བཀའ་ཤག་གི་གསལ་བཤད་དང་གྲོས་ཚོཊ་ནང་གི་གླེང་གཞི་ཁག་ཅིག་གི་ཐོག་བཅར་འདྲི།

སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་སྟེང་། བཀའ་ཤག་སྐབས་བཅུ་བཞི་བའི་སྲིད་བྱུས་ལངས་ཕྱོགས་དང་མ་འོངས་ལས་འཆར་སྐོར་གྲོས་ཚོགས་ནང་གསལ་བཤད་གནང་བ་དང་། གྲོས་ཚོགས་འཐུས་མི་ཚོས་བོད་པའི་རྩ་དོན་གཙོས་པའི་བོད་ཕྱི་ནང་གི་གནད་དོན། བྱེ་བྲག་གིས་བཙན་བྱོལ་ནང་གི་གནས་ཚུལ་ཁག་ཅིག་ཐོག་བགྲོ་གླེང་དང་གྲོས་ཆོད་བཞག་པའི་ཐོག་སྤྱི་འཐུས་རྒན་གྲས་ཁག་ཅིག་ལ་དགོངས་འཆར་བསྡུས་ཡོད།

སྤྱི་འཐུས་སྨོན་ལམ་མཐར་ཕྱིན་ལགས་སུ་སྐབས་བཅུ་བཞི་པའི་བཀའ་ཤག་གིས་སྤྱི་འཐུས་ལྷན་ཚོགས་སུ་གནང་བའི་གསལ་བཤད་ནང་མ་འོངས་ལས་འཆར་དང་རྩ་བའི་ལྟ་གྲུབ་ཐོག་ཁ་གསལ་མིན་པའི་བསམ་ཚུལ་ཡོང་གི་ཡོད་པའི་ཐད་དགོངས་ཚུལ་གང་འདྲ་ཡོད་མེད་དྲིས་པར་ཁོང་གིས། “ ང་རང་ལ་མཚོན་ནའང་སྤྱི་འཐུས་རྣམ་པས་གསུངས་པ་ལྟར། ཐེངས་འདིའི་བཀའ་ཤག་གི་གསལ་བཤད་ནང་འཛིན་སྐྱོང་གི་ལས་དོན་རེ་རེ་བཞིན་དམིགས་སུ་བཀར་ཏེ་གསལ་བཤད་གནང་མི་འདུག་བསམ་པ་བྱུང་སོང་། ད་ལྟའི་བར་བོད་མི་ཚང་མའི་སེམས་སུ་༸གོང་ས་མཆོག་བོད་ལ་གདན་འདྲེན་ཞུ་ཐུབ་ན་བསམ་གྱི་ཡོད་པ་རེད། བཀའ་ཤག་གིས་ལོ་སྔོན་མ་ནས་༸གོང་ས་མཆོག་བོད་ནང་གདན་འདྲེན་ཞུ་རྒྱུ་ཡིན། ཞེས་གསལ་བསྒྲགས་བྱས་པ་རེད། དེའི་ཐོག་གསལ་བསྒྲགས་ཤུགས་ཆེར་གནང་བ་ཡིན་ན་གནས་སྟངས་གང་འདྲ་ཞིག་ཆགས་མིན་དང་གང་འདྲ་ཞིག་འབྱུང་མིན་ཐོག་ལ་བསམ་ཚུལ་མང་པོ་ཞིག་ཡོང་གི་ཡོད་པ་རེད། ཆབ་སྲིད་ཐོག་ནས་སྔོན་མའི་སྲིད་བྱུས་རྒྱུན་འཛིན་གནང་གི་ཡིན་ཞེས་གསུངས་ཡོད་ཀྱང་། བོད་དོན་ཆེད་རྒྱ་ནག་དང་མཉམ་དུ་འབྲེལ་མོལ་བྱ་རྒྱུའི་ཐོག་ཐབས་ལམ་གང་འདྲ་ཡོད་མེད་དང་། རྒྱལ་སྤྱིའི་ཐོག་བོད་དོན་དྲིལ་བསྒྲགས་ཤུགས་ཆེ་རུ་གཏོང་སྟངས་གང་འདྲ་ཡིན་མིན་སོགས་གསལ་བོ་མི་འདུག འདི་དག་ང་རང་གིས་གྲོས་ཚོགས་ནང་དུའང་ཞུས་པ་ཡིན། བཀའ་བློན་ཁྲི་པའི་དམ་འབུལ་དང་དེའི་རྗེས་ཀྱི་གཏམ་བཤད་མང་པོའི་ནང་ཆིག་སྒྲིལ་དང་གསར་གཏོད། རང་མགོ་རང་ཐོན་བཅས་ཀྱི་ལྟ་གྲུབ་གསུམ་ལ་བོད་མི་མང་སྤྱི་འཐུས་ལྷན་ཚོགས་ཀྱིས་བཀའ་འཁྲོལ་ཐོབ་པ་ཡིན་ན། ལག་ལེན་བསྟར་བར་དཀའ་ངལ་མེད། ཅེས་གསུངས་ཡོད་པ་རེད། སྤྱི་འཐུས་ལྷན་ཚོགས་ནང་ཉེ་ཆར་བཀའ་ཤག་གི་དམ་འབུལ་སྐབས་གསུངས་པ་ལས་ལྷག་པའི་གནས་ཚུལ་གསར་བ་གང་ཡང་ཕེབས་མ་སོང་། དེ་འདྲའི་གནས་སྟངས་འོག་སྤྱི་འཐུས་ལྷན་ཚོགས་ཀྱིས་ངོས་ལེན་དང་རྒྱབ་སྐྱོར་གནང་དགོས་པ་ཡིན་ན། འགྲོ་ལུགས་འགྲོ་སྟངས་གསར་བ་གང་ཡང་མེད་པར་གནས་སྟངས་གང་འདྲ་ཆགས་ཡོང་བསམ་པའི་སེམས་ཚོར་གྲོས་ཚོགས་ནང་ཞུས་པ་ཡིན། གཅིག་བྱས་ན་རིམ་བཞིན་དེ་དག་ཁ་ཇེ་གསལ་དུ་ཡོང་གི་རེད་ལ། ཇེ་གསལ་ཏུ་གཏོང་རྒྱུའི་རེ་བ་ཡང་བྱེད་ཀྱི་ཡོད། དེ་མ་གཏོགས་བཀའ་ཞིག་གི་ལས་གཞི་གསར་པའི་ཐོག་རྒྱབ་སྐྱོར་བྱེད་དང་མི་བྱེད་ཀྱི་གཞི་རྩ་ལྷག་གི་ཡོད་པ་མ་རེད ” ཅེས་བརྗོད་བྱུང་།

