ང་ཚོ་མི་རིགས་འདིའི་བླ་སྲོག་ཡུན་རིང་དུ་འཚོ་དགོས་ན། རང་ཉིད་ཀྱི་ཤ་ཁྲག་རུས་གསུམ་གྱི་གཏིང་ལ་ཐིམ་ཡོད་པའི་ཚོར་བ་རྡོག་རྡོག་འདི་སེམས་ལ་བཟུང་སྟེ། སྙན་ངག་གྱེར་འདོན་བྱ་རྒྱུ་དེ་གལ་ཆེན་པོ་རེད། བཙན་བྱོལ་གཞུང་ན་དུས་དེབ་ཚད་ལྡན་ཞིག་དང་། སྙན་ངག་པ་གསོ་སྐྱོང་བྱ་ས་ཞིག་མེད་པ་དེར་བློ་ཕམ་ཡོད་ཟེར།
ཁ་སང་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་ ༩ པའི་སྟེང་བོད་གཞུང་སྤྱི་ཐབ་ཚོགས་ཁང་དུ། འོད་དཀར་དྲ་ཚིགས་ཀྱི་སྐབས་དང་པོའི་བོད་ཀྱི་སྙན་ངག་སྒྲོག་སྦྱང་འགྲན་ཚོགས་ཀྱི་དྷ་ས་ཁུལ་གྱི་ཐོག་མའི་སྔོན་འགྲོའི་འགྲན་བསྡུར་གནང་ཡོད་པ་དང་། ཐེངས་འདིའི་སྙན་ངག་སྒྲོག་སྦྱང་འགྲན་བསྡུར་སྟེང་འགྲན་ཞུགས་པ་དང་ཟུར་ཉན་པ་བཅས་སྐྱ་སེར་མི་གྲངས་ ༢༠༠ ལྷག་མཉམ་ཞུགས་གནང་འདུག འགྲན་བསྡུར་དབུ་འཛུགས་ཀྱི་ཐོག་མར་ལས་འགུལ་གོ་སྒྲིག་གནང་མཁན་ཤིང་བཟའ་རིན་པོ་ཆེ་མཆོག་གིས་སྙན་ངག་སྒྲོག་སྦྱང་འགྲན་བསྡུར་གྱི་དམིགས་ཡུལ་དང་། དེ་བཞིན་ས་ཁུལ་སོ་སོ་ནས་འགྲན་ཞུགས་པ་བསྡུ་སྟངས་དང་དཔྱད་འདེམས་པ་གོ་སྒྲིག་གནང་ཕྱོགས་བཅས་ངོ་སྤྲོད་གནང་རྗེས། སྙན་ངག་སྒྲོག་སྦྱང་འགྲན་བསྡུར་དངོས་སུ་དབུ་འཛུགས་གནང་སོང་།
དྷ་ས་ཁུལ་གྱི་སྙན་ངག་སྒྲོག་སྦྱང་གི་སྔོན་འགྲོའི་འགྲན་བསྡུར་སྟེང་། དྷ་སྟེང་བོད་ཁྱིམ་སློབ་གྲྭ་དང་དྷ་ཤོད་བོད་ཁྱིམ་སློབ་གྲྭ། མེས་དབོན་གཙུག་ལག་དཔེ་སྟོན་སློབ་གྲྭ། ཤེས་རབ་དགའ་ཚལ་སློབ་གླིང་། ནོར་གླིང་མཐོ་སློབ། སྤྲིན་ཆེན་སློབ་གྲྭ་བཅས་ནས་སློབ་ཕྲུག་ ༥༡ དང་། དྷ་སའི་ཉེ་འདབས་ཁུལ་ནས་སྐྱ་སེར་གཞོན་སྐྱེས་ ༢༡ བཅས་བསྡོམས་པའི་མི་ ༧༢ འགྲན་ཞུགས་བྱས་ཡོད་པ་དང་། ཐེངས་འདིའི་འགྲན་བསྡུར་ཁྲོད་ཨང་དང་པོ་ཐོབ་མཁན་དཔེ་སྟོན་སློབ་གྲྭའི་སློབ་མ་བསྟན་འཛིན་ཆོས་སྐྱིད་དང་བསྟན་འཛིན་ཀུན་གྲོལ་གཉིས་ལ་བརྒྱ་ཆ་ ༨༨ ། ༢ དང་། ཨང་གཉིས་པ་ཐོབ་མཁན་ཤེས་རབ་དགའ་ཚལ་སློབ་གླིང་གི་སློབ་མ་ཤེས་རབ་ལ་བརྒྱ་ཆ་ ༨༧ ། ༣ ། ཨང་གསུམ་པ་ཐོབ་མཁན་ནོར་གླིང་སློབ་མཐོ་སློབ་ཀྱི་སློབ་མ་ཀླུ་མོ་འཚོ་ལ་བརྒྱ་ཆ་ ༨༣ ། ༧ བཅས་ཐོབ་ཡོད་པ་དང་། ཐེངས་འདིའི་འགྲན་བསྡུར་གྱི་དཔྱད་འདེམས་པ་ནི་ས་རཱ་མཐོ་སློབ་ཀྱི་དགེ་རྒན་གཙང་ཕྲུག་སྟོབས་དང་། སྙན་ངག་པ་བསྟན་འཛིན་བརྩོན་འགྲུས། སྙན་ངག་པ་ལྷ་ཆབ་སྦྱིན་པ་བཅས་རེད། དེ་བཞིན་འགྲན་ཞུགས་པ་རྣམས་ལ་བརྒྱ་ཆ་སྤྲོད་སྟངས་ནི་དཔྱད་འདེམས་པ་མི་རེར་བརྒྱ་ཆ་ ༢༥ རེ་ཕུལ་ཡོད་པ་དང་། མང་ཚོགས་ཁྲོད་ཀྱི་དཔྱད་འདེམས་པ་མི་ལྔ་ལ་བརྒྱ་ཆ་ ༥ རེ་བཅས་སྤྱིའི་ཐོབ་གྲངས་བརྒྱ་ཆ་ ༡༠༠ ཕུལ་འདུག འགྲན་ཞུགས་པ་རེ་རེ་ནས་སྙན་ངག་གྱེར་འདོན་ཚར་མ་ཐག་དཔྱད་འདེམས་པ་རྣམས་ཀྱིས་སྤྲད་པའི་སྐར་གྲངས་དུས་ཐོག་ཏུ་གསལ་བསྒྲགས་བྱས་ཤིང་། མཇུག་མཐར་འགྲན་ཞུགས་པ་ཡོངས་ཀྱིས་སྙན་ངག་གྱེར་འདོན་གནང་ཚར་བ་དང་གྱེར་འདོན་པ་སོ་སོར་ཐོབ་པའི་སྤྱིའི་བརྒྱ་ཆའི་ཐོབ་གྲངས་ཀྱི་མཐོ་དམའ་ལྟར། ཐེངས་རྗེས་མའི་དངོས་གཞིའི་འགྲན་བསྡུར་ཁྲོད་ཚུད་པའི་རྩེ་བཏོགས་ ༢༦ གྱི་འགྲན་ཞུགས་ཨང་རྟགས་དང་ཐོབ་སྐར་བཅས་སྤྱི་བསྒྲགས་གནང་སོང་།
དེ་བཞིན་དཔྱད་འདེམས་པ་གསུམ་གྱིས་འགྲན་བསྡུར་སྐབས་འགྲན་ཞུགས་པ་རྣམས་ལ་སོ་སོས་བརྒྱ་ཆ་སྤྲོད་ཕྱོགས་སྐོར་གསལ་བཤད་ཀྱང་གནང་སོང་། དཔྱད་འདེམས་པ་ལྷ་ཆབ་སྦྱིན་པ་ལགས་ཀྱིས། ད་ཐེངས་གྱེར་འདོན་པ་དག་གིས་བརྩམས་ཆོས་དེ་རང་ཉིད་ཀྱི་ཡིན་མིན་དང་། བརྩམས་ཆོས་ཀྱི་བརྗོད་བྱའི་ནང་དོན་ལ་ལྟ་ཡི་མེད། གྱེར་འདོན་འགྲན་བསྡུར་ཡིན་སྟབས་སྙན་ངག་གྱེར་འདོན་གྱི་རྣམ་པ་གཙོ་བོར་བཟུང་སྟེ་བརྒྱ་ཆ་སྤྲོད་ཀྱིན་ཡོད་ཟེར། དཔྱད་འདེམས་པ་གཙང་ཕྲུག་སྟོབས་ཀྱིས། གོ་སྒྲིག་ཚོགས་ཆུང་གི་ཆ་རྐྱེན་གཞིར་བཟུང་ཉམས་དང་འགྱུར་བ་མངོན་ཐུབ་ཀྱིན་ཡོད་མེད་དང་། དབྱངས་དང་འགྲོས་ཀྱི་གདངས་ཏག་ཏག་བསྡད་ཡོད་མེད་དེ་གལ་ཆེན་དུ་བཟུང་སྟེ་བརྒྱ་ཆ་སྤྲོད་བཞིན་ཡོད་ཟེར། དེ་བཞིན་དཔྱད་འདེམས་པ་བསྟན་འཛིན་བརྩོན་འགྲུས་ཀྱིས། གཙོ་བོ་གྱེར་འདོན་པ་སོ་སོའི་བྱེད་སྟངས་ལ་ལྟ་བཞིན་ཡོད། སྙན་ངག་ག་འདྲ་ཞིག་སྐྱོར་བ་ཡིན་ནའང་། སྙན་ངག་དེའི་ནང་དོན་དང་མཐུན་པའི་ཐོག་ནས་གདངས་དང་རྣམ་འགྱུར། ཚོར་བ་སྟོན་སྟངས་བཅས་གཙོ་བོར་བཟུང་སྟེ་བརྒྱ་ཆ་སྤྲོད་ཀྱིན་ཡོད། ཅེས་བརྗོད་སོང་།
གཞན་ཡང་། འགྲན་བསྡུར་མདོ་འཛིན་པས་སྙན་ངག་གྱེར་འདོན་སྟེང་མཉམ་ཞུགས་གནང་མཁན། སྤྱི་སྒེར་ཚོགས་པ་ཁག་གི་གནད་ཡོད་མི་སྣ་འགར་སོ་སོའི་མྱོང་ཚོར་དྲིས་སྐབས། བོད་ཀྱི་གཞོན་ལྷན་ཚོགས་གཞོན་དོན་འགྲུབ་ལྷ་དར་ལགས་ཀྱིས་བརྗོད་དོན། སྙན་ངག་གྱེར་འདོན་མཁན་དག་གི་ཉམས་འགྱུར་དང་། ལྷག་པར་དུ་རྩོམ་གྱི་བརྗོད་བྱར་བལྟས་ཡོང་དུས། དཔལ་དོན་གྲུབ་རྒྱལ་ལགས་ཀྱིས་དུས་རབས་ཉི་ཤུའི་ལོ་རབས་བརྒྱད་བཅུའི་གཞོན་སྐྱེས་མི་རབས་གསར་བ་ལ་བཅོལ་བའི་རེ་བ་དེ། མངོན་འགྱུར་གྱི་ལམ་ཁར་མདུན་བསྐྱོད་བྱེད་བཞིན་པའི་ཚོར་སྣང་ཤུགས་ཆེན་པོ་བྱུང་སོང་ཟེར། ཡང་། དབུས་འོས་བསྡུ་ལས་ཁུངས་ཀྱི་འགན་འཛིན་ལས་འཕར་གཡང་མཁོ་རྒྱལ་གྱིས་བརྗོད་དོན། དེ་རིང་གི་སྙན་ངག་འགྲན་བསྡུར་འདིར་བལྟས་འོང་དུས་སྙན་ངག་གྱེར་འདོན་པ་མང་ཆེ་བ་གསར་འབྱོར་ཡིན་པ་དང་། ང་ཚོ་བཙན་བྱོལ་སྤྱི་ཚོགས་ནང་འཚར་ལོངས་བྱུང་མཁན་མང་པོ་མེད་པའི་ཚོར་སྣང་ཞིག་བྱུང་སོང་། ཡིན་ནའང་། སློབ་གྲྭ་ཁག་ནས་སློབ་ཕྲུག་མང་པོ་ཞིག་མཉམ་ཞུགས་བྱས་འདུག་པ་འདིར་རྗེས་སུ་ཡི་རངས་ཡོད། ང་ཚོ་མི་རིགས་འདིའི་བླ་སྲོག་ཡུན་རིང་དུ་འཚོ་དགོས་ན། རང་ཉིད་ཀྱི་ཤ་ཁྲག་རུས་གསུམ་གྱི་གཏིང་ལ་ཐིམ་ཡོད་པའི་ཚོར་བ་རྡོག་རྡོག་འདི་སེམས་ལ་བཟུང་སྟེ། སྙན་ངག་གྱེར་འདོན་བྱ་རྒྱུ་དེ་གལ་ཆེན་པོ་རེད་བསམ། ང་ཚོ་བཙན་བྱོལ་གཞུང་ན་དུས་དེབ་ཚད་ལྡན་ཞིག་དང་། སྙན་ངག་པ་གསོ་སྐྱོང་བྱ་སའི་ས་གཞི་ཞིག་མེད་པ་དེར་བློ་ཕམ་ཡོད། མ་འོང་པར་མུ་མཐུད་ནས་སྙན་ངག་གྱེར་འདོན་དང་སྙན་ངག་རྩོམ་འབྲི་གང་ཅིའི་ཕྱོགས་ལ་ཤུགས་རྒྱག་རྒྱུར་རེ་སྐུལ་ཞུ་རྒྱུ་ཡིན། ཅེས་བརྗོད་སོང་ལ། དེ་བཞིན་བོད་ཀྱི་དུས་བབ་གསར་ཁང་གི་རྩོམ་སྒྲིག་པ་དོན་འགྲུབ་བཀྲ་ཤིས་ཀྱིས། སྙན་ངག་གྱེར་འདོན་འགྲན་བསྡུར་སྐབས་གར་སྟེགས་ཇུས་འགོད་བྱེད་སྟངས་དང་། དེ་བཞིན་ཁ་ཤགས་སྒྱུ་རྩལ་པ་མགོ་ལོག་རྡ་བྷེ་ཡིས་དཔྱད་འདེམས་པའི་བརྒྱ་ཆ་སྤྲོད་སྟངས་ཐད་ནས་རང་ཉིད་ཀྱི་བསམ་ཚུལ་བཅས་བརྗོད་སོང་།
མཇུག་མཐར། སྙན་ངག་སྒྲོག་སྦྱང་འགྲན་བསྡུར་གོ་སྒྲིག་གནང་མཁན་ཤིང་བཟའ་རིན་པོ་ཆེ་མཆོག་གིས། ཐེངས་རྗེས་དངོས་གཞིའི་འགྲན་བསྡུར་དང་མཐའ་མའི་རྟིང་རྩོད་འགྲན་བསྡུར་གོ་སྒྲིག་གནང་སྟངས་སྐོར་ལ། ཉེ་སྔོན་ལྷོ་ཕྱོགས་མོན་གྷོ་དང་སྦེལ་ཀོབ་ས་གནས་གཉིས་སུ་སྔོན་འགྲོའི་འགྲན་བསྡུར་གནང་ཟིན་ཏེ། ཐེངས་རྗེས་མའི་འགྲན་བསྡུར་ཁྲོད་མི་ ༡༨ བདམས་ཐོན་བྱུང་ཡོད། དེ་རིང་ངྷ་ས་ཁུལ་ནས་མི་ ༢༦ བདམས་ཐོན་བྱུང་ཡོད་པ་རེད། ད་ལྟ་སྔོན་འགྲོའི་འགྲན་བསྡུར་མ་སོང་བར་ལྷག་བསྡད་ཡོད་པ་དེ་ས་རཱ་མཐོ་སློབ་དང་། སུ་ཇ་བོད་ཁྱིམ། ཝ་ར་ན་སི་མཐོ་སློབ། མ་སི་རུ་བུ་ཁྱིམ་སློབ་གྲྭ་བཅས་ཡོད་པ་རེད། དེ་དག་ཚང་མར་སྔོན་འགྲོའི་འགྲན