བརྡ་དང་ཐ་སྙད་གསར་བ་རྣམས་བོད་པའི་སྐད་ཡིག་ནང་ཚུར་བླངས་ཏེ་སྣོན་པ་རྒྱག་མ་ཐུབ་པ་ཡིན་ན། ཉིན་གཅིག་བོད་པའི་སྐད་ཡིག་དེ་ད་ལྟའི་སཾ་སྐྲི་ཏའི་གནས་སྟངས་ཆགས་རྒྱུ་ཡིན་པ་མིག་མཐོང་ལག་ཟིན་རེད་ཟེར།
དེ་རིང་སྔ་དྲོ་ཆུ་ཚོད་༡༠དང་ཕྱེད་ཀའི་སྟེང་བོད་ཀྱི་དཔེ་མཛོད་ཁང་གི་གོ་སྒྲོག་འོག དཔེ་མཛོད་ཚོགས་ཁང་གསར་བའི་ནང་རྩོམ་སྒྱུར་ཟབ་སྦྱོང་འཛིན་གྲྭ་ཐེངས་ ༦ པའི་དབུ་འཛུགས་མཛད་སྒོ་ཚོགས་སོང་ལ། མཛད་སྒོའི་སྐུ་མགྲོན་དུ་རང་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་དང་།དཔེ་མཛོད་ཁང་གི་དྲུང་ཆེ་ངག་དབང་ཡེ་ཤེས་གཉིས་གཙོས་པའི།ཐེངས་འདིའི་ཟབ་སྦྱོང་འཛིན་གྲྭའི་དགེ་རྒན་རྣམ་པ་དང་སློབ་ཕྲུག་རྣམས་བཅས་མཉམ་ཞུགས་གནང་འདུག མཛད་སྒོའི་ཐོག་སྐུ་མགྲོན་རྣམ་གཉིས་ཀྱིས་ཡིག་སྒྱུར་དང་འབྲེལ་བའི་མཛད་སྒོའི་གཏམ་བཤད་གནང་གྲུབ་རྗེས། དགེ་སློབ་ཚང་མས་སོ་སོ་ཕན་ཚུན་ངོ་སྤྲོད་གནང་སྟེ་མཛད་སྒོ་མཇུག་སྒྲིལ་སོང་།
བོད་ཀྱི་དཔེ་མཛོད་ཁང་གིས་གོ་སྒྲིག་འོག་ལོ་ལྟར་མཐོ་སློབ་ཁག་གི་སློབ་ཕྲུག་གཙོས་པའི་ཡིག་སྒྱུར་ཐད་མོས་བློ་ཡོད་རིགས་རྣམས་ལ་རྩོམ་སྒྱུར་གྱི་སྐོར་ལ་ཟབ་སྦྱོང་སྤྲོད་བཞིན་པ་ལྟར། ཕྱི་ཟླ་ ༧ ཚེས་ ༡ ཉིན་ནས་ད་ལོའི་རྩོམ་སྒྱུར་ཟབ་སྦྱོང་འཛིན་གྲྭ་དེ་འཚོགས་མགོ་ཚུགས་ཡོད་པ་དང་། ཐེངས་འདིའི་ཟབ་སྦྱོང་འཛིན་གྲྭར་ཁྱོན་བསྡོམས་སློབ་ཕྲུག་ ༣༠ སླེབས་འདུག དེའི་ཁྲོད་འཛིན་རིམ་བཅོ་ལྔ་ (BA) ཐོན་པའི་མཐོ་རིམ་སློབ་མ་ ༡༥ ལ་བོད་ཀྱི་དཔེ་མཛོད་ཁང་གི་ངོས་ནས་སློབ་ཡོན་རོགས་དངུལ་ཕུལ་ཡོད་པ་དང་། དེ་འཕྲོས་ཀྱི་ས་མིག་ ༡༥ བཙན་བྱོལ་སྤྱི་ནང་གི་ལས་ཁུངས་ཁག་གི་ལས་བྱེད་དང་མི་སྒེར། དེ་བཞིན་བོད་ཡིག་སློབ་མཁན་ཕྱི་རྒྱལ་བ་བཅས་ཁག་གསུམ་ལ་ས་མིག་ ༥ རེ་ཕུལ་ཡོད་པ་རེད། ཐེངས་འདིར་དུས་ཡུན་ཟླ་གསུམ་རིང་སློབ་ཕྲུག་རྣམས་ལ་རྩོམ་སྒྱུར་ཟབ་སྦྱོང་སྤྲོད་འཆར་ཡོད་འདུག ཐོག་མར་བོད་ཀྱི་དཔེ་མཛོད་ཁང་གི་དྲུང་ཆེ་ངག་དབང་ཡེ་ཤེས་ཀྱིས་རྩོམ་སྒྱུར་ཟབ་སྦྱོང་འཛིན་གྲྭ་འཛུགས་དགོས་པའི་དམིགས་ཡུལ་དང་འབྲེལ་ཏེ་བརྗོད་དོན། བོད་རང་བཙན་ཤོར་རྗེས་བོད་ནང་དུ་རྒྱ་གཞུང་གིས་བོད་པའི་རིག་གཞུང་རྩ་མེད་གཏོང་བཞིན་ཡོད་སྟབས། སྐྱབས་བཅོལ་ནང་ཕེབས་མཁན་ང་ཚོ་མི་རེ་ངོ་རེར་བོད་པའི་རིག་གཞུང་མི་ཉམས་རྒྱུན་འཛིན་གཏོང་རྒྱུའི་འོས་འགན་ཡོད་པ་རེད། བོད་ཀྱི་དཔེ་མཛོད་ཁང་གི་རྩོམ་སྒྱུར་ཟབ་སྦྱོང་གི་ལས་རིམ་འདིའང་།བོད་ཀྱི་རིག་གནས་མི་ཉམས་རྒྱུན་འཛིན་གཏོང་བའི་ཆ་ཤས་གལ་ཆེན་པོ་གཅིག་ཆགས་བསྡད་ཡོད་པ་རེད།བོད་པའི་སྐད་ཡིག་ནང་མེད་པའི་རིག་གཞུང་མང་པོ་བོད་ཡིག་ནང་ཚུར་བསྒྱུར་བ་དང་། དེ་བཞིན། བོད་པའི་ཆོས་དང་རིག་གཞུང་སྐད་ཡིག་གཞན་པའི་ནང་ཕར་བསྒྱུར་བ་གང་ཡིན་ཡང་། སྤུས་དག་པོ་ཞིག་བསྒྱུར་ཐུབ་པ་བྱུང་ན་ཡག་པོ་འདུག་བསམ་ཏེ་ལོ་ལྟར་ཟབ་སྦྱོང་འདི་ཕུལ་བཞིན་ཡོད་པ་རེད། ད་ལྟའི་བར་སྔ་ཕྱིར་རྩོམ་སྒྱུར་ཟབ་སྦྱོང་འཛིན་གྲྭ་ཐེངས་ལྔ་བསྡུས་ཏེ་སློབ་ཕྲུག་༡༠༠ལྷག་ལ་ཟབ་སྦྱོང་གོ་སྐབས་ཕུལ་བ་རེད།ཟབ་སྦྱོང་ལ་ཞུགས་མཁན་སློབ་ཕྲུག་སྔོན་མ་དག་གིས་བརྗོད་པ་ལྟར་ན།ཟླ་གསུམ་རིང་ཟབ་སྦྱོང་ཕུལ་བ་འདིས་ཁོ་ཚོར་ཕན་ཐོགས་ཆེན་པོ་བྱུང་འདུག ད་ཐེངས་ཡིན་ནའང་ཟླ་གསུམ་རིང་གི་ཟབ་སྦྱོང་འདི་བརྒྱུད་ནས་རྩོམ་སྒྱུར་ཐད་སློབ་ཕྲུག་ཚང་མར་གདེང་ཚོད་གང་འཚམ་སླེབས་ཐུབ་པའི་རེ་བ་ཡོད།ཅེས་བརྗོད་སོང་།
