རྗེས་དྲན་རྩེད་འགྲན།

གནས་ཚུལ་འབྱོར་གསལ་ལ། ཨ་རིའི་ཨོར་གྷན་མངའ་སྡེའི་ ( Portland/Vancouver ) ས་གནས་བོད་ཀྱི་གཞོན་ནུ་དང༌། སེ་ཡ་ཊིལ་ ( Seattle ) ས་གནས་གཞོན་ནུ་མཐུན་མོང་གི་གོ་སྒྲིག་འོག ༼ རྒྱལ་གཅེས་དཔའ་བོ་ཇ་རུ་བློ་བཟང་ཕུན་ཚོགས་མཆོག་རྗེས་དྲན་གྱི་སྤོ་ལོའི་རྩེད་འགྲན ༽ ཞེས་པ་ཞིག་གོ་སྒྲིག་ཞུས་ཡོད་ཅིང༌། དེ་ནི་རྒྱ་ནག་གཞུང་གིས་བོད་ཨ་མདོ་རྔ་པ་ས་ཁུལ་གྱི་དགོན་གྲོང་གཉིས་སུ་དྲག་གནོན་དང༌། ལྷག་པར་དུ་ཉེ་ཆར་ཕྱི་ཟླ་ ༣ ནང་རྔ་པ་ཀིརྟི་དགོན་པའི་གྲྭ་བློ་བཟང་ཕུན་ཚོགས་ལགས་ཀྱིས་རྒྱ་གཞུང་ལ་ངོ་རྒོལ་བྱས་ཏེ་རང་ལུས་མེར་བསྲེགས་བཏང་བའི་གནས་ཚུལ་དེར་རྗེས་དྲན་བྱས་པ་ཞིག་ཡིན་འདུག

ཐེངས་འདིའི་རྩེད་འགྲན་དེར་ལག་རྩེད་སྤོ་ལོའི་རུ་ཁག་  ༥ དང་རྐང་རྩེད་སྤོ་ལོའི་རུ་ཁག་ ༤ བཅས་མཉམ་ཞུགས་གནང་ཡོད་འདུག་ལ། ལག་རྩེད་སྤོ་ལོའི་རུ་ཁག་ལྔ་ནི། ཝན་ཁོ་ཝིར་གངས་སེང་རུ་ཁག (The Vancouver Snow Lions) དང༌། བྷེ་ཨེ་ཝིར་ཊོན་འབུམ་ཚོགས་རུ་ཁག་(Beaverton Bhumtsok) ། སེ་ཡ་ཊིལ་རུ་ཁག་(Seattle 26ers) ། པོཊི་ལན་ཌི་སོན་རྩ་རུ་ཁག་དང་གཡག་རུ་ཁག(Portland Sontsa and Portland Yaks) བཅས་ཡིན་འདུག་ལ། མཐའ་མའི་རྟིང་རྩེད་རྒྱལ་ཁ་དེ་བྷེ་ཨེ་ཝིར་ཊོན་འབུམ་ཚོགས་རུ་ཁག་ལ་ཐོབ་ཡོད་འདུག རྐང་རྩེད་སྤོ་ལོའི་རུ་ཁག་ ༤ ཡོད་པ་དག་ནི། སེ་ཡ་ཊིལ་སེག་གེ་རུ་ཁག་ (the Seattle Singey) དང༌། པོཊི་ལན་ཌི་རུ་ཁག་ ( Portland Yeti) ཧྥེ་ཇི་ཨཡེ་ལན་ཌི་རུ་ཁག་(  Fiji Islanders) ས་གྷིར་མ་ཐ་རུ་ཁག་ ( FC Sagaramatha) བཅས་ཡིན་ཞིང༌། མཐའ་མའི་རྟིང་རྩོལ་རྒྱལ་ཁ་དེ་ཧྥེ་ཇི་ཨཡེ་ལན་ཌི་རུ་ཁག་ལ་ཐོབ་ཡོད་འདུག

རྒྱལ་གཅེས་དཔའ་བོའི་རྗེས་དྲན་གྱི་ལག་རྩེད་སྤོ་ལོའི་རུ་ཁག

རྒྱལ་གཅེས་དཔའ་བོའི་རྗེས་དྲན་གྱི་རྐང་རྩེད་སྤོ་ལོའི་རུ་ཁག