ནེའུ་ཡོག་ནས་མཚན་མཐུན་གཉེན་སྒྲིག་ཁྲིམས་མཐུན་ཆཊ་པ།

ཐ་ཧྭར་སྐལ་བཟང་།

སྔོན་གླེང་།

 གཟའ་འཁོར་སྔོན་མའི་གཟའ་པ་སངས་སྤྱི་ཟླ་དྲུག་པའི་ཚེས་ ༢༤ ཉིན་ནེའུ་ཡོག་ཞིང་ཆེན་གྱི་གྲོས་ཚོགས་ནས་མཚན་མཐུན་གཉེན་སྒྲིག་ཁྲིམས་མཐུན་ཡིན་མིན་གྱི་འོས་ཤོག་བླུགས་ཤིང་། མཚན་མཐུན་གཉེན་སྒྲིག་ལ་འོས་ཤོག་ ༣༣ དང་ངོ་རྒོད་བྱེད་མཁན་ལ་འོས་ཤོག་ ༢༩ བྱུང་བས་འོས་ཤོག་གི་རྒྱལ་ཁ་མཚན་མཐུན་གཉེན་སྒྲིག་ལ་རྒྱབ་སྐྱོར་བྱེད་མཁན་ཚོར་ཐོབ་པ་རེད། རྒྱལ་ཁ་ཐོབ་པ་དང་ལྷན་དུ། མཚན་མཐུན་ཆགས་སྤྱོད་རིགས་ཀྱི་སྐྱེས་བུ་ཕོ་མོ་ཚོས་ནེའུ་ཡོག་གྲོང་ཁྱེར་དང་གྲོང་ཁྱེར་གཞན། ས་གནས་མང་པོ་ནས་ཁྲོམ་སྲང་དང་ལམ་གྱི་གཞི་མདོ་སོགས་ལ་འཛོམས་སྟེ་འོས་ཐོབ་ཀྱི་རྒྱལ་ཁའི་ཁྲོམ་སྐོར་བྱས་པ་དང་མཚན་མཐུན་ཆགས་སྤྱོད་ཀྱི་ངོ་བོ་མཚོན་བྱེད་ཀྱི་འཇའ་མཚོན་དར་ཆ་གང་སར་འཕྱར། མཚན་མཐུན་ཆགས་སྤྱོད་རིགས་ལ་མཚོན་ན་ད་ཐེངས་ནེའུ་ཡོག་གྲོང་ཁྱེར་ནས་རྒྱལ་ཁ་ཐོབ་པ་ནི་ཧ་ཅང་གལ་ཆེན་ཡིན་ཞིང་ལོ་རྒྱུས་རང་བཞིན་ཅན་ཞིག་ཀྱང་ཡིན། བཟང་གི་སྒང་ལ་རྒྱན་བཞག་ནས་བཤད་ན། འཛམ་གླིང་གང་སར་གནས་པའི་མཚན་མཐུན་ཆགས་སྤྱོད་རིགས་ལ་ཤུགས་རྐྱེན་ཆེན་པོ་ཐེབས་སྲིད་པར་ཚོད་དཔག་བྱེད་ཀྱི་ཡོད། ནེའུ་ཡོག་ཞིང་ཆེན་ནི་ཨ་རིའི་ཞིང་ཆེན་ལྔ་བཅུའི་ནང་གི་མཚན་མཐུན་གཉེན་སྒྲིག་ཁྲིམས་ཐོག་ནས་ངོས་ལེན་བྱེད་མཁན་ཨང་ ༧ པ་དེ་ཡིན།

