ཉེ་ཆར་ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་ཐད་འཕུར་གནམ་གྲུའི་གོད་ཆག་འོག་རྐྱེན་འདས་སུ་སོང་སྟེ་ཉིན་ཤས་རྗེས་ཏེ། ཁ་སང་ས་གནས་ཉེན་རྟོག་པས་ཁོང་ཉིད་ཀྱི་ཕུང་བོ་དང་གནམ་གྲུའི་ཆག་རོ་སོགས་རྙེད་སོན་བྱུང་འཕྲལ། བོད་མི་མང་སྤྱི་འཐུས་ལྷན་ཚོགས་དང་བོད་གཞུང་བཀའ་ཤག་གཉིས་ཀྱིས་ཁ་སང་འདས་པོའི་ཆེད་ཐུགས་གསོའི་འཚམས་འཕྲིན་ཞིག་ཕུལ་འདུག
འཚམས་འཕྲིན་དེའི་ནང་། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཨ་རུ་ན་ཅལ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་འདས་གྲོངས་སུ་ཕྱིན་པར་བློ་ཕམ་ཆེན་པོ་བྱུང་། དེ་རིང་གནས་ཚུལ་གསལ་པོ་ཆགས་སྟབས་ང་ཚོས་ཐུགས་གསོའི་འཚམས་འཕྲིན་འདི་ཕུལ་བ་ཡིན། གཞི་རྩའི་ཆ་ནས་བོད་དང་ཨ་རུ་ན་ཅལ་གཉིས་བར་ལོ་རྒྱུས་ཐོག་འབྲེལ་བ་ཤུགས་ཆེན་ཡོད་པར་མ་ཟད། ལྷག་པར་དུ། བོད་མི་ཚོ་བཙན་བྱོལ་དུ་འབྱོར་རྗེས་སུའང་ཨ་རུ་ན་ཅལ་དང་བཙན་བྱོལ་བོད་གཞུང་བར་འབྲེལ་བ་བྱུང་ཡོད་ལ། མངའ་སྡེའི་དཔོན་རིགས་ཚོའི་ངོས་ནས་བཙན་བྱོལ་བོད་མིའི་གནས་སྟངས་ཐོག་རྒྱབ་སྐྱོར་ཤུགས་ཆེན་གནང་ཡོད།
མངའ་སྡེའི་བློན་ཆེན་རྡོ་རྗེ་མཁའ་འགྲོ་མཆོག་ལ་མཚོན་ན་མངའ་སྡེའི་བློན་ཆེན་མ་ཆགས་གོང་བོད་མི་ཚོར་འབྲེལ་བ་ཆེན་པོ་ཡོད་པ་ཞིག་ཡིན་ཞིང་། མངའ་སྡེའི་བློན་ཆེན་དུ་བསྐོ་གཞག་བྱས་རྗེས་༧གོང་ས་མཆོག་མངའ་སྡེར་གདན་ཞུ་དང་། ཁོ་རང་རྒྱུན་དུ་༧གོང་ས་མཆོག་དང་ཆོས་འབྲེལ་ཟབ་མོ་ཡོད། དེར་བརྟེན། བོད་གཞུང་བོད་མི་མང་སྤྱི་འཐུས་ལྷན་ཚོགས་ཀྱིས། ཁོང་གི་ནང་མི་དང་ཨ་རུ་ན་ཅལ་མངའ་སྡེའི་མགོ་ཁྲིད། མི་མང་བཅས་ཚང་མར་ཐུགས་གསོ་ཞུ་རྒྱུ་ཡིན་ལ། མ་འོངས་པར་ཡང་ཨ་རུ་ན་ཅལ་གཞུང་དང་བཙན་བྱོལ་བོད་མིའི་བར་གྱི་འབྲེལ་བ་དེ། ཁོང་གིས་ལམ་བཟང་སྲོལ་གཏོད་གནང་པ་དེའི་རྗེས་སུ་འབྲང་རྒྱུ་ཡིན། ཞེས་བཀོད་ཡོད།
