ང་ཚོས་གྲུབ་འབྲས་ལྡན་པའི་ལས་འགུལ་ཞིག་སྤེལ་དགོས་ཀྱི་འདུག

ས་བྱི་ཞི་རྒོལ་ཆེན་མོའི་སྐབས་རྒྱལ་སྤྱིའི་གསར་འགོད་པའི་མདུན་སར་བོད་ནང་གི་གནས་སྟངས་དངོས་ངོ་སྤྲོད་གནང་མཁན་གྲས་གྲྭ་འཇམ་དབྱངས་སྦྱིན་པ་ལགས་འདས་གྲོངས་སུ་སོང་བར། གཞུང་འབྲེལ་མིན་པའི་ཚོགས་པ་ལྔས་གདོང་སེམས་མཉམ་སྐྱེ་ཡི་ལས་འགུལ་སྤེལ་ཡོད།

ཁ་སང་ཕྱི་ཚེས་ ༦ ཉིན་གྱི་ཕྱི་དྲོ་བོད་ཀྱི་དབུས་གཞོན་ནུ་ལྷན་ཚོགས་དང་དབུས་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་མང་གཙོ་ཚོགས་བཅས་གཞུང་འབྲེལ་མ་ཡིན་པའི་ཚོགས་པ་ལྔའི་གོ་སྒྲིག་འོག ཉེ་ཆར་རྒྱ་ནག་གཞུང་གི་མནར་གཅོད་འོག་འདས་གྲོངས་སུ་ཕྱིན་པའི་བླ་བྲང་དགོན་པའི་གྲྭ་འཇམ་དབྱངས་སྦྱིན་པ་ལགས་དང་ཁོང་གི་ནང་མིར་གདུང་སེམས་མཉམ་སྐྱེ་མཚོན་པའི་མར་མེ་ཁྲོམ་སྐོར་ཞིག་གནང་སོང་།

སྐབས་དེར་མི་མང་ལ་གྲྭ་འཇམ་དབྱངས་སྦྱིན་པ་གཙོས་པའི་བླ་བྲང་དགོན་པའི་དགེ་འདུན་པ་རྣམས་ཀྱིས་རྒྱལ་སྤྱིའི་གསར་འགོད་པར་གནས་ཚུལ་བརྗོད་བཞིན་པའི་བརྙན་རིས་གཟིགས་འབུལ་ཞུས་ཤིང་། གྲྭ་འཇམ་དབྱངས་སྤྱིན་པ་ལགས་དང་མཉམ་དུ་རྒྱལ་སྤྱིའི་གསར་འགོད་པར་གནས་ཚུལ་རྗོད་མཁན་གྲས། ད་ཆར་ས་རཱ་མཐོ་སློབ་ནང་སློབ་གཉེར་གནང་བཞིན་པའི་གྲྭ་བློ་བཟང་རྒྱ་མཚོ་ལགས་ཀྱི་སྐབས་དེའི་གནས་སྟངས་སྐོར་ལ་གཏམ་བཤད་གནང་དོན། ༢༠༠༨ ལོའི་ཕྱི་ཟླ་ ༤ བའི་ཚེས་ ༩ ཉིན་བླ་བྲང་བཀྲ་ཤིས་འཁྱིལ་དུ་རྒྱལ་སྤྱིའི་གསར་འགོད་པ་འབྱོར་སྐབས། འཇམ་དབྱངས་རྒྱ་མཚོ་ལགས་དང་མཉམ་དུ་ང་ཚོ་ཡང་ཡོད། སྐབས་དེར་ང་ཚོ་མི་སྐོར་ཞིག་གིས་བོད་སྐད་ཀྱི་ལམ་ནས་གནས་ཚུལ་འགྲེལ་བཤད་བྱས་པ་ཡིན། འཇམ་དབྱངས་རྒྱ་མཚོ་ལགས་ཀྱིས་དབྱིན་སྐད་ཐོག་ངོ་སྤྲོད་གནང་བ་རེད། ང་ཚོས་རྒྱལ་སྤྱིའི་གསར་འགོད་པ་ཚོར་གང་ཐུབ་ཀྱིས་བོད་ནང་གི་དངོས་ཡོད་གནས་ཚུལ་བཤད་ཚར་མ་ཐག དགོན་པའི་ཚོགས་འཚོགས་ཡོད་སྟབས། ཉེན་རྟོག་པས་ལམ་སང་འཛིན་བཟུང་བྱས་ཐུབ་མ་སོང་། འོན་ཀྱང་། ཕྱིན་ཉིན་གནས་ཚུལ་མི་ལེགས་སྟབས་ང་ཚོ་བྲོས་བྱོལ་དུ་ཕྱིན་པ་ཡིན། ང་ཚོ་བྲོས་བྱོལ་བྱས་པའི་དགོང་མོ་དེ་རང་ལ་རྒྱ་དམག་འཇམ་དབྱངས་སྦྱིན་པ་ལགས་ཀྱི་གྲྭ་ཤག་ཏུ་འཛུལ་ཏེ་ཁོང་འཛིན་བཟུང་བྱས་འདུག བཙོན་ཁང་ནས་ལོ་ ༣ རིང་མནར་གཅོད་ཚད་མེད་བཏང་སྟེ། ཁོང་གི་རྐང་པ་བཅག་པ་དང་། མཁལ་མ་དང་ཀླད་པ་སྐྱོན་ཅན་དུ་བཏང་སྟེ་ཤི་གསོན་གྱི་མཚམས་ལ་ཐུག་སྐབས། ནང་མི་ལ་རྩིས་སྤྲོད་བྱས་འདུག ནང་མི་གཉེན་ཉེས་ཚོས་གང་ཐུབ་ཅི་ཡོང་གིས་སྨན་ཁང་ལ་ཁྲིད་དེ་སྨན་བཅོས་བྱས་ཀྱང་ཕན་སྐྱེད་མེད་པར་འདས་གྲོངས་སུ་སོང་བ་རེད། ཅེས་ངོ་སྤྲོད་གནང་སོང་།

