བཀའ་ཁྲི་བློ་བཟང་སེང་གེ་མཆོག་གིས་བཀའ་ཤག་སྐབས་བཅུ་བཞི་བའི་ལས་དོན་དབུ་འཛུགས་གནང་སྟེ། བདུན་ཕྲག་གསུམ་འགྲོ་བཞིན་པའི་མཚམས་སུ། འདི་ག་བོད་ཀྱི་དུས་བབ་གསར་ཁང་གིས་ལས་དོན་སྐོར་ཞིག་གི་ཐོག་ལ་དམིགས་བསལ་བཅར་འདྲི་ཞུས་ཡོད།
དྲི་བ། བཀའ་ཁྲི་མཆོག་གིས་ལས་འགན་དབུ་འཛུགས་བྱས་ཏེ་གངས་སྐྱིད་ནས་ཟླ་གཅིག་ཙམ་འགྲོ་བཞིན་པའི་རིང་། དཀའ་ངལ་དང་ཡར་རྒྱས་གཏོང་དགོས་ས་གཙོ་བ་གང་དག་གཟིགས་ཡོད་པ་དང་། ད་ལྟའི་ཆར་ལས་དོན་གསར་བ་གང་དག་བརྩམས་ཡོད་དམ།
ལན། ལས་འགན་མགོ་བཙུགས་ཏེ་བདུན་ཕྲག་གསུམ་ལས་སོང་ཡོད་པ་མ་རེད། མང་ཆེ་ཤོས་ཏེ་འཛིན་སྐྱོང་རང་གི་ཐོག་ནས་ཉིན་རེ་བཞིན་ཐག་གཅོད་དགོས་པའི་རིགས་དང་། གཞན་ལ་ཐུག་འཕྲད་བྱ་དགོས་པ་དེ་དག་ཐོག་དུས་ཚོད་གཏོང་བཞིན་ཡོད། བཀའ་ཤག་ཆ་ཚང་མ་འཛོམས་གོང་ལ་ངས་ཐག་གཅོད་མང་པོ་བྱས་ན་དེ་ལན་པོ་ཡོད་མ་རེད་བསམ་གྱི་ཡོད། ང་རང་སྒེར་ངོས་ནས་དེ་སྔོན་ལྷན་ཁང་ཚང་མར་བཅར་ཏེ་ལས་བྱེད་ ༣༠༠ ལྷག་ཡོད་པ་རེ་རེ་བཞིན་ཐུག་འཕྲད་བྱས་ཏེ། ཁོ་ཚོའི་གནས་སྟངས་དང་ལས་དོན་བྱེད་ཕྱོགས་ཤེས་རྟོགས་བྱས་པ་ཡིན། ད་ལྟ་དྲུང་ཆེ་རྣམ་པ་ཚོ་དང་ལྷན་དུ་ཐུག་འཕྲད་གོ་བསྡུར་བྱེད་བཞིན་ཡོད། སྔོན་མ་མཁས་དབང་ཟམ་གདོང་རིན་པོ་ཆེ་མཆོག་གི་སྐབས་སུ། ལས་བྱེད་བརྒྱ་ཆ་ ༥༠ ཙམ་རྩ་དགོངས་ཞུས་ཡོད་པ་རེད། དེར་བརྟེན། ལས་བྱེད་རྣམ་པ་མུ་མཐུད་གནས་ཐུབ་ཐབས་སུ་ཐབས་ཤེས་ག་རེ་ཡོད་མེད་ཐད། དྲུང་ཆེ་རྣམ་པ་ཚོར་ཉམས་མྱོང་ཆེན་པོ་ཡོད་དུས་ཁོང་རྣམ་པར་གོ་བསྡུར་ཞུས་ཏེ། ཐབས་ཤེས་འཚོལ་རྒྱུར་བསམ་བློ་གཏོང་གི་ཡོད། ལས་བྱེད་མང་པོ་ཞིག་གཞུང་ཞབས་ནང་འཛུལ་ཏེ་ལོ་གཉིས་གསུམ་རིང་ཉམས་མྱོང་བསགས་རྗེས་ཐོན་འགྲོ་བཞིན་ཡོད་པ་རེད། དེ་ནི་ཁོ་ཚོ་མི་སྒེར་ལ་མཚོན་ནའང་དུས་ཚོད་འཕྲོ་བརླག་རེད་ལ། ང་ཚོ་འཛིན་སྐྱོང་གི་ངོས་ནས་ཀྱང་བསྐྱར་དུ་སྐུ་ལས་སྐྱོན་དེ་ལས་བྱེད་གསར་འདེམས་དང་། ཁོ་ཚོར་སློབ་སྦྱོང་སྤྲད་དེ་ཉམས་མྱོང་གསོག་དགོས་ཀྱི་ཡོད་པ་དེ་གངས་སྐྱིད་ཀྱི་དཀའ་ངལ་ཆེ་ཤོས་ལྟ་བུར་མཐོང་སོང་།
དྲི་བ། ༢༠༠༨ ཚུན་གྱི་ལོ་གསུམ་ལྷག་རིང་བོད་དུ་བདེན་དོན་འཐབ་རྩོད་ཆེད་མི་གསུམ་གྱིས་རང་ལུས་མེར་བསྲེགས་བཏང་བ་རེད། གནས་ཚུལ་དེ་ལ་དཔག་པའི་བཙན་སྤྱི་ཚོགས་ནང་ཚད་མཐོ་ཤོས་ཀྱི་ལས་འགུལ་གང་དག་སྤེལ་དགོས་པར་གཟིགས་ཀྱི་ཡོད་དམ།
ལན། ༢༠༠༨ ལོར་བོད་ཆོལ་ཁ་གསུམ་ནང་བོད་མི་དཔའ་བོ་དཔའ་མོ་མང་པོས་རང་སྲོག་བློས་བཏང་སྟེ་སྒེར་ལངས་ཤུགས་ཆེན་པོ་བྱུང་བ་དང་། ད་ལྟ་ད་དུང་རང་སྲོག་བློས་གཏོང་མཁན་བྱུང་དང་འབྱུང་བཞིན་ཡོད་པ་རེད། ཁོང་རྣམ་པའི་སྙིང་སྟོབས་ལ་གུས་ཞབས་ཞུ་དགོས་པ་དེ་གལ་ཆེན་པོ་རེད། ༢༠༠༨ ལོར་སྒེར་ལངས་བྱས་པའི་བཀའ་དྲིན་ལ་བརྟེན་ནས་ཕྱི་ལ་ཡོད་པའི་བོད་མི་ཚོ་ཡིན་ནའང་། ཆབ་སྲིད་ལས་འགུལ་ནང་འཛུལ་ཞུགས་བྱེད་མཁན་མང་པོ་བྱུང་སྟེ་རྒྱལ་སྤྱིའི་སྡིངས་ཆའི་སྒང་བོད་དོན་ཐོག་དོ་སྣང་ཤུགས་ཆེ་རུ་འགྲོ་བཞིན་ཡོད། ཉེ་སྔོན་བཀའ་བློན་ཁྲི་པ་དང་གྲོས་ཚོགས་འཐུས་མིའི་འོས་བསྡུའི་སྐབས་སུ། མི་མང་འཛུལ་ཞུགས་གནང་བ་དེ་རྒྱ་གཞུང་ལའང་ངོམས་ཆོག་པ་ཞིག་དང་། ང་ཚོའི་སྒྲིག་འཛུགས་འདི་རྒྱ་གཞུང་གིས་བཤད་པ་ལྟར་བརླག་མེད་པར་མ་ཟད། མི་ཐོག་རྙིང་པ་རྣམས་ཀྱིས་དཀའ་ལས་བརྒྱབ་བཞག་པ་དེ་ང་ཚོའི་མི་ཐོག་གསར་བ་ཚོས་མུ་མཐུད་རྒྱུན་གནས་ཐུབ་པ་བྱས་ཏེ། བོད་པའི་རྩ་དོན་རྩོད་རྒྱུ་ཡིན་པའི་བརྡ་ལན་དེ་པེ་ཅིན་གཞུང་ལ་གསལ་བོ་བསྟན་ཡོད་པ་རེད། དེ་བཞིན་༸གོང་ས་མཆོག་གིས་ཆབ་སྲིད་ཀྱི་སྐུ་དབང་མི་མང་གིས་བདམས་པའི་མགོ་ཁྲིད་ལ་གནང་གི་ཡིན་གསུངས་པའི་རྒྱུ་མཚན་གཅིག་ནི། ང་ཚོ་བོད་པའི་སྤྱི་ཚོགས་ནང་མི་མང་གི་ཆབ་སྲིད་ཀྱི་གོ་རྟོགས་ཚད་མཐོ་བོར་བསླེབས་ཡོད་པ་དང་། དེ་ལ་༸གོང་ས་མཆོག་གིས་ཡིད་ཆེས་དང་གདེང་ཚོད་ཡོད་པའི་ཐོག་ནས་ཆབ་སྲིད་སྐུ་དབང་གནང་བ་རེད། ཉེ་སྔོན་དམ་འབུལ་གྱི་སྐབས་སུའང་༸གོང་ས་མཆོག་གིས་རིང་ནས་སྙིང་དུ་བརྣག་པའི་འདོད་པའི་དོན་དེ་ད་ལྟ་འགྲུབ་སོང་ཞེས་གསུངས་ཡོད་པ་རེད། རྒྱལ་སྤྱིའི་སྒང་ལ་ཡིན་ནའང་བཙན་བྱོལ་བོད་པ་ཚོས་གང་ལ་གང་འཚམ་སྐུ་ལས་བསྐྱོན་ཡོད་པ་དང་། ང་ཚོའི་དམངས་གཙོའི་ལམ་ལུགས་ཀྱི་ཐོག་ནས་འོས་བསྡུ་བྱེད་པ་འདི་ཡང་གཟི་བརྗིད་ལྡན་པ་ཞིག་ཆགས་ཡོད། འདི་དག་ནི་ང་ཚོ་བཙན་བྱོལ་ལ་ཡོད་པའི་བོད་མི་ཚོས་བོད་ནང་གི་ཤ་ཁྲག་གཅིག་པའི་དཔའ་བོ་དཔའ་མོ་ཚོས་སྐུ་ལས་བསྐྱོན་བཞག་པ་དེ་ལ་ཞལ་འདེབས་རེད་བསམ་གྱི་ཡོད།
