ཕྱི་ལོ་༢༠༡༡ཟླ་༡༢ཚེས་༣༡ཉིན་ནས་༢༠༡༢ཟླ་༡ཚེས་༡༠ཉིན་བར།༧གོང་ས་མཆོག་གིས་འཛམ་གླིང་ཞི་བདེར་དམིགས་ཏེ།གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་༣༢པ་དེ་སྩོལ་རྒྱུ་རེད།ཅེས་དུས་དབང་གྲ་སྒྲིག་ཚོགས་པའི་ཚོགས་གཙོ་མོན་རྟ་དབང་དགོན་པའི་བླ་མ་ངག་དབང་ནོར་བུ་ལགས་ཀྱིས་བརྗོད་ཡོད།
ཨ་རུ་ཎ་ཅལ་དུས་འཁོར་དབང་ཆེན་གྲ་སྒྲིག་ཚོགས་པའི་གོ་སྒྲིག་འོགདེ་རིང་ཕྱི་ཟླ་༧ཚེས་༡ཉིན་གྱི་ཞོགས་པའི་ཆུ་ཚོད་༩།༣༠སྟེང་།དབུས་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་དུ།༢༠༡༢ལོར་གནས་མཆོག་རྡོ་རྗེ་གདན་དུ་འཚོགས་འཆར་ཡོད་པའི་དུས་དབང་སྐོར་གྱི་གསར་འགོད་གསལ་བསྒྲགས་ཤིག་སྤེལ་སོང་ལ།མཛད་སྒོའི་སྐུ་མགྲོན་དུ་བཀའ་བློན་ཁྲི་པ་ཟམ་གདོང་རིན་པོ་མཆོག་གདན་ཞུས་གནང་ཡོད་པ་མ་ཟད།སྐབས་དེར།དུས་དབང་སྐོར་གྱི་དྲ་རྒྱ་ཞིག་ www.kalachakra2012.orgཞིག་གསར་དུ་དབུ་འབྱེད་གནང་སོང་།
ལྷན་ཚོགས་ཐོག་མོན་རྟ་དབང་ནས་ཕེབས་པའི་དུས་དབང་གྲ་སྒྲིག་ཚོགས་ཆུང་གི་ཚོགས་གཙོ་བླ་མ་ངག་དབང་ནོར་བུ་ལགས་ཀྱིས་ངོ་སྤྲོད་གནང་དོན།ངས་དོན་ཚན་གསུམ་གྱི་ཐོག་དུས་འཁོར་དབང་ཆེན་སྐོར་ངོ་སྤྲོིད་ཞུ་རྒྱུ་ཡིན།ཨ་རུ་ཎ་ཅལ་མངའ་སྡེ་སྤྱི་ཁྱབ་བློན་ཆེན་མཆོག་ཞལ་བཞུགས་སྐབས།༧གོང་ས་མཆོག་ལ་གསོལ་བ་བཏབ་སྟེ།ཞལ་བཞེས་ཐོབ་པའི་དཔལ་དུས་ཀྱི་འཁོར་ལོའི་བཀའ་དབང་དེ།༢༠༡༡ལོའི་ཕྱི་ཟླ་༡༢ཚེས་༣༡ནས་༢༠༡༢ལོའི་ཟླ་༡ཚེས་༡༠བར་འཚོགས་གཏན་འཁེལ་བ་རེད།ད་ཐེངས་གོ་སྒྲིག་ཚོགས་པའི་ངོས་ནས།རིས་སུ་མ་ཆད་པའི་ཆོས་བརྒྱུད་ཁག་ཚང་མ་ལྷན་འཛོམས་ཐོགའཛམ་གླིང་ཞི་བདེ་ཡོང་ཆེད་སྨོན་ལམ་མགོ་འཛུགས་དང་འབུམ་ཚོགས་འཚོགས་རྒྱུ།དོལ་རྒྱལ་དང་འབྲེལ་བ་མེད་མཁན་ཚོས་ལྷ་མི་ཟུང་འབྲེལ་གྱི་ཐོག་ནས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་འབུལ་རྒྱུ་ཡིན།ཞེས་ངོ་སྤྲོད་གནང་བྱུང་། ཡང་ཁོང་གིས་དུས་དབང་མགོ་འཛུགས་མ་གནང་གོང་གྲོང་ཁྱེར་པཱ་ཌི་ནར་འཚོགས་འཆར་ཡོད་པའི་འཛམ་གླིང་ཆོས་ལུགས་སྨོན་ལམ་ཐད་ལ་ཁོང་གིས།༢༠༡༢ལོའི་ཟླ་༡ཚེས་༡ཉིན་བྷེ་ཧར་རིའི་གྲོང་ཁྱེར་པཱ་ཌི་ཎ་རུ།འཛམ་གླིང་ཆོས་ལུགས་ཁག་གི་བླ་ཆེན་དང་ཞི་བདེའི་གཟེངས་རྟགས་བཞེས་མྱོང་པའི་མཁས་དབང་ཁག་ཅིག་གིས།འཇིག་རྟེན་ཞི་བདེའི་ཆེད་སྨོན་ལམ་གསུང་རྒྱུའི་ལས་རིམ་ཞིག་གོ་སྒྲིག་ཞུ་འཆར་ཡོད།ཅེས་བརྗོད་སོང་།
བླ་མ་ངག་དབང་ནོར་བུ་ལགས་ཀྱིས་རྡོ་རྗེ་མཁའ་འགྲོ་ལགས་ཀྱིས་ནང་མིའི་འཚམས་འཕྲིན་སྒྲོག་སྦྱང་གནང་བའི་ནང་བཀོད་དོན།ཕྱི་ཟླ་༤ཚེས་༣༠ཉིན་ཨ་རུ་ཎ་ཅལ་མངའ་སྡེ་སྤྱི་ཁྱབ་བློན་ཆེན་མཆོག་གནམ་གྲུ་བརྡབ་སྐྱོན་ཁྲོད་རྐྱེན་འདས་སུ་ཕྱིན་ཏེ། ཕྱི་ཚེས་༡༠བར་སྐུ་ཕུང་སྦྱིན་སྲེག་མ་གྲུབ་བར།༧གོང་ས་མཆོག་གཙོས་པའི་བོད་གཞུང་མང་གཉིས་དང་།ལྷག་པར་དུ།ཆོས་སྡེ་ཁག་གིས་ཐུགས་ཁུར་ཆེ་བཞེས་ཀྱིས་གསོལ་སྨོན་དང་མཆོད་འབུལ་རྒྱ་ཆེ་གནང་བ་མ་ཟད། གུས་པ་ནང་མི་ཉེ་འཁོར་ཡོངས་ལ།ཡིག་ངག་གཉིས་ཐོག་ནས་སེམས་གསོ་ཚད་མེད་གནང་བར་སྙིང་ནས་ཐུགས་རྗེ་ཞུ་རྒྱུ་དང་།ཡབ་དམ་པ་དེ་ཉིད་ཀྱིས་༧གོང་ས་སྐྱབས་མགོན་ཆེན་པོ་མཆོག་ལ།དད་གུས་ཇི་ལྟར་ཞུས་ཀྱི་ཡོད་པ་བཞིན།གུས་པ་ནང་མི་ཡོངས་ནས་ཀྱང་།དུས་ནས་དུས་སུ་མགོན་པོ་གང་ཉིད་ལ་དད་གུས་ཚད་མེད་ཞུ་རྒྱུ་ཡིན།ཞེས་འཁོད་ཡོད།
དེའི་རྗེས་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུངས་དོན།༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས།བོད་དང་རྒྱ་གར།ནུབ་ཕྱོགས་གླིང་ཆེན་ཁག་དང་སོག་ཡུལ་བཅས་ས་གནས་མང་པོའི་ནང་།རྒྱལ་བ་སྐུ་ཕྲེང་ན་རིམ་སྐབས་མ་བྱུང་བའི་དཔལ་དུས་ཀྱི་འཁོར་ལོའི་བཀའ་དབང་ཐེངས་མང་བསྩལ་ཡོད་སྟབས།རླབས་ཆེན་གྱི་མཛད་རྗེས་ཤིག་བཞག་ཡོད་པ་རེད།དེའི་བྱུང་རིམ་ནང་གནས་མཆོག་གདན་དུ།༧གོང་