རྒྱ་ནག་དེ་ཁྲིམས་མེད་ལུགས་མེད་ཇག་ཚོགས་ཤིག་ཏུ་མཐོང་སོང་།

ཉེ་ཆར་རྒྱ་གར་ནང་ནང་སྐྱབས་བཅོལ་དུ་འབྱོར་ཡོད་པའི་ཡང་པ་ཅན་དགོན་པའི་དགེ་འདུན་པ་ཞིག་གིས་བརྗོད་ན། ཁོང་ཅག་གི་ས་གནས་སུ་ལོ་ལྔ་དྲུག་གོང་ནས་རྒྱ་མི་མང་པོ་ཞིག་གིས་གཏེར་ཁ་སྔོན་འདོན་བྱས་ཏེ། ད་ཆར་རི་སྟོང་པ་ཆགས་ཏེ་གཏེར་སྔོག་གི་ལས་ཀ་ཕྱིར་བསྡུ་བྱེད་བཞིན་འདུག་ཟེར།

ཉེ་ཆར་བོད་ནས་གསར་དུ་འབྱོར་ཏེ་ད་ཆར་དབུས་སྣེ་ལེན་ཁང་དུ་བཞུགས་ཡོད་པའི་ཕ་ཡུལ་ནག་ཆུ་འདམ་གཞུང་ཡང་པ་ཅན་ནས་ཡིན་པ་གྲྭ་ཀརྨ་ངེས་སྟོན་རྒྱ་མཚོ་ལགས་སུ། གསར་འགོད་པས་ཁོང་གི་མི་ཚེའི་ལོ་རྒྱུས་རག་བསྡུས་དང་འབྲེལ་ཕ་ཡུལ་གྱི་གནས་སྟངས་དང་། ཐེངས་འདིར་རྒྱ་གར་ནང་ཡོང་དགོས་པའི་རྒྱུ་མཚན་བཅས་ཀྱི་སྐོར་གླེང་མོལ་བྱས་ཡོད། གྲྭ་ཀརྨ་ངེས་སྟོན་རྒྱ་མཚོ་ལགས་ནི་རང་ལོ་  ༡༣ སྟེང་འདམ་གཞུང་ཡང་པ་ཅན་དགོན་པ་རུ་གྲྭ་བ་བྱས་ཀྱང་། ཆོས་སྒོར་ཞུགས་པའི་ལོ་དེ་ནས་ཁོང་གི་རྐང་པར་ནད་གཞི་ཞིག་ཕོག་སྟེ་ཕྱིར་ཁྱིམ་དུ་ལོག་དགོས་བྱུང་ཡོད་ཀྱང་། ནང་ནས་ལོ་ ༥ ཙམ་རིང་སྨན་བཅོས་བྱས་ཀྱང་དྲག་སྐྱེད་མ་བྱུང་པར་རྐང་པ་གཉིས་ཞ་བོར་གྱུར་རྗེས་སླར་དགོན་པར་ཕྱིན་ཡོད་འདུག སྔ་ལོའི་བོད་ཟླ་ ༢ པ་ནང་དགོན་པ་ནས་ཐོན་ཏེ་ལག་པ་གཉིས་ལ་རྟེན་ནས་བོད་ནང་གི་གནས་ཆེན་ཁག་ལ་མཇལ་སྐོར་དུ་ཕྱིན་ཡོད་ཅིང་། མཐར་མ་ཕམ་གཡུ་མཚོ་དང་གངས་ཏི་སེ་བཅས་སུ་གནས་སྐོར་གྱིས་བལ་ཡུལ་སྣེ་ལེན་ཁང་དུ་འབྱོར་ཏེ། ཟླ་འདིའི་ཕྱི་ཚེས་ ༡༧ ཉིན་བཞུགས་སྒར་དབུས་སྣེ་ལེན་ཁང་དུ་འབྱོར་ཡོད་པ་རེད།

