༧གོང་ས་མཆོག་དང་མེག་སི་ཁོའི་སྲིད་འཛིན་མཇལ་འཕྲད་ལ་རྒྱ་ནག་གི་ཁ་རྡུང་།

རེས་གཟའ་པ་སངས་ཉིན་༧གོང་ས་མཆོག་མེག་སི་ཁོའི་སྲིད་འཛིན་ཕེ་ལིབ་ཁལ་ཌེ་རོན་མཆོག་དང་མཇལ་འཕྲད་གནང་བ་དེར། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པའི་སྐྱོན་བརྗོད་ཀྱི་གསར་འགོད་གསལ་བསྒྲགས་སྤེལ་འདུག

སི་ཁོའི་སྲིད་འཛིན་སྐུ་ཞབས་ཧྥེ་ལེབ་ཁིལ་ཌི་རོན་(Felip Calderon)མཆོག་གིས་རྒྱ་ནག་གཞུང་གི་སྐྱོན་བརྗོད་དང་གནོད་ཤུགས་ལ་མ་ལྟོས་པར། ཟླ་འདིའི་ཕྱི་ཚེས་ ༩ ཉིན་༧གོང་ས་མཆོག་སྲིད་འཛིན་ཕོ་བྲང་ལོ་སི་པི་ནོ་སི་རུ་ (Los Pinos)ཞེས་པར་གདན་འདྲེན་ཞུས་ཏེ། སྲིད་འཛིན་མཆོག་དང་ཁོང་གི་སྐུ་ཟླ་མཱར་གྷ་རི་ཊ་ཛ་ཝ་ལ་ཁིལ་ཌི་རོན་(Margarita Zavala Calderon)རྣམ་གཉིས་དང་མཇལ་འཕྲད་ཀྱིས་བཀའ་མོལ་གནང་ཡོད་པ་མ་ཟད། མཇལ་འཕྲད་གྲུབ་མ་ཐག་ཡུལ་དེའི་མཱར་ཀུ་སི་རི་ཕོར་མིར་ཞེས་པར། ས་གནས་ཁག་འདྲ་མིན་ནས་ཕེབས་པའི་གསར་འགོད་པ་ ༤༠༠ ཙམ་ལ་སྐར་མ་ ༤༥ རིང་དྲི་བ་དྲིས་ལན་གྱི་གོ་སྐབས་གནང་ཡོད། དེའི་མཇུག་ཏུ་མེག་སི་ཁོའི་སྲིད་འཛིན་ཟུར་པ་སྐུ་ཞབས་ཝི་སེན་ཏེ་ཕོ་སི་ (Mr. Vicente Fox)མཆོག་དང་ཁོང་གི་ནང་མི་ཚོར་མཇལ་འཕྲད་གནང་སྟེ། སྲིད་མཆོག་ཟུར་པ་མཆོག་གིས་རེ་སྐུལ་ལྟར་ལོ་རྗེས་མ་བསྐྱར་དུ་མེག་སི་ཁོར་ཆིབས་བསྒྱུརབསྐྱང་རྒྱུར་ཞལ་བཞེས་ཀྱང་གནང་ཡོད་འདུག 

