ད་ལོའི་ཨ་རིའི་སློབ་ཡོན་ཁོངས་སུ་བོད་པའི་སློབ་མ་ ༡༨ ལ་སློབ་ཡོན་རག་ཡོད་ཀྱང་། ལྡི་ལི་ཨ་རིའི་གཞུང་ཚབ་ཀྱིས་སློབ་མ་ ༨ ལས་ཐོངས་མཆན་སྤྲད་མེད་པ་དང་། དེ་ནི་ལོ་སྔོན་མ་དག་ལ་སློབ་ཕྲུག་མང་པོ་ཞིག་ཕྱིར་མ་ལོག་སྟབས། ཨ་རིའི་གཞུང་ཚབ་ཀྱིས་བོད་པའི་སློབ་ཡོན་ལས་གཞིའི་ཐོག་འཛིན་པའི་སྲིད་བྱུས་ལ་འགྱུར་བ་ཕྱིན་པ་ཞིག་ཡིན་འདུག
ད་ལོ་ཨ་རིའི་སློབ་ཡོན་འོག་བོད་པའི་སློབ་ཕྲུག་ ༡༨ ཙམ་ཨ་རིའི་མཐོ་སློབ་ཁག་ནང་སློབ་གཉེར་དུ་བསྐྱོད་རྒྱུའི་གོ་སྐབས་རག་ཡོད་ཀྱང་། དེའི་ཁྲོད་ཀྱི་སློབ་ཕྲུག་ ༡༠ ཉེ་ལམ་ཕྱི་ཟླ་ ༧ ནང་རྒྱ་གར་གྱི་རྒྱལ་ས་ལྡི་ལིའི་ཨ་རིའི་གཞུང་ཚབ་ནས་ཐོངས་མཆན་སྤྲད་མི་འདུག གཞན་སློབ་ཕྲུག་ ༨ ཙམ་ལ་ཐོངས་མཆན་རག་སྟེ་ཟླ་སྔོན་མའི་ཟླ་མཇུག་ཏུ་ཨ་རིར་ཕྱིན་ཡོད་འདུག འདིའི་ཐད་ཨ་རི་བོད་ཀྱི་ཐེབས་རྩ་ཁང་གིས་དེ་ནི་སློབ་ཕྲུག་སྒེར་སོ་སོས་ཨ་རིའི་གཞུང་ཚབ་ནས་ཞིབ་བཤེར་བཀའ་འདྲི་གནང་སྐབས། ལན་རྒྱག་སྟངས་གནད་ལ་འཁེལ་དང་མ་འཁེལ་གྱི་ཐད་ནས་ཐོངས་མཆན་རག་མིན་ཐག་གཅོད་བྱུང་ཞིག་ཡིན་ཚུལ་བརྗོད་ཡོད་འདུག
ཉེ་ལམ་འདི་ལོའི་སློབ་ཡོན་རག་མཁན་དག་ཨ་རིའི་གཞུང་ཚབ་ཏུ་ཐོངས་མཆན་ཞུ་རྒྱུ་གྲ་སྒྲིག་གནང་བཞིན་ཡོད་སྐབས། ཐོག་མར་ཨ་རིའི་བོད་ཀྱི་ཐེབས་རྩ་ཚོགས་པས་ཨ་རིའི་གཞུང་གིས་སློབ་ཡོན་རོགས་དངུལ་ཉུང་དུ་བཏང་ཡོད་ཚུལ་བརྗོད་དེ་སློབ་ཡོན་རག་ཡོད་པ་ ༡༨ ལས་རྩེ་བཏོགས་ཀྱིས་སློབ་མ་ ༡༢ ལྡི་ལི་ཨ་རིའི་གཞུང་ཚབ་ལ་བཏང་སྟེ། ལྷག་མ་ ༦ དེ་ལོ་རྗེས་མར་གཏོང་རྒྱུ་བྱས་ཡོད་འདུག་ཀྱང་། སྐབས་དེར་ཨ་རིའི་གཞུང་ཚབ་ནས་སློབ་ཕྲུག་ ༡༢ ལས་སློབ་མ་ལྔ་ལ་མ་གཏོགས་ཐོངས་མཆན་སྤྲད་མེད་པ་དང་། རྗེས་སུ་བོད་ཀྱི་ཐེབས་རྩས་ཨ་རིའི་གཞུང་གིས་སློབ་ཡོན་ཆ་ཚང་སྤྲད་སོང་ཞེས་སློབ་ཕྲུག་གཞན་དྲུག་པོར་ཡང་ཐོངས་མཆན་ཞུ་རུ་བཏང་ཡོད་འདུག་ལ། ཁོང་ཚོའི་ཁྲོད་ཀྱི་སློབ་ཕྲུག་གསུམ་ལ་ཐོངས་མཆན་རག་སྟེ་སྔ་ཕྱི་ཁྱོན་བསྡོམས་སློབ་མ་ ༨ ལ་ཐོངས་མཆན་རག་ཡོད། ཐོངས་མཆན་མ་རག་པ་དག་གིས་ཐབས་ཤེས་ཡང་ཡང་བྱས་ཀྱང་གྲུབ་འབྲས་འཐོན་མེད་པ་དང་། གནད་དོན་དེའི་ཐད་བོད་ཁྱིམ་སློབ་ཡོན་འགན་འཛིན་དང་ཨ་རིའི་སློབ་ཡོན་གྱི་སློབ་ཕྲུག་འདེམས་སྒྲུག་ཚོགས་ཆུང་གི་ཚོགས་མི་ཐུབ་བསྟན་རྡོ་རྗེ་ལགས་ཀྱིས། “སྔོན་མ་ང་རང་ཨ་རིའི་སློབ་ཡོན་ཁོངས་སུ་འགྲོ་སྐབས་ཧ་ཅང་ལྷོད་ལྷོད་རེད། ཨ་རིའི་གཞུང་ཚབ་ལའང་འགྲོ་དགོས་པ་མ་རེད། ”ཅེས་བརྗོད་བྱུང་།
གནད་དོན་དེའི་ཐད་ལྡི་ལི་དོན་གཅོད་བསྟན་པ་ཚེ་རིང་ལགས་ཀྱིས་ཨ་རིའི་གཞུང་ཚབ་ལ་འབྲེལ་པ་བྱས་པར། གཞུང་ཚབ་ཀྱིས་ ༢༠༠༩ ལོར་སློབ་ཡོན་ཁོངས་སུ་ཕྱིན་ཏེ་ ༢༠༡༠ ལོར་སློབ་སྦྱོང་གི་དུས་ཡུན་རྫོགས་ཏེ་ཕྱིར་ལོག་བྱ་དགོས་པའི་སློབ་ཕྲུག་ ༤ ཕྱིར་ལོག་བྱས་མེད་པ་དང་། དེ་དག་ཕྱིར་ལོག་བྱུང་མཚམས་ད་ལོའི་ཐོངས་མཆན་མ་རག་པ་ཚོར་བསམ་བློ་གཏོང་གི་ཡིན་ཚུལ་བརྗོད་ཡོད་པར་བརྟེན། བོད་ཀྱི་ཐེབས་རྩ་ཚོགས་པས་སློབ་ཕྲུག་དེ་དག་སྐོར་ལ་ཞིབ་འཇུག་བྱས་པ་ལྟར་ན། ཁོང་ཚོའི་ཁྲོད་ཀྱི་མི་གཉིས་སྐྱབས་བཅོལ་ནང་འཛུལ་ཟིན་པ་དང་། གཅིག་གིས་ད་ལྟ་སྐྱབས་བཅོས་ཞུ་བཞིན་ཡོད་འདུག གཞན་མི་གཅིག་གར་སོང་ཤེས་རྟོགས་མ་ཐུབ་པས་སློབ་ཕྲུག་དེ་དག་ཕྱིར་ལོག་བྱ་རྒྱུ་མིན་པ་ཁ་གསལ་བྱུང་ཡོད་འདུག དེའི་ཐད་བསྟན་འཛིན་འཇམ་དབྱངས་ལགས་ཀྱིས། “མི་གསུམ་ཨ་རིར་ཡོད་པ་ཤེས་བཞིན་དུ་ཕྱིར་ལོག་བྱ་ཐུབ་ཀྱི་མི་འདུག་ཟེར་བ་དེ་བོད་ཀྱི་ཐེབས་རྩ་ཚོགས་པའི་འཐུས་ཤོར་རེད། ཁོང་ཚོ་ཕྱིར་ལོག་བྱ་རྒྱུར་ལམ་ཁ་རྩ་བ་ཉིད་ནས་མེད་པ་དེ་འདྲ་མ་རེད”ཟེར།
ཐེངས་འདིར་ཨ་རིར་ཐོངས་མཆན་མ་རག་མཁན་ངྷ་སྟེང་བོད་ཁྱིམ་སློབ་གྲྭའི་ཚན་རིག་དགེ་རྒན་བསྟན་འཛིན་འཇམ་དབྱངས་ལགས་ཀྱིས་བརྗོད་དོན། “ ལོ་གསུམ་ཙམ་རིང་དཀའ་ལས་བརྒྱབ་མཐར་གཞུང་ཚབ་ནས་སྐར་ཆ་འགའ་ཤས་ནང་རེ་བ་ཚང་མ་མེད་པ་བཟོས་ཡོང་དུས་བློ་ཕམ་ཆེན་པོ་བྱུང་སོང་། གནད་དོན་འདི་གཞུང་ཚབ་ཁང་གིས་བོད་མིར་བསམ་ནག་བྱས་པ་དེ་འདྲ་རེད་དྲན་གྱི་མེད། དེ་ནི་ད་སྔ་སློབ་ཡོན་ཐོབ་མཁན་མང་པོ་ཞིག་ཨ་རིར་གཏན་སྡོད་བྱས་པ་དང་བོད་ཀྱི་ཐེབས་རྩ་ཚོགས་པས་ཁོང་ཚོ་ཕྱིར་ལོག་བྱ་རྒྱུར་ནུས་པ་འདོན་མ་ཐུབ་པས་རེད། བློ་ཕམ་ཆེ་ཤོས་དེ་བཀའ་ཤག་གིས་བདག་པོ་བརྒྱབ་མ་སོང་བསམ་ཡོད། ཕྱོགས་གཅིག་ནས་བཀའ་ཁྲི་བློ་བཟང་སེང་གེ་མཆོག་གིས་ཁྱད་ལས་པ་ཁྲི་གཅིག་ཐོན་ཐབས་བྱ་རྒྱུ་དང་། ཁྱད་ལས་སློབ་སྦྱོང་ཆེད་བུ་ལོན་གཡར་རྒྱུའི་འཆར་གཞི་ཡོད་གསུང་གི་ཡོད་པ་རེད། འོན་ཀྱང་། དོན་དངོས་ཐོག་སོ་སོའི་མདུན་དུ་ཡོད་པ་དེ་ལ་ཡང་བདག་པོ་རྒྱག་གི་མི་འདུག”ཅེས་བརྗོད་བྱུང་།
༢༠༡༡ ལོར་སློབ་མཐར་ཕྱིན་ཏེ་ཕྱིར་ལོག་དགོས་པའི་སློབ་ཕྲུག་ ༡༦ ཡོད་ཅིང་། དེའི་ཁྲོད་ཀྱི་སློབ་ཕྲུག་ ༢ ལ་སོ་སོ་སྒེར་ངོས་ནས་མུ་མཐུད་ཨ་རིའི་ནང་འབུམ་རམས་པའི་སློབ་སྦྱོང་གི་གོ་སྐབས་རག་ཡོད་སྟབས། བོད་ཀྱི་ཐེབས་རྩ་ཚོགས་པས་ཁོང་གཉིས་ལ་དུས་ཚོད་འཕར་འགྱང་གི་ཆོག་མཆན་སྤྲད་ཡོད་པ་དང་། གཞན་སློབ་ཕྲུག་ ༡༤ ད་ལོའི་ཕྱི་ཟླ་བརྒྱད་པའི་ཚེས་ ༣༡ གོང་ཕྱིར་ལོག་བྱ་དགོས་པ་ལས་ ༧ ཕྱིར་ལོག་བྱུང་ཡོད་པ་དང་། སློབ་ཕྲུག་ ༧ དུས་ཐོག་ཕྱིར་ལོག་བྱས་མེད་པའི་གནས་ཚུལ་བྱུང་འདུག་ལ། བོད་ཀྱི་ཐེབས་རྩ་ཚོགས་པས་ཨ་རིའི་ནང་སྲིད་བདེ་སྲུང་ལས་ཁུངས་ (Internal home security) ལ་མི་བདུན་ཕྱིར་ལོག་བྱས་མེད་ཚུལ་སྙན་སེང་ཡང་ཞུས་ཡོད་འདུག
ཨ་རིའི་སློབ་ཡོན་ཁོངས་སུ་བསྐྱོད་དེ་ཕྱིར་ལོག་བྱེད་ཀྱི་མེད་པའི་གནད་དོན་ཐད། ཨ་རིའི་སློབ་ཡོན་ཐོབ་མཁན་སློབ་ཟུར་ཚོགས་པའི་ཚོགས་གཙོ་ཟུར་པ་དང་ཤེས་རིག་ལས་ཁུངས་ཀྱི་སློབ་ཡོན་ལམ་སྟོན་པ་སྒྲོལ་དཀར་དབང་མོ་ལགས་ཀྱིས་བརྗོད་དོན། “ ཨ་རིའི་སློབ་ཡོན་འདི་ནི་བོད་མི་སྐྱབས་བཅོལ་པ་ཚོར་རག་བཞིན་པའི་སློབ་ཡོན་ནང་གི་རྩ་ཆེ་ཤོས་དང་ཕན་ཐོག་ཆེ་ཤོས་ཤིག་ཡིན་སྟབས། བཙན་བྱོལ་སྤྱི་ཚོགས་དང་འབྱུང་འགྱུར་བོད་ཕྲུག་ཚོའི་ཆེད་བསམ་བློ་བཏང་སྟེ། སློབ་མཐར་ཕྱིན་རྗེས་དུས་ཐོག་ཕྱིར་ལོག་བྱ་རྒྱུ་ཧ་ཅང་གལ་ཆེན་པོ་རེད། སོ་སོ་ཨ་རིེར་ཐར་པའི་ཆེད་དུ་སློབ་ཡོན་ལས་གཞིའི་ལམ་ཁ་འདི་བེད་སྤྱོད་བྱས་ཏེ། ཕྱིར་མ་ལོག་པ་ཡིན་ན་རིམ་བཞིན་སློབ་ཡོན་རྩ་ཆེན་པོ་འདི་རྩ་མེད་ཆགས་སྲིད་པ་རེད ” ཅེས་བརྗོད་བྱུང་།
ཨ་རིའི་སློབ་ཡོན་ཁོངས་སུ་སློབ་ཕྲུག་འདེམས་སྒྲུག་བྱ་ཕྱོགས་ལ་སྔོན་མ་དང་མ་འདྲ་བའི་འགྱུར་བ་ཞིག་བཏང་ཡོད་པ་ནི། དེ་སྔོན་ཨ་རིའི་སློབ་ཡོན་འཐོབ་རྒྱུར་བོད་ཀྱི་རྒྱལ་རབས་ཆོས་འབྱུང་དང་བརྡ་སྤྲོད། སྤྱི་ཤེས་སོགས་བོད་ཡིག་ཐོག་ཚུད་རྒྱུགས་གཏོང་དགོས་ཀྱི་ཡོད་ཀྱང་། ད་ཆར་ཚུད་རྒྱུགས་དེ་བོད་ཡིག་ཐོག་བཏང་ན་སྐར་མ་ ༣ དམིགས་བསལ་སྤྲོད་ཀྱི་ཡོད་པ་ཙམ་ལས། ཚུད་རྒྱུགས་དེ་བོད་དབྱིན་གང་རུང་ཐོག་འབྲི་ཆོག་པ་བཟོས་ཡོད་འདུག
ཨ་རིའི་སློབ་ཡོན་ལས་གཞིའི་ཁོངས་སུ་ལོ་གཉིས་ཅན་ ( Degree program)ཟེར་བའི་སྡེ་ཚན་དང་། ལོ་གཅིག་ཅན་ ( non-degree program) ཟེར་བའི་སྡེ་ཚན་ཞིག་བཅས་རིགས་གཉིས་ཡོད་པ་དང་། ལོ་གཉིས་ཅན་གྱི་སྡེ་ཚན་དེ་ལ་ཉེ་བའི་གཙུག་ལག་རབ་འབྱམས་པ་ ( BA) ཞེས་པའི་སྟེང་མཐོ་སློབ་ཚད་ལྡན་ཞིག་ནས་ལོ་གཅིག་གི་ཆེད་སྦྱོང་དང་། དབྱིན་ཡིག་གི་ཚད་གཞི་ཊོ་ཧྥལ་ ( TOEFL) ཡིག་ཚད་ཀྱི་བརྒྱ་ཆ་ ༩༥ ལོངས་དགོས་ཀྱི་ཡོད་འདུག ལོ་གཅིག་ཅན་གྱི་སྡེ་ཚན་དེར་བོད་པའི་སྤྱི་ཚོགས་ནང་གཞུང་དང་གཞུང་འབྲེལ་མིན་པའི་ཚོགས་པ་གང་རུང་ནས་ལོ་ལྔའི་རིང་ལས་ཀ་བྱས་པའི་ཉམས་མྱོང་དང་བདེན་དཔང་ཡིག་ཆའི་སྟེང་། དབྱིན་ཡིག་གི་ཚད་གཞི་ཊོ་ཧྥལ་ ( TOEFL )ཡིག་ཚད་ཀྱི་བརྒྱ་ཆ་ ༨༥ ལོངས་དགོས་ཀྱི་ཡོད་འདུག
