ཕ་ཡུལ་བཞག་སྟེ་གནས་ངེས་མེད་དུ་འགྲོ་རྒྱུར་སེམས་འཚབ་ཡོད།

“ལོ་འགའི་རྗེས་ནས། ང་ཚོས་གཅན་ཚའི་རྨ་འགྲམ་གྱི་ས་ཆ་ཡག་ཤོས་དེ་བཞག་སྟེ། ནཱ་གོར་མོའི་བན་ཆེན་ཞིང་བདེ་ཟེར་བའི་མི་མེད་ལུང་སྟོང་གི་ས་ཁུལ་དེར་འགྲོ་དགོས་པ་རེད།” ཟེར།

ངྷ་སར་གནས་སྡོད་སྐུ་ཞབས་རིན་ཆེན་དོན་གྲུབ་ལགས་ཀྱིས། ཉེ་ཆར་ཕ་ཡུལ་ལ་ཁ་པར་བཏང་སྟེ་གནས་ཚུལ་ཤེས་རྟོགས་བྱུང་བ་ལྟར་ན། ལོ་ཤས་གོང་ནས་རྒྱ་གཞུང་གིས་གཅན་ཚ་རྫོང་དང་ཐག་མི་རིང་བའི་སར་ཆུ་མཛོད་གསར་རྒྱག་གི་ལས་གཞི་ཞིག་སྤེལ་རྒྱུར་ཁ་གཡར་ཏེ། རྨ་ཆུའི་ཉེ་འདབས་སུ་ཡོད་པའི་བོད་རིགས་ཁྱིམ་ཚང་ ༥༠༠ ཙམ་བཙན་ཚུགས་ཀྱིས་རྫོང་དེའི་ “ཤ་བཟང་ཐང་ ” ཟེར་བའི་ལུང་ཁུག་ཅིག་ཏུ་གནས་སྤོར་བྱེད་དུ་བཅུག་ཡོད་པར་མ་ཟད། མ་འོངས་པའི་ལྔའི་ནང་རྫོང་དེའི་སྣང་རའི་གྲོང་བརྒྱད་གཙོས་པའི་བོད་རིགས་གྲོང་སྡེ་བདུན་གྱི་ཁྱིམ་ཚང་ ༣༠༠ ལྷག་བསྐྱར་དུ་ནཱ་གོར་མོའི་མཐའ་མཚམས་ས་ཁུལ་ཞིག་ཏུ་གནས་སྤོ་བྱེད་དུ་འཇུག་རྒྱུ་ཡིན་འདུག  

ཟླ་འདིའི་ཕྱི་ཚེས་ ༦ ཉིན་གྱི་ཞོགས་པའི་ཆུ་ཚོད་ ༡༠ པའི་སྟེང་། ཕ་ཡུལ་མདོ་སྨད་གཙན་ཚ་ནས་ཡིན་ཞིང་། ད་ལྟ་ངྷ་སར་གནས་སྡོད་བྱེད་བཞིན་པའི་བོད་ཀྱི་ཆབ་སྲིད་བཙོན་ཟུར་སྐུ་ཞབས་རིན་ཆེན་དོན་གྲུབ་ལགས་ཀྱིས། ཉེ་ཆར་བོིད་ལ་ཁ་པར་བཏང་སྟེ་གནས་ཚུལ་ཤེས་རྟོགས་བྱུང་བ་རྣམས་འདི་ག་གསར་ཁང་ལ་ངོ་སྤྲོད་བྱས་པ་ལྟར་ན། རྒྱ་གཞུང་གིས་བོད་ཀྱི་ས་ཁུལ་ཁག་ཏུ་ཆུ་མཛོད་གསར་ཁང་གི་ལས་གཞི་འདྲ་མིན་སྤེལ་བཞིན་པ་དེས། བོད་རིགས་མང་ཚོགས་ཀྱི་དཔལ་འབྱོར་དང་འཚོ་བའི་གནས་སྟངས་ཐོག་གནོད་སྐྱོན་ཆེན་པོ་བཟོས་ཡོད་པ་དང་། ལྷག་པར་དུ། རྒྱ་གཞུང་གིས་ལོ་ཤས་གོང་ནས་མཚོ་སྔོན་གཙན་ཚ་རྫོང་གི་ཉེ་འདབས་སུ་ཡོད་པའི་ “ ཤ་བོ་འགག་ ” ཏུ་ཆུ་མཛོད་གསར་རྒྱག་གི་ལས་གཞི་ཆེན་པོ་ཞིག་སྤེལ་བའི་རྐྱེན་གྱིས། རྨ་ཆུའི་ཉེ་འགྲམ་དུ་གཞིས་ཆགས་པའི་གཅན་ཚའི་བོད་རིགས་ཞིང་པའི་གྲོང་སྡེ་བདུན་ཙམ་གྱི་ཁྱིམ་ཚང་ ༥༠༠ ཙམ། རྫོང་མཐའ་མཚམས་ཀྱི་ཤ་བཟང་ཐང་ཟེར་བའི་ལུང་ཁུག་ཅིག་ཏུ་གནས་སྤོར་བྱེད་དུ་བཅུག་ཡོད་ལ། མ་འོངས་པའི་ལོ་འགའི་ནང་ད་དུང་ཁྱིམ་ཚང་ ༣༠༠ ལྷག་ནཱ་གོར་མོའི་མཐའ་མཚམས་ས་ཁུལ་གྱི་དམག་སྒར་ཞིག་ཏུ་གནས་སྤོ་བྱ་དགོས་ཀྱི་ཡོད་པ་རེད། ས་ཞིང་ཁོ་ནར་བརྟེན་ནས་འཚོ་བ་སྐྱེལ་བཞིན་པའི་གཙན་ཚའི་མི་དམངས་ལ་མཚོན་ན། ས་ཞིང་ནི་འཚོ་བའི་རྟེན་གཞི་གལ་ཆེན་ཞིག་དང་རྒྱུ་ནོར་ཡོངས་ཁུངས་གཙོ་བོ་ཞིག་ཆགས་ཡོད་སྟབས། འདི་ལྟར་ཁྱིམ་ཚང་མང་པོ་ཞིག་དུས་གཅིག་ལ་མི་འདོད་བཞིན་ས་གནས་གཞན་ལ་གནས་སྤོར་དུ་བཅུག་པ་འདིས། ས་གནས་མང་ཚོགས་ཀྱི་སེམས་ལ་རང་བཞིན་གྱིས་དངངས་སྐྲག་ཅིག་བསླེབ་ཡོང་གི་ཡོད་འདུག  

