་གྲོགས་རྣམ་པ། སྤྱིར་ཆབ་སྲིད་ནི་ལས་རྒྱུ་ཞིག་ནས་བཤད་རྒྱུ་ཞིག་མིན་ལ། དེ་ནི་རུའུ་སུའུ་སྐད་ཆ་རེད། སྲིད་དོན་གྱི་ལྟ་གྲུབ་ལབ་ན། ལབ་གླེང་ཙམ་ལས་ཡོད་ཚད་ལས་རྒྱུ་ཡོད་ནི་མ་རེད། དེ་ཤེས་པའི་ཐོག་ནས་བགྲོ་གླེང་བྱ་འདོད་ཡོད་ན་ང་ར་མཉམ་ཞུགས་བྱ་ཆོག ཁ་དཀྱོག་ལ་འཁྱེར་མཁན་ཚོར་ངས་ནམ་ཡང་ཅ་སུན་པོ་མི་བཟོ། ལྷན་རྒྱས་ནས་ཀྱང་དེ་དོན་གནང་སྐྱོང་ཡོང་བ་ཞུ༌༌༌༌༌༌
བཅར་འདྲིའི་ཁྲོད་ཀྱི་སྐད་ཆ་ཆེས་ཚབས་ཆེ་ཤོས་ཤིག་དང་ང་ཚོས་ངེས་པར་གླེང་སློང་དགོས་པ་ཞིག་ནི་གཤམ་གྱི་འདི་སྟེ།
་་་་་་་བློ་བཟང་སེངྒེ་ཡར་བསླེབས་པ་འདི་འགྱུར་བ་ཞིག་རེད། ང་ལ་མཚོན་ན་འགྱུར་བ་ལ་དགའ། དེར་བརྟེན་ངས་སྔོན་ནས་སྐུ་དྲག་གི་ཁྱིམ་རྒྱུད་དང་། བླ་མས་བཟུང་བའི་ཆོས་སྲིད་ཟུང་འབྲེལ་གྱི་ལོ་བཞི་བརྒྱ་ལྔ་བརྒྱའི་རིང་གི་འགྲོ་སྟངས་འདི་མཚམས་ཤིག་འཇོག་རྒྱུའི་སྐོར་བཤད་ཀྱི་ཡོད།
ངས་འདི་ལྟར་བཤད་དུས་འབྱོར་མེད་གྲལ་རིམ་གྱིས་སྲིད་དབང་སྒེར་འཛིན་བྱ་དགོས་ཀྱི་འདུག་གམ། ཡང་ན་འབྱོར་ལྡན་གྲལ་རིམ་གྱིས་སྲིད་དབང་སྒེར་འཛིན་བྱ་དགོས་ཀྱི་འདུག་ཟེར་བ་ལྟ་བུའི་སྐད་ཆ་མིན་པར། དཔེར་ན། ཨེ་ཇབ་ལུང་པར་སྲིད་འཛིན་མུའུ་བྷ་ར་ཁུས་ལོ་ངོ་སུམ་ཅུར་བཟུང་བའི་མཇུག་འབྲས་ཚང་མས་མཐོང་བཞིན་པ་དེ་རེད། དེ་ལྟར་ཁྱིམ་བརྒྱུད་དང་། ཡང་ན་ཚོགས་ཁག་ཅིག་གིས་ཆབ་སྲིད་ཀྱི་དབང་ཆ་འཛིན་ཡུན་རིང་དྲགས་ན། མི་རྣམས་ཀྱི་སྲིད་དོན་གྱི་དབྱིངས་བརླག་འགྲོ་གི་རེད། དེའི་སྟབས་ཀྱིས་བློ་བཟང་སེངྒེ་ཡར་བསླེབ་ཐུབ་ན་དེ་འགྱུར་བ་ཞིག་རེད་ལ། ངས་དེ་གལ་ཆེན་པོར་བརྩི་ཡི་ཡོད་་་་
གནད་དོན་འདི་ནི་བཀའ་ཁྲི་གཞོན་སྐྱེས་ཤིག་སླེབས་དགོས་པ་ཙམ་ཞིག་གཏན་ནས་མ་རེད།
གནད་དོན་འདི་ནི་བཀས་བཀོད་རྒྱུད་འཛིན་རིང་ལུགས་ལས་ད་དུང་ཉེ་ཚབས་ཆེ་ཤོས་ཤིག་མ་ཡིན་ནམ
