ཕྱི་ཟླ་ ༥ ཚེས་ ༡༢ ཉིན་རྔ་པ་རྫོང་གཅའ་ཞང་། ནག་ཚང་མ་སྡེ་བའི་སྐར་མ་ཚང་གི་རྔ་པ་ཀིརྟི་དགོན་གྱི་གྲྭ་བློ་བཟང་ཆོས་འཕེལ། རང་ལོ་ ༡༩ ཡིན་པ་ཁོང་དགོན་པའི་ནང་ནས་འཛིན་བཟུང་གིས་བཀག་ཉར་བྱས་འདུག་མོད། ཁོང་འཛིན་བཟུང་བྱེད་དགོས་པའི་རྒྱུ་མཚན་དང་ད་ལྟ་གང་དུ་ཡོད་མེད་སོགས་ཤེས་རྟོགས་མ་བྱུང་།
དེང་སྐབས་ཀིརྟི་དགོན་པའི་ཕྱི་ནང་ཚང་མར་དམག་མི་དང་ཉེན་རྟོག་མི་སྣ། དམིགས་བསལ་ཉེན་རྟོག་པ་བཅས་ཀྱིས་དྲག་ཆས་སྣ་ཚོགས་བཟུང་ནས་བཀག་སྡོམ་བྱེད་མུས་ཡིན་ཞིང་། དགོན་པའི་ནང་ལ་རྒྱུན་དུ་ཁང་ཤར་གཅིག་པའི་གྲྭ་པ་ ༢༠ རེ་སྐོར་ཁག་གཅིག་རེར་བགོས་ཏེ། གྲྭ་ཤག་ཁག་ཏུ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་མུ་མཐུད་སྤེལ་བཞིན་ཡོད་འདུག་ལ། གྲྭ་པ་རྣམས་ལ་གནད་དོན་མང་པོའི་ཐོག་འདྲི་རྩད་སྣ་ཚོགས་བྱས་སྐབས། གྲྭ་པ་ཚོས་རྒྱ་གཞུང་གི་ལས་བྱེད་ཚོའི་འདོད་པ་ལྟར་ལན་འདེབས་མ་བྱས་སྟབས་འཛིན་བཟུང་བྱེད་ཀྱི་ཡོད་པའི་གནས་ཚུལ་ཡང་འདུག་མོད། ད་ཆར་བརྒྱུད་ལམ་ཁག་བཀག་སྡོམ་བྱས་ཡོད་སྟབས། ཞིབ་ཕྲའི་གནས་ཚུལ་རྒྱུས་ལོན་བྱ་ཐབས་མ་བྱུང་།
རྨེའུ་རུ་མའི་རུ་ཆེན་གཉིས་པའི་རྔ་པ་ཚང་གི་ཀིརྟི་དགོན་པའི་གྲྭ་བློ་བཟང་དར་རྒྱས་ལགས་སུ་ཟླ་ ༥ ཚེས་ ༢ ཙམ་ལ་ལོ་གསུམ་གྱི་ཁྲིམས་ཐག་བཅད་ཡོད་ལ། སྐབས་དེར་ཁོང་ལ་དེ་ལྟར་ཁྲིམས་ཐག་ལོ་གསུམ་གཅོད་དགོས་པའི་ནག་ཉེས་ནི་དེ་སྔོན་བཀག་ཉར་མ་བྱས་སྔོན་ལ་གྲྭ་ཤག་རེ་བཞིན་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་སྐབས། ཁོང་གིས་རང་ཉིད་ཀྱི་བསམ་ཚུལ་ཇི་མ་ཇི་བཞིན་རྒྱ་གཞུང་གི་ལས་བྱེད་པ་དང་ཉེན་རྟོག་པ་དམག་མི་བཅས་ཀྱི་མདུན་དུ་བཤད་པ་དེས་ཡིན་འདུག
ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་བཏང་འབྱོར་བྱུང་།
