རིག་གནས་རྨེག་མེད་བཏང་བྱུང་ཞེས་པ་བྷེན་ལཱ་ཌན་གྱི་འགད་རྫས་ལྟར་མ་གོ་རོགས།
ཤར་ཕྱོགས་ཁུག་རྟ།
ང་ཚོ་བོད་ལ་གཏམ་དཔེ་” དྲན་ས་བཤད་ཀི་འདུག ན་ས་རེག་གི་འདུག” ཟེར་བ་ཞིག་ཡོད། དེ་ནི་ཏག་ཏག་༼ བོད་ཀྱི་རིག་གནས་རྩ་མེད་ལས་བྱུང་བའི་ཆབ་སྲིད་བསམ་བློ ༽ འབྲི་མཁན་རྒྱ་ནག་གཞུང་གི་ལྟོས་བཅས་ལ་ཆེད་དུ་དགོངས་པ་མིན་ནམ་བསམ།
ང་ཚོས་རང་གི་ཐུན་མོང་དང་ཐུན་མོང་མིན་པའི་རིག་གནས་རྨེག་མེད་བཏང་བྱུང་ཞེས་པ་རྒྱ་གཞུང་རང་གི་ཁེ་ཕན་ཆེད་དུ་གཉེར་བའི་ཡིག་བསྒྱུར་ཁང་ཟེར་བ་དག་དང་། ཆེད་གཉེར་སྒོར་ཟུར་ལྔ་པའི་ཁུངས་མེད་རུ་དཔུང་གི་སྡིངས་ཆ་སྟེ་གཞུང་འབྲེལ་རྫུན་གཏམ་དྲ་རྒྱའམ་ཆ་འཕྲིན་ཅན་ཟེར་བ་དག་མི་འདུག་ཅེས་པར་གོ་བ་བླངས་པ་ནི་དངོས་གནས་དགོད་བྲོ་བ་ཞིག་མིན་ནམ།
ཁྱེད་ཚོས་ཏང་ལ་གཅེས་ཤིང་ཏང་ལ་དགའ་བ་ཟེར་བའི་༧པཎ་ཆེན་སྐུ་ཕྲེང་བཅུ་བ་ཆེན་པོས་ཀྱང་གནའ་ནས་སྡོམ་ཚིག་གསལ་བོར་བཀོད་པ་ལྟར། ” བོད་ཀྱི་ས་ཁུལ་དུ་འཛུགས་བསྐྲུན་ཟེར་བའི་གཡམ་སྒྲོག་དེ་ཡིས་བོད་ལ་གུང་བྲན་གྱིས་རྐུ་འཕྲོག་བཅོམ་གསུམ་བྱས་པའི་དངོས་པོའི་ཕྱེད་ཀའི་ཕྱེད་ཀའང་ཟིན་མེད་“གསུངས་པ་ནི། བོད་ཀྱི་རིག་གནས་ཙམ་དུ་མ་ཟད་སྲིད་འབྱོར་གསུམ་ཀ་ཐལ་བའི་རྡུལ་དུ་བརླག་རྩིས་ཀྱི་གུང་བྲན་གྱི་ངོ་གདོང་ངོ་མ་དེ་ཅི་ལ་མིན་ཡང་། རྒྱ་ནག་གཞུང་གིས་ལོ་བཅུ་ཕྲག་ཁ་ཤས་ཀྱི་འདས་དོན་གཏིང་བརྗེད་དུ་སོང་སྟེ། བོད་མི་མང་གི་འདས་མ་ད་གསུམ་གྱི་ཚབ་མཚོན་༧གོང་ས་མཆོག་གིས་རིག་གནས་རྨེག་མེད་བཏང་བྱུང་ཟེར་བའི་རྫུན་གཏམ་བརྗོད་གྱི་འདུག་ཅེས་ཅི་མི་སྙམ་པར་ཨག་སྐད་གནམ་མཁར་རྒྱང་གིན་འདུག
