བཙན་བྱོལ “བོད་གཞུང” གི་མཚན་བྱང་བསྐྱར་གསོ་བྱ་དགོས།

སྐབས་བཅོ་ལྔ་པའི་གྲོས་ཚོགས་ཚོགས་འཆར་ཡོད་པའི་སྐབས་དང་བསྟུན་ཏེ། གཟའ་ལྷག་པ་སྟེ་ཕྱི་ཚེས་ ༡༣ ཉིན་ངྷ་ས་ཉིན་མོ་སློབ་གྲྭའི་ཚོགས་ཁང་དུ་ཉེ་སྔོན་བཙན་བྱོལ་བོད་མིའི་མཚན་བྱང་འགྱུར་ཐེབས་པའི་ཐད་བགྲོ་གླེང་ཞིག་གནང་སྟེ། གཏམ་བཤད་པ་སྐོར་ཞིག་གིས་མཚན་བྱང་བསྐྱར་གསོ་དགོས་སྐོར་ཤུགས་ཀྱིས་གསུངས་སོང་།   

ཕྱི་ཟླ་ ༩ ཚེས་ ༡༤ ཉིན་གྱི་ཕྱི་དྲོར་དྷ་ས་ས་གནས་གཞོན་ལྷན་གྱིས་ཉི་མ་སློབ་གྲྭའི་ཚོགས་ཁང་དུ༼བཙན་བྱོལ་བོད་གཞུང་གི་མཚན་བྱང་བཅོས་བསྒྱུར་ཐད་ཀྱི་མི་དམངས་བགྲོ་གླེང་༽ཞེས་པ་ཞིག་གོ་སྒྲིག་གནང་ཐོག  སྤྱི་འཐུས་ཚོགས་གཙོ་ཟུར་བ་པདྨ་འབྱུང་གནས་དང་། སྤྱི་འཐུས་སྨོན་ལམ་མཐར་ཕྱིན། གཞོན་ལྷན་ཚོགས་གཞོན་དོན་འགྲུབ་ལྷ་དར། དགུ་བཅུ་གསུམ་ཚོགས་གཞོན་ཀླུ་མཁར་བྱམས་བཞི་གདན་འདྲེན་ཞུས་ཏེ། ཉེ་སྔོན་བཙན་བྱོལ་བོད་གཞུང་གི་མཚན་བྱང་འགྱུར་བ་ཐེབས་པའི་སྐོར་ལ་གཏམ་བཤད་དང་མང་ཚོགས་ཀྱི་དྲི་བར་ལན་འདེབས་གནང་ཡོད་པ་རེད།

སྤྱི་འཐུས་པདྨ་འབྱུང་གནས་ལགས་ཀྱིས་བཅའ་ཁྲིམས་ཀྱི་བརྒྱུད་རིམ་ཁྲོད་བཙན་བྱོལ་གཞུང་གི་མིང་བྱང་ལ་འགྱུར་བཅོས་ཅི་ལྟར་གནང་ཡོད་མེད་ཀྱི་བྱུང་རིམ་ངོ་སྤྲོད་དང་སྦྲགས་དང་། “བཅའ་ཁྲིམས་བསྐྱར་བཅོས་མ་གནང་གོང་དུ་༸གོང་ས་མཆོག་གིས་༼ རང་དབང་དམངས་གཙོའི་གཞུང་༽དང་༼རང་དབང་དམངས་གཙོའི་སྒྲིག་འཛུགས༽ཞེས་པའི་བཀའ་དེ་འདྲ་ཞིག་ཕེབས་པ་རེད། དེ་རྗེས་བཅའ་ཁྲིམས་བསྐྱར་བཅོས་གནང་པའི་སྐབས། བཀའ་འབྲེལ་ཡིན་ཟེར་ནས་ཡིག་ཐོག་ནས་ད་ལྟའི་བོད་མིའི་སྒྲིག་འཛུགས་ཞེས་པ་འདི་ཆགས་པ་རེད།” ཅེས་བརྗོད་དེ། ཁོང་རང་ཉིད་ལ་མཚོན་ན་བོད་མིའི་སྒྲིག་འཛུགས་ཞེས་པ་དེ་ནི་༸གོང་ས་མཆོག་གི་བཀའ་དགོངས་གཞིར་བཟུང་བསྐྱར་བཅོས་གནང་བ་ཞིག་ལ་ངོས་འཛིན་གནང་གི་ཡོད་པ་ལས།  སྤྱི་འཐུས་ལྷན་ཚོགས་ཀྱི་ངོས་ནས་བགྲོ་གླེང་གནང་སྟེ་ཐག་གཅོད་བྱུང་པ་ཞིག་ཡིན་བསམ་གྱི་མེད་པར་བརྟེན།  ༸གོང་ས་མཆོག་གིས་བཀའ་གནང་བཞག་པ་དེ་ཟླ་བ་གསུམ་གྱི་རྗེས་ལ་ཡང་བསྐྱར་འགྱུར་བ་གཏོང་གི་ཡིན་ཞེས་བརྗོད་སྐབས་ཁྱད་མཚར་ཞིག་ཏུ་མཐོང་གི་ཡོད་སྐོར་བརྗོད་སོང་།

