དུས་འཁོར་དབང་ཆེན་སྐབས་མི་ལྔ་ཁྲི་ལ་སྡོད་གུར་གོ་སྒྲིག་ཞུ་རྒྱུ་ཡིན།

ལོ་ ༢༠༡༡ ལོའི་ཟླ་ ༡༢ ཚེས་ ༣༡ ཉིན་ནས་ ༢༠༡༢ ལོའི་ཟླ་ ༡ ཚེས་ ༡༠ ཉིན་བར་༧གོང་ས་མཆོག་གིས་སྟོན་པ་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་དུ། དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༢ པ་དེ་བསྩལ་རྒྱུ་ཡིན་པ་ལྟར། ཉིན་འདི་འགར་དུས་དབང་གྲ་སྒྲིག་ཚོགས་ཆུང་གིས་རྡོ་རྗེ་གདན་དུ་གསུང་ཆོས་ར་བ་དང་མང་ཚོགས་ཀྱི་སྡོད་གུར། དེ་བཞིན། ཆུ་གློག་དང་གསང་སྤྱོད་གསར་རྒྱག་གི་ལས་གཞི་འདྲ་མིན་སྤེལ་ཏེ། ཐེངས་འདིའི་དུས་དབང་ཚགས་ཚུད་ཡོང་བར་འབད་བརྩོན་གནང་བཞིན་ཡོད་འདུག

དུས་དབང་གྲ་སྒྲིག་ཚོགས་ཆུང་གི་དྲུང་གཞོན་ཐུབ་བསྟན་བྱམས་པ་ལགས་ཀྱིས་བརྗོད་པ་ལྟར་ན། ཐེངས་འདིའི་དུས་དབང་གྲ་སྒྲིག་ཚོགས་ཆུང་གི་ཚོགས་མི་གཙོ་གྲས་རྣམས་ནི། ཨ་རུ་ཎ་ཅལ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་དམ་པ་དེའི་ནང་མི་དང་། རྣམ་རྒྱལ་གྲ་ཚང་གི་མཁན་རིན་པོ་ཆེ། རྟ་དབང་དགོན་པའི་མཁན་པོ་དང་བླ་མ་ངག་དབང་ནོར་བུ་སོགས་ཡིན་ཞིང་། དུས་དབང་གི་སྦྱིན་བདག་ཁོངས་སུ་ཚོགས་པ་དང་མི་སྒེར་བ་ཁྱོན་ ༢༥ ཙམ་ཡོད་འདུག་ལ། སྦྱིན་བདག་དེ་ཚོ་སྐུ་སྒེར་ཡིག་ཚང་གིས་ཆོག་མཆན་ཐོབ་པ་རྐྱང་ཆགས་ཡོད།

གསུང་ཆོས་ར་བའི་གུར་དང་། མང་ཚོགས་སྤྱི་བྱིངས་ཀྱི་སྡོད་གུར་དུས་དབང་གྲ་སྒྲིག་ཚོགས་ཆུང་གིས་འགན་འཁུར་གྱི་ཡོད་འདུག་ལ། དེ་མིན་གྱི་མཐུན་རྐྱེན་ཁག་འདི་ལོའི་ཕྱི་ཟླ་ ༧ པའི་ཚེས་ ༡༨ ཉིན་དུས་དབང་གྲ་སྒྲིག་ཚོགས་ཆུང་གི་ཚོགས་མི་རྣམས། བྷེ་ཧར་རི་མངའ་སྡེ་པཱ་ཊི་ཎ་གྲོང་ཁྱེར་དུ་ཕྱིན་སྟེ། མངའ་སྡེ་སྤྱི་ཁྱབ་བློན་ཆེན་མཆོག་ལ་སྙན་སེང་ཞུས་པར། གུར་རྒྱག་སའི་ས་ཆ་དང་། ཆུ་དང་གློག གསང་སྤྱོད། མི་མང་གི་བདེ་འཇགས། སྐུའི་སྐྱོབ་སྲུང་སོགས་ཁས་ལེན་གནང་ཡོད་འདུག