ཡང་ཁོང་གིས་རོགས་པ་གཞན་དག་གི་གནས་སྟངས་སྐོར་བརྗོད་དོན། ཉེ་ཆར་འདས་གྲོངས་སུ་ཕྱིན་པའི་གྲྭ་སངས་རྒྱས་རྒྱ་མཚོ་ལགས་ཀྱི་གྲྭ་ཤག་ད་དུང་ཡང་ཉེན་རྟོག་པས་སྔོག་བཤེར་བྱེད་བཞིན་ཡོད་སྐོར་གོ་སོང་། ཐུབ་ཚོད་དང་ཁྱད་གསོད་མང་པོ་བྱེད་བཞིན་འདུག་ཟེར། དེ་བཞིན། ས་བྱི་ཞི་རྒོལ་ཆེན་མོའི་སྐབས་བླ་བྲང་ཡུལ་གྱི་ཞི་རྒོལ་གྱི་སྣེ་འཁྲིད་པ། ཚེ་བཙོན་གྱི་ཁྲིམས་ཐག་བཅད་ཡོད་པའི་གྲྭ་ཚུལ་ཁྲིམས་རྒྱ་མཚོ་དང་། ལོ་ ༡༥ ཁྲིམས་ཐག་བཅད་པའི་འཇམ་དབྱངས་ཐབས་མཁས། ལོ་ ༡༠ ཁྲིམས་ཐག་བཅད་ཡོད་པའི་སྐལ་བཟང་རྒྱ་མཚོ་སོགས་གཙོས་པའི་བོད་ཆོལ་ཁ་གསུམ་གྱི་རྒྱལ་གཅེས་པ་མང་པོ་ཞིག་སྐུ་རྒྱ་གཞུང་གིས་བཀྲོངས་ཟིན་ཡང་། ཁག་ཅིག་གིས་ད་དུང་ཡང་རྒྱ་ནག་གི་གདུག་རྩུབ་འོག་མནར་གཅོད་མྱོང་བཞིན་ཡོད། ཁོང་ཅག་གི་གནས་སྟངས་སེམས་ལ་ཉར་ཏེ། ང་ཚོས་གྲུབ་འབྲས་ལྡན་པའི་ལས་ཀ་ཞིག་དང་། གནད་ལ་འཁེལ་བའི་ལས་འགུལ་ཞིག་སྤེལ་དགོས་ཀྱི་འདུག ཅེས་བརྗོད་བྱུང་།

མཇུག་ཏུ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་ཚོགས་པ་ལྔའི་ལས་འགུལ་གྱི་དམིགས་ཡུལ་སྐོར་ལ། རྒྱ་ནག་གཞུང་གིས་ཕྱི་ཟླ་ ༣ པའི་ཚེས་ ༢༨ ཉིན་ནས་བཟུང་བོད་ནང་ཞིང་བྲན་ཁྲི་ཚོ་བརྒྱ་བཅིངས་གྲོལ་བཏང་བའི་དུས་དྲན་སྲུང་གཙིའི་ལས་རིམ་ཞིག་འགྲོ་བཞིན་ཡོད་པ་དང་། ལས་རིམ་དེའི་སྐབས་སུ་ཀིརྟི་དགོན་པའི་གྲྭ་ཕུན་ཚོགས་ལགས་ཀྱི་རང་ལུ་མེར་བསྲེག་བཏང་སྟེ་སྐུ་སྲོག་གྲོངས་ཡོད། དེ་ནས་རྩིས་པའི་ཉིན་ ༢༢ ནང་རྒྱ་མིའི་མནར་གཅོད་འོག་རྒྱལ་གཅེས་པ་ ༣ ཡི་སྐུ་སྲོག་ཤོར་ཡོད་པ་མ་ཟད། ཉིན་དེ་དག་ནང་བསྡོམས་པའི་བོད་པའི་བདེན་དོན་འཐབ་རྩོད་པ་ ༡༤ འཛིན་བཟུང་བྱས་འདུག རྒྱ་ནག་གཞུང་གིས་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་གྲོལ་བཏང་སྟེ་བོད་མི་ཚོར་བདེ་སྐྱིད་ཡོད་པ་དང་རང་དབང་ཡོད་པའི་སྐྱག་རྫུན་བཤད་ཀྱིན་པ་དེ་ང་ཚོས་ཤེས་དགོས་པ་རེད།  ཅེས་དང་།