ཐོག་མར་ཁོ་རང་གི་དགོན་པའི་གནས་སྟངས་དང་། ད་ལན་རྒྱ་གར་ལ་ཡོང་དོན་སྐོར་བརྗོད་པ་ལྟར་ན། འདམ་གཞུང་ཡང་པ་ཅན་དགོན་པར་རྒྱ་གཞུང་གིས་དམ་དྲག་ཆེན་པོ་བྱས་ཏེ། དགོན་པ་དེར་གྲྭ་བ་ ༧༠ ཙམ་ཡོད་པ་ལས་ད་ཆར་གྲྭ་བ་ ༤༠ ཙམ་ལ་མ་གཏོགས་གྲྭ་བའི་ཐོབ་ཐང་སྤྲད་མེད་པ་མ་ཟད། དེ་དག་དགོན་པའི་བྱེད་སྒོ་ཁག་ཏུ་འཛུལ་ཞུགས་ཀྱི་ཐོབ་ཐང་མེད་པ་བཟོས་ཡོད་འདུག་ལ། དགོན་པར་འཆམ་འཁྲབ་རྒྱུ་དང་སྨོན་ལམ་འཚོགས་རྒྱུ་སོགས་ལ་ཡང་ཟླ་འགའི་གོང་ནས་ས་གནས་དཔོན་རིགས་ཚོར་ལྐོག་རྔན་སྤྲད་དེ་ཆོག་མཆན་ཞུ་དགོས་ཤིང་། རྫོང་དང་ཞིང་ཆེན་རིམ་པའི་མགོ་འཁྲིད་ཡོངས་རྫོགས་རྒྱ་རིགས་དང་། ཁོང་ཅག་གི་འོག་ཏུ་ལས་ཀ་བྱེད་མཁན་གྱི་ལས་བྱེད་དཀྱུས་མ་དག་བོད་རིགས་ཡིན་སྟབས། བོད་རིགས་ལས་བྱེད་བེད་སྤྱོད་ཀྱིས་གཞུང་གི་སྲིད་ཇུས་ལག་བསྟར་དང་དགོན་སྡེ་ཁག་ཏུ་དམ་དྲག་བྱེད་པར་བསྐུལ་ཏེ། བོད་པས་བོད་པ་གཏོར་བརླག་གཏོང་དུ་འཇུག་གིན་ཡོད་འདུག

ཁོང་ལོ་བཅུ་གྲངས་ཤིག་ཏུ་དགོན་པར་བསྡད་རིང་གྲྭ་བའི་ཐོབ་ཐང་ལག་འཁྱེར་མ་སྤྲད་པའི་ཁར་དགོན་པའི་ནང་བསྡད་པ་དེ་ཡང་ཁྲིམས་འགལ་ལྟ་བུ་ཆགས་ཤིང་། ལོ་སྔོན་མར་དགོན་པ་ནས་སྡོད་མི་ཆོག་པར་ནང་དུ་ལོག་དགོས་པའི་བཙན་བཀའ་བཏང་ཡོད་པ་མ་ཟད། ཁོང་དགོན་པ་ནས་ཐོན་ཏེ་ཕྱོགས་ཡར་མར་ལ་གནས་སྐོར་དུ་འགྲོ་སྐབས་ཀྱང་། རྒྱ་གཞུང་གི་གྲྭ་བའི་ཐོབ་ཐང་ལག་འཁྱེར་མེད་སྟབས། ཉེན་རྟོག་པ་ཚོས་སུན་གཙེར་བཟོ་བ་དང་། གྲྭ་ཆས་གྱོན་མི་ཆོག་པ་སོགས་ཀྱི་དཀའ་ངལ་མང་པོ་འཕྲད་ཡོད་ཀྱང་། ཁོང་གིས་གཅིག་ནས་རང་ཉིད་དབང་བོ་སྐྱོན་ཅན་ཡིན་པས་ལས་ཀ་བྱ་མི་ཐུབ་པ་དང་། གཉིས་ནས་བདག་པོ་མེད་པའི་དབུལ་བོ་ཡིན་པས་གྲྭ་ཆས་གྱོན་པ་ནི་རང་ཉིད་ཀྱི་ལྟོ་གོས་ཆེད་ཡིན་སྐོར་བཤད་དེ་ཕྱིན་ཡོད་འདུག གསར་འགོད་པས་ཁོང་ལ་རྒྱ་ནག་གཞུང་གིས་དབུལ་བོ་དང་དབང་བོ་སྐྱོན་ཅན་ཚོར་སྐྱོབ་གསོ་སྤྱོད་ཀྱི་ཡོད་མེད་དྲིས་པར་ཁོང་གིས། “ ང་ལ་རྒྱ་གཞུང་གིས་སྐྱོབ་གསོ་ཡིན་ཟེར་ནས་ལོ་གཅིག་རང་ལ། ཤ་རྒྱ་མ་གཉིས་དང་། མར་རྒྱ་མ་གཉིས། རྩམ་པ་རས་ཁུག་གང་སྤྲད་བྱུང་། དེ་མ་གཏོགས་སྐྱོབ་གསོ་དང་ལྟ་རྟོག་གང་ཡང་རག་མྱོང་མེད་” ཅེས་བརྗོད་བྱུང་།  