བོད་གཞུང་བཀའ་ཤག་གི་འཚམས་འཕྲིན་ནང་། ཨ་རུ་ན་ཅལ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་ཉེ་ཆར་སྟབས་མ་ལེགས་པར་ཐད་འཕུར་གནམ་གྲུ་ལས་ཟགས་ཏེ། སྐུ་ཚེ་མ་ཟིན་པའི་གནས་ཚུལ་བྱུང་བར་བློ་ཕམ་ཚད་མེད་བྱུང་། ཁོང་ནི་ལོ་ན་གཞོན་པའི་གཞུང་དྲང་གི་མངའ་སྡེའི་དབུ་ཁྲིད་ཅིག་ཡིན་པར་མ་ཟད། ཁོང་གིས་སྤྱི་ཁྱབ་བློན་ཆེན་གྱི་ཕྱག་ལས་གནང་སྐབས་ཨ་རུ་ན་ཅལ་མང་ཚོགས་དང་ས་ཁུལ་དེར་ཡོད་པའི་བོད་མི་ཚོར་ཕན་ཐོགས་ཆེན་པོ་བྱུང་ཡོད། ཁོང་གིས་ལས་ཡུན་རིང་མངའ་སྡེ་ཧ་ཅང་ཞི་བདེ་དང་ཡར་རྒྱས་ཆེན་པོ་བྱུང་ཡོད། ཁོང་འདས་གྲོངས་སུ་ཕྱིན་པ་དེར་བོད་པ་དང་ཨ་རུ་ན་ཅལ་ཡུལ་མི་རྣམས་ལ་གོད་ཆག་ཆེན་པོ་བྱུང་ཡོད་སྟབས། ང་དང་ངའི་བཀའ་བློན་ལས་རོགས་ཚོས་སེམས་ཚོར་ཆེན་པོས་ཨ་རུ་ན་ཅལ་མི་མང་དང་། དམིགས་བསལ་ཁོང་གི་ནང་མི་སྐུ་འཁོར་བཅས་ལ་ཐུགས་གསོ་ཞུ་རྒྱུ་ཡིན། ཞེས་བཀོད་ཡོད་འདུག
དཔལ་ལྡན་གྱིས་བསྡུས།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དང་པོ་གནམ་གྲུ་ཟགས་པ་རེད་དེ་ནས་ཁོང་གནམ་གྲུ་ལས་ཟགས་པ་རེད་དེར་སོང་གོང་གི་བཀའ་སྤྱི་གཉིས་ཀའི་གསུང་པ་བདེན་པ་རེད་ད་ཧ་གོ་སོང་བས།
གོང་གི་བཀའ་སྤྱི་གཉིས་ཀའི་གསུང་པ་བདེན་པ་རེད། གང་ལ་ཞེས་ན་དང་པོ་གནམ་གྲུ་ཟགས་པ་རེད་དེ་ནས་ཁོང་གནམ་གྲུ་ལས་ཟགས་པ་རེད་དེར་སོང་བཀའ་སྤྱི་གཉིས་ཀའི་གསུང་པ་བདེན་པ་རང་རེད་ཞུ་ཡ་ཡིན།
ཁོང་གི་ནང་མི་དང་མོན་རྟ་བང་ཀྱི་མི་མང་ཡོངས་ལ་གུས་འདུད་གྲངས་མེད་ཞུ།
མིག་ནས་ཆུ་མ་འཐོར་བཞིན་་་མ་ཎི་འུར་འདོན་བྱེད།
འཇིགས་རྟེན་མི་རྟགས་འཁོར་བའི་ཆོས་ཉིད་རེད།།
དལ་འབྱོར་སྙིང་བོ་ལེན་པར་མ་རེམ་ན།།
མི་དབང་སྟོབས་ཆེན་ཡིན་ཡང་འདི་ལྟ་བུར།།
བར་དོའི་ཕྲེང་རིང་འགྲིམ་པ་ཀྱེེ་མ་ཧུད།།
ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།ཨོཾ་མ་ཎི་པདྨེ་ཧཱུཾ།།
རྡོ་རྗེ་མཁའ་འགྲོ་ལགས་ནི།
རྡོ་ལ་རི་མོ་བྲིས་པ་ལྟར། །
རྗེ་བཟང་མངའ་འོག་བུ་ལྟར་བསྐྱངས། །
མཁའ་ལ་ཐད་འཕུར་གནམ་གྲུ་ནང་། །
འགྲོ་དོན་ཕེབས་དུས་དུས་ལས་འདས།
མོན་གྱི་རྟ་དབང་མི་རིགས་དང་། །
དེར་སྡོད་བོད་རིགས་མི་མང་གིས། །
བློ་ཕམ་ཕངས་སེམས་ཆེན་པོའི་ཐོག །
འདས་མཆོད་སྨོན་ལམ་གང་ཤེས་མཛད། །
དལ་རྟེན་ཐོབ་པར་ངེས་སོ་སྙམ། །
ཨོྃ མཎི པདྨེ ཧཱུྃ། །
གནམ་གྲུ་ཟགས་པ་ཡིན་ན་གནམ་གྲུ་ལས་ཟགས་པ་གང་ཡིན་ཡང་ཁྱད་པར་མི་འདུག རླབ་ཆེན་ཀྱི་མི་དེ་འདྲ་ཞིག་འདས་གྲོང་སུ་སོང་ཡོད་པར་ཐོས་པས་བློ་ཕམ་ཆེན་པོ་བྱུང་སོང་། ཁོང་གི་ནང་མི་དང་ཨ་རུ་ན་ཅལ་མངའ་སྡེ་གཙོས་ཁོང་གི་སྐུ་ཡུས་མོན་རྟ་བང་སོགས་ལ་གདུངས་སེམས་མཉམ་སྐྱེད་ཡོད།
ཁོང་སྐུ་གྲོང་སྟངས་གི་རིམ་པ་དེ་རང་ག་ཞིག་ཡིན་རྒྱུ་མ་རེད་གནས་ཚུལ་ཤེས་མཁན་རེ་ཡོད་ན་བྲི་རོགས་གནང་།
གནམ་གྲུ་ལྷུང་ཞིང་དེའི་མཚུངས་གནམ་གྲུ་ལས་ཀྱང་ལྷུང་ན་་་ད་གང་བཤད་ཀྱང་ཆོག་ག
གང་ལྟར་་ཆག་སྒོ་འདི་་ཇི་ལྟར་བྱུང་ཚུལ་གསལ་རྟོགས་བྱ་རྒྱུ་གལ་ཆེ། བསམ་པ་བཟང་ན་ལམ་ཡང་བཟང་བར་ངེས། དགེ་བ་རེ་སྔོས།
གནམ་གྲུ་དང་བློན་ཆེན་གཉིས་ཟགས་འདུག སར་ལྷུང་དུས་བློན་ཆེན་གནམ་གྲུར་ནང་ནས་ཕྱི་ལ་ཟགས་འདུག གནམ་གྲུ་ཟགས་པ་དང་གནམ་གྲུར་ནང་ནས་ཟགས་ཀ་གོ་བ་འགྲེལ་ན་མ་འགྲིག་པ་མི་འདུག་སྙམ །
གནམ་གྲུ་ཟགས་པ་ཡིན་རྒྱུ་རེད་གོ གནས་ཚུལ་ཐོན་གསལ་བྱས་ན། ཁ་སང་གནམ་གྲུའི་ཆག་རོ་དང་། རྡོ་རྗེ་མཁའ་འགྲོའི་འགྲོ་རོགས་བཅས་ཀྱི་ཕུང་པོ་མཉམ་དུ་རྙེད་སོན་བྱུང་ཡོད་རབས་བཤད་འདུག
གནམ་གྲུ་ཟགས་པ་རེད་དམ་གནམ་གྲུ་ལས་ཟགས་པ་རེད། སྤྱི་འཐུས་ཀྱིས་གནམ་གྲུ་ཟགས་ཞེས་བྲིས་འདུག་ལ་བཀའ་ཤག་གིས་གནམ་གྲུ་ལས་ཟགས་ཞེས་བྲིས་འདུག དོན་ངོ་མར་འདི་གཉིས་ཀའི་གང་རེད།