ང་ཚོར་དཔྱིད་ཀ་ག་དུས་ཤར་གི་རེད། མྱི་ནག་ཚང་།

ཨི་རྗིབ་དུ་ལས་འགུལ་དེའི་རིགས་ལམ་སློང་ཡོང་དོན་གཙོ་བོ་ཞིག་ནི། འབོལ་གདན་སྟེང་གི་ཚོགས་པ་ sofa party ཞེས་པ་ལས་འགུལ་གྱི་ནང་དུ་ཁྲིད་ཡོང་ཐུབ་སོང་བ་དེའི་དབང་གིས་རེད། འབོལ་གདན་སྟེང་གི་ཚོགས་པ་ནི་ནམ་རྒྱུན་ཡིན་ན་དཔིན་པོ་དང་ཤེས་ཡོན་པ། ཕྱུག་པོ། ལས་སྣེ་བ་བཅས་རེད། འདི་དག་ནི་ལས་འགུལ་འདི་དག་འབྱུང་སྐབས། འབོལ་གདན་སྟེང་སྡད་དེ་གཟུགས་མཐོང་བརྙན་འཕྲིན་ནང་ནས་སྲང་གི་ལས་འགུལ་དེར་ལྟ་མཁན་གྱི་གྲས་རེད། ང་ཚོ་བོད་ལ་ཡང་འབོལ་གདན་སྟེང་གི་ཚོགས་པ་འདི་མངོན་གསལ་དོད་པོ་ཡོད་སྟབས་ད་ནི་ཚང་མར་སྐུལ་མ་གཏོང་རན་རེད།

རྭ་རྒྱ་བློ་དབང་དང་བོན་རྒྱ་བཅས་ཀྱི་དགོངས་ཚུལ་དག་ཀྱང་མ་ལུས་པར་བཀླགས་ཚར། ཀློག་སྤྲོ་བོ་དང་སྣང་བར་འགྲོ་བོ་བྱུང་།

རྡོ་རྗེ་ཚེ་རིང་ལགས་ཕེབས་པར་དགའ་བསུ་ཞུ།

ངའི་བསམ་པར། གངས་ཅན་སྐྱིད་གཤོངས་ནས་མི་འགྱངས་པར་བོད་རྒྱ་ཞི་མོལ་གྱི་གནས་བབ་ཐད་བསྐྱར་ཞིབ་བྱ་རྒྱུ་ཡིན་པ་དང་། ཆེད་ལས་སྲིད་བྱུས་ཉམས་ཞིབ་སྡེ་ཚན་ཞིག་ཀྱང་འཛུགས་རྒྱུ་ཡིན་ཚུལ་འདུག་པས། དེ་དག་གིས་ཉིད་ཀྱི་དྲི་བ་དེ་ཕལ་ཆེ་བར་ལན་གསལ་བོ་རེ་འབུལ་སྲིད་ལ། དེ་བཞིན། ང་ཚོའི་དཔྱིད་ཀ་ག་དུས་ཤར་ཐུབ་མིན་གྱི་ཐད་ལ། ཚོད་དཔག་རེ་བྱ་སྲིད་པས་དེ་དུས་ཅུང་གསལ་བོ་ཆགས་པའི་རེ་བ་ཡོད་ལ། བོད་ནང་གི་བྱིས་པ་ཚོར་བརྡ་ལན་དང་གོ་སྐོན་གསར་པ་རེ་ཡང་བྱ་སྲིད་པའི་རེ་བ་འཛིན་གི་ཡོད་ལགས།