ཨ་རི་ལ་ཞིང་ཆེན་ ༥༠ ཡོད་ཅིང་། ཞིང་ཆེན་ ༤༣ གྱིས་ད་རུང་མཚན་མཐུན་གཉེན་སྒྲིག་ཁྲིམས་ཐོག་ནས་ངོས་ལེན་བྱས་མེད་པས་མཚན་མཐུན་ཆགས་སྤྱོད་རིགས་དང་ཁོ་ཚོ་ལ་རྒྱབ་སྐྱོར་བྱེད་མཁན་ཚོར་མཚོན་ན་ལས་ཀ་ཧ་ཅང་མང་པོ་རྗེས་ན་ལྷག་ཡོད། ཡིན་ན་ཡང་ནེའུ་ཡོག་ནས་རྒྱལ་ཁ་ཐོབ་པ་ནི་ཁང་བ་ཞིག་ལ་མཚོན་ན་ཁང་བའི་ཀ་བ་དང་འདྲ་བས་མ་འོངས་པའི་མཚན་མཐུན་གཉེན་སྒྲིག་བྱེད་མཁན་ཚོར་སྟབས་ཇེ་བདེར་སོང་བ་དང་མི་ཚེའི་དོན་སྙིང་ཆེ་རུ་སོང་བ་བཤད་ག་ལ་དགོས། མཚན་མཐུན་གཉེན་སྒྲིག་ཁྲིམས་ཐོག་ནས་ངོས་ལེན་བྱེད་མཁན་གྱི་ཞིང་ཆེན་ལྔ་ཨ་རིའི་ཤར་ཕྱོགས་རྒྱ་མཚོའི་འགྲམ་གྱི་ཞིང་ཆེན་ཁ་ཤས་ཡིན་ཞིང་དེའི་ནང་ལ་ནེའུ་ཡོག་ཡང་འདུས། དེ་མིན་ཞིང་ཆེན་གཞན་པ་གཉིས་ནི་ཨ་རིའི་རྒྱལ་ཁབ་ཀྱི་ནུབ་དཀྱིལ་དུ་འབོད་པའི་ཉོས་མེག་སུཁོ་(Newmexico)ཞིང་ཆེན་དང་ཨའེ་བ་( Iowa )ཞིང་ཆེན་གཉིས་ཡིན། ཨ་རིའི་ནུབ་ཕྱོགས་རྒྱ་མཚོའི་འགྲམ་ན་ཡོད་པའི་ཞིང་ཆེན་ཁ་ལི་ཕྷོར་ཉི་ཡ་( California )དང་ཕོར་ལན་སྒྲི(Portland )། སེས་ཡཱ་སྒྲལ་(Seattle )སོགས་ལྟ་བ་གུ་ཡངས་ཅན་གྱི་ཞིང་ཆེན་ཡིན་པར་ངོས་འཛིན་བྱེད་ཀྱི་ཡོད་མོད། མཚན་མཐུན་གཉེན་སྒྲིག་ད་རུང་ཁྲིམས་ཐོག་ནས་ངོས་ལེན་བྱ་ཐུབ་མེད།

ལྷག་པར་དུ་ཁཱ་ལི་ཕྷོར་ཉི་ཡ་(California)ཞིང་ཆེན་གྱི་གྲོང་ཁྱེར་ཆེན་པོར་འབོད་པའི་སན་ཕྷན་སེ་སུ་ཁོ་(San Francisco)དང་ལོ་སུ་ཨན་ཇུ་ལི་སུ་(Los angeles)ལྟུ་བུ་ཡིན་ན་མཚན་མཐུན་ཆགས་སྤྱོད་རིགས་ཀྱི་གྲངས་འབོར་ཧ་ཅང་མཐོ་ཞིང་། མཚན་མཐུན་ཆགས་སྤྱོད་འདུས་སྡོད་བྱེད་སའི་སྤྱི་ཚོགས་སམ་ཁོར་ཡུག་ཡོད་པ་དང་ཞིང་ཆེན་གཞན་པ་ཚོ་དང་བསྡུར་ན་གྲོང་ཁྱེར་མི་མང་གིས་ཡང་མཚན་མཐུན་ཆགས་སྤྱོད་དྭངས་ལེན་བྱེད་ཀྱི་ཡོད། ཁྲིམས་ཐོག་ལ་ཐེངས་ཁ་ཤས་སོང་མྱོང་ཡོད་མོད་མཚན་མཐུན་ཆགས་སྤྱོད་རིགས་ཀྱི་འདོད་པ་ཁེངས་པའི་གཏམ་དེ་ད་རུང་ཁྲིམས་ཁང་གི་སྒོ་ཆེན་གྱི་ཕྱི་ལོགས་སུ་བསླེབས་ཐུབ་མེད། དེའི་རྒྱུ་མཚན་ནི་གྲོང་ཁྱེར་ལས་རིང་དུ་ཡོད་པའི་ཆོས་ལུགས་ཀྱི་ཤུགས་རྐྱེན་ཆེ་བའི་མང་ཚོགས་སམ་ལྟ་བ་གུ་དོག་པའི་ཁོར་ཡུག་སོགས་ཀྱིས་མཚན་མཐུན་ཆགས་སྤྱོད་ངོས་ལེན་བྱེད་ཀྱི་མེད་པས་ཡིན།

