ཨ་རབ་གླིང་གི་ཁ་ཆེ་རྒྱལ་ཁབ་ལེ་བྷེ་ཡའི་མི་མང་ཚོས་འདས་པའི་ཟླ་ངོ་ ༦ རིང་། སྲིད་དབང་སྒེར་གཅོད་པ་གྷ་ཌ་ཧྥེའི་སྲིད་གཞུང་མགོ་རྟིང་སློག་རྒྱུར་གྱེན་ལངས་བྱས་ཏེ། ད་ཆར་རྒྱལ་ས་ཊི་རེ་པོ་ལེ་བདག་བཟུང་བྱས་ཏེ། སྲིད་འཛིན་གྷ་ཌ་ཧྥེ་འཛིན་བཟུང་བྱ་རྒྱུར་སྟ་གོན་བྱས་འདུག
ཟླ་འདིའི་ཟླ་དཀྱིལ་ཙམ་ལེ་བྷེ་ཡའི་གྱེན་ལངས་ཤོག་ཁག་གིས་ལེ་བྷེ་ཡའི་རྒྱལ་ས་འམ། སྲིད་དབང་སྒེར་གཅོད་པ་གྷ་ཌ་ཧྥེ་ཡི་སྡོད་གནས་གྲོང་ཁྱེར་ཊེ་རི་པོ་ལེ་( Tripoli )རུ་དྲག་འཛིང་བྱས་ཏེ། ད་ལྟ་རྒྱལ་ས་ཏེ་རི་པོ་ལེ་གྲོང་ཁྱེར་ཕལ་ཆེ་བཟུང་ཡོད་ནའང་། ད་དུང་གྷ་ཌ་ཧྥེའི་ཤོག་གཏོགས་པ་གཙང་མ་བཟོ་ཐུབ་མེད་པ་མ་ཟད། གྷ་ཌ་ཧྥེ་ཁོ་རང་ཡང་འཛིན་བཟུང་བྱེད་ཐུབ་མེད་ལ། སེར་ཏེ་ (Sirte) གྲོང་ཁྱེར་ཡང་གྷ་ཌ་ཧྥེའི་ཤོག་ཁག་གིས་བཟུང་ཡོད་འདུག དེ་ནི་གྷ་ཌ་ཧྥེའི་དྲག་དམག་གི་དབང་ཤུགས་འོག་ཡོད་པའི་གྲོང་ཁྱེར་གཅིག་པུ་ཆགས་ཡོད་འདུག གྲོང་ཁྱེར་དེ་ལེན་རྒྱུ་ནི་གྱེན་ལངས་པའི་རྒྱལ་ཁའི་མཚོན་རྟགས་ཤིག་ཏུ་བརྩི་བཞིན་ཡོད་པ་རེད། དེའི་རྒྱུ་མཚན་ནི། གཅིག་ནས་གྷ་ཌ་ཧྥེའི་ཤོག་ཁག་གི་དབང་ཤུགས་ཡོད་པའི་གྲོང་ཁྱེར་མཐའ་མ་ཡིན་པ་དང་། གཉིས་ནས་གྷ་ཌ་ཧྥེའི་སྐྱེས་ཡུལ་ཡང་ཡིན་འདུག
ད་ཆར་གྷ་ཌ་ཧྥེ་གར་ཡོད་ཤེས་ཐུབ་ཀྱི་མེད་པ་དང་། གནད་དོན་དེའི་ཐད་ཨེ་ཇབ་ (Egypt) གཞུང་འབྲེལ་གསར་ལམ་མེ་ནཱ་(MENA)ཞེས་པར། ཕྱི་ཚེས་ ༢༦ ཉིན་གྱི་ཞོགས་པར་དྲག་ཆས་ཐོགས་པའི་རླངས་འཁོར་དྲུག་ལེ་བྷེ་ཡའི་རྒྱལ་མཚམས་བརྒལ་ཏེ་ཨལ་ཇེ་རི་ཡཱའི་(Algeria) ས་ཁོངས་སུ་ཕྱིན་ཡོད་ཚུལ་དང་། དེ་ནི་གྷ་ཌ་ཧྥེ་གཞུང་གི་དཔོན་རིགས་ཁག་ཅིག་ཡིན་པ་མ་ཟད། གྷ་ཌ་ཧྥེ་ཡང་ཁོང་ཚོ་མཉམ་དུ་ཡོད་སྲིད་པའི་ཚོད་དཔག་བྱེད་ཀྱི་ཡོད་འདུག འོན་ཀྱང་། གྷ་ཌ་ཧྥེའི་ཤོག་ཁག་གིས་ད་དུང་ཁོང་ལེ་བྷེ་ཡའི་རྒྱལ་སར་ཡོད་པ་དང་། མའོ་སཱ་ཨའེ་བྷི་རཱ་ཧེམ་ཕྱི་ཚེས་ ༢༦ ཉིན་གྷ་ཌ་ཧྥེ་དང་ཐུག་འཕྲད་བྱས་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༢༤ ཉིན་གྱེན་ལངས་ཤོག་ཁག་གིས་རྒྱལ་ས་ཏེ་རི་པོ་ལེ་བཙན་བཟུང་རྒྱལ་ཁ་ཐོབ་ཡོད་པའི་དགའ་སྟོན་བྱེད་མགོ་ཚུགས་འཕྲད་ནེ་ཇི་རེ་ཡཱ་(Nigeria) གཙོས་པའི་ཨ་ཧྥི་རི་ཀ་དང་རྒྱལ་སྤྱིའི་སྲིད་གཞུང་ཁག་ཅིག་གིས་ལཱེ་བྷེ་ཡའི་གྱེན་ལངས་ཤོག་ཁག་གི་གཞུང་(Transtional