ལོ་ཆེ་ཆུང་དང་ཤེས་ཡོན་ཡོད་མེད་ཀྱི་འགྲན་བསྡུར་མ་རེད།

སང་ཕྱི་དྲོར་ངྷ་ས་ཉིན་སློབ་རྒྱལ་ཡུལ་ཆེན་མོའི་ཚོགས་ཁང་དུ་ན་གཞོན་མཐུན་ཚོགས་ཀྱི་གོ་སྒྲིག་འོག སྐབས་གསུམ་པའི་བཀའ་ཁྲིའི་འོས་མི་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས་མང་ཚོགས་ལ་གཏམ་བཤད་དང་དྲི་བ་དྲིས་ལན་གྱི་འཛུ་འཛོམས་ཤིག་བསྐངས་ཡོད་ཅིང་། བགྲོ་གླེང་དེའི་ཐོག་མར་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་མི་ཚེའི་ལོ་རྒྱུས་དང་ ༡༩༦༧ ལོ་ནས་ད་ལྟའི་བར་བོད་བསྟན་པ་ཆབ་སྲིད་ཀྱི་སླད་དུ་སྲི་ཞུ་སྒྲུབ་པའི་གློག་བརྙན་ཐུང་ངུ་ཞིག་ཀྱང་གཟིགས་འབུལ་ཞུས་སོང་།

དེའི་རྗེས་བཀྲས་མཐོང་ལགས་ཀྱིས་གཏམ་བཤད་གནང་དོན། ཉེ་བའི་ཆར་རྒྱ་གར་ནང་གི་བོད་རིགས་འདུས་སྡོད་ཁག་ཕལ་ཆེ་བར་གཏམ་བཤད་དུ་ཕྱིན་པ་ཡིན། སྐབས་དེ་དག་ཏུ་ང་རང་ལ་དྲན་གསོ་དང་ས་གནས་ས་ཐོག་གི་གནས་སྟངས་ལ་རྒྱུས་ལོན་ཁ་གསལ་བྱུང་། གཏམ་བཤད་སྐབས་གཞིས་ཆགས་དང་སློབ་གྲྭ་ཁག་གི་གནད་དོན་སྐོར་དང་ལྷག་པར་དུ་མི་མང་གི་དྲི་བ་ཤུགས་ཆེ་ཤོས། བོད་ཀྱི་རྩ་དོན་ཐོག་ལ་ག་རེ་བྱ་རྩིས་ཡོད། དབུ་མའི་ལམ་གྱི་སྟེང་ནས་ང་ཚོའི་དཀའ་རྙོག་ཇི་ལྟར་སེལ་ཐུབ་ཀྱི་རེད། བོད་ནང་གི་མི་མང་ཚོའི་དཀའ་ངལ་ཇི་ལྟར་སེལ་ཐུབ་ངེས་རེད། དྲི་བ་འདི་དག་གིས་ང་ལ་དྲན་སྐུལ་ཆེན་པོ་ཐེབས་སོང་།

༡༩༩༠ ལོར་༧གོང་ས་མཆོག་གིས་དམངས་གཙོ་ཚད་ལྡན་ཡོང་རྒྱུར་ད་ལྟའི་བར་ངས་བཀའ་བློན་བསྐོ་བཞག་བྱེད་སྲོལ་དེ་མ་ཡིན་པར་མི་མང་གིས་འདེམ་རྒྱུའི་མགོ་འཛུགས་དགོས་ཀྱི་འདུག་གསུངས་པ་དང་། སྐབས་དེའི་དམིགས་བསལ་ཚོགས་ཆེན་ཐོག་ཐེངས་དང་པོར་བཀའ་བློན་གསུམ་བདམས་པ་རེད། ལོ་དེའི་རྗེས་མ་ནས་ད་ལྟའི་སྤྱི་འཐུས་ཀྱི་སྒྲོམ་གཞི་འདི་བྱུང་བ་དང་། དེ་བཞིན་ད་ལྟའི་བཙན་བྱོལ་བོད་གཞུང་གི་བཅའ་ཁྲིམས་གཏན་འབེབ་བྱས་པ་རེད། ༢༠༠༡ ལོར་མང་ཚོགས་ཀྱིས་ཐད་གར་འོས་འདེམས་བྱས་པའི་བཀའ་བློན་ཁྲི་བ་དང་པོ་དང་གཉིས་པར་ད་ལྟའི་བཀའ་ཁྲི་ཟམ་གདོང་རིན་པོ་ཆེ་ཕེབས་པ་རེད། ད་ཆར་སྐབས་གསུམ་པའི་བཀའ་ཁྲིའི་དངོས་གཞིའི་འོས་ཤོག་འཕེན་པའི་དུས་ཚོད་ལ་བསླེབས་ཡོད།