སྤྱིར་བཏང་ཨ་རིའི་ས་ཆ་གང་ལ་སོང་ན་ཡང་མཚན་མཐུན་ཆགས་སྤྱོད་རིགས་ཡོད་པ་དང་གྲོང་ཁྱེར་ཅུང་ཙམ་ཆེ་ཁག་ཏུ་མཚན་མཐུན་ཆགས་སྤྱོད་རིགས་ལ་བལྟ་སྟངས་ངན་པ་མི་འདུག་བསམ་སོང་། ཡིན་ན་ཡང་བརྒྱ་ཆ་བརྒྱ་བཤད་ཐུབ་ཀྱི་མེད། གྲོང་ཁྱེར་ཁུག་ཀྱོག་དང་སྤྱི་ཚོགས་ཆུང་ཆུང་། ཡེ་ཤུ་ཆོས་ལུགས་ཀྱིས་ཤུགས་རྐྱེན་ཆེ་ས་སོགས་ན་མཚན་མཐུན་ཆགས་སྤྱོད་རིགས་ལ་དཀའ་ངལ་རབ་དང་རིམ་པ་འཕྲད་ཀྱི་ཡོད། དཔེར་ན་སློབ་ཆུང་ནས་སློབ་འབྲིང་བར། སློབ་ཆེན་ནས་སྤྱི་ཚོགས་བར། སྤྱི་ཚོགས་ཐོག་ནང་མུ་མཐུད་ནས་གནོན་ཤུགས་དང་དཀའ་ངལ་མྱོང་གི་ཡོད། ཡིན་ན་ཡང་འཛམ་གླིང་གི་གྲུ་སྣེ་གཞན་ཨ་ཕྷི་རི་ཁའི་(Africa)རྒྱལ་ཁབ་ཁ་ཤས་ནང་མཚན་མཐུན་ཆགས་སྤྱོད་རིགས་ལ་སྲོག་ཁྲིམས་གཅོད་པ་དང་དཀྱིལ་ཤར་ཁ་ཆེའི་རྒྱལ་ཁབ་ཁ་ཤས་ཀྱིས་ཡང་མཚན་མཐུན་ཆགས་སྤྱོད་རིགས་ལ་ངོ་རྒོད་བསམ་ཡུལ་ལས་འདས་པ་བྱེད་ཀྱི་ཡོད། ཨ་རིའི་མཚན་མཐུན་ཆགས་སྤྱོད་རིགས་ཀྱི་གནས་སྟངས་དེ་ཁོང་ཚོ་དང་བསྡུར་ཐབས་མེད་ལ་ཚེ་སྲོག་ཤོར་འགྲོ་བའི་སྣང་དོགས་ཀྱང་བྱེད་དགོས་ཀྱི་མེད།

གཙོ་གནད།

 ཨ་རིའི་རྒྱལ་ཁབ་ན་མཚན་མཐུན་ཆགས་སྤྱོད་ཀྱི་རིགས་ལ་དཀའ་ངལ་ཆེན་པོ་གཉིས་འཕྲད་ཀྱི་ཡོད། དང་པོ། མཚན་མཐུན་གཉེན་སྒྲིག་ཨ་རིའི་རྒྱལ་ཁབ་ཀྱི་ཁྲིམས་ཐོག་ནས་ངོས་ལེན་མེད་པའི་དཀའ་ངལ་ཡིན། ཁྲིམས་ཐོག་ནས་ངོས་ལེན་བྱེད་ཀྱི་མེད་པ་ལ་རྒྱུ་མཚན་གྲངས་ལས་འདས་པ་ཞིག་ཡོད་མོད། རྒྱུ་མཚན་གཙོ་བོ་གཅིག་ཟུར་དུ་བཏོན་ནས་བརྗོད་ན། ཡེ་ཤུ་ཆོས་ལུགས་ཀྱི་ཤུགས་རྐྱེན་ཧ་ཅང་ཆེ་བས་ཡིན། ཡེ་ཤུ་ཆོས་ལུགས་ལྟར་ན་ཕོ་མོ་བཟའ་ཚང་བྱེད་པ་དང་ཕྲུ་གུ་གསོ་སྐྱོང་བྱེད་པ་སོགས་ནི་ཆོས་ལུགས་ཀྱི་ཆ་ཤས་གལ་ཆེན་ཞིག་ལ་བརྩི་བ་དང་། ལྷག་པར་དུ་ཕོ་མོ་བཟའ་ཚང་བྱེད་པ་ནི་འགྲོ་བ་མིའི་རང་བྱུང་གི་ཆོས་ཉིད་ཞིག་ཡིན་པར་འདོད། དེའི་རྒྱུ་མཚན་གྱིས་མཚན་མཐུན་གཉེན་སྒྲིག་ནི་ཆོས་ལུགས་སམ་དཀོན་མཆོག་གི་བཀའ་དང་འགལ་ཞིང་། འགྲོ་བ་མིའི་རང་བྱུང་གི་ཆོས་ཉིད་དང་མི་མཐུན་ཟེར། དེའི་སྒང་ལ་མཚན་མཐུན་ཆགས་སྤྱོད་བྱེད་པ་ནི་ཁོ་རང་ཚོའི་འདོད་མོས་ཡིན་པ་ལས་འགྲོ་བ་མིའི་རང་བྱུང་གི་ཆོས་ཉིད་དམ་ལྷན་སྐྱེས་ཀྱི་ཚོར་བ་ཡིན་པར་ཁས་ལེན་བྱེད་ཀྱི་མེད། ད་དུང་ནག་ཉེས་ཐོག་ལ་ནག་ཉེས་བཞག་ན། མཚན་མཐུན་གཉེན་སྒྲིག་བྱས་ན་རང་གི་ཤ་ལས་ཆད་པའི་ཕྲུ་གུ་གསོ་སྐྱོང་བྱེད་ཐབས་མེད་པ་སོགས་ཡེ་ཤུ་ཆོས་ལུགས་སམ་དཀོན་མཆོག་གི་བཀའ་དང་ཡོངས་སུ་མི་མཐུན་པར་འདོད། དཀོན་མཆོག་གི་བཀའ་འམ་ཡེ་ཤུ་ཆོས་ལུགས་ཀྱི་གསུང་རབས་བྷ་བྷེལ་( Bible )ཟེར་བའི་ནང་ན་མཚན་མཐུན་ཆགས་སྤྱོད་ལ་ཉེས་ཆད་བཏང་བ་ཡང་བྲིས་ཡོད་འདུག ཆོས་ལུགས་ལ་དད་མཁན་ཚོས་ཡེ་ཤུའི་གསུང་རབས་ནང་གི་མཚན་མཐུན་ཆགས་སྤྱོད་ལ་ཉེས་ཆད་བཅད་པའི་སྐོར་ཡང་དང་བསྐྱར་དུ་རྗོད་ཀྱི་ཡོད་ལ། གལ་སྲིད་མཚན་མཐུན་ཆགས་སྤྱོད་འགོག་མ་ཐུབ་པ་ཡིན་ན་ཨ་རིའི་རྒྱལ་ཁབ་༼འཛམ་གླིང་ཡོངས་ལ་བཤད་ཀྱི་ཡོད་མེད་གསལ་བོ་མེད་༽ཉམས་དམས་སུ་འགྲོ་བའི་གཉེན་བརྡ་ཡང་གཏོང་གི་ཡོད།

