བོད་ནང་གི་རྩོམ་པ་པོ་ལྔ་ལ་མཚོ་སྔོན་རྩོམ་རིག་བྱ་དགའ་དང་སྐབས་ལྔ་བའི་མཚོ་སྔོན་ཞིང་ཆེན་ན་གཞོན་རྩོམ་རིག་བྱ་དགའ་ཐོབ་ཡོད་འདུག
ཉེ་ཆར་མཚོ་སྔོན་ཞིང་ཆེན་གྱི་ཆེས་ཐོག་མའི་རྩོམ་རིག་བྱ་དགའ་དང་སྐབས་ལྔ་བའི་མཚོ་སྔོན་ན་གཞོན་རྩོམ་རིག་བྱ་དགའ་སྤྲོད་པའི་ཚོགས་འདུ་ཟི་ལིང་དུ་འཚོགས་ཏེ། རྩོམ་པ་པོ་རྡོ་རྗེ་ཚེ་བརྟན་གྱིས་རྒྱ་ཡིག་གི་ལམ་ནས་བརྩམས་པའི་སྒྲུང་རིང་༼བྱང་ཆུབ་རྨི་ལམ༽ དང་རྩོམ་པ་པོ་འཇམས་དབྱངས་ཚེ་རིང་གིས་རྒྱ་ཡིག་གི་ལམ་ནས་བརྩམས་པའི་སྒྲུང་རིང་༼ཁམས་པའི་གོམས་སྲོལ༽ དང་། རྩོམ་པ་པོ་ཚེ་བརྟན་གྱིས་བརྩམས་པའི་རྒྱ་ཡིག་གི་སྒྲུང་ཐུང་ཕྱོགས་བསྒྲིགས་དེབ་༼བྱང་ཆུབ༽ ཞེས་པ། སྙན་ངག་པ་འཇུ་སྐལ་བཟང་གིས་བརྩམས་པའི་སྙན་དེབ་༼གངས་གྲོང་གི་རླུང་བུ༽ བཅས་ལ་མཚོ་སྔོན་རྩོམ་རིག་བྱ་དགའ་ཐོབ་ཡོད་པ་དང་། ན་གཞོན་སྙན་ངག་པ་ཁྲི་སེམས་དཔའི་སྙན་དེབ་༼དིང་གླིང་ཁེར་འབུད༽ཅེས་པར་མཚོ་སྔོན་ན་གཞོན་རྩོམ་པ་པོའི་རྩོམ་རིག་བྱ་དགའ་བཅས་ཐོབ་ཡོད་འདུག
ཚོགས་འདུའི་སྟེང་མཚོ་སྔོན་ཞིང་ཆེན་དམར་ཤོག་ཚོགས་པའི་རྒྱུན་ལས་དང་དྲིལ་བསྒྲགས་སྡེ་ཚན་གྱི་འགན་འཛིན། རྒྱ་རིགས་སྙན་ངག་པ་གྲགས་ཅན་ཅི་ཏེ་མཱ་ཅཱས་བྱ་དགའ་ཐོབ་པའི་བོད་རྒྱ་གཉིས་ཀྱི་རྩོམ་པ་པོ་རྣམས་ལ། མཚོ་སྔོན་གྱི་རྩོམ་པ་པོ་རྣམ་པས་རང་ས་ལ་རྐང་ཚུགས་པར་བྱས་ཏེ་རིག་གནས་རང་རྟོགས་དང་ཡིད་སྟོན་འཕེར་བའི་འཕེལ་རྒྱས་ཁྲོད། མི་དམངས་བརྗོད་སྙིང་ཡིན་པའི་གསར་རྩོམ་གྱི་རྒྱུན་དེས་དུས་རབས་དང་སྤྱི་ཚོགས་ལ་མ་བརྣག་པའི་བརྩམས་ཆོས་བགྲངས་ལས་འདས་པ་ཞིག་བརྩམ་སྟེ། མཚོ་སྔོན་གྱི་རྩོམ་རིག་གྲ་རྒྱས་སུ་གཏོང་དགོས་ཚུལ་དང་། མཚོ་སྔོན་རྩོམ་རིག་གིས་ཀྲུང་གོའི་དེང་རབས་རྩོམ་རིག་གི་ས་མིག་ཁྲོད་གོ་གནས་གལ་ཆེན་ཞིག་འཛིན་པར་འབད་འབུངས་བྱ་དགོས་པའི་གཏམ་བཤད་གནང་འདུག