            ཡང་ཁོང་ལ་ཐེངས་འདིའི་བཀའ་ཤག་གི་གསལ་བཤད་དེ་སྐབས་སྔོན་མ་དག་དང་བསྡུར་ན་མ་འདྲ་བའི་ཆ་གང་འདྲ་ཡོད་མེད་དྲིས་པར། “ སྔོན་མ་བཀའ་ཁྲི་ཟམ་གདོང་རིན་པོ་ཆེས་བཀའ་ཤག་གི་གསལ་བཤད་ཐོག་མ་གནང་སྐབས་ལས་འཆར་མི་འདྲ་བ་ཁག་ ༥༥ ལྷག་གྲོས་ཚོགས་སུ་གསལ་བཤད་གནང་བ་རེད། སྐབས་དེར་ཁ་གསལ་བོ་གང་འཚམ་ཡོད་ཀྱང་། དེའི་ཐོག་གྲོས་ཚོགས་ནང་བགྲོ་གླེང་མང་པོ་བྱུང་སྟེ། མཐའ་མར་བོད་རྒྱ་འབྲེལ་མོལ་གྱི་ཁོར་ཡུག་བསྐྲུན་ཐབས་སོགས་ཀྱི་ཐད་ལ་གྲོས་ཚོགས་ཀྱི་བཀའ་འཁྲོལ་ཡོད་མེད་ཀྱི་གནས་སྟངས་མང་པོ་ཆགས་པ་རེད། ཐེངས་འདིར་ཤེས་ཡོན་གྱི་སྐོར་ནས་འབྱུང་འགྱུར་ལོ་ ༢༠ནང་ཆེད་ལས་པ་ཆིག་ཁྲི་ཐོན་པའི་སྐོར་བཀོད་འདུག  ང་རང་གི་ངོས་ནས་ཆེད་ལས་པ་ཆིག་ཁྲི་ལས་མ་མཐར་བོད་ཡིག་གི་ཆེད་ལས་པ་ ༥༠༠ ཐོན་ཐུབ་པའི་ཐབས་ཤེས་གནང་དགོས་པའི་འབོད་སྐུལ་ཞུས་པ་ཡིན། དེ་བཞིན། གཞིས་ཆགས་ཁག་དང་བོད་རིགས་སྤྱི་མཐུན་ཚོགས་པ་ཁག་མགོ་སྒྲིལ་སྟངས་དེ་རྒྱ་ནག་གིས་བཤད་བཞིན་པའི་ཁ་གཏད་རོགས་སྐྱོར་གྱི་རྣམ་པ་ཡིན་ནམ། ཡང་ན་གཞིས་ཆགས་རེ་རེའི་ནང་གི་ཐོན་ཁུངས་གང་ཡོད་པ་དེ་བོད་རིགས་སྤྱི་མཐུན་ཚོགས་པ་བརྒྱུད་དེ་ཕྱི་རྒྱལ་དུ་ཚོང་འདྲེན་བྱ་འཆར་ཡིན། ལྷག་དཀར་སྲུང་གཙི་བྱ་འཆར་ཡོད་པ་དེ་གངས་ཅན་སྐྱིད་གཤོངས་ལྟ་བུར་ལས་འགུལ་དེའི་རིགས་ཅི་ལྟར་མགོ་རྩོམ་མིན་བཅས་ལ་ལན་གསལ་བོ་ཡོང་བའི་རེ་བ་བྱེད་ཀྱིན་ཡོད ” ཅེས་བརྗོད་བྱུང་།

སྤྱི་འཐུས་ཀརྨ་ཡེ་ཤེས་ལགས་སུ་ཐེངས་འདིའི་བཀའ་ཤག་གི་གསལ་བཤད་སྤྱི་ཡོངས་ཀྱི་ཐོག་དགོངས་ཚུལ་གང་འདྲ་ཡོད་མེད་དང་། བཀའ་ཤག་གིས་མ་འོངས་པར་ལས་དོན་གཙོ་བོ་གང་དང་གང་གནང་དགོས་པར་མཐོང་མིན་དྲིས་པར་ཁོང་གིས། “ སྐབས་བཅུ་བཞིའི་བཀའ་ཤག་གིས་གྲོས་ཚོགས་སུ་གནང་བའི་གསལ་བཤད་ཤོག་ལྷེ་གསུམ་དང་ཕྱེད་ཀའི་ནང་། བོད་ཕྱི་ནང་གཉིས་ཀྱི་ལས་དོན་དང་ནང་སྲིད་དང་ཤེས་རིག འཕྲོད་བསྟེན། དཔལ་འབྱོར་བཅས་དབྱེ་བ་དང་ཞིབ་ཕྲ་མེད་པ་དེ་གསལ་བོ་རེད། ཡིན་ནའང་སྙིང་བསྡུས་རེ་བསྟན་ཡོད་སྟབས་འདི་ཚང་མི་འདུག་ཟེར་ནས་ལབ་རྒྱུ་ཁག་པོ་རེད། མ་འོངས་པར་གང་འདྲ་བྱ་དགོས་མིན་གྱི་ཐད་ནས། ཉེ་ཆར་བཀའ་ཤག་གི་གསལ་བཤད་གནང་སྐབས་ཁོ་རང་གཅིག་པུ་རེད། ཞིབ་ཕྲའི་གནས་ཚུལ་རྗེས་སུ་རིམ་པས་ཡོང་བའི་རེ་བ་ཡོད ”  ཅེས་བརྗོད་བྱུང་།