གནད་དོན་འདིའི་རྒྱུ་མ་ཕུ་ལ་དེད་ན་འཇིག་རྟེན་བཀོད་པ་པོའམ་དཀོན་མཆོག་གིས་དང་པོ་འགྲོ་བ་མི་བཟོ་སྐབས། ཕོ་དང་མོ་བཟོས་ཤིང་། ཕོ་དང་མོ་ཡིས་འཇིག་རྟེན་ཁ་ལོ་བསྒྱུར་བ་མ་གཏོགས་མཚན་མཐུན་ཆགས་སྤྱོད་རིགས་ཀྱིས་འཇིག་རྟེན་ཁ་ལོ་བསྒྱུར་བ་ནི་ཆོས་ལུགས་སམ་དཀོན་མཆོག་གི་བཀའ་དང་ཡོངས་སུ་འགལ་བར་འདོད། ད་དུང་བྷ་བྷེལ་(Bible)ནང་ན་བུ་དང་བུ་མོ་གཉེན་སྒྲིག་མ་བྱས་པའི་སྔོན་ལ་ཆགས་པ་སྤྱོད་པ་ནི་དཀོན་མཆོག་གི་བཀའ་དང་འགལ་བར་བྲིས་ཡོད། འདི་ཞོར་འཕྲོས་ཙམ་ཡིན། གང་ལྟར་ཡེ་ཤུ་ཆོས་ལུགས་ཀྱིས་མགོ་བོ་འཚོས་བསྡད་ཡོད་པ་ཞིག་ལ་མཚོན་ན་མཚན་མཐུན་ཆགས་སྤྱོད་ཀྱི་རིགས་འདི་ངོས་ལེན་རྩ་བ་ནས་བྱ་ཐབས་མེད་ལ། མི་རིགས་རང་གི་རིག་གཞུང་དང་ཁྱིམ་ཚང་གི་རིན་ཐང་སོགས་གང་ལ་ཡང་མཐུན་ཐབས་མེད་པ་ཡིན།

