རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་སློབ་འབྲིང་ཁག་ཏུ་བོད་སྐྱོར་རྒྱ་རིགས་ལས་བྱེད་ཟེར་བའི་བྱིས་པ་མངགས་གཏོང་བྱས་ཏེ། ས་གནས་བོད་མིའི་བྱིས་པར་སློབ་འཇུག་དང་ལས་ཀའི་གོ་སྐབས་ཤོར་བཞིན་ཡོད་པ་མ་ཟད། སློབ་འབྲིང་ཁག་གི་ཀློག་དེབ་ཆ་ཚང་རྒྱལ་གཅེས་རིང་ལུགས་སྐོར་ཡིན་འདུག
འདས་པའི་མི་ལོ་ལྔ་བཅུ་ལྷག་གི་རིང་རྒྱ་ནག་གཞུང་གིས་བོད་རང་སྐྱོང་ལྗོངས་ཡོངས་སུ་ཞི་དྲག་གཉིས་ཐོག་ནས་བོད་སྐད་བོད་ཡིག་རྩ་མེད་གཏོང་བའི་སྲིད་བྱུས་རབ་དང་རིམ་པ་ལག་བསྟར་བྱས་ཡོད་ལ། ལྷག་པར་དུ་ ༢༠༠༢ ལོ་ཡས་མས་ནས་བོད་རང་སྐྱོང་ལྗོངས་ཀྱི་མངའ་ཁོངས་སུ་ཡོད་པའི་སློབ་འབྲིང་ཁག་ཏུ་བོད་ཡིག་ལས་གཞན་པའི་སློབ་ཚན་ཆ་ཚང་རྒྱ་ཡིག་ཐོག་སློབ་ཁྲིད་བྱས་ཏེ། བོད་སྐད་ཡིག་བེད་མེད་ཀྱི་གནས་སུ་བསྐྱལ་ཡོད་པ་འདུག་ལ། སློབ་འབྲིང་ཁག་ཏུ་བོད་སྐྱོར་ལས་བྱེད་ཟེར་བའི་བྱིས་པ་དག་དང་། ཕ་མ་གཉིས་ཀྱི་གང་རུང་རྒྱ་རིགས་ཡིན་པའི་ལས་བྱེད་དག་གི་བྱིས་པ་མངགས་གཏོང་བྱེད་བཞིན་ཡོད་འདུག ལས་གནས་བསྐོ་བཞག་གི་སྐབས་སུའང་སློབ་ཆེན་མཐར་ཕྱིན་པའི་བོད་པའི་སློབ་མ་ཚོར་སྦྱངས་འབྲས་བཟང་མིན་ལ་མ་ལྟོས་པར་གྲོང་གསེབ་ཁུལ་དུ་གཏོང་བ་སོགས་བྱས་ཏེ། བོད་རིགས་སློབ་མ་ཚོར་སློབ་ཞུགས་དང་ལས་གནས་བསྐོ་བཞག་གང་ཐད་ནས་དཀའ་ངལ་འཕྲད་བཞིན་ཡོད་འདུག
གནས་ཚུལ་འདིའི་སྐོར་ལ་ད་ལྟའི་བར་ལྷ་ས་སློབ་འབྲིང་ལྔ་བའི་ནང་སློབ་སྦྱོང་བྱས་ཤིང་། ཉེ་ཆར་རྒྱ་གར་ནང་བཙན་བྱོལ་དུ་འབྱོར་ཡོད་པའི་བསོད་ནམས་ལྷ་མོ་ལགས་ཀྱིས་བརྗོད་པ་ལྟར་ན། བོད་སྐྱོར་ལས་བྱེད་ཟེར་བའི་ཕ་མ་དག་གི་བྱིས་པ་སློབ་མར་བསྡུ་བ་དང་བོད་ཡིག་ལས་གཞན་པའི་སློབ་ཚན་ཆ་ཚང་རྒྱ་ཡིག་ནང་འཁྲིད་ཀྱི་ཡོད་པ་དེ་ ༢༠༠༢ ལོ་ཙམ་ནས་བོད་རང་སྐྱོང་ལྗོངས་ཀྱི་སློབ་འབྲིང་ཆ་ཚང་ལ་ལག་བསྟར་བྱས་ཡོད་འདུག