བོད་རྔ་བའི་དོན་རྐྱེན་གྱི་རྒྱབ་གཟུགས།
རྡོ་རྗེ་རིན་ཆེན།
བར་ལམ་བོད་རྔ་པ་ཀིརྟི་དགོན་གྱི་དགེ་འདུན་པ་སུམ་བརྒྱ་ལྷག་ཅིག་ས་གནས་རྒྱ་གཞུང་དམག་མིས་བཙན་བཟུང་བྱས་ཡོད་པ་དང༌། བགྲེས་སོང་ལོ་ན་དྲུག་ཅུ་བརྒལ་བ་གཉིས་དམར་གསོད་བཏང་སྟེ་ད་ལྟ་བོད་རྔ་ཡུལ་མི་དམངས་རྣམས། ས་གནས་དྲག་པོའི་དཔུང་དམག་གི་མེ་མདའི་གྲི་སོའི་འོག་སྡུག་སྦྱོང་མནར་གཅོད་ཚད་མེད་མྱོང་བཞིན་པའི་ཐད་གདུང་སེམས་མཉམ་སྐྱེད་དང་འབྲེལ། གོ་ལའི་ཁྱིམ་རྒྱུད་གཅིག་ཏུ་འཚོ་བའི་རྒྱལ་མཚམས་རིས་མེད་ཀྱི་ཤེས་ཡོན་པ་དང༌། གནས་ལུགས་ལ་བསམ་ཤེས་དང་བདེན་པར་བློ་ཁ་ཕྱོགས་མཁན་ཚོས་བོད་རྔ་པའི་མི་དམངས་རྣམས་ལ་སྙིང་རྗེས་གཟིགས་རོགས།
ལོ་རབས་ལྔ་བཅུའི་ནང་རྒྱ་གཞུང་གིས་བོད་ཁམས་ཡོངས་བཙན་བཟུང་བྱས་རྗེས་ཕྱི་ཚུལ་དུ་མི་རིགས་འདྲ་མཉམ་དང༌། ཆོས་དད་རང་དབང༌། འཆམ་མཐུན་སྤྱི་ཚོགས་སོགས་ཀྱི་ཁ་གཡང་རིམ་པར་བསྒྲགས་ནས་དུས་རབས་ཤིག་གི་ཕྱེད་ཀ་ཕྱིན་ཡོད་ཀྱང༌། དོན་དངོས་ཐོག་གཡོན་ཐལ་ཆེ་བའི་དམར་ཤོག་གི་མགོ་ཁྲིད་ཁག་ཅིག་གི་བསམ་བློའི་ནང༌། བོད་མིའི་འཚོ་གནས་ཀྱི་རང་དབང་ཡོངས་རྫོགས་རྒྱ་དམར་གྱི་སྟངས་འཛིན་འོག་གནས་དགོས་པར་བསམ་ཡོད། དེར་བརྟེན། པེ་ཅིན་གཞུང་གིས་བོད་རིགས་རྣམས་བོད་མི་ཡིན་དུ་འཇུག་རྒྱུར་དངངས་འཚབ་ཡོད་ལ། དངངས་འཚབ་དེ་བརྒྱུད་བོད་མི་ཚོར་མི་རིགས་ཀྱི་བསམ་བློའི་འདུ་ཤེས་སྐྱེ་རྒྱུར་བཀག་འགོག་དང༌། བོད་མི་ཚང་མ་རྒྱ་མི་དང་བསམ་སྤྱོད་གཅིག་ཅན་དུ་འགྱུར་བར་དངོས་བརྒྱུད་ཅི་རིགས་དང་ཞི་དྲག་གཉིས་ནས་བྱེད་ཐབས་སྤེལ་བཞིན་ཡོད།