་བསྡུར་བྱས་ཚར་རྗེས། ཡང་བསྐྱར་ལྷོ་ཕྱོགས་ནས་མགོ་བཙུགས་ཏེ་ས་གནས་སོ་སོར་དངོས་གཞིའི་འགྲན་བསྡུར་གནང་སྟེ། རྟིང་རྩོད་འགྲན་བསྡུར་ཁྲོད་བདམས་ཐོན་བྱུང་མཁན་རྣམས་དྷ་རམ་སར་སླེབས་ཡོང་གི་རེད། ཐེངས་རྗེས་མའི་བརྒྱ་ཆ་སྤྲོད་སྟངས་ཀྱི་ཐད་ནས་ཀྱང་དེ་རིང་དང་ཏོག་ཙམ་འདྲ་བ་མ་རེད། དཔྱད་འདེམ་པ་གཙོ་བོ་གསུམ་གྱིས་ཉམས་འགྱུར་གྱི་སྒང་ལ་བརྒྱ་ཆ་ ༡༠ དང་། སྐད་ངག་གི་སྒང་ལ་བརྒྱ་ཆ་ ༡༠ དང་། སྙན་ངག་སོ་སོའི་བརྩམས་པ་ཡིན་ན་བརྒྱ་ཆ་ ༥ ནས་སྙན་ངག་གི་བརྗོད་བྱར་གཞིགས་ཏེ་བརྒྱ་ཆ་སྤྲོད་ཀྱི་ཡོད་པ་རེད། དེ་མིན། སྙན་ངག་གྱེར་འདོན་པའི་ངོས་ནས་ཀྱང་སྙན་ངག་དེ་སོ་སོའི་བློ་ལ་སྐྱོར་དགོས་ཀྱི་ཡོད་པ་རེད། ཐེངས་རྗེས་མའི་འགྲན་བསྡུར་ག་དུས་འཚོགས་མིན་དེ་གློག་འཕྲིན་དང་ཁ་པར་བརྒྱུད་བདམས་ཐོན་འགྲན་ཞུགས་པ་ཡོངས་ལ་འབྲེལ་བ་གནང་གི་རེད། དེ་བཞིན་དུས་ཐོག་ཏུ་སྤྱི་ཚོགས་ནང་གསལ་བསྒྲགས་ཀྱང་གནང་གི་རེད། མཐའ་མའི་རྟིང་རྩོད་འགྲན་བསྡུར་ནང་འགྲན་ཞུགས་མཁན་ ༢༠ ནས་ ༣༠ བར་ལ་རྩིས་རྒྱག་གི་ཡོད། དེ་བཞིན་སྔོན་འགྲོ་དང་དངོས་གཞི། མཐའ་མའི་རྟིང་རྩོད་བཅས་ཀྱི་དཔྱད་འདེམ་པ་གཅིག་ཁོ་ན་མ་ཡིན་པར་དུས་ཐོག་ལ་བརྗེ་བོ་རྒྱག་གི་ཡོད། མཐའ་མའི་རྟིང་རྩོད་འགྲན་བསྡུར་དེ་འཆར་གཞི་རྒྱ་ཆེན་པོ་ཞིག་བང་རིམ་བྱས་ཏེ་འགྲོ་རྒྱུ་ཡིན། དེ་འདྲའི་དཀའ་ལས་མང་པོ་ཞིག་རྒྱག་དགོས་དོན་ནི་སྤུས་དག་པོ་ཞིག་ཡོང་ཐུབ་ཆེད་ཡིན། ཁྱེད་འགྲན་ཞུགས་པ་རྣམ་པ་ཚོའི་ངོས་ནས་ཀྱང་ཆུ་ཚོད་གཏོང་བ་དང་དཀའ་ལས་རྒྱག་རྒྱུར་མ་འཛེམས་པར་ཕེབས་གནོངས་ཞུ་རྒྱུ་ཡིན། དེ་རིང་འདིར་ཐེངས་རྗེས་མའི་འགྲན་བསྡུར་ཁྲོད་ཡར་ཚུད་མ་ཐུབ་པ་རྣམས་ལ་བསམ་འཆར་མེད་པ་ཞུ། དཔྱད་འདེམས་པ་རྣམ་པས་ལྷག