བོད་ཀྱི་རྣམ་པ་སྲུང་སྐྱོབ་ཀྱི་ལས་གཞི་ཁག་ཅིག་༧གོང་ས་མཆོག་ལ་སྦྱན་འབུལ།

དེ་རིང་༧གོང་ས་མཆོག་ཧྥ་རན་སིའི་གྲོང་འཁྱེར་བཅུ་གསུམ་གྱི་སྤྱི་ཁྱབ་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་བཅས་ལ་མཇལ་འཕྲད་གནང་ཡོད་པ་དང་། སྐབས་དེར་གྲོང་འཁྱེར་སྤྱི་ཁྱབ་དེ་དག་གིས་བོད་ནང་གི་གྲོང་དང་གྲོང་ཁྱེར་ ༣༢༠ ཙམ་ནང་བོད་ཀྱི་གདོད་མིའི་རྣམ་པ་སྲུང་སྐྱོབ་ཐད་ལས་གཞི་ཁག་ཅིག་སྦྱན་འབུལ་ཞུས་ཡོད་འདུག

ཟླ་འདིའི་ཕྱི་ཚེས་ ༩ ཉིན་ནས་བཟུང་༧སྤྱི་ནོར་༧གོང་ས་ཆེན་པོ་མཆོག་གིས་ཡུ་རོབ་རྒྱལ་ཁབ་ཁག་ལྔའི་ནང་ཆིབས་བསྒྱུར་གྱིས་མཛད་འཕྲིན་སྐྱོང་བཞིན་པ་ལྟར། ཕྱི་ཚེས་ ༡༢ ཉིན་སུད་སུའི་མཛད་འཕྲིན་ཁག་ལེགས་པར་གྲུབ་སྟེ་ཧྥ་རན་སིའི་ཤར་ཕྱོགས་མོན་སྰ་ལེ་ཧྥུའི་ནང་ཆིབས་བསྒྱུར་བསྐྱངས་ཡོད་པ་དང་། དེ་གར་ནང་བའི་བསྟི་གནས་བཤད་སྒྲུབ་ཆོས་འཁོར་གླིང་གི་འཛུགས་བསྐྲུན་ལེགས་གྲུབ་བྱུང་བའི་མཛད་སྒོ་དབུ་འབྱེད་དང་། ལྷ་ཁང་ལ་རབ་གནས། མཛད་སྒོར་ཕེབས་པའི་ཡུལ་མི་དང་དམིགས་བསལ་སོག་པོ་དང་ར་ཤི་ཡ་ནས་ཕེབས་པའི་ཆོས་ཞུ་བ་ཚོར་བསྟི་གནས་དེའི་བྱུང་རིམ་ལོ་རྒྱུས་དང་། འབྱུང་འགྱུར་འཛིན་སྐྱོང་གནང་སྟངས་སྐོར་ལ་བཀའ་སློབ་གནང་ཡོད་པ་རེད། བཤད་སྒྲུབ་ཆོས་འཁོར་གླིང་ནི་ར་ཤི་ཡའི་གྲོས་ཚོགས་འཐུས་མི་(Raefe lGimalov)ལགས་ཀྱིས་རྒྱུ་གྲོན་སྦྱར་ནས་གསར་དུ་འཛུགས་སྐྲུན་བྱས་པ་ཞིག་ཡིན་ལ། ཇི་ལྟར་གསོབ་འདེབས་ཞུས་པ་ལྟར་༧གོང་ས་མཆོག་གིས་དགོན་པར་མཚན་གསོལ་གནང་བ་མ་ཟད། བསྟི་གནས་འདིའི་འབྱུང་འགྱུར་གྱི་འཛིན་སྐྱོང་གང་ཡོད་དཔལ་ལྡན་འབྲས་སྤུངས་སྒོ་མང་གྲྭ་ཚང་གིས་གནང་གཏན་འཁེལ་ཡོད་འདུག