དེ་རྗེས་སྐུ་མགྲོན་གཙོ་བོ་རང་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ཀྱིས་སྐད་ཡིག་སྲུང་སྐྱོབ་ཀྱི་གལ་ཆེའི་རང་བཞིན་སྐོར་ནས་བརྗོད་དོན། ཁྱེད་རང་ཚོས་གཞན་པའི་སྐད་ཡིག་ནང་ཕར་བསྒྱུར་བ་དང་། བོད་ཡིག་ནང་ཚུར་བསྒྱུར་གང་གནང་བ་ཡིན་ནའང་། ཐུག་ས་གཅིག་དེ་བོད་པའི་སྐད་ཡིག་ཆགས་བསྡད་ཡོད་པ་རེད།དེར་བརྟེན།བོད་པའི་སྐད་ཡིག་དང་འབྲེལ་བའི་གཞི་རིམ་གྱི་གནད་དོན་ཁ་ཤས་ཤིག་ཞུས་ན་བསམ་སོང་།བོད་མི་རིགས་ཀྱིས་སྤོབས་པ་བྱེད་རན་ཡོད་པ་མང་པོའི་ནང་ནས་གཅིག་ནི།ང་རང་ཚོར་མི་རིགས་གཞན་སུའང་ལའང་འགྲམ་ཆུ་ལྡིང་མི་དགོས་པའི་སྐད་ཡིག་ཅིག་ཡོད་པ་དེ་རེད།སྤྱིར་འཛམ་བུ་གླིང་འདིའི་སྒང་ལ་སྐད་ཡིག་ཧ་ཅང་མང་པོ་ཡོད་སྟབས། མི་རིགས་གཞན་ཞིག་གིས་བལྟ་དུས་ང་ཚོར་སྐད་ཡིག་འདི་འདྲ་ཞིག་ཡོད་པར་ཧ་ལས་རྒྱུ་གང་ཡང་མེད་པ་ཞིག་མཐོང་སྲིད་པ་རེད།ཡིན་ནའང་།སོ་སོའི་སྐད་ཡིག་གི་ཁྱད་ཆོས་དང་ཆེ་བ་ཤེས་པ་ཡིན་ན་རང་བཞིན་གྱིས་སྤྲོ་བ་ཞིག་འཕེལ་ཡོང་གི་རེད།སྐད་ཡིག་རིག་གནས་ཐད་ཀྱི་རིགས་གཅིག་ཆེད་མཁས་པ་སུས་བལྟས་ཀྱང་། སྒྲ་གདངས་དང་བརྡ་སྤྲོད་ཀྱི་འགྲོ་སྟངས།བྱ་བྱེད་དུས་གསུམ་གྱི་དབྱེ་བ་གང་ཅིའི་ཐད་ནས། ང་ཚོའི་སྐད་ཡིག་དེ་ཕྱུག་ཤོས་ཤིག་ཆགས་བསྡད་ཡོད་པ་རེད།དེང་སྐབས་ཐ་སྙད་གསར་བ་མང་པོ་དུས་ཐོག་ཚུར་བསྒྱུར་མ་ཐུབ་པའི་དཀའ་ངལ་ཅིག་འཕྲད་བཞིན་པ་དེ་ནི།ང་རང་ཚོས་འཐུས་ཤོར་རེད་མ་གཏོགས་སྐད་ཡིག་གི་སྐྱོན་གང་ཡང་མ་རེད།ཅེས་དང་། ཡང་ཁོང་གིས་བརྗོད་དོན། རིག་གཞུང་སྲུང་སྐྱོབ་བྱེད་དགོས་ན།སྐད་ཡིག་སྲུང་སྐྱོབ་བྱེད་དགོས་པ་རེད།