༧གོང་ས་མཆོག་ཐེངས་འདིར་མེག་སི་ཁོའི་སྲིོད་འཛིན་མཆོག་ལ་མཇལ་འཕྲད་གནང་བ་དེས། རྒྱ་གཞུང་གི་དཔོན་རིགས་ཚོར་ཁོང་ཁྲོ་ཆེན་པོ་བསླངས་ཡོད་འདུག་ལ། ཉིན་དེར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མཱ་ཀྲའོ་ཞུ་ཡིས་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་ཏེ། “ སྤྱི་ཟླ་ ༩ པའི་ཚེས་ ༩ ཉིན་མོ་ཞི་ཁོའི་ཕྱོགས་ནས་ཀྲུང་གོའི་ཕྱོགས་ཀྱིས་འབྲེལ་བ་ཐེངས་མང་བྱས་པ་དང་ངོ་རྒོལ་མཐའ་གཅིག་ཏུ་བྱས་པར་མ་བལྟོས་པར་ཁ་ཨེར་ཏེ་ལུང་ཙུང་ཐུང་གིས་ཏཱ་ལའི་བླ་མ་དང་ཐུག་འཕྲད་བྱེད་རྒྱུ་བཀོད་སྒྲིག་བྱས་ཡོད་པས།བྱེད་ སྟངས་དེ་ནི་ཀྲུང་གོའི་ནང་སྲིད་ལ་རྩུབ་སྤྱོད་ཀྱིས་ཐེ་གཏོགས་བྱས་པ་ཞིག་ཡིན་པ་ མ་ཟད། ཀྲུང་གོའི་མི་དམངས་ཀྱི་བརྩེ་དུང་ལ་རྨ་ཁ་བཟོ་རུ་བཅུག་པ་ཞིག་ཡིན་ལ། ཀྲུང་གོ་དང་མོ་ཞི་ཁོའི་འབྲེལ་བར་གནོད་སྐྱོན་བཟོས་པ་ཞིག་ཀྱང་ཡིན་པས། ཀྲུང་གོའི་ཕྱོགས་ནས་དེའི་ཐད་ངོ་རྒོལ་མཐའ་གཅིག་ཏུ་བྱེད་རྒྱུ་ཡིན་པ་མ་ཟད། ཀྲུང་གོའི་ཕྱི་འབྲེལ་པུའུ་དང་མོ་ཞི་ཁོར་བཅའ་སྡོད་བྱས་པའི་དོན་གཅོད་ཁང་གིས་པེ་ཅིང་དང་མོ་ཞི་ཁོ་གྲོང་ཁྱེར་སོ་སོ་ནས་མོ་ཞི་ཁོའི་ཕྱོགས་ལ་གནད་དོན་དེ་ཕྱོགས་གཉིས་གྲོས་མོལ་གྱི་ཐོག་ནས་ཐག་གཅོད་བྱེད་རྒྱུའི་རེ་བ་ནན་པོ་ཡང་བཏོན་པ་ཡིན ” ཞེསབརྗོད་འདུག

མཱ་ཀྲའོ་ཞུ་ཡིས་མུ་མཐུད་དུ་བརྗོད་དོན།  “བོད་ ལྗོངས་ཀྱི་དོན་དག་ནི་ཀྲུང་གོའི་ནང་སྲིད་ཀྱི་དོན་དག་ཡིན་པ་དང་།བོད་དོན་གནད་ དོན་ནི་ཀྲུང་གོའི་རྩ་བའི་ཁེ་ཕན་དང་ཀྲུང་གོའི་མི་དམངས་ཀྱི་བརྩེ་དུང་དང་ འབྲེལ་བ་ཡོད་པ་ཞིག་རེད། ཏཱ་ལའི་བླ་མས་དུས་ཡུན་རིང་པོར་ཆོས་ལུགས་ཀྱི་དར་ཆ་སྒྲེང་ནས་ཀྲུང་གོར་ངོ་རྒོལ་དང་ཁ་བྲལ་བྱེད་པའི་བྱེད་སྒོ་སྤེལ་ཡོད་པས།ཀྲུང་གོའི་ཕྱོགས་ནས་རྒྱལ་ཁབ་སུ་འདྲ་ཞིག་གི་དབུ་ཁྲིད་དང་སྲིད་གཞུང་དཔོན་རིགས་ཀྱིས་རྣམ་པ་འདྲ་མིན་གྱི་ཐོག་ནས་ཏཱ་ལའི་བླ་མ་དང་ཐུག་འཕྲད་བྱེད་པར་ངོ་རྒོལ་མཐའ་གཅིག་ཏུ་བྱེད་རྒྱུ་ཡིན། མོ་ཞི་ཁོའི་དབུ་ཁྲིད་ཀྱིས་ཏཱ་ལའི་བླ་མ་དང་ཐུག་འཕྲད་བྱས་པ་དེས། མོ་ཞི་ཁོའི་ཕྱོགས་ནས་རྟག་པར་་བཏོན་པའི་་དམ་ཚིག་ལས་རྒྱབ་འགལ་དུ་སོང་བ་ཞིག་ཀྱང་རེད།ང་ཚོའི་རེ་བར་མོ་ཞི་ཁོའི་ཕྱོགས་ནས་བྱ་ཐབས་སྤྱད་དེ་ཤུགས་རྐྱེན་ངན་པ་མེད་པར་བཟོས་ཏེ། བྱ་སྤྱོད་ངོ་མའི་ཐོག་ནས་ཀྲུང་གོ་དང་མོ་ཞི་ཁོ་དབར་གྱི་འབྲེལ་བ་དེ་བདེ་ཐང་བརྟན་བརླིང་ངང་འཕེལ་རྒྱས་ཡོང་བ་བྱ་དགོས ”  ཞེས་སྡིགས་དམོལ་བྱས་འདུག  

གསར་འགོད་པ། དཔལ་ལྡན།