ཕྱོགས་ངོས་གཞན་པ་མཚན་མཐུན་ཆགས་སྤྱོད་ཀྱི་རིགས་ལ་མཚོན་ན་རང་དང་འདྲ་བའི་མཚན་མཐུན་གྱི་རིགས་ལ་ཚོར་བ་བསླེབས་པ་ནི་རང་བྱུང་ཡིན་ཟེར་བ་དང་། དེ་ནི་འགོག་ཐབས་མེད་པར་ཕྲུ་གུའི་དུས་ནས་བཟུང་ལྷན་སྐྱེས་སུ་ཡོད་པར་བཤད། འདིིའི་སྐོར་ལ་ཉེ་ཆར་ཨ་རིའི་གཞས་མ་གྲགས་ཅན་ལེ་སྒྲས་དགའ་དགའ་(Lady gaga)ཟེར་བས “གཅེས་ཕྲུག ང་འདི་ལྟར་སྐྱེས་པ་ཡིན” (Baby I was born this way) ༼བསྒྱུར་ལོག་བྱས་ཡོད་ན་དགོངས་དག༽ཟེར་བའི་གཞས་ཤིག་བཏང་ཞིང་། མཚན་མཐུན་ཆགས་སྤྱོད་རིགས་ཀྱིས་གཞས་དེ་ལ་ཧ་ཅང་དགའ་བོ་བྱེད་ཀྱི་ཡོད། གཞས་དེའི་ནང་དོན་ལ་འགྲེལ་བཤད་རྒྱག་སྟངས་མ་འདྲ་བ་བྱས་ན་ཆོག་ཀྱང་མཚན་མཐུན་ཆགས་སྤྱོད་རིགས་ཀྱིས་གཞས་དེའི་ནང་དོན་ཁོ་རང་ཚོའི་ཚོར་བ་རང་བྱུང་དང་ལྷན་སྐྱེས་སུ་ཡོད་པ་གསལ་སྟོན་བྱས་པར་འདོད།  

མ་ཟད་མཚན་མཐུན་ཆགས་སྤྱོད་རིགས་ཀྱིས་འགྲོ་བ་མིའི་རང་བྱུང་ལྷན་སྐྱེས་སུ་ཡོད་པའི་ཚོར་བ་ལ་ཆོས་ལུགས་སམ་དཀོན་མཆོག་གིས་དགེ་སྡུག་གི་དབྱེ་འབྱེད་དམ་ཡག་སྡུག་ཐག་གཅོད་བྱེད་པར་ངོ་རྒོད་བྱེད་ཀྱི་ཡོད། ལྷག་པར་དུ་ཆོས་ལུགས་ཀྱི་བལྟ་སྟངས་སམ་ཤུགས་རྐྱེན་འོག་ནས་མཚན་མཐུན་ཆགས་སྤྱོད་རིགས་ཀྱི་ཆབ་སྲིད་ཀྱི་ཁེ་དབང་དང་འགྲོ་བ་མིའི་གཞི་རྩའི་ཐོབ་ཐང་ཤོར་བ་ནི་ཧ་ཅང་བློ་ཕམ་གྱི་གནས་ཡིན། མཚན་མཐུན་ཆགས་སྤྱོད་རིགས་ཀྱི་སེམས་ཀྱི་རྨ་ཁ་ཆེས་ཆེ་ཤོས་ནི་ཆོས་ལུགས་སམ་དཀོན་མཆོག ད་དུང་རྒྱལ་ཁབ་ཀྱི་རྩ་ཁྲིམས་སོགས་ཀྱིས་འགྲོ་བ་མིའི་རང་བྱུང་ལྷན་སྐྱེས་སུ་ཡོད་པའི་བརྩེ་དུང་ལ་རྡོག་རོལ་བཏང་བ་དེ་ཡིན།