སྐུ་ཞབས་ལུང་རིགས་ལགས། ཕྲན་ཐེ་བའི་མང་མང་ཞིག་གཟར་ནས་ཧད་ཡོད་སྐབས་ལ་དྲན་སྐུལ་འདི་བྱས་བ་ཤིན་ཏུ་ཐུགས་རྗེ་ཆེ་ཞུ། ཞོར་དུ་ང་ཚོ་ལག་དྲུག་ལ་གཏད་ཀྱིན་འདུག་བསམ་ཐོག ལག་ལ་འཛིན་འོས་བའི་ལས་གང་དེ་གཏན་འཁེལ་མ་བྱས་བའི་ཡར་སྔོན་ལ་ཅི་ཞིག་བསྡུ་གསོག་བྱེད་དགོས་བ་ཡིན་ནམ། མི་ལོ་བཞི་རྒྱུའི་རིང་གི་མཚན་གནས་རྗེས་འབྲེལ་ཀྱི་སྐུ་དབང་བསྡུ་གསོག་བྱས་བའི་ཞོར་ལ། སྟོད་ཀྱི་སྟེང་གཉིས་དང་འོག་གི་བཙན་གསུམ་རིང་ནས་འབོད་གོམས་དུ་གྱུར་བའི་གཞུང་སྲིད་ཀྱི་སྐད་ཆ་འདི་སྐྱུར་སོང་། ཁ་བ་གངས་ཅན་པའི་དབུགས་རྟ་རྔ་ཙམ་པོ་ཆད་འགྲོ་བར་དོགས་པས་རང་བཙན་ཀྱི་སྐད་ཆ་བསྡུ་གསོག་བརྒྱབ་པའི་ཞོར་དུ། མི་ལོ་དུ་མའི་རིང་གི་ལོ་རྒྱུས་ཁྲོད་ཀྱི་བདེན་དོན་དག་སྲུང་སྐྱོབས་བྱེད་མཁན་རང་བཙན་པ་ཚོ་ཉེས་ཅན་ཀྱི་ཚོད་དུ་ལྷག་སོང་། བོད་རྒྱ་ཞི་མོལ་མཐོང་ཆེན་དང་རྩིས་ཆེན་བྱས་ནས་ལན་བརྒྱ་ཆད་མཐུད་ཀྱིས་དམིགས་པ་རྩེ་གཅིག་ལ་གཏད་དེ་མྱུར་སྐྱོབས་ཀྱི་དགེ་ཕན་ལ་རེ་བཞག་ས་ནས་ལུང་ལྡིབ་སྟེ། ༧གོང་ས་མཆོག་གི་སྐུ་ཚེའི་སྨད་ལ་གཏུགས་སོང་།མཐར་ཐུག་གི་རེ་བཅའ་ས་༧གོང་ས་མཆོག་གི་སྐུའི་ཡང་སྲིད་ཐད་ནས་པེ་ཅིན་གཞུང་གིས་མཆུ་ཏོ་བཙུམས་དགོས་བའི་གནས་ལུགས་ཞིག་ལ་ཐུག་འདུག བར་འདི་ནས་ང་ཚོས་ཅི་ཞིག་བསྡུ་གསོག་བྱས་རྗེས་ལག་འཛིན་གང་ཞིག་བྱེད་རྒྱུ་ཡིན་ནམ། འགག་དོགས་ས་དང གནད་ལ་ཐུག་སའི་འཐབ་རྩོད་ཀྱི་ལས་རིམ་འདི། མི་རབས་རྗེས་མའི་རྗེས་མ་ཡི་སྟེང་ལ་འབབ་ཀྱིན་པའི་ལས་དབང་ཞིག་ཡིན་པ་འདྲ། ད་ནི་ང་ཚོ་ལག་དྲུག་གནས་སྟངས་རང་རེད། རྒྱུ་མཚན་ཅིའི་ཕྱིར་དུ་གཞན་བསྟུན་དང་སྟབས་བསྟུན་ཀྱི་ལངས་ཕྱོགས་ཤིག་ལས། རང་སྟེང་ནས་བོར་ཞིང་རང་སྟེང་ནས་བཙལ་དགོས་བའི་བསམ་ཕྱོགས་ཞིག་མེད་སོང་བ་ཡིན་ནམ། གང་ལྟར་ཀྱང་འུ་ཐུག་བའི་ལག་དྲུག་གི་སྐབས་འདིར། པེ་ཅིན་གཞུང་གིས་སྐད་ཆ་དྲང་མོ་བཤད་ནས་འཛམ་བུ་གླིང་ནས་རྙེད་ཐབས་མེད་པའི་ཐབས་ཤེས་ཞིག བོད་མི་རང་སྟེང་ནས་ཡོད་མེད་གསལ་བོ་བཟོ་འདོད་ཀྱིས་སླར་ཡང་བོད་མིའི་གོམས་སྲོལ་ཀྱི་སྟེང་ལ་ནུར་ནས་ཆོས་སྲིད་གཉིས་ཀ་མདུད་ལོག་རྒྱག་འདོད་དེ་བསྟན་སོང་།དེ་ཡང་ང་ཚོའི་ལག་དྲུག་གི་ཁྲོད་ན་༧གོང་ས་མཆོགས་སྐུ་འཚོ་བཞུགས་ཀྱི་སྐབས་འདི་བོད་ཀྱི་བདེན་མཐའ་སེལ་འདོད་པའི་མོས་བ་ཞིག་ཡོད་དམ་མེད། མེས་བོ་བརྒྱུད་པའི་ཤ་ཞེན་རུས་ཞེན་ཀྱི་དཔུང་རོགས་ལ་དད་སྟོབས་ཞིག་ཡོད་དམ་མེད།མ་གྲོས་གཅིག་མཐུན་རྒྱག་གཅིག་མཆོངས་གཅིག་གི་ལངས་ཕྱོགས་ཤིག་བཟུང་ནས་རང་ཚུགས་ཐུབ་པའི་ཆིག་སྒྲིལ་དེ་ཡོད་དམ་མེད། མངོན་ལྐོག་ཕྱི་ནང་མེད་པར་དཔྱོད་ཤེས་ཀྱི་སྙིང་སྟོབས་རེ་བཟུང་ནས་ཚ་ཚ་འུར་འུར་ཀྱིས་ཕུ་འདེད་དེ་གཏོང་ཐུབ་དང་མི་ཐུབ།འདི་དག་རེ་རེ་བཞིན་དོན་དངོས་ཀྱི་ལག་འཛིན་དྲུག་པོ་དེ་ཡིན་ཚེ། ང་ཚོ་རང་སྟེང་གི་མཐུ་དང་ནུས་བ་ཤོར་མེད་སྟབས། སྐྱེས་བུ་རབ་འབྲིང་ཐ་གསུམ་ཀྱི་ཁམས་དང་མོས་བ་ལྟར་དེ་རིང་སང་ཉིན་ནས་རྒྱ་བསྐྱེད་དགོས་བར་འདོད་པ་འདི་ཡིན་ལ།ལག་དྲུག་གི་གནས་བབས་འདི་ནས་ཤོར་དང་མི་ཤོར་ཡང་མཐར་གཏུག་ན་མུ་མཐུད་དེ་བསྡུ་གསོག་གང་བྱེད་མིན་དེ་ལ་ཐུག་འདུག ད་ཐེངས་འདི་ཙམ་གྱིས་མང་བོ་ལབ་ན་གྲོགས་ཉོབ་འགྲོ་ན་ཐང་།

མྱི་ནག་ཚང་། ཁྱེད་ཡོང་དུས་དུས་བབ་དྲ་ཐོག་ན་བྲོ་བ་འདྲ་ཞིག་འདུག གཏན་དུ་མ་གྱེས་རོགས་གནང་། ང་ཚོ་ཁྱེད་དང་ཁྱེད་ཀྱི་རྩོམ་ལ་དགའ་བོ་ཡོད།

རྒན་ལགས་ཀྱིས་མཐོང་ཆེན་བྱས་པ་མང་དྲགས་སོང་། གང་ལྟར་ཀྱང་ཐུགས་རྗེ་ཆེ།

མུ་མཐུད་ནས་བཤད་ན། ད་དུང་ཨར་རྟེན་གི་འདུག་གམ། ཐབས་ཤེས་ཡག་ཤོས་དེ་ང་ཚོས་བཙལ། ཐག་གཅོད་འདོམ་ཤོས་དེ་ང་ཚོས་བྱས། བློས་གཏོང་ཆེ་ཤོས་དེ་ང་ཚོས་བྱས། ཕམ་ཁ་ཆེ་ཤོས་དེ་ང་ཚོས་ཁུར། ང་ལ་མཚོན་ན་ཉེས་པ་འདི་དག་ཚང་མ་མགོ་སྐོར་གྱི་འོག་ནས་བྱུང་བ་མ་གཏོགས། ང་ཚོ་ལ་ནུས་པ་མེད་པ་མ་རེད་འདོད། ཆབ་སྲིད་ཟེར་བ་འདི་གཡོ་སྒྱུ་ཁྲམ་གསུམ་རྩ་བར་བྱས་པའི་ལས་ཀ་ཞིག་རེད། མི་སྒེར་མ་ཟད་མི་རིགས་ཤིག་ཡིན་ཡང་མགོ་སྐོར་གྱི འོག་ལ་ཚུད་གི་རེད་འདོད།