National Council) དེ་ཁྲིམས་མཐུན་ཡིན་པར་ངོས་ལེན་བསྒྲགས་གཏམ་སྤེལ་ཡོད་པ་རེད། འོན་ཀྱང་། ཨལ་ཇེ་རི་ཡཱ་གཞུང་གིས་ལེ་བྷེ་ཡའི་ནང་གྱེན་ལངས་ངོ་རྒོལ་བྱུང་པ་ནས་བཟང་བར་གནས་ཀྱི་སྲིད་ཇུས་བཟུང་ཡོད་པ་དང་། ཟླ་འདིའི་ཕྱི་ཚེས་ ༢༨ ཉིན་གྱེན་ལངས་པའི་གཞུང་གསར་པར་ངོས་ལེན་མེད་པའི་གསལ་བསྒྲགས་སྤེལ་འདུག
ཕྱི་ཚེས་ ༢༤ ཉིན་གྷ་ཌ་ཧྥེ་ཡིས་བསྒྲགས་གཏམ་ཞིག་སྤེལ་ཏེ། “འཆི་ན་རྒྱལ་གཅེས་པ་ཞིག་དང་གསོན་ན་རྒྱལ་ཁ་ལེན་ཆེད་ཁོང་གང་དུ་གནས་ཀྱང་གྱེན་ལངས་ཤོག་ཁག་དང་ཎ་ཏོ་(Nato) མཉམ་འབྲེལ་དམག་དཔུང་ལ་ཤི་གསོན་གྱིས་དྲག་འཛིང་མུ་མཐུད་བྱ་རྒྱུ་ཡིན”ཞེས་དང་། “གྲོང་ཁྱེར་མི་མང་ཚོས་རང་ཉིད་སོ་སོའི་ས་ནས་གྱེན་ལོག་པ་དང་ཎ་ཊོ་དམག་མཐར་དཀྲོད་བྱ་རྒྱུར་ཁྱོན་ཡོངས་ནས་ཕར་རྒོལ་བྱོས།” ཞེས་སྐུལ་འདེད་བྱས་ཡོད། ད་ལྟ་གྱེན་ལངས་ཤོག་ཁག་དང་ཎ་ཏོ་མཉམ་འབྲེལ་དམག་གི་ཁོངས་གཏོགས་སྲིད་གཞུང་དག་ལ་བློ་འཚབ་ཆེན་པོ་ཞིག་ཡོད་པ་ནི། ཨེ་རག་གི་སྲིད་འཛིན་ཟུར་པ་སཱ་ཌམ་ཧུ་སེན་(Saddam Hussein) གྱི་སྲིད་དབང་ཤོར་རྗེས་ཟླ་བརྒྱད་རིང་སྦེད་སྐུང་བྱས་ཐུབ་པ་མ་ཟད། ཨོལ་ཁ་ཊ་དང་མཉམ་འབྲེལ་བྱས་ཏེ་དྲག་སྤྱོད་ཀྱི་བྱ་འགུལ་སྤེལ་པ་དང་། དེ་བཞིན། བྷེན་ལཱ་ཌན་དགུ་གཅིག་གཅིག་དོན་རྐྱེན་བྱུང་རྗེས་ལོ་ ༡༠ ལྷག་ལ་སྦེད་སྐུང་གིས་ཨ་རི་གཙོས་རྒྱལ་སྤྱིའི་སྲིད་གཞུང་མང་པོར་དཀའ་ངལ་ཆེན་པོ་སྤྲད་ཡོད་སྟབས། ཐེངས་འདིར་གྷ་ཌ་ཧྥེ་འཛིན་བཟུང་ཐུབ་རྒྱུའམ་དེ་མིན་གྲོས་མོལ་འགུག་ཐབས་མ་བྱུང་ཚེ་རྗེས་སུ་དཀའ་རྙོག་འབྱུང་རྒྱུའི་ཉེན་ཁ་ཞིག་ལྷག་ཡོད་པ་དེ་རེད།
འདི་ལོའི་ཕྱི་ཟླ་གཉིས་པ་ནས་ལཱེ་བྷེ་ཡའི་མི་མང་གིས་སྲིད་དབང་སྒེར་འཛིན་གཞུང་མགོ་རྟིང་སློག་རྒྱུའི་གྱེན་ལངས་བྱས་ཤིང་། རིམ་བཞིན་ཎ་ཊོ་ (Nato)མཉམ་འབྲེལ་དམག་གི་རྒྱབ་རོགས་ལ་བརྟེན་ཏེ། ལེ་བྷེ་ཡའི་རྒྱལ་ས་ཊི་རེ་པོ་ལེ་བདག་བཟུང་ཐུབ་ཡོད།
གསར་འགོད་པ། བནྡེ་སྐྱབས།
“འཆི་ན་རྒྱལ་གཅེས་པ་ཞིག་དང་གསོན་ན་རྒྱལ་ཁ་ལེན་ཆེད་གང་དུ་གནས་ཀྱང་རྒྱ་དམར་ལ་རྒོལ་ངེས་ཡིན“ ཞེས་བཅོས་ན་ཡག་པོ་མི་འདུག་གམ།
བླ་བསང་པོ་འདི་ཡང་མའོ་ཙེ་ཏུང་དང་གཅིག་འདྲ་ཡིན་པ་འདྲ། ད་ནི་ཁོ་གནམ་བཏགས་རྒྱུག་རྒྱུ་ལས་མེད་པ་འདྲ།