ཕྱི་ཚེས་ ༤ ཉིན་ཨོ་བྷ་མས་ཟླ་སྔོན་མའི་ཚེས་ ༢༦ ཉིན་པཱ་ཀི་སི་ཐན་དང་ཨབ་གྷན་ས་མཚམས་ནས། ཎཱ་ཊོ་ (Nato) མཁའ་དམག་གིས་པཱ་ཀི་སི་ཐན་མཐའ་མཚམས་དམག་མིར་དྲག་རྒོལ་གྱིས་དམག་མི་ ༢༤ རྐྱེན་ལམ་དུ་བཏང་པའི་དོན་རྐྱེན་ལ་འགྱོད་པ་ཆེན་པོ་ཡོད་པ་དང་། པཱ་ཀི་སི་ཐན་གཞུང་དང་མི་མང་ལ་སེམས་གསོ་བྱེད་ཀྱི་ཡོད་སྐོར་བསྒྲགས་ཡོད་པ་མ་ཟད། དེ་རིང་ཕྱི་ཚེས་ ༥ ཉིན་གྱི་ཞོགས་པར་ཨོ་བྷ་མས་ཐད་ཀར་པཱ་ཀི་སི་ཐན་གྱི་སྲིད་འཛིན་ཛར་ཌ་རེ་ (Asif Ali Zardari) ལ་ཁ་པར་བཏང་སྟེ། གནད་དོན་དེར་སྒེར་ངོས་ནས་ཀྱང་སེམས་གསོ་བྱས་ཡོད་འདུག་ལ། ཕྱི་ཚེས་ ༣ ཉིན་ཨ་རིའི་ཕྱི་འབྲེལ་དྲུང་ཆེ་ཧེ་ལཱ་རེ་ཡིས་ཀྱང་པཱ་ཀི་སི་ཐན་གྱི་སྲིད་བློན་ལ་ཁ་པར་བརྒྱུད་གོང་གི་གནད་དོན་དེའི་ཐད་སེམས་གསོ་དང་འགྱོད་བཤགས་བྱས་ཡོད་འདུག
ཆབ་སྲིད་དཔྱད་བརྗོད་པ་ཚོས་ད་ལྟ་ཨ་རིས་པཱ་ཀི་སི་ཐན་ལ་སེམས་གསོ་དང་འགྱོད་བཤགས་བྱས་པ་དེ་ནི། ༢༠༡༤ ལོར་ཨབ་གྷན་ནང་གི་རྒྱལ་སྤྱིའི་དམག་དཔུང་ཕྱིར་འཐེན་དང་འབྲེལ་པའི་རྒྱལ་སྤྱིའི་ཚོགས་ཆེན་ཞིག་འཇར་མན་ནང་འཚོགས་ལ་ཉེ་བའི་སྐབས་དང་བསྟུན་ནས།ཨ་རིས་རྒྱབ་རོགས་འཚོལ་གྱི་ཡོད་པར་བརྗོད་འདུག
གསར་འགོད་པ། བནྡེ་སྐྱབས།