            ཡང་ཁོང་ལ། ཉེ་ཆར་གྲོས་ཚོགས་ནང་བཀའ་བློན་ཁྲི་པས་ཤེས་རིག་བཀའ་བློན་གྱི་འགན་འཁུར་བ་ཡིན་ན་ལས་དོན་འཐུས་ཤོར་འགྲོ་ཉེན་ཡོད་པའི་བསམ་ཚུལ་བྱུང་བའི་ཐད་དགོངས་ཚུལ་གང་འདྲ་ཡོད་མེད་དྲིས་པར། “བཀའ་ཤག་སྐབས་བཅུ་གཉིས་པའི་བཀའ་ཤག་ལ་མཚོན་ན་བཀའ་བློན་ཁྲི་པ་རྩིས་པའི་བཀའ་བློན་བཞི་མ་གཏོགས་མེད་ཀྱང་འཐུས་ཤོར་འདི་ཕྱིན་སོང་ཟེར་ནས་མཛུབ་མོ་འཛུགས་ས་མེད། ཐེངས་འདིར་བཀའ་བློན་ཁྲི་པ་གཙོས་པའི་བཀའ་བློན་བདུན་ཡོད་སྟབས། བཀའ་བློན་ཁྲི་པའི་སྤྱི་ཡོངས་ཀྱི་ཆབ་སྲིད་དང་སྲིད་བྱུས་ཀྱི་སྒང་ལ་དགོངས་པ་བཞེས་ཏེ། ཤེས་རིག་བཀའ་བློན་ཁ་ཁ་བྱུང་ན་ཡག་གི་རེད་བསམ་གྱི་ཡོད། ཡིན་ནའང་། དེ་སྔ་ནས་བཀའ་ཁྲི་མཆོག་གིས་ཤེས་རིག་ཐོག་ཤུགས་རྒྱག་འཆར་ཡོད་པ་དང་། དེའི་ཐོག་ཁོང་ཉིད་ལ་སེམས་ཤུགས་ཆེན་པོ་ཡོད་སྟབས་ཁོང་གིས་འགན་འཁུར་བ་རེད། དེའི་ཐད་ནས་དམིགས་གསལ་ཕྱག་ལས་འཐུས་ཤོར་འགྲོ་རྒྱུའི་དོགས་པ་མེད། བཀའ་བློན་ཁྲི་པས་འབྱུང་འགྱུར་ལོ་ ༢༠ ནང་བོད་ཕྱི་ནང་གཉིས་སུ་ཆེད་ལས་པ་ཐོན་ཚད་ཀྱི་ཐད་ནས་མང་པོ་གསུངས་སོང་། ང་རང་གིས་བསམ་ན། སྤྱིར་བཏང་ཆེད་ལས་པ་དང་རིགས་གཅིག་རྐང་འཛིན་དེ་ཁ་ཁ་རེད། ཆེད་ལས་པ་དེ་ཤེས་ཡོན་པ་ཡིན་དགོས་ཀྱི་མི་འདུག་བསམ་གྱི་ཡོད། དེའི་ནང་ཤིང་བཟོ་དང་ལྷ་བྲིས། འཚེམ་བཟོ་སོགས་ང་ཚོ་བོད་རང་གི་ཐུན་མོང་མ་ཡིན་པའི་རིག་གཞུང་མང་པོ་ཞིག་ཉམས་དམས་སུ་འགྲོ་བཞིན་པའི་རིགས་ཚུད་ཡོད་པ་རེད་བསམ་གྱི་འདུག ད་ལྟའི་ཆར་བོད་ནང་ལ་མཚོན་ན་བཟོ་ལས་མང་ཆེ་བ་རྒྱ་མིས་བཟུང་ཡོད་པ་དང་། བཙན་བྱོལ་ནང་ལ་མཚོན་ན་བཟོ་ལས་མང་ཆེ་བ་རྒྱ་གར་བའི་ལག་ཏུ་བཞག་ཡོད་སྟབས། དེ་དག་ཡོངས་རྫོགས་བོད་པ་རང་གིས་བྱ་ཐུབ་རྒྱུའི་ཐད་བསམ་བློ་གཏོང་དགོས་པ་རེད་བསམ། ཤེས་ཡོན་གྱི་ཐོག་ནས་ཀྱང་ཚན་རིག་དང་ཁྲིམས་བཅས་ཀྱི་ཐོག་རྒྱལ་སྤྱིའི་གནས་ཚད་དང་མཐུན་པའི་རིགས་གཅིག་རྐང་འཛིན་ཐོན་རྒྱུ་སོགས། བཀའ་ཁྲིའི་ལས་ཡུན་ལོ་ ༥ དང་ ༡༠ ལས་མེད་ཀྱང་། བརྒྱ་ཆ་བརྒྱ་མ་འགྲུབ་ཀྱང་བརྒྱ་ཆའི་ ༥༠ འགྲུབ་ཐུབ་པ་ཡིན་ནའང་ཡག་པོ་རེད ” ཅེས་གསུངས་བྱུང་ལ། ཡང་ཁོང་གིས། “ ༧གོང་ས་མཆོག་བོད་ལ་གདན་འདྲེན་ཞུ་རྒྱུའི་ཐད། ༸གོང་ས་མཆོག་གིས་ཀྱང་ཁོང་རྒྱ་ནག་རི་བོ་རྩེ་ལྔར་ཕེབས་འདུན་ཡོད་སྐོར་གསུངས་ཡོད་པ་རེད། གནད་དོན་འདིའི་ཐད་ད་ལྟའི་རྒྱ་ནག་གི་གནས་བབ་དང་རྒྱ་ནག་གི་བྱ་སྤྱོད་སོགས་ལས་རྒྱལ་ཁབ་གསུམ་པ་བཞི་པ་ཞིག་གི་དབུ་ཁྲིད་དང་དུས་མཉམ་དུ་སྐུ་མདུན་གྱི་སྐུ་ཕྱཱ་ལ་ཉེན་ཁ་མེད་པའི་ཐོག་གདན་འདྲེན་ཞུ་ཐུབ་ན། བོད་ནང་འགྱུར་བ་འགྲོ་རྒྱུ་དང་བོད་ནང་གི་བོད་མི་ཚོའི་སྐོམ་པ་ཆུ་འདོད་ལྟར་༸གོང་ས་མཆོག་གི་གསུང་ཐོས་པ་དང་མཇལ་ཁ་རག་པའི་གོ་སྐབས་ཤིག་ཤར་ཐུབ་ཀྱི་རེད། གལ་ཆེ་ཤོས། བོད་ནང་གི་གནས་སྟངས་ལ་གཞིགས་ཏེ། དམིགས་བསལ་ཆབ་སྲིད་ཀྱི་དཀའ་ངལ་སེལ་ཐབས་ལ་ཤུགས་རྒྱག་རྒྱུ་དང་བོད་རྒྱ་འབྲེལ་མོལ་གྱི་ལམ་ནས་ང་ཚོ་བོད་ནང་མགྱོགས་པོ་ལོག་པའི་ཐད་ལ་ལས་རིམ་བསྒྲིགས་རྒྱུ་གལ་ཆེན་པོ་རེད”  ཅེས་གསུངས་བྱུང་།

སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་སུ་ཐེངས་འདིའི་གྲོས་ཚོགས་ནང་ཆབ་སྲིད་ཐོག་བགྲོ་གླེང་གནང་སྟངས་གང་འདྲ་བྱུང་ཡོད་མེད་དྲིས་པར་ཁོང་གིས། “ སྤྱིར་བཏང་གྲོས་ཚོགས་ཀྱི་སྐབས་གང་ཡིན་ཡང་ཆབ་སྲིད་ཀྱི་ཐོག་ལ་བགྲོ་གླེང་མང་པོ་གནང་གི་ཡོད་པ་རེད། ད་རེས་ཀྱི་གྲོས་ཚོགས་ནང་སྤྱི་འཐུས་གསར་པ་མང་པོ་ཞིག་གིས་ཆབ་སྲིད་ཀྱི་གནས་སྟངས་ཡག་པོ་མཁྱེན་གྱི་འདུག་ལ། ལྷག་པར་དུ་རྒྱ་ནག་གི་སྐོར་ལ་ཤེས་མཁན་དང་དོ་སྣང་ཡོད་མཁན་མང་པོ་ཞིག་བསླེབས་འདུག གྲོས་ཚོགས་ཀྱི་སྐབས་སུའང་གཙོ་བོ། བོད་ནང་རྒྱ་ནག་གི་ཆབ་སྲིད་གནས་སྟངས་འོག་ཛ་དྲག་ཆགས་ཡོད་པ་དང་། ལྷག་པར་དུ་སྤྱི་འཐུས་སྒེར་གྱི་གྲོས་ཆོད་གྲོས་འཆར་གཅིག་གི་ནང་བོད་དེ་ལོ་རྒྱུས་ཀྱི་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པའི་ཁུངས་སྐྱེད་ཡིག་ཆ་མང་པོ་འཛིན་སྐྱོང་གི་ངོས་ནས་བསྡུ་རུབ་དང་འགྲེམས་སྤེལ་བྱ་རྒྱུའི་ཐོག་སྤྱི་མོས་གྲོས་ཆོད་ཕྱིན་པ་མ་ཟད། རྒྱལ་སྤྱིའི་ཐོག་ཁྲིམས་མཐུན་གྱི་ངོས་འཛིན་ཡོང་ཐབས་ལ་འབད་བརྩོན་བྱ་རྒྱུའི་བགྲོ་གླེང་ཚད་མཐོན་པོ་གནང་སོང ” ཅེས་བརྗོད་བྱུང་།

