འགུ་ལོག་དམ་ཆོས་དཔལ་བཟང་།
ཉེ་བའི་ཆར་རྔ་བ་དང་རྟའུ་ནས་དགེ་འདུན་པ་གཙོ་བོ་བྱས་ཏེ་བོད་མི་ན་གཞོན་དགུ་ཡིས་རང་སྲོག་བློས་གཏོང་བྱས་པའི་ནང་ནས་མི་ལྔ་འདས་གྲོངས་སུ་ཕྱིན་པ་དང༌། མི་བཞི་གསོན་གང་ཡིན་མ་ངེས་པའི་གནས་སྟངས་ཀུན་གྱིས་མཁྱེན་གསལ་ལྟར་ཡིན། དོན་རྐྱེན་དེའི་ཐད་ཁ་སང་རེས་གཟའ་ལྷག་པ་ཕྱི་ཟླ་ ༡༠ ཚེས་ ༡༩ ཉིན། ཀྲུང་གོའི་ཕྱི་འབྲེལ་ལས་ཁུངས་ཀྱིས་གསར་འགོད་གསར་བསྒྲགས་ཤིག་སྤེལ་བའི་ཐོག ཕྱི་འབྲེལ་མགྲིན་ཚབ་མ་ཅང་དབྱི་ནས་བཤད་རྒྱུར། བོད་མི་འགས་རང་ལུས་མེར་བསྲེགས་བཏང་སྟེ་རྒྱལ་ཁབ་ཀྱི་བདེ་འཇགས་དང་མི་མང་གི་ཁེ་དབང་ལ་གནོད་འཚེ་བཏང་ཡོད། དེ་ནི་ཏཱ་ལའི་དང་ཏཱ་ལའི་རུ་ཚོགས་ཀྱིས་རྣམ་པ་བསྒྱུར་ནས་མང་ཚོགས་རྒྱུད་སྐུལ་བྱས་ནས་དྲག་སྤྱོད་སྤེལ་བ་ཞིག་ཡིན་པར་བཤད་ཡོད་འདུག རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་མ་ཅང་དབྱི་ནས་བཤད་པའི་རྒྱུད་སྐུལ་དང་དྲག་སྤྱོད་ཞེས་པའི་ཚིག་གཉིས་བདེན་པ་མིན་པར་དོན་དངོས་ཐོག་སྒྲོ་འདོགས་དང་སྐུར་འདེབས་བྱས་པ་ལ་གསལ་བཤད་ཅིག་མ་བྱས་པ་ཡིན་ན། ལོ་རྒྱུས་འཁྱོག་བརྗོད་བྱས་པ་བདེན་པར་མཐོང་བའི་ལྟ་ཚུལ་བྱུང་མི་སྲིད་པ་མིན།
བོད་ཁ་བ་གངས་ཅན་གྱི་བསམ་བློའི་སློབ་སྟོན་པ་སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་ཞི་བདེའི་བྱ་དགའ་དང་ཨ་རིའི་གསེར་གྱི་རྟགས་མའི་གཙོས་བྱ་དགའ་ཁག་མི་འདྲ་བ་ ༦༠༠ ལྷག་འབུལ་བཞེས་གནང་བའི་རླབས་ཆེན་གྱི་སྐྱེས་བུ་དམ་པ་ཞིག་ཡིན་པ་ཅང་དབྱི་རང་ཉིད་ཀྱིས་ཀྱང་ཧ་གོ་དོན་གསལ་ཡིན། དེ་ལྟ་བུའི་ཤཱཀྱའི་དགེ་སྦྱོང་ཏཱ་ལའི་བླ་མ་མཆོག་གིས་གཞིས་ལུས་བོད་མི་ཚོར་འཚེ་བའི་ལས་ལ་འབད་དགོས། རང་ལུས་མེ་མཆོད་གཏོང་དགོས། དྲག་སྤྱོད་ལས་འགུལ་སྤེལ་དགོས་ཞེས་རྒྱུད་སྐུལ་བྱས་པ་རེད་ཟེར་ན། དེ་སྒྲོ་འདོགས་དང་སྐུར་འདེབས་བྱས་པ་མ་ཡིན་ནམ། གོ་ལ་འདིའི་ཐོག་རྒྱ་མི་རིགས་ཚུད་པའི་བློ་གཟུ་བོར་གནས་པའི་ཤེས་