ས་མཆོག་གིས་དུས་འཁོར་གྱི་བཀའ་དབང་ཐེངས་༣༢གནང་རྒྱུའི་ཆེད།སྐུ་གཤེགས་བློན་ཆེན་རྡོ་རྗེ་མཁའ་འགྲོ་དབུས་པའི་དད་ལྡན་སྦྱིན་བདག་མང་པོ་ཞིག་གིས།གསོལ་བ་བཏབ་པ་ལྟར་ལོ་འདིའི་ལོ་མཇུག་གམ།༢༠༡༢ལོའི་ལོ་མགོ་ཙམ་ལ།ཚོགས་ཆུང་གི་ཚོགས་གཙོས་གསུངས་བ་བཞིན།དུས་འཁོར་དབང་ཆེན་བཀའ་དྲིན་བསྐྱང་རྒྱུའི་ཐུགས་གཏན་འཁེལ་བ་དེ།ཧ་ཅང་རླབས་ཆེ་བའི་ཆོས་ཕྱོགས་ཀྱི་བྱ་བ་ཞིག་ཆགས་ཡོད།ཅེས་གསུངས།དུས་འཁོར་ཀྱི་གལ་ཆེན་རང་བཞིན་སྐོར་ལ་ཟམ་གདོང་རིན་པོ་མཆོག་གིས་མུ་མཐུད་དུ།དཔལ་དུས་ཀྱི་འཁོར་ལོ་དེ་རྒྱུད་སྡེ་བཞིའི་ནང་སྔགས་བླ་མེད་ཀྱི་རྒྱུད་ལ་གཏོགས་པ་གང་ཞིག་ལ།རྒྱུད་སྡེ་གཞན་དང་ཞལ་གཟིགས་མི་མཐུན་པའི་ལམ་གྱི་རིམ་པ་ཐ་དད་དང་།ཟབ་པ་དང་མྱུར་བ་ཞིག་ཡིན་པ་རེད།དེ་སྔོན་བྱུང་ཟིན་པའི་དུས་ཀྱི་འཁོར་ལོའི་བཤད་ཁྲིད་གནང་མཁན་བླ་ཆེན་ཚོའི་ནང་།ཀུན་མཁྱེན་ཏཱ་ར་ན་ཐ་ལས་གཞན་པའི་བླ་ཆེན་གཞན་སུས་ཀྱང་།དུས་འཁོར་བཀའ་དབང་ཐེངས་གསུམ་བཞི་ལས་གནང་མྱོང་ཡོད་པ་མ་རེད།རྒྱལ་བ་སྐུ་ཕྲེང་བཅུ་བཞི་པས་བཀའ་དབང་ཐེངས་༣༠གནང་ཟིན་པ་དང་།སོ་གཅིག་པ་དེ་མི་རིང་བར་ཟླ་འདིའི་ནང་གནང་རྒྱུ་དང་།སོ་གཉིས་པའང་འདི་ལོར་གནས་མཆོག་གདན་དུ་གནང་རྒྱུ་ཡིན་པ་དེ།ཕྱོགས་གཅིག་ནས་སྙིགས་མའི་དུས་འདིར་འཇིག་རྟེན་འདི་ཧ་ཅང་ཛ་དྲག་གནས་བབ་ཤིག་ཏུ་ཡོད་ནའང་།ཕྱོགས་གཞན་ཞིག་ནས།བླ་མ་ཁྱད་པར་འཕགས་པའི་ཆོས་ཁྱད་པར་འཕགས་པའི་ཆོས་འདི་ལྟ་བུ་ཞིག་འཆད་ཉན་ཡོད་པ་དེ།བསྐལ་བ་བཟང་པོ་དང་བསོད་ནམས་ཆེན་པོ་ཞིག་ཆགས་ཡོད་པ་རེད།ཅེས་གསུངས་སོང་།
འདི་གའི་གསར་འགོིད་པས་རྟ་དབང་དགོན་པའི་བླ་མ་ངག་དབང་ནོར་བུ་ལགས་སུ།ད་ལོའི་དུས་དབང་གི་སྦྱིན་དབང་དང་གོ་སྒྲིག་པ་སུ་སུ་ཡིན་མིན་དང་།ཆོས་ཞུ་བ་ཅི་ཙམ་ཕེབས་ཐུབ་མིན།དེ་བཞིན།ཆོས་ཞུ་བའི་སྡོད་གནས་ཐོག་གྲ་སྒྲིག་གང་འདྲ་བྱས་ཡོད་མེད་སྐོར་དྲིས་སྐབས་ཁོང་གིས་བརྗོད་དོན།
