ཁག་ཅིག་གིས་༧གོང་ས་མཆོག་ལ་ “བླ་རྒན” དང་སྐུའི་ཆབ་སྲིད་འགན་དབང་བསྒྱུར་བཅོས་ཐོག་སྤྱི་འཐུས་ལ་ནུས་པ་མེད་ཟེར་གྱི་འདུག སྤྱིར་མང་གཙོའི་ལམ་སྲོལ་ཐོག་སྐད་ཆ་ག་རེ་བཤད་ན་འགྲིག་ཀྱང་། བཤད་ཟིན་པ་དོན་ལ་གནས་རྒྱུ་ཤིན་ཏུ་གལ་ཆེན་རེད། ཅེས་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་གསུངས།
དེ་རིང་ཕྱི་ཚེས་ ༡ ཉིན་གྱི་ཞོགས་པར་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས། ༼དཀའ་ཚེགས་ཆེ་བའི་ལམ་བུ༽ཞེས་པའི་དེབ་ཕྲེང་བརྒྱད་པ་དེ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོར་བོད་གཞུང་ཆོས་དོན་བཀའ་བློན་ཚེ་རིང་ཕུན་ཚོགས་མཆོག་གཙོས་པའི་ལྷན་ཁང་ཁག་གི་དྲུང་ཆེ་དང་སྤྱི་འཐུས་རྒྱུན་ལས་བཅས་མཉམ་ཞུགས་གནང་འདུག
ཚོགས་འདུའི་སྟེང་གྲྭ་བག་གྲོ་ལགས་ཀྱིས་དཔེ་དེབ་དབུ་འབྱེད་ཀྱི་དམིགས་ཡུལ་སྐོར་བརྗོད་དོན། དཔེ་དེབ་འདི་ངའི་དེབ་ཕྲེང་བརྒྱད་པ་ཆགས་ཡོད། ང་རང་བཙན་བྱོལ་དུ་ཡོང་སྐབས། བོད་ནང་གི་ཆབ་སྲིད་བཙོན་པ་ཁག་ཅིག་གིས་ང་ལ་རྒྱ་སྒོར་ ༡༥༠༠ ཙམ་སྤྲད་བྱུང་ལ། ཁོང་ཚོས་ང་ལ་ངྷ་རམ་ས་ལར་འབྱོར་རྗེས། ༧གོང་ས་མཆོག་དང་བཙན་བྱོལ་བོད་གཞུང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ། དེ་བཞིན་འཛམ་གླིང་མི་མང་བཅས་ལ་བོད་མི་རིགས་ཀྱི་དཀའ་སྡུག་ཞུ་སྐུལ་གནང་དགོས་ཞེས་མངགས་བཅོལ་བྱས་སོང་། ངས་ཁོང་ཚོས་སྤྲད་པའི་སྒོར་མོ་དེ་སྒོར་དུང་ཕྱུར་ལས་རྩ་ཆེར་བརྩིས་ཏེ་རེ་བ་ཆུད་ཟོས་སུ་མ་བཏང་བར། ལོ་ངོ་བཅུ་ཕྲག་རིང་བཙན་བྱོལ་སྤྱི་ཚོགས་སུ་བོད་དོན་ཐོག་ཅི་ཡོང་བྱས་ཏེ་དཔེ་དེབ་བརྒྱད་བརྩམས་པ་ཡིན། ཞེས་བརྗོད་བྱུང་།