ང་ཚོ་ཤེས་རིག་ལུས་ཁུངས་ཀྱི་ངོས་ནས་རྩ་དོན་གཉིས་བཤད་ཀྱིན་ཡོད།དང་པོ། བོད་པའི་སྐད་ཡིག་ནང་ཡོད་པའི་རིག་གཞུང་རྩ་ཆེན་པོ་རྣམས་མི་ཉམས་རྒྱུན་འཛིན་བྱེད་དགོས་པ་དེ་རེད། གལ་སྲིད་སྐད་ཡིག་མར་ཉམས་ཆག་ཏུ་གྱུར་པ་ཡིན་ན།མི་རབས་བརྗེ་འགྲོ་དུས་སྐད་ཡིག་དེའི་ནང་ཡོད་པའི་དོན་དག་རྣམས་མགོ་ཚོས་ཀྱི་མ་རེད།དེར་བརྟེན།སྔོན་གྱི་མེས་རྣམས་པའི་དུས་ནས་འཛིན་སྐྱོང་སྤེལ་གསུམ་གནང་བའི་པོ་ཏི་སྟོང་ཕྲག་མང་པོ་ཡོད་པ་དག་ཚང་མ་རྒྱུན་འཛིན་ཡོང་ཆེད་སྐད་ཡིག་སྲུང་སྐྱོབ་བྱེད་དགོས་རྒྱུ་གཙོ་བོ་ཆགས་ཡོད་པ་རེད།བརྗོད་བྱ་བརྗོད་བྱེད་གང་ཐད་ནས་བེད་སྤྱོད་མེད་པའི་རིགས་རང་བཞིན་གྱིས་ཡལ་འགྲོ་གི་རེད་མ་གཏོགས། གཞན་རྙིང་པ་རེད་ཟེར་ནས་གཡུག་རྐྱང་མི་བྱེད་པར་སྲུང་སྐྱོབ་བྱ་དགོས། ཡིན་ནའང་།སྔོན་མ་དེ་གཅིག་པུ་སྲུང་སྐྱོབ་བྱས་བསྡད་པ་ཡིན་ན་ཡང་འགྲིག་གི་ཡོད་པ་མ་རེད། རྩ་དོན་གཉིས་པ་ནི། འགྱུར་འགྲོས་ཟེར་བ་དེ་སུ་གང་ལའང་དམིགས་བསལ་ཡོད་པ་མ་རེད།ཚང་མ་མཉམ་དུ་འགྲོ་དགོས་ཀྱིན་ཡོད་སྟབས། འཛམ་བུ་གླིང་གི་སྒང་ལ་རིག་གནས་གསར་བ་མང་པོ་ཞིག་སླེབས་ཀྱིན་ཡོད་པ་རེད། དེ་དག་གི་བརྡ་དང་ཐ་སྙད་གསར་བ་རྣམས་བོད་པའི་སྐད་ཡིག་ནང་ཚུར་བླངས་ཏེ་སྣོན་པ་རྒྱག་མ་ཐུབ་པ་ཡིན་ན། ཉིན་གཅིག་བོད་པའི་སྐད་ཡིག་དེ་ད་ལྟའི་སཾ་སྐྲི་ཏའི་གནས་སྟངས་ཆགས་རྒྱུ་ཡིན་པ་མིག་མཐོང་ལག་ཟིན་རེད།བོད་པའི་སྐད་ཡིག་དེ་ག་དུས་ཡིན་ཡང་དགོས་མཁོ་དང་བེད་སྤྱོད་ཡོད་པ་ཞིག་ཏུ་གནས་ཐུབ་རྒྱུར། རྙིང་པ་མ་ཉམས་པ་དང་གསར་བ་དུས་ཐོག་སྣོན་པ་རྒྱག་ཐུབ་པ་ཞིག་དགོས་ཀྱི་ཡོད་པ་རེད། རྗེས་མ་སློབ་ཕྲུག་ཁྱེད་རྣམ་པ་ཚོས་རྩོམ་སྒྱུར་བྱེད་སྐབས་ཀྱང་དེ་གཉིས་ཀ་མ་ཚང་བ་ཡིན་ན་ཧ་ལམ་ཁག་པོ་རེད། ཅེས་བརྗོད་སོང་།