            ཡང་ཁོང་ལ་སྐབས་བཅུ་བཞི་པའི་སྤྱི་འཐུས་ཁྲོད་ནམ་རྒྱུན་གྲོས་ཚོགས་ནང་རྒྱ་ནག་གི་སྲིད་བྱུས་དང་དེའི་འགྱུར་བའི་ཐོག་དོ་སྣང་དང་རྒྱུས་ལོན་ཡོད་མཁན་གྱི་སྤྱི་འཐུས་ཁག་ཅིག་ཡོད་པ་རེད། ཐེངས་འདིའི་གྲོས་ཚོགས་དེའི་ཐད་ཀྱི་གནས་ཚད་གང་འདྲ་ཡིན་མིན་དྲིས་པར་ཁོང་གིས། “ སྤྱིར་བཏང་སྤྱི་འཐུས་ཁྲོད་བོད་ནས་ཡོང་མཁན་དང་རྒྱ་གར་ནས་འཚར་ལོངས་བྱུང་བའི་རིགས། ཕྱི་རྒྱལ་ཡུལ་གྲུ་ཁག་ནས་ཡོང་མཁན་མཉམ་འདུས་བྱས་ཡོད་ཀྱང་། རྒྱ་ནག་གི་ཕྱོགས་ལ་དོ་སྣང་ཆེན་པོ་བྱེད་ཀྱིན་པའི་རྣམ་པ་མཐོང་བྱུང་། ལྷག་པར་དུ་ད་རེས་གྲོས་ཚོགས་ནང་བོད་ནང་ལོགས་ནས་རྒྱ་ནག་གི་སློབ་གྲྭ་རིམ་པ་བརྒྱུད་དེ་མཐོ་རིམ་སློབ་གྲྭ་སློབ་མཐར་ཕྱིན་ཏེ་རྒྱ་ཡིག་གི་གནས་ཚད་མཐོ་བོ་ཡོད་མཁན་དང་ཆབ་སྲིད་ཀྱི་གནས་སྟངས་འོག་རྒྱ་ནག་གི་བཙོན་དུ་ཚུད་དེ་ལོ་མང་བསྡད་མྱོང་མཁན་མང་པོ་ཞིག་བསླེབས་ཡོད་སྟབས། གྲོས་ཚོགས་ཀྱི་ལས་རིམ་ནང་རྒྱ་ནག་གིས་བོད་ཐོག་འཛིན་པའི་སྲིད་བྱུས་སྐོར་ལ་སྔར་ལས་ལྷག་པའི་རྒྱུས་མངའ་ཆེན་པོ་འདུག་བསམ་སོང་། གཙོ་བོ། སྤྱི་འཐུས་རྣམ་པས་དུས་རྒྱུན་དུ་རྒྱ་ནག་གིས་བོད་ཐོག་འཛིན་པའི་སྲིད་ཇུས་དང་རྒྱལ་སྤྱིའི་སྤྱི་ཚོགས་ཐོག་འགུལ་བསྐྱོད་བྱེད་སྟངས། ཚོང་ལས་དཔལ་འབྱོར་དང་མཉམ་དུ་རྒྱལ་སྤྱིའི་སྟེང་ཆབ་སྲིད་ཀྱི་ལས་ཀ་བྱེད་ཕྱོགས་བཅས་ལ་དོ་སྣང་དང་རང་ངོས་ནས་རྒྱུས་ལོན་བྱས་རྗེས། སྤྱི་འཐུས་གྲོས་ཚོགས་ནང་རྒྱ་ནག་གི་སྲིད་ཇུས་འགྱུར་བ་དང་ལྷག་པར་དུ་བོད་ཐོག་འཛིན་པའི་སྲིད་ཇུས་བཅས་ཐོག་གླེང་སློང་ཚད་མཐོ་བོ་བྱེད་ཐུབ་པ་ཡིན་ན། ཕྱོགས་གཅིག་ནས་གྲོས་ཚོགས་ཀྱི་ལས་རིམ་ཆ་ཚང་ཐད་ཀར་རྒྱང་སྲིང་བྱེད་ཀྱི་ཡོད་པ་དང་། གྲོས་ཚོགས་ཀྱི་ལས་རིམ་གསར་ཤོག་གི་ངོ་བོའི་ཐོག་ས་གནས་མང་པོའི་ནང་འགྲེམ་གྱི་ཡོད་སྟབས། ཉེ་ཁུལ་གྱི་ས་གནས་ཁོ་ན་མིན་པར་ཡུལ་ལུང་ཁུག་ཀྱོག་མང་པོའི་ནང་ཡོད་པའི་བོད་མི་ཚོས་རྒྱ་ནག་གི་བྱེད་སྟངས་དང་བོད་ནང་གི་ཛ་དྲག་གནས་སྟངས་སོགས་རྟོགས་ཐུབ་པའི་དགེ་མཚན་ཆེན་པོ་འདུག་བསམ་ཡོད་ལ། དེ་ཧ་ཅང་གལ་ཆེན་པོ་ཞིག་དང་གནད་འགག་ཆེན་པོ་ཞིག་ཏུ་མཐོང་གི་ཡོད ” ཅེས་བརྗོད་བྱུང་ལ། མཐའ་མར་ཁོང་གིས། “ ང་རང་ཚོ་བཙན་བྱོལ་དུ་འབྱོར་ཏེ་ལོ་ ༥༠ ལྷག་ཕྱིན་ཟིན་པ་རེད། འདས་པའི་དུས་སུ་ང་ཚོས་ལས་དོན་གང་བསྒྲུབ་ཀྱང་གཞིས་བྱེས་ལྷན་འཛོམས་དང་བོད་དོན་བདེན་མཐའ་སེལ་བའི་ཆེད་དུ་ལས་དོན་བསྒྲུབ་ཡོད་པ་རེད། མ་འོངས་པར་ཡང་དེ་དག་གཞི་ལ་བཞག་སྟེ་གཙོ་བོ། བོད་ནང་གི་བོད་མི་ཚོས་དཀའ་ངལ་དང་མནར་གཅོད་གང་འདྲ་མྱོང་གི་ཡོད་མེད་ཀྱི་ཐོག་དོ་སྣང་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད། དེའི་ཐད་གྲོས་ཚོགས་ཀྱི་འཐུས་མི་དང་འཛིན་སྐྱོང་བཀའ་ཤག  ལས་བྱེད། བཙན་བྱོལ་མི་མང་བཅས་ཚང་མས་དོ་སྣང་བྱ་ཡུལ་གཙོ་བོ་འཛིན་ཐུབ་པ་ཡིན་ན། བོད་གཞིས་བྱེས་གཉིས་ཀྱི་མཐུན་ལམ་དང་ང་རང་ཚོའི་འཐབ་རྩོད་བཅས་ཀྱི་ཐོག་གྲུབ་འབྲས་ཡག་པོ་ཡོང་ཐུབ་ཀྱི་རེད་བསམ་གྱི་ཡོད ” ཅེས་གསུངས་བྱུང་།