ང་ཚོའི་བླ་མ་དང་སྐུ་དྲག་གི་ཁྱིམ་རྒྱུད་སོགས་རྩ་རྫོགས་དགོས་ན་རིག་གནས་གསར་བརྗེ་ཞིག་མ་བསླངས་ཐབས་མེད་རེད།
གལ་ཏེ་བླ་མ་དང་ཁྱིམ་རྒྱུད་དེ་དག་གིས་དབང་མ་བཟང་ན་བོད་ཀྱི་ཆོས་སྲིད་ཟུང་འབྲེལ་ལམ་ལུགས་ཀྱི་མཇུག་རྫོགས་པ་ཞིག་ཡིན་ནམ།
དོན་དམ་པའི་ཆོས་སྲིད་ཟུང་འབྲེལ་གྱི་དགེ་སྐྱོན་ཅི། གང་ཆེ། གང་ཕན།
རྣམ་དཔྱོད་དང་ལྡན་པ། སེམས་ཁུར་དང་ལྡན་པ། འགན་དང་ལེན་བྱེད་མཁན་ཚོས་ངེས་པར་གནད་དོན་འདི་གླེང་སློང་ཐག་གཅོད་གཙང་མ་བྱེད་དགོས།
༼ ཕར་ཞོག་ ༽ ཅེས་བཟོ་རོགས་ཞུ།
སྔོན་མ་ཉན་ཞིབ་དོགས་འདྲིའི་སྐབས། ཚོགས་གཙོ་ཟུར་པ་ཀརྨ་ཆོས་འཕེལ་ལགས་ཀྱིས་འདི་འདྲ་ཞིག་གསུངས་ཡོད། ༼ ང་སྤྱི་ཚོགས་ནང་སྐད་ཆ་མ་འདྲ་བ་བཤད་མཁན་གྱི་གྲས་ཡིན། ཡིན་ནའང། ངས་མ་འདྲ་བ་དེའི་ཁུངས་སྐྱེལ་ཐུབ་ཀི་ཡོད། ༽ ཅེས་གསུངས་ཡོད། དེ་མཚུངས་ཀླུ་མཁར་བྱམས་ལགས་ཀྱི་སྲིད་དོན་གོམ་འགྲོས་ལ་མ་འདྲ་བའི་ཤེད་ཤུགས་ཆེན་པོ་ཡོད་པ་རེད། ཡིན་ནའང། ངས་གསལ་བོ་བཤད་ཐུབ་པ་ཞིག་དང། དྲི་བ་བཏང་གི་མེད་པ་ཞིག་ནི། སྔ་མོར་ཁོང་གིས་ཁྱིམ་བརྒྱུད་ཆེན་མོ་གསུམ་ཡང་བསྒྲགས་བསྐྱར་བསྒྲགས་བྱས་ཡོད། ད་ཡང་འཇུ་ཆེན་དང། གཞན་གསུམ་བསྐྱར་བསྒྲགས་བྱེད་རྒྱུ་མོས་མཐུན་གནང་གི་མེད་མོད། དྲང་ཚུགས་ཟེར་བ་འདི་དོན་དམ་གྱིས་ཡོད་ན། སྲིད་དོན་ཕར་ཕྱོགས། ལོ་རྒྱུས་ཀྱི་ངོས་གཅིག་པུ་ནས་མཚུངས་བསྡུར་བྱས་ཏེ་སྦོམ་བཤད་དེ་ཅུང་རྒྱ་བསྐྱེད་རོགས་ཞུས་པ་ཡིན་ན། དེ་ཕལ་ཆེར་ལན་ཡོད་པ་མ་རེད། དེ་ངས་ཁོང་ལས་ང་ལོ་ལྔ་བཅུ་བོ་འདིའི་ལོ་རྒྱུས་ལ་མྱོང་བ་ཡོད་ཅེས་ལབ་རྒྱག་རྒྱུའི་དོན་དག་མིན་པར། སྐད་ཆ་བཤད་ཕྱོགས་ཤིག་དང། སྐད་ཆའི་ནང་སྙིང་གཉིས་ལ་བར་ཁྱད་ཡོད་པ་དེ་ཤོད་རྒྱུའི་དོན་དུ་ཡིན།