དེ་ནི་བོད་རང་སྐྱོང་ལྗོངས་ཀྱི་སློབ་གྲྭ་ཁག་ཏུ་རྒྱ་ཡིག་གི་ཁྱབ་རྒྱ་ཆེ་རུ་གཏོང་ཆེད་དང་། ལོ་རེར་བོད་རང་སྐྱོང་ལྗོངས་ཀྱི་སློབ་མ་སྟོང་ཕྲག་འགའ་རྒྱ་ནག་པེ་ཅིན་དང་ཧྲང་ཧེ། ཀོང་ཏུང། ཁྲོན་ཆེན། སི་ཁྲོན། ཨན་ཧེ་སོགས་གྲོང་ཁྱེར་ཆེ་ཁག་ཏུ་ཡོད་པའི་བོད་ལྗོངས་སློབ་འབྲིང་ཁག་ཏུ་འགྲོ་སྐབས། སློབ་མ་ཚོ་རྒྱ་ཡིག་གི་ཐོག་ནས་རྗེས་ཆོད་ཀྱི་མེད་ཚུལ་བཤད་དེ་ལག་བསྟར་བྱས་པ་ཞིག་ཡིན་འདུག གནས་སྟངས་དེ་དག་གི་དབང་གིས། སློབ་གྲྭའི་ལས་འགུལ་ཁག་ཆ་ཚང་རྒྱ་ཡིག་གི་ལམ་ནས་སྤེལ་གྱི་ཡོད་པར་མ་ཟད། བོད་རིགས་སློབ་མར་དམིགས་པའི་བོད་སྐད་ཡིག་གི་ཀློག་དེབ་ནང་དོན་ཆ་ཚང་ཡང་རྒྱ་ཡིག་ལས་བསྒྱུར་བའི་རྒྱལ་གཅེས་རིང་ལུགས་སྐོར་ཁོ་ན་ལས། སུམ་རྟག་དག་གསུམ་དང་སྙན་ངག་སོགས་བོད་པའི་སྐད་ཡིག་རིག་གནས་ཀྱི་སློབ་དེབ་མཐོང་དཀོན་པའི་གནས་སྟངས་ཆགས་ཡོད་འདུག
སྔོན་མ་ལྷ་ས་སློབ་འབྲིང་ལྔ་བའི་ནང་། གྲོང་གསེབ་ནས་ཡོང་བའི་སློབ་མ་ཚོས་བོད་ཡིག་ཐོག་དོ་སྣང་དང་དགའ་མོས་བྱེད་ཀྱི་ཡོད་ཀྱང་། སློབ་གྲྭའི་ཁོར་ཡུག་ནང་རྒྱ་སྐད་སྤྱི་སྐད་དུ་གྱུར་བ་དང་རྒྱ་ཡིག་གི་ཁྱབ་རྒྱ་ཆེ་བ། དགེ་སློབ་གཉིས་ཀས་ཚད་ལྡན་གྱི་རྒྱ་སྐད་མ་སྤྱད་ཚེ། སློབ་གྲྭའི་སྒྲིག་གཞི་དང་འགལ་བའི་རིགས་མང་པོ་ཡོད་པ་སོགས་ལ་བརྟེན་ཏེ། རིམ་གྱིས་བོད་སྐད་ཡིག་གི་ཁོར་ཡུག་མེད་པ་ཆགས་པ་དང་། ལྷག་པར་དུ་བོད་ཡིག་ཀློག་དེབ་མང་ཆེ་བ་རྒྱལ་གཅེས་རིང་ལུགས་ཀྱི་སློབ་གསོའི་སྐོར་ཡིན་སྟབས། སློབ་མ་ཚོར་རིམ་གྱིས་བོད་ཡིག་ལ་དོ་སྣང་དང་དགའ་མོས་མེད་པའི་སྣང་ཚུལ་བྱུང་གི་ཡོད་འདུག ཕྱོགས་གཞན་ཞིག་ནས་སྔོན་མ་བོད་རང་སྐྱོང་ལྗོངས་ཀྱི་བོད་རིགས་སློབ་མ་ཚོར་སློབ་ཆེན་གྱི་ཡིག་རྒྱུགས་སྐབས་དམིགས་བསལ་སྐར་མ་ ༤༠ ཙམ་གྱི་ཁ་སྣོན་བྱེད་ཀྱི་ཡོད་ཀྱང་། ཕྱིས་སུ་བོད་སྐྱོར་ལས་བྱེད་ཟེར་བ་དེ་དག་གིས་རྒྱ་ནག་གི་སློབ་གྲྭ་ཁག་ཏུ་ཡོད་པའི་ཁོང་ཚོའི་བྱིས་པར་ལྷ་སའི་མི་སེར་གྱི་ཐེམ་ཐོའི་ཐོག་ཡིག་རྒྱུགས་སྤྲོད་དུ་བཅུག་སྟེ། མཐོ་སློབ་ཡག་ཤོས་དང་ལས་གནས་ཡག་ཤོས་བསྐོ་བཞག་བྱས་སྟབས། བོད་རིགས་སློབ་མ་ཚོས་རྒྱ་ཡིག་མ་ཤེས་ཚེ་མཐོ་སློབ་ཏུ་སྐྱོད་པ་དང་ལས་ཀ་འཚོལ་རྒྱུ་བཅས་ཀྱི་དཀའ་ངལ་འཕྲད་ཀྱི་ཡོད་འདུག་ལ། མཐོ་སློབ་མཐར་ཕྱིན་པའི་སློབ་མ་ཁ་ཤས་ཀྱིས་པོ་ཏཱ་ལ་དང་ར་མོ་ཆེ། གཙུག་ལག་ཁང་གཡས་གཡོན་དུ་གཏན་འཇགས་མིན་པའི་བདེ་སྲུང་དམག་མིའི་ལས་ཀར་ཞུགས་ཏེ། ནམ་རྒྱུན་བོད་པ་ཚོས་ཆབ་སྲིད་དང་འབྲེལ་བའི་ལས་འགུལ་རིགས་སྤེལ་གྱི་ཡོད་མེད་དང་། བོད་དོན་དང་འབྲེལ་བའི་གནས་ཚུལ་བརྒྱུད་སྒྲོག་བྱེད་མིན་སོགས་ལ་ལྟ་རྟོག་གི་ལས་ཀ་བྱས་ཏེ་རྒྱ་གཞུང་གི་རྒྱུག་ཁྱི་ལྟ་བུར་གྱུར་ཡོད་འདུག
ལྷ་ས་སློབ་འབྲིང་ལྔ་བ་ནི། ལྷ་ས་གྲོང་ཁྱེར་གྱི་ཉིང་རི་ལམ་དུ་ཡོད་པའི་དམའ་འབྲིང་དང་མཐོང་གཉིས་ཀ་ཡོད་པའི་སློབ་གྲྭ་ཞིག་ཡིན་ཞིང་། འདས་པའི་དུས་སུ་སློབ་གྲྭ་འདིར་ལྷ་སའི་ཉེ་ཁུལ་གྱི་ཉིང་རི་དང་ཚེ་གུང་ཐང་། ཐོ་སྡེ། ལྟག་རྩེ་བཅས་ཤང་བཞི་ཡི་སློབ་མ་ལས་མེད་ཀྱང་། ཕྱིས་སུ་གཞིས་ཀ་རྩེ་དང་འདམ་གཞུང་། ནག་ཆུ་བཅས་ནས་ཀྱང་རྒྱ་རིགས་བོད་སྐྱོར་ལས་བྱེད་པའི་བྱིས་པ་བསྡུ་རུབ་བྱས་ཡོད་འདུག
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དེང་སང་ལྷ་ས་གྲོང་ཁྱེར་ནང་སྤོ་ལགས་མོ་ལགས་ཚོས་རྒྱ་སྐད་མ་འདྲིས་པའི་བོད་སྐད་ཚང་མ་གསུང་མི་ཤེས་པས་ལྷ་སའི་གཞོན་སྐྱེས་ཚོར་ཁག་ག་ལ་ཡོད། བོད་རང་སྐྱོང་ལྗོངས་མངའ་འོག་ཏུ་བོད་སྐད་བོད་ཡིག་རྒྱ་མིའི་མེད་པར་མ་བཟོས་གོང་བོད་མི་རང་གིས་བོད་ཡིག་བོད་སྐད་བེད་སྤྱོད་གཏོང་གི་མེད་དུས་བོད་ཀྱི་སློབ་འབྲིང་ཚོར་བོད་ཡིག་མ་བསླབ་ཅིང་སྐྱོན་མེད།
བོད་ཡིག་འདི་བོད་རང་སྐྱོང་ལྗོངས་ནང་དུ་སྔ་ན་འཕྱིས་འཆི་རྒྱུ་ཉག་གཅིག་རེད།
རང་སྐྱོང་ལྗོངས་ཀྱི་སློབ་མ་དེ་དག་ལ་མི་རིགས་ལ་ཞེན་པའི་ལ་རྒྱལ་དང་སྐད་ཡིག་ལ་དུངས་བའི་བརྩེ་་སེམས་རེ་ཡོད་ན་ མཚོ་སྔོན་ཁུལ་དུ་ལོ་སྔོན་མ་སློབ་མ་ཚོས་ལས་འགུལ་གང་སྤེལ་སོང།