གྲ་སྒྲིག་ཚོགས་པའི་ངོས་ནས་ད་ལོར་འཛམ་གླིང་ཕྱོགས་མཐའ་ནས་ཆོས་ཞུ་བ་ཉིས་འབུམ་ ༢༠༠༠༠༠ ལྷག་འཛོམ་རྒྱུའི་རེ་བ་རྒྱག་བཞིན་ཡོད་པ་དང་། དེ་དག་ལས་མི་མང་ལྔ་ཁྲི་ ༥༠༠༠༠ ཙམ་ལ་སྡོད་གུར་རིམ་པ་མི་འདྲ་བ་ ༤ ཙམ་གོ་སྒྲིག་ཞུ་འཆར་ཡོད་ཅིང་། སྡོད་གུར་དེ་དག་ལས་གུར་ཆུང་ཤོས་ལ་མི་ ༤ ཤོང་ཐུབ་པ་དང་། གུར་ཆུང་ཤོས་གཉིས་པར་མི་ ༡༠ ནས་ ༡༢། གུར་འབྲིང་གྲས་ལ་མི་ ༣༠ ནས་ ༣༥ བར་ཤོང་གི་ཡོད་འདུག དཔལ་འབྱོར་མཐུན་རྐྱེན་ཡག་ཙམ་ཡོད་མཁན་ལ་སྡོད་གུར་རེར་མི་  ༢ རེ་བསྡད་ཆོག་གི་ཡོད་ཀྱང་། ཆུ་གློག་དང་གསང་སྤྱོད་ཀྱི་འགྲོ་གྲོན་ལས་གཞན་པའི་གུར་གྱི་རིན་གོང་དོ་བདག་རང་ཉིད་ནས་སྤྲོད་དགོས་ཀྱི་ཡོད་འདུག 

ཐུབ་བསྟན་བྱམས་པ་ལགས་ཀྱིས་བརྗོད་དོན།  “ བོད་ནས་ཕེབས་མཁན་ཚོའི་སྡོད་གནས་ཐད་བོད་གཞུང་སྣེ་ལེན་ཁང་གིས་གྲ་སྒྲིག་ཞུ་བཞིན་ཡོད་སྟབས། ང་ཚོའི་ངོས་ནས་དམིགས་བསལ་འགན་འཁུར་དགོས་པ་མ་རེད། དུས་དབང་སྐབས་ཀྱི་བདེ་འཇགས་དང་འཕྲོད་བསྟེན་ཐོག་གྲ་སྒྲིག་བྱས་ཚར་ཡོད། གདན་ས་ཁག་གཙོས་པའི་བོད་ཀྱི་དགོན་སྡེ་ཆེ་ཁག་ཚོས་རང་ངོས་ནས་རྡོར་གདན་ས་གནས་ཡན་ལག་བཙུགས་ཡོད་སྟབས་སྡོད་ཁང་ལ་དཀའ་ངལ་དེ་ཙམ་མེད་ཀྱང་། གྲྭ་ཚང་ཆུང་གྲས་ཁག་དང་བཙུན་དགོན་སྡོད་ཁང་གི་དཀའ་ངལ་ཡོད་རིགས་ཚོར་གང་ཐུབ་ཀྱིས་རོགས་རམ་ཞུ་འཆར་ཡོད།  ” ཅེས་བརྗོད་བྱུང་།

དབུས་བོད་མིའི་སྒྲིག་འཛུགས་བདེ་སྲུང་དྲུང་ཆེ་དངོས་གྲུབ་རྡོ་རྗེ་མཆོག་ལ་ད་ལོའི་དུས་དབང་སྐབས་༧གོང་ས་མཆོག་གི་སྐུ་ཕྱྭ་དང་སྐུའི་འཕྲོད་བཞེས་ཐོག་གྲ་སྒྲིག་གང་འདྲ་ཡོད་མེད་དྲིས་པར། “ སྐུ་མདུན་གང་དུ་ཕེབས་ཀྱང་སྐུའི་སྲུང་སྐྱོབ་ཐོག་བདེ་སྲུང་ལས་ཁུངས་ཀྱིས་གང་ཐུབ་གནང་གི་ཡོད་པ་རེད། དེའི་ཐོག་འགན་གཙོ་བོ་རྒྱ་གར་གཞུང་གིས་འཁུར་གྱི་ཡོད་པ་རེད། སྐུའི་བདེ་འཇགས་ཐོག་རྒྱ་གར་གཞུང་གིས་གཏན་འབེབས་ཚད་གཞི་ཞིག་བཟོས་ཡོད་སྟབས། སྐུ་མདུན་རྒྱ་གར་ས་གནས་གང་དུ་ཆིབས་བསྒྱུར་གནང་ཡང་སྲུང་སྐྱོབ་ཧ་ཅང་ཡག་པོ་ཡོང་གི་ཡོད་པ་རེད། དུས་དབང་འདི་ཐེངས་དང་པོ་ཆགས་ཀྱི་མེད་དུས། ད་ལོའི་རྡོ་རྗེ་གདན་དུས་དབང་སྐབས་དམིགས་བསལ་སེམས་ཁྲལ་དེ་འདྲ་གང་ཡང་མེད ” ཅེས་གསུངས་སོང་། 