སྐད་ཆ་གནད་འགག་ཅན་དང་བསམ་བློ་རེ་ཞིག་མ་བཏང་ན་གཏིང་མི་ལོན་པའི་སྐད་ཆ་འགའ་ཡང་བཤད་འདུག་པས་དགའ་ཡོད།
བཅར་འདྲི་ཡག་པོ་བྱས་འདུག་ལ་དྲིས་ལན་ཡང་ཡག་པོ་བརྒྱབ་འདུག
ཀླུ་མཁར་བྱམས་ལགས། བློ་སེང་བཀའ་ཁྲིར་སླེབས་པ་ཡིན་ན་ལམ་དབུ་མ་ལ་འགྱུར་གཏོང་པའི་རེ་བ་ཡོད་པས། ཁྱེད་རང་གིས་ཉིན་མོའི་རྨི་ལམ་བཏང་མ་སྡོད་ལྭོ།
ཉེ་ཆར་མདོ་སྨད་ཚོགས་པས་ཀླུ་མཁར་ལ་མ་དགའ་སྡང་ཟུག་ལྟ་བུ་བྱས་ནས་མགོ་འབུར་དུ་མི་འཇུག་པའི་སྲིད་ཇུས་དེའི་འོག་ནས་ཁོང་འབུར་ཨེ་ཐུབ་སྙམ་པའི་སེམས་ཁྲལ་ཞིག་བྱུང་།
དེ་རིང་གི་བཀའ་ལན་འདི་ཚོ་ལ་ཀློག་སྐབས་གཞན་དང་མ་འདྲ་ཞིག་འདུག རང་གཤིས་ལ་ཡོན་ཏན་ཡོད་ན་ཕྱིའི་གནོན་ཤུགས་ཀྱིས་ལས་སླ་བོར་འཇོམས་ཐུབ་པ་ཞིག་རེད་མི་འདུག་ཨང་སྙམ་པའི་དགའ་ཚོར་ཞིག་བྱུང་། ད་དུང་ཁོང་ལ་སྲིད་དོན་གྱི་འབག་བཙོག་དེ་ཙམ་འགོས་མི་འདུག ཁོང་གི་དྲང་གཤིས་རྒྱལ་གྱུར་ཅིག
ཀླུ་མཁར་བྱམས་འདི་ཉིན་རེ་ནས་ཉིན་རེ་བཙན་བྱོལ་སྤྱི་ཚོགས་ནང་ཁ་ལས་རླུང་རྟ་ཇེ་དར་ཇེ་དར་རེད། ད་རུང་དགའ་འོས་པ་ཞིག་ལ་ད་ལོ་་་་ཚེ་གཅིག་གཟའ་ཟླ་ཞིག་ཀྱང་དབྱེ་བ་ཨ་ཁུ་ཤེས་རབ་ལག་ནས་ཕྲོགས་འདུག་པས་ངོ་མ་བུ་རྒོད་རེད།
ཀླུ་མཁར་བྱམས་ཀྱི་ཤེས་འཇོན་གང་ཞིག་གིས་ཐོག་ནས་ཁོང་རྣམ་པ་གསུམ་ལ་དཔྱད་བརྗོད་འཇོག་གི་ཡོད་པ་རེད།ཐུགས་རྗེ་གཟིགས་ཀླུ་མཁར་བྱམས་ཀྱི་ཤེས་ཚད་ལག་འཁྱེར་ངོ་ཤེས་མཁན་འདྲ་ཡོད་ན་ངོ་སྤྲོད་གནང་རོགས།
དགུ་བཅུ་གསུམ་ཚོགས་པའི་ཚོགས་གཞོན་འདི་ད་ཡིན་ན། སྤྱི་འཐུས་ཚོགས་གཙོར་འོས་ཤིང་འཚམས་པ་ཞིག་འདུག གནད་འགག་ཅན་ག་ཚད་ཅིག་གསུངས་འདུག ཚང་མ་ལོས་ཤོད་དང་། དེང་གི་བར་སུ་ཞིག་གིས་འདི་འདྲ་དྲང་པོ་དྲང་བཞག་དང་མང་ཚོགས་ཀྱིས་ཧ་གོ་དགོས་པ་དག་གསུང་མྱོང་ངམ།
