ད་ལྟའི་ཆར་བཙན་བྱོལ་བོད་གཞུང་གི་མ་དངུལ་གྱི་གནས་སྟངས་ཧིན་སྒོར་ས་ཡ་༦༣༨།༧༣ཡིན་པ་དང་།༢༠༡༡ལོ་ནས་༢༠༡༢ལོའི་བར་གྱི་ཡོང་འཆར་ཁྱོན་བསྡོམས་ཧིན་སྒོར་ས་ཡ་༩༥༣།༡༣ཡིན་འདུག་ལ།སྔར་ལོ་ལས་ཡོང་འཆར་སྒོར་ས་ཡ་༢།༩༤མང་བའི་ཚོད་དཔག་ཞུས་ཡོད་འདུག
དེ་རིང་ཕྱི་ཚེས་༡༤ཉིན་གྱི་ཞོགས་པར་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་དངོས་སུ་དབུ་འཛུགས་གནང་ཡོད་ཅིང་།ཚོགས་འདུའི་སྟེང་༸གོང་ས་མཆོག་གིས་བསྩལ་བའི་དམིགས་བསལ་གསུང་འཕྲིན་སྒྲོག་སྦྱོང་དང་།གཞུང་འབྲེལ་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དྲུང་ལས་རོགས་ཟུང་དྲུང་ཟུར་པ་སྐུ་ཞབས་མདའ་གཞིས་རྟ་མགྲིན་དབང་རྒྱལ་ལགས་སྐུ་ཚེ་འཕེན་པ་རྫོགས་པར་མྱ་ངན།དེ་བཞིན་ཉི་ཧོང་གི་རང་བྱུང་ས་ཡོམ་གྱི་གནོད་འཚེ་ཁྲོད་འདས་གྲོངས་སུ་ཕྱིན་པ་རྣམས་དང་ཨོ་སི་ཁྲི་ལི་ཡའི་གཙོས་པའི་འཛམ་གླིང་ཡུལ་གྲུ་གང་སའི་རང་བྱུང་གནོད་འཚེ་ཁྲོད་འདས་གྲོངས་སུ་གྱུར་བ་རྣམས་ལ་གཞུང་འབྲེལ་ཐོག་མྱ་ངན་ཞུས་པར་མ་ཟད།༢༠༡༡ནས་༢༠༡༢བར་གྱི་བཙན་བྱོལ་བོད་གཞུང་གི་ལྷན་ཁང་མ་ལག་དང་བཅས་པའི་མ་དངུལ་གཏོང་ཡོང་གི་སྔོན་རྩིས་ཀྱི་སྐོར་ནས་བགྲོ་གླེང་གོ་བསྡུར་གནང་འཆར་ཡོད་པ་རེད། སྐབས་དེར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཚོགས་འདུ་དབུ་འཛུགས་ཀྱི་གཏམ་བཤད་གནང་དོན།ཐེངས་འདི་ནི་སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་ཐ་མ་དང་སྔོན་རྩིས་ཀྱི་ཚོགས་དུས་ཆགས་ཡོད་ལ།རྒྱལ་སྤྱིའི་སྤྱི་ཚོགས་ལ་མཚོན་ནའང་སྔོན་མེད་བསམ་བློའི་ནང་འཁོར་མ་མྱོང་བའི་འགྱུར་འགྲོས་ཆེན་པོ་ཕྱིན་སྟེ།ཨ་ཧྤི་རི་ཀའི་ཏོ་ནེ་ཤི་ཡ་དང་ཨེ་རྗེབ།ཡེ་མན།བྷར་ལེན།ལི་སྤི་ཡཱ་བཅས་སུ་མི་མང་གི་མངོན་འདོད་གཞིར་བཟུང་ཐོག་ཞི་བའི་སྒེར་ལངས་བྱས་ཏེ་གཞུང་མགོ་རྟིང་བསློག་ཐུབ་པའི་གནས་སྟངས་ཆགས་ཡོད་པ་དང་།དེ་བཞིན་་ཤར་འཇར་མན་