མདང་དགོང་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་དམངས་གཙོ་ཚོགས་པ་བཅས་ཀྱི་གོ་སྒྲིག་འོག མེག་གྷན་རླངས་འཁོར་འབབ་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་ཅིང་། དེ་ནི་རྒྱ་ནག་གཞུང་གི་བཙོན་འཇུག་མནར་གཅོད་འོག་ཟླ་འདིའི་ཕྱི་ཚེས་ ༢༥ ཉིན་འདས་གྲོངས་སུ་སོང་བའི་རྒྱལ་གཅེས་པ་བུ་ལུག་ལགས་ཀྱི་ལྷག་བསམ་དང་སྙིང་སྟོབས་ལ་ཡི་རངས་དང་ཁོང་གི་ནང་མིར་གདུང་སེམས་མཉམ་སྐྱེ་ཆེད་ཡིན་འདུག
མར་མེ་ཁྲོམ་སྐོར་མཇུག་སྡོམ་སྐབས། ཐེག་ཆེན་ཆོས་གླིང་གཙུག་ལག་ཁང་དུ་མང་ཚོགས་རྒྱལ་གཅེས་པ་ཁོང་ལོ་རྒྱུས་ངོ་སྤྲོད་དང་སྦྲགས། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་གཏམ་བཤད་གནང་དོན། རྒྱ་ནག་གཞུང་གིས་ང་དགུ་ཚུན་ལ་རྒྱལ་ཁབ་བཙན་བཟུང་དང་བོད་མི་ཚོར་དམར་གསོད་དང་མནར་གཅོད། བཙོན་འཇུག་སོགས་བྱས་ཏེ་མི་རིགས་རྩ་མེད་གཏོང་བའི་སྲིད་བྱུས་ལག་བསྟར་བྱས་དང་བྱེད་ཀྱིན་པ་དེ་བོད་མི་རིགས་ཚོས་དུས་ནམ་ཡང་བརྗེད་ཐབས་མེད་པ་དང་བཟོད་ཐབས་མེད་པའི་གནས་སྟངས་ཤིག་ཆགས་ཡོད། ཅེས་དང་།
རྒྱལ་གཅེས་ལྷག་བསམ་ཅན་བུ་ལུག་ལ་མཚོན་ན། རྒྱ་ནག་གཞུང་གི་བཙོན་ཁང་དུ་སྡོད་རིང་གཅར་རྡུང་མནར་གཅོད་ཚད་མེད་བཏང་ཡོད་པ་མ་ཟད། ནང་མི་སྤུན་མཆེད་སུ་གང་ལའང་ཐུག་འཕྲད་བྱེད་མ་བཅུག་པའི་གནས་སྟངས་འོག་འདས་གྲོངས་སུ་ཕྱིན་ཡོད་པ་འདི་རྒྱལ་སྤྱིའི་ཁྲིམས་དང་འགལ་བའི་གནས་སྟངས་ཤིག་ཆགས་ཡོད་སྟབས། དེ་དག་གི་ཐད་ལ་རྒྱལ་སྤྱིའི་ངོས་ནས་བརྟག་དཔྱད་མཐིལ་ཕྱིན་བྱས་ཏེ་རྒྱབ་སྐྱོར་གནང་དགོས། གནས་ཚུལ་འདི་རིགས་རྒྱལ་སྤྱིའི་མི་མང་གིས་མཁྱེན་རྟོགས་ཡོང་ཆེད། ང་ཚོ་ཚོགས་པ་ལྔས་ནུས་པ་གང་ཡོད་འདོན་བཞིན་ཡོད་པ་མ་ཟད། བོད་མི་ཚང་མས་ཀྱང་བོད་ནང་གི་བོད་མིའི་གནས་སྟངས་ཤེས་པའི་ཐོག་ནས་འབད་བརྩོན་བྱ་དགོས། ཞེས་གསུངས་སོང་།