སྤྱི་འཐུས་པདྨ་འབྱུང་གནས་ལགས་སུ་ཐེངས་འདིར་གྲོས་ཚོགས་ནང་ལྷན་ཁང་ཁག་གི་ལས་བསྡོམས་བསྣམས་ཡོང་སྟངས་གང་འདྲ་འདུག་ཞེས་དྲིས་པར་ཁོང་གིས། “ ལྷན་ཁང་ཁག་གི་ལས་བསྡོམས་གྲོས་ཚོགས་སུ་བསྣམས་ཡོང་སྟངས་དེ་གཙོ་བོ། ལྷན་ཁང་སོ་སོའི་ཡན་ལག་ལས་ཁུངས་ཁག་གིས་ཁྱབ་ཁོངས་དང་བཅས་པའི་ལས་བསྡོམས་ལྷན་ཁང་སོ་སོར་འབུལ་གྱིན་ཡོད་རེད།  དེར་ཡང་ལས་བསྡོམས་རྒྱས་པ་ཞིག་དང་བསྡུས་པ་གཅིག་བཅས་གཉིས་ཡོད་ཅིང་། ལས་བསྡོམས་རྒྱས་པ་དེའི་ནང་དབུས་ལས་ཁུངས་སོ་སོའི་ལས་བསྡོམས་ཕྱོགས་བསྒྲིགས་བྱས་ཡོད་པ་དང། གྲོས་ཚོགས་ནང་སྙན་སེང་ཞུ་བར་ལས་བསྡོམས་བསྡུས་པ་ཞིག་ཡོད་པ་དེ་ལྷན་ཁང་ཁག་བདུན་གྱི་བཀའ་བློན་རྣམ་པས་སྤྱི་འཐུས་གྲོས་ཚོགས་ནང་སྙན་སྒྲོན་ཞུ་བཞིན་པ་དེ་ནམ་རྒྱུན་གྱི་འགྲོ་སྟངས་ལྟ་བུ་རེད། ལས་བསྡོམས་རྒྱས་པ་དེ་སྤྱི་འཐུས་རྒྱུན་ལས་ལ་གནང་སྟེ་སྤྱི་འཐུས་རྒྱུན་ལས་ཀྱིས་ཞིབ་འཇུག་གནང་གི་ཡོད་པ་རེད། སྤྱི་འཐུས་རྒྱུན་ལས་ནང་ཆབ་སྲིད་དང་འཛིན་སྐྱོང་རྟོག་ཞིབ་སྡེ་ཚན། རྒྱུན་གྲོན་སྡེ་ཚན་བཅས་གསུམ་ཡོད་པ་རེད། ང་ཚོ་ཆབ་སྲིད་སྡེ་ཚན་ལྟ་བུར་མཚོན་ན། སྐུ་ཚབ་དོན་གཅོད་ཁག་དང་ཕྱི་དྲིལ་ལས་ཁུངས་ཁྱབ་ཁོངས་དང་བཅས་པ་དང་། གཞན་པའི་རྟོག་ཞིབ་སྡེ་ཚན་དང་དཔལ་འབྱོར་དང་འབྲེལ་བའི་རིགས་དེ་རྒྱུན་གྲོན་སྡེ་ཚན་གྱིས་ཤོག་གྲངས་རེ་རེ་བཞིན་རྟོག་ཞིབ་གནང་སྟེ། ཐུགས་དོགས་ཡོད་པ་དང་ཐག་མ་ཆོད་པའི་རིགས་ཡོད་པ་ཡིན་ན། དྲི་བ་བཟོས་ཏེ་གྲོས་ཚོགས་ནང་འཁྱེར་ཡོང་གི་ཡོད་པ་རེད། ཐེངས་འདིར་གྲོས་ཚོགས་ནང་རང་སྐྱོང་སྡེ་ཚན་ཁག་གི་ལས་བསྡོམས་ཁག་ཅིག་བསླེབས་མེད་པའི་བསམ་ཚུལ་ཡོང་གི་འདུག གྲོས་ཚོགས་ནང་བསླེབས་པ་དེ་ལས་བསྡོམས་བསྡུས་པ་ཡིན་སྟབས་ཆ་ཚང་བསླེབས་ཐུབ་ཡོད་པ་མ་རེད། ཡིན་ནའང་། ལས་བསྡོམས་རྒྱས་པའི་ནང་ང་རང་གིས་ཤེས་ཚོད་ལ་ཐེངས་འདིར་ཝར་ནཱ་མཐོ་སློབ་ཀྱི་ལས་བསྡོམས་དང་བལ་ཡུལ་ནང་གི་གངས་ཅན་བདེ་རྩ་བཅས་ཁག་ཅིག་བསླེབས་མི་འདུག ” ཅེས་གསུངས་བྱུང་།