་བསམ་རྣམ་དག་གིས་བརྒྱ་ཆ་སྤྲད་ཡོད་པ་རེད། ནམ་རྒྱུན་སོ་སོའི་སྙན་ངག་ཡག་པོ་སྐྱོར་གྱི་ཡོད་ནའང་། མཚམས་རེར་གར་སྟེགས་སྟེང་སླེབས་དུས་འཚུབ་ཆ་ལངས་ཏེ་ཡག་པོ་མ་བྱུང་བ་དེ་འདྲ་ཡོང་སྲིད་པ་རེད། ཡིན་ནའང་། ཁྱེད་རང་ཚོ་འདིར་བསླེབས་པ་ཙམ་གྱིས་ང་ཚོ་གོ་སྒྲིག་པ་ཚོའི་ངོས་ནང་ཧ་ཅང་དགའ་བོ་བྱུང་། ཁྱེད་ཅག་གིས་རྒྱབ་སྐྱོར་ཆེན་པོ་གནང་བ་འདིས་ང་ཚོར་སྔར་མེད་ཀྱི་སྤོབས་པ་ཞིག་སྐྱེད་འོང་གི་འདུག ཁྱེད་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད། ཅེས་གསུངས་སོང་།
འོད་དཀར་དྲ་ཚིགས་ཀྱི་སྐབས་དང་པོའི་བོད་ཀྱི་སྙན་ངག་སྒྲོག་སྦྱང་འགྲན་ཚོགས་དེ་ནི། བཙན་བྱོལ་སྤྱི་ཚོགས་ནང་ཁྱབ་ཆེ་བའི་སྙན་ངག་སྒྲོག་སྦྱང་འགྲན་བསྡུར་ཐོག་མ་དེ་ཆགས་ཡོད་པ་དང་། འགྲན་བསྡུར་སྐབས་སྔོན་འགྲོ་དང་དངོས་གཞི། མཐའ་མའི་རྟིང་རྩོད་བཅས་འགྲན་བསྡུར་རིམ་པ་གསུམ་བརྒྱུད་བཞིན་ཡོད་འདུག
གསར་འགོད་པ། ཚེ་རིང་རྒྱལ།
ཧ་ཅང་བསྔགས་འོས་པའི་ལས་གཞི་འདིར་རྒྱབ་སྐོྱར་ཚད་མེད་ཡོད།།
རླུང་རྟ་རྒྱལ་ཁྱོད། ཁ་སྡིག་མང་པོ་བསགས་ཚར་སོང་། ད་དུང་ཁ་སྡིག་མང་པོ་མ་བསགས་ན་ལེགས་པ་མི་འདུག་གམ། ལགས།
ཚང་མའི་ཤེས་གསལ་ལྟར།རྒྱ་གུང་ཁྲན་དམར་དམག་དང་གདོང་ཐུག་དུས་སེ་འབྲས་དགེ་གསུམ་སོགས་མགོ་བོ་སྐྱ་ཐེར་དུ་གྱུར་ཡོད་པ་བཙུན་པ་དག་གིས་དབང་རྩོད་འཕྲོག་རེས་དང་ནང་དམེའི་ལས་ཁོ་ན་བྱས་པས།བོད་ལ་རང་སྐྱོང་ལྡན་ཞིང་དགྲ་ནག་པོ་གདོང་བསུ་བའི་དམག་ཤུགས་ཉམས་དམས་སུ་གྱུར་པ་མ་ཡིན་ནམ།
དེས་མ་ཟད།བོད་བཙན་པོའི་དུས་སྐབས་ནས་བཟུང་བོད་རྒྱལ་རབས་རྩ་འཐོར་དུ་གཏོང་པའི་རྐྱེན་གཙོ་བོི་ཡང་དགེ་འདུན་པ་རྣམས་ཆོས་ལ་མི་ཕྱོགས་པར་གདོན་གྱིས་བརླན་ནས་མིག་ལ་དབང་ཐང་དང་།རྒྱུ་ནོར།ཆགས་སྲེད་མ་གཏོགས་མཐོང་བ་མེད་དོ།