སྐུ་ཞབས་རིན་ཆེན་དོན་གྲུབ་ལགས་ཀྱིས། གཅན་ཚ་ས་ཁུལ་གྱི་གནམ་གཤིས་དྲོད་གྲང་སྙོམ་པོའི་ཡིན་པའི་ཆེ་བ་བརྗོད་བཞིན་རྒྱ་ནག་སྲིད་བྱུས་ཀྱི་དམིགས་ཡུལ་སྐོར་ངོ་སྤྲོད་གནང་བ་ལྟར་ན། “རྒྱ་གཞུང་གིས་ཤ་བོ་འགག་ཆུ་མཛོད་གསར་རྒྱག་ལ་ཁ་གཡར་ཏེ། ༢༠༠༦ ལོར་རྨ་ཆུའི་ཉེ་འགྲམ་དུ་ཡོད་པའི་མགུར་དང་འབར་རྩ། རྟ་ར་ཁ། སོ་རྡེའུ། སྣང་ར་ཞང་ཁོངས་ཀྱི་གྲོང་སྡེ་ཁག་བཞིའི་བོད་རིགས་ཁྱིམ་ཚང་ ༥༠༠ ལྷག་མཚོ་དྲུག་ཞང་ཁོངས་ཀྱི་ཤ་བཟང་ཐང་དུ་གནས་སྤོར་བྱེད་དུ་བཅུག་པ་རེད། ས་ཆ་དེར་ས་དོང་དང་བྱེ་རྡོ་མང་བ། འཐུང་ཆུ་དཀོན་པ། ཞིང་ཁར་ལོ་ཏོག་མི་སྨིོན་པ་བཅས་ཀྱིས་བོད་མི་ཚོར་དཀའ་ངལ་ཆེན་པོ་ཞིག་འཕྲད་ཀྱི་འདུག” ཅེས་དང་།