ལྡན་པ་སུ་ཞིག་གིས་གསལ་བསྒྲགས་དེ་བདེན་པར་མི་འཛིན། མགྲིན་ཚབ་མ་ཅང་དབྱི་ལ་འདྲི་རྒྱུར། སྐྱབས་མགོན་ཏཱ་ལའི་བླ་མས་རྒྱལ་ཁབ་གང་ནས། ལོ་དང་ཟླ་དུས་ནམ་ཞིག་ལ། རྒྱུད་སྐུལ་འདི་དང་དེ་ཞེས་གཅིག་གཅིག་གཉིས་གཉིས་བྱས་ཏེ་སྟོན་དགོས་རྒྱུ་ལ། བདེན་དཔང་ཚིག་གཅིག་སྟོན་རྒྱུ་མེད་པ་ལ། ཁྱོད་ཀྱིས་ཧམ་པ་ཆེན་པོས་གསར་འགོད་གསལ་བསྒྲགས་བྱས་ཏེ་འཛམ་གླིང་མི་མང་ལ་མགོ་སྐོར་བཏང་བ་ཡིན་ན། རྒྱ་ནག་སྟོབས་ལྡན་རྒྱལ་ཁབ་ལ་མཚོན་ན། ཧ་ཅང་ངོ་གནོང་དགོས་པའི་བྱེད་ཐབས་སྐྱུག་བྲོ་བོ་ཞིག་མ་ཡིན་ནམ། མིའི་འགྲོ་བ་འུ་ཐུག་ཐབས་ཟད་ཀྱི་གནས་སྐབས་སུ། རང་གི་སྡུག་བསྔལ་འཛམ་གླིང་མི་མང་གི་ཤེས་སུ་འཇུག་ཆེད་རང་ལུས་མེར་བསྲེགས་བཏང་བ་རེད།
རྒྱལ་སྤྱིའི་ཐོག་རང་ལུས་མེ་བསྲེགས་བཏང་བའི་ལོ་རྒྱུས་ཉུང་ཉུང་མིན། དེ་དག་གིས་ཅི་ཞིག་མཚོན་གྱི་ཡོད། ངས་འགྲེལ་བཤད་མི་དགོས། ང་ལས་ལྷག་གཅིག་ཁྱོད་རང་གིས་ཤེས་རྟོགས་ཡོད་ངེས། མི་རིགས་གཅིག་གི་རང་དབང་ཐོབ་ཐང་རྩོད་ལེན་བྱེད་པར་དཔུང་དང་སྟོབས་ཤུགས་ཀྱིས་མ་ཐུབ་པར་འུ་ཐུག་ཐབས་ཟད་དུ་གྱུར་བའི་གནས་སྐབས་སུ། ཐབས་ལམ་གང་ཞིག་ཀྱང་དྲན་མི་སྲིད་པ་མིན། ཉེ་ཆར་ན་གཞོན་དགུ་ཡིས་རང་ལུས་ལ་མེ་བསྒྲོན་པ་དེས་ག་རེ་མཚོན་པ་ཡིན་ཞེ་ན། རྒྱ་ནག་གཞུང་གིས་བོད་ལ་འགྲོ་བ་མིའི་ཐོབ་ཐང་རང་དབང་བདག་སྤྲོད་བྱེད་རྒྱུ་ཕར་ཟད། གྲངས་ཉུང་མི་རིགས་རྣམས་མི་ཞིག་ཡིན་པའི་འདུ་ཤེས་ཀྱང་བཞག་མེད་ན། ཇི་སྲིད་རང་དབང་དང་བདེ་སྐྱིད་མ་ཐོབ་པར་བོད་མིའི་འཐབ་རྩོད་དང་རང་སྲོག་བློས་གཏོང་བྱེད་པ་མཚམས་འཇོག་མི་བྱེད་པ་དམ་བཅས་ཏེ་རང་སྲོག་བློས་བཏང་བ་ཡིན། དེ་ལྟར་མི་བྱེད་ཀ་མེད་སུས་བྱས་པ་རེད་ཟེར་ན། རྒྱ་ནག་གུང་ཁྲན་ཚོགས་པ་ཡིན། དེའི་འགན་ཆ་ཚང་རྒྱ་གཞུང་ལ་ཡོད་པ་ལས། ྋསྐྱབས་མགོན་ཏཱ་ལའི་བླ་མ་དང་བཙན་བྱོལ་བོད་མིའི་སྒྲིག་འཛུགས་ལ་མེད། མཉམ་འབྲེལ་རྒྱལ་ཚོགས་གཙོས་ཡུ་རོབ་གྲོས་ཚོགས་བཅས་ཀྱིས་མཉམ་རུབ་ཐོག་གནས་ཚུལ་དེའི་ཐད་ཞིབ་འཇུག་མཐར་ཕྱིན་པ་ཞིག་གནང་བའི་རེ་འདུན་ཞུ་རྒྱུ་ཡིན། བོད་རྒྱའི་གནད་དོན་འཛམ་གླིང་རྒྱལ་སྤྱིའི་ཐོག་གླེང་བའི་གདེང་ཚོད་དང་སྤོབས་པ་ྋགོང་ས་མཆོག་དང་བོད་མིའི་སྒྲིག་འཛུགས་མ་གཏོགས། རྒྱ་ནག་དམར་པོ་གཞུང་དང་ཕྱི་འབྲེལ་མགྲིན་ཚབ་མ་ཅང་དབྱི་ལ་རྩ་བ་ནས་མེད། དེའི་རྒྱུ་མཚན་རྒྱ་ནག་དམར་པོའི་གཞུང་ལ་བདེན་པ་མེད་པས་ཡིན།
ད་ལོར་རྔ་བ་དང་རྟའུ་ནས་བོད་མི་ན་གཞོན་བརྒྱད་ཀྱིས་རང་ལུས་མེ་མཆོད་གཏོང་དགོས་པའི་རྒྱུ་མཚན་གཙོ་བོ་བཅུ་མཐོང་གི་ཡོད། དང་པོ། རྔ་པ་ཀིརྟི་དགོན་པས་མཚོན་གྲྭ་གཞོན་རྣམས་དགོན་པར་གནས་སྡོད་མ་ཆོག་པར་སློབ་སྦྱོང་གི་གོ་སྐབས་འཕྲོག་པ། གཉིས་པ། བོད་མི་རྣམས་ལ་སྨྲ་བརྗོད་དང་འགྲོ་འདུག་རང་དབང་མེད་པ། གསུམ་པ། ྋརྒྱལ་བ་དོན་གྱི་བདག་པོ་དང་རང་གི་རྩ་བའི་བླ་མར་སྐྱོན་བརྗོད་བྱེད་དགོས་པ། བཞི་བ། བོད་ནང་གི་ཛ་དྲག་གནས་ཚུལ་ཁྱབ་བསྒྲགས་ཀྱི་གསར་འགོད་རང་དབང་མེད་པ། ལྔ་པ། བོད་ཀྱི་རྩོམ་རིག་དཔར་སྐྲུན་རང་དབང་མེད་པ། དྲུག་པ། བོད་རང་གི་ཁྱད་ཆོས་ལྡན་པའི་གླུ་གཞས་དང་རྡུང་ལེན་འཁྲབ་སྟོན་བྱེད་མི་ཆོག་པ། བདུན་པ། རང་ས་རང་བདག་བྱེད་པའི་བདག་དབང་མེད་པ། བརྒྱད་པ། བོད་ཀྱི་ཁོར་ཡུག་སྲུང་སྐྱོབ་དང་བདག་གཅེས་བྱེད་མི་ཆོག་པ། དགུ་བ། འཛིན་བཟུང་བྱས་པའི་ཆབ་སྲིད་བཙོན་པ་ལ་ལྟོ་གོས་སྟེར་བ་དང་ཐུག་འཕྲད་བྱེད་མི་ཆོག་པ། བཅུ་བ། བོད་རིགས་ལས་བྱེད་པ་ཕལ་མོ་ཆེར་རྒྱ་གཞུང་གིས་མཐོང་ཆུང་དང་དོགས་ཟོན་ལས་ཡིད་ཆེས་མི་བྱེད་པ། མདོར་ན། རྒྱ་གཞུང་གི་ཁ་ནས་མི་རིགས་འཆམ་མཐུན་དང་མེས་རྒྱལ་གོང་བུ་གཅིག་གྱུར་བཤད་ཅིང༌། དོན་ལ་རྒྱལ་ཁབ་ཀྱི་རྩ་ཁྲིམས་རྡོག་རོལ་ཏུ་བཏང་སྟེ་གྲངས་ཉུང་མི་རིགས་ལ་མཐོང་ཆུང་དང༌། ཁྱད་གསོད། ཐུབ་ཚོད་བྱེད་པ་བཅས་ལ་བརྟེན། ལུས་སེམས་གཉིས་ཀྱི་སྡུག་བསྔལ་ལ་བཟོད་སྒོམ་མ་ཐུབ་པའི་མཐའ་མར། རང་ལུས་མེ་མཆོད་གཏོང་རྒྱུ་འདེམ་དགོས་བྱུང་ཡོད།
༢༠༡༡།༡༠།༢༠།