གཞན་ཡང་། སློབ་ཕྲུག་ཁག་ཅིག་ལ་དམིགས་ཡུལ་ག་འདྲ་ཞིག་ཁུར་ནས་ཟབ་སྦྱོང་འཛིན་གྲྭ་འདིར་ཞུགས་ཀྱི་ཡོད་མེད་དྲིས་སྐབས། སི་ཕན་རྒྱལ་ཁབ་ནས་ཡིན་པའི་ཧྥ་རེན་ལགས་ཀྱིས། ངས་དེ་སྔོན་ལོ་གཉིས་རིང་ལོ་ཙཱ་བ་རིན་ཆེན་བཟང་པོའི་སྐད་སྒྱུར་སློབ་གྲྭའི་ནང་བོད་ཀྱི་བརྡ་སྤྲོད་སུམ་རྟགས་ལ་སློབ་སྦྱོང་དང་། དེ་རྗེས་ལོ་གཉིས་རིང་གཙོ་བོ་ནང་ཆོས་ཀྱི་ཕྱོགས་ལ་སློབ་གཉེར་བྱས་པ་ཡིན། ཟབ་སྦྱོང་འཛིན་གྲྭ་འདིར་སྐད་སྒྱུར་གྱི་ཕྱོགས་ནས་ཉམས་མྱོང་མང་པོ་ཡོད་པའི་དགེ་རྒན་དང་། དེ་བཞིན་སྐད་སྒྱུར་གྱི་སྐོར་ནས་སློབ་ཕྲུག་མང་པོར་བསམ་ཚུལ་བརྗེ་རེས་གྱི་གོ་སྐབས་ཡོད་སྟབས། རང་ཉིད་ལ་ཉམས་མྱོང་དང་སློབ་སྦྱོང་མང་པོ་རག་གི་རེད་བསམ་ཏེ་འཛིན་གྲྭ་འདིར་ཞུགས་པ་ཡིན། ངའི་དམིགས་ཡུལ་ནི་མ་འོངས་པར་བོད་ཡིག་ཡག་པོ་ཞིག་ཤེས་རྗེས་བོད་པའི་ནང་ཆོས་ཀྱི་སྐོར་དབྱིན་ཡིག་དང་སི་ཕན་སྐད་ཡིག་ནང་སྒྱུར་ཐུབ་རྒྱུའི་རེ་བ་ཆེན་པོ་ཡོད། ཅེས་བརྗོད་སོང་། དེ་རྗེས། དགའ་ལྡན་ཤར་རྩེ་ནས་ཡིན་པའི་གྲྭ་བྱམས་པ་བློ་བཟང་ལགས་ཀྱིས་བརྗོད་རྒྱུར། ང་ལ་མཚོན་ན་དགའ་ལྡན་ཤར་རྩེ་གྲྭ་ཚང་གིས་དམིགས་བསལ་དཔེ་མཛོད་ཁང་ལ་བཏང་སྟེ། དབྱིན་ཡིག་དང་ལྷག་པར་དབྱིན་སྐད་ནང་གི་ནང་ཆོས་ཀྱི་ཚིག་རིས་ཐོག་ལ་སློབ་སྦྱོང་བྱེད་དུ་ཡོང་བ་ཡིན། དམིགས་ཡུལ་གཙོ་བོ་ནི་ནང་ཆོས་དེ་ཕྱིའི་རྒྱལ་ཁབ་ནང་སྤེལ་བ་ལ་སྐད་ཡིག་མེད་ན་ཡོང་ཐབས་མེད་པ་ཡིན་དུས། གྲྭ་ཚང་གི་མཁན་རིན་པོ་ཆེ་མཆོག་ནས་དམིགས་སུ་བཀར་ཏེ་ང་ཚོ་གྲྭ་བ་གསུམ་ལ་དབྱིན་ཡིག་སློབ་སྦྱོང་གི