ང་ཚོས་བོད་ཀྱི་རིག་གནས་ནི་ནང་དོན་རིག་གནས་སོ་ཞེས་སྨྲས་མེད་ལ། ནང་དོན་རིག་གནས་ཁོ་ནའི་སྟེང་བོད་མིའི་བློ་གྲོས་ཀྱི་མཁས་མཛངས་སྟོན་དགོས་ཞེས་ནམ་ཞར་ཡང་བཤད་མེད། ནང་དོན་རིག་གནས་ནི་གུང་བྲན་གྱིས་ངོས་འཛིན་བྱས་པ་ལྟར་ཆོས་ལུགས་ཙམ་དང་། ཆོས་ལུགས་དེའང་སྤྱི་ཚོགས་ཡར་རྒྱས་ཀྱི་གེགས་རྡོ་ལྟ་བུ། གེགས་རྡོ་དེའང་མིའི་སེམས་ཁམས་ལ་ཁྱབ་པའི་མྱོས་རྫས་སམ་དུག་རྫས་ལྟ་བུ་ཞིག་གཏན་དུ་མ་ཡིན་པས། གུང་བྲན་གྱིས་ནང་དོན་རིག་གནས་ལ་ལྷག་བསམ་བཅངས་པ་ནི་སྤྱང་ཀིས་ལུ་གུ་མ་བསད་འཁྲིས་སུ་ཉར་བ་དང་མཚུངས་བས། དེ་ལ་འཇིག་རྟེན་གྱི་སེམས་ཅན་སུའང་ཡིད་ཆེས་ཡོང་རེ་མེད་པས། ནང་དོན་རིག་གནས་གཙོ་བོར་གྱུར་བའི་བོད་ཀྱི་རིག་གནས་ཆེ་ཆུང་བཅུ་དང་། དེང་རབས་རིག་གནས་སོགས་ལ་སློབ་རྒྱུར་བོད་མི་ཚོར་རང་དབང་གི་ཁོར་ཡུག་དང་མཐུན་རྐྱེན་འདང་ངེས་སྤྲོད་དགོས་ཞེས་པ་ཆབ་སྲིད་ཀྱི་བསམ་བློར་གོ་བ་བླངས་པ་ནི། “རྒྱ་དོགས་པའི་ཕུངས་“པའི་ནད་རོ་བསྐྱར་དུ་ལངས་པ་ཞིག་ཅི་ལ་མིན་ཏེ། དེ་ལྟར་གོ་བ་བླངས་པ་ཡིན་ན་འཇིག་རྟེན་གྱི་བྱ་དངོས་ཡོད་ཚད་ཀྱི་འགུལ་སྐྱོད་དང་རང་བཞིན། ཆོས་ཉིད་མཐའ་དག་ཀྱང་ཆབ་སྲིད་ཡིན་སོང་བ་མིན་ནམ། སྐད་ཆ་འདི་ལ་གད་མོ་མི་ཤོར་བའི་བློ་ལྡན་ཞིག་གནམ་འོག་ཏུ་ཡོད་དམ།
ད་དུང་ཉེ་ས་ནས་བཤད་ན། སྔ་ལོར་མདོ་སྨད་རེབ་གོང་ནས་བོད་རིགས་ས་ཁུལ་གང་སར་མེ་སྟག་བཞིན་མཆེད་པའི་ ” སྐད་ཡིག་རང་དབང་། མི་རིགས་འདྲ་མཉམ། ” གྱི་དར་ཆ་དེ་ནི་བོད་ཀྱི་རིག་གནས་ལྷག་བསམ་བཅངས་ནས་བྱུང་བ་ཞིག་མིན་པར། ཐ་ན་དམའ་འབྲིང་རིམ་པའི་གཙོ་སྐད་རྒྱ་ཡིག་འཇོག་རྒྱུའི་ལས་དོན་གྱིས་བསླངས་པ་ཡིན་སྟབས། བོད་ཀྱི་སྐད་ཡིག་རྨེག་མེད་ཕྱིན་པའི་བོད་ཀྱི་རིག་གནས་མི་ཉམས་གོང་འཕེལ་གཏོང་སྟངས་ནི་དངོས་གནས་རང་། རྒྱ་ནག་གཞུང་གིས་བཤད་པ་ལྟར་ཆབ་སྲིད་ཀྱི་གཡོ་ཇུས་འབའ་ཞིག་མིན་ན་གང་ཡིན་ནམ། ངས་རྩོམ་ཡིག་སྔོན་མ་དག་དུ་བྲིས་པ་ལྟར་བོད་ཀྱི་ནང་དོན་རིག་གནས་ཀྱི་གཞུང་ལུགས་ལ་སློབ་སྦྱོང་བྱེད་རྒྱུའི་སྔར་ལུགས་ཉམ་དམས་སུ་འགྲོ་བཞིན་པ་ནི། དགོན་པ་མཐའ་དག་འགྲེམས་སྟོན་ཁང་ལྟ་བུར་བསྒྱུར་བཞིན་འདུག་པས་མཚོན་ཐུབ་ལ། ཉིན་ཤས་སྔོན་ནས་བྱུང་བའི་མདོ་སྨད་རྔ་པ་ཀིརྟི་དགོན་ཆེན་ལ་དྲག་གནོན་སྐྱི་གཡའ་བ་བྱེད་བཞིན་པས་ཀྱང་མཚོན་མི་ཐུབ་བམ། སྐབས་དེར་སྐུ་ཞབས་ཕུན་ཚོགས་ཀྱིས་རང་གི་གཅེས་པའི་ལུས་སྲོག་མེ་རུ་སྦར་ཏེ་བོད་ཀྱི་རིག་གནས་རྨེག་མེད་ཀྱིས་མཚོན་པའི་བོད་ཐོག་“རང་དབང་“གི་ཚིག་འདི་འཇའ་བཞིན་ཡལ་ཟིན་པས་གནས་སྟངས་ངོ་སྤྲོད་བྱས་ཡོད། འདི་ལ་རྒྱལ་སྤྱིའི་སྟེང་སེམས་འཚབ་དང་རྒྱ་ནག་གཞུང་ལ་དྲག་གནོན་མཚམས་འཇོག་ཡོང་རྒྱུར་སྐུལ་མ་ལན་མང་བྱས་ཡོད་ཀྱང་། ད་ལྟའི་རྒྱ་ནག་གཞུང་གི་རྣམ་འགྱུར་འདིས་བོད་ལ་ཤ་ཚ་ཡོད་པ་སྟོན་ཐུབ་བམ། ངས་རྫུན་སྒྲིག་བརྟོལ་བའི་བདེན་དོན་འདི་འབྲི་བཞིན་པའི་སྐབས་སུའང་ཁོ་ཚོ་དྲག་གནོན་འོག་ལྷུང་ནས་ཡོད་པ་རེད། དེས་གུང་བྲན་གྱིས་བོད་ཀྱི་རིག་གནས་བྱ་འཕུར་བ་ལྟར་ཡར་རྒྱས་བཏང་ཟིན་པའི་ལོ་རྒྱུས་མཚོན་ཐུབ་བམ། དེས་གུང་བྲན་གྱི་རྫུན་གཏམ་ལུང་པ་གང་གི་དྲི་མ་འགེབས་ཐུབ་བམ།