            ཡང་ཁོང་ལ་དེ་སྔོན་གྲོས་ཚོགས་ནས་གཏན་འབེབས་གནང་བའི་ལས་དོན་ཁག་འཛིན་སྐྱོང་གི་ལག་བསྟར་ཏག་ཏག་ཐུབ་ཡོད་མེད་དྲིས་པར། “ འཛིན་སྐྱོང་གི་ཕྱག་ལས་དེ་གྲོས་ཚོགས་ཀྱི་མངོན་འདོད་དང་ཐག་གཅོད་གཞིར་བཟུང་གནང་གི་ཡོད་སྟབས། གྲོས་ཚོགས་ཀྱི་ཐག་གཅོད་གང་གནང་བ་དེའི་ཁྱབ་ཁོངས་དང་བཅས་པར་བཀོད་ཁྱབ་གནང་སྟེ་ཕྱག་ལས་གནང་གི་ཡོད་པ་རེད། ང་རང་ལ་མཚོན་ན་བརྒྱད་ཅུ་གྱ་གྲངས་ནས་སྤྱི་འཐུས་བྱས་བསྡད་པ་རེད། ཕྱག་ལས་མ་གནང་བ་མིན་པར། ལས་བསྡོམས་ནང་བཀོད་དང་མ་བཀོད་མང་པོ་ཞིག་ཡོང་གི་ཡོད་པ་རེད། སྔོན་མ་ལས་ཡག་པོ་འདུག་བསམ་སོང་། སྔོན་མར་ཕྱི་རྒྱལ་གྱི་དོན་གཅོད་ཁག་གི་ལས་བསྡོམས་དེ་ཚིག་ཐོ་ལྟ་བུ་ཞིག་ལས་མེད་སྟབས། གྲོས་ཚོགས་ཀྱི་ངོས་ནས་ལོ་གཅིག་རིང་ལས་ཀ་འདི་ལས་བྱས་མེད་དམ། ཅེས་དྲི་བ་བཀོད་མྱོང་བ་རེད། གང་ལྟར། དེ་སྔོན་དང་བསྡུར་ན་ལས་བསྡོམས་བཀོད་སྟངས་སོགས་ཡག་ཏུ་ཕྱིན་འདུག་བསམ་གྱི་ཡོད། ཐེངས་འདིའི་ལས་བསྡོམས་ཁག་ལས་འདོད་པ་ཚིམ་པ་དེ་ང་རང་ཆབ་སྲིད་སྡེ་ཚན་གྱི་ཁོངས་གཏོགས་སུ་ཡོད་སྟབས། ཕྱི་དྲིལ་ལས་ཁུངས་དང་སྐུ་ཚབ་དོན་གཅོད་ཁག་གི་ལས་འགན་ཁག་དངོས་ནས་ཚགས་ཚུད་ཡོང་འདུག་བསམ་གྱི་ཡོད། ལས་ཀ་ཏག་ཏག་བསྒྲུབས་ཡོད་མེད་ཀྱི་ཐད་ནས།   ད་ལྟའི་བར་ཏག་ཏག་འགྲོ་བཞིན་པ་རེད། ཡིན་ནའང་། ང་རང་གི་ངོས་ནས་ཡིག་ཐོག་ཏུ་ཡོད་པའི་ལས་བསྡོམས་ནང་གང་འཁོད་པ་དེ་སྤྱི་འཐུས་ཚོ་ཕྱོགས་བགོས་ཀྱི་ས་ཁུལ་སོ་སོར་ཕེབས་སྐབས་ཐུགས་ཞིབ་གནང་བ་ཡིན་ན། ས་གནས་ས་ཐོག་ཏུ་དངོས་སུ་ཕེབས་སྐབས་ལས་དོན་བསྒྲུབ་ཡོད་མེད་དང་འགྲུབ་ཡོད་མེད་ར་འཕྲོད་ཐུབ་ཀྱི་རེད་བསམ་གྱི་ཡོད ” ཅེས་བརྗོད་བྱུང་།

སྤྱི་འཐུས་ཡོངས་གླིང་ཟླ་བ་ཚེ་རིང་ལགས་སུ་ཐེངས་འདིའི་བཀའ་ཤག་གིས་སྤྱི་འཐུས་གྲོས་ཚོགས་སུ་གནང་བའི་གསལ་བཤད་ཐོག་སྒེར་ངོས་ནས་དགོངས་ཚུལ་གང་འདྲ་ཡོད་མེད་དྲིས་པར་ཁོང་གིས། བཀའ་ཤག་གི་གསལ་བཤད་ཐད་བཀའ་བློན་ཁྲི་པའི་འོས་བསྡུའི་སྐབས་ནས་མང་ཚོགས་ལ་ཁས་ལེན་དམ་བཅའ་ཆིག་སྒྲིལ་དང་གསར་གཏོད། རང་མགོ་རང་ཐོན་བཅས་ལྟ་གྲུབ་གསུམ་གྱི་ཐོག་གསུངས་པ་རེད། ཐེངས་འདིར་དེ་དག་གསལ་བོར་བཀོད་མེད་པ་གསལ་བོ་རེད། ལྟ་གྲུབ་གང་ཞིག་བཟུང་བའི་རྗེས་སུ་འགྲུབ་མ་འགྲུབ་གནས་ཚུལ་ཡོང་སྲིད་ཀྱང་། ལྟ་གྲུབ་ལ་གཞིར་བཞག་ཏེ་ལས་འཆར་ཞིག་དགོས་ཀྱི་ཡོད་པ་རེད། མ་འོངས་པར་བཀའ་ཁྲི་མཆོག་གིས་གསུངས་བསྡད་པ་དེ་དག་ལས་ཆིག་སྒྲིལ་གྱི་ཕྱོགས་ནས་ད་ལྟའི་བར་༸གོང་ས་མཆོག་གི་ཐུགས་རྗེ་བཀའ་དྲིན་ལ། བོད་ཆོལ་ཁ་གསུམ་དང་ཆོས་བརྒྱུད་ཁག  བོད་ཕྱི་ནང་གཉིས་བཅས་ཀྱི་ཆིག་སྒྲིལ་ཐོག་བཤད་དགོས་པའི་གནས་སྟངས་ཡོད་པ་མ་རེད། ཡིན་ནའང་། མི་ལ་ཉོན་མོངས་དུག་གསུམ་དང་རྣམ་རྟོག་གྱིས་བསྒྲིབས་ཏེ། ང་ཚོའི་སྤྱི་ཚོགས་ནང་གནས་ཚུལ་ཆུང་ཙག་མ་མཐུན་པ་དང་མ་འགྲིག་པའི་རིགས་མང་པོ་ཞིག་ཡོང་གི་ཡོད་སྟབས། དེ་རིགས་ཆིག་སྒྲིལ་གྱི་ལྟ་གྲུབ་ཐོག་ཕྱག་ལས་གནང་ཐུབ་པ་ཡིན་ན། ཡག་པོ་ཡོང་གི་རེད་ལ། དེ་བཞིན་གསར་གཏོད་ཀྱི་ཆ་ནས་ཀྱང་། སྔར་མ་བྱས་པའི་རིགས་བྱས་པ་ཡིན་ན། ཕན་རླབས་དང་རྒྱུན་གནས་ཆེ་ཆུང་། མི་རིགས་དང་རྒྱལ་ཁབ་ཀྱི་དོན་དག་ལ་ཕན་ཐོགས་ཡོད་མེད་ལ་གཞིགས་པའི་གསར་གཏོད་དགོས་ཀྱི་རེད་མ་གཏོགས། གསར་གཏོད་བྱས་པའི་དབང་གིས་མི་རིགས་དང་རྒྱལ་ཁབ་ལ་ཕན་ཐོགས་མེད་པའི་རིགས་བྱུང་བ་ཡིན་ན་དེ་ལ་ཧང་སངས་དགོས་པ་དེ་འདྲ་གང་ཡང་མ་རེད་བསམ་གྱི་འདུག