་གོ་སྐབས་སྤྲད་པ་རེད། འཛམ་བུ་གླིང་འདིའི་སྒང་ལ་ང་ཚོར་ངོམས་ཆོག་པ་ཞིག་ཡོད་པ་དེ་ནི་ནང་ཆོས་རེད། དེ་ལས་ལྷག་པ་གཞན་གང་ཡང་ཡོད་པ་མ་རེད། སྔོན་མ་ངའི་གྲོགས་པོ་ཁ་ཤས་ཟབ་སྦྱོང་འཛིན་གྲྭ་འདིར་ཞུགས་ཏེ་ཡར་རྒྱས་ཡག་པོ་ཕྱིན་འདུག མ་འོངས་པར་ཡང་འདི་འདྲའི་ཟབ་སྦྱོང་མང་པོ་འཛུགས་ཐུབ་རྒྱུར་རེ་བ་དང་སྨོན་ལམ་ཡོད། ཅེས་བརྗོད་སོང་། རྩོམ་སྒྱུར་ཟབ་སྦྱོང་འཛིན་གྲྭ་འདི་ནི་བོད་ཀྱི་དཔེ་མཛོད་ཁང་གི་གོ་སྒྲིག་འོག ཕྱི་ལོ་ ༢༠༠༦ ནས་མགོ་འཛུགས་གནང་སྟེ་ད་ལྟའི་བར་སྔ་ཕྱིར་ཐེངས་ ༥ ལ་ཚོགས་ཡོད་པ་དང་། མཐོ་སློབ་ཁག་གི་སློབ་ཕྲུག་གཙོས་དང་གྲྭ་བ། ལས་བྱེད་སོགས་མི་གྲངས་ ༡༠༠ ལྷག་ལ་རྩོམ་སྒྱུར་གྱི་ཟབ་སྦྱོང་གོ་སྐབས་ཕུལ་ཡོད་འདུག
གསར་འགོད་པ། ཚེ་རིང་རྒྱལ།
ང་ཚོས་དུས་དང་མཐུན་པར་གཏན་འབེབས་བྱས་པའི་རང་མི་རིགས་ཀྱི་བརྡ་ཆད་གསར་བ་དེ་དག་ཚིག་མཛོད་ཅིག་བཟོས་པས་གཏན་ནས་འགྲིག་ཏུ་མེད་པས། ངེས་པར་དུ་ཚིག་མཛོད་དེ་ཡང་སྤྱི་ཚོགས་ཀྱི་བཀོལ་སྤྱོད་ཁོར་ཡུག་དང་ཁ་ཐག་ཉེ་རུ་གཏོང་དགོས་པས། ཉེ་ཆར་ཤེས་རིག་ལས་ཁུངས་ནས་བཏོན་པའི་ཚིག་མཛོད་གསར་མ་དེ་དག་ཀྱང་སྤྱི་ཚོགས་སུ་རིན་མེད་དུ་འགྲེམས་སྤེལ་བྱེད་ན་ལག་ལེན་དུ་བསྟར་བའི་གོ་སྐབས་མང་པོ་ཞིག་འབྱུང་བའི་རེ་བ་ཆེ་བར་སྙམ།
ང་ནི། བོད་ཆོས་ཉམས་ལེན་པ་ས་ཡ་༡༣ཡས་མས་ཡོད་པ་ཚོས། བོད་ཀྱི་སྐད་ཡིག་འདི་བཞིན་སཾ་སྐྲི་ཏའི་གནས་སྟངས་ཆགས་ཉེན་ལས་སྐྱོབས་མི་ཐུབ་པ་མེད། འོན་ཀྱང་གཟབ་གཟབ་བྱས་ནས་དཀའ་ལས་རྒྱོབས་དགོས་འདུག
མགོ་བོ་སྒུར་ནས་ལག་པའི་མིག་ཆུ་ཕྱིས་ན་འདོད།
བཀུར་འོས་ཤེས་རིག་དྲུང་ཆེན་ཀརྨ་དགེ་ལེགས་ལགས།