དྲི་བ། སྐུ་ཉིད་ཀྱི་གསུང་བཤད་སྔ་ཕྱིའི་ནང་འབྱུང་འགྱུར་ལོ་ ༢༠ ནང་ཁྱད་ལས་པ་དང་རིགས་གཅིག་རྐང་འཛིན་པ་ ༡༠༠༠༠ འཐོན་པ་གནང་རྒྱུ་ཡིན་སྐོར་གསུངས་སོང་། དེ་དག་གིས་བོད་སྤྱི་ཚོགས་ལ་ཞབས་ཞུ་དང་ལས་དོན་སྒྲུབ་སའི་ཁོར་ཡུག་གི་ཐད་གྲ་སྒྲིག་དང་འཆར་སྣང་གང་འདྲ་ཡོད་དམ།
ལན། ལོ་ ༢༠ ནང་ལ་བཙན་བྱོལ་དུ་ཁྱད་ལས་པ་དང་རིགས་གཅིག་རྐང་འཛིན་པ་ ༡༠༠༠༠ འཐོན་རྒྱུ་དང་། བོད་ནང་ཁྱད་ལས་པ་དང་རིགས་གཅིག་རྐང་འཛིན་ ༡༠༠༠༠༠ འཐོན་ཐུབ་རྒྱུར་རེ་བ་ཞུ་བཞིན་ཡོད་ཅེས་ཞུས་པ་ཡིན། དེའང་བཙན་བྱོལ་ཟེར་དུས་རྒྱ་གར་གཅིག་པུ་མ་ཡིན་པར་ཕྱི་རྒྱལ་ལུང་པ་ ༣༠ ལྷག་ནང་ཡོད་པའི་བོད་པ་སྤྱི་ཡོངས་ལ་ལབ་པ་ཡིན། ང་རང་ཉིད་ཀྱི་ཐོག་ནས་ཤེས་ཡོན་ཡར་རྒྱས་གཏོང་བ་གཙོ་བོར་འཛིན་བཞིན་ཡོད་ལ། དེ་ཡང་ནས་ཡང་དུ་ཞུ་བཞིན་ཡོད། ཤེས་ཡོན་ཡར་རྒྱས་ཆེད་ག་རེ་བྱ་དགོན་མིན་ཐད་གཏིང་ཟབ་མོའི་སྒོ་ནས་ཞིབ་འཇུག་བྱ་རྒྱུ་ཡིན། ཟླ་ ༩ ཚེས་ ༣ ཉིན་ལྡི་ལིར་སློབ་གྲྭ་ཁག་གི་བོད་པའི་སློབ་སྤྱི་ཁག་ཚང་མ་ཕེབས་རོགས་ཞུས་ཡོད། ང་རང་བཅར་དེ་ཉིན་གཉིས་རིང་ཚོགས་འདུ་འཚོགས་རྒྱུ་ཡིན། དགེ་རྒན་དང་སློབ་སྤྱི་རྣམས་ལ་བོད་པའི་སློབ་ཕྲུག་ཚོར་སློབ་སྦྱོང་ཡར་རྒྱས་གཏོང་རྒྱུར་ཐབས་ཤེས་ག་རེ་གནང་རྒྱུ་ཡོད་མེད་དང་། ང་ཚོའི་ངོས་ནས་རྗེས་ལུས་ཐེབས་པ་དང་ཆད་ལྷག་ཤོར་བ་གང་དག་ཡོད་མེད་སྒང་ལ་གྲོས་བསྡུར་བྱ་རྒྱུ་ཡིན། དེའི་ཐོག་གི་གྲོས་བསྡུར་གྱི་སྙིང་བོ་ཕྱོགས་བསྡོམས་བྱས་ཤིང་། དེའི་རྗེས་ལ་སློབ་གྲྭ་ཁག་གི་འཛིན་སྐྱོང་བ་ཚང་མར་འབྲེལ་བ་གནང་སྟེ། ཁོང་རྣམས་ལའང་ཚོགས་འདུ་བསྡུས་ཏེ་འཛིན་སྐྱོང་གི་ངོས་ནས་ཤེས་ཡོན་ཡར་རྒྱས་གཏོང་ཐབས་ལ་ག་རེ་བྱ་དགོས་ཀྱི་ཡོད་མེད་ཤེས་རྟོགས་བྱས་རྗེས། རྒྱ་གར་དང་རྒྱལ་སྤྱིའི་མཁས་པ་གདན་འདྲེན་ཞུས་ཏེ་ང་ཚོར་ཡོད་པའི་དཀའ་ངལ་དེ་དག་སེལ་ཐབས་ཐད་བཀའ་བསྡུར་གནང་སྟེ་ཐབས་ལམ་འཚོལ་རྒྱུ་ཡིན། ལས་དོན་དེ་དག་ལ་འཛིན་སྐྱོང་གི་ཐོག་ནས་དཔལ་འབྱོར་སོགས་ཀྱི་མཐུན་འགྱུར་གནང་དགོས་པ་རེད། ད་དུང་རྒྱལ་སྤྱིའི་སྡིངས་ཆའི་སྒང་ལ་འགྲོ་བར་ཤེས་ཡོན་གལ་ཆེན་པོ་ཡིན་པ་དེ་ཕ་མ་དང་བྱིས་པ་ཚང་མར་ཞུས་ཏེ་ཁོར་ཡུག་བསྐྲུན་ཐུབ་པ་ཡིན་ན། རིམ་པས་བོད་པ་ཁྱད་ལས་པ་དང་རིགས་གཅིག་རྐང་འཛིན་པ་མང་པོ་ཞིག་འཐོན་ཡོང་གི་རེད། ཁྱད་ལས་པ་རིགས་གཅིག་རྐང་འཛིན་པ་ཐོན་པའི་ཐོག་ནས་ང་ཚོའི་འཛིན་སྐྱོང་དང་སྤྱི་ཚོགས་ནང་ཞབས་ཞུ་གནང་བ་ཡིན་ན། ཞབས་ཞུ་དེ་ནུས་པ་འཐོན་པ་ཞིག་ཡོང་གི་རེད། གལ་སྲིད་དེ་ལྟར་གནང་མ་ཐུབ་པ་ཡིན་ནའང་། ཁོ་རང་ཚོ་ཁྱད་ལས་པ་དང་རིགས་གཅིག་རྐང་འཛིན་འཐོན་པའི་ལག་ཁྱེར་ཡོད་པའི་རྗེས་ལ། སོ་སོའི་མི་ཚེ་བསྐྱལ་བ་དང་ཕ་མ་སྤུན་མཆེད་ལ་ལྟ་རྟོག་བྱ་རྒྱུ་ལས་སླ་བོ་ཡོང་གི་རེད། རིགས་གཅིག་རྐང་འཛིན་པ་དག་སྤྱི་ཚོགས་ཀྱི་སྡིངས་ཆ་བསྐྲུན་ཐབས་ཐད། ལོ་རེ་ལ་གཞུང་ཞབས་བརྒྱ་ཆ་ ༡༥ ཙམ་དགོངས་པ་ཞུ་བཞིན་ཡོད་དུས་དེ་དག་གི་ཚབ་ལ་གཞུང་ཞབས་པ་གསར་བསྡུ་བྱ་དགོས་པ་རེད། ལྷན་ཁང་ཁག་ལ་དཔག་པའི་ལག་ཁྱེར་ཡོད་ན་དེ་ལྟར་འཛུལ་ཞུགས་གནང་སྟེ་ཕྱག་ལས་གནང་བ་ཡིན་ན། མི་སྒེར་སོ་སོར་ཡང་ལས་ཀའི་ཐོག་སྤྲོ་སྣང་ལྡན་པ་དང་ནུས་པ་ཐོན་པའི་ཞབས་ཞུ་སྒྲུབ་ཐུབ་པ་རེད།
དྲི་བ། སྐུ་ཉིད་ཀྱིས་ཤེས་ཡོན་སྲིད་བྱུས་གསར་བའི་སྟེང་གཟིགས་ཚུལ་གང་འདྲ་ཡོད་པ་དང་། ཉིད་ཀྱི་གཏམ་བཤད་ཁག་ཅིག་ནང་འཛིན་རིམ་ལྔ་བ་ཡན་གྱི་སློབ་ཚན་ཚང་མ་དབྱིན་ཡིག་ནང་ཁྲིད་སྤེལ་བྱ་དགོས་ཚུལ། ལྷག་པར་དུ་མཐོ་རིམ་སློབ་མ་ཚོས་དབྱིན་ཡིག་ཐོག་འབད་བརྩོན་ཆེ་བ་གནང་དགོས་སྐོར་གསུངས་དོན་ཅི་ཡིན།