བོད་ནས་ཕེབས་མཁན་གསར་འབྱོར་བ་ཚོར་མཐུན་འགྱུར་རོགས་རམ་ཇི་ལྟར་གནང་རྩིས་ཡོད་མེད་དྲིས་པར། བདེ་སྲུང་ལས་ཁུངས་ཀྱི་ངོས་ནས་བོད་ནས་ཕེབས་མཁན་བདུན་སྟོང་ ༧༠༠༠ ཡས་མས་ཡོད་པར་ཚོད་དཔག་བྱེད་ཀྱི་ཡོད་འདུག་ལ། དེ་དག་ལ་བལ་ཡུལ་སྣེ་ལེན་ཁང་དང་བོད་ཀྱི་གཞོན་ནུ་ལྷན་ཚོགས་མཉམ་འབྲེལ་ཐོག བལ་ཡུལ་གྱི་རླངས་འཁོར་དང་མེ་འཁོར་འབབ་ཚིགས་ཁག་ཏུ་མི་སྣ་ཆེད་འཛུགས་ཀྱིས་བོད་ནས་ཕེབས་མཁན་ཚོར་གླ་འཁོར་གྱི་འཛིན་བྱང་ཉོ་བ་སོགས་ལ་རོགས་རམ་གནང་རྒྱུ་དང་། རྒྱ་གར་ནང་དུའང་གཅིག་མཚུངས་ཀྱིས་མཐུན་འགྱུར་ཞུ་རྒྱུ་ཡིན་འདུག

བོད་ནས་ཕེབས་མཁན་ཚོ་ཐོག་མར་བལ་ཡུལ་སྣེ་ལེན་ཁང་དུ་འབྱོར་མ་ཐག འཛིན་བྱང་རེ་བཟོས་ཏེ་དུས་དབང་སྐུར་ཡུལ་དུ་ཁོང་ཅག་ལ་སྡོད་གནས་དང་ཟ་མ། གསུང་སྒྱུར་བ་སོགས་གོ་སྒྲིག་ཞུ་འཆར་ཡོད་འདུག གཞན། ཁོང་ཅག་གི་འཐུང་ཆུ་དང་གསང་སྤྱོད་སོགས་འཕྲོད་བསྟེན་ཐོག་བྷེ་ཧར་མངའ་སྡེ་གཞུང་དང་། འཕྲོད་བསྟེན་ལས་ཁུངས། སྨན་རྩིས་ཁང་སོགས་ཀྱིས་རོགས་འདེགས་ཞུ་རྒྱུ་ཡིན་འདུག

དྲུང་ཆེ་མཆོག་གིས་གསུངས་དོན། “ དུས་དབང་སྐབས་བོད་པ་ཚོས་ཐུན་མོང་ཐོག་འགན་འཁུར་དགོས་པ་ཞིག་ལ། ༧གོང་ས་མཆོག་གི་སྐུའི་བདེ་འཇགས་དེ་བོད་པ་མི་རེ་ངོ་རེར་ཧ་ཅང་གལ་ཆེན་ཡིན་སྟབས། སོ་སོར་དོགས་གཞི་ཡོད་པའི་གནས་ཚུལ་ག་རེ་བྱུང་ཡང་། བདེ་སྲུང་ལས་ཁུངས་ལ་དུས་ཐོག་འབྲེལ་བ་གནང་དགོས་པ་དང་། རང་ཉིད་ཀྱི་བདེ་འཇགས་ཆེད་སྐྱབས་བཅོལ་ལག་དེབ་དང་ངོ་སྤྲོད་ལག་དེབ་གང་རུང་ངེས་པར་དུ་བསྣམས་དགོས་པ་རེད ” ཅེས་གསུངས་སོང་།

དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་སུ་བཅར་འདྲི་ཞུས་པར། གཞོན་ནུའི་ངོས་ནས་དོན་ཚན་ ༡༡ ཡོད་པའི་བཀོད་ཁྱབ་ཞིག་ཕྱི་ཟླ་ ༧ པའི་ཚེས་ ༡༢ ཉིན་ས་གནས་གཞོན་ནུ་ཁག་ཚང་མར་བཏང་ཡོད་ཅིང་། བཀོད་ཁྱབ་དེར་ས་གནས་གཞོན་ནུ་ཁག་ཚང་མའི་རྒྱུན་ལས་དང་ཚོགས་མི་ ༣ རེ་རྡོར་གདན་ལ་གཏོང་རྒྱུར་ཐག་གཅོད་བྱུང་ཡོད་པ་དང་། ད་འཆར་གཞོན་ནུའི་ཚོགས་མི་ ༡༣༠ ལྷག་གིས་རྡོར་གདན་གྱི་དུས་དབང་སྐབས་༧གོང་ས་མཆོག་གི་སྐུ་ཕྱཱ་དང་ཁོར་ཡུག་སྲུང་སྐྱོབ་གཙོས་པའི་ལས་དོན་ཁག་ཅིག་ཐོག་ཞབས་ཞུ་བསྒྲུབ་དགོས་ཀྱི་ཡོད་འདུག

ཚོགས་གཞོན་དོན་གྲུབ་ལྷ་དར་ལགས་ཀྱིས་བརྗོད་དོན། “ ང་ཚོར་ལོ་སྔོན་མ་དང་མ་འདྲ་བའི་སྤྱི་ཚོགས་ཞབས་ཞུ་གསར་པ་ག་རེ་ཡོད་ཟེར་ན། བོད་ནས་གསར་དུ་ཕེབས་མཁན་ཚོར་དུས་དབང་དང་འབྲེལ་བའི་གནད་འགག་ཅན་གྱི་ས་ཆ་ཝ་རཱ་ཎ་སི་དང་ངྷ་རམ་ས་ལ། ལྡི་ལི། ལྷོ་ཕྱོགས། བལ་ཡུལ་བཅས་ཀྱི་རླངས་འཁོར་འབབ་ཚིགས་དང་མེ་འཁོར་ས་ཚིགས་བཅས་སུ་མི་སྣ་ཆེད་གཏོང་གིས་སྐད་བསྒྱུར་ལམ་སྟོན་གྱི་རོགས་རམ་གནང་འཆར་ཡོད ” ཅེས་བརྗོད་སོང་། 

བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་སུ་བཅར་འདྲི་ཞུས་པར། བུད་མེད་ལྷན་ཚོགས་ཀྱི་ངོས་ནས་དུས་དབང་སྐབས་རྡོ་རྗེ་གདན་མཆོད་རྟེན་གཡས་གཡོན་དུ་གད་སྙིགས་བླུགས་སྣོད་དང་། གསང་སྤྱོད་གོ་སྒྲིག་ཞུ་འཆར་ཡོད་པ་དང་། དེ་བཞིན། བུད་མེད་ལྷན་ཚོགས་ཀྱིས་གཞུང་ལ་འབྲེལ་བ་བྱས་ཏེ་སྐུ་ཕྱྭའི་ཐད་ལས་འཆར་ཞིག་ཡོད་ཅིང་། དེ་ལ་ས་གནས་རེ་ནས་བུད་མེད་ ༣ རེ་ཞུགས་དགོས་ཀྱི་ཡོད་འདུག

    ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་ནི་བོད་ཀྱི་འདས་པའི་ལོ་རྒྱུས་ཁྲོད་དུས་འཁོར་བཀའ་དབང་གནང་མཁན་ཆེས་མང་ཤོས་དེ་ཆགས་ཡོད་པ་རེད།

༼ གོང་བཀོད་གནས་ཚུལ་དེ་བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས་པ་ཡིན ༽

གསར་འགོད་པ། དཔལ་ལྡན།