ཕྱི་ཚེས་ ༡༣ ནས་བཟུང་གྲོང་ཁྱེར་ཐོ་ལོ་སིའི་ནང་ཉིན་གསུམ་རིང་ཐེངས་འདིའི་ཧྥ་རན་སིའི་མཛད་འཕྲིན་དངོས་གཞི་སྟེ། དད་ལྡན་མང་ཚོགས་ ༩༠༠༠ བརྒལ་བར་སློབ་དཔོན་ཀ་མ་ལ་ཤྰི་ལས་མཛད་པའི་༼ སྒོམ་རིམ་བ་མའི་༽བཀའ་ཁྲིད་གནང་ཡོད་པ་དང་། ཕྱི་ཚེས་ ༡༥ ཉིན་གྱི་ཕྱི་དྲོར་གསུང་ཆོས་ར་བའི་ནང་མི་མང་ཆིག་ཁྲི་ལྔ་སྟོང་བརྒལ་བར་༼བདེ་སྐྱིད་ཀྱི་འབྱུང་རྩ།༽ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀའ་དྲིན་བསྩལ་ཡོད་པ་རེད། ཐེངས་འདིའི་བཀའ་ཁྲིད་དང་མང་ཚོགས་ལ་བཀའ་སློབ་གནང་བ་དེར་ཡུ་རོབ་གཙོས་པའི་འཛམ་གླིང་ཡུལ་གྲུ་ ༣༠ ལྷག་གི་དད་ལྡན་ཆོས་ཞུ་བ་འཛོམས་ཡོད་པ་དང་། ཉིན་གསུམ་རིང་གི་བཀའ་ཁྲིད་དང་མང་ཚོགས་བཀའ་སློབ་གནང་བ་ཁག་ཧྥ་རན་སིའི་སྐད་དང་དབྱིན་སྐད། རྒྱ་སྐད། དེ་བཞིན་ཀམ་བྷོ་ཌི་ཡ་སོགས་ཚུད་པའི་སྐད་རིགས་ ༨ ནང་གསུང་བསྒྱུར་བྱས་ཡོད་པ་རེད།

ཆིབས་བསྒྱུར་འདི་༧གོང་ས་མཆོག་གི་བོད་ཀྱི་ཆབ་སྲིད་འགན་དབང་མི་མང་ཀྱི་དབུ་འཁྲིད་བཀའ་བློན་ཁྲི་པར་རྩིས་སྤྲོད་གནང་རྗེས་ཡིན་ནའང་། གནམ་ཐང་དང་གསུང་ཆོས་བར་གསེང་ཁག་ཏུ་གསར་འགོད་པ་དང་། གྲོང་ཁྱེར་སྤྱི་ཁྱབ་པ་རྣམ་པ། ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་མི་སྣ་ཁག་ལ་མཇལ་འཕྲད་གནང་སྟེ། ཁོང་གི་ཆབ་སྲིད་འགན་དབང་བཀའ་བློན་ཁྲི་པར་རྩིས་སྤྲོད་གནང་བའི་བྱུང་རིམ་དང་། དེ་བཞིན་བོད་ཀྱི་འདས་པ་དང་མ་འོངས་པའི་སྲིད་དོན་གནས་སྟངས་ཐད་ལ་བཅར་འདྲི་དང་ལེན་དང་བཀའ་སློབ་གནང་བ་སོགས་སྲིད་ཕྱོགས་ཀྱི་མཛད་འཕྲིན་མི་ཉུང་བ་ཞིག་བསྐྱངས་ཡོད་པ་རེད། ཕྱི་ཚེས་ ༡༢ ཉིན་གནམ་ཐང་དུ་ཕེབས་འབྱོར་སྐབས་གསར་འགོད་པ་ཚོར་ཐེངས་འདིའི་ཆིབས་བསྒྱུར་སྐོར་ཀྱི་ཐུགས་ཚོར་གསུངས་དོན། ‘‘སྔོན་མ་ང་ཧྥ་རན་སི་ལྷོ་ཕྱོགས་འདི་ལ་ཐེངས་མ་ཁ་ཤས་ཡོང་བ་རེད། སྐབས་དེ་དུས་ངས་བོད་ཀྱི་ཆབ་སྲིད་ཀྱི་འགན་ལེན་མུས་ཡིན་པར་སོང་ཕྱོགས་གང་ཅིའི་ཐད་ནས་ལྷོད་ལྷོད་མེིད་ནའང་། ད་ཐེངས་ངས་ཆབ་སྲིད་ཀྱི་འགན་མཚམས་བཞག་ནས་བསླེབས་པ་ཡིན་སྟབས་རྦད་དེ་ལྷོད་ལྷོད་རེད”། ཅེས་བཞད་མོལ་དང་བཅས་གསུངས་བ་དང་།དེ་བཞིན་ཁོང་གིས་རྒྱལ་ཁབ་གང་འདྲ་ཞིག་ཡིན་རུང་མི་སྒེར་བ་གཅིག་དང་།ཆོས་ལུགས་གཅིགཡང་ན་ཚོགས་པ་གཅིག་གིས་ཆབ་སྲིད་ལ་དབང་བསྒྱུར་བཞིན་པ་དེ་དུས་ཚོད་ཀྱི་ཆ་ནས་མཚམས་འཇོག་དགོས་ཆགས་ཡོད་པ་ང་ལ་ཡིད་ཆེས་བརྟན་པོ་ཡོད’’ཅེས་གསུངས།