གསར་འགོད་པ། དོན་གོ
ལྕགས་དང་གློག་གིས་ལུས་ལ་ཁྲབ་པས་རྣམ་ཤེས་ཕྱིར་ལ་འཕྱུང་བའི་ལོ་རབས་གཅིག།
བཟས་བཅད་སྡུག་སྣ་དགུ་ཡིས་བཙོན་ཁང་ཁྲག་གི་གཡོལ་བའི་སྤུན་ཟླའི་སེམས་འཕྲེང་གཉིས།
རང་ལུས་དུམ་བུ་བརྒྱ་རུ་སྟུབ་ཀྱང་དམ་བཅའི་རི་མོ་མི་ཟུབ་རྡོ་བརྐོས་གསུམ།
དཔའ་བོ་བུ་ལུག་གཙོས་པའི་རིགས་མཐུན་སྤུན་ཟླའི་ཆེད་དུ་ཚེ་སྲོག་འབུལ་རྣམས་རྒྱལ།
གཞུང་འབྲེལ་མ་ཡིན་པའི་ཚོགས་པ་ལྔའི་གདུང་སེམས་མཉམ་བསྐྱེད་བྱེད་པ་ལ་རྗེས་སུ་ཡིད་རང་ཡོད།
ད་དུང་གཞུང་འབྲེལ་གྱི་སྟེང་ནས་གདུང་སེམས་མཉམ་བསྐྱེད་བྱས་ན་ཡག་པོ་མེད་འགྲོ་སྙམ།
བསྟན་དང་དེ་འཛིན་ཆབ་སྲིད་རང་རིགས་སླད།། གཅེས་པའི་ལུས་སྲོག་ལོངས་སྤྱོད་ཡོངས་བཏང་བའི།། དཀའ་བ་རྒྱ་ཕྲག་བསྒྲུབས་པའི་སྐྱེ་བོ་རྣམས།། གྲུ་འཛིན་མགོན་དེའི་ཐུགས་རྗེས་སྐྱོང་བར་མཛོད།།
རྒྱལ་གཅེས་དཔའ་བོ། བུ་ལུག་ལགས། འདས་གྲོངས་སུ་གྱུར་བར། མྱ་ངན་གུས་འདུད་དང་། ཁོང་གི་ནང་མི་ཡོངས་ལ། གདུང་སེམས་མཉམ་སྐྱེད་ཡོད་ལགས། དལ་འབྱོར་རིམ་བརྒྱུད་ཀྱིས། མྱུར་དུ་སངས་རྒྱས་ཤོག །
ཡིད་སྐྱོའི་གནས་ཚུལ་འདིའི་སྐོར་ཅུང་གསལ་བཤད་ཞུས་ན།
འདི་ཟླའི་ཕྱི་ཚེས་ ༢༥ ཉིན་གུང་ལྷ་སའི་ཆུ་ཚོད་ ༡༢ དང་ཕྱེད་ཐོག་རྒྱལ་གཅེས་དཔའ་བོ་བུ་ལུག་དེ་ཉིད་ལྷ་སའི་སྨན་ཁང་ཞིག་ཏུ་སྐུ་གཤེགས་པའི་ཡིད་སྐྱོའི་གནས་ཚུལ་ཐོན་འདུག དེ་ཡང་