མཚོ་སྔོན་རྩོམ་རིག་བྱ་དགའ་ནི། མཚོ་སྔོན་ཞིང་ཆེན་གྱི་རྩོམ་རིག་གསར་རྩོམ་ཆེད་ལས་རང་བཞིན་གྱི་ཆེས་མཐོའི་བྱ་དགའ་ཞིག་ཡིན་ཞིང་། དེ་ནི་ཞིང་ཆེན་དམར་ཤོག་ཚོགས་པའི་དྲིལ་བསྒྲགས་སྡེ་ཚན་གྱིས་མཆོག་མཆན་གནང་བའི་ཞིང་ཆེན་རིམ་པའི་བྱ་དགའ་ཞིག་ཡིན་འདུག་ལ། ན་གཞོན་རྩོམ་རིག་བྱ་དགའ་ནི། མཚོ་སྔོན་ཞིང་ཆེན་གྱིས་ན་གཞོན་རྩོམ་པ་པོ་དག་ལ་སྐུལ་ལྕག་དང་སྔོག་འདོན་ལ་ཆེད་དུ་དམིགས་ཏེ་བཙུགས་པ་ཞིག་ཡིན་པ་དང་། ད་ལྟའི་ཆར་བྱ་དགའ་འདི་གཉིས་ཞིང་ཆེན་རྩོམ་པ་པོ་མཐུན་ཚོགས་ཀྱིས་གཙོ་གཉེར་བྱེད་ཀྱིན་ཡོད་འདུག
གསར་འགོད་པ། དོན་གོ
ཤག་སྒང་པ་ཀྱེ། ཁྱོད་ཀྱིས་ཐོབ་མཁན་ཡོད་ཚད་ལ་བཀྲིས་བདེ་ལེགས་ཀྱིས་འཚམས་འདྲི་ཞུ་དགོས་པ་མཐོང་གི་ཡོད་དམ། ཁྱོད་ཀྱིས་ཡག་ཉེས་གང་ལའང་མ་བལྟས་པར་འཚམས་འདྲི་དེ་གར་ཞུས་དང་ཇི་ཞུས་ཡིན་པ་བསམ་གྱི་ཡོད་དམ།
ཀྱེ་ཀྱེ། རིགས་ཀྱི་སྤུན་གྲོགས་ལགས། དེ་འདྲ་བསམ་ཨེ་ཉེན་ནམ། ཨེ་རུང་ངམ་་་་
ཨ་ཇོ་ཆབ་བྲག་གི་གསུངས་ལ་གཟིགས་ཙམ་བྱོས།
བཀྲིས་བདེ་ལེགས་ཞུ།
ཉེ་ལམ་བོད་ནང་གི་སྒྱུ་རྩལ་རྩོམ་རིགས་ལ་གཏོགས་པའི་གཟེངས་རྟགས་ཐོབ་དགོས་ངེས་ཀྱི་བརྩམས་ཆོས་འགའ་ནི།
༡༽སྐུ་ཞབས་ལྗང་བུའི་སྙན་དངགས་ཕྱོགས་བསྒྲིགས། གཟི་མིག་དགུ་བ།
༣)ནགས་ཚང་ནེའུ་བློས་བརྩམས་པའི་དངོས་བྲིས་སྒྲུང་རིང་། ནགས་ཚང་ཞི་ལིའི་སྐྱིད་སྡུག
༣༽རྩོམ་པ་པོ་ཚེ་རིང་དོན་གྲུབ་ལགས་ཀྱས་བརྩམས་པའི་སྒྲུང་རིང། རླུང་དམར་འུར་འུར།
གཞན་ཡང་ལྷ་བྱམས་རྒྱལ་དང་པད་མ་ཚེ་བརྟན་གཉིས་ཀྱི་སྒྲུང་ཐུང་ཕྱོགས་བསྒྲིགས་བཅས་ཡིན་པར་འདོད།
ཡིན་ན་ཡང་རྒྱ་ཡིག་གི་སྒྲུང་གཏམ་ལས་བོད་ཡིག་གི་སྒྲུང་གཏམ་ལ་རིན་ཐང་མེད་འགྲོ་གི་ཡོད་པ་འདྲ། དེ་ནི་ཀློག་པ་པོའི་གནད་དོན་གྱིས་ཡིན་ནམ། གོང་རིམ་གྱི་གནད་དོན་ཁོ་ན་ཞིག་ཡིན་ནམ། གང་ལྟར་རྩོམ་པ་པོ་ཁོང་ཅག་ཚང་མ་བསྔགས་སུ་འོས་པ་ཞིག་ཅི་ལ་མིན།