གཉིས་པ། མཚན་མཐུན་གཉེན་སྒྲིག་རྒྱལ་ཁབ་གཞུང་གིས་ཁྲིམས་ཐོག་ནས་ངོས་ལེན་མ་བྱས་པས་མཚན་མཐུན་ཆགས་སྤྱོད་རིགས་ཀྱི་སྐྱེས་བུ་སྒེར་གྱི་མི་ཚེའི་ནང་ལ་འཕྲད་པའི་དཀའ་ངལ་ཡིན། འདི་ཡང་དཀའ་ངལ་སྣ་འཛོམས་ཤིག་ཡིན་མོད། གཙོ་ཆེ་ཤོས་བརྩེ་དུང་དང་ཐོབ་ཐང་གི་གནད་དོན་ཡིན། ཨ་རི་ལྟ་བུ་ཡིན་ན་མཚན་མཐུན་གཉེན་སྒྲིག་རྒྱལ་ཁབ་ཀྱི་ཁྲིམས་ཐོག་ནས་ངོས་ལེན་མེད་པ་དེས་མཚན་མཐུན་ཆགས་སྤྱོད་རིགས་ཀྱི་སྒེར་གྱི་མི་ཚེ་ལ་བརྡབ་གསིག་ཆེན་པོ་ཐེབས་ཀྱི་ཡོད། མངོན་གསལ་དོད་པོའི་ངང་ནས་མཚན་མཐུན་ཆགས་སྤྱོད་རིགས་ཀྱིས་ཨ་རིའི་སྤྱི་མི་བཞིན་རྒྱལ་ཁབ་ཀྱི་རྩ་ཁྲིམས་ནང་ལ་འཁོད་ཡོད་པའི་ཁེ་དབང་མང་པོ་ཞིག་ལོངས་སུ་སྤྱོད་ཐུབ་ཀྱི་མེད། དཔེ་ཁ་ཤས་ཤིག་བཀོད་ན། ཨ་རིའི་མི་མང་སྤྱི་ཡོངས་ཀྱི་ཐོབ་ཐང་ལྟར་རྒྱལ་ཁབ་གཞན་གྱི་མི་དང་གཉེན་སྒྲིག་བྱེད་ཐབས་བྲལ་བ། རྒྱལ་ཁབ་གཞན་གྱི་མི་དང་མཉམ་དུ་གཉེན་སྒྲིག་བྱས་ན་མི་ཆོག་པའི་རྩ་ཁྲིམས་དམིགས་བསལ་མེད་ཀྱང་། གཙོ་བོ་གཉེན་སྒྲིག་བྱས་ན་ཡང་རང་གི་སྙིང་ཉེ་དེ་ཚུར་རང་ཉིད་གནས་སའི་ཨ་རིའི་རྒྱལ་ཁབ་ལ་མཚན་མཐུན་གཉེན་སྒྲིག་གི་མིང་ཐོག་ནས་ལེན་ཐུབ་ཀྱི་མེད་པ་དེ་ཡིན། རྒྱུ་མཚན་དེའི་དབང་གིས་མཚན་མཐུན་ཆགས་སྤྱོད་རིགས་ཀྱིས་ཨ་རིའི་རྒྱལ་ཁབ་ཀྱི་རྩ་ཁྲིམས་ནང་ལ་འཁོད་ཡོད་པའི་ཐོབ་ཐང་ཧ་ཅང་གལ་ཆེན་ཞིག་འཆོར་བཞིན་ཡོད། དཀའ་ངལ་འདི་འཛམ་གླིང་གི་མཚན་མཐུན་ཆགས་སྤྱོད་རིགས་ཀྱི་བརྒྱ་ཆ་མང་ཆེ་ཤོས་ལ་འཕྲད་ཀྱི་ཡོད།

