དེང་སང་སྤྱི་ཚོགས་དང་ཆབ་སྲིད་ཀྱི་གནས་བབ་གང་ཡང་ལྷག་མེད་ལ། དམག་ཤུགས་གནས་བབ་ཀྱང་དེ་ཙམ་གལ་ཆེན་མིན་པར། གལ་ཆེ་ཤོས་དཔལ་འབྱོར་དང་ཁྲོམ་རའི་གནས་བབ་རེད། ཅེས་ཟམ་གདོང་རིན་པོ་ཆེས་གསུངས་ཡོད།
བོད་མིའི་ཚོང་ལས་བདེ་ཚོགས་ཀྱི་གོ་སྒྲིག་འོག ཁ་སང་ཕྱི་ཚེས་ ༤ ཉིན་གངས་སྐྱིོད་སྤྱི་ཐབ་ཚོགས་ཁང་དུ། བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་ལྔ་པ་དེ་ཚོགས་ཡོད་ཅིང་། ཚོགས་འདུའི་མཛད་སྒོར་བོད་གཞུང་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གཙོས་བཀའ་བློན་ཕྱག་རོགས་དང་སྤྱི་འཐུས་ཚོགས་གཞོན། ཧིན་བོད་མཛའ་འབྲེལ་ཚོགས་པའི་ཚོགས་གཙོ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་བོད་མིའི་ཚོང་ལས་བདེ་ཚོགས་ཀྱི་ཚོགས་མི་བཅས་ཁྱོན་ ༡༠༠ ཙམ་འདུ་འཛོམས་བྱུང་ཡོད་ལ། དེ་རིང་ཕྱི་ཚེས་ ༥ ཉིན་ཚོང་ལས་བདེ་ཚོགས་ཀྱི་རྒྱུན་ལས་གསར་འདེམས་གནང་རྒྱུ་ཡིན་འདུག
ཐོག་མར་བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་བསོད་ནམས་སྟོབས་རྒྱལ་ལགས་ཀྱིས་ལས་སྡོམ་སྙན་སྒྲོན་ཞུས་དོན། ད་ལྟ་བོད་མིའི་ཚོང་ལས་ཚོགས་པའི་གནས་སྟངས་ཡར་རྒྱས་སོང་སྟེ་ཚོགས་མི ༡༢༥ ཙམ་ཡོད་ཅིང་། ཚོགས་པའི་དམིགས་ཡུལ་ནི། ཚོགས་པ་འདི་སྲ་བརྟན་ཆགས་ཏེ་རང་མགོ་རང་ཐོན་ཡོང་རྒྱུ་དེ་ཡིན། བོད་པའི་ཚོང་པ་རྣམས་རྒྱལ་སྤྱིའི་ཚོང་ལས་སྡེ་ཚན་ཁག་ཏུ་འཛུལ་ཞུགས་བྱས་ན་ཁེ་ཕན་ཆེ་སྟབས། ང་ཚོས་ཧྥ་རན་སིའི་ཚོང་ལས་ཚོགས་པ་དང་། སི་ཕན་ཚོང་ལས་ཚོགས་པ། ཡུ་རོབ་ཚོང་ལས་ཚོགས་པ་བཅས་སུ་འབྲེལ་བ་བྱས་ཏེ་མཉམ་འབྲེལ་བྱ་ཐུབ་བྱུང་ཡོད། ཚོང་དོན་འབྲེལ་ལམ་འདི་བརྒྱུད་ང་ཚོའི་ངོས་ནས་ཚོང་པ་གཞན་དང་མི་འདྲ་བར་བོད་རིགས་ཚོང་པའི་བཟང་སྤྱོད་ཀྱི་རིན་ཐང་སྟོན་རྒྱུ་ཡིན། ཞེས་བརྗོད་བྱུང་།