འགྲན་བསྡུར་མེད་ན་ཡར་ཐོན་མེད་ཅེས་པའི་དཔེ་ལྟར་འདི་ལྟ་བུའི་ལྡིང་ཆ་ཞིག་བསྐྲུན་པར་སྙིང་ནས་དགའ་བསུ་དང་། མ་འོངས་པར་ཡང་འདི་དང་འདི་ལྟ་བུའི་ལྡིང་ཆ་གང་མང་ཞིག་བསྐྲུན་གནང་ཡོང་བའི་རེ་བ་ཡོད།
རླུང་རྟ་རྒྱལ་ལགས། ངུར་སྨིག་འཛིན་པོ་རྣམས་ད་ལྟའི་བར་རང་གི་རྐང་པའི་ཐོག་ལོངས་སྡོད་འདུག འདུན་སྡེ་གང་ཞིག་ཡིན་་རུང་ད་ལྟའི་བར་རང་འགན་ལེན་ཏེ་ནང་དོན་རིགས་གནས་འཛིན་སྐྱོ་སྤེལ་གསུམ་གྱི་སྙན་གྲགས་བོད་ལ་ཁྱབ་ཡོད་པ་རེད།
ཐེངས་འདིར་སློབ་ཆུང་གི་སློབ་མ་ནས་སྤྱི་ཚོགས་ཐོག་གི་དར་མའི་བར་གྱི་སྐྱ་སེར་ཕོ་མོ་དུ་མ་ཞིག་འགྲན་སྡུར་ལ་ཞུགས་པ་འདི་ཡག་རྟགས་ཤིག་རེད། གོ་སྒྲིག་ཞུ་མཁན་རྣམ་པས་ཀྱང་ཉམས་མྱོང་གསོག་ཞོར་གོ་སྒྲིག་དང་སྟངས་འཛིན་གང་ལེགས་ཡོང་ཐུབ་ན་རྗེས་ཕྱོགས་མུ་མཐུད་ཕྱག་ལས་རྒྱུན་འཁྱོངས་ཡོང་བར་ཕན་ཐོགས་ཆེ།
བདག་གི་བསམ་ཚུལ་ལ། སྤྱིར་ཡིན་ན་སྙན་ངག་གྱེར་འདོན་དང་ལྷག་པར་གྱེར་འགྲན་འདི་སྙན་ངག་པའི་རིག་རྩལ་འཁྲབ་སྟོན་ཞིག་ཡིན་པར་འདོད། དེ་བཞིན་སྙན་ངག་གི་སྒྱུ་རྩལ་རང་བཞིན་དང་བསམ་བློའི་རང་བཞིན་ཡང་གལ་ཆེར་འཛིན་འོས། དཔེར་ན་མཛེས་མ་འགྲན་སྡུར་ལ་མཚོན་ན་ཡང་ཕྱི་སྐྱེ་ལུས་གཅིག་པུ་མིན་པ་བཞིན་སྙན་ངག་གྱེར་འདོན་ལ་མཚོན་ན་ཡང་ལུས་ངག་གི་ཉམས་འགྱུར་ཁོ་ན་གཙོ་བོར་བཟུང་ན་མི་འོས། ལྷག་པར་སྙན་ངག་དང་སྙན་ངག་པའི་རིན་ཐང་གི་ངོས་ནས་བལྟས་ན་མི་འོས། དེ་བས་རྟིང་རྩོད་འགྲན་སྡུར་སྐབས་སུ། གཅིག་ནས་སྙན་ངག་གི་བསམ་བློ་དང་སྒྱུ་རྩལ་རང་བཞིན་དང། གཉིས་ནས་ལུས་ངག་གི་སྒྱུ་རྩལ་གཉིས་གལ་གནད་ལ་བཟུང་ནས་དཔྱད་འདེམས་གནང་ན་ལེགས་ཤིང། དཔྱད་འདེམས་པའང་ཉུང་མཐར་མི་ལྔ་ཡོད་ན་བཟང།