ཁོས་མུ་མཐུད་དུ་བརྗོད་དོན། དཀའ་ཚེགས་ཆེ་བའི་ལམ་བུ་ཞེས་པའི་དེབ་འདི་འབྲི་དོན་ནི། རྒྱལ་བ་སྐུ་ཕྲེང་ལྔ་པའི་སྐབས་བོད་གཞུང་དགའ་ལྡན་ཕོ་བྲང་བཙུགས་རྗེས། སྐུ་ཕྲེང་བཅུ་གསུམ་དང་བཅུ་བཞི་བཅས་ཀྱིས་དམིགས་བསལ་བོད་བསྟན་སྲིད་ཆེད་སྐུ་ངལ་ཚད་མེད་བསྐྱོན་ཡོད་ལ། ལྷག་དོན་དུ་བཙན་བྱོལ་དུ་བོད་ཀྱི་ཆོས་དང་རིག་གཞུང་གསོན་པོར་གནས་ཐུབ་པ་འདི་༧གོང་ས་མཆོག་ཁོ་ནའི་ཐུགས་རྗེའི་བཀའ་དྲིན་རེད། བཙན་བྱོལ་སྤྱི་ཚོགས་ནང་ཆབ་སྲིད་ཀྱིས་མཚོན་པའི་གནས་སྟངས་མང་པོའི་ཐོག་འགྱུར་ལྡོག་བྱུང་སྟེ། བཙན་བྱོལ་དུ་ཤེས་ཡོན་ཅན་དང་རྩོམ་པ་པོ་སོགས་མང་པོ་ཞིག་བྱུང་ཡོད་ཀྱང་། ༧གོང་ས་མཆོག་དང་བོད་གཞུང་ལ་ཟུར་ཟ་དང་མཚན་སྨོད་བྱེད་མཁན་ཇེ་མང་དུ་འགྲོ་བཞིན་ཡོད་སྟབས། ངས་རྩོམ་འཆལ་དེ་དག་ལ་ཞིབ་འཇུག་བྱས་སྐབས་བོད་རྒྱལ་ཁབ་དང་མི་རིགས་ལ་ཕན་པའི་སྐད་ཆ་སྣ་གཅིག་བཤད་མི་འདུག གལ་སྲིད་རྩོམ་དེ་ཚོར་ཁུངས་ལུང་བཙན་པོ་ཡོད་ན། རྩོམ་གྱི་མཇུག་ཏུ་རང་ཉིད་ཀྱི་མིང་དང་ཁ་བྱང་གསལ་པོར་འགོད་དགོས་ངེས་ཡིན། དེ་མིན་གཞུང་དང་མི་དམངས་བར་འགལ་ཟླ་བཟོ་བ་དང་། མི་མང་ནང་ཁུལ་དུ་ཡིད་ཆེས་མེད་པ་བཟོས་ན་ཡག་པོ་མེད། སྤྱིར་བཙན་བྱོལ་སྤྱི་ཚོགས་ཀྱི་ཤེས་ཡོན་ཅན་དང་རྩོམ་པ་པོ་ཚོར་རྒྱ་གཞུང་ཁ་གཏད་གཅོག་རྒྱུའི་མཐུན་རྐྱེན་དང་གོ་སྐབས་གཉིས་ཀ་ཡོད་ཀྱང་། ཁོང་ཚོས་བསྒྲུབ་དགོས་པ་དེ་མི་བསྒྲུབ་པར་བོད་གཞུང་ལ་ཁ་རྡུང་བཏང་སྟེ་ཉི་མ་གང་འཁྱོལ་བྱས་ན་ཐབས་སྐྱོ་བོ་རེད། རྒྱ་གཞུང་གི་མཚན་སྨོད་ལ་ལན་འདེབས་བྱེད་མཁན་བོད་དུ་དྲག་གནོན་འོག་ཡོད་པའི་རྩོམ་པ་པོ་འོད་ཟེར་དང་ཐེའུ་རང་སོགས་རེད། ཅེས་བརྗོད་བྱུང་།
མཇུག་ཏུ་སྐུ་མགྲོན་གཙོ་བོ་ཆོས་རིག་བཀའ་བློན་ཚེ་རིང་ཕུན་ཚོགས་ལགས་ཀྱིས་བརྗོད་དོན། གྲྭ་བག་གྲོ་ལགས་བོད་དུ་བཞུགས་སྐབས། བོད་དོན་ལས་འགུལ་ནང་ཐེངས་དུ་མར་མཉམ་ཞུགས་བྱས་ཡོད་ལ། གནད་དོན་དེའི་རྐྱེན་གྱིས། རྒྱ་གཞུང་གིས་ཁོིང་ལ་ལོ་གསུམ་གྱི་བཙོན་འཇུག་ཁྲིམས་ཐག་བཅད་པ་རེད། བཙན་གྲོལ་ཐོབ་ཏེ་བཙན་བྱོལ་དུ་འབྱོར་རྗེས་སུའང་། ཁོང་གིས་འཛམ་གླིང་རྒྱལ་ཁབ་ཁག་ ༣༠ ནང་སྐོར་བསྐྱོད་ཀྱིས་བོད་དོན་དྲིལ་བསྒྲགས་ཤུགས་ཆེན་བྱས་ཡོད་པས། ངས་བཙན་བྱོལ་བོད་གཞུང་གི་ངོས་ནས་ཁོང་ལ་ཐུགས་རྗེ་ཆེ་དང་རྗེས་སུ་ཡི་རངས་ཞུ་རྒྱུ་ཡིན་ལ། གཞིས་ལུས་མི་མང་གི་རེ་འདོད་ལྟར་མ་འོངས་པར་ཡང་བོད་དོན་ཐོག་མུ་མཐུད་ཕྱག་ལས་གནང་རོགས། ཞེས་འབོད་སྐུལ་ཞུས་སོང་།
མི་སྒེར་རེ་ཟུང་གིས་༧གོང་ས་མཆོག་ལ་འཛིན་པའི་ལྟ་ཚུལ་ཐད་ཁོང་གིས། འཛམ་གླིང་ཐོག་རྒྱལ་ཁབ་མང་པོ་ཡོད་པའི་ཁྲོད་། བོད་གངས་ཅན་ལྗོངས་ནི་སྤྱན་རས་གཟིགས་ཀྱི་གདུལ་ཞིང་དུ་གྱུར་ཏེ། ཆོས་རྒྱལ་རིན་བྱོན་ཐོག་རྒྱལ་བ་ལྔ་པ་ནས་བཅུ་གསུམ་བར་ཕེབས་ཡོད་ཅིང་། དེའི་ནང་དམིགས་སུ་བཀར་ཏེ་བཏོན་པ་རྒྱལ་བ་ལྔ་བ་དང་བཅུ་གསུམ། བཅུ་བཞི་པ་བཅས་ཡིན། ཁོང་ཚོའི་ལོ་རྒྱུས་ལ་ཕྱིར་མིག་བལྟས་ཏེ་དོ་སྣང་དགོས་རྒྱུ་གལ་ཆེན་རེད། ༧གོང་ས་བཅུ་བཞི་པའི་ནུས་སྟོབས་ཀྱིས། ད་ལྟ་རྒྱལ་སྤྱིའི་སྟེང་བོད་པ་ཞེས་ལབ་དུས་ཚང་མས་བཤད་བསྡད་པ་ཞིག་དང་། ཆ་འཇོག་ཡོད་པ་ཞིག་ཆགས་ཡོད་པ་ལས་དཔའ་ཞུམ་པ་དང་ངོ་ཚ་དགོས་པའི་གནས་སྟངས་གང་ཡང་ཆགས་མེད། ཅེས་དང་།
ཡང་ཁོང་གིས་མི་མཐུད་དོན། ཁ་ཤས་ཀྱིས་༧གོང་ས་མཆོག་གིས་ཆོས་ཕྱོགས་ཀྱི་ཕྱག་ལས་གནང་ན་འགྲིག་གི་མི་འདུག ཆབ་སྲིད་ཀྱི་ཕྱག་ལས་མང་ཙམ་གནང་དགོས་ཟེར་བ་དང་། རིགས་ཁ་ཤས་ཀྱིས་༧གོང་ས་མཆོག་གི་ཕྱག་ལས་གནང་སྟངས་ཡག་པོ་ཡོད་ནའང་། ཁོང་སྐུ་དངོས་ནས་ཞི་བའི་གོམ་བགྲོད་དང་ཟས་བཅད་ངོ་རྒོལ་གནང་ཐུབ་ན་ཡག་ས་རེད་ཟེར་མཁན་ཡོང་གི་འདུག ཁག་ཅིག་གིས་༧གོང་ས་མཆོག་ལ་ “བླ་རྒན” དང་སྐུའི་ཆབ་སྲིད་འགན་དབང་བསྒྱུར་བཅོས་ཐོག་སྤྱི་འཐུས་ལ་ནུས་པ་མེད་ཟེར་གྱི་འདུག སྤྱིར་མང་གཙོའི་ལམ་སྲོལ་ཐོག་སྐད་ཆ་ག་རེ་བཤད་ན་འགྲིག་ཀྱང་། བཤད་ཟིན་པ་དོན་ལ་གནས་རྒྱུ་ཤིན་ཏུ་གལ་ཆེན་རེད། ང་ཚོས་༧གོང་ས་མཆོག་གི་མཛད་འཕྲིོན་ཁོ་ནར་བསམ་བློ་བཏང་ཡང་། གསུང་ཆོས་ཐེངས་གཅིག་གསུངས་པའི་སྐབས་སུའང་རླབས་ཆེན་གྱི་ཕྱག་ལས་ཅི་ཙམ་གནང་ཡོད་མེད་བསམ་བློ་གཏོང་དགོས། དེ་མིན་འཆལ་གཏམ་བཤད་མཁན་ཞིག་གིས་མི་ལོ་སྟོང་ཕྲག་རིང་འཛམ་གླིང་སྐོར་བརྒྱབ་ཀྱང་། སྐུ་མདུན་གྱི་གསུང་ཆོས་ཐེངས་གཅིག་གི་དོ་ཟླར་མི་ཡོང་། ཞེས་གསུངས་བྱུང་།
གསར་འགོད་པ། དཔལ་ལྡན།
༈ ཆོས་རིགས་བཀའ་བློན་ཚིག་ནི་སྟོང་པ་རེད་ཤག གོ་རྒྱུ་གང་ཡང་མི་འདུག རྗེས་སོར་ཁོང་གི་གསུང་བཤད་འདྲ་གནང་རྒྱུ་ཡོད་ན་ཐོག་མ་ནས་ཡག་པོ་གྲ་སྒྲིག་གནང་སྟེ་གསུང་ཐུབ་ན་ཡག་པོ་ཡོང་ས་རེད་ཐུགས་འཇགས་ཞུ།།
ཆོས་རིག་བཀའ་བློན་མཆོག་ལ་ཆོས་སྲིད་ཀྱི་མཁྱེན་རྒྱ་མེད་ན་བོད་གཞིས་བྱེས་གཉིས་ཀྱི་ངོ་ཚབ་ཆོས་རིག་བཀའ་བློན་ཕོག་མི་ཐུབ་པ་ཀུན་གྱི་མཁྱེན་གསལ་རེད། རྒན་ཡོལ་ཞུས་ཞེས་བསྐུལ་མ་མི་དགོས་དང་ཨ་མའི་བུ་ལ་ནུས་འཇོན་ཡོད་ནས་བོད་གཞུང་དགའ་ལྡན་ཕོ་བྲང་གི་ཆོས་རིག་བཀའ་བློན་ལོ་ལྔ་ཡི་རིང་བྱེད་དགོས་པའི་བྱ་བ་མཐའ་དག་དག་ཅིང་གཙང་བའི་སྒོ་ནས་རླབས་ཆེན་གྱི་ཕྱག་ལས་གནང་ཟིན་པ་རེད། བྱས་རྗེས་ཞེས་མཁར་ཁང་པའི་ཁྲ་ཁྲ་ཟིང་ཟིང་ཙམ་མིན་པར་བོད་གཞིས་བྱེས་གཉིས་ཀྱི་རིས་མེད་ཆོས་སྡེ་ཡོངས་ཀྱི་ལོ་རྒྱུས་དཔེ་དེབ་ཆེན་མོ་དེ་བཟོད་ཁྱོད་ཀྱིས་མཐོང་འོང་རྒྱུ་རེད། གོང་དུ་བཀའ་བློན་མཆོག་གི་གསུང་པ་བཞིན་མང་གཙོ་དང་སྨྲ་བརྗོད་རང་དབང་ཡིན་དུས་བརྗོད་་ཆོག་ན་ཡང་བརྗོད་པ་དོན་ལ་གནས་དགོས་གསུང་པ་དེ་མཁྱེན་པར་མཛོད་ཅིག