དེ་བཞིན། ད་ལྟའི་མཚན་བྱང་བསྐྱར་དུ་བསྒྱུར་བཅོས་ཀྱི་གླེང་སློང་སླེབས་སྟངས་དེ་ནི་བཅའ་ཁྲིམས་བསྐྱར་བཅོས་གནང་ཚར་བའི་རྗེས་སུ།   སྤྱི་འཐུས་སྐབས་བཅོ་ལྔ་པས་བཅའ་ཁྲིམས་བསྐྱར་བཅོས་ཀྱི་རྗེས་འབྲེལ་ཁྲིམས་སྒྲིག་བསྐྱར་བཅོས་ཚོགས་ཆུང་བཙུགས་ཏེ་ཁྲིམས་སྒྲིག་བསྐྱར་བཅོས་གནང་བཞིན་པའི་བར་སྐབས་དེར།   སྐབས་དེའི་བཀའ་ཁྲི་ཟམ་གདོང་རིན་པོ་ཆེ་དང་། ད་ལྟའི་བཀའ་ཁྲི་བློ་བཟང་སེང་གེ སྤྱི་འཐུས་ཚོགས་གཙོ་སྤེན་པ་ཚེ་རིང་གསུམ་༸གོང་ས་མཆོག་གི་ཕེབས་བསུར་བཅར་ཐེངས་ཤིག་ལ།  བཀའ་ཁྲི་ཟམ་གདོང་རིན་པོ་ཆེ་མཆོག་གིས་ “བོད་མིའི་སྒྲིག་འཛུགས་ཞེས་པ་བཅའ་ཁྲིམས་ལེའུ་དང་པོའི་སྐབས་ཀྱི་དེ་རེད་མ་གཏོགས་སྤྱི་ཡོངས་ལ་གོ་བ་ཞིག་ཡིན་ས་མ་རེད། ༸གོང་ས་མཆོག་གི་དགོངས་པ་ཡང་དེ་ཡིན་ས་མ་རེད།” ཅེས་གསུངས་ཡོད་སྟབས།  ཚོགས་གཙོ་རྣམ་གཉིས་ཀྱིས་ཁྲིམས་སྒྲིག་བསྐྱར་བཅོས་ཚོགས་ཆུང་ནས་དེ་བསྒྱུར་བཅོས་གནང་རྒྱུའི་སྐོར་ལ་བཀའ་མོལ་གནང་བ་དང་། སྐབས་དེར་ཚོགས་ཆུང་གི་ངོས་ནས་ད་ལྟའི་ཚོགས་ཆུང་དེ་ནི་བཅའ་ཁྲིམས་བསྐྱར་བཅོས་ཀྱི་རྗེས་འབྲེལ་ཁྲིམས་སྒྲིག་བསྐྱར་བཅོས་ཚོགས་ཆུང་ཡིན་པ་མ་གཏོགས། བཅའ་ཁྲིམས་བསྐྱར་བཅོས་བཟོ་མཁན་མིན་པར་བརྟེན་དེ་འགྲིག་གི་མེད་སྐོར་གསལ་བཤད་ཞུས་ཡོད་པར་མ་ཟད།    སྐབས་དེར་ཚོགས་ཆུང་གི་ངོས་ནས་ “ ༸གོང་ས་མཆོག་གི་བཀའ་འདི་ཡིན་ས་རེད། ཕ་གི་ཡིན་ས་རེད་ཅེས་གསུངས་དེ་མི་སྡོད་པར། གང་ཡིན་པ་དེ་ང་ཚོར་གསལ་བོ་བཟོ་དགོས་ཀྱི་ཡོད། བཀའ་བློན་ཁྲི་པ་དང་ཚོགས་གཙོ་རྣམ་གཉིས་གང་ཡིན་ན་རེད། ཡང་བསྐྱར་༸གོང་ས་མཆོག་ལ་ཐུགས་མཇལ་ཞུས་ཏེ། དགོངས་སྐོར་ཞུས་ན་ཡག་པོ་འདུག་ཅེས་ཞུས་པ་ཡིན།” ཞེས་བརྗོད་སོང་། 