ལན། ཤེས་ཡོན་སྲིད་བྱུས་གསར་བ་དེ་ ༢༠༠༤ ནས་མགོ་བཙུགས་པ་རེད། ད་ལྟ་འཛིན་གྲྭ་དང་པོ་ནས་ལྔ་བར་ལག་བསྟར་བཞིན་ཡོད། ཤེས་ཡོན་སྲིད་བྱུས་དེ་མུ་མཐུད་དུ་ལག་བསྟར་གནང་སྟེ་འཛིན་རིམ་བཅུ་གཉིས་པར་དུ་འགྲོ་རྒྱུ་ཡོད་པ་རེད། ལག་ལེན་བསྟར་སྟངས་ཀྱི་ཐོག་ནས་ངས་ག་རེ་ཞུ་བཞིན་ཡོད་ཟེར་ན། བོད་ཡིག་གཙོ་བོའི་ཐོག་སློབ་ཚན་ཁག་འགྲོ་དགོས་ཀྱི་ཡོད་པ་གཞིར་བཟུང་ཐོག འཛིན་གྲྭ་ལྔ་བ་ནས་བརྒྱད་པའི་བར་གྱི་ཚན་རིག་དང་ཨང་རྩིས་དེ་བོད་ཡིག་དང་དབྱིན་ཡིག་གཉིས་ཆའི་ཐོག་ནས་བསླབ་དགོས་ཀྱི་འདུག་ཟེར་གྱི་ཡོད། དེ་ལ་རྒྱུ་མཚན་གཉིས་ཡོད། དང་པོ་དེ་ང་ཚོའི་སློབ་ཕྲུག་ཚོ་སློབ་གྲྭ་ཐོན་ཡོང་སྐབས། ཨང་རྩིས་དང་ཚན་རིག་སྐྱོ་བོ་ཡོད་པ་དེ་གསལ་བོ་རེད། དེ་ཡར་རྒྱས་གཏོང་བ་ལ། བོད་ཡིག་ཐེངས་གཅིག་དང་། དབྱིན་ཡིག་ཐེངས་གཅིག་བཅས་སློབ་ཚན་ཚར་གཉིས་བསླབ་པ་ཡིན་ན། གཞི་རིམ་སློབ་གསོའི་ཐོག་ནས་ཀྱང་ཨང་རྩིས་དང་ཚན་རིག་ཡར་རྒྱས་འགྲོ་བ་ལ་རེ་བ་ཅིག་མཐོང་གི་འདུག གཉིས་ནས་ཨང་རྩིས་དང་ཚན་རིག་ནི་རྒྱལ་སྤྱིའི་སྤྱི་ཡོངས་ཀྱི་ཐོག་ནས་དབྱིན་ཡིག་ཐོག་ནས་བསླབ་ཀྱིན་ཡོད་པ་རེད། བརྡ་ཆད་དང་ལྟ་གྲུབ་ཧ་ཅང་མང་པོ་ཡོད་པ་དེ་དག་དབྱིན་ཡིག་ལས་བོད་ཡིག་ནང་བསྒྱུར་ཏེ་བསླབ་པ་ཡིན་ན། དང་པོ་བརྡ་ཆད་དང་ལྟ་གྲུབ་དེ་རྣམས་ཏག་ཏག་སྡོད་ཀྱི་ཡོད་མེད་དང་མགོ་འཚོས་ཀྱི་ཡོད་མེད་ཀྱི་གནས་ཚུལ་ཞིག་ཡོད་པ་རེད། ཨུ་ཚུགས་ཀྱིས་བསླབས་ཀྱང་རྗེས་མ་མཐོ་སློབ་ནང་དབྱིན་ཡིག་ཐོག་ལྟ་དགོས་དུས་བརྡ་ཆད་དང་ལྟ་གྲུབ་དེ་དག་གནད་འགག་ཆགས་ཡོད། དང་པོ་ནས་བོད་ཡིག་དང་དབྱིན་ཡིག་གཉིས་ཀའི་ཐོག་ནས་བསླབ་པ་ཡིན་ན། རང་བཞིན་གྱིས་ཚན་རིག་དང་ཨང་རྩིས་ཡར་རྒྱས་འགྲོ་བ་དང་། བརྡ་ཆད་དང་ལྟ་གྲུབ་ཡག་པོ་མགོ་འཚོས་པར་ཕན་ཐོགས་ཆེན་པོ་ཡོང་གི་རེད།
དྲི་བ། བཀའ་ཤག་སྐབས་བཅུ་བཞི་པའི་ཆབ་སྲིད་ལངས་ཕྱོགས་དབུ་མ་ཡིན་པ་གསལ་ཁ་བྱུང་ཡོད། འོན་ཀྱང་། གནད་དོན་གཞན། རྒྱ་གཞུང་ལ་སྤྲད་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དང་། རྒྱ་ཕྱོགས་ནས་བཏོན་པའི་རྒྱུན་འཁྱོངས་བྱ་དགོས་པ་གསུམ་སོགས་ཀྱི་ཐོག་ལངས་ཕྱོགས་གང་འདྲ་འཛིན་འཆར་ཡོད་དམ།
ལན། དེ་དག་ཆ་ཚང་ལ་བསྐྱར་ཞིབ་ཅིག་བྱ་རྒྱུ་གལ་ཆེན་པོ་རེད། བོད་རྒྱ་ཞི་མོལ་ལས་དོན་ཚོགས་ཆུང་དེ་ཕྱི་ཟླ་ ༡༠ ཚེས་མགོར་འཚོགས་རྒྱུ་གཏན་འཁེལ་གནང་ཡོད། ཚོགས་འདུ་དེ་ཚོགས་པའི་ཐོག་ནས་ད་ལྟའི་བར་དམིགས་བསལ་སྐུ་ཚབ་ཕེབས་ཏེ་བཀའ་མོལ་ག་རེ་གནང་ཡོད་མེད་དང་། ད་ལྟའི་གནས་སྟངས་ག་རེ་ཆགས་ཡོད་མེད། དེ་བཞིན་ཚོགས་འདུར་ཕེབས་མཁན་ཚོགས་མི་ཚོར་དགོངས་ཚུལ་ག་རེད་ཡོད་མེད། ཆ་ཚང་རྟོགས་པའི་ཐོག་ནས་བསྐྱར་ཞིབ་ཆ་ཚང་བ་ཞིག་བྱས་ཏེ། འགྱུར་བ་ག་རེ་གཏོང་དགོས་མིན་གཞི་ནས་ཐག་ཆོད་ཡོང་གི་རེད། ད་ལྟ་ང་མི་གཅིག་རང་ལུགས་པ་ཆགས་ཡོད་དུས་གསལ་བོར་ཞུ་ཐུབ་ཀྱི་མི་འདུག
དྲི་བ། ༧གོང་ས་མཆོག་གི་ཆབ་སྲིད་ཀྱི་ཐུགས་འགན་མཚམས་འཇོག་གནང་རྗེས། བཀའ་ཤག་ལ་འགན་དབང་སྔར་ལས་ཆེ་བ་ཆགས་ཡོད། བཀའ་ཤག་སྐབས་བཅུ་བཞི་པར་བཀའ་ཤག་སྐབས་བཅུ་གསུམ་པ་ལས་ལྷག་པའི་ལས་འགན་གང་དག་ཡོད་པར་གཟིགས་ཀྱི་ཡོད་དམ།
ལན། དེ་བཅའ་ཁྲིམས་ནང་གསལ་བོར་བཀོད་ཡོད། སྔོན་མ་བཀའ་ཤགས་སྐབས་བཅུ་གསུམ་པའི་སྐབས་སུ། ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༸གོང་ས་མཆོག་ཆགས་ཡོད་པ་རེད། ད་ལྟ་༸གོང་ས་མཆོག་གིས་ཆབ་སྲིད་སྐུ་དབང་ཆ་ཚང་མཚམས་འཇོག་གནང་ཡོད་སྟབས། མཐའ་མའི་ཐག་གཅོད་བྱེད་པའི་འགན་དེ་བཀའ་ཤག་རང་ལ་བབ་ཡོང་གི་ཡོད། དེ་གཙོ་ཆེ་ཤོས་ཤིག་རེད་བསམ་གྱི་འདུག ད་ལྟ་ལས་དོན་ཡག་ཉེས་ག་རེ་བྱུང་ཡང་བཀའ་ཤག་བཅུ་བཞི་པ་རང་ལ་རག་ལས་བསྡད་ཡོད་པ་རེད། དེ་ཡིན་དུས་ཕྱག་ལས་ག་རེ་གནང་བ་ཡིན་ནའང་གཟབ་གཟབ་བྱ་རྒྱུ་གལ་ཆེན་པོ་རེད། ཡིན་ནའང་། ༧གོང་ས་བཞུགས་བཞིན་པ་ཡིན་དུས་བཀའ་སློབ་ལམ་སྟོན་ཞུ་དགོས་པ་དེ་གལ་ཆེན་པོ་རེད། ཁོང་གི་དགོངས་པ་གཞི་བཞག་པའི་ཐོག་ནས་ཕྱག་ལས་གནང་དགོས་པ་དེའང་གལ་ཆེན་པོ་རེད། གཙོ་ཆེ་ཤོས་གྲོས་ཚོགས་ནས་ཐག་གཅོད་ག་རེ་གནང་པ་ཡིན་ན། དེ་བཀའ་ཤག་གིས་ལག་ལེན་བསྟར་དགོས་པ་རེད།
