རུལ་སུངས་ལ་རྒོལ་བ།

རྩ་རླུང་སྒོམ་སྒྲུབ་ཀྱི་ཆོས་དཔོན་ཞིག་གིས་རྒྱ་གར་མཐོ་རིམ་དཔོན་རིགས་ནང་ལྐོག་ཟ་རུལ་སུངས་དང་། གཞུང་དངུལ་ཕོན་ཆེན་གཞན་ལ་སྐྱི་གཡར་བཅོལ་འཇོག་བྱེད་ཀྱི་ཡོད་པའི་ནག་ཉེ་ཐེར་འདོན་གྱིས་ཟས་བཅད་ངོ་རྒོལ་བྱས་པར་གཞུང་ཕྱོགས་ནས་བཙན་ཤེད་ཀྱིས་བཀག་སྡོམ་བྱས་ཡོད།

ཁ་སང་ཕྱི་ཚེས་ ༦ ཉིན་རྒྱ་གར་ཉེན་རྟོག་པ་བརྒྱ་ཕྲག་འགས་རྒྱ་གར་གྱི་རྩ་རླུང་སྒོམ་སྒྲུབ་པ་སློབ་དཔོན་ཆེ་མོ་རམ་ཌེཝུ་( Ramdev) མཆོག་དང་ཁོང་གི་རྗེས་འཇུག་པ་ཚོ་ཟས་བཅད་ངོ་རྒོལ་ལ་བསྡད་ཡོད་པ་རྣམས་བཙན་དབང་གིས་ཁ་གཏོར་བཏང་སྟེ་རམ་ཌེཝུ་མཆོག་བཀག་ཉེར་བྱས་ཡོད་འདུག

ཐེངས་འདིར་རྒྱ་གར་ཙམ་མ་ཡིན་པར། ཨ་རི་དང་ཡུ་རོབ། ཨ་ཧྥི་རི་ཀ་སོགས་སུ་ཡོད་པའི་རྒྱ་གར་བ་སྟོང་ཕྲག་མང་པོ་རམ་ཌེཝུ་མཆོག་ལ་རྒྱབ་སྐྱོབ་ཀྱིས་སོ་སོའི་གནས་ཡུལ་རྒྱལ་ཁབ་གང་ས་ནས་ཟས་བཅད་ངོ་རྒོལ་བྱེད་བཞིན་ཡོད་པ་དང་། ཨ་རིའི་ནང་གྲོང་ཁྱེར་ཆེ་ཁག་ ༡༣ ཙམ་གྱི་ནང་དུ་ངོ་རྒོལ་གྱི་ལས་འགུལ་སྤེལ་བཞིན་ཡོད་འདུག

རྒྱ་གར་གྱི་རྩ་རླུང་སྒོམ་སྒྲུབ་པ་ཆེ་མོ་རམ་ཌེཝུ་མཆོག་གིས་ཟས་བཅད་ངོ་རྒོལ་བྱས་དོན་ནི། རྒྱ་གར་ནང་གི་ལྐོག་ཟ་རུལ་སུངས་ལ་ངོ་རྒོལ་དང་དེའི་ཉེས་དོན་གཙང་སེལ་ཡོང་རྒྱུ། དེ་བཞིན་རྒྱ་གར་གྱི་མ་དངུལ་འབོར་ཆེན་རྒྱལ་ཁབ་གཞན་གྱི་དངུལ་ཁང་དང་ཚོང་ལས་སྡེ་ཚན་ཁག་ལ་ཁྲིམས་འགལ་ཐོག་སྐྱུ་གཡར་བྱས་པ་རྣམས་ཕྱིར་འཐོབ་པར་བྱས་ཏེ། རྒྱ་གར་གྱི་མི་མང་གི་བདེ་སྡུག་དང་རྒྱལ་ཁབ་འཛུགས་སྐྲུན་ཐད་གཏོང་དགོས་པ་བཅས་ཀྱི་དགོས་འདུན་འོག ཁོང་དང་ཁོང་གི་རྒྱབ་སྐྱོར་པ་ཚོས་ཟས་བཅད་ངོ་རྒོལ་གྱི་ལས་འགུལ་དེ་སྤེལ་བ་ཡིན་འདུག

གནད་དོན་འདིའི་ཐད་ཨ་རིར་ཡོད་པའི་རྒྱ་གར་པ་ཝེ་ཇེ་ཡ་(Vijay Pallod) ཟེར་པས། ང་རང་ལྐོག་ཟ་རུལ་སུངས་ཀྱི་ས་ཆ་དེ་ནས་སྤྱི་ལེ་སྟོང་ཕྲག་གི་ཕ་རོལ་དུ་གནས་ཡོད་ཀྱང་། སོ་སོའི་ཕ་ཡུལ་གྱི་གནས་བབ་ལ་སེམས་ཁུར་དང་དོ་སྣང་ཡོང་གི་འདུག་ལ། ལྐོག་ཟ་རུལ་སུངས་དེའི་དབང་གིས་རྒྱ་གར་ལ་འཕེལ་རྒྱས་མེད་པར་ལྷག་ཡོད་པ་རེད། ཅེས་བྷི་བྷི་སི་གསར་ཁང་ལ་བརྗོད་འདུག

གསར་འགོད་པ། བནྡེ་སྐྱབས།