གཞན་གྱིས་གཉའ་གནོན་ཅི་བྱས་ཀྱང་། །རང་མདོག་མི་དོར་དམ་བཅའ་དགོས། །སྐད་རིགས་སྣ་ཚོགས་ཐབས་སྟོན་ཀྱང་། །ཕ་སྐད་མི་དོར་བརྩེ་སེམས་དགོས། །དམར་པོའི་རྒྱ་གྲམ་མཐའ་བསྐོར་ཀྱང་། །ཕ་ཡིག་བྲག་རི་ལྟར་གཏན་དགོས། །
རྒྱ་ནག་ལ་ངོ་དགའ་ནམ་ཡང་མི་བྱེད་ཁོ་དག་ཡིན།།
བོད་རིགས་ལ་ངོ་ལོག་ནམ་ཡང་མི་བྱེད་ངོ་མ་ཡིན།།
ཕུ་ནུ་ལ་ནང་དམེ་ནམ་ཡང་མི་བྱེད་བདེན་པ་ཡིན།།
སྐད་རིགས་ཐོས་ཤོར་ནམ་ཡང་མི་བྱེད་དྲང་གཏམ་ཡིན།།
ང་ཚོ་བོད་པ་ཚོར་སེམས་ཞིག་ཡོད་ན་བོད་ཀྱི་སྐད་རིགས་སློབ་སྦྱོང་བྱེད་མི་ཐུབ་པའི་གནད་དོན་གང་ལ་ཐུག་ཡོད་མེད་ངོས་གསར་བོར་ཟིན་དགོས།
མཚོ་སྔོན་འོག་ཏུ་སྔར་ལོ་ཕྱི་ཟླ་གསུམ་པ་ནས་བོད་སྐད་ཡིག་ལས་གཞན་རྒྱ་ཡིག་ཐོག་གཏན་འབེབས་བྱ་རྒྱུའི་སྲིད་བྱུས་ཤིག་གྲགས་པ་རེད། སྐབས་དེར་བོད་རིགས་སློབ་ཕྲུག་ཚོའི་འབོད་སྒྲ་ཞིག་གོ་ཐོས་བྱུང་། བོད་རང་སྐྱོང་ལྗོངས་འོག་གི་སློབ་གྲྭ་ཡོངས་སྔོན་མ་ནས་བོད་ཀྱི་སྐད་ཡིག་གཅིག་པུ་ལས་སློབ་ཚན་གཞན་ཡོངས་རྫོགས་རྒྱ་ཡིག་རྒྱ་སྐད་ཡིན་རབས་གོ་སོང་། སི་ཁྲོན་དང་། ཀན་སུའུ་འོག་གི་གནས་སྟངས་གང་འདྲ་ཡིན་པ་གོ་ཨེ་བྱུང་།
རྒྱུས་མངའ་ཡོད་མཁན་ཚོས་འདིར་བསམ་ཚུལ་རེ་འགོད་རོགས།
བོད་པ་ཡིན་ནས་བཟུང་བོད་ཡིག་ནི་ངེས་པར་དུ་དགོས་ལ། དུས་དང་མཚམས་པར་རྒྱ་ཡིག་མ་ཤེས་ན་དེ་བས་མི་འགྲིགས་པས། འདི་སྙད་དུ་མི་གཙུག་པར་སློབ་མ་རྣམས་ཀྱི་ངོས་ནས་ངེས་པར་དུ་རིག་པ་ཧུར་ཕྱུང་དགོས་པ་ནི་གནད་ཀྱི་དམ་པ་ཡིན་པར་འདོད། དེ་འདྲ་མ་བྱུང་ནས་རྒྱ་མི་ལ་སྙད་གཙུག་པ་གཅིག་པོས་ཕན་པ་ལས་གནོད་པའི་བྱ་བ་མང་བར་འབྱུང་གི་འདུག་སྙམས།
རྒྱ་ནག་སྡུག་པོ་ཡིན་པ་ཀུན་གྱིས་ཤེས།།
བོད་ཡིག་རྩི་མཐོང་མེད་པ་རང་གིས་ལན།།
རྒྱ་མིས་མགོ་སྐྱོར་བཏང་བ་ཀུན་གྱིས་ཤེས།།
རང་དོན་རང་གཅེས་མེད་པ་རང་གིས་སྐྱོན།།