དྲི་བ། ལོ་སྔ་ཕྱིར་གཞིས་ཆགས་ཁག་ནས་མི་མང་པོ་ཞིག་ཕྱི་རྒྱལ་དུ་སྐྱོད་ཀྱི་ཡོད་པ་དང་། གསར་འབྱོར་བ་མང་པོ་ཞིག་ཕྱིར་བོད་ནང་ལོག་གི་ཡོད་འདི་རྩ་དོན་འཐབ་རྩོད་རྒྱུན་གནས་ཐུབ་མིན་གྱི་ཉེན་ཁ་ཞིག་ལ་མཐོང་གི་ཡོད་མེད་དང་། མཐོང་གི་ཡོད་ན་ཉེན་ཁ་དེ་སེལ་ཐབས་སུ་ལམ་ཁ་གང་འདྲ་གཟིགས་ཀྱི་ཡོད་དམ།
ལན། ཕྱི་རྒྱལ་ཁག་ལ་ཕེབས་མཁན་རྣམས་འགོག་ཐབས་ཡོད་པ་མ་རེད། ཁོང་ཚོ་རང་དབང་ཐོག་གཞུང་ཚབ་ནས་ཆོག་མཆན་རག་ན་ཕེབས་འགྲོ་བཞིན་ཡོད། བོད་ནང་ཕེབས་བཞིན་པ་དེ་སྤྱིར་བཏང་གནས་མཇལ་དང་སློབ་སྦྱོང་དུ་ཕེབས་མཁན་རྣམས་ཕར་ལོག་དགོས་པའི་གནས་སྟངས་ཤིག་ཆགས་ཡོང་གི་ཡོད། བོད་ནས་ཕེབས་མཁན་མང་པོ་ཞིག་ཕྱིར་ལོག་གི་ཡོད་པ་དེ་གཅིག་བྱས་ན་རྒྱ་གཞུང་གིས་ནང་མིར་གནོན་ཤུགས་སྤྲོད་ཀྱི་ཡོད་པ་སོགས་ཀྱང་ཡིན་སྲིད་པ་རེད། གནས་ཚུལ་འདི་ཕུགས་ཀྱི་ཉེན་ཁ་ཞིག་ལ་ངས་མཐོང་གི་མེད། བུ་ཁྱིམ་སློབ་གྲྭ་དང་སྨན་རྩིས་ཁང་། ནོར་བུ་གླིང་ཁ། དེ་བཞིན་གཞུང་ཞབས་དང་གྲོས་ཚོགས་ནང་ལའང་བོད་ནས་གསར་བ་ཕེབས་མཁན་མང་པོ་ཡོད། ལྷག་པར་དུ་གྲོས་ཚོགས་དེ་སྐུ་དབང་ཆེ་ཤོས་ཆགས་ཡོད། མགོ་སྐུ་སྒེར་ཡིག་ཚང་ནས་ལྷན་ཁང་ཁག་གི་བར་བོད་ནས་གསར་དུ་ཕེབས་མཁན་སྲི་ཞུ་བ་མང་པོ་ཡོད་པ་རྣམས་གཏན་འཇགས་ཆགས་ཡོད། ཡིན་ནའང་། སྐབས་སྐབས་སུ་རྒྱ་ནག་གི་གནོན་ཤུགས་འོག་མི་གྲངས་མང་ཉུང་འགྲོ་བ་དེ་འདྲ་ཡོང་སྲིད་པ་རེད། གཙོ་བོ་བོད་ནང་གི་བོད་མི་ཚོའི་སྙིང་སྟོབས་དང་སྤོབས་པ་དེ། ༢༠༠༨ ནས་བཟུང་ད་ལྟ་བར་ཤུགས་ཆེ་རུ་འགྲོ་བཞིན་པ་དང་། དེ་བཞིན་ཕྱིའི་བོད་པ་རྣམས་ཀྱང་ཆབ་སྲིད་དོ་སྣང་ཆེ་རུ་འགྲོ་བཞིན་ཡོད་པ་གསལ་བོ་རེད། དམིགས་བསལ་གཞོན་སྐྱེས་ཚོའི་ཁྲོད་དེང་དུས་ཀྱི་ཤེས་ཡོན་ཡོད་མཁན་དང་། རྒྱ་སྐད་ཤེས་མཁན་མང་པོ་འཚར་ལོངས་འབྱུང་བཞིན་པར་བརྟེན། ཕུགས་ལ་ང་ཚོའི་རྩ་དོན་དེ་ཇེ་བརྟན་དང་ནུས་པ་ཆེ་རུ་འགྲོ་བཞིན་པ་ཞིག་ལ་ངས་ཡིད་ཆེ་བྱེད་ཀྱི་ཡོད།
དྲི་བ། སྐུ་ཉིད་ཀྱི་དམ་འབུལ་གསུངས་བཤད་ནང་བོད་ཀྱི་སྲིད་བྱུས་ཞིབ་འཇུག་ཁང་ཞིག་འཛུགས་འཆར་ཡོད་སྐོར་གསུངས་སོང་། དེ་བཞིན། སྤྱི་ཚོགས་ནང་གི་ཤེས་ཡོན་པ་ཚོར་དམིགས་བསལ་གྱིས་བདག་པོ་རྒྱག་རྒྱུ་ཡིན་སྐོར་གསུངས་སོང་། དེའི་སྐོར་ལ་འཆར་གཞི་དང་གྲ་སྒྲིག་གང་འདྲ་ཡོད་དམ།
ལན། སྲིད་བྱུས་ཉམས་ཞིབ་ཁང་ཟེར་བ་དེ་ནི། ལས་ཁུངས་ཤིག་བཙུགས་ཏེ་དེས་ང་ཚོའི་འཛིན་སྐྱོང་འདི་ལོ་ ༥ དང་ ༥༠ ནང་ལ་ག་འདྲ་ཆགས་མིན་དང་། རྒྱ་བོད་བར་གྱི་གནས་སྟངས་ག་འདྲ་ཆགས་མིན། རྒྱ་གར་ནང་བོད་པ་ག་འདྲ་ཆགས་མིན། དེ་བཞིན་ཨ་རི་དང་ནུབ་ཕྱོགས། ཨེ་ཤ་ཡ་བཅས་ཀྱི་ནང་བོད་པ་ག་རེ་ཆགས་ཡིན་སོགས་སྤྱི་ཡོངས་ནས་བོད་པའི་གནད་དོན་ཐད་ཉམས་ཞིབ་གནང་དགོས་པ་རེད། འཛིན་སྐྱོང་གིས་ཉིན་རེའི་ལས་དོན་ཐག་གཅོད་གནང་བཞིན་འགྲོ་དགོས་སྟབས། ཕུགས་རྒྱང་རིང་པོར་ལྟ་ཐུབ་མཁན་གྱི་ལས་ཁུངས་ཤིག་ཟུར་དུ་འཛུགས་རྒྱུ་དེ་གལ་ཆེན་པོ་རེད། ལས་གཞིའི་འདིའི་ཐད་ཀྱི་མ་དངུལ་གྲ་སྒྲིག་བྱས་ཚར་ཡོད། ཟླ་བ་གཉིས་གསུམ་ནང་ལ་ལས་གཞི་འདི་མགོ་འཛུགས་ཐུབ་པ་བྱ་རྒྱུ་ཡིན། ཉམས་ཞིབ་པ་ལྔ་དྲུག་ཅིག་བསྐོ་བཞག་གིས་གནད་དོན་རྒྱ་ཆེ་སར་ཞིབ་འཇུག་གནང་སྟེ། ཟླ་རེའི་ནང་གནད་ཡོད་མི་སྣ་གསུང་བཤད་གནང་མཁན་གདན་ཞུ་དང་། ཟླ་བ་གསུམ་བཞི་རེའི་མཚམས་སུ་མཁས་པ་གསུམ་ལྷག་གདན་འདྲེན་བྱས་ཏེ་ཚོགས་འདུ་ཚོགས་པ། ལོ་གཅིག་རེའི་ནང་ཉིན་གསུམ་ལྷག་གི་ཚོགས་འདུ་ཆེན་པོ་རེ་འཚོགས་རྒྱུ་བྱས་ཏེ། བོད་ནང་གི་ཁོར་ཡུག་དང་ཆུ། འགྲོ་བ་མིའི་ཐོབ་ཐང་སོགས་ཕྱོགས་སོ་སོའི་ཐད་བགྲོ་གླེང་གནང་བ་ཡིན་ན། གངས་སྐྱིད་དང་ངྷ་རམ་ས་ལའི་དཀྱིལ་འཁོར་འདིའི་ནང་ལ་མཐོ་རླབས་ཤིག་འབྱུང་གི་རེད། དེ་ལྟར་མཁས་པའི་བགྲོ་གླེང་སོགས་ཀྱི་ཁོར་ཡུག་བསྐྲུན་ཐུབ་པ་ཡིན་ན་སྤྱི་ཡོངས་ལ་ཕན་གི་རེད། གཉིས་པ། ང་ཚོའི་འཛིན་སྐྱོང་ཁག་ནང་འཕྲུལ་ཆས་དང་ཤེས་ཡོན་ཐོག་ནས་མ་འདང་བ་དེ་འདྲའི་རིགས་ལ། ཕྱི་ལ་ཡོད་པའི་བོད་རིགས་ལག་ཤེས་དང་ཤེས་ཡོན་ཅན་དག་ཕེབས་རོགས་ཞེས་འབོད་སྐུལ་ཞུས་ཏེ། ཟླ་བ་དྲུག་དང་ལོ་གཅིག་གཉིས་རིང་གདན་ཞུ་གནང་བ་ཡིན་ན། རིམ་བཞིན་ཕྱི་རྒྱལ་ཁག་གི་བོད་རིགས་སྲི་ཞུ་སྒྲུབ་མཁན་མང་དུ་ཕྱིན་ཏེ། དྷ་རམ་ས་ལར་ཡོད་པའི་འཛིན་སྐྱོང་འདི་ལྟེ་གནས་གཙོ་བོ་ཆགས་ཏེ་ཕུགས་བརྟན་པོ་ཡོང་གི་རེད། ལས་གཞི་འདི་འཆར་ལོའི་ཚེས་མགོ་ཞིག་ནས་མགོ་འཛུགས་གསལ་བསྒྲགས་གནང་གི་ཡིན།
༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽
གསར་འགོད་པ། དོན་འགྲུབ་བཀྲ་ཤིས་དང་ཚེ་རིང་རྒྱལ།
བཀུར་འོས་བཀའ་ཁྲི་མཆོག་གིས་འབྱུང་འགྱུར་ལོ་༢༠ ནང་ཁྱད་ལས་པ་དང་རིགས་གཅིག་རྐང་འཛིན་པ་ ༡༠༠༠༠ ཐོན་པ་བྱ་ཐུབ་རྒྱུའི་རེ་བ་དང་དམིགས་ཚད་བཟུང་བ་འདི་ཧ་ཅང་དགའ་འོས་པ་ཞིག་རེད། དེ་དང་མཉམ་དུ་འབྱུང་འགྱུར་ལོ་༢༠ནང་ང་ཚོའི་བླ་སྲོག་ཏུ་གྱུར་པའི་མ་ཡུམ་སྐད་ཡིག་འདི་ཉིད་དུས་རབས་གསར་པའི་རིག་གནས་ཀྱི་བརྡ་ཆད་ཀྱིས་ཁ་གང་བ་ཞིག་བཟོ་རྒྱུ་དེ་དེ་བས་གལ་ཆེ། ཁྱད་ལས་པ་དང་རིགས་གཅིག་རྐང་འཛིན་པ་༡༠༠༠༠ཙམ་ཐོན་པ་དེ་དག་གི་བོད་དོན་འཐབ་རྩོད་ཀྱི་མདུན་ཕྱོགས་ནས་ནུས་པ་མི་དམན་པ་ཐོན་རྒྱུ་ཡིན་པ་གོར་མ་ཆགས་ཀྱང་། བོད་རང་གི་སྐད་ཡིག་འདི་ཉིད་འཕེལ་རྒྱས་གཏོང་མ་ཐུབ་ན་བོད་མི་རིགས་ཀྱི་རྩ་བ་རུལ་ནས་ཡལ་གར་ཁྲ་ཁྲ་ཟིང་ཟིང་བཏགས་པ་ལྟར་འགྱུར་རྒྱུར་གདོན་མི་ཟའོ།།
དེས་ན་འགྱོགས་ནས་མྱུར་དུ་བསྒྲུབ་དགོས་པའི་ལས་དོན་ཞིག་ནི། ཆབ་སྲིད་ཀྱི་ལས་དོན་དང་ཐད་ཀར་འབྲེལ་བ་མེད་པར་བོད་ཕྱི་ནང་གི་མཁས་དབང་གང་མང་མཉམ་ཞུགས་གནང་སའི་ཆེས་མཐོའི་ཐ་སྙད་གཏན་འབེབ་ཚོགས་ཆུང་ཞིག་འཛུགས་ཐབས་གནང་དགོས་པ་དང། དེ་དང་འབྲེལ་ནས་ལས་ཁུངས་དེའི་འཛིན་སྐྱོང་འོག་ནས་ཤེས་ཡོན་སྲིད་ཇུས་གསར་པའི་དགེ་རྒན་འོས་སྦྱོང་གི་ལས་དོན་ཞིག་བསྒྲུབ་དགོས། འབྱུང་འགྱུར་ལོ་༢༠ནང་ཕ་སྐད་གཙང་མའི་ལམ་ནས་དུས་རབས་གསར་པའི་རིག་གནས་འཆད་ཁྲིད་བྱ་ཐུབ་པའི་དགེ་རྒན་ཁྲི་གཅིག་མ་བྱུང་རུང་སྟོང་ཕྲག་རེ་གཉིས་ཤིག་གསོ་སྐྱོང་བྱ་ཐུབ་ན་བོད་མི་རིགས་ཀྱི་རྩ་བའི་གཏིང་ནས་ནུས་སྟོབས་རྒྱས་རྒྱུར་ཐེ་ཚོམ་མེད་དོ།།
ཀློག་པ་པོ་ཚང་མས་བསམ་གཞིག་གནོངས་རོགས།
ཤེས་ཡོན་སྲིད་ཇུས་ལག་བསྟར་བྱེད་ཕྱོགས་སྐོར་ལ་བསམ་བློ་ཏན་ཏན་ཞིག་གཏོང་རྒྱུ་ཧཧ་ཅང་གལ་ཆེན་པོ་རེད། ང་ཚོས་རང་གི་སྐད་ཡིག་རིག་གཞུང་ལ་ཤ་ཚ་དུང་ཞེན་ཡོད་པ་ཙམ་རྒྱུ་མཚན་དུ་བྱས་ནས་སློབ་ཚན་ཚང་མ་བོད་ཡིག་ནང་དགོས་ཟེར་ན་དུས་རབས་ཀྱི་རྗེས་ཟིན་པ་ཞིག་ཅེས་ཀྱང་ཡོང་ཐབས་དཀའ། གང་ཡིན་ཟེར་ན་ང་ཚོ་ཉི་ཧོང་དང་རྒྱ་ནག་སོགས་དང་རྩ་ནས་མི་འདྲ། ཁོ་ཚོ་ལ་དཔལ་འབྱོར་དང་ཁོར་ཡུག་ཕྱི་དངོས་པོའི་ཆ་རྐྱེན། སྟངས་འཛིན་གྱི་ནུས་པ་སོགས་ཕྱོགས་གང་ཐད་ནས་ལྡང་ངེས་ཡོད། ང་ཚོས་ཡོད་ཚད་གཞན་ལ་བརྟེན་དགོས་དུས་ང་ཚོའི་མ་འོང་སོན་རྩ་ཚོ་འཛིན་གྲ་བཅུ་གཉིས་ཐོན་རྗེས་མི་རིགས་གཞན་དག་དང་དཔུང་བ་མཉམ་གཤིབ་ཀྱིས་མདུན་བསྐྱོད་ཀྱི་ནུས་པ་བྲལ་ཞིང་དེས་རྐྱེན་བྱས་ནས་མདུན་ལམ་མེད་པའི་མུ་བུ་ཁྱུ་ཁྱུ་བྱས་ནས་སྡུག་ཡུས་བགྲང་ནས་སྡོད་རྒྱུ་ལས་མ་འདས། བོད་ཀྱི་སྐད་ཡིག་རིག་གཞུང་ཤེས་པའི་བོད་པ་རྣལ་མ་ཞིག་ཡོང་བར་བོད་ཀྱི་སྐད་ཡིག་རིག་གཞུང་དང་རྒྱལ་རབས་ལོ་རྒྱུས་སོགས་སློབ་ཁྲིད་གནང་མཁན་གྱི་དགེ་རྒན་ཚད་ལྡན་དང་སློབ་དེབ་ཚད་ལྡན། ད་དུང་ཟུར་ལྟའི་སློབ་དེབ་སོགས་དང་སློབ་ཁྲིད་བྱེད་སྟངས་ཚད་ལྡན་སོགས་ཡོང་བར་ཞིབ་འཇུག་གིས་ལེགས་བཅོས་གང་ཐུབ་བྱེད་དགོས་པ་ལས་སློབ་ཚན་ཚང་མ་བོད་སྒྱུར་བྱས་པ་ཙམ་གྱིས་དམིགས་བསལ་ཕན་ཐོགས་ཅང་ཡོད་པར་མི་སེམས། གལ་ཏེ་ཚང་མ་བོད་སྐད་ནང་བསྒྱུར་བའི་དབང་དུ་བཏང་ཡང་དེ་དག་བོད་ཀྱི་སྐད་ཡིག་ནང་སློབ་ཁྲིད་བྱེད་ཐུབ་མཁན་གྱི་དགེ་རྒན་ཚད་ལྡན་འདང་ངེས་ཤིག་ཕར་ཟད་རེ་ཟུང་ཙམ་ཡང་བོད་མིའི་ཁྲོད་དཀོན་པོ་མ་ཡིན་ནམ། དེ་ལས་ཀྱང་བསམ་ཞིབ་བྱེད་དགོས་པ་ཞིག་ནི་འཛིན་གྲ་བཅུ་གཉིས་ཐོན་རྗེས་གང་དུ་འགྲོ་དགོས་མིན་དང་ཅི་ཞིག་བྱེད་དགོས་མིན་དེ་རེད།
རྒྱ་གར་འཛིན་སྐྱོང་ཁོངས་མ་ཡིན་པའི་བོད་སློབ་ཁག་ནང་ལ་བསླབ་བྱ་གཅིག་སྐད་ཡིག་གཉིས་ཐོག་ནས་བསླབ་ཐབས་ཡོང་རྒྱུ་རེད། འོན་ཀྱང་དཀའ་ངལ་ཆེ་ཤོས་དེ་དགེ་རྒན་རེད། བོད་དབྱིན་གཉིས་མཁྱེན་པ་ཞིག་ངེས་པར་དགོས་ཡོད།
