རྒྱ་ནག་གཞུང་གིས་བོད་རང་སྐྱོང་ལྗོངས་ལྷོ་ཁ་ས་ཁུལ་ལྷུན་རྩེ་རྫོང་ཡུལ་སྨད་ཞང་དུ་མཐའ་སྲུང་མངགས་གཏོང་ཁང་ཞིག་གསར་རྒྱག་བྱས་ཡོད་འདུག
རྒྱ་ནག་གཞུང་འབྲེལ་ཞིན་ཧྭ་དྲ་བའི་སྟེང་གནས་ཚུལ་སྤེལ་བ་ལྟར་ན། ཟླ་སྔོན་མའི་ཕྱི་ཚེས་ ༢༩ ཉིན་བོད་རང་སྐྱོང་ལྗོངས་ལྷོ་ཁ་ས་ཁུལ་ལྷུན་རྩེ་རྫོང་ཡུལ་སྨད་ཞང་དུ་མཐའ་སྲུང་མངགས་གཏོང་ཁང་གསར་རྒྱག་ལེགས་འགྲུབ་ཀྱི་མཛད་སྒོ་ཞིག་བསྡུས་ཡོད་འདུག་ལ། མཛད་སྒོའི་ཐོག་བོད་རང་སྐྱོང་ལྗོངས་མཐའ་སྲུང་ཉེན་རྟོག་རུ་ཁག་གི་དམག་དཔོན་(ཧྲའོ་ཅང་)ཨུ་ལོ་བུ་ཆུང་དང་ལྷོ་ཁ་ས་ཁུལ་མཐའ་སྲུང་ཉེན་རྟོག་འགན་འཛིན་ཝུའུ་ཆི་ལི་གཙོས། ས་གནས་དཔོན་རིགས་དང་དམག་མི་བཅས་མཉམ་ཞུགས་གནང་ཡོད་འདུག ཉིན་དེར་བོད་རང་སྐྱོང་ལྗོངས་མཐའ་སྲུང་ཉེན་རྟོག་རུ་ཁག་གི་དམག་དཔོན་ཨུ་ལོ་བུ་ཆུང་གིས་མངགས་གཏོང་ཁང་གསར་འཛུགས་ཀྱི་དམིགས་ཡུལ་ཐད། མངགས་གཏོང་ཁང་བོད་དང་རྒྱ་གར་གྱི་མཐའ་མཚམས་དང་སྤྱི་ཚོགས་བདེ་འཇགས། རྒྱ་ཁབ་ཀྱི་བདག་དབང་བཅས་སྲུང་སྐྱོབ་དང་ས་གནས་མང་ཚོགས་ཀྱི་དཔལ་འབྱོར་ལ་སྐུལ་འདེད་གཏོང་ཆེད་ཡིན་ཚུལ་སོགས་བརྗོད་ཡོད་འདུག
ཡུལ་སྨད་ཞང་ནི་ས་བབ་ཧ་ཅང་མཐོ་ལ་གནམ་གཤིས་གྲང་ས་ཞིག་ཡིན་ཞིང་། མཐོ་ཚད་རྒྱ་མཚོའི་ངོས་ལས་སྤྱི་ལེ་གྲུ་བཞི་མ་ ༣༥༠༠ ཙམ་ཡོད་པའི་བོད་དང་རྒྱ་གར་ས་མཚམས་ཀྱི་རི་གྲོང་ཞིག་ཏུ་ཆགས་ཡོད་ཅིང་། ལྷུན་རྩེ་རྫོང་དང་བར་ཐག་སྤྱི་ལེ་ ༡༩༥ ལྷག་ཡོད་འདུག ད་ལྟའི་ཆར་ལྷུན་རྩེ་རྫོང་ཡུལ་སྨད་ཞང་ཡོངས་སུ་ཁྱིམ་ཚང་ ༨ དང་མི་གྲངས་ ༢༧ ལས་མེད་སྟབས། རྒྱ་ནག་གཞུང་གིས་རྒྱལ་ཡོངས་ཀྱི་མི་གྲངས་ཆེས་ཉུང་བའི་ཞང་ཡིན་ཚུལ་རྗོད་ཀྱི་ཡོད་འདུག
གསར་འགོད་པ། དོན་གོ
རྒྱལ་ཡོངས་ཀྱི་མི་གྲངས་ཆེས་ཉུང་བའི་ཞང་ཆུང་ཆུང་འདིར་ཡང་མི་གྲངས་ཆེས་མང་བའི་རྒྱ་རིགས་ཀྱི་དཔུང་དམག་གནས་སྤོར་བ་རེད། བཅིངས་འགྲོལ་དམག་བོད་ལ་རོགས་རམ་དང་མཐའ་སྲུང་དུ་ཁ་གཡར་ནས་བོད་དུ་གཞིས་ཆགས་ཏེ་ད་ཆ་བོད་ཀྱི་དགོན་སྡེ་དང་བཅས་པར་དམ་བསྒྲགས་བྱས་ཡོད། ད་ལྟ་བདག་གིས་བཅིངས་འགྲོལ་དམག་ལ་གྲོལ་བཅིངས་དམག་ལབ་ཀྱིན་ཡོད། བོད་ཙམ་མིན་པར་ཀྲུང་གོའི་མི་དམངས་ཚང་མའི་རང་དབང་བཅིངས་ཡོད། དེ་བས་གུང་ཁྲན་ཏང་གི་ལྕགས་སྒྲོག་དངོས་ནི་རྒྱ་དམག་ཡིན།