ཁོང་བོད་ཀྱི་ས་ཁུལ་མང་པོའི་ནང་གནས་སྐོར་དུ་ཕྱིན་པའི་མཐོ་ཐོས་གང་འདྲ་བྱུང་མྱོང་སྐོར་དྲིས་པའི་ལན་དུ། བོད་ཅེས་པ་འདི་བརླག་འགྲོ་བཞིན་འདུག་ཟེར་ལ། དེ་ཇི་ལྟར་བརླག་བཞིན་པའི་སྐོར་ནས། ཁོང་སྡོད་སའི་ས་གནས་ནང་ ༢༠༠༥ ལོ་ཙམ་ནས་གཏེར་ཁ་རྔོག་འདོན་བྱས་ཤིང་ད་ཆར་རི་སྟོང་པ་ཆགས་ཏེ་ལས་གཞི་མཚམས་འཇོག་བཞིན་ཡོད་པ་དང་། འདས་པའི་ལོ་ལྔ་དྲུག་རིང་ཉིན་རེར་གཏེར་རྫས་རླངས་འཁོར་བརྒྱ་ཕྲག་མང་པོ་རྒྱ་ཡུལ་དུ་དབོར་འདྲེན་བྱེད་ཀྱི་ཡོད་ཀྱང་། ཁ་ནས་ནམ་རྒྱུན་བོད་ལ་རོགས་སྐྱོར་བྱེད་ཀྱི་ཡོད་ཟེར་ནས་བཤད་ཀྱི་ཡོད་ཚུལ་སོགས་བརྗོད་བྱུང་།

ཡང་ཁོང་གིས་གནས་སྐོར་དུ་ཕྱིན་པའི་མཐོང་ཐོས་སྐོར་ལ་ཁོང་སྟོད་མངའ་རིའི་ཕྱོགས་སུ་ཕྱིན་སྐབས། གྲྭ་བ་ཚོའི་ལུས་ལ་གྲྭ་ཆས་གྱོན་པ་ཙམ་ལས་གྲྭ་བའི་འདུལ་ཁྲིམས་སྲུང་མཁན་མཐོང་དཀོན་པ་དང་། རྒྱ་གཞུང་གིས་བོད་ཀྱི་ནང་བསྟན་གཙོ་བོར་གྱུར་པའི་རིག་གནས་སློབ་གསོ་རྩ་བརླག་བཟོ་བཞིན་ཡོད་པ་དང་། སྤྱི་ཚོགས་ཀྱི་ཐད་ནས་ཀྱང་བོད་ཀྱི་ས་གནས་གང་དུ་ཕྱིན་ཡང་བོད་པ་ལས་རྒྱ་མི་མང་པ་དང་། ས་ཁུལ་ཚང་མ་རྒྱའི་གྲོང་ཁྱེར་དུ་སྒྱུར་བཞིན་ཡོད་ཚུལ་རྗོད་བཞིན་ཁོ་དང་མཉམ་དུ་སྣེ་ལེན་ཁང་ལ་འབྱོར་མཁན་གཞོན་སྐྱེས་འགའ་བསྟན་ཏེ། བྱིས་པ་འདི་དག་ཕལ་ཆེ་བས་རྒྱ་ཡིག་རྒྱ་སྐད་ལས་བོད་སྐད་བོད་ཡིག་ཤེས་ཀྱི་ཡོད་པ་མ་རེད་ཅེས་བརྗོད་བྱུང་།  

མཐར་ཁོང་གིས་རྒྱ་ནག་གཞུང་གི་དྲིལ་བསྒྲགས་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ཅེས་བརྗོད་ཀྱི་ཡོད་ཀྱང་། དོན་དངོས་ཐོག་གྲངས་ཉུང་མི་རིགས་སྤྱི་དང་ལྷག་པར་དུ་བོད་རིགས་ཐོག་འཛིན་པའི་སྲིད་ཇུས་རྒྱ་ནག་གཞུང་གི་རྩ་ཁྲིམས་ཇི་བཞིན་ལག་བསྟར་བྱེད་ཀྱི་མེད་པའི་ཁར། བོད་ཀྱི་ས་ཁུལ་རེར་སྲིད་ཇུས་རེ་ལག་བསྟར་བྱེད་ཀྱི་ཡོད་པ་དང་། ཁོ་རང་ཉིད་ལ་མཚོན་ན་ས་གནས་དང་ཡང་པ་ཅན་དགོན་བཅས་སུ་ལག་བསྟར་བྱེད་བཞིན་པའི་སྲིད་ཇུས་དེ་འདྲ་ཞིག་རྒྱ་ནག་གི་རྩ་ཁྲིམས་ནང་མེད་པ་ཤེས་ཀྱི་ཡོད་ཀྱང་། ཞུ་གཏུག་བྱེད་ས་དང་སྐད་ཆ་བཤད་སའི་གོ་སྐབས་མེད་པས། རྒྱ་ནག་ནི་རང་སྣང་གང་དྲན་དང་ཁྲིམས་མེད་ལུགས་མེད་ཀྱི་ཇག་ཚོགས་ལྟ་བུ་ཞིག་ལ་མཐོང་གི་ཡོད་ཅེས་སོགས་བརྗོད་བྱུང་།

གསར་འགོད་པ། བནྡེ་སྐྱབས།

༼ བོད་ཀྱི་དུས་བབ་ཚགས་པར་ལས་འདིར་བཀོད ༽