ཞོར་དུ། གསལ་བཤད་གཞན་ཞིག་ཞུ་རྒྱུར། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་གོ་སྒྲིག་འོག འཁྲུངས་སྐར་ཉིན་མོར། ཡིད་བཞིན་ནོར་བུ་དང་འཛམ་གླིང་མི་དམངས་ཟེར་བའི་སྙན་དངགས་གྱེར་འདོན་གྱི་དགོང་ཚོགས་ཤིག་གཙུག་ལག་ཁང་དུ་འཛོམས་རྒྱུའི་གསལ་བརྡ་བྱས་ཀྱང་དེ་ནུབ་བོད་ཀྱི་ཟློས་གར་ཁང་དུ་ཡང་གླུ་གར་གྱི་དགོང་ཚོགས་ཤིག་འདུག་པས་ང་ཚོའི་དུས་ཚོད་གཅིག་ལ་མི་འཁེལ་བའི་ཆེད་དུ། དེ་ཉིན་ཕྱི་དྲོའི་ཆུ་ཚོད་བཞི་བ་ནས་དྲུག་པ་བར་ལ་མེག་ལོ་གན་ཇིའི་ཉིན་མོའི་སློབ་གྲྭ་རུ་འཛོམས་རྒྱུའི་འགྱུར་བ་བཏང་ཡོད་ན་དེ་དོན་དགོངས་འཇགས་འཚལ།
ཐེངས་འདིར་རང་རྩོམ་དང་གཞན་རྩོམ་ལ་ཁྱད་པར་མེད་ཅིང། སྐད་ཡིག་གང་ཡིན་ལ་ཡང་ཁྱད་པར་མེད། འདི་ནི་དང་བླང་རང་དབང་གི་སྙན་དངགས་གྱེར་འདོན་འདུ་འཛོམས་ཤིག་ཡིན་པས་གདན་ཞུའི་སྐུ་མགྲོན་སུ་ཡང་མེད་ལ། དམིགས་བསལ་མཛད་རིམ་ཡང་མེད། དེ་བས་གླུ་གར་སྒྱུ་རྩལ་པ་དང། ལྷག་པར་སྙན་ངག་པ་དང་སྙན་ངག་ལ་དོ་སྣང་དང་དགའ་བོ་ཡོད་པའི་སྤུན་ཟླ་གང་མང་མཉམ་ཞུགས་ཡོང་པའི་རེ་བ་ཞུ།
བཙན་བྱོལ་སྤྱི་ཚོགས་ནང་བོད་ནང་ཁུལ་ལྟར་གསར་རྩོམ་དང་སྙན་ངག་གི་དྲི་ངད་ཙམ་ཡང་དབེན་པ་དང་།དུས་ད་ལྟའི་བར་དུ་གསར་རྩོམ་ལ་ཕྱོགས་པའི་ན་གཞོན་དང་མི་རབས་གསར་པ་བསྐྱེད་སྲིང་བྱས་ནས་བཙན་བྱོལ་ཁྲོད་རྩོམ་རིག་གསར་པའི་སྟོང་ཆ་སྐོང་མ་ཐུབ་པ་དེ་ནི་དངོས་གནས་ངོ་ཚ་ཞིག་རེད་ལགས།ནང་པའི་བསྟན་པ་ལ་འཇུག་མཁན་ངུར་སྨྲིག་འཛིན་པ་མོད་པོ་ཡོད་ཀྱང་།ཐམས་ཅད་སྒེར་གྱི་ཁེ་དབང་དང་རྒྱུ་ནོར་སོགས་ཀྱིས་བསླུས་ནས་བོད་མིའི་རྐང་ཡང་པོ་འཛུགས་ཐུབ་རྒྱུ་ཕར་ཞོགཐ་ན་ཁོ་ཚོའི་ཁ་རྒྱབ་གཉིས་ཀྱང་གྲོང་མིའི་མཆོད་འབུལ་དང་གཞན་པའི་ཞལ་འདེབས་སོགས་ལ་བརྟེན་དགོས།