དཔེ་མཚོན་གསལ་བོ་ཞིག་ནི་ད་ལྟ་བོད་རྔ་པའི་དགོན་གྲོང་གཉིས་ལ་འཕྲད་བཞིན་པའི་གནས་ཚུལ་འདི་འདྲ། ས་གནས་སི་ཁྲོན་གཞུང་ལ་མཚོན་ན་བྱེད་ཐེངས་དང་པོ་ཞིག་མིན། ད་ལྟ་རྒྱ་ནག་དབུས་ཆབ་སྲིད་ཅུས་ཀྱི་རྒྱུན་ལས་དང་སྤྱི་བདེ་དམག་གི་མགོ་འཛིན་ཀྲོའུ་ཡུན་ཁང་གིས་ཕྱི་ལོ་ ༡༩༩༩ ལོར་ས་གནས་སི་ཁྲོན་དམར་ཤོག་དྲུང་ཆེའི་འགན་བཞེས་ནས་རིང་བོ་མ་སོང་བར། སི་ཁྲོན་ཁོངས་གཏོགས་བོད་དཀར་མཛེས་ཁུལ་གྱི་དགེ་བཤེས་བསོད་ནམས་ཕུན་ཚོགས་དང༌། སྤྲུལ་སྐུ་བསྟན་འཛིན་བདེ་ལེགས་གཉིས་ལ་མ་ཉེས་ཁ་གཡོག་གི་གྱོད་གཞི་བཟོས་ཏེ་འཛིན་བཟུང་དང༌། གསེར་རྟ་ལྔ་རིག་ནང་བསྟན་སློབ་གླིང་གཏོར་བཤིག་བཏང་བ། མཁན་པོ་འཇིགས་མེད་ཕུན་ཚོགས་དོ་དམ་འོག་གྲོངས་རྐྱེན་དོགས་གཞིར་གྱུར་པ་རྣམས། ཀྲོའུ་ཡུན་ཁང་གིས་སི་ཁྲོན་དམར་ཤོག་དྲུང་ཆེའི་འགན་ཁུར་རྗེས་བོད་དཀར་མཛེས་ཁུལ་གཅིག་པོར་བསྟུད་མར་སྤེལ་བའི་གནས་ཚུལ་ཞིག་ཡིན།
གོང་གསལ་མཁན་པོ་འཇིགས་མེད་ཕུན་ཚོགས་དང༌། སྤྲུལ་སྐུ་བསྟན་འཛིན་བདེ་ལེགས། དགེ་བཤེས་བསོད་ནམས་ཕུན་ཚོགས་གསུམ་ནི། བོད་དཀར་མཛེས་ཁུལ་དུ་ཤུགས་རྐྱེན་ཐེབས་ཤོས་ཀྱི་ཆོས་ལུགས་གཙོ་འཛིན་མི་སྣ་གསུམ་ཡིན་ཞིང༌། གསེར་རྟ་ལྔ་རིག་ནང་བསྟན་སློབ་གླིང་ནི་མཁན་པོ་འཇིགས་མེད་ཕུན་ཚོགས་མཆོག་གིས་གསར་འཛུགས་གནང་བའི་མི་རིགས་སྣ་མང་འདུས་གནས་བོད་ཤར་རྒྱུད་ཀྱི་ནང་བསྟན་སློབ་གཉེར་ཁང་ཆེ་ཤོས་གྲས་ཤིག་ཡིན།
ཕྱི་ལོ་ ༡༩༩༩ ལོར་ཀྲོའུ་ཡུན་ཁང་གིས་སི་ཁྲོན་དམར་ཤོག་དྲུང་ཆེའི་འགན་བཞེས་མ་ཐག་སི་ཁྲོན་ཁུལ་གྱི་ཆོས་འཁོར་སྒོམ་སྒྲུབ་ལ་དམ་དྲག་དང༌། བོད་དཀར་མཛེས་ཁུལ་ལ་ངན་ཇུས་ལག་བསྟར་བྱས་སྟབས། ཕྱི་ལོ་༢༠༠༢ ལོར་རྒྱ་ནག་དབུས་གཞུང་སྤྱི་བདེ་དམག་གི་མགོ་ཁྲིད་དང༌། དབུས་ཆབ་སྲིད་ཅུས་འཐུས་མི་གཅིག་ལྕོགས་ཀྱི་ཐོད་རྒལ་གོ་གནས་དེ་རེག་ཚུལ་ཆབ་སྲིད་དབྱེ་ཞིབ་པ་ཚོས་འགྲེལ་བརྗོད་གནང་བཞིན་ཡོད།ས་འོག་དར་འཐག་གི་ཆབ་སྲིད་ཡོ་འཁྱོམས་དེ་ད་ལྟ་སི་ཁྲོན་ཁོངས་གཏོགས་བོད་རྔ་བའི་སྒང་ལ་སླེབས་པ་རེད།