རུལ་སུངས་ལུགས་རྙིང་གཏོར་བ་འབངས་ཀྱི་ཆེད། །ཆབ་སྲིད་ཁེ་དབང་གླེང་བའང་འབངས་ལ་གཟིས། །ཐོབ་ཐང་ལ་རྒྱའི་རང་ཚུགས་འབངས་ལ་ལྟོས། །འབངས་ལ་དམིགས་པའི་བློ་དེ་མ་རྩ་ཡིན། །མ་རྩ་བོར་བའི་གསར་བརྗེར་འགྱུར་ལྡོག་མེད། རྨང་རྡོ་ཞིག་པའི་ཁེ་དབང་སྒེར་གྱི་ཡིན། །དམངས་སེམས་བོར་བའི་ལ་རྒྱ་ལྟོ་ལ་ཐུག ། རང་སེམས་རང་གིས་རྟོག་པའི་དུས་ལ་བབས། །

རྒན་ལྷ་མོ་སྐྱབས་ལགས། ཁྱེད་ཀྱི་ལྷག་བསམ་དེ་ལོ་འདི་འགའི་རིང་ལ་ཡང་ནས་བསྐྱར་དུ་མཐོང་སོང་ལ། དེས་རང་ཉིད་ལ་ཡང་བློ་སྐྱེད་མི་དམན་རེ་བྱུང་། ད་དུང་ཡིན་ཡང་ཁ་མིག་ཡར་ལྟ་བྱེད་གིན་ཡོད།

དེ་ནས་སྐབས་ཐོག་གི་བསམ་ཚུལ་ཐད་ནས། བོད་ཀྱི་དཔྱིད་ཀ་ཤར་ཚར་མིན་དེ་མི་སོ་སོའི་ལྟ་སྟངས་རེད། སྟོན་ཁ་ཡིན་ན་ཡང་མི་འགྲིག་པ་ཅི་ཡོད།

གནད་འགག་ངོ་མ་དེ། གལ་སྲིད་ཁྱོད་བཀའ་བློན་ལ་བདམས་ན་ཐབས་ཤེས་འདྲ་ཡོད་དམ་ཅེས་པ་འདི་རེད། དྲི་བ་འདི་ངས་རང་ཉིད་ལ་སྔར་ནས་འདྲི་མྱོང་། ཨུ་ཐུགས་ཐབས་ཟད་ཀྱི་གནས་སུ་ལྷུང་འགྲོ་གི་འདུག

ཡིན་ཡང་། བར་སྐབས་ཤིག་ནས་བཟུང་འཆར་སྣང་ཇེ་མང་རེད། གཅིག་བྱས་ན།གལ་སྲིད་ང་བཀའ་བློན་ལ་བདམས་པ་ཡིན་ན་ང་ལ་ལས་རིམ་ཁ་ཤས་ཡོད་ས་རེད། ངས་ཉེ་ལམ་བོད་ཀྱི་གསར་འགོད་པ་ཚང་མ་ཡོད་ས་ནས། བོད་ནང་ལ་ང་ཚོས་ལན་ཏག་ཏག་ཅིག་འཕྲོད་གི་མེད་པ་འདྲ། གཞུང་གི་སྲིད་བྱུས་དང་བོད་ནང་གི་བྱིས་པ་ཚོའི་ལས་འགུལ་གཉིས་ཁ་ཁར་འགྲོ་གི་འདུག
འདིའི་ཐད་ལམ་སྟོན་འདྲ་ཡོད་དམ་ཅེས་ཡར་དྲི་བ་ཕུལ་སྐབས། བོད་ནང་གི་ཤེས་ཡོན་་པ་ཕལ་ཆེ་བས་ད་ལྟའི་སྲིད་བྱུས་འདིར་རྒྱབ་སྐྱོར་ཞུ་གི་འདུག་ཅེས་གསུངས་སོང་། ང་རང་ཐབས་ཟད་སོང་། ལས་རོགས་ཤིག་གིས་ཁྱོད་ཀྱི་དྲི་བ་ལ་ལན་སྐྱོན་གནང་མ་སོང་ཟེར། གང་ལྟར། དོན་དག་རེ་ཟུང་འགྲིག་གི་མེད་པ་འདྲ་བོ་འདུག