དོན་གྲུབ་ལྷ་དར་ལགས་ཀྱིས། ད་ལྟའི་བར་བོད་ཕྱི་ནང་ཚང་མས་དཀའ་ངལ་ཆེན་པོ་ཞིག་གི་ནང་ལོ་ ༦༠ ལ་བཙན་རྒྱལ་རིང་ལུགས་ཆེས་ཤོས་དེའི་ཁ་གཏད་ལ་སྲོག་བཏང་དེ་འཐབ་རྩོད་བྱས་བསྡད་པ་ལ་རེ་བ་ཡིད་ཆེས་གསུམ་ཡོད་པ་རེད། དང་པོ་དེ་འདས་པོའི་ལོ་རྒྱུས་ཀྱི་ཐོག་ནས་བོད་རང་བཙན་ཡིན་པ། གཉིས་པ་དེ་༸གོང་ས་མཆོག་གི་རླབས་ཆེན་གྱི་དབུ་ཁྲིད། གསུམ་པ་དེ་བཙན་བྱོལ་སྤྱི་ཚོགས་འདིར་སོ་སོའི་སྲིད་གཞུང་ཞིག་ཡོད་པའི་ནུས་པ་དང་སྟོབས་ཤུགས་བཅས་ཡིན་པར་བརྟེན།   མ་འོངས་པར་བོད་རང་བཙན་སླར་གསོའི་ཕུགས་འདུན་དེ་བཙན་བྱོལ་བོད་གཞུང་གི་མིང་དང་དོན་གཉིས་ཀ་ཆགས་བསྡད་པའི་རྒྱུ་མཚན་གྱིས། མིང་དོན་གཉིས་ཀ་རྒྱུན་འཁྱོངས་བྱ་དགོས་པ་དེ་གནད་འགག་ཆགས་ཡོད་པ་གསལ་བཤད་དང་སྦྲགས། ཁོང་གིས་ “ འགྱུར་བ་བཏང་བའི་བརྒྱུད་རིམ་ཁྲོད་དབང་ལྡན་འགན་འཛིན་དང་མཐོ་རིམ་དབུ་ཁྲིད་ཚོས་བཀའ་མོལ་ལ་འགྱུར་བ་མང་པོ་ཕྱིན་ཡོད་པ་རེད། འགྱུར་བ་གཏོང་དགོས་པའི་རྒྱུ་མཚན་ཁ་གསལ་ཡོད་པ་མ་རེད། འགྱུར་ཕྱིན་པའི་བརྒྱུད་རིམ་ནང་མཚམས་རེར་གནས་ཡུལ་གཞུང་གི་གནོད་ཤུགས་ཡོད་སྐོར་བཀའ་མོལ་གནང་ཡོད་པ་རེད། གྱུར་བ་བཏང་ཚར་བའི་རྗེས་ལ་འགྱུར་བ་གཏོང་དགོས་པ་དེ་གནས་ཡུལ་གཞུང་གི་གནོད་ཤུགས་མིན་ཞེས་ལབ་ཡོད་པ་རེད།  དོན་གྱིས་འགྱུར་བ་གཏོང་དགོས་པའི་རྒྱུ་མཚན་དེ་ད་ལྟའི་ཆར་ཁ་གསལ་བོ་མེད་པའི་གནས་སྟངས་ཤིག་ཆགས་བསྡད་ཡོད་པ་རེད།” ཅེས་བརྗོད་དེ།  དབུ་ཁྲིད་ཚོས་མི་མང་གི་མགོ་མ་འཐོམ་པ་བཟོ་དགོས་པ་དང་།  མི་མང་གི་དམིགས་ཡུལ་བརྟན་པོ་དང་ནུས་པ་གཅིག་གྱུར་ཡོང་ཆེད། ནང་ཁུལ་དམིགས་ཡུལ་དུམ་བུར་མ་སོང་པ་ཞིག་དང་། དམིགས་ཡུལ་གྱི་ཐོག་ལ་དོགས་པ་མ་སླེབས་པ་བྱ་དགོས་རྒྱུ་གལ་ཆེན་པོ་ཡིན་པ་ནན་བརྗོད་གནང་སོང་།

གཞན་ཡང་། ཁོང་གིས་བཙན་བྱོལ་བོད་གཞུང་གི་མཚན་བྱང་ལ་འགྱུར་བ་བཏང་བའི་རྗེས་ཀྱི་ཟླ་བ་ཁ་ཤས་རིང་མཇུག་འབྲས་ག་རེ་བྱུང་ཡོད་མེད་ཐད། ངེས་པར་དུ་ཕྱོགས་བསྡོམས་བྱ་དགོས་པའི་གནས་སྟངས་ཤིག་ཆགས་ཡོད་པ་དང་།  ད་ལྟའི་ཆར་མི་སེར་དཀྱུས་མ་ཙམ་དུ་མ་ཟད། གཞུང་ཞབས་པའི་ནང་ལོགས་སུ་ཡང་བློ་ཕམ་དང་ཡིད་ཆད་ཀྱི་སེམས་ཚོར་བྱུང་སྟེ།  གཞོན་ནུ་ལྷན་ཚོགས་ཀྱི་ཡིག་ཚང་དུ་མཚན་བྱང་བསྐྱར་གསོའི་ཆེད་ཐབས་ཤེས་གནང་དགོས་པའི་འབོད་སྐུལ་ཞུ་མཁན་མང་པོ་བྱུང་པ་དང་།   དེ་བཞིན།  ད་ལྟ་བཙན་བྱོལ་བོད་གཞུང་གི་མཚན་བྱང་ལ་འགྱུར་བ་ཐེབས་པ་ལ་བརྟེན་ནས།  དྷ་རམ་ས་ལའི་རི་ཁུག་འདིར་མུ་མཐུད་སྡུག་རུས་བརྒྱབ་སྟེ་སྡོད་དགོས་པའི་རྒྱུ་མཚན་ཐད་མི་མང་སོ་སོའི་སེམས་ནང་དོགས་དྲི་སླེབ་བཞིན་ཡོད་སྟབས།    གལ་སྲིད་མི་མང་གི་སེམས་ནང་ཡིད་ཆད་དང་བློ་ཕམ་བྱུང་ཚེ་འཐབ་རྩོད་ལ་གནོད་པའི་སྐོར།  བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༢ པའི་ཐོག་ལ་སྤྱི་མོས་གྲོས་ཆོད་བཞག་པ་ལྟར།  བཙན་བྱོལ་བོད་གཞུང་གི་མཚན་བྱང་བསྐྱར་གསོ་ཡོང་བའི་ཐད་གྲོས་ཚོགས་སུ་ཞུ་སྙན་ཕུལ་ཡོད་པ་དང་། གཞོན་ནུ་ལྷན་ཚོགས་ཀྱི་ངོས་ནས་ད་ལྟའི་བར་ཡིག་ཆའི་སྟེང་བཙན་བྱོལ་བོད་གཞུང་ཞེས་བཀོད་ཡོད་ལ།  མ་འོངས་པར་ཡང་མུ་མཐུད་དེ་ལྟར་འགོད་རྒྱུ་ཡིན་པ་སོགས་བརྗོད་སོང་།

སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་ “སྐུ་སྒེར་དྲུང་ཆེ་བརྒྱུད་ནས་མར་བཀའ་ཞིག་ཕེབས་ཡོད་པ་རེད། དེའི་ནང་ལ་བཙན་བྱོལ་སྒྲིག་འཛུགས་གསུངས་དེ། ད་ལྟ་ང་ཚོའི་བཙན་བྱོལ་བོད་གཞུང་གསུང་ས་དེ་ལ་ཚིག་དེ་འདྲ་ཞིག་བྲིས་གནང་ཡོད་པ་རེད། མཐའ་མ་ཕུལ་བ་དེའི་ནང་ལ། བོད་མིའི་སྒྲིག་འཛུགས་ཟེར་བ་དེ་ཕེབས་ཡོད་པ་དང་། གྲོས་ཚོགས་ནང་ལ་གླེང་སློང་ཤུགས་ཆེན་པོ་བྱུང་བའི་གནས་སྐབས་སུ། སྐབས་དེའི་བཀའ་བློན་ཁྲི་པ་ཡིས་ད་ལྟའི་བར་དུ་༸གོང་ས་མཆོག་གིས་བཙན་བྱོལ་བོད་གཞུང་ཟེར་ནས་གསུངས་མ་མྱོང་བ་རེད་ཅེས་པའི་ཚིག་ཚུན་ཆད་བེད་སྤྱོད་བཏང་སྟེ།  