དཀའ་ངལ་ཆེན་པོ་གཞན་ཞིག་ནི་ཨ་རིའི་རྒྱལ་ཁབ་ཀྱི་དཔྱ་ཁྲལ་གྱི་སྒང་ནས་ཡིན། དཔྱ་ཁྲལ་ཕུལ་སྐབས་མི་སྒེར་གྱི་དཔྱ་ཁྲལ་དང་ཁྱིམ་ཚང་གི་དཔྱ་ཁྲལ་བར་ཁྱད་པར་ཆེན་པོ་ཡོད། སྤྱིར་བཏང་མི་སྒེར་བ་གཉིས་༼མཚན་མཐུན་ཆགས་སྤྱོད་རིགས་ཡིན་ན་ཆོག་ལ་མིན་ན་ཡང་ཆོག ༽ཀྱིས་དཔྱ་ཁྲལ་སྤྲོད་སྐབས་དཔྱ་ཁྲད་ལ་ཁྱད་པར་མེད་མོད། མི་སྒེར་བ་དེ་གཉིས་ཁྱིམ་ཚང་གཅིག་ཆགས་པ་ཡིན་ན་དཔྱ་ཁྲལ་གྱི་ཐོག་ནས་ཆག་ཡངས་གང་འཚམ་འགྲོ་ངེས་ཡིན། མཚན་མཐུན་གཉེན་སྒྲིག་རྒྱལ་ཁབ་ཀྱི་ཁྲིམས་ཐོག་ནས་ངོས་ལེན་མེད་པས་མཚན་མཐུན་ཆགས་སྤྱོད་རིགས་ཀྱིས་ཁྱིམ་ཚང་བསྐྲུན་ཐུབ་ཀྱི་མེད་༼ཁང་པ་གཅིག་གི་ནང་ནས་མཚན་མཐུན་ཆགས་སྤྱོད་རིགས་མཉམ་དུ་བསྡད་མི་ཆོག་ཟེར་བའི་དོན་མིན༽། ཁྱིམ་ཚང་བསྐྲུན་མ་ཐུབ་པ་དེའི་རྒྱུ་མཚན་གྱིས་དཔྱ་ཁྲལ་ཡང་ཁྱིམ་ཚང་གཞན་ལྟར། མཉམ་དུ་ཕུལ་ཐུབ་ཀྱི་མེད་པ་རེད། དཔྱ་ཁྲལ་མཉམ་དུ་ཕུལ་མ་ཐུབ་པ་དེས་མཚན་མཐུན་ཆགས་སྤྱོད་རིགས་ཀྱིས་ཨ་རིའི་སྤྱི་མི་གཞན་ལྟར་རྒྱལ་ཁབ་ཀྱི་རྩ་ཁྲིམས་ནང་ལ་འཁོད་ཡོད་པའི་ཁྱིམ་ཚང་གི་ཁེ་དབང་ཆེ་ཞིག་ཤོར་གྱི་ཡོད་པ་རེད། རྒྱལ་ཁབ་ཀྱི་རྩ་ཁྲིམས་ནང་དོན་གཙོ་བོ་ཞིག་ནི་རང་གི་རྒྱལ་ཁབ་ཀྱི་མི་སེར་དང་མི་སྒེར། ཁྱིམ་ཚང་སོགས་ལ་སྲུང་སྐྱོབ་བྱ་རྒྱུ་དེ་འཁོད་ཡོད་མོད། འོན་ཀྱང་མཚན་མཐུན་ཆགས་སྤྱོད་རིགས་ནི་ཨ་རིའི་རྒྱལ་ཁབ་ཀྱི་མི་སེར་ཡིན་ན་ཡང་རྩ་ཁྲིམས་ཀྱིས་ཁོ་ཚོའི་ཁེ་དབང་སྲུང་སྐྱོབ་བྱ་རྒྱུ་ཕར་ཞོག དེ་ལ་ཚད་ལས་བརྒལ་བའི་གཏོར་བཤིག་གཏོང་གི་ཡོད། ༼གསལ་བཤད་བྱེད་དགོས་པ་ཞིག་ལ་ཨ་རིའི་ཞིང་ཆེན་ཁ་ཤས་ཀྱིས་མཚན་མཐུན་གཉེན་སྒྲིག་ངོས་ལེན་མེད་ན་ཡང་དཔྱ་ཁྲལ་གྱི་ཐོག་ནས་གུ་ཡངས་ཀྱི་ཚུལ་དུ་མཚན་མཐུན་ཆགས་སྤྱོད་རིགས་ཀྱིས་རང་གི་སྙིང་ཉེ་དང་མཉམ་དུ་དཔྱ་ཁྲལ་ཕུལ་ཆོག་པ་བཟོས་ཡོད།༽སྤྱིར་བཏང་ཨ་རའི་ཁྲིམས་ཐོག་ན་མི་སྒེར་བ་ལས་ཁྱིམ་ཚང་ལ་ཁེ་དབང་ལྷག་མ་ ༣༠༠ ལྷག་ཡོད་པར་བཤད། གལ་སྲིད་དེ་འདྲ་ཞིག་ཡོད་པའི་དབང་དུ་བཏང་ན་མཚན་མཐུན་ཆགས་སྤྱོད་རིགས་ཀྱི་ཁེ་དབང་དེ་ཚོ་ཤོར་དང་ཤོར་བཞིན་ཡོད་པ་རེད། ད་དུང་ལོ་ག་ཚོད་ལ་ཁྲིམས་ཐོག་གི་ཁེ་དབང་དེ་ཚོ་ཤོར་དགོས་མིན་སུ་ཞིག་གིས་ཀྱང་བཤད་མི་ཐུབ།

