ཟླ་འདིའི་ཕྱི་ཚེས་ཤར་ལ་རང་ལོ་ ༣༡ ཡིན་པའི་རྔ་པ་ཀིརྟི་དགོན་གྱི་གྲྭ་བློ་བཟང་དར་རྒྱས་དང་། རང་ལོ་ ༣༣ ཡིན་པའི་གྲྭ་དཀོན་མཆོག་ཚུལ་ཁྲིམས་གཉིས་ལ་རྔ་པ་རྫོང་མི་དམངས་ཁྲིམས་ཁང་གིས་ལོ་ ༣ རེ་ཡི་བཙོན་འཇུག་ཁྲིམས་ཐག་བཅད་ཡོད་འདུག
གྲྭ་བློ་བཟང་དར་རྒྱས་ལགས་ནི་ཆུང་དུས་སུ་རྔ་པ་ཀིརྟི་དགོན་དུ་རབ་ཏུ་བྱུང་ཡོད་པ་དང་། ༢༠༠༣ ལོར་གདན་ས་འབྲས་སྤུངས་སུ་ཕེབས་ཏེ་ནང་དོན་རིག་པར་སློབ་སྦྱོང་བྱས། ༢༠༠༨ ལོའི་འབྲས་སྤུངས་ཞི་རྒོལ་སྐབས་ཁོང་ཚོ་དགེ་འདུན་པ་ཁག་ཅིག་གིས་རྒྱ་གཞུང་ལ་ངོ་རྒོལ་བྱས་སྟབས། རྒྱ་གཞུང་གིས་བརྙན་པར་ནང་ཁོང་གི་ངོ་རིས་ངོས་འཛིན་བྱུང་སྟེ། དེ་མུར་འཛིན་བཟུང་གིས་དུས་ཡུན་ཟླ་ ༥ རིང་ས་གནས་འདྲ་མིན་དུ་བཀག་ཉར་བྱས་མཐར་རྔ་པ་ས་གནས་སུ་བསྐྱལ་ཏེ། གནས་སྐབས་རིང་ཀློད་གྲོལ་ཐོབ་ཡོད་ནའང་ས་གནས་ཉེན་རྟོག་ལས་ཁུངས་ཀྱིས་སྐད་ནམ་བཏང་ལ་ལས་ཁུངས་སུ་ཐོ་འགོད་བྱེད་དུ་འགྲོ་དགོས་ཤིང་། ས་གནས་རྫོང་གི་ས་ཁོངས་ལས་བརྒལ་དགོས་བྱུང་ན། ཉེན་རྟོག་ལས་ཁུངས་སུ་སྙན་སེང་ཞུ་དགོས་པའི་དམ་དྲག་འོག་རྒྱུན་རིང་བཞག་ཡོད།
དེ་བཞིན་དུ། ཕྱི་ཟླ་ ༤ ཚེས་ ༡༡ ཉིན་རྒྱ་མིའི་དམག་མི་འགའ་གློ་བུར་དུ་གྲྭ་དཀོན་མཆོག་ཚུལ་ཁྲིམས་ཀྱི་གྲྭ་ཤག་ཏུ་འཛུལ་ཏེ་ཁོང་འཛིན་བཟུང་བྱས་ཡོད་ཅིང་། ས་གནས་ཉེན་རྟོག་པས་ཕྱི་ཟླ་ ༤ ཚེས་ ༢༢ ཉིན་ནས་དགོན་པའི་དགེ་འདུན་པ་ཚོར་རྒྱལ་གཅེས་ཆོས་གཅེས་སློབ་གསོ་སྤེལ་རྩིས་བྱས་སྐབས་དགེ་འདུན་པ་ཚོས་ངོས་ལེན་མ་བྱས་སྟབས། ཟླ་འདིའི་ཕྱི་ཚེས་ ༥ བར་སློབ་གསོའི་ཚོགས་འདུ་བསྐང་ཐུབ་མེད་ནའང་། ཕྱི་ཚེས་ ༦ ཉིན་ནས་ངེས་པར་འཚོགས་དགོས་ལུགས་བརྗོད་ཡོད་འདུག རྒྱ་གཞུང་གིས་ཟླ་གསུམ་གྱི་སློབ་གསོ་ཟེར་བ་དེ་དང་ལེན་བྱས་ཚེ་ལས་འགུལ་མཚམས་འཇོག་བྱ་རྒྱུ་ཡིན། དེ་མ་གཏོགས་ལོ་ཧྲིལ་བོར་རྒྱལ་གཅེས་སློབ་གསོ་མཚམས་འཇོག་བྱ་རྒྱུ་མིན་ཚུལ་བརྗོད་ཡོད་འདུག
ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ཀ་ཉག་ཚེ་རིང་གཉིས་ཀྱིས་བཏང་འབྱོར་བྱུང་།