ལས་བྱེད་གསར་བ་རྒྱུན་རིང་ཙམ་གནས་ཐབས་ལ་དགོངས་བཞེས་གནང་རྒྱུ་ཞིག་ཡོད་ན་དེ་ངོ་མ་བཟང་གི ལས་བྱེད་མང་ཆེ་བ་ལོ་ལྔ་ལ་མུ་མཐུད་གནས་ཐུབ་ན་འགྲིགས། གཙོ་བོ་ཤེས་འཇོན་ལྷག་བསམ་གསུམ་ལྡན་གྱི་མི་སྣ་དག་རྒྱུན་གནས་ཐུབ་རྒྱུ་ཧ་ཅང་གལ་ཆེ། དེ་བས་དེ་དག་ལ་དོ་སྣང་ཆེན་པོ་དང་ལས་ཀའི་གོ་སྒྲིག་ཐད་ནས་འཐུས་ཤོར་མེད་པ་ཞིག་གནང་གལ་ཆེ།
བཅར་འདྲི་འདི་རིགས་གནང་ན་གཤམ་མཆན་འགོད་མཁན་མང་བས་བཟང། སློབ་ཚན་དང་འབྲེལ་བའི་སྐོར་ལ་དགེ་རྒན་རྣམ་པས་དགོངས་ཚུལ་འདོན་རྒྱུ་གལ་ཆེ།
སྤྱིར་བཏང་བྱས་ན་བཀའ་ཁྲི་མཆོག་གིས་གནང་སྟངས་དེ་ཡག་པོ་རད་དེ། འོན་ཀྱང་དེ་ཙམ་གྱིས་ནུས་པ་ཐོན་ཨེ་ཐུབ་སྙམ། གང་ལགས་ཤེ་ན། དམིགས་བསལ་མཁས་པའི་ཚོགས་ཆུང་ཟུར་འཛུགས་བརྒྱུད་ཤེས་ཡོན་གྱི་གནས་ཚུལ་སྤྱི་ལ་ཞིབ་འཇུག་གཏིང་ཐག་ཆོད་པ་ཞིག་མ་བྱས་ན་སྔར་བཞིན་རང་འཇགས་ཆགས་ཀྱི་རེད། དེ་ལྟར་ཞིབ་འཇུག་ཅིག་བརྒྱུད་ནས་ཡར་རྒྱས་དང་འགྱུར་བ་བཏངས་ན་ནུས་ངེས་ཅན་ཞིག་འདོན་ཐུབ་ཀྱི་རེད་འདོད།
དེ་གནས་ཡིན་རྒྱུ་རེད་ལས་ཁོངས་འཛུལ་སྟེ་ཕྱི་རྒྱལ་འགྲོ་རྒྱུ་ལམ་ཁ་དང་ཆ་རྐྱེན་ཧ་གོ་རྗེས་ཐོན་འགྲོ་གི་ཡོད་པར་ད་གང་དྲག་དེ་འདྲ་སེམས་སྐྱོ་པ་ལ་ཨ་ཁ་ཁ་
མི་འགའ་རེས་ལག་ནས་བོད་ཡིག་འབྲི་བཞིན། ཁ་ནས་བོད་ཡིག་ལ་བརྒོལ་བ་ནི་ཡིག་མུག་པ་ཞིག་རེད། བཙན་བྱོལ་སློབ་གྲྭ་ཁག་གི་སློབ་སྦྱོང་གནས་ཚད་ལ་༸གོང་ས་མཆོག་གསུང་སྐད་ཤོར་དགོས་བྱུང་བ་དེ་བོད་ཡིག་སློབ་རྒྱུ་མང་སོང་བས་ཡིན་ནམ། གཏན་ནས་མ་རེད་མི་ལོ་ལྔ་བཅུའི་རིང་ལ་བོད་ཡིག་ལ་འཐོང་ཆུང་བྱས་པའི་འབྲས་བུ་རེད།
ཁོ་བོ་ནི་འདི་ལྟར་དྲན་བཞིན་ཡོད། གཅིག་བྱས་ན་སྐད་ཆ་འདི་བོད་ཀྱི་སྐད་ཡིག་ལ་ཕོག་ཐུག་འགྲོ་གཞི་ཞིག་ཏུ་འགྱུར་སྲིད་ཀྱང་། དངོས་ཡོད་གནས་སྟངས་དང་ཁ་ཡོད་ལག་ཡོད་ཀྱི་བོད་པའི་སློབ་ཕྲུག་ཁག་ལ་མ་འོངས་པའི་ཕུག་ལ་ཕན་པར་བསམ་པ་ཡིན་ན། འཛིན་གྲ་ལྔ་པ་ནས་སློབ་ཚན་གཞན་ཡོངས་རྫོགས་དབྱིན་ཡིག་གི་ལམ་ནས་བསླབས་པ་ཡིན་ན་ཡག་པ་ཡོད་རེད་སྙམ། སྤྱིར་བཏང་དེ་དང་མཉམ་དུ་བོད་ཡིག་སློབ་ཚན་རྒྱལ་རབས་དང་སྐད་ཡིག་སོགས་ཡོད་མུས་རེད་པ། གང་ཡིན་ཟེར་ན། མ་འོངས་པར་བོད་རིགས་སློབ་ཕྲུག་དེ་རྣམས་རྒྱལ་སྤྱི་སློབ་ཕྲུག་གཞན་རྣམས་དང་མཉམ་གཤིབས་ཀྱིས་སློབ་སྦྱོང་བྱེད་དགོས་པ་དང་བྱེད་བཅུག་འདོད་ཡོད་ན་ཐབས་ལམ་དེ་ཡག་ཤོས་རེད། དེ་མ་གཏོགས་རང་གི་སྐད་ཡིག་སྲུང་སྐྱོབ་བྱེད་ཀྱི་ཡོད་ཟེར་ནས་ཁ་ནས་བཤད་ནས་ཕྲུ་གུའི་མ་འོངས་འདུན་ལམ་གཏོར་བཤིག་གཏང་བ་ཡིན་ན་ཡག་པོ་རེད་སྙམ། སློབ་ཚན་ཡོངས་རྫོགས་བོད་ཡིག་ཐོག་བསླབ་དགོས་རེད་མཁན་མང་ཆེ་བ་ནི་སློབ་གྲྭ་ལ་འགྲོ་མི་དགོས་མཁན་ཤ་སྟག་རེད་འདུག
ཕྱོགས་གཅིག་ནས་ང་ཚོས་བོད་པའི་སློབ་ཕྲུག་ཁྲོད་ནས་རིག་གཅིག་རྐང་འཛིན་པ་ཐོན་ཐུབ་ཀྱི་མིན་འདུག་ཟེར་བ་དང་། རྒྱལ་སྤྱིའི་སློབ་ཕྲུག་ལྟར་དུ་གྲུབ་འབྲས་ཐོན་ཐུབ་ཀྱི་མིན་འདུག་ཟེར་བ་སོགས་མ་འགྲིག་པ་མང་པོ་གཅིག་བརྗོད་བཞིན་ཡོད། ཡང་ཕྱོགས་གཞན་ནས་དེ་ལྟར་ཡོང་རྒྱུར་འགོག་རྐྱེན་བཟོ་བཞིན་འདུག་སྙམ། འདི་ནི་རང་གི་བསམ་འཆར་ཙམ་ཡིན།
བཀའ་ཁྲི་མཆོག་གིས་ཟམ་གདོང་རིན་པོ་ཆེའི་སྐབས་ལས་བྱེད་བརྒྱ་ཆ་ ༥༠% རྩ་དགོངས་ཞུས་སྐོར་གསུངས་འདུག་ལ་དེའི་དཀའ་ངལ་སེལ་ཐབས་དྲུང་ཆེ་རྣམ་པར་གོ་བསྡུར་བྱེད་ཀྱིན་ཡོད་ཅེས་གསུངས་འདུག གཅིག་ནས་དེང་སྐབས་བོད་མི་རྣམས་ལ་སྒོར་མོའི་ཡོང་འབབ་གང་ན་མང་བ་ཡོད་ན་དེར་རྒྱུག་འགྲོ་བ་ལས་ལྷག་བསམ་དང་སེམས་ཤུགས་ཡོད་མཁན་དཀོན་པོ་རེད། གཉིས་ནས་བོད་གཞུང་གི་ལས་བྱེད་རྣམས་ ཁ་ཟ་ལ་དགའ། བརླ་ཉལ་ལ་དགའ་ཟེར་བ་ལྟར་ཟམ་གདོང་སྐབས་ལས་དོན་ཚགས་ཚུད་དང་། སྒྲིག་འཛུགས་ཅུང་དམ་དུ་བཏང་བས་ཡིན་ལས་ཆེ། གལ་སྲིད་དཀའ་ངལ་དེ་སེལ་དགོས་ན་ལས་བྱེད་གླ་ཕོགས་སྤར་དགོས་པ་དང་། ཡང་ན་ལས་དོན་ལྷོད་དུ་གཏང་དགོས། དེ་གཉིས་གང་རུང་མ་གནང་ཚེ་དཀའ་ངལ་དེ་སེལ་ཐུབ་རྒྱུ་ཁག་པོར་ཆགས་ཡོད།