བོད་མི་གནས་སྤོ་བྱས་པའི་སྲིད་བྱུས་དེའི་ཐོག་ནས་གཙན་ཚ་ས་ཁུལ་དུ་ལྐོག་ཟ་རུལ་སུངས་གི་གནས་སྟངས་དང་འབྲེལ་ནས་བོད་རིགས་ཁྱིམ་ཚང་ནང་ཁུལ་ལ་རྩོད་རྙོག་ཆེ་རུ་འགྲོ་བཞིན་པའི་ཐད་ལ། “ ང་ཚོ་གནས་སྤོ་བྱེད་མཁན་ཁྱིམ་ཚང་རེར་ཆ་སྙོམས་ས་ཞིང་མུའུ་ ༥ རེ་ཡོད་ནའང་། རྒྱ་ནག་མགོ་ཁྲིད་ཚོས་ལྐོག་ཟ་བྱས་ཏེ་ས་རིན་ཕྱེད་ཀ་ལས་སྤྲོད་ཀྱི་མེད་པ་དང་། ཡང་གྲོང་སྡེ་ཁ་ཤས་སུ་ཁྱིམ་ཚང་ཚང་མ་གནས་སྤོ་བྱེད་དགོས་མིན་གྱི་གནས་སྟངས་ཐོག་གཞུང་གི་ལས་བྱེད་ཚོས་ལས་ཀ་ཏག་ཏག་མ་བྱས་སྟབས། སྡེ་མི་ཚོས་ང་ཚོ་སྤོར་རྒྱུ་མིན། ཁོང་ཚོ་སྤོར་རྒྱུ་མིན་ཟེར་ནས་ཁྱིམ་མཚེས་བར་དཀའ་ངལ་འཕྲད་ཀྱི་འདུག་ ” བརྗོད་བྱུང་།

མ་འོངས་པའི་ལོ་ཤས་ནང་གཅན་ཚ་རྫོང་རྨ་ཆུའི་འགྲམ་རྒྱུད་དུ་ཆགས་པའི་མར་ཁུ་ཐང་དང་འབར་རྩ། མགུར། དེ་མིན་སྣང་རའི་གྲོང་བརྒྱད་ཁོངས་ཀྱི་གྲོང་སྡེ་ཁག་བདུན་གྱི་བོད་རིགས་ཁྱིམ་ཚང་རྣམས་ནཱ་གོར་མོའི་ཕྱོགས་སུ་གནས་སྤོ་བྱ་དགོས་ཀྱི་འདུག་ལ། རིན་ཆེན་ལགས་ཀྱིས་རྒྱ་གཞུང་གིས་གཅན་ཚའི་བོད་རིགས་རྣམས་ས་ཆ་ཁུག་ཀྱོག་ཅིག་ལ་བཙན་གྱིས་རྒྱུ་མ་ཕུད་འདེད་བྱས་པ་དེ། ས་གཤིས་ལེགས་པའི་གཅན་ཚའི་ཡུལ་དེར་རྒྱ་མི་མང་པོ་གནས་སྤོར་བྱ་རྒྱུའི་ངན་བྱུས་ཡོད་སྐོར་སོགས་བརྗོད་བཞིན། “ལོ་འགའི་རྗེས་ནས། ང་ཚོས་གཅན་ཚའི་རྨ་འགྲམ་གྱི་ས་ཆ་ཡག་ཤོས་དེ་བཞག་སྟེ། ནཱ་གོར་མོའི་བན་ཆེན་ཞིང་བདེ་ཟེར་བའི་མི་མེད་ལུང་སྟོང་གི་ས་ཁུལ་དེར་འགྲོ་དགོས་པ་རེད། ས་ཁུལ་དེར་སྔོན་ཆད་རྒྱ་ནག་དམག་མི་བསྡད་མྱོིང་ཡོད་སྟབས། ས་ཞིང་མུའུ་ ༢༠༠༠ ཙམ་ས་སྒང་ལ་བསྐྱུར་བཞག་ཡོད་པ་རེད། ད་ལྟ་གཅན་ཚའི་མི་དམངས་ཀྱིས་ཕ་ཡུལ་བཞག་སྟེ་གནས་ངེས་མེད་དུ་འགྲོ་རྒྱུར་སེམས་འཚབ་བྱེད་ཀྱི་འདུག” ཅེས་བརྗོད་སོང་།

གཅན་ཚ་ནི་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་གྱི་ཁོངས་སུ་གཏོགས་པའི་བོད་རིགས་འདུས་སྡོད་ཆེ་ཤོས་ཀྱི་རྫོང་ཞིག་ཡིན་ཞིང་། རྫོང་དེར་ཁྱོན་མི་འབོར་མི་ལྔ་ཁྲི་ལྷག་ཡོད་པའི་ནང་བོད་རིགས་ ༣༠༠༠༠ ལྷག་ཡོད་ཅིང་། མི་རིགས་གཙོ་བོ་བོད་དང་རྒྱ་རིགས། ཁ་ཆེ། ཟ་ལེར་བཅས་ཡིན་ལ། ས་བབ་དམའ་ཤོས་མཚོ་ངོས་ནས་རྨིད་ ༢༠༠༠ དང་མཐོ་ཤོས་ ༤༠༠༠ ཙམ་རེད། མི་མང་གི་འཚོ་བ་གཙོ་བོ་ཞིང་ལས་དང་ཚོང་ལས་བཅས་ཡིན་འདུག  

གསར་འགོད་པ། དཔལ་ལྡན།