ཆོས་ལུགས་སུ་ཡིན་ཡང་ཕྱོགས་རིས་ཀྱིས་ཕན་ཚུན་མ་ཕྱེ་བ་འདྲ་མཉམ་དང་རིས་མེད་དགེ་འདུན་པ་ཡོངས་ལ་ཞེན་བསྐུལ་དུས་རབ་དང་མཐུན་པའི་གསུང་སྙིང་ཐག་པ་ནས་སེར་མོ་བ་རྣམས་ཀྱི་དེ་ལྟར་མ་བྱེད་ན་དུས་ཀྱི་གཉན་འཕྲང་ཡ་ང་བ་འདིར་ཉན་ཁ་ཆེན་པོ་འཕྲད་དང་འཕྲད་འགྱུར་གྱི་ལྷག་བསམ་ཕུག་རྒྱང་རིང་པོ་དང་ལྡན་པ་ཞིག་ངེས་པར་དུ་དགོས་ཀྱི་འདུག་ཞེས་ཡང་ནས་ཡང་དུ་བསྐུལ་མར་སྐུལ་བའི་བཀའ་བློན་འདི་བཞིན་མ་འོང་བཙན་བྱོལ་བའི་ནང་ལ་ཡོང་བ་དཀའ་ལས་ཁག་པོ་ཡིན་པར་སེམས། མ་གཞི་ནི་ཁྱི་བ་གི་ཆུ་འབོག་ན། རང་སྣ་ལ་མཐོ་འཇལ་དགོས་པ་བཞིན་རང་ལ་ནུས་འཇོན་ཤེས་གསུམ་ག་ཚོད་ཡོད་པ་ལ་བལྟ་ནས་མི་ལ་ཡང་དེ་བཞིན་ཤོད་དགོས་རྒྱུ་ནི་བཙན་བྱོལབའི་ནང་གི་རྩོམ་པ་པོ་རྣམས་ལ་མེད་དུ་མི་རུང་བའི་ཆ་རྐྱེན་ཞིག་ཡིན་པར་སེམས།
བག་བྲོ་ཟེར་བ་འདི་ཆབ་སྲིད་བཙོན་པའི་མིང་འཁུར་ཞིག་རེད།
ཡིན་ཡང་བཙན་བྱོལ་དུ་འབྱོར་ནས་སྦྱིན་བདག་ཁག་ཤས་ཤིག་གིས་རོགས་རམ་ཐོབ་ཚེ་ད་བཟོད་འཇིག་རྟེན་ཆོས་བརྒྱད་ཁོ་ནར་མགོ་འཁོར་བ་ཞིག་རེད།
ད་སྔར་ཁོས་འགྲེམས་སྤེལ་བྱས་པའི་དེབ་ཚོར་གཟིགས་དང་།
སྦྱིན་བདག་གི་དངུལ་འཕྲོ་བརླག་ཙམ་ལས་ཕན་ཐོགས་པ་གཅིག་ཀྱང་མེད།
མདོར་ན་ཁོ་རང་བོད་གཞུང་གིས་དྲིན་གྱིས་རྒྱལ་ཁབ་ཕྱི་ནང་དུ་བསྐྱོད་པའི་པར་དེ་ཚོ་བསྐྱར་པར་རྐྱང་རྐྱང་རེད།
ཁོས་ད་དུང་བོད་གཞུང་དང་བཀའ་ཁྲི་མཆོག་ལ་ཁ་རྐྱང་རྐྱང་གཏོང་གིན་རེད།
ཁོ་ནི་དྲིན་ཆེན་ལ་དྲིན་ལོག་ཤ་སྟག་བྱེད།
རྣར་མི་འགྲོ་བ་ད་སྔར་ཁོས་བཏོན་པའི་དེབ་ཚོར་ཞིབ་འཇུག་ཅིག་བྱོས་དང་།
དགའ་ལྡན་བག་གྲོ་ལགས་ཀྱི་རྩོམ་དེབ་དེ་ལ་དགའ་སྤྲོ་བཅས་ཐུགས་བརྗེ་ཞུ།
ཆོས་རིག་བཀའ་བློན་གྱི་སྐད་ཆ་ལ་ཉོག་གཏམ་ལས་དོན་ཅི་ཡང་མེད་པ་ཞིག་རེད།