ང་ཚོ་ལག་དྲུག་ལ་གཏད་མི་འདུག༼མདོ་སྨད་ཀྱི་ཏ་སེ་རྩེས་སྐབས་ཀྱི་མཐའ་མའི་ཏ་སེ་དྲུག་ལག་ལ་ཉར་ཡོད་པ་དེའི་དོན་ཡིན༽ ད་དུང་འཕག་འཚེག་རྒྱག་རྒྱུ་ཡོད་པ་འདྲ་ཞིག་རེད།

༧གོང་ས་མཆོག་གིས་སྲིད་དབང་ཡོད་ཚད་གང་མགྱོགས་ཐོག་གཞོན་སྐྱེས་རྣམས་ལ་རྩིས་སྤྲད་པ་འདི་དམིགས་ཡུལ་དེ་འདྲ་ཞིག་མཐོང་ནས་ཡིན་སྲིད་།
ཡིན་ཡང་བོད་ཕྱི་ལ་ཡོད་པའི་གཞོན་སྐྱེས་སམ་བོད་མི་དག་ལ་སྙིང་སྟོབས་དེ་འདྲ་བ་ཡོད་པའི་རྣམ་པ་གང་ཡང་མི་འདུག་།

ང་ཚོར་དགུན་ཁ་ཤར་ནས་དུས་རབས་ཕྱེད་ཙམ་འགྲོ་གི་ཡོད་པས། ད་ལྟ་ཤར་རྒྱུ་ལྷག་པ་ནི་དཔྱིད་ཀ་ལས་མ་འདས་པ་རེད། འོན་ཀྱང་ང་ཚོའི་དཔྱིད་ཀ་ཤར་དུས་དེ་ཕལ་ཆེར་ད་དུང་དུས་རབས་ཕྱེད་མིན་ཙམ་འགོར་དགོས་ཀྱི་ཡོད་པ་འདྲ། ང་ཚོའི་དཔྱིད་ཀ་ཤར་དུས་དེ། རྒྱ་ནག་མི་དམངས་ལ་དཔྱིད་ཀ་ཤར་བ་དང་མཉམ་གཅིག་ཏུ་བཞད་རྒྱུ་ཡིན་པ་འདྲ།
དགུན་གཞུང་ཧ་ཅང་རིང་ཡང་། ད་དུང་དཔྱིད་ཀ་ཤར་རྒྱུའི་གྲབས་མི་འདུག ཕལ་ཆེར་དགུན་གཞུང་འདི་གྲང་སོང་བས་ཡིན་ནམ། ཡང་ན་གྲང་ངད་དེའི་ཕག་ན་དཔལ་འབྱོར་གྱི་བསླུ་བྲིད་ཡིབ་ཡོད་པས་ཡིན།
ལམ་དབུ་མར་དཔྱིད་ཀ་ཞིག་མེད་ན། རང་བཙན་ལ་ཁ་ཐག་ཧ་ཅང་རིང་། དེས་ན་ཁྱེད་ལ་གང་མགྱོགས་དཔྱིད་ཀ་ཞིག་དགོས་ན། ཁ་ཞེ་ངོ་ལྐོག་མེད་པར་དོན་དངོས་དང་འཚམས་པར་བསམ་གཞིག་ཅིག་གྱིས།

མི་ནག་ཚང་ལགས།
མི་ལོ་ལྔ་བཅའི་ནང་དུ་རྡ་རམ་ས་ལའི་ཕྱི་ནང་གསང་གསུམ་ལ་ཉམས་ཞིབ་མཐར་ཕྱིན་པ་ཞིག་བྱ་ན་གད་མོ་ཤོར་བ་དང་ངུ་ཤོར་བའི་གནས་ཚུལ་ཉུང་ཉུང་མ་རེད་ཁྱེད་ཀྱིས་ཀྱས་ལོས་མཁྱེན།