བཀའ་ཁྲིས་ཨང་རྩིས་དེ་བོད་དབྱིན་གཉིས་ཐོག་ནས་དགོས་ཚུལགསུངས་པ་དེ་ཉམས་མྱོང་ཅན་གྱི་གསུང་རང་རེད་དེར་རྒྱབ་སྐྱོར་ཡོད། བོད་ཡིག་ཁོ་ནའི་སྟེང་ནས་བསླབ་པ་ཡིན་ན་འཛིན་གྲ་བཅུ་གཉིས་ཐོན་ནས་རྒྱ་གར་དང་ཕྱི་རྒྱལ་མཐོ་སློབ་ཁག་ཏུ་ཞུགས་དུས་བོད་ཕྲུག་ཚོར་གྱོང་ཅི་ཙམ་རག་གི་ཡོད་པ་དེ་གནད་དོན་ཆུང་ཆུང་ཞིག་མ་རེད། ཨང་རྩིས་དེ་འཛིན་གྲ་བཅུ་བ་བཅུ་གཅིག་བའི་སྐབས་སློབ་ཕྲུག་ཚོས་བདམ་བྱའི་སྡེ་ཚན་ཁག་ཕལ་ཆེར་ལ་ཅི་ཙམ་གལ་ཆེ་བ་ཞིག་མརེད་དམ། རྗེས་མ་མཐོ་སློབ་སྐབས་སུ་རྒྱ་གར་དང་ཕྱི་རྒྱལ་སོགས་ལ་བརྟེན་མི་དགོས་པ་ཞིག་ཡིན་ན་བོད་ཡིག་ཁོ་ནའི་སྟེང་ནས་བསླབ་ན་ལོས་བཟང་ཡང་ཚན་རིག་ཆེད་མཁས་པ་ཞིག་སྐྱེད་བསྲིང་བྱེད་རྒྱུ་ལྟ་བུས་མཚོན་ཡོད་ཚད་གཞན་ལ་བརྟེན་མི་དགོས་པ་ཞིག་ནི་ད་དུང་བྱིས་པ་གོག་ནུར་ལྟ་བུའི་འུ་ཅག་བོད་པ་ཚང་ལ་དཀའ་ཚོད་དུ་གདའ་འོ།
བོད་དབྱིན་གཉིས་ཐོག་ནས་སློབ་ཁྲིད་གནང་དགོས་ཀྱི་འདུག་ཅེས་པ་འདི་དངོས་གནས་ཡག་པོ་འདུག དེ་མ་གཏོགས་བྱ་མིན་བྱེའུ་མིན་ཞིག་ལ་གྱུར་ནས་ཅི་ཡང་ཤེས་ཀྱི་མ་རེད། རྩིས་དངོས་རྫས་གསུམ་གྱི་སློབ་ཁྲིད་འདི་བཞིན་སྐད་གཉིས་སྒང་ནས་ཁྲིད་ན་གཅིག་ཕན་གཅིག་གྲོགས་དང་དགེ་རྒན་མེད་པའི་དཀའ་ངལ་ཡང་ཡོངས་སུ་སེལ་ཡོད་ལ། སློབ་ཚར་རྗེས་ཆེད་ལས་སློབ་གྲྭར་འཛུལ་ཞུགས་ཐུབ་པར་ཡང་གཞོགས་འདེགས་གནང་ཡོད་པའི་ཁར། མ་འོངས་པར་བོད་ཡིག་ནང་ཤེས་བྱ་འདི་དག་ཁྱབ་བརྡལ་ལ་གཏོང་བར་རྨང་གདན་འདིངས་ཐུབ་ཡོད། དེ་ལས་ལྡོག་ན། དེང་རབས་ཤེས་བྱ་བོད་ཡིག་སྒང་ཐེབས་ཆག་ཅིག་བསྒྱུར་ཐུབ་པའི་དབང་དུ་བཏང་ན་ཡང་སློབ་ཚར་རྗེས་འཛུལ་སའི་སློབ་གྲྭ་མེད་པའི་ཁར་བཀོལ་སའི་ལས་ཀའང་མེད་པས། ལས་མེད་ན་གཞོན་ཁྱུ་དང་ཁྱུ་བྱས་ནས་འཁྱམ་འདུག་རྒྱུ་ལས་མེད། དེ་བས།
མ་འོངས་མདུན་ལམ་གཙོར་འཛིན་གྱི་སློབ་གསོའི་སྲིད་ཇུས་ཤིག་གཏན་འབེབས་གནང་རྒྱུ་རང་གཞན་ཀུན་ལ་ཕན་ཐོགས་པ་ཞིག་རེད།
“འཛིན་གྲྭ་ལྔ་བ་ནས་བརྒྱད་པའི་བར་གྱི་ཚན་རིག་དང་ཨང་རྩིས་དེ་བོད་ཡིག་དང་དབྱིན་ཡིག་གཉིས་ཆའི་ཐོག་ནས་བསླབ་དགོས་ཀྱི་འདུག་ཟེར་གྱི་ཡོད། དེ་ལ་རྒྱུ་མཚན་གཉིས་ཡོད། དང་པོ་དེ་ང་ཚོའི་སློབ་ཕྲུག་ཚོ་སློབ་གྲྭ་ཐོན་ཡོང་སྐབས། ཨང་རྩིས་དང་ཚན་རིག་སྐྱོ་བོ་ཡོད་པ་དེ་གསལ་བོ་རེད། ” ཅེས་པ་འདི་བལྟ་གྲུབ་དང་ལག་ལེན་གཉིས་ཀ་མ་ཤེས་པའི་སྐད་ཆ་ཞིག་རེད། སྔོན་མ་ཡང་འཛིན་གྲྭ་དང་པོ་ནས་ལྔ་བ་བར་བོད་ཡིག་ཐོག་སློབ་ཚན་རྣམས་སློབ་རྒྱུ་ཐག་ཆོད་སྐབས་ཀྱང་འཛིན་གྲྭ་གོང་མར་སླེབས་སྐབས་དཀའ་ངལ་འཕྲད་རྒྱུ་ཡིན་པའི་ཐུགས་ཁྲལ་དེ་འདྲ་བྱུང་ཡོད་པ་རེད། འོན་ཀྱང་ད་ལྟ་ལོ་བཅུ་བདུན་ཙམ་སོང་བའི་རྗེས་སུ་རྩིས་རིག་དང་ཚན་རིག་གི་གནས་ཚད་སྔར་བས་ཇེ་ལེགས་སུ་སོང་ཡོད་པ་ལས་ཇེ་ཞན་དུ་སོང་མེད་པ་དངོས་ཡོད་གནས་ཚུལ་རེད། དེ་ངས་ཉམས་མྱོང་གིས་བཤད་ཀྱིན་ཡོད།
ལྷག་པར་དུ་”བརྡ་ཆད་དང་ལྟ་གྲུབ་ཧ་ཅང་མང་པོ་ཡོད་པ་དེ་དག་དབྱིན་ཡིག་ལས་བོད་ཡིག་ནང་བསྒྱུར་ཏེ་བསླབ་པ་ཡིན་ན། དང་པོ་བརྡ་ཆད་དང་ལྟ་གྲུབ་དེ་རྣམས་ཏག་ཏག་སྡོད་ཀྱི་ཡོད་མེད་དང་མགོ་འཚོས་ཀྱི་ཡོད་མེད་ཀྱི་གནས་ཚུལ་ཞིག་ཡོད་པ་རེད།”ཞེས་པ་དེ་རྦད་དེ་ནོར་བ་རེད། ཕྱིའི་སྐད་ཡིག་བེད་སྤྱད་ནས་བསླབས་པ་དང་རང་གི་སྐད་ཡིག་བེད་སྤྱད་ནས་བསླབས་པ་ཡིན་ན་ཕྲུ་གུས་བསླབ་གཞི་མགོ་ཚོས་ཆེ་པ་ཡོང་གི་ཡོད་པ་འཇིག་རྟེན་སྤྱི་གྲགས་ཤིག་རེད།
འདི་ལ་དཔེར་མཚོན་གསོན་པོ་ཞུ་དགོས་ན་རྫོགས་རྒྱུ་མེད་པ་ངས་ཉམས་མྱོང་གིས་ཞུ་ཆོག
དེ་བཞིན་”བོད་ཡིག་ཐེངས་གཅིག་དང་། དབྱིན་ཡིག་ཐེངས་གཅིག་བཅས་སློབ་ཚན་ཚར་གཉིས་བསླབ་པ་ཡིན་ན།”ཟེར་བ་འདི་ཚོ་ལག་ལེན་དངོས་ལ་ཡོང་ཐབས་མེད་པའི་སྐད་ཆ་ཞིག་རེད།
ཅོ་རི་ཉི་མ་ལགས། གོང་གི་བཅར་འདྲའི་མཇུག་ཏུ་༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽ ཞེས་བཀོད་ཡོད་པ་མཐོང་མ་བྱུང་ངམ། བཅར་འདྲི་དེ་ཕྱི་ཟླ་ ༨ ཚེས་ ༣༠ ཉིན་ནས་བོད་ཀྱི་དུས་བབ་ཚགས་ཤོག་སྟེང་བཀོད་དེ་འགྲེམས་སྤེལ་ཞུས་ཟིན་ཡོད། དེ་མ་མཐོང་བར་ཕྱི་ཟླ་ ༩ ཚེས་ ༣ ཉིན་སློབ་སྤྱི་ཚོ་ལྡི་ལིར་ཚོགས་སོང་བའི་གསར་འགྱུར་དེ་གང་ཞིག་ནས་མཐོང་སྟེ་དུས་བབ་རྗེས་ལུས་ཡིན་སྐོར་གསུངས་པ་དེ་ཡང་ཡ་མཚན་རེད། གང་ལྟར། ” ཤུགས་རྒྱབ ” ཟེར་བའི་སྐད་ཆ་དེ་གཅིག་པུས་མགུ་ནས་ཡོད།