རྒྱ་རྫུན་དེ་ཚོས་དེ་འདྲ་མི་ཤོད་ཐབས་མེད་རེད་དེ་ལས་ལྷག་པས་ཁེགས་དཀྲི་བྱེད་ས་ཞིག་མེད་པས། དེ་ནི་སྤྱི་བཏང་པ་ཞིག་རེད་འཛམ་གླིང་མི་མང་གིས་ཀྱང་དེ་ཧ་གོ་བཞིན་ཡོད་པ་རེད།
འགུ་ལོག་དམ་ཆོས་དཔལ་བཟང་གི་ཐ་ཚིག་བསྒྲགས་ཟེར་བའི་མིང་ལ་གོ་ཡ་ཅུང་མེད་གི་འདི་འདྲའི་མིང་ཏེ་གསང་སྔགས་ལས་བྱུང་བ་ཞིག་རེད། བསྟན་མ་བཅུ་གཉིས་ལ་ཐ་ཚིག་བསྒྲགས་ཟེར་བ་སོགས་ཡོད་རེད་དེ་བཞིན་སློབ་གུ་རུ་པདྨ་འབྱུང་གནས་ཀྱིས་གནོས་སྦྱིན་དམ་ལ་བཏགས་ནས་ཐ་ཚིག་བསྒྲགས་ཟེར་བའི་དོན་ལས་མ་འདས།
བོད་མི་རིགས་ཀྱི་དཀའ་སྡུག་ལ་ཐུགས་བསམ་བཞེས་མཁན་རྒེན་དམ་ཆོས་ལགས་ཀྱི་གསུང་པ་བཞིན་དངོས་ཡོད་ཀྱི་ལམ་ནས་བདེན་པ་རབ་སྤྲོད་གནང་རྒྱུ་གལ་ཆེན་རེད། གནང་སྟངས་ཡག་པོ་གང་འདྲ་ཡིན་མིན་མི་ཤེས་མཁན་ཚོ་ཕན་ངེས་ཡིན་པས་དགེ་མཚན་འདུག དམར་གཞུང་གི་རྫུན་གཏམ་ལ་གསལ་བཤད་གནང་པ་དེ་ནས་སྐབས་སུ་བབ་པ་ཡིན་པས་མུ་མཐུད་འབྲི་རྒྱུ་གལ་ཆེན་དུ་མཐོང་།
ང་རང་ཚོས་འབོད་སྐུལ་ཞུ་དགོས་གི་རེད་ཟེར་ནས་སྟོང་གཏམ་བཤད་པ་ཙམ་མ་ཡིན་པ། ཁ་ཡོད་ལག་ཡོད་ལས་འགུལ་འདི་དང་འདི་འདྲ་སྤེལ་དགོས་གི་རེད་ཟེར་ནས་བསམ་འཆར་བཤད་པ་ཡིན་ན་ངོ་མ་དོན་ཡོད་རེད།
ཐ་ཚིག་ཙམ་གྱིས་རྒྱ་གཞུང་འདི་འདར་དུ་འཇུག་ཐུབ་བམ། མི་རིགས་འདི་བ་ཚང་དམག་ཐབས་ལ་བྱང་ཞིང་གཡོ་སྒྱུ་ལ་གོམས་ཞིང་འཇགས་པ་མ་ཟད། དེ་དག་གི་རིག་གནས་ཀྱང་གཏིང་ཟབ་མོ་ཞིག་ཡོད་པར་འདོད། དེ་འདྲ་ཡིན་དུས། རིག་གནས་དེ་དག་གིས་དམག་ཐབས་རྒྱག་སྟངས་གང་འདྲ་ཡིན་མིན་དང་། དེ་དག་གི་ཇི་ལྟར་བསྔོག་གི་ཡིན་མིན་སོགས་ཀྱི་ཐད་ལ་བཀའ་མོལ་རེ་ཡོང་ན། ཕན་ནུས་ཆེན་པོ་ཞིག་ཐོན་སྙམ། ཐ་ཚིག་དང་བསྒྲགས་གཏམ་ཁོ་ནས་འདི་བ་ཚང་གི་ཁ་གཏད་མི་ཐུབ་པ་གསལ་རྟོགས་མ་རེད་དམ།
འགུ་ལོག་གིས་བཤད་པར་རྒྱབ་སྐྱོར་ཡོད། འདི་བཞིན་མུ་འཐུད་འབྲི་དགོས་པ་རེད།
མ་གཞི་རྒྱ་གཞུང་མངོན་སུམ་དུ་སྨྱོན་གྱི་ཡོད་པ་རེད་དེ། གསལ་བཤད་བྱེད་རྒྱུ་གལ་ཅན་དུ་མཐོང་།