གོང་གི་གནས་ཚུལ་དེ་དག་ལོ་རྒྱུས་དང་འབྲེལ་ཏེ་ཞུ་དགོས་པའི་རྒྱུ་མཚན་ ༡༩༥༩ ནས་ད་ལྟའི་བར་ང་ཚོས་དྲན་གསོ་བྱ་དགོས་པ་དང་། ལྷག་པར་དུ་ང་སྐབས་གསུམ་པའི་བཀའ་ཁྲིའི་འོས་མིར་ལངས་བ་འདི་བུར་དུ་བསམ་བློར་འཁོར་བ་ཞིག་མིན་པར་༧གོང་ས་མཆོག་གི་ཕུགས་རྒྱང་རིང་པོར་གཟིགས་ཏེ་བོད་ཀྱི་རྩ་དོན་འདི་དམངས་གཙོ་དང་། བཙན་བྱོལ་གཞུང་དམངས་སྲ་བརྟན་ཡོང་པའི་དགོངས་པ་འདིའི་ཐོག ང་རང་གིས་སྲི་ཞུ་བསྒྲུབ་ཐུབ་ན་བསམ་པ་དེ་ཡིན།

མ་འོངས་པའི་བོད་ཀྱི་རྩ་དོན་ཐད་ཐེངས་འདིའི་བཀའ་སྤྱིའི་འོས་འདེམས་འདིར་མང་ཚོགས་ཀྱིས་ཐུགས་སྣང་དང་འགན་འཁུར་རྒྱུ་ཧ་ཅང་གལ་ཆེན་པོ་ཆགས་ཡོད། རྒྱ་ནག་དང་རྒྱལ་སྤྱི་སོགས་ནས་ཐེངས་འདིའི་བཙན་བྱོལ་བོད་གཞུང་གི་བཀའ་སྤྱིའི་ལས་གནས་སུ་མི་སུ་དག་བསླེབ་མིན་དང་། སྲིད་ཇུས་འཛིན་ཕྱོགས་བཅས་ལ་དོ་སྣང་ཆེན་པོ་བྱེད་ཀྱི་ཡོད་པར་བལྟས་ན། ང་ཚོས་ངེས་པར་དུ་གལ་ཆེན་མཐོང་ཆེན་དང་འགན་འཁུར་དགོས་པ་ཞིག་ཆགས་ཡོད།

སྤྱིར་དམངས་གཙོའི་འོས་བསྡུའི་ནང་མི་མང་གིས་ཆ་ཤས་བླངས་པའི་བརྒྱ་ཆ་ ༥༠ ཙམ་ཡིན་ན་སྐྱོ་བོར་རྩི་བ་དང་། རྒྱ་གར་རྒྱལ་ཡོངས་འོས་བསྡུའི་སྐབས་བརྒྱ་ཆ་ ༦༠ ཙམ་ལ་བསླེབས་པ་ནི་ཡག་པོར་རྩི་ཡི་ཡོད། ང་ཚོས་འོས་བསྡུའི་ནང་བརྒྱ་ཆ་ ༧༠ ལྷག་ལ་བསླེབ་ཐུབ་ཚེ་རྒྱལ་སྤྱིའི་ངོས་ནས་ང་ཚོའི་མང་གཙོའི་ལམ་སྲོལ་ལ་དམིགས་བསལ་ལྟ་སྟངས་ཤིག་ཡོང་ངེས་ཡིན་སྟབས། ཐེངས་འདིའི་བཀའ་སྤྱིའི་འོས་བསྡུའི་སྐབས་སུ་མང་ཚོགས་ཀྱིས་འགན་ལེན་བྱ་རྒྱུ་གལ་ཆེན་པོ་ཆགས་ཡོད།