མི་མཐུན་ལྟ་སྤྱོད་གླེང་གལ་ཆེ། འགལ་བ་གཅིག་ཏུ་བཟླུམ་གལ་ཆེ།
སྲིད་ཇུས་འཕོ་འགྱུར་འགྲོ་མིན་དེ། བཀའ་ཁྲིར་རག་ལུས་ཡིན་ནམ་ཅི།
བཀས་བཀོད་རྒྱུད་འཛིན་ལམ་ལུགས་དེ། ད་དུང་ཡོད་པ་བདེན་ནམ་ཅི།
གུང་ཁྲན་ཏང་གི་སྐྱོན་བརྗོད་དེ། བདེན་པ་ཡིན་ནམ་སྐྱབས་བཅོལ་གཞུང།
རྒན་གཞོན་བརྗེས་ཙམ་གསར་བརྗེ་འམ། དོན་གྱི་འགྱུར་བ་ཅི་ཞིག་ཡིན།
མ་འགྱུར་མི་བཟང་རྒྱུ་མཚན་ཅི། ཅི་ལ་བབ་བརླིང་བརྟན་གསུམ་ཟེར།
བཅར་འདྲི་འདིའི་ནང་དུ་སྐད་ཆ་གསར་བའམ་བསམ་བློ་གཏོང་དགོས་པའི་རིགས་ནི་འོག་གི་འདི་ཚོ་རེད།
སྤྱིར་བཏང་ནས་དེང་སྐབས་ང་ཚོའི་སྤྱི་ཚོགས་འདིར་རྒྱབ་ན་མི་འཇུ་ཆེན་ཐུབ་བསྟན་ཡོད་མི་འོས་པ་དང་། ལྷ་ཤུགས་ལྡན་ཡོད་མི་རུང་བ། གལ་སྲིད་དེ་གཉིས་གང་རུང་ཡོད་ཚེ་མི་དེ་ནག་པོ་འདྲ་བོ། ཡང་ཟམ་གདོང་རིན་པོ་ཆེ་དང་རྒྱ་རི་རིན་པོ་ཆེ། རྒྱ་ལོ་དོན་འགྲུབ་སོགས་རྒྱབ་ན་ཡོད་ན་མི་དེ་དཀར་པོ་ཡིན་པ་འདྲ་བོ་ཞིག་བཤད་ཀྱིན་ཡོད་སྟབས། ཆབ་སྲིད་པ་རྣམས་ཀྱིས་གོ་སྐབས་དེ་བཟུང་ནས་ལྷ་སྲུང་ཐོག་དམ་ཚིག་གཙང་རབས་དང་། མིའི་ཐད་ནས་འཇུ་ཆེན་རྒྱབ་ཏུ་མེད་རབས་དག་འབུད་བྱེད་ཀྱིན་པ་ཚང་མས་མཐོང་གསལ་རེད། སྐད་ཆ་དྲང་མོར་བཤད་ན། འཇུ་ཆེན་རྒྱབ་ན་ཡོད་ན་ཧང་སང་རྒྱུ་གང་ཡང་མི་འདུག གཅིག་ནས། འཇུ་ཆེན་ཁྱིམ་རྒྱུད་ཀྱིས་བཙན་བྱོལ་བོད་གཞུང་ལ་དང་བླངས་དཔྱ་དངུལ་འབུལ་བཞིན་པའི་རྒྱལ་འབངས་རྣལ་མ་ཞིག་དང་། གཉིས་ནས། ཟམ་གདོང་རིན་པོ་ཆེ་དང་། རྒྱ་རི། རྒྱ་ལོ་དོན་འགྲུབ་སོགས་ལ་བྱས་རྗེས་ཡོན་ན་འཇུ་ཆེན་ལའང་དེ་མཚུངས་ཤིག་ཡོད་ལ། ངན་ཕྱོགས་ནས་གླེང་ནའང་ཚང་མ་འདྲ་འདྲ་རེད་སྙམ། དེ་བས་མང་ཚོགས་ཀྱི་དཀྲོགས་མགོ་ལངས་ཕྱོགས་ཙམ་གཞིར་བཞག་སྟེ། ཆབ་སྲིད་པ་ཚོས་གནད་དོན་དེའི་གྲས་ཡང་ནས་བསྐྱར་དུ་གསལ་བཤད་བྱ་རྒྱུ་ནི་སྒེར་ལ་གལ་ཆེན་པོ་ཡིན་སྲིད་མོད། སྤྱི་ཚོགས་ལ་བསམ་ན་ཕན་ལས་གནོད་ཆེ་ཞིང་། འདིའི་རིགས་སྲིད་དོན་པ་ཚོ་རང་ཉིད་རང་ལ་གདེང་ཚོད་མེད་པའི་ཕྱོགས་ཤིག་ཀྱང་རེད།
