གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༤ ཉིན་ནི་རྒྱ་ནག་གི་རྒྱལ་ས་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་སློབ་ཕྲུག་ཁྲི་ཕྲག་གིས་དམངས་གཙོའི་ལས་འགུལ་སྤེལ་ཏེ་ལོ་ངོ་ ༢༢ འཁོར་བའི་ཉིན་མོ་དང་བསྟུན་ཏེ། ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཀྱི་གོ་སྒྲིག་འོག སྦར་སིལ་རང་དབང་སློབ་གླིང་ནང་བོད་རྒྱ་ཡུ་གུར་མི་རིགས་གསུམ་མཉམ་འཛོམས་ཀྱིས་བགྲོ་གླེང་ཚོགས་འདུ་ཞིག་ཚོགས་ཡོད་འདུག བགྲོ་གླེང་སྟེང་བོད་རིགས་དང་རྒྱ་རིགས། ཡུ་གུར་བ། དེ་བཞིན་ཕྱི་རྒྱལ་གྱི་སློབ་མ་དང་བོད་དོན་རྒྱབ་སྐྱོར་པ། ས་གནས་བོད་རིགས་སོགས་ཁྱོན་མི་གྲངས་ ༣༠ ལྷག་མཉམ་ཞུགས་གནང་ཡོད་འདུག
བགྲོ་གླེང་མ་ཚུགས་གོང་སློབ་གླིང་གི་རྒྱལ་སྒོའི་མདུན་གྱི་དྲུག་བཞིའི་དྲན་གསོའི་རྡོ་རིང་འགྲམ་དུ་དྲུག་བཞིའི་ལས་འགུལ་ནང་ཚེ་སྲོག་ཤོར་བ་དང་། བོད་ཀྱི་རྒྱལ་གཅེས་དཔའ་བོ་དཔའ་མོ་དག་ལ་དྲན་གསོའི་ཆེད་སྨོན་ལམ་དང་མྱ་ངན་གུས་འདུད་ཞུས་ཤིང་། བགྲོ་གླེང་ཐོག་གཏམ་བཤད་གནང་མཁན་དག་ནི། སུད་སི་སྐུ་ཚབ་དོན་གཅོད་ཡུ་རོབ་བོད་རྒྱ་འབྲེལ་མཐུད་པ་བློ་བཟང་ཉི་མ་མཆོག་དང་། ཡུ་གུར་མི་རིགས་ཀྱི་འཐུས་མི་ཨད་ཅང་དང་སྦེ་ཁ་ཐི་ཡ། གནམ་སྡེ་སྒོ་མོ་ཆེའི་སློབ་ཕྲུག་གི་ལས་འགུལ་ནང་དངོས་སུ་བཞུགས་ཏེ་མེ་མདའི་ཕོག་མྱོང་མཁན་ཀྲང་ཅན། བྷེལ་ཇམ་བོད་རིགས་ཚོགས་པའི་ཚོགས་གཙོ་ཙ་ཡི་སྐལ་བཟང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་འཐུས་མི་སྐུ་ཞབས་Adrew swan སྦར་སིལ་སྐུ་ཚབ་དོན་གཅོད་ལས་ཁུངས་ཀྱི་ལས་བྱེད་རིག་འཛིན་ཆོས་སྒྲོན་བཅས་ཁག་སོ་སོས་གཏམ་བཤད་གནང་ཡོད་འདུག
དེ་ཡང་སུད་སི་སྐུ་ཚབ་དོན་གཅོད་ཡུ་རོབ་བོད་རྒྱ་འབྲེལ་མཐུད་པ་བློ་བཟང་ཉི་མ་མཆོག་གིས་གསུངས་དོན། རྒྱ་ནག་དམར་པོའི་སྲིད་དབང་ལམ་ལུགས་མགོ་ཚུགས་པ་ནས་ད་བར་རྒྱ་མི་རིགས་ཙམ་མ་ཟད། ལྷག་པར་བོད་མི་རིགས་དང་ཡུ་གུར་མི་རིགས། སོག་པོ་མི་རིགས་གསུམ་ལ་ཆེས་གདུག་རྩུབ་ཅན་གྱི་སྲིད་ཇུས་ལག་བསྟར་བྱས་ཡོད་པ་རེད། འོན་ཀྱང་ད་བར་སྲིད་དབང་ལམ་ལུགས་དེ་མགོ་རྟིང་སློག་ཐུབ་མེད། དེའི་རྒྱུ་རྐྱེན་གཙོ་བོ་ནི། ལོ་རབས་བརྒྱད་ཅུ་དང་དགུ་བཅུའི་ནང་སྐྱེས་པའི་གཞོན་སྐྱེས་ཚོས་རིག་གནས་གསར་བརྗེ་དང་དྲུག་བཞིའི་དོན་རྐྱེན་གྱི་གནས་ཚུལ་ཤེས་རྟོགས་ཅི་ཡང་མེད་པའི་རྐྱེན་གྱིས་རེད། ཅེས་དང་།