ཨ་རིའི་སློབ་ཡོན་ཁོངས་སུ་ཚུད་མཁན་ཚོའི་སློབ་ཡོན་དང་གནམ་གྲུའི་གླ་ཆ་སོགས་འགྲོ་གྲོན་ཆ་ཚང་ལས་བརྒྱ་ཆ་ ༧༠ ཨ་རིའི་གཞུང་དང་། བརྒྱ་ཆ་ ༣༠ ཨ་རི་བོད་ཀྱི་ཐེབས་རྩ་ཁང་གིས་སྤྲོད་ཀྱི་ཡོད་འདུག ཐོངས་མཆན་རག་པའི་སློབ་ཕྲུག་རྣམས་ཨ་རིར་འབྱོར་འཕྲལ་བོད་ཀྱི་ཐེབས་རྩ་ཚོགས་པའི་གན་རྒྱའི་ཡིག་ཆ་ཞིག་ལ་མིང་རྟགས་འགོད་དགོས་ཤིང་། གན་རྒྱ་དེའི་ནང་། སློབ་སྦྱོང་གི་དུས་ཡུན་རྫོགས་རྗེས་ཕྱིར་ལོག་མ་བྱས་ཚེ་བོད་ཀྱི་ཐེབས་རྩས་ཉེས་ཆད་གང་བཅད་ངོས་ལེན་ཞུ་དགོས་པ་དང་། སློབ་ཡོན་ཆ་ཚང་ཕྱིར་སློག་བྱ་རྒྱུ། ཨ་རིའི་ནང་སྲིད་བདེ་སྲུང་ལས་ཁུངས་ལ་རྩིས་སྤྲོད་བྱ་རྒྱུ་སོགས་ཡིན་འདུག་ལ། ད་ལོ་ནས་སློབ་ཕྲུག་ཚོ་ཕྱིར་ལོག་བྱ་ཆེད་དང་བླངས་དཔྱ་ཁྲལ་ལག་དེབ་ཀྱང་བོད་ཀྱི་ཐེབས་རྩ་ཚོགས་པར་གཏའ་མར་འཇོག་དགོས་པ་བཅས་བཟོས་ཡོད་འདུག
ཨ་རིའི་སློབ་ཡོན་འདི་ ༡༩༨༨ ལོར་མགོ་འཛུགས་བྱས་ཤིང་། ལས་གཞི་འདིའི་ལས་འགན་གཙོ་བོ་ཨ་རི་བོད་ཀྱི་ཐེབས་རྩ་(The Tibet Fund, New York) ཁང་གིས་འགན་འཁུར་འོག བོད་གཞུང་ཤེས་རིག་ལས་ཁུངས་བརྒྱུད་ལོ་ལྟར་སློབ་ཡོན་གསལ་བསྒྲགས་དང་སློབ་མ་འདེམས་སྒྲུག་སོགས་གནང་གི་ཡོད་པ་དང་། ༢༠༡༠ ལོ་ནས་བཀའ་ཤག་གི་ཐག་གཅོད་ལྟར་ལས་གཞི་ཆ་ཚང་ཨ་རིའི་བོད་ཀྱི་ཐེབས་རྩར་རྩིས་སྤྲོད་བྱས་རྗེས། ཨ་རིའི་བོད་ཀྱི་ཐེབས་རྩས་ངྷ་སྟེང་བོད་ཁྱིམ་དང་སམ་བྷོ་ཊ། མཚན་ཉིད་བཅས་ཀྱི་ཤེས་ཡོན་འགན་འཛིན་ལས་གྲུབ་པའི་ཚོགས་ཆུང་ཞིག་བཙུགས་ཏེ་སློབ་ཕྲུག་འདེམས་སྒྲུག་བྱེད་བཞིན་ཡོད་འདུག
ཨ་རིའི་སློབ་ཡོན་ཐོག་མར་མགོ་བཙུགས་པ་ནས་ ༢༠༠༩ པར་དུ་སློབ་ཡོན་རག་མཁན་ཚོར་ཐོངས་མཆན་མ་སྤྲད་པ་བྱུང་མྱོང་མེད་ཅིང་། ༢༠༠༩ ལོར་སློབ་ཕྲུག་ ༡ ལ་ཐོངས་མཆན་རག་མེད་པ་དང་། ༢༠༡༠ ལོར་སློབ་ཕྲུག་ ༤ ལ་ཐོངས་མཆན་རག་མི་འདུག དེ་བཞིན་འདི་ལོར་སློབ་ཕྲུག་ ༡༠ ལ་ཐོངས་མཆན་སྤྲད་མེད་པའི་གནས་ཚུལ་བྱུང་ཡོད།
གསར་འགོད་པ། བནྡེ་སྐྱབས།
༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས ༽