སྐྱབས་སུ་འཆིའོ་གངས་ཅན་འགྲོ་བའི་མགོན། །བྱིན་གྱིས་རླཔས་ཤིག་ཕྱག་ན་པད་མོ་མཆོག །ལས་ངན་པའི་རང་རེ་ཀླད་མེད་འགས། །དོན་མ་རྟོགས་མུ་ཅོར་སྣ་ཚོགས་སྒྲོག །དེང་དུས་ཀྱི་ཤེས་བྱར་སྦྱངས་མདོག་གིས། །སྔོན་ཐོན་གྱི་རྣམ་དཔྱོད་ཡོད་མདོག་གིས། །བོད་གངས་ཅན་ཕུང་ལ་སྦྱོར་ལ་བ་ཡི། །དོན་སྙིང་པོས་དབེན་པའི་ལོང་གཏམ་སྨྲ། །བོད་རང་དབང་གཙང་མ་འཐོབ་འདོད་ན། །ཆོལ་ཁ་གསུམ་རྡོག་རྩ་གཅིག་སྒྲིལ་དགོས། །ཆོལ་གསུམ་གྱི་བོད་མིའི་སེམས་པ་ཀུན། །གཅིག་སྒྲིལ་གྱི་འབྱུང་ཁུངས་ངོ་མ་དེ། །ཁོང་ཡིད་བཞིན་ནོར་བུ་ལས་གཞན་མེད། །དེ་གོ་བར་གྱིས་ཤིག་ཀླད་མེད་ཚོ། །
ང་ཚོ་བོད་ཀྱི་བཀའ་བློན་ཁྲི་པ་དེ། སྒྲིག་འཛུགས་ཤིག་དང་། ལམ་ལུགས་ཤིག་གི་འོག་ཏུ་འགྲོ་ཀྱང་མ་ཡིན་པར། དོན་དངོས་ཐོག་འཛམ་གླིང་འགྱུ་འགྲོས་དང་མཐུན་པའི་གོམས་པ་སྤོ་ཐུབ་མཁན་ཞིག་ཕེབས་ཐུབ་ན་ཁ་ཡོད་ལག་ཡོད་ཡིན་ལ། དེ་མིན་ཁ་སྙན་ཇི་ཙམ་བཤད་ཀྱང་དོན་ངོ་མའི་ཐོག་མི་ཁ་ཤས་ཀྱིས་བེད་སྤྱོད་འོག་སྔར་བཞིན་ཕྱིན་པ་ཡིན་ན་ད་དུང་ཐུས་ཤོར་མུ་མཐུད་འགྲོ་རྒྱུ་ལས་མ་འདས་པས། ད་ལན་བཀའ་བློན་ཁྲི་པའི་འོས་དེ་བློ་བཟང་སེང་གེ་ལ་ཕུལ་ནས་ཁོང་གི་ལོ་ལྔའི་ནང་འགྱུར་བ་ཇི་ཙམ་གཏང་སོང་དང་མ་སོང་བལྟ་རྒྱུ་རེད། གལ་སྲིད་སྔར་བཀའ་བློན་ཁྲི་པ་རྣམས་དང་ཕྱོགས་མཚུངས་ཤིག་ལས་འགྱུར་བ་མ་ཕྱིན་ཚེ། ལོ་ལྔའི་རྗེས་དམངས་གཙོའི་ཐོབ་ཐང་ལོངས་སུ་སྤྱོད་དེ་འོས་མི་གསར་པ་ཞིག་གདམ་རྒྱུ་ལས་གཞན་ཐབས་ཤེས་གང་ཡང་མེད་པས་དེ་དོན་ཐུགས་ལ་བཞག་རོགས།
སྤུན་གྲོགས་ཚོའི་གཟིགས་དང་༽