    ཡང་རང་ཁ་རང་གསོའི་ཐད་ནས། བོད་ནས་གསར་དུ་འབྱོར་བའི་རིགས་མང་པོ་ཞིག་མང་ཉུང་ལ་མ་ལྟོས་པར་སྔོན་མ་ནས་ད་ལྟའི་བར་ཡོང་བསྡད་པ་རེད། དེ་དག་གི་བློ་གཏད་ས་དང་རེ་བ་བཅོལ་ས་དེ་བོད་མིའི་སྒྲིག་འཛུགས་ཆགས་བསྡད་ཡོད་པ་རེད། ངྷ་ས་གཡས་གཡོན་དང་ཡུལ་གྲུ་གཞན་དུ་ཡོད་པའི་གསར་འབྱོར་གཙོས་སྔོན་མ་གཞིས་ཆགས་ནང་ཡོད་བསྡད་པའི་ནང་མི་གཅིག་གཉིས་དེ་དག་མི་མང་པོ་ཆགས་ཡོད་སྟབས། དེ་དག་ལ་དཀའ་ངལ་ཡོད་པའི་ཐད་རྒྱ་གར་གཞུང་གིས་ཐོབ་ཐང་སྤྲོད་ཀྱི་མེད་པའི་གནས་སྟངས་སོགས་བྱུང་ཚེ་གནས་ཚུལ་ཁ་ཁ་རེད། ཡིན་ནའང་། ད་ལྟའི་བར་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་མིའི་ངལ་སེལ་ཚོགས་པ་སོགས་ཀྱི་མིང་ཐོག་ནས་ས་ཆ་ཉོས་ཏེ་སྡོད་ཁང་མཁོ་སྒྲུབ་བྱ་རྒྱུ་དང་། སྒེར་གྱི་མིང་ཐོག་ནས་ཉོ་མི་ཐུབ་པའི་རིགས་ལ་གཞུང་ངོས་ནས་རྒྱབ་སྐྱོར་འོག་ས་ཆ་ཉོ་རྒྱུ་སོགས་ལ་ཕན་ཐོགས་ཆེན་པོ་ཡོང་གི་རེད་བསམ་གྱི་འདུག  ད་ལྟའི་ཆར་ཤེས་རབ་དགའ་ཚལ་སློབ་གླིང་དང་དགོན་སྡེ་ཁག་ནས་ཡོང་བའི་མི་མང་པོ་ཞིག་བོད་ནང་ལོག་མ་ཐུབ་པའི་གནས་ཚུལ་ཡོང་གི་ཡོད་པ་དེ་དག་ལ་སྡོད་ཁང་སོགས་ཀྱི་ཐོག་ནས་མཐུན་རྐྱེན་མཁོ་སྒྲུབ་བྱ་ཐུབ་པ་ཡིན་ན། ད་ལྟའི་བཀའ་ཤག་གིས་ཆིག་སྒྲིལ་དང་རང་ཁ་རང་གསོའི་ལྟ་གྲུབ་གཞིར་བཞག་གིས་བསྒྲུབ་ཐུབ་པ་ཡིན་ན། བོད་མི་སྤྱི་སྒེར་གཉིས་ལ་ཕན་ཐོགས་ཆེན་པོ་ཡོང་གི་རེད་བསམ་གྱི་འདུག ” ཅེས་བརྗོད་བྱུང་ལ།

    ཡང་ཁོང་ལ་ལྷན་ཁང་ཁག་གི་ལས་བསྡོམས་ཐད་བཀའ་འདྲི་ཞུས་པར་ཁོང་གིས། “ ལས་བསྡོམས་ཀྱི་ཐད་ནས་རང་དབང་ཅན་གྱི་སྡེ་ཚན་མང་པོ་ཞིག་འཁོད་མེད་པའི་གནས་སྟངས་ཆགས་འདུག དེ་དག་ལོ་རྒྱུས་ཀྱི་ཐོག་ནས་ཧ་ཅང་གལ་ཆེན་པོ་ཞིག་ཏུ་མཐོང་བྱུང་། ལས་ཀའི་གྲུབ་འབྲས་ཀྱི་ཐད་ནས་ད་ལྟའི་བར་བོད་མིའི་སྒྲིག་འཛུགས་ཀྱི་ངོས་ནས་གང་གནང་མིན། དཔེར་ན། མི་མང་གི་འཐུང་ཆུ་དང་འཕྲོད་བསྟེན། ཤེས་ཡོན་བཅས་ཕྱོགས་ཡོངས་ནས་མཐོང་ཡོད་སྟབས། དམིགས་བསལ་བཀོད་དགོས་པའི་གནད་འགག་དེ་འདྲ་མཐོང་གི་མི་འདུག ”  ཅེས་བརྗོད་བྱུང་།

སྤྱི་འཐུས་ཟླ་བ་ཕུན་སྐྱིད་ལགས་སུ་སྐབས་བཅོ་ལྔ་པའི་སྤྱི་འཐུས་གྲོས་ཚོགས་ཚོགས་དུས་གཉིས་པའི་ནང་བཀའ་ཤག་གིས་གནང་བའི་གསལ་བཤད་ཐོག་མའི་ཐོག་དགོངས་ཚུལ་གང་འདྲ་ཡོད་མེད་དྲིས་པར་ཁོང་གིས། ང་རང་ལ་མཚོན་ན་ཐེངས་འདིའི་བཀའ་ཤག་གསར་བའི་གསལ་བཤད་དེ་སྔོན་མ་བཀའ་བློན་ཁྲི་པ་བཞེངས་སྐབས་ཀྱི་གཏམ་བཤད་དང་ཕྱིས་སུ་བཀའ་ཁྲིར་འདེམས་ཐོན་བྱུང་རྗེས་ཀྱི་བཀའ་སློབ་ཁག་ཐེངས་འདིའི་གྲོས་ཚོགས་སུ་གསལ་བཤད་གནང་བ་ཞིག་ལས། མ་འོངས་པའི་ལས་འཆར་གྱི་ཐད་ནས་སྲིད་བྱུས་ཉམས་ཞིབ་ཁང་གསར་འཛུགས་གནང་རྒྱུ་ལས་དམིགས་བསལ་གྱི་ལས་གཞི་གསར་བ་མེད་པའི་ཚོར་སྣང་བྱུང་སོང་། ཆེད་ལས་པའི་ཐོག་ནས་མ་འོངས་པའི་ལོ་ ༢༠ དུས་ཡུན་བཞག་ཡོད་སྟབས། ང་ཚོར་ལབ་ས་མེད་པའི་གནས་སྟངས་ལྟ་བུ་ཞིག་དང་། རྩིས་རྒྱག་པའི་ཐོག་དགོངས་པ་བཞེས་པ་ཡིན་ན། བཀའ་ཤག་གི་གསལ་བཤད་ནང་ལྟ་ས་མེད་བསྡད་པ་ཞིག་ཆགས་འདུག ཡིན་ནའང་། ང་རང་ལ་ཡིད་ཆེས་དང་རེ་བ་ཞིག་ཡོད་པ་དེ་འཛིན་སྐྱོང་བཀའ་ཤག་གིས་ཧུར་བརྩོན་གནང་གི་རེད་བསམ་པ་འདི་ཡིན། གཙོ་བོ་སྔར་ཡོད་འཛིན་སྐྱོང་གི་ལས་དོན་གང་ཡོད་པ་དེ་ཉམས་ཆག་ཏུ་མི་འགྲོ་བའི་ཐོག་རིམ་གྱིས་ལས་གཞི་གསར་བ་གང་བྱ་མིན་ཐག་གཅོད་བྱ་རྒྱུ་གལ་ཆེན་པོ་རེད ” ཅེས་བརྗོད་བྱུང་།