༄༅། །རྐང་གསུམ་དྲྭ་གྲོགས་ལགས། བདུད་ལྷས་སྦྱིན་གྱིས་སྟོན་པ་སངས་རྒྱས་ཤཱཀྱ་ཐུབ་པར་རྐྱོན་དུ་མཐོང་བཞིན་ཁྱེད་རང་གིས་ཀྱང་བཀའ་ཁྲིར་རྐྱོན་དུ་མཐོང་གྱི་ཡོད་འདུག ཐོམ་ཞྭ་དེ་དང་ངན་མཐོང་གི་མིག་ཤེལ་རྣམས་ཕར་འཕུད་ནས་བཟང་ཕྱོགས་ཀྱི་དགོང་པ་བཞེས་དགོས་པ་དང་། ཡག་སྡུག་ལ་མ་ལྟོས་པས་བློ་སེང་ནི་བྱེས་འབྱོར་བོད་མི་བརྒྱ་ཆ་ ༥༥ ནས་ཡིད་ཆེས་བློས་འགེལ་ཐོག་འདེམ་འཐོན་བྱུང་བས་ཁྱེད་རང་དགའ་ན་ཡང་འདྲ་མི་དགའ་ན་ཡང་འདྲ། དཔེ་ལྟར། གླང་ཆེན་མདུན་བསྐྱོད་བྱེད་པ་དང་། ཁྱི་རྒན་རྒྱབ་ཏུ་ཨབ་པ་འདྲ། སོང་ཙང་རང་གི་རྐང་པར་རང་གིས་རྟ་གྲི་མ་རྒྱག བསམ་ཚུལ་ཡིན།
དྲ་གྲོགས་གནས་ཚང་གིས་སྐད་ཆ་འདི་འདྲ་ཞིག་བཤད་འདུག་གནད་དོན་འདི་ཟམ་གདོང་བཀའ་ཤག་གིས་ཤུལ་དུ་བཞག་པའི་བློ་སེང་ལ་ཐབས་ཤེས་མེད་པའི་དོན་དག་ཅིག་རེད་ཟེར་གྱི་འདུག
དྲང་མོ་བཤད་ན་གནད་དོན་འདི་དེ་འདྲ་ཞིག་མ་རེད། གནད་དོན་འདི་བློ་སེང་སྟོང་གཏམ་བཤད་རྒྱུར་དགའ་བའི་མཚོན་རྟགས་ཤིག་ཡིན་པ་མ་ཟད། བློ་སེང་གིས་མ་འཇོན་པའི་གནད་དོན་ཞིག་ཀྱང་རེད།
མི་སྒེར་སོ་སོའི་དགོས་འདུན་མ་འགྲུབ་དུས་གཞན་མགོར་བཙན་འདེད་བྱེད་པ་བོད་པ་ཚང་གི་གཤིས་སུ་གྲུབ་འདུག་ཧ་ཧ་ཧ་དགེ་རྒན་ཟེར་བ་ལས་དགོས་འདུན་སྒྲུབ་མཁན་ཟེར་ན་ཡག་པོ་རེད་ད།
ངས་སྔ་མོའི་བོད་ཀྱི་གཏམ་དཔེ་ཞིག་འདྲན་བྱུང་།
”རང་གིས་མ་འཇོན་རོགས་ལ་འཁོན། བསོད་ནམས་མེད་པ་འཚེ་ལ་འཁོན། ”
དཀའ་ར྄ྙོག་འདིའི་རིགས་ངེས་པར་དུ་སེལ་དགོས་པ་ཞིག་རེད
ངྷ་སྟེང་བོད་ཁྱིམ་སློབ་གྲྭའི་ཚན་རིག་དགེ་རྒན་བསྟན་འཛིན་འཇམ་དབྱངས་ལགས་ལོ་གསུམ་ཙམ་རིང་དཀའ་ལས་བརྒྱབ་པ་དེ་ཨ་རི་འགྲོ་རྒྱུ་ཁོ་ནའི་ཆད་དུ་ཡིན་ན་ཐབས་སྐྱོ་བོ་ཞེ་པོ་རེད་ ཁོང་ལ་ཨ་རི་མཐོང་ཆེན་མ་རག་པ་ཡག་པོ་བྱུང་འདུག བོད་ཁྱིམ་དགེ་རྒན་ཞིག་ལ་བསམ་བློ་དེ་ལས་མེད་ན་ཧ་ཅང་ངོ་ཚ་དགོས་པ་ཞིག་རེད་ ད་དུང་བཀའ་ཤག་ལ་སྐྱོན་འཛུག་འདྲ་བྱེད། གྲོགས་པོ་ཚོ་མི་འདིའི་སྐད་ཆ་ལ་གཅིག་ལྟོས་དང་།།