དེ་རིང་ཕྱི་ཚེས་ ༡༥ ཉིན་གྱི་སྔོ་དྲོར་༧གོང་ས་མཆོག་གིས་ཧྥ་རན་སིའི་གྲོང་ཁྱེར་ ༡༣ ཙམ་གྱི་སྤྱི་ཁྱབ་པ་དང་། ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆུང་གི་འཐུས་མི་ཁག་ཅིག་དང་སྔ་ཕྱིར་མཇལ་འཕྲད་གནང་ཡོད་པ་རེད། སྐབས་དེར་གྲོང་ཁྱེར་སྤྱི་ཁྱབ་པ་དེ་དག་གིས་བོད་ནང་གི་གྲོང་དང་གྲོང་ཁྱེར་ཁག་གི་བོད་ཀྱི་རྣམ་པ་སྲུང་སྐྱོབ་ཐད་ལས་གཞི་ཁག་ཅིག་སྤྱན་འབུལ་ཞུས་ཡོད་འདུག ལས་གཞི་དེ་དག་ནང་ཧྥ་རན་སིའི་གྲོང་ཁྱེར་དེ་དག་གིས་ཐུན་མོང་དང་ཐུན་མོང་མ་ཡིན་པའི་བརྒྱུད་ལམ་ཐོག བོད་ནང་གི་གྲོང་དང་གྲོང་ཁྱེར་ཁག་ནང་བོད་ཀྱི་གདོད་མིའི་རྣམ་པ་སྲུང་སྐྱོབ་ཐད་ལས་གཞི་ཁག་ལག་བསྟར་བྱ་འཆར་ཡོད་འདུག་ལ། ད་ལྟའི་ཆར་ལས་གཞི་དེ་དག་ནང་བོད་ནང་གི་གྲོང་དང་གྲོང་ཁྱེར་ཁག་ ༣༢༠ ལྷག་ཚུད་ཡོད་འདུག དེ་བཞིན་ཧྥ་རན་སིའི་གྲོས་ཚོགས་འཐུས་མི་རྣམས་དང་མཇལ་འཕྲད་སྐབས་༧གོང་ས་མཆོག་གིས་ཁོང་གི་ཆབ་སྲིད་ཀྱི་ཐུགས་འགན་མཚམས་འཇོག་གནང་བའི་བྱུང་རིམ་དང་། བོད་ཀྱི་དམངས་གཙོའི་འཕེལ་རིམ། ཆབ་སྲིད་གནས་བབ་བཅས་ཀྱི་ཐད་བཀའ་སློབ་བསྩལ་བ་དང་། གྲོས་ཚོགས་འཐུས་མི་རྣམ་པས་ད་ལྟའི་བོད་ནང་གི་གནས་སྟངས་དང་། རྒྱལ་སྤྱིའི་འགྱུར་འགྲོས་ཁྲོད་ཀྱི་བོད་ཀྱི་གནས་བབ། དེ་བཞིན་ཉེ་སྔོན་ཨ་རིར་སྲིད་འཛིན་ཨོ་བྷ་མ་དང་མཇལ་འཕྲད་སྐབས་ཀྱི་གནས་ཚུལ་ཁག་དང་འབྲེལ་བའི་བཀའ་འདྲི་ཞུས་པར་བཀའ་ལན་བསྩལ་ཡོད་པ་མ་ཟད། ཕ་རི་སི་བོད་ཀྱི་སྐུ་ཚབ་དོན་གཅོད་འབྲེལ་མཐུད་ཁང་གིས་བོད་དོན་རྒྱབ་སྐྱོར་བ་རྒན་པ་དང་གྲོས་ཚོགས་འཐུས་མི་ཟུར་བ་སྐུ་ཞབས་  (Jean-Michel Belorgey) ལགས་ཀྱིས་ད་བར་བོད་དོན་ཐད་སྐུ་ངལ་བསྐྱོན་པར་ཐུགས་རྗེ་ལེགས་འབུལ་གྱི་ཕྱག་རྟགས་དེ་༧གོང་ས་མཆོག་གིས་ཐད་ཀར་བསྩལ་ཡོད་པ་རེད། སྐུ་ཞབས་ཁོང་ནི་ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆུང་གསར་དུ་འཛུགས་མཁན་དེ་ཡིན་ཞིང་། ཕྱི་ལོ་ ༡༩༩༠ ལོར་བཙུགས་པ་ནས་ད་ལྟའི་ཆར་གྲོས་ཚོགས་འཐུས་མི་ ༡༨༣ ཡོད་འདུག