རྒྱལ་གཅེས་དཔའ་བོ་བུ་ལུག་ནི་བོད་མདོ་ཁམས་སྡེ་དགེ་འཇོ་མདའ་རྫོང་ཁོང་འཛི་སྒར་ཤང་པདྨ་གོང་ཧྲེ་སྟག་ཆེན་སྐེ་ནས་ཡིན་ཞིང། ཕྱི་ལོ་ ༢༠༠༩ ལོའི་ཕྱི་ཟླ་དྲུག་པའི་ནང་ཁམས་འཇོ་མདའ་སྐྱབས་ཆེ་དགོན་དུ་རྒྱ་གཞུང་གིས་རྒྱལ་གཅེས་ཆོས་གཅེས་ཟེར་བའི་ལས་འགུལ་སྤེལ་ཏེ་གོང་ས་མཆོག་ལ་མཚན་སྨོད་ཀྱི་མིང་རྟགས་བསྡུ་རུབ་ཀྱི་ལས་འགུལ་སྤེལ་བར་དགེ་འདུན་པ་གཅིག་གིས་ཀྱང་མིང་རྟགས་མ་བཀོད་པར་ཕྱོགས་གང་སར་བྲོས་བྱོལ་དུ་ཕེབས་ནས་ཟླ་ངོ་གཅིག་རིང་དགོན་པར་དགེ་འདུན་པ་གཅིག་ཀྱང་མེད་པར་ཆགས་ཡོད།
གནས་ཚུལ་འདི་ནི་ལྔ་བཅུ་ང་དགུའི་རྗེས་ཀྱི་དགོན་པ་སྟོང་པ་ཆགས་པ་ཐེངས་དང་པོ་དེ་ཡིན་འདུག ཕྱི་ལོ་ ༢༠༠༩ ལོའི་ཟླ་ ༦ ཚེས་ ༢༧ ཉིན་གོང་གསལ་མི་ངོ་རྣམས་སྐབས་དེར་རྒྱ་གཞུང་ཉེན་རྟོག་མི་སྣས་གྲོང་ཚོའི་འགོ་ཁྲིད་ཁོངས་མི་ཡིན་པ་བུ་ལུག་སོགས་མི་ལྔ་ཆེད་འགུག་གིས་དགོན་པའི་དགེ་འདུན་པ་གང་དུ་ཡོད་ན་ཆ་ཚང་རྩིས་སྤྲོད་དགོསཔའི་བཙན་བཀའ་བཏང་བར་ངོས་ལེན་མ་བྱས་པའི་ཉེས་མིང་འོག་ཐོག་མར་བོད་ལྗོངས་ཆབ་མདོའི་བཙོན་ཁང་དང། དེ་ནས་བོད་ལྗོངས་སྤོ་བོ་རྫོང་གི་བཙོན་ཁང་དུ་བཅུག་ནས་། བཙོན་ཁང་ནས་སྡུག་སྦྱོང་མནར་གཅོད་ཚད་མེད་བཏང་རྐྱེན་ལོ་སྔོན་མ་ནས་ཁོང་གི་སྐུ་གཟུགས་ཀྱི་གནས་སྟངས་ཇེ་སྡུག་ཏུ་ཕྱིན་ཡང་ནང་མི་སྤུན་མཆེད་ཚུན་ཆོད་ད་བར་ཐུག་ཕྲད་བཅུག་མེད། ཁ་སང་དགོང་མོ་བཙོན་ཁང་ནས་ལྷ་སའི་སྨན་ཁང་དུ་ཁུར་འདུག་ཀྱང་དྲག་བསྐྱེད་གང་ཡང་མ་བྱུང་བར་ཕྱི་ལོ་ ༢༠༡༡ ལོའི་ ༣ ཚེས་ ༢༥ ལྷ་སའི་ཆུ་ཚོད་ ༡༢ དང་ཕྱེད་ཐོག་སྐུ་གཤེགས་པའི་ཡིད་སྐྱོའི་གནས་ཚུལ་ཐོན་འདུག
ང་ཚོ་སྤྱི་སྒེར་ཚང་མས་ཁ་ནས་གསུང་པ་ནང་བཞིན་ལག་ལེན་དོན་ཐོག་འགྲོ་ཐུབ་ན་སྙམ་པ་ཞིག་ཚང་མའི་སེམས་ནང་ཡོད་ཀྱང་། དེ་གཉིས་དབར་རྒྱངས་ཐག་ཤིན་ཏུ་རིང་བ་ནི་དངོས་ཡོད་གནས་ཚུལ་ཞིག་རེད།
རྒྱལ་གཅེས་དཔའ་བོ་བུ་ལུག་ལགས་འདས་གྲོངས་སུ་གྱུར་བ་མྱ་ངན་གུས་འདུད་དང་ཁོང་གི་ནང་མི་ཡོངས་ལ་གདུང་སེམས་མཉམ་བསྐྱེད་བྱེད་ཀི་ཡོད།