ང་ས་ཁུལ་ཁག་ལ་སྐོར་སྐྱོད་བྱས་སྐབས་མང་ཚོགས་ཀྱིས་བཀའ་བློན་ཁྲི་བའི་འོས་འདེམས་ལས་སྤྱི་འཐུས་ཀྱི་འོས་འདེམས་ལ་དེ་ཙམ་དོ་སྣང་བྱེད་ཀྱི་མེད་པའི་མྱོང་ཚོར་བྱུང་། དོན་དངོས་ཐོག་བཀའ་སྤྱི་གཉིས་ཀྱི་འོས་འདེམས་གལ་ཆེ་ཆུང་འདྲ་འདྲ་རེད། སྤྱི་འཐུས་ཚོ་མི་མང་གི་སྐུ་ཚབ་ཆགས་ཡོད་པ་དང་གཞུང་གི་སྲིད་བྱུས་ཚང་མ་སྤྱི་འཐུས་གྲོས་ཚོགས་ནས་ཐག་གཅོད་བྱེད་ཀྱི་ཡོད་སྟབས། སྤྱི་འཐུས་འོས་འདེམས་དེ་ཧ་ཅང་གལ་ཆེན་པོ་རེད།

ཉེ་ཆར་རྒྱལ་བ་ཀརྨ་པའི་བླ་བྲང་ལ་བྱུང་བའི་དོན་རྐྱེན་དཔེ་མཚོན་བྱས་ཏེ་བཤད་ན། རྒྱ་གར་གྱི་གནད་ཡོད་མི་སྣ་དང་ཡོན་ཏན་ཅན་ཚོས་བཙན་བྱོལ་བོད་མིར་གདུག་རྩུབ་ཅན་གྱི་ལས་ཀ་དེ་འདྲ་བྱེད་པ་མ་རེད་ལ། ལྷག་པར་དུ་༧གོང་ས་མཆོག་བཞུགས་རིང་ལ་དེ་འདྲ་ཡོང་གི་མ་རེད། འོན་ཀྱང་རྒྱ་གར་རྒྱ་ཆེན་པོ་དང་ལྟ་བ་འདྲ་མིན། ཆབ་སྲིད་ཀྱི་ལས་འགན་འདྲ་མིན་སྤེལ་བའི་ཚོགས་པ་ཡོད་སྟབས། ང་ཚོའི་སྐྱོན་ཆུང་ཆུང་ཞིག་ཡིན་ཡང་གོ་སྐབས་འཛིན་ཆོག་ཆོག་དང་རྡོག་རྩིས་གཏོང་ཆོག་ཆོག་བྱེད་པ་རེད། ང་ཚོས་གང་གཟབ་གཟབ་བྱ་རྒྱུ་གལ་ཆེན་པོ་རེད།  ཞེས་གསུངས་སོང་།