༄༅། །ངྷ་སྟེང་བོད་ཁྱིམ་སློབ་གྲྭའི་ཚན་རིག་དགེ་རྒན་བསྟན་འཛིན་འཇམ་དབྱངས་ལགས་ཀྱིས་ཧ་ཅང་ཐབས་སྐྱོ་པོའི་བཀའ་མོལ་ཞིག་གནང་འདུག ཨ་རིར་སློབ་སྦྱོང་ལ་ཡོང་མཁན་སློབ་ཕྲུག་མ་ཝིང་དེ་ཚོས་རང་གི་ཁས་ལེན་དམ་བཅའ་རྣམས་རྩིས་མེད་ཀྱི་སྡིག་པ་མིག་རྩུམ་བྱས་པར་བཀའ་ཤག་ལ་འགན་འཁུར་རྩ་བ་ནས་མེད་པར་དོན་མེད་ཡ་ལ་ཀྲིས་ན་སྒྲིག་གི་མ་རེད། སློབ་ཕྲུག་དེ་ཚོས་ལས་རྒྱུ་འབྲས་དང་ཚེ་འདི་ཕྱི་མ་རྩིས་ན་ཨ་རི་ས་རྒྱ་ཆེན་པོ་འདིའི་ནང་གར་ཡོད་རྩད་གཅོད་དང་བཙན་བཀའ་བཏང་ན་ཁྲིམས་རྒལ་ཡིན་པས་ཐབས་ཤེས་ཡོད་མ་རེད། དེར་བརྟེན་མ་འོངས་པར་ཡང་བསམ་བློ་ཐེབས་ཅག་འདི་འདྲ་མི་གཏོང་བར་བཟང་ཕྱོགས་ཀྱི་བསམ་བློ་བཏང་ན་རླུང་རྟའང་འགྲོ་ལ་བསམ་དོན་ཡང་སྒྲུབ་ངེས་རེད་མ་གཏོགས་གོང་གི་བཀའ་འདྲ་བོ་གསུངས་བཞུགས་ན་ལམ་འགྲོ་ཡང་འགྲོ་གི་མ་རེད་ལ་སྡིག་པའི་རྒྱུ་རེད། དེ་རྩིས་དགོང་པ་བཞེས་དགོས།
རྒྱ་གར་དུ་ཕྱི་ལོག་མ་བྱས་མཁན་སློབ་ཕྲུག་དེ་དག་དང་པོ་ཉིད་ནས་ཁོ་རང་ཚོ་ཨ་རིར་གཏན་སྡོད་བྱེད་རྒྱུ་གྲ་སྒྲིག་ཆ་ཚང་བྱས་ཟིན་ཡོད་རེད། ཨ་རིའི་ནང་སྤྱི་སྒེར་གྱི་ཁྲིམས་རྩོད་པ་ཁྲི་སྟོང་མང་པོ་ཡོད་སྟབས་ཁྲིམས་རྩོད་པ་གང་རུང་ཞིག་ལ་འབྲེལ་བ་བྱས་ནས་ཁོ་རང་ཨ་རི་དུ་སྐྱབས་བཅོལ་ཞུ་སྙན་ཞིག་ཁྲིམས་རྩོད་ཞིག་གིས་བདག་པོ་རྒྱག་ཟིན་ན་དེ་ནས་འགྲིག་ཚར་བ་རེད། སྐབས་དེར་ཨ་རིས་གཞུང་གིས་ཀྱང་ཕྱིར་འབུད་བྱེད་རྒྱུར་ལས་སླ་བོ་ཡོད་མ་རེད། ཁྲིམས་ཀྱི་བརྒྱུད་རིམ་ཆ་ཚང་འགྲིམས་ནས་ཐག་བཅད་རྒྱུ་ལས་བོད་ཀྱི་ཐེབས་རྩའམ་བོད་གཞུང་སོགས་ནས་གནོད་ཤུགས་སྤྲོད་ནའང་གྲུབ་འབྲས་ཡོང་ཁག་པོ་རེད། ད་དུང་དེ་ལས་ཟློག་ཏེ་སྐྱབས་བཅོལ་ཞུ་མཁན་ཁོ་རང་ལ་སྐྱབས་བཅོལ་བའི་ཁྲིམས་ལུགས་ཀྱི་སྟེང་ནས་སྲུང་སྐྱབས་ཐོབ་པའི་གོ་སྐབས་ཀྱང་ཡོད་རེད། ངས་དཔེ་མཚོན་ཞིག་ཞུས་ན། ལོ་ཤས་གོང་དེར་རྒྱ་གར་ལྷོ་ཕྱོགས་རྦེཀོབ་གཞིས་ཆགས་ནས་སྒེར་གཉེར་་ཚོགས་པ་ཞིག་ནས་༼ མིང་བརྗོད་ཀྱི་མིང ༽ བོད་གཞས་གཏོང་མཁན་ཁག་གཅིག་ཨ་རི་དང་ཁེ་ན་ཌ་ནང་བསྐོར་སྐྱོད་བྱས་ཡོད། སྐབས་དེར་ཁེ་ན་ཌ་ཁྲོ་རོན་ཀྲོ་ནང་རྟེན་གཞི་བྱས་པའི་བོད་རིགས་ཚོགས་པ་ཞིག་ནས་འགྲོན་འབོད་ཀྱིས་འདི་གར་འབྱོར་སོང་། ཁྲབ་སྟོན་པའི་གྲས་ནས་མི་གཉིས་འདི་འདིར་ག་སྐྱབས་བཅོལ་ཞུས་ནས་ཕྱི་ལོགས་མ་བྱས་པ་རྟེན་འགོན་བདག་ཚོགས་པ་དེས་དོ་བདག་གཉིས་ན་ཡི་གེ་ཞིག་སྤྲོད་འདུག ཡི་གེའི་དེའི་ནང་དོན་ཚན་ཁག་གཅིག་བཀོད་ཡོད་པའི་ནང་འགྲོན་བདག་ཚོགས་པ་འདི་ཁེ་ན་ཌའི་གཞུང་ལ་ཁྲིམས་མཐུན་དེབ་བསྐྱེལ་ཡོད་པའི་ཆོགས་པ་ཞིག་ཡིན་པ་ར་སྥྲོད་དང་། གལ་སྲིད་དོ་བདག་གཉིས་བཟང་སྤྱོད་ཀྱིས་རྒྱ་གར་དུ་ཕྱི་ལོག་མ་བྱས་ཚེ་འབྲེལ་ཡོད་ཁྲིམས་ཁང་ཁག་ལ་ཞུ་གཏུབ་ཀྱིས་ཕྱིར་འབུད་བྱེད་རྒྱུ་ཡིན་པའི་མཐའ་ཚིག་སྤྲོད་འདུག
ཡིན་ན་ཡང་མ་བསམ་ས་ནས་ཡིག་ཆ་དེ་ཁོ་རང་གཉིས་སྐྱབས་བཅོལ་ཞུ་རྒྱུའི་མཐུན་རྐྱེན་དུ་གྱུར་ནས་ཉིན་མོ་དེ་ནས་བཟུང་ཁོ་རང་གཉིས་སྐྱབས་བཅོལ་བའི་ཁྲིམས་ལུགས་ཀྱིས་སྲུང་སྐྱབས་བྱེད་ཡུལ་ཁོངས་སུ་འཚུད་ནས་དཀའ་ངལ་གང་ཡང་མེད་པར་ཁྲིམས་ལུགས་ཀྱི་བརྒྱུད་རིམ་ཚོ་མ་བདེ་བླག་ངང་འགྲུབ་ནས་ད་ལྟའི་འཆར་ཡུལ་མི་ཆགས་ཟིན་པ་རེད།
དངོས་གནས་མི་རེ་ཟུར་གྱི་ལམ་བཀག་གི་ཡོད་པ་རེད།
དཔེ་ན་ཆབ་སྲིད་བཙོན་པ་རྫུན་མ་ཚོས་དངོས་གནས་དེ་ཚོས་ལམ་བཀག་གི་ཡོག་པ་རེད།
ཚོགས་པའི་ངོས་ནས་ཕྱི་རྒྱལ་དུ་ཞབས་བྲོ་རྒྱག་བགཏོང་ནས་ཚུར་མ་ལོག་པ་རྗེས་མ་ལམ་ཁ་མེད་པ་བཟོ་གིས་ཡོད་པ་རེད།
དེ་གཙོ་བོ་ནི་བཙན་བྱོལ་སྤྱི་ཚོགས་ནང་མི་ཁ་ཤས་བསམ་བློའི་ཆུ་ཚད་དམའ་གྲ་བའི་སྐྱོན་ཡང་ན་རང་གཤིས་ཚ་བ་ཞིག་མ་རེད་དམ།
ཕྱི་རྒྱལ་ལ་འགྲོ་ཡ་རག་སོང་གཞན་སུ་ལའང་བསམ་བློ་བཏང་གི་མ་རེད།
རྒྱུ་མཚན་དེ་འདྲའི་ཡིན་ཙམ་རྗེས་མ་སློབ་སྦྱོང་བྱེད་འགྲོ་མཁན་ཡིན་ནའང་འདྲ་དེ་མིན་གཞན་དག་ཡིན་ནའང་འདྲ་གྱོང་གུད་རག་གི་ཡོག་རེད།
གནད་དོན་འདི་ཟམ་གདོང་བཀའ་ཤག་གིས་ཤུལ་དུ་བཞག་པའི་བློ་སེང་ལ་ཐབས་ཤེས་མེད་པའི་དོན་དག་ཅིག་རེད། རབ་བྱུང་ན་བཀའ་བསྟན་ཡིག་བསྒྱུར་ཁང་དུ་སོང་ནས་རིན་པོ་ཆེར་ཕྱག་རོགས་ཞུས་ན་ཡག་ཤོས་རེད།