ཁོང་གིས་མུ་མཐུད་དོན། ༼དུས་རབས་ཀྱི་ང་།༽ཞེས་པའི་དུས་དེབ་ཀྱི་རྩོམ་སྒྲིག་པ་ཇོ་ལེབ་ཟླ་བ་ལགས་ལ་མཚོན་ན། ཁོང་བཟའ་ཟླར་ཕྲུ་གུ་བཙས་ཏེ་ཟླ་ལྔ་ལས་འགོར་མེད་པའི་སྐབས་སུ་འཛིན་བཟུང་བྱས་ཤིང་། ཉེ་ཆར་ཁོང་གི་བཟའ་ཟླ་ཚེ་རིང་སྐྱིད་ཀྱང་འཛིན་བཟུང་བྱས་འདུག ད་ཆར་ཤུལ་དུ་ལོ་གསུམ་ཅན་གྱི་ཕྲུ་གུ་ཞིག་དང་ཟླ་ལྔ་ལས་འགོར་མེད་པའི་བུ་མོ་ཞིག་བཅས་ལས་ལྷག་ཡོད་པ་མ་རེད། གྲྭ་འཇམ་དབྱངས་སྦྱིན་པ་ལགས་ལ་མཚོན་ནའང་། རྒྱ་ནག་གཞུང་གིས་ལོ་གསུམ་རིང་བཙོན་ཁང་ནས་མནར་གཅོད་ཚད་མེད་བཏང་སྟེ་ཁོང་གི་བཤང་གཅིར་ཡང་བདག་པོ་རྒྱག་དགོས་པའི་གནས་བབ་འོག་ནང་མིར་རྩིས་སྤྲོད་བྱས་པ་རེད། ཅེས་དང་། ཁོང་གིས། བོད་ནང་གི་བོད་མི་ཚོ་ད་ལྟའི་གནས་སྟངས་འདི་འདྲའི་འོག་འཚོ་དགོས་པ་དེ་སོ་སོའི་ལྟོ་གོས་དང་གོ་སའི་ཆེད་དུ་མིན་པར། བོད་མི་ས་ཡ་དྲུག་དང་བོད་རང་བཙན་སླར་གསོའི་ཆེད་དུ་ཡིན་སྟབས། ང་ཚོའི་བཙན་བྱོལ་ནང་གི་མགོ་ཁྲིད་དང་མང་ཚོགས་དཀྱུས་མ་ཡོངས་རྫོགས་ཀྱིས་ལས་འགུལ་འདྲ་མིན་སྤེལ་དགོས་པ་ཞིག་དང་འཐབ་རྩོད་ནང་མཉམ་ཞུགས་བྱ་དགོས་ཀྱི་འདུག ཅེས་རེ་འབོད་ཀྱང་ཞུས་སོང་།  

རྒྱལ་གཅེས་པ་གྲྭ་འཇམ་དབྱངས་སྦྱིན་པ་ལགས་ནི། ༡༩༧༦ ལོར་བླ་བྲང་བསང་ཁོག་སྟོད་མ་ནས་ཕ་བློ་བཟང་དང་མ་ཚེ་ལོ་གཉིས་ཀྱི་ཁྱིམ་དུ་སྐྱེས་ཤིང་། ཕ་ཡུལ་ནས་སློབ་ཆུང་ནས་སློབ་འབྲིང་བར་ཕྱིན་རྗེས་ ༡༩༩༣ ལོར་བཙན་བྱོལ་དུ་ཡོང་སྟེ་སུ་ཇཱ་བོད་ཁྱིམ་དུ་ལོ་གསུམ་རིང་དབྱིན་ཡིག་སློབ་སྦྱོང་བྱས། ༡༩༩༦ ལོར་ཕྱིར་བོད་ནང་ལོག་རྗེས་བླ་བྲང་དགོན་པའི་སྨན་པ་གྲྭ་ཚང་དུ་ཞུགས་ཏེ་དབྱིན་སྐད་སྣེ་ཤན་པའི་ཕྱག་ལས་གནང་། ༢༠༠༨ ལོར་རྒྱལ་སྤྱིའི་གསར་འགོད་པ་བླ་བྲང་དུ་ཡོང་སྐབས་བོད་ནང་གི་དངོས་ཡོད་གནས་སྟངས་ངོ་སྤྲོད་གནང་སྟབས། རྒྱ་གཞུང་གིས་འཛིན་བཟུང་བྱས་ཏེ་ལོ་གསུམ་རིང་མནར་གཅོད་བཏང་མཐར་ནང་མིར་རྩིས་སྤྲད་དེ། ཟླ་འདིའི་ཕྱི་ཚེས་ ༣ ཉིན་གྱི་ཞོགས་པའི་ཆུ་ཚོད་ ༡༠ བའི་སྟེང་འདས་གྲོངས་སུ་ཕྱིན་ཡོད་འདུག

གསར་འགོད་པ། དོན་གོ