རྒྱ་སྒོར་སྟེང་གི་རྒྱ་ནག

ཉེ་ཆར་རྒྱ་རིགས་ཆོས་འཁོར་རྩ་རླུང་སྒོམ་སྒྲུབ་པ་རྣམས་ཀྱིས་རྒྱ་ནག་མི་དམངས་ཡོངས་ཀྱིས་རྒྱ་གཞུང་གི་ནག་ཉེས་ཤེས་རྟོགས་ཡོང་ཆེད། རྒྱ་སྒོར་སྟེང་རྒྱ་གཞུང་གི་ནག་ཉེས་ཐེར་འདོན་གྱི་ཡི་གེ་འདྲ་མིན་བྲིས་ཏེ་བཀྲམས་ཡོད་འདུག

རྒྱ་གཞུང་གིས་ཕྱི་ལོ་ ༡༩༩༩ ལོ་ནས་ད་ལྟའི་བར་ཆོས་འཁོར་རྩ་རླུང་སྒོམ་སྒྲུབ་པ་རྣམས་ལ་དྲག་གནོན་བཙོན་འཇུག་གི་སྲིད་ཇུས་ལག་བསྟར་བྱེད་བཞིན་པར་མ་ཟད། རྒྱ་ནག་ནང་གསར་འགྱུར་བརྒྱུད་ལམ་བཀག་སྡོམ་དང་། ཆོས་འཁོར་རྩ་རླུང་སྒོམ་སྒྲུབ་ནི་སྤྱི་ཚོགས་ལ་གནོད་འཚེ་གཏོང་མཁན་གྱི་ལོག་ཆོས་ཤིག་ཡིན་སྐོར་གྱི་ལོག་འགྲེལ་རྒྱག་བཞིན་ཡོད་སྟབས། ཉེ་ལམ་ཆོས་འཁོར་རྩ་རླུང་སྒོམ་སྒྲུབ་པ་རྣམས་ཀྱིས་རྒྱ་སྒོར་སྟེང་དུ་༼རྒྱ་གཞུང་ནི་མིའི་སྤྱི་ཚོགས་ལ་གནོད་འཚེ་སློང་མཁན་ཡིན་པས། སྤྱི་ཚོགས་བདེ་འཇགས་ཡོང་ཐབས་སུ་དམར་ཤོག་ཚོགས་པ་དང་ཐཱུན་ཚོགས་པ། ལོ་ཆུང་རུ་མིའི་ཚོགས་པ་གསུམ་ནས་ཕྱིར་འཕུད་བྱ་དགོས༽ ཞེས་པ་དང་། ༼དམར་ཤོག་ཚོགས་པ་ལས་ཕྱིར་འཕུད་ཀྱི་འབྲེལ་གཏུགས་ཁ་པར་ཨང་། ༠༠༡༥༡༤༣༤༢༡༠༢༣ ༽ཞེས་པ། ༼ཆོས་འཁོར་རྩ་རླུང་སྒོམ་སྒྲུབ་འཛམ་གླིང་ཁྱོན་ལ་སྤེལ་ཏེ། དྲང་བདེན་དང་བརྩེ་བ། བཟོད་བསྲན་བཅས་ཡ་རབས་བཟང་སྤྱོད་གོང་འཕེལ་གཏོང་དགོས༽སོགས་རྒྱ་གཞུང་གི་ཉེས་སྤྱོད་ཐེར་འདོན་གྱི་བརྗོད་ཚིག་སྣ་ཚོགས་བཀོད་དེ། མང་ཚོགས་ཁྲོད་དངོས་ཡོད་གནས་ཚུལ་ཤེས་རྟོགས་ཡོང་བའི་ཐབས་ཤེས་བྱས་ཡོད་པ་རེད། 

གོང་གསལ་བརྗོད་ཚིག་དེ་དག་བཀོད་ཡོད་པའི་རྒྱ་གར་དག་གི་བརྗོད་ཚིག་ཡིག་འབྲུའི་ཁ་དོག་དང་། ཤོག་སྒོར་གྱི་མཚོན་མདོག་སྡེབ་སྒྲིག་སོགས་ཧ་ཅང་ཞིབ་ཚགས་ལྡན་པ་ཞིག་བཟོས་ཡོད་སྟབས། བལྟས་མ་ཐག་ཤོག་སྒོར་རང་སྟེང་ཐོག་མ་ནས་ཡོད་པ་ཞིག་ཏུ་སྣང་བར་བཟོས་ཡོད་འདུག   ཉེ་སྔོན་རྒྱ་ནག་པེ་ཅིན་དུ་ཡོད་པའི་དབྱིན་ཇིའི་དངུལ་རྩའི་གསར་ཤོག་གི་གསར་འགོད་པ་ཨན་ཌིར་ལེ་ནཱ་ཡིས། རང་ཉིད་ཀྱི་དྲ་ཐོག་ཟིན་བྲིས་ནང་དེའི་སྐོར་གྱི་གནས་ཚུལ་སྤེལ་བ་ལྟར་ན། ལས་འགུལ་དེ་ཐོག་མར་རྒྱ་ནག་པེ་ཅིན་དང་ཧྲང་ཧེ་གྲོང་ཁྱེར་གཉིས་ནས་བརྩམས་ཤིང་། ཐོག་མའི་དུས་སྐབས་སུ་ཤོག་སྒོར་སྟེང་སྨྱུ་གུས་བྲིས་ཏེ་བཀྲམས་ཡོད་པ་དང་། རྗེས་སུ་བརྗོད་ཚིག་དེ་དག་དཔར་ཤིང་ལ་བཏབས་རྗེས་ཤོག་སྒོར་སྟེང་ཐད་ཀར་དཔར་ཡོད་འདུག

རྒྱ་གཞུང་ལ་ཐེར་འདོན་གྱི་བརྗོད་ཚིག་དེ་དག་བཀོད་ཡོད་པའི་རྒྱ་སྒོར་དག་ནི། སྒོར་གྲངས་གཅིག་ཅན་དང་ལྔ་ཅན། བཅུ་ཅན། ཉི་ཤུ་ཅན་སོགས་ཡིན་འདུག    

གསར་འགོད་པ། ཚེ་རིང་རྒྱལ།