ཨོ་སི་ཊོ་ལི་ཡའི་སྲིད་བློན་མཆོག་ཟླ་འདིའི་ཟླ་མཇུག་ཏུ་རྒྱ་ནག་ལ་རྒྱལ་དོན་འཚམས་གཟིགས་སུ་བསྐྱོད་འཆར་ཡོད་པའི་སྐབས་འདིར། ཡུལ་དེར་རྟེན་གཞི་བྱས་པའི་བོད་དོན་ལྷན་ཚོགས་ཀྱི་འགན་འཛིན་སྐུ་ཞབས་ཕོལ་བྷོར་ཁུ་(Paul Bourke)ལགས་ཀྱིས། ཚོགས་པ་དེའི་མཚན་ཐོག་ནས་སྲིད་བློན་ལྕམ་ཇོ་ལི་ཡ་གྷི་ལིར་ཊི་(Julia Gillard)མཆོག་ལ་འབོད་སྐུལ་ཞུ་ཡིག་ཅིག་ཕུལ་ཡོད་འདུག
ཞུ་ཡིག་དེའི་ནང་དུ། ཐེངས་འདིའི་སྲིད་བློན་མཆོག་གི་གཟིགས་སྐོར་དམིགས་ཡུལ་གཙོ་བོ་ཚོང་དོན་ཆེད་ཡིན་ནའང་། ང་ཚོས་ཨོ་སི་ཊོ་ལི་ཡ་དང་རྒྱ་ནག་གཉིས་ཀྱི་འབྲེལ་བའི་ནང་འགྲོ་བ་མིའི་ཐོབ་ཐང་ཤིན་ཏུ་གལ་ཆེན་ཞིག་ཏུ་ངོས་འཛིན་བྱེད་ཀྱིན་ཡོད་སྟབས། སྲིད་བློན་མཆོག་ནས་རྒྱ་ནག་དཔོན་རིགས་ཚོར་ཐུག་འཕྲད་སྐབས་གནད་དོན་གསུམ་ཐོག་ངེས་པར་དུ་གླེང་སློང་བྱ་དགོིས་ཀྱི་ཡོད་ལ། ང་ཚོའི་རེ་འདུན་ཁག་ནི། གཅིག ད་ལྟ་བོད་ནང་དུ་ཆབ་སྲིད་དང་ཆོས་དད་རང་དབང་ལ་དམ་བསྒྲགས་དང་། བོད་ཀྱི་ཁོར་ཡུག་ཉམས་ཆག་ཏུ་གཏོང་བཞིན་པ། སྐད་ཡིག་དང་ལེགས་བྱང་རྩ་མེད་བཏང་སྟེ་བོད་ཡུལ་རྒྱ་ཡུལ་དུ་བསྒྱུར་བཞིན་པ། གཉིས། བོད་རྒྱ་གཉིས་བར་དོན་ཕན་ལྡན་པའི་གཉིས་སྨན་གྲུབ་འབྲས་ཤིག་ཡོང་ཐབས་སུ། རྒྱ་གཞུང་གིས་བོད་རིགས་མང་ཚོགས་ལ་གྲོས་མོལ་མུ་མཐུད་གནང་དགོས་རྒྱུ།གསུམ། བོད་རིགས་བུད་མེད་ནོར་འཛིན་དབང་མོ་ལགས་ད་ལྟ་གང་དུ་བཙོན་འཇུག་བྱས་ཡོད་མེད་དང་ཁོང་མྱུར་དུ་གློད་ཀྲོལ་དགོས། ཞེས་བཀོད་ཡོད་འདུག
གསར་འགོད་པ། དཔལ་ལྡན།
འགྲོ་བ་མིའི་ཐོབ་ཐང་དང་། བོད་ཀྱི་སྐད་ཡིག་ལེགས་སྦྱང་ལ་སོགས་སྣེ་འཁྲིད་པའི་མི་སྣ་རྣམས་ཀྱི་སྨྲ་བརྗོད་རང་དབང་ཡོད་མེད་སོགས་ལ་ཡང་། གཟིགས་སྐོར་གནང་ཐུབ་པའི་རེ་བ་ཡོད་ལགས།