ཆོས་རིག་བཀའ་བློན་འདི་དངོས་གནས་ཆོས་སྲིད་གང་ཞིག་ལ་མཁྱེན་རྒྱ་ཡོད་མེད་ཀྱང་མི་ཤེས། ད་ལྟའི་བར་དུ་འདི་གནང་བཞག་པ་རེད་ཞེས་སྟོན་རྒྱུ་ཞིག་མེད་པའི་སྒང་རེད། བླ་རྒན་འདི་ད་དངོས་གནས་རྒན་ཡོལ་ཞུ་རན་རེད། དེ་མིན་དེ་རིང་གཞུང་དམངས་གཉིས་ལ་དབྱེན་སྦྱོརའདྲ་ཞིག་བཤད་འདུག
གྲྭ་བག་བྲོའི་དེབ་དང་རྩིག་ངོས་དག་ན་ཡོད་པའི་པར་མང་པོ་རེད། རྣ་མིག་ལ་བྱང་ནས་ཅང་མ་རིག་མོད།
ཆོས་རིག་བཀའ་བློན་འདིས་དངོས་གནས་གནད་འགག་ཅིག་གསུངས་འདུག་ལ། གཅན་ཚའི་དཔལ་ལྡན་ཁྱེད་ཀྱིས་གནད་འགག་ལ་འཇུས་ནས་གསར་འགྱུར་མ་འདྲ་བ་ཞིག་བྲིས་འདུག དངོས་གནས་གསར་འགོད་པ་ཟེར་བ་འདི་འགོ་ཚོས་མཁན་ཞིག་དགོས་ས་རེད། གསར་ལམ་གཞན་པ་དང་ལྷག་ཏུ་གཞུང་འབྲེལ་དྲ་བའི་སྟེང་གི་གསར་གནས་འབྲི་སྟངས་དེར་ཅིག་གཟིགས་དང་། གོ་རྒྱུ་ཚོར་རྒྱུ་ཞེ་དྲག་ཡོད་པ་མ་རེད། དེས་ན་ཀླད་དམར་ཁྱེད་གཞར་ཡང་ཀླད་པ་རང་དགར་མ་དམར་བ་ཤེས་ཀྱི་འདུག་ཅེས་ངས་བཤད་ཀྱི་ཡོད། ཡག་བྱུང་།
རྒྱལ་པོ་རང་གི་ཡུལ་དུ་བཀུར། །
མཁས་པ་ཡུལ་གཞན་དུ་ཡང་བཀུར། །
༸ས་པཎ་གྱི་ཚིག་དེ་ཡང་ད་ཡག་པོ་མི་དྲན།
གུས་པའི་གོ་ཐོས་ལྟར་ན། གོང་ས་མཆོག་གིས་ཕྱི་ལོ ༢༠༠༡ལོར་ཟམ་གདོང་རིན་པོ་ཆེར་བཀའ་ཁྲིའི་འོས་ཐོབ་རྗེས། གསར་འགོད་པར་ཡང་ང་ལྟ་བུའི༼བླ་རྒན་མགོ་དཀར༽ཞིག་སླེབས་སོང་ཞེས་སྐུ་རྩེད་ཀྱིས་ལན་གསུངས་ཡོད་པས། ཆོས་དོན་བཀའ་བློན་འདིས་ག་རེ་བྱེད་བསམ་གྱི་ཡོད་ན། སྐུ་སྒེར་དང་བཀའ་ཤག་བར་འགལ་བ་ཞིག་བཟོ་བསམ་གྱི་ཡོད་དམ། བཀའ་ཤག་གིས་སྐུ་སྒེར་ལ་བསྐོར་ནས་སྐྱོན་ཞིག་རྒྱག་གི་ཡོད་པ་གང་ཡིན་ཤེས་ཀྱི་མི་འདུག ཚང་མ་ལོས་བགྲོ་གླེང་གནང་རན་མེད་དམ།
དེ་མིན་འཆལ་གཏམ་བཤད་མཁན་ཞིག་གིས་མི་ལོ་སྟོང་ཕྲག་རིང་འཛམ་གླིང་སྐོར་བརྒྱབ་ཀྱང་། སྐུ་མདུན་གྱི་གསུང་ཆོས་ཐེངས་གཅིག་གི་དོ་ཟླར་མི་ཡོང་།