གཅེན་གཅུང་གཉིས་ཀྱི་རེ་འདུན་བྱས་ས་གཞོན་སྐྱེས་ཤིག་རེད་འདུག
་སྐབས་གཉིས་པའི་བཀའ་ཁྲིའི་གྲུབ་འབྲས་གསལ་བསྒྲགས་བྱས་རྗེས་། གོང་༸ས་མཆོག་གིས་གསར་འགོད་པ་ཞིག་གི་དྲིས་ལན་དུ་།
ངས་བཀའ་ཁྲི་གསར་པ་དེ་གཞོན་སྐྱེས་ཤེས་འཇོན་གཉིས་ལྡན་ཤིག་ལ་རེ་བ་བྱས་ཀྱང་། སྟབས་མ་ལེགས་པ་ཤིག་ལ་བླ་རྒན་མགོ་དཀར་དེ་ཡང་བསྐྱར་འདེབསའདུག་ཅེས་། གོང་༸ས་མཆོག་གིས་དེ་དུས་ནས་གཞོན་སྐྱེས་ཤིག་ལ་ཐུགས་རེ་གནང་བའི་གསལ་ཁ་དེ་སྟོན་ཡོད་།
མ་ཚད་ཡང་དེའི་རྗེས་སུ་གོང་ས་མཆོག་གིས་འདི་ལྟར་གསུང་ཡོད་། ངས་མ་འོང་བཀའ་ཁྲི་དེ་གཞོན་སྐྱེས་ཤིག་ལ་རེ་བ་བྱས་པ་མ་ཚད་བུ་མེད་ཤེས་འཇོན་གཉིས་ལྡན་ཞིག་ལ་ཡང་རེ་བ་བྱས་ཀྱི་ཡོད་ཅེས་གསུངས་མྱོང་།
སྐུ་ཡི་གཅེན་པོ་རྒྱལ་པོ་དོན་གྲུབ་མཆོག་གི་བཀའ་སྤྱི་གཉིས་ཀྱི་སྐོར་གསུང་བཤད་འདི་ལྟར་གནང་འདུག་།
ང་ཚོས་འཐུས་ཤོར་ཞེ་དྲག་ཕྱིན་འདུག་རྗེས་ལུས་ཞེ་དྲག་ཐེབས་འདུག་ཅེས་བཀའ་གནང་གི་ཡོད་རེད་།ང་ཚོས་ངེས་པར་དུ་སྐྱར་ཞིབ་དང་རྩ་འཛུགས་བྱེད་དགོས་ཀྱི་འདུག་།འདས་པའི་ལོ་༥༠་རིང་འགྲིག་ཡོད་ཀྱང་ནོར་ཡོད་ཀྱང་ང་ཚོས་གོམཔ་དེ་འདྲ་ཞིག་སྤོས་པ་རེད་།མ་འོངས་པའི་གོམ་པ་སྤོ་སྟངས་དེའི་ཐད་ལ།
ངའི་བསམ་པར་ངེས་པར་དུ་བསྐྱར་ཞིབ་གནང་དགོས་ཀྱི་རེད་དྲིན་གྱི་འདུག་ལ་ངས་༸སྐུ་མདུན་ལངས་ཞུ་ཡི་ཡོད་།ངའི་བསམ་བློའི་ནང་ལོ་ཆུང་བའི་ནང་བུ་དང་བུ་མོ་མང་པོ་འདུག་།དེ་ཚོར་བསྐྱར་ཞིབ་སོགས་ཀྱི་ལས་ཀ་བཀོལ་རྒྱུ་དེ་།ད་ལྟ་༸སྐྱབས་མགོན་རིན་པོ་ཅེའི་དབུ་ཁྲེད་འོག་ནས་།
འཛིན་སྐྱོང་གི་འགོ་ཁྲིད་མཁན་དང་ཕྱག་ལས་གནང་མཁན་ཚོས་།ལོ་ཆུང་བ་ཚོར་ལས་ཀ་བཀོལ་སྟངས་མཁྱེན་གྱི་མི་འདུག་ལ་།ལོ་ཆུང་བ་དེ་ཚོར་ཡོད་ཆེས་གནང་གི་མི་འདུག་་་ལོ་ཆུང་བ་དེ་ཚོར་ལས་ཀ་སྤྲོད་དགོས་ཀྱི་འདུག་།ལོ་རྒན་པ་ཚོས་དཀའ་ལས་ཞེ་དྲག་སྐྱོན་ནས་ཕྱག་ལས་གནང་པ་རེད་།
ཁོང་ཚོར་རྒན་ཡོལ་གྱི་ཕོག་དང་ལྟ་རྟོག་གི་འོག་ནས་བཞུགས་།ལོ་ཆུང་བ་བུ་དང་བུ་མོ་མང་པོ་ཡོད་པ་དེ་ཚོ་རྩ་འཛུགས་གནང་ཐུབ་ན་།ཤས་ཡོན་དང་དཔལ་འབྱོར་སོགས་ལས་ཀ་གང་ཅིའི་ཐད་ལ་ཕྱག་ལས་གནང་ཐུབ་ཀྱི་རེད་།རྒྱ་མི་ཐད་ལ་ང་ལ་སེམས་ཁྲེལ་མེད་།ག་ལེ་ག་ལེ་གཟིགས་ཀྱི་གཟིགས་ཀྱི་གོམ་པ་སྤོས་གནང་ན་མ་འགྲིག་བ་ཡོད་མ་རེད་བསམ་གྱི་འདུག་།
ང་ལ་སེམས་ཁྲེལ་ཆེ་ཤོས་ང་རང་ཚོ་ནང་ཁོལ་ནང་སྲ་ཐག་ཐག་བྱེད་ཐུབ་པ་།ལས་ཀ་རྩོམ་ཐུབ་པ་།དོན་དངོས་ལག་ལེན་གྱི་ཐོག་ནས་ང་ཚོ་རྡོ་རྩ་ཆིག་སྒྲིལ་ཡག་པོ་ཞིག་ཡོང་དགོས་ཀྱི་དེ་གལ་ཆེན་རེད་བསམ་གྱི་འདུག་།
ད་ལྟའི་སྐབས་ལོ་ཆུང་བ་འདེབས་གནང་དགོས་ཀྱི་འདུག་།་་ལོ་ཆུང་བ་འདེབས་ཟེར་བ་དེ་བཀའ་བློན་ཁྲི་པ་གཅིག་པུ་ལ་ལབས་ཀྱི་ཡོད་མ་རེད་།་་བཀའ་བློན་ཁྲི་པ་ལ་རོགས་པ་མང་པོ་ཞིག་དགོས་ཀྱི་ཡོད་རེད་།བཀའ་བློན་བརྒྱད་དགོས་ཀྱི་ཡོད་ནའང་འདྲ་བཅུ་དགོས་ཀྱི་ཡོད་ནའང་འདྲ་གནད་འགག་མི་འདུག་།ལོ་ཆུང་བ་མང་པོས་ལས་ཀ་མཉམ་རུབ་བྱེ་ཐུབ་དགོས་ཀྱི་འདུག་།།
ཅེས་གསུང་འདུག་པས་དགོངས་འཇག་ཚལ་།།
དངོས་གནས་ལྷད་མེད་པའི་དྲང་གཏམ་བཤད་ཡོད་ཀི། བདེན་པ་རེད། ངས་ཀྱང་ཡང་ནས་བསྐྱར་དུ་བློ་བཟང་སེང་གེ་ཞེས་སྐད་རྒྱག་དོན་ནི་འགྱུར་བ་ཞིག་གི་རེ་བ་ཡིན། ཁ་སང་ཨ་རིའི་རླུང་འཕྲིན་ཁང་གི་སྐར་ཆ་ཁ་ཤས་ཀྱི་དྲི་བ་བསྡུ་རུབ་བྱེད་པ་དེ་ལའང་ཁྱེད་གསུམ་གར་མ་འོངས་པར་འགྱུར་བ་ཅི་ཞིག་གཏོང་རྩིས་ཡོད་ཅེས་དྲིས་ཡོད།
དངོས་གནས་ཤི་མིན་རོ་མིན་དང་ཁ་ཡག་འཁྲབ་སྟོན་ཞིག་གིས་རྫོགས་ཤིང་ཚར་ནས་འགྲོ་བའི་སྤྱི་ཚོགས་འདི་ལ་འགྱུར་བ་ཞིག་མ་སོང་བར་འཛམ་གླིང་སྟེང་གི་ཆེས་རུལ་སོང་བ་ནི་ང་ཚོ་ཆགས་ངེས་པ་རེད།