    ཡང་ཁོང་ལ་ཐེངས་འདིར་སྤྱི་འཐུས་གཅིག་གིས་བཙན་བྱོལ་ནང་བོད་ཀྱི་གསོ་བ་རིག་པ་དང་ནུབ་ཕྱོགས་ཀྱི་གསོ་རིག་མཉམ་འབྲེལ་བྱས་ཏེ་བོད་ནང་དང་། རྒྱལ་སྤྱིའི་ཐོག་ཕན་ནུས་འཐོན་པ་གནང་དགོས་སྐོར་གསུངས་པའི་ཐད་དགོངས་ཚུལ་གང་འདྲ་ཡོད་མེད་དྲིས་པར། “ འཕྲོད་བསྟེན་གྱི་ཕྱོགས་ནས་ད་ལྟའི་བར་ལས་གཞི་གང་འགྲོ་བཞིན་པ་དེ་ལས་དམིགས་བསལ་ཡར་རྒྱས་འགྲོ་རྒྱུ་ཁག་པོ་རེད་བསམ་གྱི་ཡོད། གང་ཡིན་ཞེ་ན། ད་ལྟའི་བར་བཙན་བྱོལ་བོད་མིའི་གཞིས་ཆགས་ཁག་མང་པོ་ཞིག་ཏུ་སྨན་པ་མེད་པའི་དཀའ་ངལ་འཕྲད་བསྡད་ཡོད་པ་རེད། དཀའ་ངལ་དེ་ལམ་སེང་སེལ་ཐུབ་པ་ཞིག་ཀྱང་མ་རེད། ཡིན་ནའང་། ད་རེས་ཀྱི་འཕྲོད་བསྟེན་བཀའ་བློན་སྨན་པ་ཡིན་པའི་དབང་གིས་སྤྱི་ཚོགས་ནང་འཕྲོད་བསྟེན་དང་འབྲེལ་བའི་དཀའ་ངལ་གང་ཡིན་ཡང་ཞུ་གཏུག་སྐབས་གནད་དོན་མགོ་འཚོས་པ་ཞིག་དང་དཀའ་ངལ་ངོ་སྤྲོད་བྱ་རྒྱུ་ལས་སླ་བོ་ཡོང་གི་རེད་བསམ་གྱི་ཡོད། གནད་དོན་མང་པོ་ཞིག་འཆར་གཞི་གཏོང་བར་དཔལ་འབྱོར་ལ་རག་ལུས་ཡོད་པ་རེད། སྤྱི་ཡོངས་ཀྱི་ཐོག་ནས་ཐེངས་འདིའི་ལྷན་ཁང་ཁག་གི་ལས་བསྡོམས་གྲོས་ཚོགས་ནང་འཁྱེར་ཡོང་བ་དེ་ལས་བསྡོམས་འཁྱེར་ཡོང་མཁན་གྱི་ངོས་ནས་གྲུབ་འབྲས་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད་པ་རེད་ལ། ང་རང་གི་ངོས་ནས་ཀྱང་སྐྱོན་བརྗོད་བྱེད་སའི་གཞི་ཞིག་མེད་པ་དེ་ལ་འདོད་པ་ཁེངས་ནས་བསྡད་ཡོད། དེ་ཡང་གཙོ་བོ། སྔོན་མའི་བཀའ་ཤག་གིས་ཡང་དག་པའི་དམངས་གཙོ་དང་འཚེ་བ་མེད་པ། དྲང་བདེན་བཅས་ལ་གཞི་བཅོལ་ཏེ་བསྒྲུབས་ཡོད་སྟབས། མཛད་གཙོ་རྣམ་པ་དང་འབྲེལ་ཡོད་ལས་བྱེད་ཚང་མའི་སེམས་ནང་ཡིད་ཆེས་ཡོད་པའི་ཐོག་ནས། དམིགས་བསལ་གྱི་སྐྱོན་བརྗོད་བྱེད་ས་མེད་པར་བསྔགས་བརྗོད་ཞུ་འོས་པ་ཞིག་ཆགས་ཡོད་པ་རེད ” ཅེས་བརྗོད་བྱུང་། མཐར་ཁོང་ལ་གཞིས་ཆགས་སྲ་བརྟན་གྱི་དཀའ་ངལ་གཙོ་བོ་གང་ཞིག་ལ་ངོས་འཛིན་བྱེད་ཀྱིན་ཡོད་མེད་དྲིས་པར། “ ང་རང་ལ་མཚོན་ན་ཁྲིམས་དང་སྒྲིག་གཞི་དམ་པོ་བྱེད་པ་ཙམ་མིན་པར། གཞིས་ཆགས་ཁག་ཏུ་འཚོ་བའི་རྟེན་གཞི་ཡག་པོ་ཞིག་བསྐྲུན་རྒྱུ་དང་ མི་མང་གི་འཚོ་རྟེན་དང་དཀའ་ངལ་ཤེས་རྟོགས་ཡོང་ཆེད་བཀའ་བློན་རྣམ་པ་གཞིས་ཆགས་ཁག་ཏུ་ཕེབས་ཏེ། ས་གནས་ས་ཐོག་གི་གནས་སྟངས་རྒྱུས་ལོན་བྱས་ཏེ་འཆར་གཞི་གཏོང་དགོས་ཀྱི་འདུག དེ་ལྟར་བྱས་པ་ཡིན་ན་མ་འོངས་པའི་ལོ་ལྔའི་ནང་གང་བྱ་དགོས་མིན་དང་གང་བྱ་ཐུབ་མིན་གསལ་བོ་མཁྱེན་ཡོང་གི་རེད་ལ། དེ་དང་མཉམ་དུ་རྗེས་སུ་གང་བྱས་ཡོད་མེད་དང་གང་འགྲུབ་ཡོད་མེད་ཀྱང་རྩིས་སྤྲོད་བྱ་རྒྱུར་ཕན་ཐོགས་ཀྱི་རེད ” ཅེས་བརྗོད་བྱུང་།

གསར་འགོད་པ། དོན་གོ