དེའི་རྗེས་མང་ཚོགས་དང་དྲི་བ་དྲིས་ལན་མགོ་འཛུགས་བྱས་སོང་ཞིང་། སྔོན་མ་བཀའ་བློན་ཁྲི་པའི་ལས་ཐོག་ནས་དགོངས་པ་ཞུས་པ་དེ་སོ་སོའི་ནང་མིའི་ཆེད་དུ་བོད་ཀྱི་རྩ་དོན་བློས་བཏང་བ་ཞིག་མ་རེད་དམ། ཞེས་དྲིས་པའི་ལན་དུ་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་ལན་འདེབས་གནང་དོན། ནང་མི་ཟེར་བ་དེ་གལ་ཆེན་པོ་རེད། སྣང་མེད་གཏོང་རྒྱུ་དེ་འདྲ་མ་རེད། ༡༩༩༠ ལོར་བཀའ་བློན་གསུམ་བདམས་ཐོན་བྱུང་བའི་ནང་གི་གཅིག་ང་རང་རེད། དེ་ནས་ ༡༩༩༥ ལོའི་བར་བཀའ་བློན་གྱི་འགན་ཁྱེར་བའི་རྗེས་སུ་ལུགས་མཐུན་ཐོག་དགོངས་པ་ཞུས་པ་ཡིན། སོ་སོའི་འཚོ་བ་ཡག་པོ་ཞིག་ཆགས་ན་བོད་སྤྱི་བའི་ལས་དོན་ལ་ནུས་པ་ཞིག་འདོན་ཐུབ་པ་རེད་སྙམ་པ་ཡིན་མ་གཏོགས་བོད་ཀྱི་རྩ་དོན་བློས་བཏང་བ་དེ་འདྲ་མིན། སྐབས་དེར་ང་གཞུང་གི་ལས་གནས་ནས་དགོངས་པ་ཞུས་ཀྱང་ཕྱི་ལོགས་ནས་བོད་ཀྱི་རྩ་དོན་ལ་མུ་མཐུད་འབྲེལ་བ་དང་འགན་ཁུར་བ་ཡིན། ཞེས་ལན་བསྐྱོན་སོང་།

ཡང་ཁོང་ལ། རྒྱ་ནག་དང་མཉམ་དུ་འབྲེལ་བ་བྱ་རྒྱུ་དང་བོད་མིའི་མི་རབས་གསར་བ་གསོ་སྐྱོང་བྱ་རྒྱུ་དེ་གཉིས་བོད་པའི་ལས་དོན་གཙོ་བོ་ཡིན་སྟབས། དེའི་ཐད་སྐུ་ཉིད་ལ་འཆར་གཞི་དང་སྲིད་བྱུས་གསར་བ་གང་འདྲ་ཡོད་དམ། ཞེས་དྲིས་པར་ཁོང་གིས། རྒྱ་ནག་མཉམ་དུ་བོད་ཀྱི་དཀའ་རྙོག་སེལ་བའི་སྲིད་བྱུས་༧གོང་ས་མཆོག་གི་དགོངས་པ་དང་སྤྱི་འཐུས་ལྷན་ཚོགས་ཀྱིས་གཏན་འབེབ་བྱས་པའི་གཉིས་ཕན་དབུ་མའི་ལམ་འདི་རྒྱུན་འཁྱོངས་བྱ་དགོས་པ་ལས། བཀའ་བློན་ཁྲི་པ་གཅིག་པོས་སྲིད་བྱུས་གསར་བ་གཏན་འབེབས་བྱ་རྒྱུའི་དབང་ཆ་ཡོད་པ་མ་རེད། འོན་ཀྱང་། གནས་ཚུལ་གྱི་འགྱུར་བ་དང་གནས་ཚུལ་གསར་བའི་རིགས་བྱུང་སྐབས། བཀའ་བློན་ཁྲི་པས་དམིགས་བསལ་འགན་ཁུར་ཏེ། སྲིད་བྱུས་ལ་བསྐྱར་ཞིབ་བྱ་དགོས་མིན་དང་ནུས་པ་ཇེ་ཆེར་གཏོང་ཐབས། འགྱུར་བ་ག་རེ་གཏོང་དགོས་མིན་བཅས་ལ་དགོངས་ཚུལ་དང་ལམ་སྟོན་བྱ་རྒྱུའི་འགན་ཡོད་པ་རེད། དེ་བཞིན་བོད་དང་རྒྱ་ནག་ནང་ཉེ་ཆར་ཁ་ཆེ་ལུང་པ་ཚོའི་ནང་བྱུང་བའི་འགྱུར་བ་དེ་འདྲ་བྱུང་ཚེ་བཀའ་བློན་ཁྲི་བས་ནུས་བ་དམིགས་བསལ་འདོན་རྒྱུའི་དབང་ཚད་དང་གོ་སྐབས་ཡོད་པ་རེད། ཅེས་ལན་བསྐྱོན་སོང་།