གོ་སྒྲིག་ཚོགས་ཆུང་ལ་ཁྱོན་སྦྱིན་བདག་མི་༢༡ཡོད་ཅིང་།དེའི་ནང་ཕྱག་ལས་གནང་མཁན་གཙོ་བ་གསུམ་ཡོད་པའི་ནང་།ཨ་རུ་ཎ་ཅལ་མངའ་སྡེ་བློན་ཆེན་རྡོ་རྗེ་མཁའ་འགྲོ་ལགས་ཀྱི་ཕྱོགས་ནས་སྡེ་ཚན་གཅིག་དང་།རྒྱ་ལི་སྨོན་ལམ་ཚོགས་པའི་ཕྱོགས་ནས་གདན་ས་ཁག་ཅིག་གི་གྲྭ་ཚང་༦གི་འཐུས་མིའི་སྡེ་ཚན་གཅིགརྣམ་རྒྱལ་གྲྭ་ཚང་ནས་སྡེ་ཚན་གཅིག་བཅས་ཡོད།དེ་བཞིན།ང་ཚོས་རྒྱ་ནག་སྐམ་ས་ནས་རྒྱ་རིགས་ཆིག་སྟོང་༡༠༠༠ལྷག་ཕེབས་ཐུབ་རྒྱུའི་རོབ་རྩིས་རྒྱག་བཞིན་ཡོད་ཀྱང་།རྒྱ་ནག་གི་སྲིད་བྱུས་ཀྱི་རྐྱེན་པས་ཁོང་ཚོར་གསུང་སྟངས་བདེ་བོ་ཡོད་ས་མ་རེད།གསལ་པོ་ཞིག་ཞུ་ཐུབ་ཀྱི་མི་འདུག་ཀྱང་།ད་ལོ་ནམ་རྒྱུན་ནམ་དང་མི་འདྲ་བར་མི་མང་པོ་ཞིག་འཛོམས་ཐུབ་རྒྱུར་རེ་བ་རྒྱག་གི་ཡོད།སྐྱབས་མགོན་རིན་པ་ཆེ་དགུང་ལོ་མཐོ་རུ་འགྲོ་བཞིན་ཡོད་སྟབས།མི་མང་པོ་ཞིག་ལ་དུས་འཁོར་དབང་ཆེན་ཐོབ་དང་མི་ཐོབ་ཀྱི་སེམས་འཚབ་ཡོང་གིན་ཡོད།གནས་མཆོག་རྡོ་རྗེ་གདན་དུ་དུས་དབང་གནང་མ་ཐུབ་པར་དུས་ཚོད་གང་འཚམ་ཕྱིན་ཡོད་སྟབས།།ད་ཆར་འཛམ་གླིང་ཕྱོགས་མཐའ་ནས་མི་ཆིག་འབུམ་ལྔ་ཁྲི་ནས་༡༥༠༠༠ནས་༢༠༠༠༠༠ཉིས་འབུམ་ཙམ་འཛོམས་རྒྱུའི་རེ་བ་ཡོད་ཅེས་དང་།
ཡང་ཁོང་གིས་མུ་མཐུད་དོན།ཐོག་མར་ང་ཚོས་དགེ་འདུན་པ་དང་།ཕྱི་རྒྱལ་ཁག་གི་སྐུ་མགྲོན།མི་མང་དཀྱུས་མ་བཅས་སྡེ་ཚན་བགོས་ཏེ་གྲ་སྒྲིག་བྱས་ཏེ།མི་ཁྲི་ལྔ་ཙམ་ལ་སྡོད་གུར་གྱི་གྲ་སྒྲིག་བྱས་པ་རེད།ཕྱི་ཟླ་༨པའི་ནང་ང་ཚོ་བསྐྱར་དུ་ཚོགས་འདུ་ཞིག་འཚོགས་འཆར་ཡོད།སྐབས་དེར།གུར་གྱི་ཁ་གྲངས་མང་དུ་གཏོང་དགོས་ན་སྐབས་བསྟུན་གྱིས་འགྱུར་བ་གཏོང་རྩིས་བྱས་ཡོད།ཅེས་བརྗོད་བྱུང་།