དང་ནུབ་འཇར་མན།ཨུ་རུ་སུ་ཁ་འཐོར་ཕྱིན་པ།བྱང་ཨ་ཧྤི་རི་ཀ་དང་དཀྱིལ་ཤར་ཨེ་ཤ་ཡའི་ནང་གནས་ཚུལ་སོགས་ཀྱིས་ང་ཚོ་བོད་དོན་ཐོག་ལའང་འགྱུར་བ་ཞིག་ཏན་ཏན་ཕྱིན་སྟེ།ང་ཚོ་རང་གི་རྒྱལ་ཁབ་དུ་ལོག་ཐུབ་པའི་གོ་སྐབས་ཤིག་ཡོང་ཐུབ་པའི་རེ་བ་དང་སྙིང་སྟོབས་སྐྱེ་གཞི་ཞིག་ཆགས་ཡོད་ཅེས་དང་།
ཡང་ཁོང་གིས། བཙན་བྱོལ་བོད་མི་ཚོར་མཚོན་ནའང་མང་གཙོ་དབུ་བརྙེས་ཏེ་མི་ལོ་༥༠འཁོར་བ་དང་།༸གོང་ས་མཆོག་གིས་བོད་ས་མ་ཤོར་བའི་སྔོན་ནས་བོད་ནང་ལེགས་བཅོས་གནང་བའི་དགོངས་གཞི་ཡོད་པ་ལྟར།ད་ལྟའི་བར་མང་གཙོའི་འཕེལ་རིམ་གྱི་ཐོག་ལ་ཁོང་ཉིད་ཀྱིས་ཐད་ཀར་བཀའ་གནང་རྗེས་འགྱུར་བ་འགྲོ་བཞིན་པ་ཞིག་ཆགས་བསྡད་ཡོད།ད་ལྟའི་ཆར་རྒྱལ་སྤྱིའི་ནང་འཐབ་རྩོད་བྱེད་བསྡད་མཁན་གྱི་དབུ་འཛིན་ཚོས་མི་མང་གི་མངོན་འདོད་གཞིར་མ་བཞག་པར་དྲག་གནོན་དང་།འགྲོ་བ་མིའི་ཐོབ་ཐང་དང་ཁྲིམས་ཀྱི་ཐོག་ནས་དྲང་བདེན་ཡོང་སོགས་བརྡབ་གསིག་ཡོང་གི་ཡོད་ནའང་།༧གོང་ས་མཆོག་གི་བཀའ་སློབ་ལམ་སྟོན་འོག་ང་ཚོའི་གནས་སྟངས་དེ་ལས་ལྡོག་ཡོད།
ཐེངས་འདིའི་གསུམ་བཅུའི་དུས་དྲན་དང་གྲོས་ཚོགས་ལ་བསྩལ་བའི་གསུང་འཕྲིན་དེ་དག་སེམས་ལ་ཤོངས་དཀའ་བའི་གནས་སྟངས་ཆགས་ཀྱང་།སྐབས་བཅུ་བཞི་བའི་གྲོས་ཚོགས་ལ་འགན་ལྗིད་མོ་ཞིག་བབ་ཡོད་པ་ལྟར།ཚང་མས་གསུང་འཕྲིན་རིན་པོ་ཆེའི་ནང་དོན་ལ་བསམ་བློ་གཏིང་ཟབ་དང་བློ་རིག་བསྒྲིམས་ཏེ།རང་ཉིད་ཀྱི་བསམ་ཚུལ་གྲོས་ཚོགས་ནང་འབུལ་རྒྱུའི་རེ་བ་དང་རང་ཉིད་གཅིག་པུའི་བསམ་ཚུལ་མ་ཡིན་པར་བོད་ཕྱི་ནང་གཉིས་སུ་གནས་པའི་བོད་མིའི་བདེ་སྡུག་སྐོར་གསུང་དགོས་པའི་འབོད་སྐུལ་དང་།ཐེངས་འདིའི་གྲོས་ཚོགས་ནང་དམིགས་བསལ་༸གོང་ས་མཆོག་གི་གསུང་འཕྲིན་ཐད་ལ་བགྲོ་གླེང་གོ་བསྡུར་གནང་རྒྱུ་ཡིན་པའི་སྐོར་གསུངས་བྱུང་བར་མ་ཟད།བོད་མི་མང་སྤྱི་འཐུས་ལྷན་ཚོགས་ཀྱི་དྲ་རྒྱ་www.tibetanparliament.org ཞེས་པའི་དྲ་རྒྱ་ངོ་སྤྲོད་གནང་ཡོད།
