ཁེ་ན་ཌའི་ཁུལ་གྱི་མཛད་འཕྲིན།

༧གོང་ས་མཆོག་གིས་ཁེ་ཎ་ཌ་དང་མེ་སི་ཁོ། ཨར་ཅིན་ཊི་ཎ། སྦར་ཛིལ་བཅས་རྒྱལ་ཁབ་ཁག་བཞིའི་ནང་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་ཡོད་པ་རེད།  

ཉིན་འདི་འགར་༧གོང་ས་མཆོག་གིས་ཁེ་ཎ་ཌའི་ཡུལ་དུ་ཆོས་ཕྱོགས་ཀྱི་མཛད་འཕྲིན་ཁག་སྐྱོང་བཞིན་པ་ལྟར། ཁེ་ཎ་ཌ་མཁན་ཟུར་འཇམས་དབྱངས་ཆོས་ཚོགས་ཀྱི་གདན་ཞུས་ལྟར། ༧གོང་ས་མཆོག་ཟླ་འདིའི་ཕྱི་ཚེས་ ༧ ཉིན་ཁེ་ཎ་ཌའི་མཁན་ཟུར་འཇམ་དབྱངས་མཆོག་དང་ལོང་ཝེལ་ (longueil)  གྲོང་ཁྱེར་སྤྱི་ཁྱབ་པ་གཙོས་པའི་ས་གནས་བོད་རིགས་དང་། ཝི་ཊི་ནམ་ནང་པའི་དད་ལྡན་མང་ཚོགས་ཀྱི་ཕེབས་བསུའི་ཁྲོད། ཡུལ་དེའི་ལོང་ཝེལ་གྲོང་ཁྱེར་དུ་རྟེན་གཞི་བྱས་པའི་འཇམ་དབྱངས་ཆོས་ཚོགས་སུ་ཆིབས་སྒྱུར་བསྐྱངས་ཡོད་ཅིང་། ཆོས་ཚོགས་དེར་༧གོང་ས་མཆོག་གིས་བོད་དང་ཝི་ཊི་ནམ་ནང་པའི་དད་ལྡན་པ་བརྒྱ་ཕྲག་བརྒལ་བར་ནང་ཆོས་ཀྱི་རིན་ཐང་སྐོར་བཀའ་སློབ་གནང་ཡོད་འདུག་ལ། བོད་པ་ཚོར་དམིགས་བསལ་བཀའ་སློབ་གནང་ཡོད་པའི་ནང་།  “ ང་ཚོས་ནང་ཆོས་ལ་སློབ་སྦྱོང་བྱས་ཏེ་དུས་རབས་ ༢༡ པའི་ནང་པ་བྱ་དགོས་ཀྱི་འདུག ཆོས་རྒྱལ་སྐབས་དར་བའི་དཔལ་ནཱ་ལེཎྜའི་ཆོས་རྒྱུད་དྲི་མ་མེད་པ་དེ་ང་ཚོས་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། དེ་སྔོན་རྒྱ་མི་གུང་ཁྲན་གྱིས་ནང་ཆོས་དེ་རྨོངས་དད་ཡིན་སྟབས་ཚན་རིག་ཡར་རྒྱས་ཕྱིན་ན། རང་བཞིན་གྱིས་ཡལ་འགྲོ་བ་རེད་ཅེས་བཤད་བསྡད་ཡོད་པ་རེད། ད་ཆར་དེ་ལས་ལྡོག་སྟེ་ཚན་རིག་པ་ཚོས་ཀྱང་ནང་ཆོས་ལ་དོ་སྣང་ཆེན་པོ་བྱེད་ཀྱི་འདུག  ” ཅེས་གསུངས་ཡོད་པར་མ་ཟད། སྐབས་དེར་༧གོང་ས་མཆོག་གིས་ཉེ་ཆར་བོད་ཀྱི་ཆབ་སྲིད་འགན་དབང་མང་ཚོགས་ཀྱིས་བདམས་པའི་མགོ་ཁྲིད་ཚོར་རྩིས་སྤྲོད་གནང་ཕྱོགས་དང་། དོལ་རྒྱལ་བསྟེན་གསོལ་བྱས་ན་ཉེས་དམིགས་ཅི་ཡོད། དེ་བཞིན། ཕྱི་རྒྱལ་དུ་སྡོད་མཁན་བོད་རིགས་རྒན་གྲས་ཚོས་རང་གི་དཀའ་སྡུག་ལོ་རྒྱུས་རྣམས་ཡིག་ཐོག་ཏུ་འགོད་སྐོར་སོགས་གསུངས་འདུག  