དྲུག་བཞིའི་དོན་རྐྱེན་ནང་མཉམ་བཞུགས་གནང་མཁན་སློབ་མ་ཚོར་ཆ་མཚོན་ན། རང་གི་ལུས་སྲོག་ལོངས་སྤྱོད་ཡོངས་སུ་བཏང་ནས་རང་གི་རྒྱལ་ཁབ་དང་མི་རིགས་ཆེད་རླབས་ཆེན་གྱི་ལས་འགུལ་སྤེལ་བར་ང་ཚོས་དུས་རྒྱུན་ནས་དྲན་གསོ་བྱ་དགོས་ངེས་རེད། དེང་སྐབས་རྒྱ་ནག་དམར་པོའི་གཞུང་གིས་ན་གཞོན་ཚོར་འཛིན་པའི་སྲིད་ཇུས་ནི། དངུལ་ཁོ་ན་ལས་རང་གི་མི་རིགས་མདུན་ལམ་ལ་བསམ་བློ་གང་ཡང་གཏོང་མི་ཤེས་པའི་ཀླད་སྟོང་བ་འབོར་ཆེན་གསོ་སྐྱོང་བྱ་རྒྱུ་དེ་རེད། དེར་བརྟེན། ང་ཚོ་བོད་རིགས་དང་ཡུ་གུར་མི་རིགས། སོག་པོའི་མི་རིགས། རྒྱ་མི་རིགས་ཚང་མ་མཉམ་འབྲེལ་གྱིས་འཛམ་གླིང་ནང་ཆེས་གདུག་རྩུབ་ཆེ་བའི་སྲིད་དབང་སྒེར་སྤྱོད་ལམ་ལུགས་དེ་རྩ་མེད་གཏོང་རྒྱུར་འབད་བརྩོན་བྱ་རྒྱུ་དེ་ཡིན། ཞེས་བརྗོད་སོང་།
གཞན། གཏམ་བཤད་གནང་མཁན་གཞན་ཚོས་དྲུག་བཞིའི་ལས་འགུལ་དང་འབྲེལ་ཏེ། རང་རང་གིས་དངོས་སུ་མྱངས་ཟིན་པའི་གནས་ཚུལ་དང་རྒྱ་ནག་དམར་པོའི་གཞུང་གི་སྲིད་ཇུས་འོག་ཤེས་ཡོན་ཅན་ཁྲི་ཕྲག་མང་པོ་དམར་གསོད་བཏང་བ་དང་། ཕྱི་ཕྱོགས་སུ་ཁྱབ་བསྒྲགས་བྱས་པའི་ནང་དོན་ལས་ཡོངས་སུ་ལྡོག་པའི་མི་རིགས་ཁག་གི་མི་མང་ཚོར་དཀའ་སྡུག་ཚད་ལས་བརྒལ་བ་སྤྲད་དང་སྤྲོད་ཀྱི་ཡོད་པ་སོགས་བརྗོད་ཡོད།
ལྷག་པ་ཚེ་རིང་ལགས་ཀྱིས་གནས་ཚུལ་བཏང་འབྱོར་བྱུང་།
ཐོག་མར་འབྲེལ་མཐུས་རྣམས་ལ་འཚམས་འདྲི་དང་བསྔགས་བརྗོད་ཡོད
གནས་ཚུལ་ནི་དངོས་ནས་རྒྱ་དམར་གུང་གྲན་གྱི་དཔོན་པོ་ཁ་ཤས་ཀྱི་འོག་བྲན་གཡོག་རྒྱུགས་བཞིན་པའི་རྒྱ་མི་རིགས་དང་ཡུ་གུལ་བ་དེ་བཞིན་བོད་མི་སོགས་ཀྱི་གནད་དོན་གལ་འགངས་ཆེན་པོ་ཡིན་པས་རྒྱ་དམར་འོག་དཀའ་སྡུག་མྱང་བཞིན་པའི་མི་རིགས་ཡོངས་ཀྱི་འགན་བླངས་ནས་རྒྱ་དམར་གཞུང་གཏོར་ཐབས་ཀྱི་གཅིག་བསྒྲིལ་ངང་ཐབས་ཤེས་དང་ལས་དོན་སྤེལ་ན་དོན་སྙིང་ལྡན་པ་ཡོང་ངེས་རེད་ བོད་ཀྱི་གཞོན་ནུས་ད་མི་རིགས་འདི་དག་ལ་འབྲེལ་བ་བྱས་ནས་ལས་དོན་སྤེན་རན་འདུག་