གསར་འགོད་པ་་་་བཀྲ་ཤིས་དོན་གྲུབ་དང་ཚེ་རྒྱམ་ལགས་་་་ཁྱེད་གཉིས་ཀྱིས་བཀའ་ཁྲི་ལ་བཀའ་དྲིས་ཞུ་པ་འདི་བདུན་གཅིག་གི་སྔོན་དུ་དྲིས་འདུག་པར་མ་ཟད་ཉིན་བཅུ་ལྷག་འགྲོ་གི་ཡོད་ཚད་འདུག
བཀའ་ཁྲི་མཆོག་གིས།།
ཤེས་ཡོན་ཡར་རྒྱས་ཆེད་ག་རེ་བྱ་དགོན་མིན་ཐད་གཏིང་ཟབ་མོའི་སྒོ་ནས་ཞིབ་འཇུག་བྱ་རྒྱུ་ཡིན། ཟླ་ ༩ ཚེས་ ༣ ཉིན་ལྡི་ལིར་སློབ་གྲྭ་ཁག་གི་བོད་པའི་སློབ་སྤྱི་ཁག་ཚང་མ་ཕེབས་རོགས་ཞུས་ཡོད། ཞེས་གསུངས་འདུག་པས་ཕྱི་ཟླ་༩་པའི་ཚེས་༣་གྱི་སྔོན་གི་སྐད་ཆ་རེད། དེ་རིང་སྤྱི་ཟླ་དགུ་པའི་ཚེས་དགུ་རེད།
དུས་བབ་ཚང་གིས་༩པའི་ཚེས་༣་ཉིན་ལྡི་ལིར་སློབ་གྲྭ་ཁག་གི་བོད་པའི་སློབ་སྤྱི་ཚོས་འཚོགས་ཐོག་ཏུ་བཀའ་མོས་གང་བྱུང་ཡོད་མེད་གསར་འགྱུར་བཀོད་ཐུབ་ཀྱི་མེད་པ་རེད། དུས་བབ་རྗེས་ལུས་ཆགས་བཅུག་མ་ཡོང་རོགས་ཞེས་རེ་བ་ཞུ་རྒྱུ་ཡིན།
རྗེས་ལུས་ཀྱི་རྣམ་པ་མངོན་ཡོད་གི་འདུག གནས་ཚུལ་གསར་པ་རྣམས་དུས་ཐོག་བཀོད་ཐུབ་དགོས་པ་ནི་གསར་འགོད་པའི་ལས་འགན་རེད། ཤུགས་རྒྱོབ། རྗེས་ལུས་ཤོར་ན་ཡག་པོ་མ་རེད།།།
སྤྱིར་བོད་ཙམ་མ་ཡིན་པར་ལས་བྱེད་སུ་ཞིག་ཡིན་རུང་མི་ཚེ་གང་བོ་གཞུང་ལ་ཞབས་ཕྱི་གནང་མཁན་ཁག་པོ་ཡིན་གྱི་རེད། འོན་ཀྱང་ལོ་ངོ་གཅིག་གཉིས་ཞིག་ལས་དགོང་པ་ཞུས་ནས་འགྲོ་མཁན་ཡོད་པ་དེ་ནི་ཕལ་ཆེར་རང་རོགས་གཉིས་ཀྱི་དཀའ་ངལ་ཞིག་གི་དབང་གི་ཡོང་པ་ཞིག་ཡིན་རྒྱུ་རེད། གཞུང་ལ་དཔལ་འབྱོར་གྱི་དཀའ་ངལ་དང་དགེར་པ་རང་ཉིད་ལ་ཟླ་ཕོགས་ཅུང་ཙམ་ཡོད་པ་དེའི་འདང་མིན་སོགས་ཀྱི་དཀའ་ངལ་རེད། གཙོ་བོ་དཔལ་འབྱོར་ལ་རག་ལས་པ་ཞིག་རེད་དྲན་སོང་། འོན་ཀྱང་བོད་མིའི་ལས་བྱེད་ཞིག་ཡིན་དུས་ངེས་པར་བོད་མི་ཞིག་ལས་ཁུངས་སུ་ཡོང་སྐབས་བོད་སྐད་གཙང་མ་ཞིག་བཤད་ཀྱི་གལ་ཆེན་པོ་རེད། བོད་ནང་དུ་རྒྱས་བཙན་འོག་ཏུ་ཡོད་ཀྱང་བོད་མིའི་སྐད་ཡིག་སྲུང་སྐྱབས་བྱེད་ཀྱི་ཡོད་པ་ཧ་གོ་ན་ཡག་པོ་རེད། སྤྱིར་སྐད་རིགས་མང་པོ་ཤེས་ན་བཟང་ཡང་གཙོ་བོ་བོད་རང་གི་མི་ཞིག་ལ་འབྲེལ་བ་གནང་སྐབས་དབྱིན་ཇི་བཤད་དགོས་པ་གང་ཡང་ཡོད་པ་མ་རེད། ལར་བོད་ནས་དུས་དབང་ལ་ཡོང་མཁན་མང་པོ་ཞིག་བོད་མིའི་སྒྲིག་འཛུག་ལ་བལྟ་བར་་ཡོང་ངེས་རེད། དེ་དུས་དབྱིན་སྐད་འདྲ་བཤད་པ་ཡིན་ན་ཁོང་ཚོ་བློ་ཕམ་ཡོང་གི་རེད། ཐོག་མར་ལས་བྱེད་བསྡུ་སྐབས་བོད་མིའི་རིག་གཞུང་ལ་དུང་པ་ཡོད་མཁན་ཞིག་བསྡུ་རྒྱུ་གལ་ཆེན་མཐོང་།
བཀའ་ཁྲི་བློ་བཟང་སེང་གེས་ཤེས་ཡོན་སྲིད་ཇུས་གསར་པའི་ཐོག་གདེང་ཚོད་སླེབས་མི་འདུག ཚན་རིག་དང་ཨང་རྩིས་ཀྱི་བརྡ་ཆད་དེ་ཚོ་དབྱིན་ཡིག་ནང་ཡོད་པ་དེ་མུར་འཇོག་པ་ལས། བོད་ཡིག་ནང་ཕབ་སྒྱུར་དང་། བོད་སྐད་ཐོག་འཇག་ཐབས་ཡོང་བའི་ཐབས་ཤེས་གནང་རྩིས་མི་འདུག བརྡ་ཆད་དང་ལྟ་གྲུབ་དེ་དག་བོད་སྐད་ནང་ཏག་ཏག་བསྡད་ཀྱི་ཡོད་མེད་ཧ་གོ་གི་མི་འདུག་ཅེས་ཁ་གཡར་ས་འཚོལ་གྱི་ཡོད། ཏག་ཏག་མ་བསྡད་ན་ཏག་ཏག་ཡོང་བའི་ཐབས་ཤེས་ག་རེ་འཚོལ་རྒྱུ་འདུག་བལྟ་དགོས་རེད། ཚན་རིག་དང་ཨང་རྩིས་སོགས་སོགས་སློབ་དེབ་ཆ་ཚང་བོད་སྐད་ཐོག་ཡོད་མེད་དང་། སློབ་གྲྭ་ཁག་ཇི་ཙམ་གྱིས་ཤེས་ཡོན་སྲིད་ཇུས་ལག་བསྟར་བྱེད་ཀྱི་ཡོད་མེད། ཤེས་ཡོན་སྲིད་ཇུས་གསར་པར་གྲུབ་འབྲས་ཇི་ཙམ་ཐོན་ཡོད་མེད། ད་ལྟ་དཀའ་ངལ་ག་རེད་ཡོད་མེད། དགེ་རྒན་གྱི་གནས་སྟངས་གང་འདྲ་ཡོད་མེད་སོགས་ནི་བཀའ་ཁྲིས་སྲིད་ཇུས་ལག་བསྟར་མ་བྱས་གོང་ངེས་པར་དུ་ཤེས་དགོས་པའི་གནད་དོན་ཞིག་རེད། འོན་ཀྱང་ད་ལྟ་བཀའ་ཁྲི་མཆོག་གིས་དེ་ཚོའི་ཐོག་གཞི་ནས་རྒྱུས་ལོན་བྱ་རྒྱུ་ཡིན་པས། བོད་རྒྱ་ཆེ་མི་མང་དང་གྲོས་ཚོགས་ཀྱིས་ཐག་གཅོད་བྱས་པའི་སྲིད་ཇུས་དེ། ལམ་སེང་འགྱུར་ཆོག་ཆོག་ཅིག་གཏན་ནས་མ་རེད་བསམ། གང་ལྟར་ཡང་བཀའ་ཁྲི་བློ་བཟང་སེང་གེས་ཤེས་ཡོན་ཐོག་ལས་དོན་ཤུགས་ཆེ་བསྒྲུབ་རྒྱུར་ཁས་ལེན་གནང་བ་ནི་ངོ་མ་དགའ་འོས་པ་ཞིག་ཡིན་མོད། དོད་དམ་བོད་ལ་མཁོ་བའི་ཤེས་ཡོན་པའི་སྡེ་ཁག་ཅིག་བསྐྲུན་ཐུབ་མིན་ནི། གདམ་ཁ་མ་ནོར་བའི་སྲིད་ཇུས་ཤིག་ལག་བསྟར་བྱ་རྒྱུར་ཐུག་ཡོད།