༧གོང་ས་མཆོག་གི་ཧྥ་རན་སིའི་མཛད་འཕྲིན་ཁག་ལེགས་པར་གྲུབ་རྗེས་ཕྱི་ཚེས་ ༡༦ ཉིན་ཨེ་སི་ཌོན་ནེ་ཡའི་ནང་ཆིབས་བསྒྱུར་བསྐྱང་རྒྱུ་ཡིན་འདུག དེ་གར་ཡུལ་དེའི་མང་ཚོགས་ལ་༼འཇིག་རྟེན་ཀུན་ཁྱབ་ཀྱི་འགན་འཁུར།༽ཞེས་པའི་བརྗོད་གཞིའི་ཐོག་བཀའ་སློབ་དང་། དེ་ནས་རིམ་བཞིན་ཧྥིན་ལན་ཌི་དང་། འཇར་མན་བཅས་སུ་ཆིབས་བསྒྱུར་གྱིས་ཐེངས་འདིའི་ཡུ་རོབ་མཛད་འཕྲིན་ཁག་གི་མཇུག་མུ་མཐུད་བསྐྱང་རྒྱུ་ཡིན་འདུག

ཕྱི་ལོ་ ༡༩༨༢ ལོར་༧གོང་ས་མཆོག་ཐེངས་དང་པོར་ཧྥ་རན་སིར་ཕེབས་པ་ནས་ད་ལྟའི་བར་ཐེངས་ ༡༩ ཙམ་ལ་ཆིབས་བསྒྱུར་བསྐྱངས་ཡོད་པ་དང་། ཆིབས་བསྒྱུར་རིམ་པ་ཁག་གི་སྐབས་ཧྥ་རན་སིའི་སྲིད་འཛིན་ལས་ཐོག་རྣམ་པ་གཉིས་དང་། སྲིད་འཛིན་ཟུར་བ། དེ་བཞིན་གཞུང་དང་གྲོས་ཚོགས་ཀྱི་གནད་ཡོད་མི་སྣ་ཁག་དང་མཇལ་འཕྲད་གནང་ཡོད་པ་མ་ཟད། ཕྱི་ལོ་ ༢༠༠༩ ལོར་རྒྱལ་ས་ཕ་རི་སིའི་ཕུལ་བྱུང་གྲོང་མིའི་མཚན་སྙན་གཟེངས་རྟགས་ཀྱང་འབུལ་བཞེས་གནང་ཡོད་པ་རེད།

 གསར་འགྱུར་མཁོ་གཏོང་བ། ཟླ་བ་ཚེ་རིང་།