ཤེས་རིག་ལས་ཁུངས་ཀྱིས་ཐ་སྙད་གསར་པའི་ཚིག་མཛོད་གཅིག་བཟོས་ཡོད་ཞེས་གསར་ལམ་ཁག་ཏུ་སྟོན་གནང་སོང་། ཡིན་ནའང་འཛམ་གླིང་རྒྱལ་ཁབ་སུམ་ཅུ་སུམ་གྲངས་ནང་དུ་ཁ་འཐོར་དུ་གནས་པའི་བོད་མི་ཚོའི་ལག་ཏུ་ག་དུས་རག་གི་རེད་དམ། དངོས་གནས་བྱས་ན་གྲྭ་བློ་བཟང་སྨོན་ལམ་གྱིས་ཚིག་མཛོད་ལྟར་ཀམ་པུང་དྲའི་རྒྱུད་ནས་བོད་མི་ཚང་མའི་བེད་སྤྱོད་གཏོང་ཐུབ་པ་ཞིག་བཟོས་ན་ག་འདྲ་ཡག་པོ།
ངོ་མ་ཁྱེད་ཚོ་ལ་ངོ་ཚ་ཡག་མི་འདུག ཁ་ནས་རིག་གཞུང་དང་སྐད་ཡིག་ཟེར་ཞོར་ཐ་སྙད་གསར་པའི་ཚིག་མཛོད་འདྲ་ཞིག་བཟོས་ཡོད་པ་དེ་ཡང་བོད་རྒྱ་ཆེ་མི་དམངས་སུ་རིོན་མེད་ཐོག་ནས་སྤྲོད་ཀྱི་མི་འདུག ཁ་མ་ཡིན་དོན་གྱི་བོད་ཀྱི་སྐད་ཡིག་བསམ་གྱི་ཡོད་ན་་ཨ་ཁུ་སྨོན་ལམ་ལྟར་ཀམ་པུང་དྲའི་རྒྱུད་ནས་བོད་མི་ཚང་མས་བེད་སྤྱོད་གཏོང་ཐུབ་པ་ཞིག་བཟོ་རོགས།
ཤེས་རིག་ལས་ཁུངས་ཀྱིས་བཟོས་པའི་ཐ་སྙད་གསར་པའི་ཚིག་མཛོད་དེ་ཙོང་བརྩི་ཡིན་པས། ཞབས་འདྲེན་རེད་ད། གྲྭ་སྨོན་ལམ་ལགས་ཀྱི་མདུན་དུ་ཡང་ངོ་ཚ་གི་མི་འདུག་གམ།
ཨ་མའི་བུ་དེ་ཡིས། ཁ་སྒོ་ལ་མིད་ཐག་འཕྲང་མེད་ལ། ཁ་ཚོད་མེད་ནང་གི་ཚིག་བདག་མེད་བཤད་ཀྱི་འདུག སྐུ་ངོ་འདིས་ད་ལྟ་བར་དུ་བཙན་བྱོལ་ནང་དུ་ས་སྙི་མོ་ལ་རྐང་པ་སྲ་མོ་བརྟེན་ནས་ལས་ཀ་བྱས་པ་ལ་ཡི་རང་མེད་ན། བསྙོན་འཛུགས་རྒྱུ་ནི་མ་འོས་པ་ཞིག་རེད། རང་ཉིད་ཀྱིས་ད་ལྟ་བར་དུ་སྤྱི་ཚོགས་ནང་དུ་ག་རེ་བྱས་དང་གང་ཞིག་སྒྲུབ་ཡོད་སྟོན་དང་། སྐུ་ངོས་ད་ལྟའི་དངོས་ཡོད་གནས་ཚུལ་དང་འདས་སོང་གི་ལོ་ཟླའི་ནང་ཕྱག་ལས་ཁྲོད་ཐོབ་པའི་མྱོང་བས་ལམ་སྟོན་གནང་བར་མི་དགའ་བ་ཅི་ཞིག་འདུག བཙན་བྱོལ་གྱི་སྤྱི་ཚོགས་དང་རང་ཉིད་ཀྱི་བྱས་པ་ཕྱིར་འདང་ཞིག་བརྒྱབ་སྟེ། ས་འཇམ་ས་དང་རྩྭ་ཆུ་བཟང་ས་བསྙེགས་པའི་སྐུ་ངོ་རྣམས་དང་མི་འདྲ་བ་ཤེས་ན་བཟང་། དྲིན་བྱས་དྲིན་དུ་མི་གོ་ན་དུད་འགྲོ་ལས་ཁྱད་ཅི།