ད་ལོར་བོད་ནས་དུས་འཁོར་དབང་ཆེན་ལ་བོད་མི་ཅི་ཙམ་འབྱོར་ཐུབ་ཀྱི་ཡོད་མེད་སྐོར་དྲིས་སྐབས།ང་ཚོས་བོད་ནས་ཕེབས་མཁན་བདེ་སྲུང་ལ་བཀའ་འདྲི་ཞུ་བཞིན་ཡོད།ད་བར་བདེ་སྲུང་བཀའ་བློན་དང་དྲུང་ཆེ་སོགས་ལ་ཐུགས་ལྷོད་ལྷོད་བྱས་ཏེ།བཀའ་མོལ་གནང་ཁོམ་བྱུང་ཡོད་པ་མ་རེད།སང་ཉིན།བདེ་སྲུང་བཀའ་བློན་དང་མཉམ་དུ་བཀའ་བསྡུར་གནང་རྒྱུ་ཡིན།དེའི་ནང་ལ་བོད་ནས་ཕེབས་མཁན་ཚོ་དང་།དེ་མིན་པའི་དུས་དབང་སྐབས་བདེ་སྲུང་དང་འབྲེལ་བའི་གནད་དོན་ཁག་གི་ཐོག་བཀའ་བསྡུར་གནང་རྒྱུ་ཡིན།ཕྱི་ཚེས་༢༩ཉིན་ཆོས་རིག་བཀའ་བློན་དང་ཐུག་འཕྲད་ཀྱིས་ཆོས་ཕྱོགས་ཀྱི་ལས་རིམ་ཐོག་བཀའ་མོལ་གནང་ཐུབ་པ་བྱུང་།བོད་ནས་མི་ག་ཚོད་བསླེབ་ཐུབ་མིན་ཐོག་ཚོད་དཔག་བྱས་ནས་བཤད་ཐུབ་ཀྱི་མི་འདུགགོ་ཐོས་ལྟར་ན།༧གོང་ས་མཆོག་གིས་རྡོར་གདན་དུ་དུས་དབང་གནང་རྒྱུའི་ཞལ་བཞེས་ཐོབ་པ་ནས།གདན་ས་དང་གཞིས་ཆགས་ཁག་གི་འབྲེལ་ཡོད་མི་སྣ་ཚོས།དུས་དབང་གི་ཚེས་གྲངས་ཇི་ལྟར་གཏན་འཁེལ་པ་རེད།ཚེས་གྲངས་དེས་ཡིག་ཆ་བཟོ་སྟངས་ལ་ཁྱད་པར་ཡོང་གི་འདུག་ལབ་མཁན་བྱུང་སོང་།ད་ལྟ་བོད་ནས་བོད་མི་གང་ཙམ་ཞིག་ལ་ཐོངས་མཆན་སྤྲད་ཚུལ་གོ་ཡོང་གི་འདུགདེར་བལྟས་ན།བོད་ནས་བོད་མི་མང་པོ་ཞིག་ཕེབས་ཐུབ་རྒྱུའི་རེ་བ་ཡོད།ཅེས་བརྗོད་སོང་།
༢༠༡༢ལོའི་རྡོར་གདན་གྱི་དུས་དབང་དྲ་རྒྱ་སྐོར་ལ་ཁོང་གིས་མུ་མཐུད་དོན།གཅིག་ནས།དཔལ་དུས་ཀྱི་འཁོར་ལོའི་བཀའ་དབང་དེ་ཆོས་ཕྱོགས་ཀྱི་འབྲེལ་བ་ཆགས་ཡོད་པ་དང་།གཉིས་ནས།བོད་གཞུང་དང་འབྲེལ་བ་ཆེན་པོ་ཞིག་ཆགས་ཡོད།བོད་གཞུང་གི་ནང་དུ་བཀའ་བློན་ཁྲི་པ་ནི་༧གོང་ས་མཆོག་ཕུད་པའི་མི་སྣ་གཙོ་བོ་དེ་ཆགས་ཡོད་སྟབས།རིན་པོ་ཆེས་དབུ་འབྱེད་གནང་ཐུབ་ན།འཛམ་གླིང་ཡོངས་སུ་ཡིད་ཆེས་དང་དད་པ་སྐྱེ་ས་ཞིག་ཡོང་གི་རེད་བསམ་སོང་།ཅེས་བརྗོད་སོང་།
མཐའ་མར་གསར་འགོད་པས་ཁོང་ལ།ཆོས་ཞུ་བས་དཀར་སྐྱོང་གནང་ཐབས་ལ་གོ་སྒྲིག་ཚོགས་པ་ལས་འགུལ་ཅི་ཞིག་སྤེལ་རྩིས་ཡོད་མེད་དང་།སྐབས་དེའི་མང་ཚོགས་ཀྱི་བདེ་འཇགས་ཐོག་གྲ་སྒྲིག་གང་འདྲ་ཡོད་མེད་དྲིས་པར།ང་ཚོའི་ངོས་ནས་དད་ལྡན་ཆོས་ཞུ་ཡོངས་དང་ལྷག་པར་དུ་ཟ་ཁང་གཉེར་མཁན་ཚོས་དུས་དབང་གི་སྐབས་སུ།གང་ཐུབ་ཀྱིས་དཀར་སྐྱོང་གནང་རྒྱུའི་འབོད་སྐུལ་ཞུ་བཞིན་ཡོད།མང་ཚོགས་ཀྱི་བདེ་འཇགས་ཐོག་ང་ཚོས་བདེ་སྲུང་ལས་ཁུངས་དང་འབྲེལ་བ་བྱས་ཏེ་བཀའ་བསྡུར་གནང་གི་ཡིན།ཞེས་བརྗོད་སོང་།