མཐའ་མར།བོད་གཞུང་དཔལ་འབྱོར་ལས་ཁུངས་ཀྱི་བཀའ་བློན་ཚེ་རིང་དོན་འགྲུབ་མཆོག་གིས་བཙན་བྱོལ་བོད་གཞུང་གི་ཕྱི་ལོ་༢༠༡༡ནས་༢༠༡༢བར་གྱི་སྔོན་རྩིས་ཕྱོགས་སྡོམ་གྲོས་ཚོགས་ལ་སྙན་སྒྲོན་ཞུས་དོན།ད་ལྟའི་ཆར་བཙན་བྱོལ་བོད་གཞུང་གི་མ་དངུལ་གྱི་གནས་སྟངས་ཧིན་སྒོར་ས་ཡ་༦༣༨།༧༣ཡིན་པ་དང་།ད་ཆར་དང་བླང་དཔྱ་དངུལ་ལག་དེབ་བཟོ་མཁན་༡༣༩༥༢༣ ཙམ་ཡོད་འདུག ༢༠༡༡ལོ་ནས་༢༠༡༢ལོའི་བར་གྱི་ཡོང་འཆར་ཁྱོན་བསྡོམས་ཧིན་སྒོར་ས་ཡ་༩༥༣།༡༣ཡིན་འདུག་ཅིང་། དེ་དག་གི་ཡོང་ཁུངས་སོ་སོའི་ཟུར་བཀོལ་རྩིས་ཁོངས་སུ་དམིགས་བཀར་ལས་གཞིའི་ཆེད་ཡོང་འཆར་སྒོར་ས་ཡ་༦༨༡།༩༩དང་།དཔལ་འབྱོར་ལས་ཁུངས་བརྒྱུད་ཡོང་འཆར་སྒོར་ས་ཡ་༢༧༡།༡༤། ངེས་མེད་ཞལ་འདེབས་ནས་ཡོང་འཆར་སྒོར་ས་ཡ་༨༣།༧༤སྔར་ལོ་ལས་ཡོང་འཆར་སྒོར་ས་ཡ་༢།༩༤མང་བའི་ཚོད་དཔག་ཞུས་ཡོད་འདུག
དེ་བཞིན།༢༠༡༡ནས་༢༠༡༢ལོའི་བར་གྱི་བཙན་བྱོལ་བོད་གཞུང་གི་ཕྱོགས་བསྡོམས་འགྲོ་གྲོན་མ་དངུལ་ཧིན་སྒོར་ས་ཡ་༡༠༢༥།༦༨གཏོང་འཆར་ཡོད་པའི་ཁྲོད་ལས་བྱེད་པའི་ཕོགས་དང་ལས་ཁུངས་ཁག་གི་རྒྱུན་གྲོན་ཁོ་ནར་འགྲོ་གྲོན་ཧིན་སྒོར་བསྡོམས་ས་ཡ་༣༧༤།༢༢དང་།དམིགས་བསལ་ལས་དོན་ཐོག་སྒོར་ས་ཡ་༢༩།༦༡།དམིགས་བཀར་ལས་འཆར་ཐོག་སྒོར་ས་ཡ་༦༢༡།༨༥འགྲོ་རྒྱུའི་རྒྱབ་གཉེར་ཞུས་ཡོད་འདུག
ཐེངས་འདིའི་གྲོས་ཚོགས་འདི་ཉིད་དེ་རིང་ཕྱི་ཚེས་༡༤ཉིན་ནས་མགོ་འཛུགས་ཀྱིས་ཕྱི་ཚེས་༢༥བར་འཚོགས་གཏན་འཁེལ་ཡོད་པ་དང་།ཉིན་གྲངས་བཅུའི་རིང་དགོངས་ཞུ་གནང་མཁན་སྤྱི་འཐུས་༢དང་ཉིན་བཞི་དང་དྲུག་རིང་དགོངས་པ་ཞུས་པའི་སྤྱི་འཐུས་༢།ཉིན་གཅིག་རིང་དགོངས་པ་ཞུས་མཁན་གྱི་སྤྱི་འཐུས་༢བཅས་དྲུག་ལས་གཞན་སྤྱི་འཐུས་ཚང་མ་མཉམ་ཞུགས་གནང་ཡོད་པ་རེད།
གསར་འགོད་པ།དོན་གོ
གཞུང་ཞབས་པའམ་ལས་བྱེད་པ་འདི་དག་གིས་ཡུལ་ཤུལ་ས་ཡོམ་གྱི་སྐབས་སུ་གཞུང་འབྲེལ་གྱི་མྱ་ངན་དང་། འོན་ཏེ་ཕྱི་མི་དག་ལ་ཞུ་བའི་མྱ་ངན་ལས་ཁྱད་པར་གང་ཡང་བྱས་ཡོད་རེད་དམ།