སྐུ་བགྲོན་གཙོ་བོ་༧ཟམ་གདོང་རིན་པོ་ཆེ་མཆོག་གིས་གསུང་དོན། བོད་པའི་ཚོང་ལས་བདེ་ཚོགས་སྐྱབས་བཅོལ་སྤྱི་ཚོགས་ནང་འཛུགས་ཐུབ་པ་དེ། ཚོང་ལས་ཙམ་མིན་པར་སྤྱི་ཚོགས་དང་ཆབ་སྲིད་གཉིས་ཀའི་ཐོག་གལ་ཆེན་ཞིག་ཆགས་ཡོད་ལ། མ་འོངས་པར་ཡང་ཇི་སྲིད་ང་ཚོ་བཙན་བྱོལ་དུ་གནས་པའི་རིང་། ཚོགས་པ་འདིའི་རིགས་བརྟན་པོར་གནས་ཐུབ་རྒྱུ་འབད་བརྩོན་གནང་དགོས། དཔལ་འབྱོར་དོ་དམ་པས་གསུངས་པ་བཞིན། རྒྱུན་ལས་ཡག་པོ་གདམ་རྒྱུ་དང་བདམས་ཐོན་བྱུང་བའི་རྒྱུན་ལས་ཚོས་ཀྱང་། སོ་སོའི་ཚོང་ལས་དང་རང་དོན་འཐུས་ཤོར་དུ་འགྲོ་བཞིན་ཡོད་ནའང་། སྤྱི་དོན་ལ་ལྷག་བསམ་གྱི་ཐོིག་ཕྱག་ལས་གནང་རྒྱུ་གལ་ཆེན་རེད། ད་ལྟའི་འཇིག་རྟེན་འདི་ཚོང་པའི་འཇིག་རྟེན་ཞིག་ཆགས་ཡོད་དུས། དཔལ་འབྱོར་དང་ཚོང་གི་ལས་དོན་དེ། ཆབ་སྲིད་དང་སྤྱི་ཚོགས་ལ་འགྱུར་བ་གཏོང་མཁན་གྱི་རྒྱུ་རྐྱེན་ཆགས་ཡོད། ཅེས་གསུངས་བྱུང་།
ཟམ་གདོང་རིན་པོ་ཆེས་ཁོང་གིས་དེང་རབས་ཚོང་ལས་ལ་འཛིན་པའི་ལྟ་ཚུལ་སྐོར་ལ། ང་ལ་མཚོན་ན། ཚོང་པའི་ལྷན་ཚོགས་ནང་ཆ་ཤས་ལེན་པ་དང་གཏམ་བཤད་སྤེལ་རྒྱུར་འོས་བབ་ཡོད་མཁན་ཞིག་མ་རེད། གང་ཡིན་ཟེར་ན། ང་རང་སྒེར་གྱི་ལྟ་གྲུབ་ཐོག་བལྟས་ན། དེང་རབས་དངུལ་གྱི་མ་རྩའི་ཐོག་ནས་ཚོང་རྒྱག་མཁན་ཚོར་ངོ་རྒོལ་བྱེད་མཁན་གྲས་ཡིན། འཇིག་རྟེན་འདི་ཆུད་ཟོས་སུ་གཏོང་མཁན་ནི། ཐོག་མ་དངུལ་དང་དེ་ནས་དངུལ་ལ་བརྟེན་པའི་ཚོང་། མཐའ་མ་དངུལ་གྱི་ཚོང་དེ་བསམ་བློའི་ནང་རྣམ་རྟོག་གི་སྤྲུལ་བ་ཞིག་གི་ཐོག་བརྒྱབ་པ་མ་གཏོགས། སོ་སོའི་ཁུག་མའི་ནང་དངུལ་གྱི་མ་རྩ་མེད་ནའང་། ཚོང་ལས་བྱ་ཐུབ་པའི་མ་རྐང་ཉོ་ཚོང་ཐོག་འཚོང་རྒྱག་རྒྱུ་དེ་སྤྱི་ཚོགས་འཕྲོ་བརླག་ཏུ་གཏོང་བ་དང་། སྤྱི་ཚོགས་ནང་དབུལ་ཕྱུག་ཆ་མ་སྙོམས་པའི་གཞི་རྩ་ཞིག་ཏུ་མཐོང་བསྡད་ཡོད། ཅེས་གསུངས།
བོད་ཀྱི་ཚོང་པ་ཚོས་རྒྱལ་སྤྱིའི་ཚོང་དོན་གྱི་འགྲོ་ལུགས་དང་བསྟུན་དགོས་པའི་ཐད་ལ། དེང་སང་སྤྱི་ཚོགས་དང་ཆབ་སྲིད་ཀྱི་གནས་བབ་གང་ཡང་ལྷག་མེད་ལ། དམག་ཤུགས་གནས་བབ་ཀྱང་དེ་ཙམ་གལ་ཆེན་མིན་པར། གལ་ཆེ་ཤོས་དཔལ་འབྱོར་དང་ཁྲོམ་རའི་གནས་བབ་རེད། ཅི་ཙམ་གྱིས་བག་མེད་ལོངས་སྤྱོད་ཐུབ་པ་དང་ཁྲོམ་ར་བསྐྲུན་ཐུབ་ན། རང་ཉིད་རྒྱལ་སྤྱིའི་སྟེང་ནུས་པ་དང་སྟོབས་ཤུགས་ལྡན་པ་ཞིག་ཆགས་ཐུབ་ཀྱི་རེད། རྒྱལ་སྤྱིའི་སྤྱི་ཚོགས་དང་ཆབ་སྲིད་ཀྱི་ལམ་ཁ་དེར་ཁ་ལོ་བསྒྱུར་ཐུབ་པའི་གནས་བབ་ཅིག་ཏུ་བསླེབ་སྐབས། ང་ཚོའི་འབོད་སྒྲ་དེ་ཚང་མས་གོ་ཐུབ་དགོས་ན། ང་ཚོས་ཀྱང་མ་རྩ་རིང་ལུགས་ཀྱི་ཚོང་བ་ཚོར་རྣམ་འགྱུར་ཞིག་སྟོན་དགོས་རྒྱུ་ལས། རྣམ་འགྱུར་གཞན་ཞིག་ཐོག་འགྲོ་རྒྱུའི་ལམ་ཁ་གང་ཡང་མེད། ཅེས་གསུངས།
བོད་པའི་ཚོང་ལས་ཁྲིམས་མཐུན་ཡོང་ཐབས་སྐོར་ལ། ང་རང་གི་ངོས་ནས་བཙོན་བྱོལ་བོད་མིའི་ཚོང་པའི་བདེ་དོན་ལྷན་ཚོགས་འདི། སྤྱི་ཚོགས་དང་ཆབ་སྲིད་གཉིས་ཀའི་ཐོག་དོན་ཕན་ཆེན་པོ་བསྒྲུབ་རྒྱུར་ནུས་པ་ཡོད་པའི་སྒྲིག་འཛུགས་ཤིག་དང་། མ་འོངས་པར་ནུས་པ་ཆེ་རུ་འགྲོ་རྒྱུའི་རེ་བའི་འབྱུང་ཁུངས་ཤིག་ཡིན་པར་ངོས་འཛིན་བྱེད་ཀྱི་ཡོད་སྟབས། སྒྲིག་འཛུགས་འདི་རྒྱུན་གནས་དང་ཡར་རྒྱས་འགྲོ་དགོས་པ་གལ་ཆེན་རེད། སྒྲིག་འཛུགས་རྒྱུན་གནས་དང་ཡར་རྒྱས་ཀྱི་ཆ་རྐྱེན་ནི། གནས་ཡུལ་རྒྱལ་ཁབ་ཀྱི་ཁྲིམས་དང་མཐུན་པ་དང་། ཕྱི་གསལ་ནང་གསལ་ཡོད་པ། འགན་འཁུར་ཐུབ་པའི་ལས་ཀ་བྱེད་རྒྱུ་བཅས་རེད། དེབ་སྐྱེལ་ཡིག་ཆ་དེ་ཚོ་ཡང་བསྐྱར་བཅོས་ཁྲིམས་མཐུན་བཟོ་རྒྱུ་དང་གཞུང་གི་འབབ་ཁྲལ་དང་རྩིས་ཞིབ་ཀྱི་ཡིག་ཆ་གཙང་བཟོ་དགོས་པ་གལ་ཆེན་རེད། དེ་མིན། རྒྱ་གར་ནང་དཔལ་འབྱོར་གྱི་ལས་ཀ་བྱ་དགོས་བྱུང་ན། ཕྱི་དངོས་ནང་འདྲེན་དང་ཕྱི་ཟོག་ནང་འདྲེན་བྱ་རྒྱུའི་ལམ་ཁ་ཞིག་མེད་ན། ས་གནས་རང་དུ་ཚོང་ལས་གཉེར་རྒྱུ་ཅུང་ཁག་པོ་ཡོད། ཅེས་གསུངས་བྱུང་།
བོད་རིགས་ཚོང་པའི་ཀུན་སྤྱོད་ཀྱི་གལ་ཆེའི་རང་བཞིན་སྐོར་ལ། ཁྱོད་ཚོས་ཚོང་པའི་བདེ་ཚོགས་གཞན་ལ་འབྲེལ་བ་བྱེད་སྐབས། བོད་ཀྱི་ཚོང་པའི་མ་འཛུགས་དང་པོ་དེ་ཚོང་པའི་བཟང་སྤྱོད་སྐོར་ཡིན་གསུངས་པ་དེ་དགའ་འོས་པ་ཞིག་རེད། ཚོང་བ་དང་བཟོ་བ་གང་ཡིན་རུང་། གཞི་རིམ་གྱི་བཟང་སྤྱོད་ཅིག་མེད་ན། ཕུགས་བརྟན་པོ་ཞིག་ཡོང་ཐབས་