བོད་རྔ་བ་ནི་མཁས་གྲུབ་གཉིས་ལྡན་གྱི་ཀིརྟི་སྐུ་ཕྲེང་བརྒྱད་པ་བློ་བཟང་འཕྲིན་ལས་རྒྱ་མཚོ་དང་བླ་སློབ་ཀྱི་དམ་ཚིག་གཙང་མའི་འབྲེལ་བ་ཡོད་པ་དང༌། ཀིརྟི་སྐུ་རབས་བརྒྱད་པས་རྔ་ཡུལ་ཀིརྟི་དགོན་དགེ་ལྡན་ལེགས་བཤད་གླིང་ཕྱག་འདེབས་མཛད་ནས། ད་བར་ལོ་ངོ་བརྒྱ་དང་ལྔ་བཅུ་ལྷག་རིང་བོད་རྔ་པའི་དགོན་གྲོང་གཉིས་ལ་ཀིརྟི་སྐུ་ཕྲེང་ན་རིམ་གྱིས་ཕན་བདེའི་བྱ་བཞག་སྐྱོང་མུས་ཡིན་ཞིང༌། རྔ་པ་ཀིརྟི་དགོན་དགའ་ལྡན་ལེགས་བཤད་གླིང་འདི་རྔ་ཁུལ་ཙམ་མ་ཟད། བོད་མདོ་སྨད་ཀྱི་ས་གནས་ཁག་སོ་སོ་ནས་ཀྱང་དགེ་འདུན་པ་སློབ་གཉེར་ལ་ཡོང་སའི་བོད་བརྒྱུད་ནང་བསྟན་སློབ་གཉེར་ཁང་ཆེ་ཤོས་ཤིག་ཡིན་སྟབས། བོད་རྔ་པ་ཀིརྟི་དགོན་འདི་ཡང་ཀྲོའུ་ཡུན་ཁང་དང་ཁོ་བའི་ཕྱོགས་གཏོགས་ཚེ་སེམས་སུ་བོད་ཀྱི་ཆོས་རིག་རྩ་མེད་བཟོ་རྒྱུའི་འགག་རྡོ་ཞིག་ཆགས་ཡོད་ལ། ཉེས་མེད་ཉེས་འཛུགས་འོག་རྩ་མེད་མ་བཟོས་ན། བོད་ཀྱི་ཆོས་དང་རིག་གཞུང་དགྲར་འཛིན་སྟོབས་ཤུགས་རྒྱུན་འཁྱོངས་བྱེད་བདེ་མེད་པར་གྱུར་ཡོད།
དེར་བརྟེན་རང་གི་མི་རིགས་ཀྱི་དམིགས་བསལ་ཆོས་དང་རིག་གཞུང་ཐོབ་ཐང་ལ་བློ་བརྟན་འགྱུར་མེད་ངང་སྲུང་སྐྱོབ་བྱེད་པའི་བོད་མི་དང༌། མཚོན་བྱེད་གསུམ་གྱི་བྱེད་ཐབས་སྤྱད་དེ་ཕུགས་དོན་ཁོང་ཚོ་རང་འདྲར་བསྒྱུར་བའི་རྒྱ་རིགས་ཆེན་པོའི་དབང་སྒྱུར་བར་སྲོག་དང་བསྡོས་པའི་འགྲན་རྒོལ་ཞིག་ཆགས་ཡོད་ཅེས་རྒྱ་རིགས་ཤེས་ཡོན་ཅན་མོ་ལིས་གསུངས་པ་ལྟར། ས་བྱི་ལོར་བོད་ཆོལ་ཁ་གསུམ་གྱི་ས་ཁུལ་ཡོངས་ནས་རྒྱ་གཞུང་ལ་ཞི་རྒོལ་གྱེན་ལངས་སྐབས། བོད་རྔ་པའི་མི་དམངས་ཚོས་ཀྱང་ཞི་བའི་གྱེན་ལངས