གསར་འགོད་པ།དཔལ་ལྡན།
དུས་དབང་སྐབས་སུ་བོད་ནས་གསར་ཏུ་འབྱོར་མཁན་རྣམས་ལ་སྡད་ས་ཡག་པོ་བཟོ་ཐུབ་ན་ཕན་པ་ཆེ
བོད་གཞིས་བྱེས་གཉིས་ཀྱི་སྙིང་ནོར་དེ།།
མགོན་བསྟན་རྒྱ་མཚོ་མ་ལགས་སམ།།
ཁྱེད་སྐུ་ཚེ་ཁྲི་ལོར་བརྟན་གྱུར་ནས།།
བོད་གངས་ཅན་བསྟན་པ་དར་བར་ཤོག།
ལྷ་ཌྭ་ཀིའི་སྟོང་གི་གཙོ་མོ་དེ།།
དཔལ་དམག་ཟོར་རྒྱལ་མོ་མ་ལགས་སམ།།
ཁྱེད་གཟིགས་པ་དུས་ལས་མ་གཡེལ་བར།།
དམ་མཉམ་པའི་བསྟན་དགྲ་དབྱིངས་སུ་སྒྲོལ།།
བོད་ཡིག་དང་དབྱིན་ཡིག་རྒྱ་ཡིག་སོགས་མང་པོ་ཞིག་ནས་མཐོང་ཐོབ་པ་བྱས་ན་དགེ་མཚན་ཆེ་བ་རློམ།
དཔལ་དུས་ཀྱི་འཁོར་ལོའི་དབང་ཆེན་ཞེས་སྔགས་བླ་མེད་ཀྱི་རྒྱུད་ཀྱི་རྒྱུད་ལ་གཏོགས་པ་ཞིག་ཡིན་དུས་དེའི་ནུས་བ་མྱུར་པ་དང་ཟབ་པ་སོགས་གལ་ཆེན་ཡིན་པར་མ་ཟད་གནས་ཆེན་ཁྱད་པར་ཅན་འདི་ནས་དུས་དབང་གཅིག་ཐོབ་པ་ཡིན་ན་དུས་དབང་ལྔ་ཞིག་ཐོབ་དང་ཕན་ཡོན་གཅིག་ཡིན་ཟེར་གྱི་ཡོད་པ་རེད། དེ་ལས་གལ་ཆེན་ཞིག་ཡོད་པ་ནི་༧གོང་ས་མཆོག་གི་སྐུ་ཕྱྭའི་གནས་སྟངས་སོགས་ཟབ་དགོས་པ་ཞིག་ཡིན་སྔོན་སོང་གི་ལོ་རྒྱུས་ལ་ལྟས་ན་གསལ་བོ་རེད། དེ་འདྲ་ཡིན་དུས་དུས་དབང་གྲ་སྒྲིག་ཚོགས་ཆུང་ནས་དེ་ལ་ཟབ་ཟབ་གནང་རོགས་ཞུ་རྒྱུ་བཅས་ཐུགས་རྗེ་གནང་།
དུས་དབང་དུས་ལྟར་གསུང་ཐུབ་རྒྱའི་སྨོན་འདུན་ཞུ།
དུས་འཁོར་དབང་ཆེན་སྐབས་སུ་གལ་གནད་ཆེ་ཤོས། ༧གོང་ས་མཆོག་གི་སྐུ་གཟུགས་འཕྲོད་བསྟེན་དང་།
སྐུ་ཕྱྭའི་ཐད་གོ་སྒྲིགས་ཚོགས་ཆུང་གཙོས་འབྲེལ་ཆགས་ཀུན་གྱིས་འགན་སྲུང་ནན་ཏན་བྱེད་པར་དམིགས་བསལ་འབོད་སྐུལ་ཞུ་བཞིན་ཡོད། དེ་ལས་གལ་ཆེ་བ་ཞིག་མེད་པ་ངོས་འཛིན་གནང་རོགས་ཞུ་ཞུ།