ང་ཚོའི་ཕྱོགས་ནས་དམིགས་གསལ་ཀི་ཅང་ལས་རྒྱུ་མེད་ནོ་ཁྱེད་ཀྱིས་ཀྱང་ཤེས་ཀི་རེད། ང་ཚོར་ནམ་རྒྱུན་གོམ་ལོབ་ཏུ་སོང་ཡོད་པའི་ལས་འགུལ་ཟེར་ན་རེད། ཚོགས་པ་རེའི་ངོས་ནས་མར་མེ་ཁྲོམ་སྐོར་རེ་དང་གསར་འགོད་གསལ་བསྒྲགས་རེ། ད་དུང་མི་སྒེར་ངོས་ནས་རབ་བྱུང་ན་འདས་པོ་རྣམ་པའི་ཆེད་དུ་མཆོད་མེ་རེ་སྤར་ཀི་ཡོད་ན་མེད་ན་དེ་རེད། འདི་ནི་ལོ་འགའི་སྔོན་ནས་ང་ཚོའི་རྒྱུད་རིམ་ལྟ་བུ་དང་གོམ་གཤིས་འདྲ་བོ་རེད། དེ་ལས་དམིགས་གསལ་ཀི་ཚོར་བ་ཞེ་དྲག་ཅང་སྐྱེས་ཀི་མེད་ཀ ང་ཡང་འདིའི་གྲས་སུ་འཐུས།

ཉིན་ཞག་༣༦༠་ ང་ཚོ་དུས་བཞི་དང་འབྲལ་མ་མྱོང་མོད། འོན་ཀྱང་དུས་བཞི་གང་ཞིག་ལ་ལོང་སྤྱོད་མིན་དེ། རང་ཉིད་ལ་ཐུག་ཡོད། དཔྱིད་ཀ་སྒུག་ནས་སླེབ་ཡོང་རྒྱུ་ཞིག་མེད་ལ་རང་ཉིད་ཀྱི་དཔྱིད་དུས་ལ་རོལ་ཐུབ་དགོས་པ་མ་ཡིན་ནམ།

ཧ་ཧ་སྨྱོ་གཏམ་ཞིག་བཤད་པ་ཡིན

དྲ་གྲོགས་ཚོ་ཕེབས་པར་དགའ་ནས་ཡོད། རེ་རེ་ལ་ལན་འདེབས་བྱ་ཐུབ་གི་མི་འདུག

ད་རང་རང་གིས་ཅི་བསམ་གི་དེ་ཚོ་ཤོད།

བཀའ་ཁྲིས་ད་ལོར། ༼ང་ཚོའི་ཕ་མེས་ཡང་མེས་ཚོས་དེ་དུས་སྒྲུབ་ཐུབ་པ་ཞིག་ང་ཚོས་དེ་རིང་སྒྲུབ་མི་ཐུབ་པ་ཅི་ཡོད་༽ཟེར།

ཨི་རྗིབ་མི་དམངས་ཀྱིས། ནེལ་ གཙང་བོའི་སྟོད་རྒྱུད་དུ་ཡོད་པའི་ཊོ་ནེ་ཤི་ཡ་མི་དམངས་ཀྱིས་སོ་སོའི་སྲིད་གཞུང་རྫོག་ཐུབ་ན། ང་ཚོས་མི་ཐུབ་པ་ཅི་ཡོད་ཅེས་ཨ་རབས་ཀྱི་དཔྱིད་ཀ་དེ་ཤར་བཅུག་པ་རེད།

ད་བོད་པ་ཚོས། འ་ལེར་ཐོག་མར་ལས་འགུལ་རྩོམ་མི་ཐུབ་ཀྱང་། རྩ་བའི་རྩ་དོན་གྱི་གཏིང་རིམ་པ་དགུ་ན་ཉལ་བསྡད་པའི་དྲི་བ་དེ་དག་འདོན་ཐུབ་དགོས་པར་འདུག དྲི་བ་ངོ་མ་དེ་འདྲི་ཐུབ་སོང་ན། དེ་ནས་དྲི་ལན་འཚོལ་དགོས་པ་རེད་འདོད།

