སྦེལ་ཀོབ་མདོ་སྨད་རྒྱུན་ལས་ཁང་གི་གསལ་བསྒྲགས།
ཉེ་སྔོན་དུས་བབ་གསང་ཁང་གིས་སྐབས་བཅོ་ལྔ་བའི་སྤྱི་འཐུས་ཕྱོགས་སྐྱོད་པ་ཁག་ཅིག་ལ་བཅར་འདྲི་བྱས་པའི་ནང་དུ།སྦེལ་ཀོབ་ས་གནས་སུ་ཕེབས་པའི་བཀུར་འོས་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་གྱིས་༼སྦེལ་ཀོབ་གཞིས་ཆགས་ལ་མཚོན་ན།ད་ལྟའི་བར་ཆོལ་ཁ་གསུམ་རྡོག་རྩ་ཆིག་སྒྲིལ་བྱ་མ་ཐུབ་པའི་དབང་གིས་ས་གནས་འཐུས་ཚོགས་འཛུགས་ཐུབ་ཀྱི་མི་འདུགདེ་དཀའ་ངལ་ཆེ་ཤོས་རེད།གནས་ཚུལ་དེ་ས་གནས་མི་མང་ལ་དྲིས་སྐབས་དབུས་གཙང་གི་མི་ཚོས་མདོ་སྟོད་སྨད་གཉིས་ཀྱིས་མཉམ་རུབ་བྱེད་ཀྱི་མི་འདུག་ཟེར་ཞིང།མདོ་སྟོད་སྨད་ཀྱི་མིས་ས་གནས་གྲོས་ཚོགས་དེ་འོས་བསྡུའི་ལམ་ནས་བདམས་པ་ཡིན་ན།དབུས་གཙང་ལ་མི་འབོར་མང་བས་གྲོས་ཚོགས་འཐུས་མི་ཚང་མ་དབུས་གཙང་གི་མི་ཆགས་ཏེ་མདོ་སྟོད་སྨད་གཉིས་ཀྱི་མི་མང་གི་མངོན་འདོད་འགྲུབ་དཀའ་མོ་ཡིན་ཚུལ་བརྗོད་བྱུང༽ཞེས་བརྗོད་འདུག།
བཅར་འདྲི་དུས་བབ་ཚགས་པར་འདོན་ཐེངས་༥༣༠པ་དང་དྲ་རྒྱ་བཅས་སུ་བཀོད་ཟིན་པ་རེད།སྔོན་གཞུང་གིས་ས་གནས་འཐུས་ཚོགས་འཛུགས་པའི་སྐད་ཆ་གླེང་སློང་དུས།ས་གནས་རྒྱུན་ལས་སྔོན་མའི་སྐབས་སུ་འཚོགས་འདུ་སྐོར་སྟེ་ས་གནས་མདོ་སྨད་མི་མང་བརྒྱ་ཆ་དགུ་བཅུའི་ས་གནས་འཐུས་ཚོགས་དགོས་པར་མོས་མཐུན་དང་གཞུང་གི་ལས་དོན་ལ་རྒྱབ་སྐྱོར་མཐའ་གཅིག་ཏུ་བྱས་ཡོད་པས།དེ་འདྲའི་ཕྱོགས་ཞེན་ཅན་གྱི་སྐད་ཆ་ཞིག་དུས་ནམ་ཡང་བཤད་མྱོང་མེད་ལ་མ་འོངས་པ་ན་ཡང་བཤད་འཆར་མེད།སྤྱི་འཐུས་ཤིག་གི་མཚན་ཐོག་དང་ལྷག་པར་དབུས་གཙང་སྤྱི་འཐུས་ཤིག་གི་མཚན་ཐོག་ནས་དབྱེ་ཞིབ་མ་གནང་བར་བཀའ་མོལ་དེ་འདྲ་གནང་བར་བློ་ཕམ་དང་རྗེས་སུ་དེ་འདྲ་མི་གནང་བའི་འབོད་སྐུལ་ཞུ།ས་གནས་གཞན་དུ་ས་གནས་འཐུས་ཚོགས་ཚུགས་ཟིན་པ་དང་དེ་ལ་བལྟས་ན་ཡང་མདོ་སྨད་པ་མི་གྲངས་ཉུང་བས་མངོན་འདོད་མ་འགྲུབ་པ་ཞིག་གོ་ཐོས་མེད་པ་དང།ས་གནས་འཐུས་ཚོགས་བཙུགས་ན་མདོ་སྨད་པའི་མངོན་འདོད་མི་འགྲུབ་རབས་ཤིག་བཤད་མྱོང་མེད་པས།ཆོས་གསུམ་བོད་མི་ཡོངས་ཀྱི་ཤེས་རྟོགས་ཡོང་བའི་སླད་དུ་གསལ་བསྒྲགས་འདི་སླེལ་བའོ།ཞེས་སྦེལ་ཀོབ་མདོ་སྨད་རྒྱུན་ལས་ཁང་གིས་༢༠༡༡ཟླ་བ་༩བའི་ཚེས་༢༤ཉིན།