ཡང་མང་ཚོགས་ཤིག་གིས། སྐུ་ཉིད་ཀྱིས་བཀའ་བློན་ཁྲི་པར་ཚང་དགོས་པའི་ཁྱད་ཆོས་གཙོ་བོ་གང་འདྲ་ཞིག་ལ་གཟིགས་ཀྱི་ཡོད་མེད་དྲིས་པར་ཁོང་གིས། འོས་འདེམས་བྱུང་བའི་བཀའ་ཁྲི་དེས་མཇོན་གྱི་ཡོད་མེད་གང་ལྟར་བཙན་བྱོལ་གཞུང་དམངས་དང་། བོད་མི་ས་ཡ་དྲུག་གི་འགན་འཁུར་དགོས་པ་ཡིན་དུས་མཚན་ཉིད་ཚང་བའི་བཀའ་ཁྲི་ཞིག་ཡོང་དགོས་པ་རེད། ལོ་རྒན་གཞོན་དང་ཡོན་ཏན་ཆེ་ཆུང་གི་འགྲན་བསྡུར་ཞིག་མ་རེད། ཉམས་མྱོང་ཆེ་ཆུང་གི་འགྲན་བསྡུར་ཡང་མ་རེད། ལྷག་པར་དུ་སེམས་ཤུགས་དང་ལྷག་བསམ་ཟེར་བ་དེ་མཐོང་ཐུབ་པ་ཞིག་མ་རེད། གཙོ་བོ་གཟུགས་གཞི་བདེ་ཐང་དང་། ཤེས་ཡོན་ཉམས་མྱོང་གང་འཚམ་ཡོད་པ། གཞིས་ལུས་བོད་མིས་ཡིད་ཆེས་ཡོད་མཁན། ༧གོང་ས་མཆོག་གི་དགོངས་པ་རྟོགས་པ་སོགས་ཀྱི་ཁྱད་ཆོས་མང་པོ་ཞིག་ཚང་དགོས་པ་རེད། ཅེས་གསུངས་སོང་།

དེང་སྐབས་རྒྱ་ནག་གིས་ཕྱི་ཕྱོགས་ཀྱི་བོད་པ་རྣམས་ནང་དུ་འགུག་གི་ཡོད་པའི་སྲིད་ཇུས་ཤིག་བཟུང་སྟེ། བཙན་བྱོལ་ནང་གི་བོད་མི་མང་པོ་ཞིག་ཕྱིར་ལོག་གི་ཡོད་པ་དེ་འགོག་ཐབས་འདྲ་ཡོད་མེད་དྲིས་པར། གཉེན་འཕྲད་དུ་ཕྱི་སྡོད་བོད་མི་ཚོས་རྒྱ་ནག་གཞུང་ཚབ་ནས་ཐོངས་མཆན་བླངས་ཏེ་ཕྱིར་བོད་དུ་བསྐྱོད་པ་ཡིན་ན་འགྲིག་གི་རེད། དེ་མིན་ཆབ་སྲིད་ཀྱི་གནད་དོན་ཧ་གོ་བའི་ཐོག་ནས་རྒྱ་ནག་གི་སྲིད་བྱུས་ལྟར་ཕྱིར་ལོག་བྱས་ཚེ། རང་ཉིད་བོད་མི་ཞིག་ཡིན་པའི་འགན་མ་ཁུར་བ་རེད་མ་གཏོགས་དེ་ལ་བཙན་བྱོལ་གཞུང་གི་ངོས་ནས་འགྲོ་ཆོག་གི་མེད་ཟེར་ནས་བཀག་འགོག་བྱ་ཐབས་ཡོད་པ་མ་རེད། ཅེས་ལན་འདེབས་གནང་སོང་།

གསར་འགོད་པ། བནྡེ་སྐྱབས།