ལེགས་བཤད་ལས། ཁ་བཤད་ཆུ་ཡི་ལྦུ་བ། ལག་ལེན་གསེར་གྱི་ཐིག་པ་ཞེས་པ་བཞིན་ལོ་མང་ཤེས་རིག་ལྷན་ཁང་གི་རྐུབ་སྟེགས་ཟིན་ཏེ་སྐད་ཆ་ཐབས་སྐྱོ་པོ་འདི་འདྲ་ཤིག་བཤད་འདུག དུས་ཡུན་རིང་པོ་འདིའི་བོད་མི་རིགས་ཀྱི་རིག་གཞུང་སྲུང་སྐྱོབས་ཆེད་དུ་ལས་ཀ་མ་བྱས་པར་ཐ་ན་བོད་མི་རིགས་ཀྱི་རིག་གཞུང་ཆེད་དུ་ལོ་མང་ཞབས་རྗེ་ཞུ་མྱོང་བའི་ལྷག་བསམ་ཅན་གྱི་བྱས་པ་ཅན་དེ་ཚོའི་རིགས་ཕྱིེར་འབུད་བཏང།
ཉིན་གཅིག་བོད་པའི་སྐད་ཡིག་དེ་ད་ལྟའི་སཾ་སྐྲི་ཏའི་གནས་སྟངས་ཆགས་རྒྱུ་ཡིན་པ་བཟོ་མཁན་གཡུ་ཐོག་རྐམ་དགེ་ལེགས་ལ་སོགས་པའི་སེང་ལྤགས་གྱོན་པའི་ལྦ་མོའི་ཁྱེད་ཚོའི་རིགས་དེ་རེད།
བོད་མི་རིགས་ཀྱི་རིག་གཞུང་ལ་དོ་སྣང་དང་ཆག་འཇིག་གི་གདོང་ལེན་ངོ་མ་དེ་བརྡ་དང་ཐ་སྙད་གསར་པ་འདི་ཚོ་གསལ་སྟོན་དང་གསར་གཏོད་གཞད་སྐད་ཀྱི་ལེགས་ཆ་རང་གི་སྐད་ཡིག་ཏུ་ཕབ་བསྒྱུར་དང་རང་གི་ལེགས་ཆ་གཞན་གྱི་སྐད་ཡིག་ཏུ་འགོད་ཐུབ་པ་ནི་ངེས་པར་དུ་དགོས་ངེས་པ་ཅན་དང་མེད་དུ་མི་རུང་བ་ཡིན་ཙང་ཟབ་སྦྱང་འདིའི་གོ་སྐབས་གནང་ཐུབ་པ་དགེ་འོས་སློབ་གྲོགས་ཚང་མ་ལ་སྙིང་ནས་རྗེས་སུ་ཡི་རང་ཡོད། ལྷག་པར་དུ་དེང་དུས་བོད་ཀྱི་དྲྭ་རྒྱ་ཁག་ལ་གཞན་པའི་རྒྱལ་ཁབ་ནང་གི་དྲྭ་རྒྱ་ནང་བཞིན་དུ་བོད་ཡིག་རང་གི་ཐོག་ནས་སྤྱི་སྒེར་ཡོངས་ཀྱི་བྱ་བ་གསལ་སྟོན་ཐུབ་པ་ཞིག་བཟོ་ཐུབ་ན་ཤིན་ཏུ་དགེ་མཚན་ཆེན་པོ་ལྡན་པས་དེ་ཚོའི་སྟེང་དུ་དགེ་སློབ་ཚང་མས་ཐུགས་ཁུར་ཟབ་བཞེས་གནང་ཐུབ་པའི་འབོད་བསྐུལ་ཡང་ཡང་ཞུ་གི་ཡོད།