དེའི་རྗེས་༧གོང་ས་མཆོག་གིས་ཧྥི་ལཱ་སཱི་ཌེ་སི་ཀོང་རེ་སི་ (Palais des Congress) ཞེས་པའི་ཚོགས་ཁང་དུ། ས་གནས་གསར་འགོད་པ་ཚོར་དྲི་བ་དྲིས་ལན་གྱི་གོ་སྐབས་གནང་སྟེ། ཆོས་ལུགས་མཐུན་སྒྲིལ་དང་འགྲོ་བ་མིའི་རིན་ཐང་གོང་མཐོར་གཏོང་རྒྱུ་གཉིས་ཁོང་གི་མཛད་འགན་གཙོ་བོ་ཡིན་སྐོར་གསུངས་པ་དང་། ད་ལྟའི་བོད་ཀྱི་ཁོར་ཡུག་གནས་སྟངས་ཧ་ཅང་ཛ་དྲག་ཆགས་ཡོད་སྐོར་སོགས་གསུངས་ཡོད་འདུག   

ཕྱི་ཚེས་༧ ཉིན་གྱི་ཉིན་རྒྱབ་མེཀ་གྷིལ་གཙུག་ལག་སློབ་གྲྭ་ (McGill University) ཆེན་མོ་དང་། མོན་ཊ་རེལ་གཙུག་ལག་སློབ་གྲྭ་ (Universite de Montreal) ཆེན་མོ། ཁེ་ཎ་ཌའི་ཏཱ་ལའི་བླ་མའི་ཐེབས་རྩ་བཅས་ཀྱི་གོ་སྒྲིག་འོག ༧གོང་ས་མཆོག་གིས་མོན་ཁྲི་རིལ་ཧྥི་ལཱ་སི་ཌེ་སི་ཀོ་རེ་སི་ཚོགས་ཆེན་མོར། ཁུལ་དེའི་མི་མང་སྟོང་ཕྲག་བརྒལ་བར་༼བཟང་སྤྱོད་ཀྱི་ཐོག་ནས་ཞི་བདེ་བསྐྲུན་ཐབས།༽ ཞེས་པའི་བརྗོད་གཞིའི་བཀའ་སློབ་གནང་ཡོད་ཅིང་། སྐབས་དེར་ཁོང་གིས།  “ དེང་དུས་འཛམ་གླིང་ནང་ཆོས་ལུགས་མི་འདྲ་བ་ཁག་གི་འབྲེལ་བ་ཉེ་རུ་གཏོང་རྒྱུ་ཧ་ཅང་གལ་ཆེན་ཆགས་ཡོད། ངོས་རང་གང་དུ་ཕྱིན་ཀྱང་ཆོས་ལུགས་ཁག་གི་བླ་ཆེན་ཚོར་ཐུག་འཕྲད་ཀྱིས་ཆོས་ལུགས་མཐུན་སྒྲིལ་གྱི་ལས་འགུལ་འདྲ་མིན་སྤེལ་གྱི་ཡོད། ངོས་ཀྱི་ལས་འགུལ་དེར་སྤྱི་ཚོགས་ནང་ཕན་ནུས་གང་འཚམ་ཡོང་གི་འདུག ” ཅེས་གསུངས་འདུག དེའི་རྗེས་༧གོང་ས་མཆོག་གིས་མོན་ཁྲི་རིལ་གྲོང་ཁྱེར་ནང་མང་ཚོགས་ལ་ཀུན་ཁྱབ་སེམས་ཁུར་གྱི་ཐོག་ནས་གོ་ལ་སྤྱི་ཡོངས་ཀྱི་མི་སེར་ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་དང་། ཁོང་གི་ཁེ་ཎ་ཌའི་མཛད་འཆར་ཁག་ལེགས་པར་གྲུབ་རྗེས་ཁ་སང་ཕྱི་ཚེས་ ༨ ཉིན་མཱེ་སེ་ཁོ་རུ་ (Mexico) ཞབས་སོར་འཁོད་ཡོད།

ཐེངས་འདིར་༧གོང་ས་མཆོག་ཁེ་ན་ཌ་ཁུལ་དུ་ཆིབས་སྒྱུར་མ་བསྐྱངས་སྔོན་ཏེ། ཟླ་འདིའི་ཕྱི་ཚེས་ ༥ ཉིན་ཨིན་ངྷི་རཱ་གྷན་དི་གཙུག་ལག་སློབ་གྲྭ་ཆེན་མོའི་(Indira Gandhi National Open University) ལོ་འཁོར་མཐར་ཕྱིན་མཛད་སྒོ་ཐེངས་ ༢༤ པའི་སྟེང་ཆིབས་བསྒྱུར་བསྐྱངས་ཏེ། གཙུག་ལག་སློབ་ཁང་དེའི་འབུམ་རམས་པའི་མཁས་པའི་གཟེངས་རྟགས་ (Honoris Causa)ཞེས་པ་དེ་བཞེས་གནང་མཛད་ཡོད་པ་མ་ཟད། སྐབས་དེར་གཙུག་ཁག་སློབ་ཁང་དེར་གསར་འཛུགས་གནང་བའི་བོད་རིག་པའི་སྡེ་ཚན་ཞིག་ཀྱང་དབུ་འབྱེད་གནང་ཡོད་འདུག

གསར་འགོད་པ། དཔལ་ལྡན།