བོད་རིགས་ས་ཁུལ་གཙོས་པའི་མི་རིགས་གཞན་གྱིས་རང་གི་སྐད་ཡིག་གི་ལམ་ནས་རྒྱལ་ཁབ་ཀྱི་ལས་གནས་ཆེ་སར་འཛུལ་ཞུགས་ཆོག་པའི་ཆ་རྐྱེན་བསྐྲུན་མེད་ལ། བོད་སྐད་ཡིག་བོད་རིགས་ས་ཁུལ་ནས་འཁོར་རྒྱུག་ཡངས་མོར་བྱེད་ཆོག་པའི་འགན་ལེན་ཅི་ཡང་གནང་མེད། བོད་རིགས་ས་ཁུལ་ཁག་ཏུ་ད་དུང་ཡིག་རྨོངས་ཀྱིས་ཁེངས་ནས་ཡོད་ལ། ང་སྐྱེས་སའི་གྲོང་གསེབ་རེབ་གོང་བཙན་མོའི་ས་ཆ་ལྟ་བུར་མཚོན་ནའང་། ལོ་རབས་བརྒྱད་བཅུའི་རྗེས་ནས་སློབ་འབྲིང་དུ་བསྐྱོད་མཁན་གྲོང་གསེབ་ཡོངས་ནས་སློབ་མ་གཅིག་གཉིས་ཙམ་ལས་བྱུང་མེད། ལོ་རབས་དགུ་བཅུ་བ་དང་སྟོང་ལོ་གསར་བའི་དེ་རིང་བར་གྲོང་སྡེ་དྲུག་གི་མི་གྲངས་ཁྲི་ ༥ ལྷག་གི་ཁྲོད་སློབ་ཆེན་པ་ ༤ མ་གཏོགས་ཐོན་མི་འདུག འདི་ནི་བོད་ཀྱི་སློབ་མ་ཚོ་རིག་པ་རྟུལ་དྲག་ནས་མིན་ལ་སློབ་སྦྱོང་གི་འདུན་པ་མེད་པས་ཀྱང་མིན་མོད། རྒྱ་ཡིག་གཙོ་སྐད་ཀྱིས་ཤུགས་ཆེ་དབང་དང་། བོད་རིགས་ས་ཁུལ་གྱི་སློབ་གྲྭ་ཆུང་བའི་དགེ་རྒན་ཚུན་ཆད་ལའང་རྒྱ་ཡིག་གི་གནས་ཚད་ངེས་ཅན་གྱི་ལག་འཁྱེར་དགོས་ཀྱི་ཡོད་པ། སློབ་མ་ཚོའི་སློབ་ཚན་གྱི་ནང་དོན་ཡོངས་རྫོགས་ལ་བོད་ཀྱི་རིག་གནས་ཀྱི་ཞག་རྩི་རྩ་བྲལ་ལ་སོང་། སྐད་ཡིག་ཅེས་པའི་བོད་ཡིག་ཐོག་སློབ་དེབ་ཅིག་ཡོད་ཀྱང་། དེ་ནི་དོན་དངོས་མའོ་ཙེ་ཏུང་གི་གསུང་རྩོམ་བོད་ཡིག་ཐོག་བསླབས་པའི་སྔ་མོའི་དུས་ངན་ཐབས་སྡུག་གི་སྐབས་དང་གཅིག་མཚུངས་སུ་ཡོད། སློབ་འབྲིང་ནས་མཐོ་འབྲིང་སློབ་ཆེན་བར་རིམ་པས་བོད་ཀྱི་སྐད་ཡིག་དང་རིག་གནས་ཁ་ཐག་ཇེ་རིང་དུ་འགྲོ་ཐབས་ལ་འཚོ་བའི་དགོས་མཁོ་གཞན་གྱིས་གནོན་ཤུགས་སྤྲོད་ཀྱི་ཡོད་པས། བོད་ཀྱི་རིག་གནས་རྨེག་མེད་བཏང་ཞེས་ང་ཚོས་ཡང་ཡང་བརྗོད་པ་ཆབ་སྲིད་ཀྱི་གཡོ་ཇུས་ཤིག་ཅི་ལྟར་ཡིན་སོང་བ་རེད་དམ།