དེ་ནས་ཐ་མའི་གནད་དོན་གཙོ་བོ་ནི། གོང་གསལ་དཀའ་ངལ་ཚང་མ་མཉམ་དུ་བསྡུས་པའི་སྙིང་ཁུ་འདྲ་བོ་ཡིན། དེ་ནི་འཇིག་རྟེན་འདིའི་ཐོག་གི་མི་ཚང་མས་ཉམས་སུ་མྱོང་ཞིང་མི་ཚང་མས་ཁས་ལེན་བྱེད་པའི་མིང་ཚིག་བརྩེ་དུང་ཟེར་བ་དེ་ཡིན། འགྲོ་བ་མི་ཚང་མ་༼དུད་འགྲོའི་རིགས་ལ་ཡང་བརྩེ་དུང་ཤུགས་ཆེན་འདུག༽རང་གི་བརྩེ་དུང་ཡོད་ཅིང་། དེའི་ཆེད་དུ་བློས་གཏོང་ཡང་མང་བོ་བྱེད་ཀྱི་ཡོད། དཔེར་ན་ཁ་ཤས་ཀྱིས་རྒྱུ་འབྱོར་སོགས་གཏོང་བ་དང་། ཁ་ཤས་ཀྱིས་དེ་ལས་བརྒལ་དེ་ཕ་མ་སོགས་རང་དང་ཆེས་བློ་ཐག་ཉེ་བའི་མི་དང་འགལ་བ། ཡང་ཁ་ཤས་དེ་ལས་བརྒལ་དེ་རང་གི་ཚེ་སྲོག་ཡན་ཆད་ཀྱང་བརྩེ་དུང་གི་ཆེད་དུ་གཏོང་གི་ཡོད། མིའི་མི་ཚེ་ནང་ལ་བརྩེ་དུང་མེད་ན་ལྷ་སའི་དཀྲུག་ཇའི་ཁ་ན་མར་མེད་པ་དང་། ཨ་མདོའི་ཞོ་ཡི་ཁ་ན་འོ་སྤྲིས་མེད་པ་དང་འདྲ་བར་འདོད་མོད། མི་རིགས་གཞན་དང་རིག་གཞུང་གཞན་དུ་འདི་ལ་དཔེ་མཚོན་གཞན་འདྲ་ཡང་ཡོད་སྲིད། གང་ལྟར་ངས་འབྲི་བཞིན་པའི་རྩོམ་འདིའི་ནང་དོན་གཙོ་བོ་མཚན་མཐུན་ཆགས་སྤྱོད་རིགས་ཀྱིས་བརྩེ་དུང་ཟེར་བའི་མིང་ཚིག་གི་བྲོ་བ་ཅན་དེ་དངོས་སུ་མྱོང་ཐུབ་ཀྱི་མེད་པ་དེ་ཡིན། ཅིའི་ཕྱིར་ཞེ་ན། ཆོས་ལུགས་དང་རྩ་ཁྲིམས་ཀྱིས་མཚན་མཐུན་ཆགས་སྤྱོད་རིགས་ཀྱི་བརྩེ་དུང་ལ་ཚོད་འཛིན་བྱེད་ཀྱི་ཡོད། བརྩེ་དུང་ནི་འཁྲིག་སྤྱོད་གཅིག་པོ་མིན་པར་རང་གི་སྙིང་ཉེ་དང་ལྷན་དུ་འཚོ་ཞིང་རང་གི་སྙིང་ཉེ་དང་ལྷན་དུ་མི་ཚེ་བསྐྱལ་བ། ད་དུང་རང་གི་སྙིང་ཉེ་དེ་འཛམ་གླིང་གི་ས་ཁུག་ཁུག་ཀྱོག་གང་ན་ཡོད་ན་ཡང་ལྷན་དུ་གནས་ཐུབ་པ། རང་ཉིད་ཀྱི་སྙིང་ཉེ་དེ་རང་དང་ལྷན་དུ་སྐྱིད་ཀྱི་རྟ་བོར་མཉམ་ཞོན་དང་སྡུག་གི་ཁུར་བོ་མཉམ་ཁུར་གྱི་མི་ཚེ་རོལ་གྱིན་ཡོད་ན། དེ་ལ་ཆོས་ལུགས་དང་རྩ་ཁྲིམས་ཀྱིས་འགག་བྱའམ་གཏོར་སྐྱོན་མེད་པ་སོགས་རེད། གང་ལྟར་བརྩེ་དུང་ལ་ས་མཚམས་མེད་པ་བདེན་མོད། ཨ་རིའི་ཡུལ་ན་ཆོས་ལུགས་དང་རྩ་ཁྲིམས་ཀྱིས་མཚན་མཐུན་ཆགས་སྤྱོད་རིགས་ཀྱི་བརྩེ་དུང་དང་ཐོབ་ཐང་རྡོག་རོལ་གཏོང་བ་ནི་བསམ་ཡུལ་ལས་འདས་པ་ཡིན། མཚན་མཐུན་ཆགས་སྤྱོད་རིགས་ཀྱིས་ཁོ་རང་ཚོས་སྐྱེས་བོ་གཞན་ལྟར་རང་གི་ཆེས་དྭངས་པའི་བརྩེ་དུང་དེ་ཡོངས་སུ་ཕྱིར་ངོམས་བྱེད་ཐུབ་ཀྱི་མེད་པ་དེ་གནད་དོན་འདི་ཚང་མའི་ནང་ནས་གཙོ་བོ་དེ་ངོས་འཛིན་བྱེད་ཀྱི་ཡོད།

                                                                         སྤྱི་ལོ་༢༠༡༡ཟླ་བ་དྲུག་པའི་ཚེས་༢༨། 

མཆན།

མཚན་མཐུན་ཆགས་སྤྱོད་རིགས་ཀྱི་ཕོ་ལ་༼Gay༽ཟེར།

མོ་ལ་༼Lesbian༽ཟེར།

ཕོ་མོ་དབྱེར་མེད་སྤྱོད་པ་ལ་༼Bisexual༽ཟེར།

མཚན་མཐུན་ཆགས་སྤྱོད་ལ༼Homosexuality༽ཟེར།

༼ རྩོམ་པ་པོའི་ཟིན་བྲིས་ལས་འདྲེན་བཀོད་བྱས།༽