ཡོད་པ་མ་རེད། རྒྱ་དཀར་ནག་གཉིས་རྒྱལ་སྤྱིའི་སྟེང་དཔལ་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་ཅིག་ཡིན་པར་མ་ཟད། འབྱུང་འགྱུར་དཔལ་འབྱོར་གྱི་སྟོབས་ཆེན་རྒྱལ་ཁབ་ཅིག་ཆགས་རྒྱུར་རྒྱུ་རྐྱེན་ཚང་ཡོད། ཡིན་ནའང་། དེ་གཉིས་ལ་འགོག་རྐྱེན་ཞིག་འཕྲད་ཡོད་པ་ནི། དཔལ་འབྱོར་འདུ་འགོད་བྱེད་མཁན་ཚོར་ཚོང་པའི་བཟང་སྤྱོད་ཀྱི་མ་འདང་པར། ལྐོག་ཟ་རུལ་སུངས་དང་ལྟག་སྒོ་བརྒྱུད་པ། དེ་བཞིན་ཚོང་ལས་ཐོག་ཚད་ལས་བརྒལ་བའི་ཁེ་བཟང་བླངས་པའི་སྟབས་ཀྱིས་གནས་སྟངས་དེའི་རིགས་འབྱུང་བཞིན་ཡོད། ཅེས་གསུངས་སོང་།
གསར་འགོད་པ། དཔལ་ལྡན།
བཀའ་ཁྲི་ལགས།
ད་ལྟའི་འཇིག་རྟེན་འདི་ཚོང་གི་འཇིག་རྟེན་ཞིག་ཡིན་ན།
བཙན་བྱོལ་བོད་གཞུང་ཡང་དེ་དང་མཉམ་དུ་བཞུགས་ཐབས་ཤིག་མི་དགོས་སམ།
ལོ་ཤས་སྔོན་ནས་ཁྱེད་ཀྱིས་བཙན་བྱོལ་གཞུང་གི་ཚོང་རིགས་ཐམས་ཅད་སྒོ་ཐེལ་རྒྱབ་ནས་བཅམ་འཇོག་བྱས་པ་རེད།
དེ་ལྟར་ན་ང་ཚོ་ཡང་འཇིག་རྟེན་འདི་ཡི་རྒྱལ་ཁབ་དང་མཉམད་དུ་འགྲོ་མི་དགོས་སམ།
དུས་རབས་ཀྱི་རྗེས་ལུས་ཡིན་ནམ།
ཨ་རོ་ཁྱེད་ཀྱིས་གསར་འགྱུར་བྲིས་དང་ན། ངས་ཡིན་གཅིག་མིན་གཅིག་ལྟ་དགོས་ཀྱི་འདུག གལ་སྲིད་སྐུ་ཞབས་ཞོགས་དུང་ཟེར་བ་ཞིག་མེད་ནའང་། གཅན་ཀླད་དམར་ཁྱེད་རེ་བ་ཞིག་ཡོད་ན་ཐང་ཀི། ཧཧཧཧཧ
ཁྱེད་ཀྱིས་རིན་པོ་ཆེའི་གསུང་བཤད་ཀྱི་གནད་འགག་དེ་འཇུས་འདུག འདི་ལྟར་ཕྱིན་དུས
ད་ལྟའི་འཇིགས་རྟེན་འདི་ཚོང་ཞིག་ཡིན་ན་ཤུན་ཏུ་ངེས་ཀྱང་བཟང་།
སྤྱིར་དངོས་པོའི་དཔལ་ཡོན་དང་བསམ་པའི་དཔལ་ཡོན་གཉིས་ལས་བསམ་པའི་དཔལ་ཡོན་གཙོ་ཆེ་ན་ཡང་།
ཕྱི་དངོས་པོའི་དཔལ་ཡོན་མེད་ན་འཇིགས་རྟེན་འདི་ཡར་རྒྱས་ལ་འགྲོ་ས་མ་རེད། ཆགས་བཞགས་ན་བལ་ཡུལ་རྒྱལ་ཁབ་ལྟ་བུའོ།
འཇིག་རྟེན་འདི་ཆུད་ཟོས་སུ་གཏོང་མཁན་སྒོར་མོ་མ་རེད་ལ་སྒོར་མོ་ལ་བརྟེན་པའི་ཚོང་བ་དེ་ལས་ཀྱང་མ་རེད། འཇིག་རྟེན་འདིའི་འཚོ་རྟེན་གཙོ་བོ་སེམས་པའི་དཔལ་ཡོན་དང་དངོས་པའི་དཔལ་ཡོན་གཉིས་ལས་མ་འདས་བ་མ་ཡིན་ནམ།