ང་ཚོས་བཙན་བྱོལ་བོད་གཞུང་ཞེས་པའི་ཚིག་དེ་བེད་སྤྱོད་བཏང་བ་ཡིན་ན། ༸གོང་ས་མཆོག་གི་ཞལ་བཞེས་གནང་བ་ལ་དཀའ་ལས་ཁག་པོ་ཆགས་པ་རེད་གསུངས་པའི་གནས་སྟངས་མང་པོ་ཞིག་དང་། དེ་བཞིན་ང་ཚོའི་ངོས་ནས་ཀྱང་ད་ལྟ་བར་དུ་གོང་ས་མཆོག་གི་བཀའ་སློབ་རིམ་པའི་དགོངས་དོན་ལ་བརྟེན་ནས་བོད་མིའི་སྒྲིག་འཛུགས་ཟེར་བ་དེ་ཏག་ཏག་སྡོད་ཀྱི་ཡོད་པ་ཞིག་དང་། དེ་ཡང་གོང་ས་མཆོག་གི་དགོངས་བཞེས་ཡིན་པ་གཅིག་རང་ལ་ངོས་འཛིན་བྱས་ཏེ་མཐའ་མའི་གཏན་འབེབས་གནང་སྟངས་དེ་འདྲ་ཞིག་རེད།” ཅེས་བརྗོད་དེ། ད་ལྟ་འགྱུར་བ་ཕྱིན་པ་དེ་མདོར་བསྡུས་ན་རྒྱ་གར་གཞུང་གིས་ཁས་ལེན་གྱི་ཡོད་པའི་དབྱིན་ཇིའི་ཚིག་དེ་དང་མཐུན་པ་ཞིག་བཟོས་པ་ཡིན་པར་ངོས་འཛིན་དང་། ༸གོང་ས་མཆོག་གིས་གཞུང་མང་རྒྱལ་ཡོངས་ཚོགས་ཆེན་གྱི་མཇུག་བསྡོམས་ཚར་ཏེ་མཇལ་མོལ་གནང་སྐབས།  སྣང་མེད་བཏང་ན་འགྲིག་གི་མེད་པ་དང་། མང་པོ་ཞིག་ཕན་ཚུན་བསྟུན་དགོས་ཀྱི་ཡོད་པ་གསུངས་པའི་དགོངས་དོན་དང་མ་འགལ་བར་ཏག་ཏག་ཅིག་བསྡད་ཡོད་པར་ངོས་འཛིན་གནང་གི་ཡོད་སྐོར་བརྗོད་སོང་།  

ཚོགས་གཞོན་ཀླུ་མཁར་བྱམས་ལགས་ཀྱིས། “ སྤྱིར་གཞུང་ཟེར་བ་དེ་ནུས་པ་གཉིས་ཀྱི་སྒང་ལ་འཇོག་དགོས་པ་རེད། གཅིག་ང་ཚོས་གཞུང་དེས་དངོས་ཡོད་གནས་ཚུལ་ཐོག་ཁྲལ་དང་ཁྲིམས་ལུགས་ཀྱི་སྒང་ནས་མི་མང་ལ་མགོ་བསྡུ་རྒྱག་ཐུབ་ཀྱི་ཡོད་མེད་དེ་རེད། གཉིས་པ་དེ་གཞུང་དང་མི་མང་བར་སེམས་ཚོར་ཡོད་དགོས་པ་དེ་རེད། གཞུང་དང་མི་མང་གི་བར་གྱི་སེམས་ཚོར་དེ་བརླགས་པ་ཡིན་ན། དེ་ལས་བསླ་བོས་སླར་གསོ་བྱེད་ཐུབ་པ་ཞིག་མ་རེད། ང་ཚོ་བཙན་བྱོལ་བོད་གཞུང་དང་བོད་མི་མང་བར་གྱི་འབྲེལ་བ་དེ། ངས་བལྟས་ན་ཁྲིམས་ཁང་དང་དམག་མི། ཁྲལ་སོགས་ཀྱི་སྒང་ནས་གཞུང་ཞིག་གི་ཁྱབ་ཁོངས་ལ་འགྲོ་ཐུབ་ཀྱི་ཡོད་པ་མ་རེད། ཚོར་བ་རང་གི་སྒང་ན་བསྡད་ཡོད་པ་རེད། ” ཅེས་བརྗོད་དེ།  