ང་ཚོ་མི་ལོ་ལྔ་བཅུ་དེ་དགུན་དགུན་རྐྱང་ཞིག་བྱས་ནས་ལོ་ནག་དེ་དུང་ཡང་རྫོགས་མེད་པས་ང་ཚོ་ལ་དཔྱིད་ཀ་ཞིག་ད་ལྟ་ཐག་རིང་པོ་རེད།
ང་ཚོས་མི་ལོ་ལྔ་བཅུའི་ལོ་ནག་དེ་ནི་ནང་འཁྲུག་དང་ཕྱོགས་རིས་ཀྱིས་བསྐྱལ་བ་རེད།
གནས་ཚུལ་དེ་མཇུག་སྒྲིལ་བའི་ཉིན་མོ་ནས་ཁ་ཁོག་མེད་པའི་ཆིག་སྒྲིལ་གྱི་གོང་བུ་ཞིག་ཏུ་ག་དུས་བསྒྱུར་ཐུབ་ན་ཉིན་མོ་དེ་ནས་བཟུང་ང་ཚོ་ལ་དཔྱིད་ཀ་ཞིག་ཤར་བའི་མགོ་འཛུགས་ཀྱི་རེད།གནས་ཚུལ་དེ་མཇུག་མ་སྒྲིལ་ན་བོད་མི་ཕྱེད་ཀ་མེ་ལ་སྒྲོན་ཡང་གྲུབ་འབྲས་སྨིན་གྱི་མ་རེད།དེ་ནི་མི་ལོ་ལྔ་བཅུ་ཕྱིར་མིག་དང་ཉམས་ཞིབ་ཡག་པོ་ཞིག་བྱ་ན་ལོ་ནག་དང་ཟླ་ནག་གིས་རྫོགས་ཡོད།ད་ང་ཚོ་མི་རབས་གསར་པ་ཚོས་ལོ་ནག་དང་ཟླ་ནག་དེ་ན་ཁ་གཏད་བྱ་ནས་དཔྱིད་ཀ་ཞིག་བུ་དགོས་བ་རེད།

ང་ཚོ་ལ་ཉི་མ་ ༣༦༠ ཡིས་མི་ཚད་པའི་དགུན་ཟླ་རིང་མོ་ཞིག་ཡོད་སྟབས། དཔྱིད་ཀ་ཤར་ཁག་པོ་རེད།

བོད་ཀྱི་དགུན་ཁ་དང་། འཁྱགས་ལ་འབྱར་བའི་བོད་པ། འཁྱགས་ཀློང་ནས་མ་བཟོད་པར། རང་ལུས་མེ་རུ་སྦར་བཞིན་པའི་བོད་པ། སོ་སོ་འཚིག་པ་མ་གཏོགས་གཞན་ལ་མི་གནོད་པའི་བོད་པའི་ལས་འགུལ། དཔྱིད་ཀ་ཅེས་པ་ཞིག་ཤར་རྒྱུ་མེད་པར་ཐག་བཅད་ཚར་བའི་བོད་པ། མགོ་རུམ་ལ་བཅུག་སྟེ། མི་སྐད་ཁྱི་སྐད་ཙམ་ཡང་མི་གོ་བའི་བོད་པ། ང་ཚོ་ལ་དཔྱིད་ཀ་ཞིག་དངོས་གནས་ཤར་རྒྱུ་མེད་པ་རེད་དམ།

ཡག་པོ་བྲིས་འདུག

རེད། ང་ཚོའི་དཔྱིད་ཀ་ནི་རི་བོང་གི་རྭ་དང་། རུས་སྦལ་གྱི་སྤུ། མོ་གཤམ་གྱི་བུ། ནམ་མཁའི་མེ་ཏོག་ལྟ་བུ་ཞིག་མིན་ནའང་། ཊོ་ནེ་ཤི་ཡ་དང་། ཨི་རྗིབ། ལེ་བྷི་ཡ། སེ་རི་ཡ། ཨ་རབ་ལྟ་བུའི་དཔྱིད་ཀ་མགྱོགས་མྱུར་ཆེ་ཞིང་། སྐྱེ་སྟོབས་དར་བ་ཞིག་ནི་གཏན་ནས་ཡིན་ཚོད་མི་འདུག་གོ ཡིན་ནའང་། ཁ་སང་རང་མེ་ལ་བསྲེགས་པའི་གྲྭ་ཕྲུག་འདི་དག་ནི་ང་ཚོའི་དཔྱིད་ཀ་བསུ་བའི་ཁུ་བྱུག་གི་འབོད་པ་ལོས་ཡིན།