རྒྱ་ནག་གཞུང་གིས་རིག་གནས་ཡར་རྒྱས་བཏང་ཚུལ་བརྗོད་སྐབས་དེ་འབྲེལ་གྱི་ཁྲིམས་ཡིག་མང་པོ་གཏན་འབེབས་གནང་ཚུལ་བྲིས་འདུག ང་ཚོས་ཀྱང་ཡིག་ཐོག་ཏུ་གཏན་འབེབས་བྱས་མི་འདུག་ཅེས་རྫུན་བཤད་མ་མྱོང་ལ། ཡིག་ཐོག་གི་གཏན་འབེབས་ལག་ལེན་དུ་བསྟར་གྱི་མི་འདུག་ཅེས་ད་དུང་ནན་བཤད་བྱས་ཡོད། རྒྱ་ནག་གི་རྩ་ཁྲིམས་དོན་ཚན་ ༤ དང་ ༡༢༡ སོགས་ཀྱིས་རང་ཉིད་ཀྱི་སྐད་ཡིག་སྤྱོད་པ་དང་གོང་དུ་སྤེལ་རྒྱུར་འགན་སྲུང་བྱས་པ་དང་། བཅའ་ཁྲིམས་དོན་ཚན་ ༡༠ པ་དང་ ༣༦ སོགས་ཀྱིས་མི་རིགས་ས་ཁུལ་གྱི་སྐད་ཡིག་གཙོ་བོ་མི་རིགས་དེའི་སྐད་ཡིག་བྱས་ཆོག་པར་བཤད་ཡོད་ཁར། སློབ་ཁྲིད་བྱེད་པའི་སྐད་རིགས་སོགས་ཀྱང་མི་རིགས་རང་ལ་དབང་བར་བཤད་ཡོད། དེ་བཞིན་མི་རིགས་ཀྱི་ལེགས་བྱང་དང་ཤེས་ཡོན་བཅས་ལ་རང་འགན་རང་ལ་ཡོད་པའི་རྩ་ཁྲིམས་དང་བཅའ་ཁྲིམས་ཀྱི་དོན་ཚན་མང་པོ་ས་ལ་གྲོག་མ་བཞིན་བཀྲམས་འདུག་ཀྱང་། དེ་དག་ནི་དོན་དངོས་རྩ་ཁྲིམས་ཤིག་ཡིན་ནམ་ཕྱི་རྫུག་ནང་རུལ་གྱི་སྒེར་གཅོད་པའི་འབག་ཏུ་གྱུར་བའི་རྩ་ཁྲིམས་ཤིག་རེད།
མཇུག་ཏུ་མིའི་རིགས་ལ་ཡོད་པའི་བརྩེ་བ་ཐུན་མོང་བ་དེས་ནན་བརྗོད་བྱེད་རྒྱུར། ང་ཚོས་རིག་གནས་རྨེག་མེད་བཏང་སོང་ཞེས་བདེན་དོན་བརྗོད་པ་ནི་བྷེན་ལཱ་ཌན་གྱི་འགད་རྫས་ལྟ་བུའི་སྙིང་རྩ་འདར་བའི་གདུག་རྩུབ་ཅིག་ཏུ་མ་བསྒོམ་པར། མིའི་བདེ་སྐྱིད་དང་རང་དབང་འདྲ་མཉམ་འཚོལ་བའི་གེགས་རྡོ་གཏོར་བྱེད་ཀྱི་འབར་རྫས་ལྟ་བུ་ཞིག་ཏུ་ཅི་ནས་ཀྱང་གོ་དགོས་ལ། རང་ལ་ནོངས་འགྱོད་ཡོད་དུས་འཕྲལ་མར་ངོས་ཟིན་ཐོབ་རྒྱུ་མི་ཚད་ལྡན་མིན་ན་མི་ཡོང་ཡང་། ང་ཚོས་རྒྱ་ནག་གཞུང་ལ་དེ་ལྟར་བོད་ཀྱི་རིག་གནས་ཐད་འཛིན་པའི་བྱ་སྤྱོད་ཚད་ལྡན་ཡོང་བར་རེ་བ་བྱེད་ཀྱི་ཡོད། ༧གོང་ས་ཏཱ་ལའི་བླ་མ་མཆོག་ནི་དུས་རབས་ ༢༡ པའི་ནང་མིའི་རིགས་ཀྱི་བསམ་བློའི་རིག་གནས་ཀྱི་ཚབ་མཚོན་པ་དང་ལམ་སྟོན་པ། དེ་བཞིན་བཟང་སྤྱོད་དང་ཡ་རབས་ཀྱི་འབྱུང་ཁུངས་ལྟ་བུར་སོང་གཤིས། བོད་ཀྱི་རིག་གནས་རྨེག་མེད་གཏོང་བཞིན་པའི་དངོས་དོན་བརྗོད་རྒྱུ་ནི་ཁོང་གིས་འཛམ་གླིང་ལ་ཁུར་བའི་འགན་ཁུར་གྱི་ནང་དོན་ཞིག་ཀྱང་ཡིན་པས། བོད་ཀྱི་རིག་གནས་རྨེག་མེད་བཏང་ཚུལ་བརྗོད་པར་ཆབ་སྲིད་ཀྱི་གཡོ་ཇུས་གཞན་ཞིག་མེད་པ་འཛམ་གླིང་གི་མི་བུ་ཚང་མར་གསལ་བོ་ཆགས་ཟིན་པ་རེད།
༢༠༡༡། ༥། ༡༡། ཉིན།
སྤུན་ཆུང་ཕེབས་པ་དགའ། ཉིན་ཁ་ཤས་ལ་དུས་བབ་ཉུལ་ཁོམ་མ་བྱུང་ཐ།
རྒྱ་ནག་གིས་ནམ་ཡང་བོད་མི་རིགས་ཀྱི་སེམས་ཁམས་སུ་གྲུབ་ཡོད་པའི་མི་རིགས་ཀྱི་རིག་གནས་གཏོར་ཐུབ་ནི་མ་རེད། ཁོང་ཚོས་ཅིག་བ་ནོ་དགོན་པ་དང་ལྷ་ཁང་གཏོར་རྒྱུ་ཙམ་རེད། དངོས་གནས་དགོད་བྲོ་བོ་རེད་ཡ།
སྤུན་ཆུང་ཡོང་ནས་བཀླགས་ཟིན་པ་ཡིན།
མི་རིགས་ཉམས་བྱེད་ལ་ཐབས་ཚུལ་གཙོ་བོ་གཉིས་ཡོད། གཅིག་ནི་མི་རིགས་གཞན་དག་དང་རིགས་རྒྱུད་བསྲེ་སླད། གཉིས་ནི་མི་རིགས་གཞན་གྱི་རིག་གནས་ཀྱི་སླད་ཞུགས་པར་བྱེད་པའོ། འདི་གཉིས་ལ་བཙན་ཚུགས་རང་བཞིན་དང། གཡོ་ཚོང་རང་བཞིན་གྱི་ཐབས་ཚུལ་སྤྱད་དང་སྤྱོད་ཀྱིན་ཡོད་ཐོག རང་མོས་གཞན་འགྱུར་གྱི་རྣམ་པ་ཡང་ཇེ་གསལ་དུ་འགྲོ་བཞིན་ཡོད། འདི་ནི་ཆེས་ཉེན་ཚབས་ཆེ་ཤོས་དེ་ཆགས་ཡོད། ངེས་དོན་གྱི་མི་རིགས་རང་བཞིན་སྲུང་སྐྱོབ་དགོས་ན་ནམ་ཡང་རང་མོས་གཞན་འགྱུར་གྱི་ནད་ཡམས་དེ་འགོས་མི་རུང། འདི་ནི་སྔོན་འགོག་གི་རྨང་གཞི་ཡིན།