གྷ་ཌ་ཧྥེའི་བུ་འཛིན་ཐུབ་མི་འདུག

གཟའ་ཉི་མར་ལཱེ་བྷེ་ཡཱའི་གྱེན་ལོག་ཤོག་ཁག་གིས་གྷ་ཌ་ཧྥེ་ཡི་བུ་སའེ་ཧྥི་ཨལ་འཛིན་བཟུང་བྱས་ཚུལ་བསྒྲགས་པའི་ཉིན་གཉིས་པར། སའེ་ཧྥི་ཨལ་ཕྱིར་མངོན་ཏེ་གྱེན་ལོག་ཤོག་ཁག་གི་རྟེན་གཞི་གཙོ་བོ་ཞིག་གཞུང་དམག་གིས་གཏོར་བཅོམ་བྱས་པར་བརྗོད་འདུག

ཕྱི་ཚེས་ ༢༡ ཉིན་ལཱེ་བྷེ་ཡའི་གྱེན་ལངས་ཤོག་ཁག་གི་སྲིད་དབང་སྒེར་འཛིན་པ་གྷ་ཌ་ཧྥེའི་བུ་སའེ་ཧྥི་ཨལ་(Saif al-Islam) དང་སྤུན་མཆེད་ནང་མི་སྐོར་ཞིག་འཛིན་བཟུང་བྱས་ཡོད་པར་བསྒྲགས་ཡོད། འོན་ཀྱང་། གཟའ་ཟླ་བའི་ཉིན་སའེ་ཧྥི་ཨལ་ལཱ་བྷེ་ཡའི་རྒྱལ་ས་ཊི་རེ་པོ་ལེ་(Tripoli) ནས་དངོས་སུ་ཕྱིར་ཐོན་ཏེ། འདས་པའི་ཉིན་འགའི་འཐབ་འཁྲུག་ཁྲོད་ས་གནས་གྱེན་ལོག་ཤོག་ཁག་གི་རྟེན་གཞི་གཙོ་བོ་ཞིག་གཞུང་དམག་གིས་གཏོར་སྐྱོན་བཏང་ཡོད་པ་དང་། གྱེན་ལོག་པས་ཁོང་དང་ནང་མི་སྐོར་ཞིག་འཛིན་བཟུང་བྱས་ཡོད་སྐོར་བསྒྲགས་པ་དེ་དཀྲོག་གཏམ་རེད་ཅེས་བརྗོད་འདུག

དེ་རིང་ཕྱི་ཚེས་ ༢༣ ཉིན་གྱི་ཞོགས་པར་བྷེ་བྷེ་སེ་ཡི་གསར་འགོད་པ་མཱ་ཐེཝོ་(Mathew price) ལགས་ཀྱིས་སའེ་ཧྥི་ཨལ་ལ་བཅར་འདྲི་ཐུང་ཐུང་ཞིག་བྱས་པའི་ནང་། ད་ལྟ་གྷ་ཌ་ཧྥེ་བདེ་འཇགས་ཡིན་པ་མ་ཟད། རྒྱལ་སའི་གྲོང་ཁྱེར་ཕྱི་ནང་གི་ས་ཁུལ་ཕལ་ཆེ་བ་གཞུང་དམག་གིས་བརྟན་བཟུང་བྱས་ཡོད་ཚུལ་དང་། ཉེ་ཆར་ནས་གྱེན་ལངས་ཤོག་ཁག་གིས་ཊི་རེ་པོ་ལེ་ཡི་ས་སྒོ་གང་ས་ནས་དཔུང་འཇུག་བྱས་ཡོད་ཀྱང་། གཞུང་དམག་གི་འགོག་རྒོལ་འོག་ད་ཆར་གྱེན་ལངས་ཤོག་ཁག་ལ་ཕམ་ཉེས་བྱུང་ཡོད་ཅེས་བརྗོད་འདུག

འདི་ལོའི་ཕྱི་ཟླ་གཉིས་པ་ནས་ལཱེ་བྷེ་ཡའི་མི་མང་གིས་སྲིད་དབང་སྒེར་འཛིན་གཞུང་མགོ་རྟིང་སློག་རྒྱུའི་གྱེན་ལངས་ངོ་རྒོལ་བྱས་ཤིང་། རིམ་བཞིན་ཎ་ཊོ་ (Nato)མཉམ་འབྲེལ་དམག་གི་རྒྱབ་རོགས་བཅས་ལ་བརྟེན། གྲོང་ཁྱེར་དང་སུ་ཁུལ་མང་པོ་ཞིག་གཞུང་གི་སྟངས་འཛིན་ལས་ཤོར་ཡོད་ཅིང་། ད་ལྟ་གྷ་ཌ་ཧྥེ་སྲིད་གཞུང་གི་རྟེན་གཞི་གཙོ་བོ་རྒྱལ་ས་ཊིརེ་པོ་ལེ་ལ་ས་སྒོ་ཁག་མང་པོ་ཞིག་ནས་ཚུར་རྒོལ་བྱེད་བཞིན་ཡོད་པ་རེད། གནད་དོན་འདིའི་ཐད་གྱེན་ལོག་ཤོག་ཁག་གི་མགོ་ཁྲིད་ཇ་ལེལ་(Mustafa Abdul Jalil) གྱིས་ “ང་ཚོའི་རྒྱལ་ཁ་ངོ་མ་ནི་གྷ་ཌ་ཧྥེ་འཛིན་བཟུང་བྱས་པའི་དུས་སྐབས་དེ་ཡིན” ཞེས་བརྗོད་ཡོད་འདུག

སའེ་ཧྥི་ཨལ་ནི་རང་ལོ་ ༣༩ དང་། གྷ་ཌ་ཧྥེའི་བུ་རྣམས་ཀྱི་ནང་གི་ཕ་ཤུལ་འཛིན་བྱེད་མཁན་དེ་ཆགས་ཡོང་གི་ཡོད་འདུག  

གསར་འགོད་པ། བནྡེ་སྐྱབས།