་བྱས་ཡོད། བོད་མིའི་གྱེན་ལངས་ནི་འདས་པའི་ལོ་ལྔ་བཅུའི་ནང་རྒྱ་གཞུང་གིས་བོད་ལ་འཛིན་པའི་མི་རིགས་སྲིད་ཇུས་ལ། བོད་མི་ཕྱོགས་ནས་མི་འདོད་པའི་རྣམ་འགྱུར་བསྟན་པ་ཞིག་དང༌། རྣམ་འགྱུར་དེ་ཚང་མ་རྒྱ་གཞུང་གིས་ཁ་ནས་སྒྲོག་བཞིན་པའི་ཆོས་ལུགས་དད་མོས་རང་དབང་དང༌། མི་རིགས་སྲིད་ཇུས་འདྲ་མཉམ་ཡིན་ཚུལ་གླེང་པ་རྣམས་ཁ་དང་ལག་ལེན་མི་མཚུངས་པའི་རྐྱེན་གྱིས། བོད་མིས་རང་དབང་གི་ཐོབ་ཐང་རྩོད་ལེན་བྱས་པ་ཞིག་རེད།
གནས་ཚུལ་དེ་ནི་རྒྱ་ནག་དམར་ཤོག་དཔོན་རིགས་ཁག་ཅིག་གིས་ཅི་ཞིག་ལ་གོ་སྐབས་ཐོབ་པ་ལྟར་བོད་རྔ་པའི་མི་དམངས་ཐོག་མེ་མདའི་སོ་ཁ་བསྐོར་ནས་བོད་མི་ཉེས་མེད་མང་བོ་ཞིག་དམར་གསོད་བཏང༌། ཁྲག་བཞུར་བའི་དོན་རྐྱེན་ཡ་ང་བ་ཞིག་བཟོས་ཏེ་ར་བསད་ནས་ལུག་འདར་བའི་ཚོད་བགམ་དེ་བོད་རྔ་པའི་མི་དམངས་ཐོག་བྱས་ཡོད། ཡིན་ནའང་བོད་རྔ་པའི་དཔའ་རྒོད་ཚོ་དེ་རིང་ད་དུང་བོད་མི་རིགས་ཀྱི་བདེན་དོན་ཆེད་དུ་ལངས་བཞིན་ཡོད་ལ། རྒྱལ་གཅེས་དཔའ་བོ་གྲྭ་གཞོན་ཕུན་ཚོགས་ལགས་ཀྱིས་སེམས་ཀྱི་ན་ཟུག་མ་བཟོད་པར། རང་ལུས་མེར་བསྲེགས་བཏང་ནས་བོད་མིའི་སྡུག་བསྔལ་འཛམ་གླིང་མི་དམངས་ལ་སྟོན་ཐབས་བྱས་པ་འདིར། མི་སྡེའི་སྤྱི་ཚོགས་ནང་ཆེན་པོས་ཆུང་ངུར་གཉའ་གནོན་བྱེད་དུས། འགྲོ་བ་མིས་སྐྱོབ་གསོ་དགོས་པའི་ངང་ཚུལ་ནས་འཛམ་གླིང་གི་གཟུར་གནས་ཤེས་ལྡན་པ་རྣམས་ཀྱིས་བོད་རྔ་བའི་མི་དམངས་རྣམས་ལ་རྒྱབ་སྐྱོར་གནང་རོགས། བོད་རྒྱལ་ལོ།
རྩོམ་ཡིག་འདི་ཕྱི་གླིང་གི་སྐད་ཡིག་ཐོག་བསྒྱུར་ནས་བཀྲམས་ཐུབ་ན་དགེ་མཚན་ཆེ། འབྲི་བ་བོ་ཐུགས་རྗེ་ཆེ།
སྐུ་ཞབས་རྡོ་རྗེ་རིན་ཆེན་གྱིས་གནད་ལ་འཁེལ་བའི་ཆེད་རྩོམ་ཡག་པོ་ཞིག་སྤེལ་འདུག་ན། བུ་མོ་ངས་ཡི་རངས་དང་རྒྱབ་སྐྱོད་ཡོད་ལགས།