བཙན་བྱོལ་བོད་གཞུང་གི་མཚན་བྱང་འགྱུར་བ་བཏང་བ་དེས་མི་མང་གི་ཚོར་བའི་སྒང་ལ་ཕོགས་ཐུག་འགྲོ་བཞིན་ཡོད་སྟབས།  མིའི་ཚོར་བའི་དཀའ་ངལ་དེ་ལས་སླ་བོས་བསྐྱར་གསོ་བྱ་ཐུབ་ཀྱི་ཡོད་པ་དང་། དེ་བཞིན།  རྒྱ་ནག་གཞུང་གི་འོག་ནས་བྲོས་ཡོང་དགོས་པའི་རྒྱུ་མཚན་དང་། དགའ་ལྡན་ཕོ་བྲང་གི་ཐམ་ཀ་དང་ལས་ཤོག་བསྣམས་ཏེ་ཁྱེར་ཡོང་དགོས་པའི་རྒྱུ་མཚན་གཙོ་བོ་རྒྱལ་ཁབ་ཅིག་གི་ངོ་བོ་ནས་ང་ཚོ་བྲོས་ཡོང་པ་ཡིན་སྟབས།  བཙན་བྱོལ་བོད་གཞུང་གི་མཚན་བྱང་རྒྱུན་འཛིན་དགོས་པ་དེ་ལོ་རྒྱུས་ཀྱི་གནད་འགག་རྩ་ཆེན་ཞིག་ཏུ་གྱུར་ཡོད་པས།  བཙན་བྱོལ་བོད་གཞུང་གི་མཚན་བྱང་དེ་ངེས་པར་དུ་ཕྱིར་བསྐྱར་གསོ་བྱ་དགོས་ཀྱི་ཡོད་པ་དང་། ཚོགས་འདུ་ཚོགས་དེ་གཏམ་བཤད་བྱ་དགོས་པའི་རྒྱུ་མཚན་ཡང་དེ་ཡིན་པ་བརྗོད་སོང་།  

གཞན་ཡང་། ཁོས་མང་ཚོགས་ཀྱིས་དྲི་བར་ལན་འདེབས་སྐབས། “ང་ཚོ་༸གོང་ས་མཆོག་གི་བཀའ་ག་རེ་གནང་པ་དེར་ཧང་སངས་བཞིན་མེད། ༸གོང་ས་མཆོག་གི་བཀའ་བརྩི་སྟངས་དེ་ལ་ང་ཚོ་ཧང་སངས་ཀྱི་ཡོད། ༸གོང་ས་མཆོག་གིས་བཀའ་རབ་དང་རིམ་པ་མང་པོ་གནང་ཚར་བ་རེད། ཡིན་ནའང་། ༸གོང་ས་མཆོག་གིས་ངའི་བཀའ་ཡིན་པའི་རྒྱུ་མཚན་གྱིས། དམངས་གཙོ་ཡང་བྱེད་མ་དགོས་པར་ཡིན་གཅིག་མིན་གཉིས་ལག་བསྟར་བྱ་དགོས་ཀྱི་ཡོད་ཅེས་གསུང་གི་མེད་པར།  ངོས་ཀྱི་དགོངས་འཆར་འདི་འདྲ་ཡིན་མི་མང་གི་བསམ་བློ་གཏོང་ཕྱོགས་ག་འདྲ་འདུག དམིགས་བསལ་ཚོགས་ཆེན་འཚོགས་དགོས་ཀྱི་འདུག་གམ། ཁྱོད་རང་ཚོས་ང་མེད་པ་ནང་བཞིན་སྒྲུབ་རོགས་ཞེས་བཀའ་འདི་ལྟར་གནང་གི་ཡོད་པ་རེད་བསམ་གྱི་འདུག  དེར་བརྟེན། འདི་དག་ ༸གོང་ས་མཆོག་གི་བཀའ་བརྩི་སྟངས་མ་རེད། མི་མང་གི་མངོན་འདོད་ཀྱང་སྒྲུབ་ཀྱིན་ཡོད་པ་མ་རེད། སོ་སོར་འཁྲབ་སྟོན་བྱེད་སའི་གོ་སྐབས་ཤིག་བཙལ་གྱི་ཡོད་པ་རེད། མི་མང་གི་རེ་བ་དང་མངོན་འདོད་ག་དུས་ཡིན་ཡང་སྒྲུབ་ཀྱི་མ་རེད། ” ཅེས་བརྗོད་སོང་།

གསར་འགོད་པ། ཚེ་རིང་རྒྱལ།